O Ile a Tšollela Pelo ea Hae ho Molimo ha a Rapela

1, 2. (a) Ke hobane’ng ha Anna a ne a sa thaba ha a ntse a lokisetsa leeto? (b) Re ka ithuta’ng paleng ea Anna?

ANNA o ile a iphathahanya ka ho lokisetsa leeto e le hore a se ke a touta. Ena e ne e lokela ho ba nako e monate; monna oa hae, Elkana, o ne a tloaetse ho nka leeto le lelapa la hae kaofela selemo le selemo ho ea rapela tempeleng Shilo. Jehova o ne a lokiselitse hore linako tse joalo e be tse thabisang. (Bala Deuteronoma 16:15.) Ha ho pelaelo hore Anna o ne a thabela mekete eo ho tloha ha e sa le ngoana. Empa morao tjena lintho li ne li fetohile.

² O ne a hlohonolofalitsoe ka monna ea neng a mo rata. Leha ho le joalo, Elkana o ne a e-na le mosali e mong. Lebitso la hae e ne e le Penina ’me ho bonahala a ne a ikemiselitse ho sulafalletsa Anna bophelo. Penina o ne a bile a e-na le tsela eo ka eona a utloisang Anna bohloko haholo hore a se ke a thabela liketsahalo tsena tsa selemo le selemo. O ne a etsa seo joang? Habohlokoa le ho feta, tumelo eo Anna a neng a e-na le eona ho Jehova e ile ea mo thusa joang hore a mamelle bothata boo ho neng ho bonahala eka a ke ke a tsoa ho bona? Haeba u na le mathata a u sulafaletsang bophelo, pale ea Anna e ka ’na ea u khothatsa haholo.

3, 4. Anna o ne a tobane le mathata afe a mabeli a maholo, hona ke hobane’ng ha ho ne ho se bonolo ho sebetsana le bothata ka bong?

³ Bibele e bua ka mathata a mabeli a maholo ao Anna a neng a tobane le ’ona. Ho ne ho se na ntho e kaalo eo a ka e etsang ka bothata ba pele, athe ba bobeli bona ho hang ho ne ho se seo a ka se etsang ka bona. Taba ea pele ke hore o ne a le lenyalong la sethepu ’me mohalitsong oa hae o ne a mo hloile. Ea bobeli ke hore o ne a hloka thari. Bona ke boemo bo bohloko haholo ho mosali leha e le ofe ea batlang ho ba le bana; empa joale, mehleng ea Anna teng, le ho latela setso sa habo, boemo boo bo ne bo baka masisa-pelo a sa mamelleheng le ho feta. Lelapa le leng le le leng le ne le batla ho ba le bana ba tla ntšetsa pele lebitso la lelapa. Ho hloka thari ho ne ho nkoa e le sekhobo le ntho e tlotlollang habohloko.

⁴ Ha e ne e se ka Penina, mohlomong Anna a ka be a ile a khona ho mamella ho hloka ha hae thari. Ha ho mohla lintho li kileng tsa tsamaea hantle lenyalong la sethepu. Manyalong a joalo ho ne ho atile litlhōlisano, liqhoebeshano le masisa-pelo feela. Lenyalo la mofuta oo le ne le fapane hōle le seo Molimo a ileng a se theha serapeng sa Edene, e leng hore monna a nyale mosali a le mong. (Gen. 2:24) Ka hona, Bibele ha e bue hantle ka lenyalo la sethepu ’me pale e utloisang bohloko ea se neng se etsahala lapeng la Elkana ke mohlala o motle oa hore na ke hobane’ng ha lenyalo la sethepu le ne le se molemo.

 5. Ke hobane’ng ha Penina a ne a batla hore Anna a utloe bohloko, hona o ile a utloisa Anna bohloko joang?

⁵ Elkana o ne a rata Anna haholo. Ho latela moetlo oa Bajuda, ho bonahala a ile a nyala Anna pele, eaba lilemo hamorao o nyala Penina. Ebang ho bile joalo kapa che, taba ke hore Penina o ne a shoela Anna mōna haholo ’me o ile a fumana litsela tse ngata tsa ho mo hlorisa. Sebetsa se seholo seo Penina a neng a se sebelisa khahlanong le Anna, ke hore eena o ne a khona ho ba le bana. O ile a ba le bana ba bangata, ’me nako le nako ha a e-ba le ngoana e mong, seo se ne se mo mathela hloohong. Ho e-na le hore Penina a utloele Anna bohloko ’me a mo tšelise mahlomoleng ao a hae, o ne a sebelisa monyetla oo ho tšela letsoai leqebeng. Bibele e re Penina o ile a tšoenya Anna e le hore feela “a ikutloe a ferekane.” (1 Sam. 1:6) Penina o ne a etsa lintho tseo ka boomo. O ne a batla ho utloisa Anna bohloko ’me o ile a fela a atleha.

6, 7. (a) Ho sa tsotellehe boiteko ba Elkana ba ho tšelisa Anna, ke hobane’ng ha Anna a sa ka a mo bolella litaba kaofela? (b) Na ho hloka thari ha Anna ho ne ho bolela hore o ne a entse ntho e sa khahliseng Jehova? Hlalosa. (Sheba mongolo o botlaaseng ba leqephe.)

⁶ Ho bonahala monyetla oo Penina a neng a o sebelisa haholo e ne e le oa ha ho nkoa leeto la selemo le selemo ho ea Shilo. Elkana o ile a fa ngoana e mong le e mong oa Penina—“bara bohle ba hae le barali ba hae”—likabelo tseo ba neng ba tla etsetsa Jehova sehlabelo ka tsona. Leha ho le joalo, Anna ea se nang bana eena o ile a fumana kabelo ea hae feela. Joale ke hona mona moo Penina a ileng a ikutloa a phahametse Anna, eaba o mo hopotsa hore ke nyopa hoo mosali eo oa batho a ileng a lla a ba a felloa ke takatso ea lijo. Elkana o ile a hlokomela hore moratuoa oa hae Anna o ne a hloname a bile a sa je, eaba o leka ho mo khothatsa. O ile a re ho eena: “Anna, u llela’ng, ke hobane’ng ha u sa je, ’me ke hobane’ng ha pelo ea hao e utloile bohloko? Na ha ke molemo ho uena ho feta bara ba leshome?”—1 Sam. 1:4-8.

⁷ Botle ba Elkana ke hore o ne a lemoha hore matšoenyeho a Anna a ne a bakoa ke hore ha a khone ho ba le bana. Ha ho pelaelo hore Anna o ile a ananela tsela eo ka mosa monna oa hae a neng a lula a mo tiisetsa hore oa mo rata.a Empa ha ho moo Elkana a ileng a bua ka bokhopo boo Penina a neng a bo etsa ’me tlaleho ha e bontše hore Anna le eena o ile a bolella monna oa hae ka taba eo. Mohlomong o ile a lemoha hore ha a ka bolella Elkana ka Penina, bophelo bo ka ’na ba e-ba bosula le ho feta. Na ka sebele Elkana o ne a ka fetola maemo? Na Penina o ne a ke ke a hloea Anna le ho feta, mohlomong a be a kenye moea oo ho bana ba hae le bahlanka ba hae? Joale Anna o ne a tla ikutloa a khesoa le ho feta lelapeng la hae.

 8. Haeba u tobane le bokhopo bo itseng kapa ho hloka toka, ke hobane’ng ha e le ho tšelisang ho hopola hore Jehova ke Molimo oa toka?

⁸ Ebang Elkana o ne a tseba ntho e ’ngoe le e ’ngoe ka bokhopo ba Penina kapa o ne a sa tsebe, Jehova Molimo eena o ile a bona sohle se neng se etsahala. Lentsoe la hae le hlalosa pale eo kaofela, ka hona, le fana ka temoso e matla ho mang kapa mang ea nang le mōna le ea etsang liketso tse khopo empa a nka seo habobebe. Ka lehlakoreng le leng, ba se nang molato le ba nang le khotso joaloka Anna ba ka tšelisoa ke ho tseba hore Molimo oa toka o lokisa litaba ka nako ea hae le ka tsela ea hae. (Bala Deuteronoma 32:4.) E ka ’na eaba Anna le eena o ne a tseba seo, kaha o ile a kōpa hore Jehova a mo thuse.

 9. Re ka ithuta’ng ka boikemisetso ba Anna ba ho nka leeto le eang Shilo ho sa tsotellehe taba ea hore o ne a tseba hore na mohalitsong oa hae o tl’o itšoara joang?

⁹ Ho ne ho phethesela ka tlung lihoreng tsa hoseng. Bohle ba ne ba itokisetsa ho kena leetong, ho akarelletsa le bana. Lelapa leo le leholo le ne le tla tsamaea lik’hilomithara tse fetang 30 ho ea Shilo, le haola naheng ea Efraime e meepa.b Leeto leo le ne le ka nka letsatsi kapa a mabeli ha ba tsamaea ka maoto. Anna o ne a tseba hore na mohalitsong oa hae o tlil’o itšoara joang. Leha ho le joalo, Anna ha aa ka a sala hae. Ka hona, o behetse barapeli ba Molimo mohlala o babatsehang ho fihlela le kajeno. Ke booatla ho lumella boitšoaro bo fosahetseng ba ba bang hore bo re thibele ho sebeletsa Molimo. Haeba re ka etsa joalo, re tla fetoa ke lintho tsa bohlokoa tse ka re thusang hore re khone ho mamella.

10, 11. (a) Ke hobane’ng ha Anna a ile a ea tabernakeleng kapele kamoo a ka khonang? (b) Anna o ile a tšollela maikutlo ho Ntate oa hae oa leholimo joang ka thapelo?

¹⁰ Qetellong lelapa leo le leholo le ile la bonela Shilo haufi, ka mor’a ho tsamaea nako e telele litseleng tse tsoelipanang lithabeng. Motse oo o ne o le leralleng le neng le pota-potiloe ke lithaba tse ling tse phahameng ho e feta. Ha lelapa le ntse le atamela, e ka ’na eaba Anna o ne a nahana ka thata hore na o tl’o re’ng ha a rapela Jehova. Ha lelapa le fihla, le ile la ja hammoho. Hang ha monyetla o hlaha, Anna o ile a tsamaea a le mong ho ea tabernakeleng ea Jehova. Moprista ea Phahameng Eli, o ne a le moo, a lutse haufi le kosene ea monyako. Empa Anna ha aa ka a mo hlokomela kaha o ne a inahanetse ka Molimo oa hae feela. O ne a kholisehile hore Molimo o tla mo utloa ha a le mona tabernakeleng. Haeba ho ne ho se ea utloisisang masisa-pelo a hae ka botlalo, Ntate oa hae ea leholimong eena o ne a tla utloisisa. O ile a tlallana ke bohloko eaba o qala ho lla.

¹¹ Ha Anna a ntse a lla habohloko hoo ’mele oa hae o neng o thothomela, o ile a bua le Jehova ka pelong. Ha a ntse a tšolla bohloko joalo, o ne a ntse a bebenya molomo. O ile a rapela nako e telele, a tšollela Ntate oa hae matšoenyeho ’ohle a hae. Ha aa ka a rapella feela hore Molimo a mo fe ngoana eo a neng a mo batla ka pelo eohle ea hae. Anna o ne a sa batle ho fumana melemo feela ho Molimo, empa le eena o ne a batla ho fa Molimo seo a ka se khonang. Kahoo, o ile a etsa kano ea hore haeba a ka ba le mora, o tla nehelana ka ngoana eo hore a sebeletse Jehova bophelo bohle ba hae.—1 Sam. 1:9-11.

12. Joalokaha mohlala oa Anna o bontša, ke’ng seo re lokelang ho lula re se hopola ha re rapela?

¹² Kahoo, Anna o ile a behela bahlanka bohle ba Molimo mohlala o motle tabeng ea thapelo. Ka mosa, Jehova o khothalletsa batho hore ba bue le eena ba lokolohile, ba sa tsilatsile ha ba mo bolella matšoenyeho a bona, joalokaha ngoana a ne a ka bua le motsoali oa hae ea lerato hobane a mo tšepa. (Bala Pesaleme ea 62:8; 1 Bathesalonika 5:17.) Moapostola Petrose o ile a susumetsoa hore a ngole mantsoe ana a khothatsang mabapi le ho rapela Jehova, a reng: ‘Lahlelang matšoenyeho ’ohle a lōna ho eena, hobane oa le tsotella.’—1 Pet. 5:7.

13, 14. (a) Ho tlile joang hore Eli a fihlele qeto e fosahetseng ka Anna? (b) Tsela eo Anna a ileng a arabela Eli ka eona e re behela mohlala ofe o babatsehang oa tumelo?

¹³ Leha ho le joalo, batho ha ba utloisise ebile ha ba na kutloelo-bohloko joaloka Jehova. Ha Anna a ntse a lla a bile a rapela, o ile a nyarosoa ke lentsoe la motho ea buang. E ne e le lentsoe la moprista ea phahameng Eli, ea neng a ntse a mo shebile. O ile a re: “U tla itšoara joaloka ea tahiloeng halelele hakae? Tlosa veine ea hao ho uena.” Eli o bone hore Anna o ntse a bebenya molomo, oa lla ebile o shebahala a utloile bohloko. Empa ho e-na le hore a botse hore na molato ke eng, o ile a iketsetsa qeto ea hore o tahiloe.—1 Sam. 1:12-14.

¹⁴ E tlameha ebe Anna o ile a utloa bohloko haholo ha nakong eo ea mesarelo, a qosoa ka ntho eo e seng ’nete—le hona a qosoa ke motho ea boemong bo hlomphehang joalo! Leha ho le joalo, o ile a boela a beha mohlala o babatsehang oa motho ea nang le tumelo. Ha aa ka a lumella mefokolo ea motho e mong hore e mo sitise ho rapela Jehova. O ile a arabela Eli ka tlhompho ’me a mo hlalosetsa boemo ba hae. Ka lentsoe leo e ka ’nang eaba le ne le bontša hore o soabile, empa e se e le le thobang maikutlo, Eli o ile a mo araba: “Tsamaea ka khotso, ’me e se eka Molimo oa Iseraele a ka phethahatsa kōpo ea hao e matla eo u e kōpileng ho eena.”—1 Sam. 1:15-17.

15, 16. (a) Anna o ile a ikutloa joang ka mor’a hore a tšollele pelo ea hae ho Jehova le ho mo rapela tabernakeleng? (b) Re ka latela mohlala oa Anna joang ha re imetsoe maikutlong?

¹⁵ Anna o ile a ikutloa joang ka mor’a hore a tšollele pelo ea hae ho Jehova le ho mo rapela moo tabernakeleng? Tlaleho e re: “Mosali eo a tsamaea ’me a ja, ’me sefahleho sa hae ha sea ka sa hlola se tšoenyeha.” (1 Sam. 1:18) Bibele—Phetolelo e Ncha e beha temana ena tjena: “Sefahleho sa hae sa khanya khotso.” Anna o ile a ikutloa a imolohile. E ne eka o nkile moroalo oa hae o neng o mo imetse maikutlong eaba o o jarisa motho e moholo le ea matla ho mo feta, e leng Ntate oa hae ea leholimong. (Bala Pesaleme ea 55:22.) Na ho na le bothata bo ka mo sitang? Che—bo ne bo le sieo mehleng eo, le mehleng ena ha bo eo, ebile ha ho mohla bo tla ke bo be teng!

¹⁶ Ha re ikutloa re imetsoe, re tsielehile, kapa re utloile bohloko haholo, e ka ba hantle hore re latele mohlala oa Anna oa ho bua ka bolokolohi le Eo Bibele e reng ke “Ea Utloang thapelo.” (Pes. 65:2) Haeba re etsa joalo re e-na le tumelo, le rōna re ka fumana hore mesarelo ea rōna e nkeloa sebaka ke “khotso ea Molimo e fetang monahano oohle.”—Bafil. 4:6, 7.

17, 18. (a) Elkana o ile a bontša joang hore o tšehetsa kano ea Anna? (b) Penina o ne a se a se na matla a ho utloisa Anna bohloko joang?

¹⁷ Hoseng ha letsatsi le hlahlamang, Anna o ile a khutlela tabernakeleng a se a e-na le Elkana. E ka ’na eaba o ne a mo phetetse ka kōpo eo a e entseng le ka kano eo a neng a e entse, etsoe Molao oa Moshe o ne o bolela hore monna o na le tokelo ea ho hlakola kano eo mosali oa hae a e entseng ntle le eena. (Num. 30:10-15) Empa monna eo ea tšepahalang ha aa ka a etsa joalo. Ho e-na le hoo, eena le Anna ba ile ba rapela Jehova ba le hammoho tabernakeleng pele ba khutlela hae.

¹⁸ Penina o ile a hlokomela neng hore ha a sa khona ho utloisa Anna bohloko? Tlaleho ha e re bolelle, empa mantsoe a reng ‘ha aa ka a hlola a tšoenyeha’ a fana ka maikutlo a hore ho tloha ka nako eo, Anna o ile a qala ho lula a thabile. E tlameha ebe Penina o ile a lemoha hore boitšoaro ba hae bo bontšang lehloeo ha bo sa ama Anna le hanyenyane feela. Ka mor’a moo, ha ho sa na moo Bibele e buang ka Penina.

19. Anna o ile hlohonolofatsoa joang, hona o ile a bontša joang hore oa utloisisa hore na tlhohonolofatso eo e tsoa ho mang?

¹⁹ Ha likhoeli li ntse li feta, khotso eo Anna a neng a e-na le eona e ile ea fetoha thabo e khōlō. O ile a lemoha hore o imme! Le hoja Anna a ne a thabile hakaalo, ha aa ka a lebala le hanyenyane hore na tlhohonolofatso eo e ne e tsoa ho mang. Ha moshanyana oa hae a hlaha, o ile a mo reha Samuele, e bolelang “Lebitso la Molimo,” ’me ho hlakile hore le amana le ho ipiletsa lebitsong la Molimo, joalokaha Anna a ile a etsa. Selemong seo, ha aa ka a ea le Elkana le lelapa lohle Shilo. Ka lilemo tse tharo o ile a sala hae le lesea, ho fihlela a le khoesa. Eaba joale o itokisetsa letsatsi leo ka lona a tla arohana le mora eo oa hae ea mo ratang haholo.

20. Anna le Elkana ba ile ba phethahatsa tšepiso eo ba e entseng ho Jehova joang?

²⁰ E tlameha ebe ho ile ha e-ba boima ha ba arohana. Ke ’nete hore Anna o ne a tseba hore Samuele o tla hlokomeloa hantle Shilo, mohlomong ke basali ba bang ba neng ba sebeletsa tabernakeleng. Leha ho le joalo, o ne a ntse a le monyenyane haholo, etsoe ha ho ’mè ea batlang ho arohana le ngoana oa hae. Ho ntse ho le joalo, Anna le Elkana ba ile ba tlisa moshanyana eo ba thabile, ba sa hlonama. Ba ile ba etsa sehlabelo ntlong ea Molimo, eaba ba siea Samuele ho Eli ’me ba mo hopotsa kano eo Anna a ileng a e etsa moo lilemong tse fetileng.

21. Thapelo ea Anna ho Jehova e bontša joang hore o ne a e-na le tumelo e tebileng? (Sheba le lebokose le reng, “Lithapelo Tse Peli Tse Ikhethang.”)

²¹ Ka mor’a moo, Anna o ile a etsa thapelo eo Molimo a ileng a bona e lokela ho kenyelletsoa Lentsoeng la hae le bululetsoeng. Ha u ntse u bala mantsoe a hae a tlalehiloeng ho 1 Samuele 2:1-10, u tla lemoha hore polelong e ’ngoe le e ’ngoe ho na le mantsoe a bontšang kamoo tumelo ea hae e neng e tebile kateng. O ile a rorisa Jehova ka tsela e hlollang eo a sebelisang matla a hae ka eona—matla a hae a ke keng a lekanngoa a ho kokobetsa ba ikhohomosang, a ho hlohonolofatsa ba hateletsoeng, a ho timetsa batho kapa esita le hona ho ba pholosa lefung. O ile a rorisa Ntate oa hae ka tsela e ikhethang eo a halalelang ka eona, ka toka ea hae le ka botšepehi ba hae. Anna o ne a e-na le lebaka le utloahalang la hore a re: “Ha ho lefika le joaloka Molimo oa rōna.” Jehova o tšepahala ka ho feletseng, ha a fetohe ebile ke setšabelo sa bohle ba khahlapetsoang le ba hatelloang, ba kōpang thuso ho eena.

22, 23. (a) Ke hobane’ng ha re ka kholiseha hore Samuele o hōtse a tseba hore batsoali ba hae baa mo rata? (b) Jehova o ile a tsoela pele a hlohonolofatsa Anna joang?

²² Ka sebele Samuele e monyenyane o ne a le lehlohonolo ka ho ba le ’mè ea nang le tumelo e matla joalo ho Jehova. Le hoja ha a ntse a hōla a ne a mo hloloheloa, ha ho mohla a ileng a ikutloa a lahliloe. Selemo le selemo Anna o ne a ea Shilo, a isetsa Samuele seaparo se senyenyane se se nang matsoho hore a se apare ha a sebeletsa tabernakeleng. Anna o ne a etsetsa Samuele seaparo sena e le ho bontša hore o rata mora oa hae le hore oa mo tsotella. (Bala 1 Samuele 2:19.) U ka inahanela feela ha a ntse a apesa moshanyana oa hae seaparo seo, a se batalatsa hantle a mo shebile ka lerato ha a ntse a bua le eena ka mosa ’me a mo khothatsa. Ruri Samuele o ne a hlohonolofalitsoe ka ho ba le ’mè ea joalo ’me o ile a hōla, le eena ea e-ba tlhohonolofatso ho batsoali ba hae le ho Baiseraele kaofela.

²³ Anna le eena ha aa ka a lebaloa. Jehova o ile a mo hlohonolofatsa ka thari ’me a tsoalla Elkana bana ba bang ba bahlano. (1 Sam. 2:21) Leha ho le joalo, e ka ’na eaba tlhohonolofatso e khōlō ea Anna e bile kamano e matla eo a bileng le eona le Ntate oa hae, Jehova, e ileng ea ’na ea matlafala ha lilemo li ntse li feta. E se eka le uena u ka etsahalloa ke se tšoanang ha u ntse u bontša tumelo e tšoanang le ea Anna.