Bontša Tumelo e Tšoanang le ea Bona

O Ile a Tšelisoa ke Molimo oa Hae

HA MARU a matšo a ntse a fifala le ho feta, Elia o ne a ntse a le tipatipa har’a pula. Jezriele, moo a neng a habileng teng, ho ne ho sa le sebakanyana le hona o ne a se a ile lilemong. Leha ho le joalo, ha aa ka a khathala ha a ntse a matha, etsoe “letsoho la Jehova” le ne le le holim’a hae. O ne a e-na le mokoka oo a qalang ho o utloa, hoo a ileng a feta sehlopha sa lipere tse neng li hula koloi ea Morena Akabe!—1 Marena 18:46.

Joale Morena Akabe o ne a saletse morao haholo, ’me thota e ne e sa namme ka pel’a Elia. U se u ka inahanela feela ha a ntse a matha, a fahloa ke pula ’me a nahana ka se etsahetseng letsatsing leo la bohlokoa bophelong ba hae. Ha ho pelaelo hore eo e ne e bile tlhōlo ea Molimo oa Elia, Jehova, hammoho le barapeli ba hae ba ’nete. Thaba ea Karmele, eo ho eona Jehova a ileng a sebelisa Elia hore a hlōle borapeli ba Baale ka matla a maholo le ka tsela ea mohlolo, e ne e se e sa bonahale kaha e ne e se e le hōle ebile e koahetsoe ke maru a thibileng. Baprofeta ba Baale ba makholo ba ne ba pepesitsoe hore ke mamenemene a khopo ’me ke ka toka ba neng ba timelitsoe. Ka mor’a moo, Elia o ne a ile a rapela Jehova hore a felise komello e neng e ile ea otla naha ka lilemo tse tharo le halofo. Pula e ile ea fela ea tšoloha!a—1 Marena 18:18-45.

Ha Elia a ntse a qaputsa ka har’a metsi joalo lik’hilomithara tse 30 ho leba Jezriele, e ka ’na eaba o ne a nka hore ka sebele joale lintho li tla fetoha. Akabe o tla tlameha ho fetoha! Ka mor’a seo a se boneng, ruri o ne a se na boikhethelo haese feela hore a furalle borapeli ba Baale, a laole mofumahali oa hae, Jezebele, a be a khaotse ho hlorisa bahlanka ba Jehova.

Ka tlhaho ha lintho li bonahala li re tsamaela hantle, re ee re be le tšepo. Re ka ’na ra nahana hore bophelong ba rōna boemo bo tla ntlafala le ho feta, mohlomong ra ba ra nahana hore mathata a rōna a maholo a ile ka ’moho. Haeba Elia o ne a nahana joalo, seo ha se makatse kaha “e ne e le motho ea nang le maikutlo a joaloka a rōna.” (Jakobo 5:17) Leha ho le joalo, ’nete ke hore mathata a Elia a ne a sa le hōle le ho fela. Ha e le hantle, ho e-s’o fete le nako e seng kae feela Elia o ne a tla tšoha a be a tepelle maikutlong hoo a neng a tla lakatsa ho shoa. Ho ile ha etsahala’ng? Hona Jehova o ile a thusa moprofeta eo oa hae joang hore tumelo ea hae e matlafale a be a be sebete hape? A re boneng.

Phetoho e sa Lebelloang

Ha Akabe a fihla ntlong ea hae ea borena Jezriele, na o ile a bontša hore o ne a fetohile, e se e le motho oa moea? Rea bala: “Akabe a bolella Jezebele tsohle tseo Elia a neng a li entse le tsohle tsa kamoo a bolaileng baprofeta bohle ka sabole.” (1 Marena 19:1) Hlokomela hore ha Akabe a tlaleha se etsahetseng letsatsing leo, ha aa ka a bua ka Molimo oa Elia, Jehova. Akabe, eo e neng e le motho oa nama, o ile a nka liketsahalo tsa mohlolo tse etsahetseng letsatsing leo e le tse entsoeng ke motho, tseo “Elia a neng a li entse.” Ho hlakile hore o ne a sa ithuta ho hlompha Jehova Molimo. Jezebele ea tletseng boiphetetso eena o ile a itšoara joang?

O ile a loloma ke bohale! O ile a rōmela molaetsa ona ho Elia a bela: “E se eka melimo e ka etsa joalo, ’me e se eka e ka ekelletsa ho seo, haeba hosasane ka nako ena nke ke ka etsa hore moea oa hao o be joaloka oa e mong le e mong oa bona!” (1 Marena 19:2) Mona Elia o ne a tšosoa ka tsela e mpe ka ho fetisisa ea hore o tla bolaoa. Ha e le hantle, Jezebele o ne a ikana hore eena ka boeena o tla shoa haeba letsatsi le ka feta Elia a e-s’o bolaoe e le ho iphetetsa ka baprofeta ba Baale. Nahana feela Elia a tsosoa borokong moo a robetseng teng sebakeng sa boemo bo tlaase Jezriele, bosiung bona boo ba lipula—a tsosetsoa ho bolelloa molaetsa oa mofumahali oa bomalimabe. O ile a ameha joang?

Oa Nyahama o Bile o Tlala Tšabo

Haeba Elia a ne a tšepile hore ntoa khahlanong le barapeli ba Baale e felile, tšepo eo ea hae e ile ea bjaramana habohloko nakong eo. Jezebele e ne e ntse e le eena eane oa maoba le maobane. O ne a se a ile a ntša taelo ea hore ho bolaoe bo-mphato ba Elia ba bangata ba tšepahalang ’me ho ne ho bonahala joale Elia e le eena ea latelang. Bibele e re bolella hore o ile a qala ho “tšoha.” Na ka kelellong Elia o ile a bona kamoo Jezebele a neng a batla ho mo bolaea ka sehlōhō kateng? Haeba o ile a lula a nahana ka seo, ha ho makatse hore ebe o ile qala ho tšoha. Leha ho le joalo, Elia o ile “a qala ho tsamaea hore a pholose moea oa hae”—o ile a baleha ho sireletsa bophelo ba hae.—1 Marena 18:4; 19:3.

Elia hase eena feela motho ea tšepahalang ea kileng a apareloa ke tšabo. Hamorao, moapostola Petrose o ile a ikutloa ka tsela e tšoanang. Ka mohlala, ha Jesu a ne a etsa hore Petrose a tsamaee metsing ho tla ho Eena, moapostola eo o ile a qala ho “sheba moea oa sefefo.” Ka mor’a moo, o ile a tšoha eaba o qala ho teba. (Matheu 14:30) Ka hona, mohlala oa Petrose le oa Elia o re ruta thuto ea bohlokoa. Haeba re batla ho lula re le sebete, ha rea lokela ho lumella likelello tsa rōna hore li lule li nahana ka lintho tse re tšosang. Re lokela ho lula re nahanne ka Mohloli o re fang tšepo le matla.

“Ho Lekane!”

A tšohile, Elia o ile a balehela Beerseba, motse o ka boroa-bophirimela, o bohōle ba lik’hilomithara tse ka bang 150, o pel’a moeli o ka boroa oa Juda. Ha a le moo, o ile a siea mohlokomeli oa hae eaba o leba lefeelleng a le mong. Tlaleho e re o ile a tsamaea “leeto la letsatsi,” ho bolelang hore mohlomong o ile a kena leetong ha letsatsi le chaba ’me ho hlakile hore le lijo o ne a sa li nka. A nyahame a bile a tšohile, o ile a tsamaea ka thata thoteng eo e mpe e neng e sa batalla, tlas’a letsatsi le bataolang. Ha qetellong letsatsi le ea malikelong, Elia o ne a se a feletsoe ke matla. A khathetse, o ile a lula tlas’a sehlahla sa lefielo—e leng eona feela ntho e haufi eo a neng a ka itšireletsa ho eona lehoatateng moo.—1 Marena 19:4.

Elia o ile a rapela a imetsoe e le kannete. O ile a ikōpela ho shoa. O ile a re: “Ha ke molemo ho feta baholo-holo ba ka.” O ne a tseba hore baholo-holo ba hae e ne e se e le lerōle le masapo feela mabitleng, ba ne ba ke ke ba hlola ba etsetsa motho molemo leha e le ofe. (Moeklesia 9:10) Elia o ile a ikutloa a se na thuso. Hase feela a ileng a lla, a re: “Ho lekane!” Ke sa phelela’ng?

Na hoa makatsa ho tseba hore mohlanka oa Molimo a ka nyahama hakaalo? Le hanyenyane. Banna ba bangata le basali ba tšepahalang ka Bibeleng ba hlalosoa ba ile ba utloa bohloko hoo ba ileng ba lakatsa ho shoa—har’a bona ke Rebeka, Jakobo, Moshe le Jobo.—Genese 25:22; 37:35; Numere 11:13-15; Jobo 14:13.

Kajeno re phela ‘linakong tse mahlonoko tseo ho leng thata ho sebetsana le tsona,’ ka hona, ha ho makatse hore ebe batho ba bangata, esita le bahlanka ba Molimo ba tšepahalang, baa nyahama ka linako tse ling. (2 Timothea 3:1) Haeba u iphumana u le boemong boo, latela mohlala oa Elia tabeng ena: Tšollela pelo ea hao ho Molimo. Etsoe Jehova ke “Molimo oa matšeliso ’ohle.” (2 Bakorinthe 1:3) Na o ile a tšelisa Elia?

Jehova o Matlafatsa Moprofeta oa Hae

U nahana hore Jehova o ile a ikutloa joang ha a sheba lefatšeng a le leholimong ’me a bona moprofeta eo a mo ratang a robetse tlas’a sehlahla lefeelleng ’me a ikōpela ho shoa? Ha ho hlokahale hore re ingoaee hlooho. Ka mor’a hore Elia a khalehe, Jehova o ile a romela lengeloi. Lengeloi leo le ile la tsosa Elia ka ho mo sisinya habonolo, ’me la re: “Tsoha, u je.” Elia o ile a etsa joalo, etsoe ka mosa lengeloi leo le ne le mo lokiselitse lijo tse bobebe tsa bohobe bo ntseng bo chesa le metsi. Na o ile a leboha lengeloi leo? Tlaleho e bontša feela hore moprofeta o ile a ja ’me a noa eaba o boetse oa robala. Na ebe o ne a nyahame hoo a neng a sitoa le ho bua? Ho sa tsotellehe hore na boemo e ne e le bofe, lengeloi leo le ile la mo tsosa lekhetlo la bobeli, mohlomong ha mafube a hlaha. Le ile la boela la re ho Elia, “Tsoha, u je,” la ba la eketsa ka mantsoe ana a ikhethang, “etsoe leeto le boima bakeng sa hao.”—1 Marena 19:5-7.

Ka lebaka la temohisiso eo le e fuoeng ke Molimo, lengeloi leo le ne le tseba hore na Elia o ea hokae. Le ne le boetse le tseba hore ho ke ke ha e-ba bonolo hore Elia a phethe leeto leo ka matla a hae. Ho tšelisa hakaakang ho sebeletsa Molimo ea tsebang lintho tseo re batlang ho li finyella le mefokolo ea rōna ho feta le rōna beng ba tsona! (Pesaleme ea 103:13, 14) Lijo tseo li ile tsa thusa Elia joang?

Rea bala: “A tsoha eaba oa ja le ho noa, ’me a ’na a tsamaea ka matla a lijo tseo ka matsatsi a mashome a mane le masiu a mashome a mane ho ea fihla thabeng ea Molimo oa ’nete, Horebe.” (1 Marena 19:8) Joaloka Moshe lilemong tse makholo a tšeletseng pele ho eena, le joaloka Jesu lilemo tse ka bang sekete ka mor’a hae, Elia o ile a qeta matsatsi a 40 le masiu a 40 a sa je. (Exoda 34:28; Luka 4:1, 2) Lijo tseo ha lia ka tsa etsa hore mathata ’ohle a hae a fele, empa li ile tsa mo matlafatsa ka tsela ea mohlolo. U se u ka inahanela feela letsatsi le letsatsi, beke le beke nako e ka etsang khoeli le halofo monna eo ea seng a hōlile a tsamaea ka thata lefelleng le bileng le se nang litsela!

Le kajeno Jehova o matlafatsa bahlanka ba hae, eseng ka lijo tsa mohlolo, empa ka tsela ea bohlokoa ho feta eo. O fepa bahlanka ba hae moeeng. (Matheu 4:4) Ho ithuta ka Molimo ka ho bala Lentsoe la hae le libuka tseo ka hloko li thehiloeng Bibeleng hoa re matlafatsa moeeng. Ho ja lijo tseo tsa moea ho ke ke ha felisa mathata a rōna kaofela, empa ho ka re thusa hore re mamelle ao mohlomong re neng re ke ke ra khona ho a mamella. Hape ho lebisa ‘bophelong bo sa feleng.’—Johanne 17:3.

Elia o ile a tsamaea lik’hilomithara tse ka bang 320 ho fihlela a fihla Thabeng ea Horebe, moo nakong e fetileng, Jehova Molimo ka lengeloi la hae a neng a ile a itlhahisa ho Moshe sehlahleng se tukang le moo hamorao Jehova a ileng a etsa selekane sa Molao le Baiseraele. Elia o ile a fumana moo a ka sunyang hlooho teng ka lehaheng.

Kamoo Jehova a Ileng a Tšelisa le ho Matlafatsa Moprofeta oa Hae

Ha a le Horebe, “lentsoe” la Jehova—ho hlakile hore e ne e le ka lengeloi le romiloeng—le ile la mo botsa potso ena e bonolo: “U batla’ng mona, Elia?” Ho ka etsahala hore ebe potso eo e ne e botsitsoe ka mosa hobane Elia o ile a nka e mo khothalletsa hore a tšolle pelo ea hae, ’me o ile a fela a e tšolla! O ile a re: “Ke ’nile ka boulella Jehova Molimo oa mabotho ka ho feletseng; etsoe bara ba Iseraele ba tlohetse selekane sa hao, ba qhaqhile lialetare tsa hao, ’me ba bolaile baprofeta ba hao ka sabole, hoo ke setseng ke le mong; ba qala ho batla moea oa ka hore ba o tlose.” (1 Marena 19:9, 10) Bonyane mantsoe ao a Elia a ile a fana ka mabaka a mararo a hore na ke hobane’ng ha a nyahame.

Lebaka la pele, Elia o ne a utloa eka mosebetsi oa hae e bile oa lefeela. Ho sa tsotellehe lilemo tse ngata tseo a li qetileng a sebeletsa Jehova ka ho ‘boulela ka ho feletseng,’ a beha lebitso la Molimo le halalelang le borapeli ba hae pele ho tsohle, Elia o ne a bona eka maemo a mpefala le ho feta. Batho ba ne ba ntse ba se na tumelo ba bile ba tletse borabele, ha borapeli ba bohata bona bo ne bo jele setsi. La bobeli, Elia o ne a ikutloa a se na mang oe! O ile a re: ‘Ke setse ke le mong,’ joalokaha eka e ne e le eena feela ea setseng a sebeletsa Jehova sechabeng seo kaofela. La boraro, Elia o ne a tšohile. Ho ne ho se ho bolailoe baprofeta-’moho le eena ba bangata, ’me o ne a kholisehile hore ho latela eena. E ka ’na eaba ho ne ho se bonolo hore Elia a lumele hore o na le maikutlo ao, empa ha aa ka a lumella boikhohomoso kapa lihlong hore li mo sitise ho bua. Ka ho tšollela pelo ea hae ho Molimo thapelong, o sietse batho bohle ba tšepahalang mohlala o motle.—Pesaleme ea 62:8.

Jehova o ile a sebetsana joang le maikutlo ao a Elia a ho tšoha le a lintho tseo a amehileng ka tsona? Lengeloi le ile la bolella Elia hore a eme monyako oa lehaha. O ile a etsa joalo, a sa tsebe hore na ho tlil’o latela eng. Ho ile ha tsoha moea o matla! E tlameha ebe molumo oa oona o ne o thiba litsebe hobane o ne o le matla hoo o ileng oa petsola lithaba le mafika. Inahanele feela ha Elia a leka ho sireletsa mahlo a hae ha ka lehlakoreng le leng a mamaretse seaparo sa hae se entsoeng ka boea, se seng mahalihali, ha a ntse a puputloa ke moea. Joale o ile a loanela ho tsepamisa maoto fatše kaha ho ile ha qala ho ba le tšisinyeho ea lefatše! E ne e le moo a reng o re nk’hu! ha ho e-ba le mollo o moholo o ileng oa mo qobella hore a khutlele ka lehaheng ho ea ipatela lebatama la mollo.—1 Marena 19:11, 12.

Ketsahalong ka ’ngoe, tlaleho e re bolella hore Jehova o ne a se har’a lintho tseo tse neng li bontša matla a tlhaho. Elia o ne a tseba hore Jehova hase molimo ea inahaneloang joaloka Baale eo barapeli ba hae ba thetsitsoeng ba neng ba mo bitsa “Ea Kaletseng Maru,” kapa ea nesang pula. Jehova ke Mohloli oa sebele oa matla ’ohle a hlollang a teng tlhahong, empa hape o moholo haholo ho feta ntho leha e le efe eo a e entseng. Esita le maholimo ka booona a ke ke a mo lekana! (1 Marena 8:27) Leha ho le joalo, lintho tsee kaofela li ile tsa thusa Elia joang? Hopola hore o ne a tšohile. Empa kaha o ne a e-na le Molimo ea kang Jehova ka lehlakoreng la hae, ea neng a e-na le matla ao a maholohali, ho ne ho se na lebaka la hore Elia a tšohe Akabe le Jezebele!—Pesaleme ea 118:6.

Ka mor’a hore mollo o fete, ho ile ha e-ba le khutso e khōlō eaba Elia o utloa “lentsoe le bonolo, le tlaase.” Le ne le mo khothalletsa hore a tšolle maikutlo a hae hape ’me o ile a fela a etsa joalo, a ntša lintho tsohle tse mo tšoenyang ka lekhetlo la bobeli.b Mohlomong seo se ile sa etsa hore ka mor’a moo a utloe ho itse kokololo! Leha ho le joalo, ha ho pelaelo hore Elia o ile a tšelisoa le ho feta ke seo “lentsoe le bonolo, le tlaase” le ileng la mo bolella sona ka mor’a moo. Jehova o ile a tiisetsa Elia hore ka sebele e ntse e le motho oa bohlokoa. O ile a etsa seo joang? Molimo o ile a senola seo a rerileng ho se etsa nakong e tlang mabapi le ho loantša borapeli ba Baale Iseraele. Ho hlakile hore mosebetsi oa Elia e ne e sa ka ea e-ba oa lefeela kaha morero oa Molimo o ne o sa tl’o engoa pele ke letho. Ho feta moo, ho ne ho ntse ho e-na le karolo eo Elia a tla e phetha morerong oo kaha Jehova o ile a mo khutlisetsa morao hore a e’o phetha litaelo tse itseng tse tobileng.—1 Marena 19:12-17.

Ho thoe’ng ka tsela eo Elia a neng a ikutloa ka eona ea hore ha a na mang oe? Jehova o ile a etsa lintho tse peli ka taba eo. Ea pele, o ile a bolella Elia hore a e’o tlotsa Elisha hore e be moprofeta eo qetellong e neng e tla ba eena ea mo hlahlamang. Mohlankana eo e ne e tla ba mphato oa Elia le mothusi oa hae ka lilemo tse ngata. Ao e bile matšeliso a sebele hakaakang! Ea bobeli, Jehova o ile a senola litaba tsena tse thabisang: “Ke siile ba likete tse supileng Iseraele, mangole ’ohle a sa kang a khumamela Baale, le molomo o mong le o mong o sa kang oa mo aka.” (1 Marena 19:18) Ho hang Elia o ne a sa sala a le mong. E tlameha ebe o ile a khothatsoa ke ho utloa hore ho na le batho ba tšepahalang ba likete ba hanneng ho rapela Baale. Ba ne ba lebeletse hore Elia a tsoele pele a tšepahala tšebeletsong ea hae, a ba behele mohlala o motle oa ho khomarela Jehova ka tieo linakong tseo tse mahlonoko. E tlameha ebe Elia o ile a ameha haholo ha a utloa mantsoe ao a Molimo oa hae a neng a buuoa ke lenģosa la Jehova ka “lentsoe le bonolo, le tlaase.”

Joaloka Elia, re ka ’na ra hlolloa ke matla a maholohali a tlhaho a bonahalang pōpong, ’me le joale re lokela ho hlolloa. Pōpo e bontša ka ho hlaka matla ao ’Mōpi a nang le ’ona. (Baroma 1:20) Jehova o ntse a rata ho sebelisa matla a hae a sa lekanngoeng ho thusa bahlanka ba hae ba tšepahalang. (2 Likronike 16:9) Leha ho le joalo, Molimo o bua le rōna ka ho toba ka Lentsoe la hae, e leng Bibele. (Esaia 30:21) Bibele e ka tšoantšoa le “lentsoe le bonolo, le tlaase,” leo ka lona kajeno Jehova a re tataisang, a re laeang, a re khothatsang le ho re tiisetsa hore oa re rata.

Na Elia o ile a amohela khothatso eo Jehova a mo fang eona Thabeng ea Horebe? Ha ho pelaelo hore o ile a e amohela! Ka mor’a nakoana o ne a boetse a khutletse mosebetsing oa hae, e se e le moprofeta ea sebete, ea tšepahalang ea ileng a ema a tiile har’a bobe ba borapeli ba bohata. Haeba le rōna re nka mantsoe a bululetsoeng a Molimo ka botebo, e leng “matšeliso a tsoang Mangolong,” re tla khona ho etsisa tumelo ea Elia.—Baroma 15:4.

[Mongolo o botlaaseng ba leqephe]

[Setšoantšo se leqepheng la 19]

Jehova o ile a hlohonolofatsa Elia haholo, ha ho le monate le ha ho nyolosetsa

[Setšoantšo se leqepheng la 20]

Elia o ile a tšollela pelo ea hae ho Jehova ha a ne a nyahame haholo

[Setšoantšo se leqepheng la 21]

Jehova o ile a sebelisa matla a hae a hlollang ho tšelisa le ho khothatsa Elia