Kamoo Anna a Ileng a Fumana Khotso Kateng

MOSALI e mong ea tšepahalang o rorisa Jehova ka thapelo a hoelelitse. O lumela hore Molimo o mo phahamisitse lerōleng, ’me masoabi a hae oa fetotse thabo e khaphatsehang.

Lebitso la mosali enoa ke Anna. Ke eng se fetotseng tsela eo a ikutloang ka eona hakaale? Ke hobane’ng ha hona joale a thabile hakaale? Re ka rua molemo joang phihlelong ea hae? E le hore re fumane likarabo tsa lipotso tsena, a re ke re hlahlobeng pale ea Anna.

Lelapa le Imetsoeng Kelellong

Anna ke e mong oa basali ba babeli ba Elkana, Molevi ea lulang naheng ea Efraime. (1 Samuele 1:1, 2a; 1 Likronike 6:33, 34) Le hoja qalong e ne e se morero oa Molimo hore batho ba nyale sethepu, Molaong oa Moshe se ne se lumelloa se bile se e-na le melao e se laolang. Elkana le ba lelapa la hae ba rapela Jehova, empa hangata manyalo a sethepu a baka likhohlano, joalokaha litaba tsa lelapa la Elkana li bontša.

Anna ke nyopa, ha Penina, e leng mosali e mong oa Elkana, a e-na le bana ba bangata. Penina ke mohalitsong oa Anna.—1 Samuele 1:2b.

Har’a basali ba Iseraele, ho ba nyopa ho nkoa e le thohako ebile e le pontšo ea hore Molimo ha a talime mosali oa nyopa e le motho oa bohlokoa. Empa ha ho letho le bontšang hore ho se be le bana ha Anna ke bopaki ba hore Molimo ha a khahloe ke eena. Leha ho le joalo, ho e-na le hore Penina a leke ho tšelisa Anna, o sebelisa boemo ba hae ba hore eena o na le thari e le mokhoa oa ho sulafaletsa Anna, mohalitsong oa hae.

Ho Etela Sehalalelong sa Jehova

Ho sa tsotellehe khohlano ena, selemo le selemo lelapa la Elkana le kena leetong la ho ea nyehela mahlabelo sehalalelong sa Jehova, Shilo.a Ho ka etsahala hore ebe leeto lena la bolelele ba lik’hilomithara tse ka bang 60 ho ea le ho khutla, le tsamauoa ka maoto. E tlameha ebe Anna o thatafalloa haholo linakong tsena kaha Penina le bana ba hae ba fuoa likabelo tse ’maloa tsa sehlabelo se kopanetsoeng, ha Anna eena a fuoa kabelo e le ’ngoe feela. Penina o sebelisa menyetla e joalo hore a utloise Anna bohloko, o mo etsa hore a ferekane kaha ho bonahala eka Jehova o “koetse pōpelo ea hae.” Tlhokofatso ena e etsahala selemo le selemo, ’me e llisa Anna ebile e etsa hore a hane ho ja. Kahoo, maeto a lokelang hore a mo thabise a mo bakela tsieleho e khōlō. Leha ho le joalo, Anna o ntse a kena maetong ana a ho leba sehalalelong sa Jehova.—1 Samuele 1:3-7.

Na u bona kamoo Anna a re behetseng mohlala o motle kateng? Ha u nyahame, u etsa’ng? Na u itšehla thajana ebe ha u kopane le balumeli-’moho le uena? Anna ha aa ka a etsa joalo. E ne e le mokhoa oa hae hore a be har’a barapeli ba Jehova. Ho sa tsotellehe maemo a sithabetsang, re lokela ho mo etsisa.—Pesaleme ea 26:12; 122:1; Liproverbia 18:1; Baheberu 10:24, 25.

Elkana o leka ho tšelisa Anna o bile o mo khothalletsa hore a bolele se mo jang. Oa mo botsa: “Anna, u llela’ng, ke hobane’ng ha u sa je, ’me ke hobane’ng ha pelo ea hao e utloile bohloko? Na ha ke molemo ho uena ho feta bara ba leshome?” (1 Samuele 1:8) Mohlomong Elkana ha a tsebe hore Penina o tšoere Anna hampe, ’me ho ka etsahala hore ebe Anna o ikhethetse ho shoa le mantsoe ho e-na le ho belaela. Leha ho le joalo, Anna o bontša tumelo ka hore a batle khotso ka ho rapela Jehova.

Anna oa Ikana

Mahlabelo a kopanetsoeng a ne a jelloa sehalalelong sa Jehova. Ka mor’a hore Anna a tsoe ka phaposing ea ho jela, o rapela Molimo. (1 Samuele 1:9, 10) Oa kōpa: “Jehova oa mabotho, haeba ruri u tla talima mahloreho a lekhabunyane la hao ’me u nkhopole, ’me u ke ke ua lebala lekhabunyane la hao ’me u tla fa lekhabunyane la hao ngoana e motona, ke tla mo fa Jehova ka matsatsi ’ohle a bophelo ba hae, ’me ha ho lehare le tla feta hloohong ea hae.”—1 Samuele 1:11.

Anna o etsa thapelo e tobang taba. O kōpa ngoana e motona ’me o ikana hore ngoana eo o tla fuoa Jehova e le Monazari nako eohle ea bophelo ba hae. (Numere 6:1-5) Monna oa hae o lokela hore a lumelle kano eo, ’me lintho tseo Elkana a li etsang hamorao li bontša hore o lumeletse tšepiso eo ea mosali oa hae ea ratoang.—Numere 30:6-8.

Tsela eo Anna a rapelang ka eona e etsa hore Eli, Moprista ea Phahameng a nahane hore o tahiloe. O ntse a bebenya melomo, empa ha ho utloahale mantsoe, kaha Anna o buela ka pelong. O hlile o etsa thapelo eo ka tieo. (1 Samuele 1:12-14) Nahana hore na Anna o ikutloa joang ha Eli a mo nyelisa, a re o tahiloe! Leha ho le joalo, o araba moprista ea phahameng ka tlhompho. Ha Eli a lemoha hore Anna o ne a ntse a rapela “ka lebaka la ho tšoenyeha ha [hae] ho hoholo le khalefo ea [hae],” o re: “E se eka Molimo oa Iseraele a ka phethahatsa kōpo ea hao e matla.” (1 Samuele 1:15-17) Ka mor’a moo Anna oa tsamaea ’me oa ja, ebile ‘sefahleho sa hae ha se sa tšoenyehile.’—1 Samuele 1:18.

Re ka ithuta eng ho see sohle? Ha re rapela Jehova ka lintho tseo re tšoenyehileng ka tsona, re ka mo tsebisa kamoo re ikutloang kateng ’me ra mo kōpa ho tloha pelong. Haeba ho se ho se letho leo re ka le etsang ho rarolla bothata boo, re lokela ho tlohela litaba matsohong a hae. Ena ke tsela e molemo ka ho fetisisa eo re ka e latelang.—Liproverbia 3:5, 6.

Ka mor’a ho rapela ka tieo, ho ka etsahala hore bahlanka ba Jehova ba be le khotso e tšoanang le eo Anna a ileng a ba le eona. Ha moapostola Pauluse a bua ka thapelo, o ile a ngola a re: “Le se ke la tšoenyeha ka letho, empa nthong e ’ngoe le e ’ngoe ka thapelo le thapeli hammoho le liteboho likōpo tsa lōna tse matla li ke li tsebisoe Molimo; ’me khotso ea Molimo e fetang monahano oohle e tla lebela lipelo tsa lōna le matla a lōna a kelello ka Kreste Jesu.” (Bafilipi 4:6, 7) Ha re lahlela moroalo oa rōna ho Jehova, re lokela ho mo lumella hore ebe eena ea o jarang. Joale, ebe joaloka Anna, ha re sa tšoenyeha ka letho.—Pesaleme ea 55:22.

Mora ea Alimiloeng Jehova

Joale Molimo o ela Anna hloko; oa ima ’me o ba le mora. (1 Samuele 1:19, 20) Lena ke le leng la makhetlo a seng makae tlalehong ea Bibele moo Molimo ka boeena a etsang hore ho hlahe motho eo e tla ba mohlanka oa hae. Samuele, mora oa Elkana le Anna e lokela ho ba moprofeta oa Jehova, ea tla phetha karolo ea bohlokoa tabeng ea ho theha borena ba Iseraele.

Ha ho pelaelo hore Anna o qala ho ruta Samuele ka Jehova ho tloha boseeng. Empa na Anna o lebala kano eo a e entseng? Ho hang! O re: “Hang ha moshanyana a khoesitsoe, ke tla mo tlisa, ’me o tla hlaha ka pel’a Jehova ’me a lule moo ho isa nakong e sa lekanyetsoang.” Ha Samuele a khoesitsoe, mohlomong a le lilemo li tharo kapa ho feta moo, Anna o mo isa sehalalelong sa Jehova hore a il’o lula teng, feela joalokaha a ne a tšepisitse.—1 Samuele 1:21-24; 2 Likronike 31:16.

Ka mor’a hore ba etsetse Jehova sehlabelo, Anna le monna oa hae ba isa Samuele ho Eli. Mohlomong Anna o tšoere moshanyana oa hae ka letsoho ha a re ho Eli: “Ntšoarele, moren’a ka! Ka moea oa hao o phelang, moren’a ka, ke ’na mosali ea neng a eme le uena sebakeng sena ho rapela Jehova. E ne e le mabapi le moshanyana enoa ke neng ke rapela hore Jehova a phethahatse kōpo ea ka e matla eo ke mo kōpileng eona. ’Na, ke alimane ka eena ho Jehova. Ka matsatsi ’ohle a bophelo ba hae, o kōpetsoe Jehova.” Ka tsela eo, Samuele o qalisa nako ea ho sebeletsa Molimo ka tsela e khethehileng bophelong bohle ba hae.—1 Samuele 1:25-28; 2:11.

Ha nako e ntse e feta, ka sebele Anna ha a lebale Samuele. Mangolo a re: “’M’ae o ne a mo etsetsa seaparo se senyenyane se se nang matsoho, ’me o ne a mo tlisetsa sona selemo le selemo ha a ne a nyoloha le monna oa hae ho tla etsa sehlabelo sa selemo le selemo.” (1 Samuele 2:19) Ruri Anna o tsoela pele ho rapella Samuele. Ha a ntse a mo etela joalo selemo le selemo, ha ho pelaelo hore o mo khothalletsa hore a lule a tšepahala tšebeletsong eo a e etsetsang Molimo.

Ka lekhetlo le leng, Eli o hlohonolofatsa batsoali ba Samuele ’me o re ho Elkana: “E se eka Jehova a ka u fa bana ka mosali enoa sebakeng sa se alimanoeng, se alimiloeng Jehova.” Tumellanong le mantsoe ana, Anna le Elkana ba hlohonolofatsoa ka bara ba bang ba bararo le barali ba babeli.—1 Samuele 2:20, 21.

Elkana le Anna ke mehlala e metle hakaakang ho batsoali ba Bakreste! Ka tsela ea tšoantšetso, bo-’mè le bo-ntate ba bangata ba ’nile ba ithaopela ho alima Jehova bara le barali ba bona, ba ba khothalletsa hore ba phehelle mofuta o itseng oa tšebeletso ea nako e tletseng ba le hōle le hae. Batsoali ba lerato joalo ba lokela ho babatsoa ka boitelo boo ba bo etsang, ’me Jehova o tla ba putsa.

Thapelo ea Anna ea Thabo

Anna eo pele e neng e le nyopa o thaba hakaakang! Ka Mangolong hase hangata ho tlalehoang lithapelo tse entsoeng ke basali. Leha ho le joalo, tabeng ea Anna teng, re tseba ka lithapelo tse peli tseo a ileng a li etsa. Ea pele ke thapelo ea ha a ne a tšoenyehile a bile a saretsoe, ’me ea bobeli ke ea ha a ne a thabile a bile a leboha. Anna o qala ka ho re: “Pelo ea ka e thabela Jehova.” O thabela hore ebe “esita le nyopa e tsoetse,” ’me o rorisa Jehova ka hore “ke Mophahamisi oa ea tlaase lerōleng.” Ka sebele, “o phahamisa mofutsana sekoting sa molora.”—1 Samuele 2:1-10.

Tlaleho e bululetsoeng e buang ka Anna e bontša hore re ka utloisoa bohloko ke ho se phethahale ha ba bang kapa lehloeo la bona. Leha ho le joalo, ha rea lokela ho lumella liteko tse joalo ho re amoha thabo ea ho sebeletsa Jehova. Ke eena Moutloi e moholo oa thapelo, ea arabelang mehoo ea batho ba hae ba tšepahalang, ea ba lopollang mahlomoleng ’me a ba fa khotso e ngata le litlhohonolofatso tse ling.—Pesaleme ea 22:23-26; 34:6-8; 65:2.

[Mongolo o botlaaseng ba leqephe]

[Setšoantšo se leqepheng la 17]

Anna o ile a alima Jehova Samuele