Phehella Khotso ea Bomolimo Bophelong ba Lelapa
“Nehang Jehova, Lōna malapa a batho, nehang Jehova khanya le matla.”—PESALEME EA 96:7, NW.
1. Jehova o ile a qalisa bophelo ba lelapa ba mofuta ofe?
JEHOVA o ile a qalisa bophelo ba lelapa bo nang le khotso le bo thabileng ha a ne a kopanya monna oa pele le mosali oa pele lenyalong. Ha e le hantle, Adama o ile a thaba hoo a ileng a hlalosa thabo ea hae ka mantsoe a thothokiso ea pele-pele e tlalehiloeng: “Joale enoa ke lesapo la masapo a ka, ke nama ea nama ea ka; o tla bitsoa mosali; hobane o ntšitsoe ho monna.”—Genese 2:23.
2. Molimo o ne a rerile eng bakeng sa lenyalo ho phaella tabeng ea ho tlisetsa bana ba hae ba batho thabo?
2 Ha Molimo a ne a theha lenyalo le tokisetso ea lelapa, o ne a sa rera feela hore a thabise bana ba hae ba batho. O ne a batla hore ba etse thato ea hae. Molimo o ile a bolella batho ba babeli ba pele: “Ngatafalang, le ate, le tlale lefatšeng, le rene holim’a lona ’me le buse lihlapi tsa leoatle, le tse rurang tsa maholimo, le tsohle tse phelang, tse hahabang lefatšeng.” (Genese 1:28) Ka sebele ke kabelo e putsang. Adama, Eva le bana bao ba neng ba tla ba le bona ba ka be ba ile ba thaba hakaakang hoja banyalani ba pele ka kutlo ba ne ba ile ba etsa thato ea Jehova!
3. Ho hlokahala eng e le hore malapa a ka phela ka boinehelo ba bomolimo?
3 Leha ho le joalo, esita le kajeno, malapa e ba a thabileng ka ho fetisisa ha a sebetsa hammoho ho etsa thato ea Molimo. ’Me malapa a joalo a mamelang a na le litebello tse hlollang hakaakang! Moapostola Pauluse o ile a ngola: “Boinehelo ba bomolimo bo molemo bakeng sa lintho tsohle, kaha bo e-na le tšepiso ea bophelo ba hona joale le ea bo tlang ho tla.” (1 Timothea 4:8) Malapa a phelang ka boinehelo ba ’nete ba bomolimo a latela melao-motheo ea Lentsoe la Jehova ’me a etsa thato ea hae. A phehella khotso ea bomolimo ’me ka tsela eo a fumana thabo ea “bophelo ba hona joale.”
Bophelo ba Lelapa bo Kotsing
4, 5. Ke hobane’ng ha ho ka boleloa hore kajeno bophelo ba lelapa bo kotsing lefatšeng ka bophara?
4 Ha re sheba litaba ka tsela ea sebele, ha re fumane khotso le thabo lelapeng le leng le le leng. Ha e qotsa tlaleho ea patlisiso e entsoeng ke mokhatlo oa palo ea baahi o bitsoang Population Council, The New York Times e re: “Linaheng tse ruileng le tse futsanehileng ka ho tšoana, sebōpeho sa bophelo ba lelapa se fetoha ka ho feletseng.” Ho tlalehoa hore mohlophisi oa patlisiso ena o itse: “Khopolo ea hore lelapa ke ntho e le ’ngoe e tsitsitseng le e momahaneng eo ho eona ntate a hlokomelang litlhoko tsa lichelete le ’mè a hlokomelang litlhoko tsa maikutlo, ke tšōmo. ’Nete ke hore maemo a kang a bo-’mè ba sa nyaloang, ho phahama ha palo ea manyalo a qhaloang ka tlhalo, [le] malapa a manyenyane . . . a teng lefatšeng ka bophara.” Ka lebaka la liphetoho tse joalo, malapa a limilione a hloka botsitso, khotso le thabo, ’me a mangata aa qhalana. Spain palo ea manyalo a qhaloang ka tlhalo e nyolohetse ho lenyalo le le leng ho a robeli mathoasong a bo-1990—keketseho e khōlō ho tloha lenyalong le le leng ho a 100 lilemong tse 25 feela pejana. Ho tlalehoa hore Engelane ke e ’ngoe ea linaha tseo ho tsona palo ea manyalo a qhaloang ka tlhalo e phahameng ka ho fetisisa Europe—manyalo a 4 ho a mang le a mang a 10 aa hlōleha. Naha eo e boetse e bile le ho phahama ho hoholo ha palo ea malapa a motsoali a le mong.
5 Ho bonahala hore batho ba bang ba potlakela ho hlalana. Ba bangata ba khobokana “Tempelaneng ea ho Khaola Maqhama” haufi le Tokyo, Japane. Tempele ena ea Shinto e amohela likōpo tsa tlhalo le tsa ho felisa likamano tse ling tse sa batleheng. Morapeli ka mong o ngola kōpo ea hae botong e bobebe ea lehong, o e fanyeha sebakeng se koahetsoeng sa tempelana, ebe o rapella karabo. Koranta e ’ngoe ea Tokyo e bolela hore ha tempelana eo e ne e thehoa hoo e ka bang lilemong tse lekholo tse fetileng, “basali ba bahoebi ba ruileng ba sebaka seo ba ne ba ngola lithapelo ba kōpa hore banna ba bona ba lahle linyatsi tsa bona ’me ba khutlele ho bona.” Leha ho le joalo, kajeno boholo ba liqelo ke tse batlang tlhalo, e seng poelano. Ha ho pelaelo hore bophelo ba lelapa bo kotsing ho pota lefatše. Na see se lokela ho makatsa Bakreste? Che, hobane Bibele e re bula mahlo ka ho feletseng mabapi le maqakabetsi a lelapa a kajeno.
Ke Hobane’ng ha Lelapa le le Maqakabetsing?
6. Johanne oa Pele 5:19 e na le kamano efe le maqakabetsi a lelapa a kajeno?
6 Lebaka le leng la maqakabetsi a lelapa a kajeno ke lena: “Lefatše lohle le rapaletse matleng a ea khopo.” (1 Johanne 5:19) Re ka lebella eng ho ea khopo, Satane Diabolose? Ke raleshano ea khopo, ea itšoereng hampe. (Johanne 8:44) Ha ho makatse hore ebe lefatše la hae le qoetse thetsong le boitšoarong bo bobe, tse senyang bophelo ba lelapa hakana! Ka ntle ho mokhatlo o hlophisitsoeng oa Molimo, tšusumetso ea bosatane e sokela tokisetso ea Jehova ea lenyalo le ho felisa bophelo ba lelapa bo nang le khotso.
7. Malapa a ka angoa joang ke litšobotsi tseo batho ba bangata ba li bonahatsang matsatsing aa a ho qetela?
7 Lebaka le leng la mathata a lelapa ao hona joale a hlasetseng moloko oa batho le bontšitsoe ho 2 Timothea 3:1-5. Mantsoe a Pauluse a boprofeta a tlalehiloeng moo a bontša hore re phela “matsatsing a ho qetela.” Malapa a ke ke a ba le khotso le ho thaba haeba litho tsa ’ona e le “baithati, ba ratang chelete, ba ikhopolang ho tlōla, ba ikhohomosang, banyefoli, ba sa mameleng batsoali, ba se nang teboho, ba sa tšepahaleng ka ho sa sekisetseng, ba se nang boikutlo bo mofuthu ba tlhaho, ba sa bulehelang tumellano leha e le efe, baetselletsi, ba hlokang boitšoaro, ba bohale bo tšosang, ba hlokang lerato la se molemo, baeki, ba hlooho li thata, ba hohomohileng ke boikakaso, ba ratang menyaka ho e-na le ba ratang Molimo, ba nang le ponahalo ea boinehelo ba bomolimo empa ba ipaka ba se na ’nete matleng a bona.” Lelapa le ke ke la thaba ka ho feletseng haeba esita le setho se le seng sa lona se haelloa ke boikutlo bo mofuthu ba tlhaho kapa e le se sa tšepahaleng ka ho sa sekisetseng. Bophelo ba lelapa e ka ba bo nang le khotso joang haeba e mong ka lapeng e le ea bohale bo tšosang ’me a sa bulehela tumellano leha e le efe? Ho hobe le ho feta, ho ka ba le khotso le thabo joang ha litho tsa lelapa e le tse ratang menyaka ho e-na le ho rata Molimo? Tsena ke litšobotsi tsa batho ba lefatše lena le busoang ke Satane. Ha ho makatse hore ebe ho thata ho finyella thabo ea lelapa matsatsing ana a ho qetela!
8, 9. Boitšoaro ba bana bo ka ba le phello efe thabong ea lelapa?
8 Lebaka le leng leo ka lona malapa a mangata a hlokang khotso le thabo ke boitšoaro bo bobe ba bana. Ha Pauluse a ne a bolela esale pele ka maemo a matsatsing a ho qetela, o ile a profeta hore bana ba bangata e ne e tla ba ba sa mameleng batsoali. Haeba u motho e mocha, na boitšoaro ba hao bo thusa ho etsa hore lelapa leno e be le nang le khotso le le thabileng?
9 Bana ba bang hase mohlala boitšoarong. Ka mohlala, moshanyana e mong o ile a ngolla ntat’ae lengolo lena le sa thabiseng: “Haeba u sa tsamaee le ’na ho ea Alexandria nke ke ka u ngolla lengolo, kapa ka u buisa, kapa ka re u tsamaee hantle, ’me haeba u ea Alexandria nke ke ka u tšoara ka letsoho kapa ka u lumelisa le ka mohla. Sena ke se tla etsahala haeba u sa tsamaee le ’na . . . Empa nthomelle [harepa], kea u kōpa. Haeba u sa etse joalo, nke ke ka ja ’me nke ke ka noa. Ke tiile, ha ke soasoe!” Na hoo ho utloahala ho tšoana le boemo ba kajeno? Ha e le hantle, lengolo leo le tsoang ho moshanyana le eang ho ntate oa hae le ile la ngoloa Egepeta ea boholo-holo lilemong tse fetang 2000 tse fetileng.
10. Ba banyenyane ba ka thusa malapa abo bona joang ho phehella khotso ea bomolimo?
10 Boikutlo ba mocha eo oa Moegepeta ha boa ka ba tlatsetsa khotsong ea lelapa. Ka sebele matsatsing ana a ho qetela ho etsahala lintho tse tebileng le ho feta ka malapeng. Leha ho le joalo, lōna bacha le ka thusa malapa abo lōna ho phehella khotso ea bomolimo. Joang? Ka ho mamela keletso ena ea Bibele: “Lōna bana, le mamele batsoali ba lōna nthong e ’ngoe le e ’ngoe, etsoe sena ke se khahlisang haholo Moreneng.”—Bakolose 3:20.
11. Batsoali ba ka thusa bana ba bona joang ho ba bahlanka ba Jehova ba tšepahalang?
11 Ho thoe’ng ka lōna batsoali? Ka lerato thusang bana ba lōna hore e be bahlanka ba tšepahalang ba Jehova. Liproverbia 22:6 e re: “Ruta mohlankana tsela eo a tšoanetseng ho e tsamaea; le mohla a tsofalang, a ke ke a e kheloha.” Ka thuto e ntle ea Mangolo le ka mehlala e metle ea batsoali, bashanyana le banana ba bangata ha ba khelohe tseleng e nepahetseng ha ba hōla. Empa ho hongata ho itšetlehile ka boleng ba koetliso ea Bibele le tekanyo ea eona le ka pelo ea mocha.
12. Ke hobane’ng ha lelapa la Mokreste le lokela ho ba le khotso?
12 Haeba litho tsohle tsa malapa a rōna li leka ho etsa thato ea Jehova, re lokela hore ebe re thabela khotso ea bomolimo. Lelapa la Bokreste le lokela ho tlala ‘metsoalle ea khotso.’ Luka 10:1-6 e bontša hore Jesu o ne a hopotse ka batho ba joalo ha a roma barutuoa ba 70 e le basebeletsi ’me a re ho bona: “Kae kapa kae moo le kenang ka tlung le re pele, ‘E se eka ntlo ena e ka ba le khotso.’ ’Me haeba motsoalle oa khotso a le teng, khotso ea lōna e tla lula holim’a hae.” Ha bahlanka ba Jehova ka khotso ba e-ea ka ntlo le ntlo ka “litaba tse molemo tsa khotso,” ba batla metsoalle ea khotso. (Liketso 10:34-36; Baefese 2:13-18) Ka sebele, lelapa la Mokreste le entsoeng ka metsoalle ea khotso le lokela ho ba le khotso.
13, 14. (a) Naomi o ile a lakaletsa Ruthe le Orpa eng? (b) Lehae la Mokreste e lokela ho ba nģalo ea phomolo ea mofuta ofe?
13 Lehae e lokela ho ba sebaka sa khotso le phomolo. Mohlolohali ea hōlileng Naomi o ne a tšepile hore Molimo o ne a tla neha lingoetsi tsa hae tse nyenyane tsa bahlolohali, Ruthe le Orpa, phomolo le matšeliso tse tlisoang ke ho ba le monna ea molemo le lelapa le molemo. Naomi o ile a re: “Jehova a nee e mong le e mong oa lōna khatholoho tlung ea monna oa hae.” (Ruthe 1:9) Mabapi le takatso ea Naomi, setsebi se seng se ile sa ngola hore malapeng a joalo, Ruthe le Orpa “ba ne ba tla lokoloha pherekanong le matšoenyehong. Ba ne ba tla ba le phomolo. E ne e tla ba boemo boo ba neng ba ka lula ho bona, le boo ho bona maikutlo a bona a bonolo le litakatso tse hlomphehang ka ho fetisisa li neng li tla khotsofatsoa le ho khutsisoa. Khatiso e khethehileng ea Seheberu . . . e bontšitsoe hantle ke sebōpeho sa lipolelo tse amanang le tseo ho [Esaia 32:17, 18].”
14 Ka kōpo hlokomela tšupiso ena ea Esaia 32:17, 18. Mono rea bala: “Moputso oa ho loka e tla ba khotso, tholoana ea ho loka e be phomolo le boiketlo ka ho sa eeng kae. Sechaba sa ka se tla aha moahong oa khotso, le matlung a tšepehang, nģalong tsa boiketlo le phomolo.” Lehae la Mokreste e lokela ho ba nģalo ea phomolo ea ho loka, khutso, tšireletseho le khotso ea bomolimo. Empa ho thoe’ng haeba ho hlaha liteko, liphapang kapa mathata a mang? Joale ho hlokahala ka ho khethehileng hore re tsebe lekunutu la thabo ea lelapa.
Melao-motheo e Mene ea Bohlokoa
15. U ne u ka hlalosa lekunutu la thabo ea lelapa joang?
15 Lelapa le leng le le leng lefatšeng le na le lebitso ka lebaka la Jehova Molimo, ’Mōpi oa malapa. (Baefese 3:14, 15) Ka hona ba batlang thabo ea lelapa ba lokela ho batla tataiso ea hae le ho mo rorisa, joalokaha mopesaleme a ile a etsa: “Nehang Jehova, Lōna malapa a batho, nehang Jehova khanya le matla.” (Pesaleme ea 96:7) Lekunutu la thabo ea lelapa le fumanoa ka Lentsoeng la Molimo, Bibele, le ho sebeliseng melao-motheo ea lona. Lelapa le sebelisang melao-motheo ena le tla thaba ’me le tla thabela khotso ea bomolimo. Ka lebaka leo, a re shebeng melao-motheo e mene ho ena ea bohlokoa.
16. Boitšoaro bo lokela ho phetha karolo efe bophelong ba lelapa?
16 O mong oa melao-motheo ena o likoloha ho sena: Boitšoaro ke ba bohlokoa bakeng sa khotso ea bomolimo bophelong ba lelapa. Morena Solomone o ile a re: “Motho ea hlōloang ke ho busa pelo ea hae, ke motse o kenoeng ke lira, o se nang lerako.” (Liproverbia 25:28) Ho laola maikutlo a rōna—ho ba le boitšoaro—ke habohlokoa haeba re lakatsa ho ba le lelapa le nang le khotso le le thabileng. Le hoja re sa phethahala, ho hlokahala hore re be le boitšoaro boo e leng tholoana ea moea o halalelang oa Molimo. (Baroma 7:21, 22; Bagalata 5:22, 23) Moea ona o tla hlahisa boitšoaro ka ho rōna haeba re rapella tšoaneleho ena, re sebelisa keletso ea Bibele e mabapi le eona, ’me re kopanela le ba bang ba e bontšang. Tsela ena e tla re thusa ho ‘balehela bohlola.’ (1 Bakorinthe 6:18) Boitšoaro bo tla boela bo re thuse ho furalla pefo, ho qoba kapa ho hlōla bokhoba ba tahi le ho sebetsana le maemo a thata ka khutso.
17, 18. (a) Bakorinthe ba Pele 11:3 e sebetsa joang bophelong ba lelapa la Mokreste? (b) Ho hlokomela bohlooho ho tlatsetsa joang khotsong ea bomolimo ka lapeng?
17 Molao-motheo o mong oa bohlokoa o ka boleloa ka tsela ena: Ho hlokomela bohlooho ho tla re thusa ho phehella khotso ea bomolimo malapeng a rōna. Pauluse o ile a ngola: “Ke batla hore le tsebe hore hlooho ea monna e mong le e mong ke Kreste; hape hlooho ea mosali ke monna; hape hlooho ea Kreste ke Molimo.” (1 Bakorinthe 11:3) Hona ho bolela hore monna o etella pele ka lapeng, hore mosali oa hae o mo tšehetsa ka botšepehi bo sa sekisetseng, le hore bana baa mamela. (Baefese 5:22-25, 28-33; 6:1-4) Boitšoaro bo joalo bo tla tlatsetsa khotsong ea bomolimo bophelong ba lelapa.
18 Ho hlokahala hore monna oa Mokreste a hopole hore bohlooho ba Mangolo hase bohatelli. O lokela ho etsisa Jesu, Hlooho ea hae. Le hoja e ne e tla ba “hlooho holim’a lintho tsohle,” Jesu o “ile a tla, eseng ho tla sebeletsoa, empa ho tla sebeletsa.” (Baefese 1:22; Matheu 20:28) Ka tsela e tšoanang, monna oa Mokreste o sebelisa bohlooho ka mokhoa o lerato o mo nolofalletsang ho hlokomela lithahasello tsa lelapa la hae hantle. ’Me ka sebele mosali oa Mokreste o batla ho sebelisana le monna oa hae. E le “mothusi” le “motlatsi” oa hae, o tlatsetsa ka litšoaneleho tseo monna oa hae a se nang tsona ’me ka tsela eo o mo tšehetsa kamoo ho hlokahalang. (Genese 2:20, NW; Liproverbia 31:10-31) Tšebeliso e nepahetseng ea bohlooho e thusa banna le basali ho tšoarana ka tlhompho ’me e susumelletsa bana ho mamela. E, ho hlokomela bohlooho ho tlatsetsa khotsong ea bomolimo bophelong ba lelapa.
19. Ke hobane’ng ha puisano e ntle e hlokahala bakeng sa khotso le thabo ea lelapa?
19 Molao-motheo oa bohlokoa oa boraro o ka hlalosoa ka mantsoe ana: Puisano e ntle ke ea bohlokoa bakeng sa khotso le thabo ea lelapa. Jakobo 1:19 ea re bolella: “Motho e mong le e mong o lokela ho potlaka mabapi le ho utloa, e be ea liehang mabapi le ho bua, e be ea liehang mabapi le khalefo.” Ho hlokahala hore litho tsa lelapa li mamelane li be li buisane hobane puisano ea lelapa e lokela hore e be ho fapanyetsana maikutlo. Leha ho le joalo, esita leha seo re se buang e le ’nete, se ka baka tšenyo e fetang molemo haeba se buuoa ka mokhoa o utloisang bohloko, oa boikhohomoso kapa o sa nahaneleng. Puo ea rōna e lokela ho ba e latsoehang, e “nōkiloeng ka letsoai.” (Bakolose 4:6) Malapa a latelang melao-motheo ea Mangolo ’me a buisana hantle a phehella khotso ea bomolimo.
20. Ke hobane’ng ha u ne u ka bolela hore lerato lea hlokahala bakeng sa khotso ea lelapa?
20 Molao-motheo oa bone ke ona: Lerato lea hlokahala bakeng sa khotso le thabo ea lelapa. Lerato la maikutlo le ka ’na la phetha karolo ea bohlokoa lenyalong, ’me boikutlo bo mofuthu bo tebileng bo ka hōla har’a litho tsa lelapa. Leha ho le joalo, habohlokoa le ho feta, ke lerato le emeloang ke lentsoe la Segerike a·gaʹpe. Lena ke lerato leo re le hlaolelang bakeng sa Jehova, bakeng sa Jesu le bakeng sa baahelani ba rōna. (Matheu 22:37-39) Molimo o ile a bontša lerato lena ho moloko oa batho ka ho fana ka “Mora oa hae ea tsoetsoeng a ’notši, e le hore e mong le e mong ea sebelisang tumelo ho eena a se ke a timetsoa empa a be le bophelo bo sa feleng.” (Johanne 3:16) Ke ho babatsehang hakaakang hore ebe re ka bontša mofuta ona oa lerato ho litho tsa malapa a rōna! Lerato lena le phahameng ke “tlamo e phethahetseng ea kopano.” (Bakolose 3:14) Le tlamella banyalani hammoho ’me le ba susumelletsa ho etsetsana se molemohali le ho se etsetsa bana ba bona. Ha ho hlaha mathata, lerato le ba thusa ho sebetsa litaba ba kopane. Re ka kholiseha ka sena hobane “lerato . . . ha le batle lithahasello tsa lona . . . Le jara lintho tsohle, le lumela lintho tsohle, le tšepa lintho tsohle, le mamella lintho tsohle. Lerato ha le fele le ka mohla.” (1 Bakorinthe 13:4-8) Ka sebele malapa ao ho ’ona ho ratana ho tiisitsoeng ke ho rata Jehova, a thabile!
Tsoela Pele ho Phehella Khotso ea Bomolimo
21. Ke’ng seo ho ka etsahalang hore se eketse khotso le thabo ea lelapa la hao?
21 Melao-motheo e seng e boletsoe le e meng e tsoang Bibeleng e thathamisitsoe libukeng tseo ka mosa Jehova a li lokiselitseng ka “lekhoba le tšepahalang le le masene.” (Matheu 24:45) Ka mohlala, boitsebiso bo joalo bo fumanoa bukeng e maqephe a 192 ea Lekunutu la Thabo ea Lelapa, e lokolotsoeng Kopanong ea Setereke ea “Manģosa a Khotso ea Bomolimo” ea Lipaki tsa Jehova e neng e tšoeroe ho pota lefatše ka 1996/97. Thuto ea botho le ea lelapa ea Mangolo ka thuso ea buka e joalo e ka fella ka melemo e mengata. (Esaia 48:17, 18) E, ho ka etsahala hore ho sebelisa keletso ea Mangolo ho eketse khotso le thabo ea lelapa la hao.
22. Re lokela ho etsa hore bophelo ba rōna ba lelapa bo likolohe ho eng?
22 Jehova o na le lintho tse babatsehang tseo a li boloketseng malapa a etsang thato ea hae, ’me o lokeloa ke thoriso le tšebeletso ea rōna. (Tšenolo 21:1-4) Ka lebaka leo, e se eka lelapa la hao le ka etsa hore bophelo ba lona bo likolohe borapeling ba Molimo oa ’nete. ’Me e se eka Ntate oa rōna oa leholimo ea lerato, Jehova, a ka u hlohonolofatsa ka thabo ha u ntse u phehella khotso ea bomolimo bophelong ba lelapa la hao!
U ne U Tla Araba Joang?
◻ Ho hlokahala eng hore malapa a phele ka boinehelo ba bomolimo?
◻ Ke hobane’ng ha lelapa le le maqakabetsing kajeno?
◻ Lekunutu la thabo ea lelapa ke eng?
◻ Ke melao-motheo efe e meng e ka re thusang ho hlaolela khotso le thabo bophelong ba lelapa?
[Setšoantšo se leqepheng la 24]
Puisano e ntle e re thusa ho phehella khotso ea bomolimo bophelong ba lelapa