Litšupiso Tsa Bukana ea Seboka sa Bophelo le Tšebeletso ea Rona
LA 1-LA 7 JULY
MATLOTLO A TSOANG BIBELENG | BAKOLOSE 1-4
“Hlobola Botho ba Khale ’me U Ikapese bo Bocha”
(Bakolose 3:5-9) Ka hona, le bolaee litho tsa ’mele ea lona tse lefatšeng mabapi le bohlola, ho se hloeke, takatso ea botona kapa ea botšehali, takatso e kotsi, le ho chacheha ka mohono, e leng borapeli ba litšoantšo. 6 Ka lebaka la lintho tseo khalefo ea Molimo ea tla. 7 Le lona, le kile la tsamaea linthong tseo ha le ne le phela ho tsona. 8 Empa joale ka sebele li tloseng kaofela ho lona, khalefo, bohale, bobe, puo e nyefolang, le puo e nyonyehang melomong ea lona. 9 Le se ke la bolellana leshano. Hlobolang botho ba khale le litloaelo tsa bona,
Amohela Moea oa Molimo, Eseng oa Lefatše
Botho ba ka bo bontša hore ke na le moea ofe? (Bala Bakolose 3:8-10, 13.) Moea oa lefatše o ntšetsa pele mesebetsi ea nama. (Bagal. 5:19-21) Ntho e hlileng e bontšang hantle hore na re na le moea ofe ke ha lintho li sa tsamaee hantle, joalokaha mora kapa morali oabo rona oa Mokreste a re hlokomoloha, a re utloisa bohloko kapa a bile a re siteloa. Ho phaella moo, ha re le malapeng moo re le bang, ho ka ’na ha hlaka hore na re laoloa ke moea ofe. Ho ka ’na ha hlokahala hore re itlhahlobe. Ipotse, ‘Likhoeling tse tšeletseng tse fetileng, na botho ba ka bo bile joaloka ba Kreste haholoanyane kapa ke khutletse mekhoeng ea ka e mebe lipuong le boitšoarong?’
Moea oa Molimo o ka re thusa hore re ‘hlobole botho ba khale le litloaelo tsa bona’ le hore re ikapese “botho bo bocha.” Seo se tla re thusa hore re be le lerato le ho feta le hore re be mosa. Ho tla ba bonolo hore re tšoarelane ka bolokolohi, le haeba re e-na le lebaka le utloahalang la ho utloa bohloko. Ha re sa tla hlola re bontša “lehloeo le nang le lonya le bohale le khalefo le ho tleroha le puo e nyefolang” haeba re nahana hore re sebelitsoe ka ho hloka toka. Ho e-na le hoo, re tla etsa boiteko ba hore re be le “qenehelo e bonolo.”—Baef. 4:31, 32.
(Bakolose 3:10-14) ’me le ikapese botho bo bocha, boo ka tsebo e nepahetseng bo ntseng bo nchafatsoa ho ea ka setšoantšo sa Ea bo bopileng, 11 boo ho bona ho seng Mogerike kapa Mojuda, lebollo kapa ho se bolle, osele, Moskitha, lekhoba, motho ea lokolohileng, empa Kreste e le lintho tsohle ’me a le ho tsohle. 12 Ka lebaka leo, joaloka bakhethoa ba Molimo, ba halalelang le ba ratoang, le ikapese lerato le mofuthu la qenehelo, mosa, ho ikokobetsa kelellong, bonolo, le tiisetso. 13 Tsoelang pele le mamellana le ho tšoarelana ka bolokolohi haeba leha e le mang a e-na le sesosa sa pelaelo khahlanong le e mong. Esita le joalokaha Jehova a ile a le tšoarela ka bolokolohi, le etse joalo le lona. 14 Empa, ntle ho lintho tsena kaofela, le ikapese lerato, etsoe ke tlamo e phethahetseng ea bonngoe.
Na U Fetohile?
Haeba re batla hore Lentsoe la Molimo le re fetole, ha rea lokela ho le bala le ho le tseba feela. Batho ba bangata ba bala Bibele khafetsa, ka lebaka leo baa tseba hore na e re’ng. Mohlomong u kile ua kopana le batho ba mofuta oo tšebeletsong ea tšimo. Ba bang ba bile ba khona ho pheta litemana tsa Bibele ka hlooho. Leha ho le joalo, sena se ka ’na sa se ke sa ama tsela eo ba nahanang le eo ba phelang ka eona. Ho hlokahala hore ba etse’ng? E le hore Lentsoe la Molimo le susumetse motho le be le mo fetole, o lokela ho le lumella hore le “theohele” pelong. (Gal 6:6, NW.) Kahoo, re lokela ho qeta nako re nahana ka seo re ithutang sona. E ka ba hantle hore re ipotse: ‘Na ke kholisehile hore see hase thuto ea bolumeli feela tjee? Na ke hlokometse hore ke ’nete? Ho feta moo, na ke hlokomela litsela tseo nka sebelisang seo ke ithutang sona ka tsona, eseng feela e le seo nka se rutang ba bang? Na ke nka hore Jehova o bua le ’na ka ho toba?’ Ho nahana le ho thuisa ka lipotso tse kang tseo ho ka re thusa hore re matlafatse kamano ea rona le Jehova. Lerato leo re mo ratang ka lona le tla eketseha. Ha seo re ithutang sona se ama lipelo tsa rona, re tla susumelletseha hore re etse liphetoho tse tla thabisa Molimo.—Lipr 4:23; Lu 6:45.
Ho bala Lentsoe la Molimo kamehla le ho thuisa ka lona ho tla re susumelletsa hore re tsoele pele re etsa seo re seng re qalile ho se etsa, e leng ho ‘hlobola botho ba khale le litloaelo tsa bona, ’me re ikapese botho bo bocha, boo ka tsebo e nepahetseng bo ntseng bo nchafatsoa.’ (Kol 3:9, 10) Haeba re hlile re utloisisa se rutoang ke Bibele re bile re sebelisa seo re ithutang sona, seo se tla re susumelletsa hore re apare botho bo bocha ba Bokreste bo tla re sireletsa marabeng a Satane.
Batlisisa Matlotlo a Patiloeng
(Bakolose 1:13, 14) O ile a re lopolla matleng a lefifi ’me a re fetisetsa ’musong oa Mora oa hae ea ratoang, 14 eo ka eena re nang le tokollo ea rona ka thekollo, tšoarelo ea libe tsa rona.
it-2-E 169 ¶3-5
’Muso oa Molimo
‘ ’Muso oa Mora oa Hae ea Ratoang.’ Matsatsi a leshome ka mor’a hore Jesu a nyolohele leholimong ka Pentekonta ea selemo sa 33, barutuoa ba hae ba ile ba e-ba le bopaki ba hore “o ile a phahamisetsoa ka letsohong le letona la Molimo,” ha a ne a tšollela moea o halalelang holim’a bona. (Lik 1:8, 9; 2:1-4, 29-33) “Selekane se secha” se ile sa qala ho sebetsa ho bona ’me ea e-ba motheo oa “sechaba se halalelang” se secha e leng Iseraele ea moea.—Heb 12:22-24; 1Pe 2:9, 10; Gal 6:16.
Kreste o ne a se a lutse ka letsohong le letona la Ntate oa hae ’me e ne e le Hlooho ea phutheho. (Ef 5:23; Heb 1:3; Fil 2:9-11) Bibele e bontša hore ho tloha ka Pentekonta ea selemo sa 33 ho ea pele ka mor’a hore Jesu a tlohe lefatšeng, Molimo o ile a theha ’Muso bakeng sa barutuoa ba hae. Ha moapostola Pauluse a ne a ngolla Bakreste ba Kolose ba mehleng ea baapostola, o ile a bua ka Jesu Kreste e se e le ea nang le ’Muso. A re: “[Molimo] o ile a re lopolla matleng a lefifi ’me a re fetisetsa ’musong oa Mora oa hae ea ratoang.”—Kol 1:13; bapisa le Lik 17:6, 7.
Ho tloha ka Pentekonta ea selemo sa 33 ho ea pele, ’Muso oa Kreste e ne e le o thehiloeng ke Molimo o busang holim’a Iseraele ea Molimo, e leng, Bakreste ba tlotsitsoeng ka moea oa Molimo hore e be bana ba Molimo. (Joh 3:3, 5, 6) Ha bara bana ba Molimo ba fumana moputso oa ho phela leholimong, ba ke ke ba busoa ke puso ea Kreste ba le mona lefatšeng empa e tla ba marena le Kreste leholimong.—Tše 5:9, 10
(Bakolose 2:8) Hlokomelang: mohlomong ho ka ba le e mong ea tla le nka joaloka phofu ea hae ka filosofi le thetso ea lefeela ho ea ka neano ea batho, ho ea ka lintho tsa motheo tsa lefatše eseng ho ea ka Kreste;
Lintlha-kholo Tsa Mangolo a Eang ho Bagalata, Baefese, Bafilipi le Bakolose
2:8—“Lintho tsa motheo tsa lefatše” tseo Pauluse a lemositseng ka tsona ke life? Ke lintho tsa lefatše la Satane—e leng lintho tsa motheo kapa melao-motheo e le bopang, e le tataisang kapa e le susumetsang. (1 Joh. 2:16) Har’a tsona ho akha filosofi, ho rata leruo le malumeli a bohata a lefatše lena.
’Malo oa Bibele
(Bakolose 1:1-20) Pauluse, moapostola oa Kreste Jesu ka thato ea Molimo, le Timothea mor’abo rona 2 ho bahalaleli le barab’abo rona ba tšepahalang ba bonngoeng le Kreste ba leng Kolose: E se eka le ka ba le mosa o sa tšoanelang le khotso e tsoang ho Molimo Ntat’a rona. 3 Re leboha Molimo Ntate oa Morena oa rona Jesu Kreste kamehla ha re le rapella, 4 kaha re ile ra utloa ka tumelo ea lona mabapi le Kreste Jesu le lerato leo le nang le lona bakeng sa bahalaleli bohle 5 ka lebaka la tšepo eo le e boloketsoeng maholimong. Tšepo ena le ile la utloa ka eona pele ka ho boleloa ha ’nete ea litaba tseo tse molemo 6 tse itlhahisitseng ho lona, esita le joalokaha li beha litholoana le ho eketseha lefatšeng lohle feela joalokaha li etsa le har’a lona, ho tloha letsatsing leo ka lona le ileng la utloa le ho tseba ka ho nepahetseng mosa o sa tšoanelang oa Molimo ka ’nete. 7 Ke seo le ithutileng sona ho Epafrase lekhoba-’moho le rona le ratoang, eo e leng mosebeletsi ea tšepahalang oa Kreste bakeng sa rona, 8 eo hape a ileng a re senolela lerato la lona ka tsela ea moea. 9 Ke ka lebaka leo hape, ho tloha letsatsing leo ka lona re ileng ra utloa ka hona, re sa khaotsang ho le rapella le ho kopa hore le ka tlala tsebo e nepahetseng ea thato ea hae ka bohlale bohle le kutloisiso ea moea, 10 e le hore le tsamaee ka mokhoa o tšoanelang Jehova e le hore le mo khahlise ka botlalo ha le ntse le tsoela pele ho beha litholoana mosebetsing o mong le o mong o molemo le ho hola tsebong e nepahetseng ea Molimo, 11 le ntse le etsoa ba matla ka matla ’ohle ho isa tekanyong ea bonatla ba hae bo khanyang e le hore le mamelle ka botlalo ’me le tiisetse ka thabo, 12 le leboha Ntate ea ileng a le etsa ba loketseng hore le be le karolo lefeng la bahalaleli leseling. 13 O ile a re lopolla matleng a lefifi ’me a re fetisetsa ’musong oa Mora oa hae ea ratoang, 14 eo ka eena re nang le tokollo ea rona ka thekollo, tšoarelo ea libe tsa rona. 15 Ke setšoantšo sa Molimo ea sa bonahaleng, letsibolo la popo eohle; 16 hobane lintho tse ling tsohle tse maholimong le tse lefatšeng li ile tsa boptjoa ho sebelisoa eena, lintho tse bonahalang le lintho tse sa bonahaleng, ho sa tsotellehe hore na ke literone kapa borena kapa mebuso kapa balaoli. Lintho tse ling tsohle li bopiloe ka eena le bakeng sa hae. 17 Hape, o ka pele ho lintho tse ling tsohle ’me ka eena lintho tse ling tsohle li ile tsa etsoa hore li be teng, 18 ’me ke hlooho ea ’mele, phutheho. Ke tšimoloho, letsibolo ho tsoa bafung, e le hore e ka ba eena oa pele linthong tsohle; 19 hobane Molimo o ile a bona ho le molemo hore botlalo bohle bo lule ho eena, 20 le hore ka eena a boelanye hape lintho tse ling tsohle le eena ka ho etsa khotso ka mali ao a ileng a a tšolla thupeng ea tlhokofatso, ho sa tsotellehe hore na ke lintho tse lefatšeng kapa lintho tse maholimong.
La 8-La 14 JULY
MATLOTLO A TSOANG BIBELENG | 1 BATHESALONIKA 1-5
“Le ’ne le Tšelisane le ho Hahana”
(1 Bathesalonika 5:11-13) Ka hona le ’ne le tšelisane le ho hahana, feela joalokaha le etsa. 12 Joale rea le kopa, barab’eso, hore le hlomphe ba sebetsang ka thata har’a lona le ba le okametseng Moreneng le ba le eletsang; 13 le ba ele hloko haholo ka lerato ho feta kamoo ho tloaelehileng ka lebaka la mosebetsi oa bona. E mong a be le khotso le e mong.
“Le Hlomphe ba Sebetsang ka Thata Har’a Lona”
12 Ho ‘okamela’ phutheho ha ho bolele ho ruta feela. Ho sebelisitsoe poleloana e tšoanang ho 1 Timothea 3:4. Pauluse o ile a re molebeli e lokela ho ba “motho ea okamelang ba ntlo ea hae ka mokhoa o motle, ea nang le bana ba ipehileng tlaase ka ho nka lintho ka botebo bohle.” Ho hlakile hore mona poleloana e reng “ea okamelang” ha e akarelletse ho ruta bana ba hae feela, empa e boetse e akarelletsa ho etella pele ka lapeng le ho ba le “bana ba ipehileng tlaase.” Ka sebele, baholo ba etella phutheho pele, ba thusa bohle hore ba ikokobeletse Jehova.—1 Tim. 3:5.
“Le Hlomphe ba Sebetsang ka Thata Har’a Lona”
U ne u tla etsa’ng haeba u ne u ka fumana mpho e etselitsoeng uena ka ho khetheha? Na u ne u tla bontša hore ua e ananela ka hore u e sebelise? Jehova o u file “limpho tseo e leng banna” a sebelisa Jesu Kreste. Tsela e ’ngoe eo u ka bontšang hore u ananela limpho tsena ka eona, ke ka hore u mamele ka hloko ha baholo ba fana ka lipuo le ka hore u leke ho sebelisa lintlha tseo ba li hlahisang. U ka boela ua bontša hore ua ba ananela ka hore u fane ka litlhaloso tse utloahalang ha u le libokeng. Tšehetsa mesebetsi eo baholo ba etellang pele ho eona, e kang tšebeletso ea tšimo. Haeba keletso eo moholo a ileng a u fa eona e u tsoetse molemo, e ka ba hantle hore u mo bolelle. Ho phaella moo, e ka ba hantle hore u bontše hore u ananela malapa a baholo. Hopola hore lelapa la moholo le tela nako eo le ka beng le e qeta le eena e le hore a sebetse ka thata ka phuthehong.
(1 Bathesalonika 5:14) Ka lehlakoreng le leng, rea le eletsa, barab’eso, le eletse ba sa laoleheng, le bue ka mokhoa o tšelisang le meea e tepeletseng maikutlo, le tšehetse ba fokolang, le be le tiisetso ho bohle.
“Re Rate ka Ketso le ’Nete”
Thusa bao tumelo ea bona e fokolang. Bibele e re re lokela ho ‘tšehetsa ba fokolang, re be le tiisetso ho bohle.’ Ka ho etsa joalo re tla be re bontša lerato la ’nete. (1 Th 5:14) Hangata Bakreste ba bang ba ka khona ho lokisa kamano ea bona le Jehova ’me ba e-ba le tumelo hape. Leha ho le joalo, ba bang ba hloka hore re be le mamello ’me re ba thuse ka mosa. Re ka ba thusa joang? Re ka sebelisa Bibele ho ba khothatsa, ra ba mema ha re ea tšimong kapa ra ipha nako ea ho ba mamela ha ba hloka ho bua. Ha rea lokela ho nahana feela hore tumelo ea mora kapa morali’abo rona e “matla” kapa ea “fokola” empa re lokela ho hopola hore kaofela ha rona re ka fokola kapa re ka ba matla tumelong. Moapostola Pauluse le eena o ne a lumela hore o na le mefokolo. (2 Ko 12:9, 10) Kaofela ha rona re hloka thuso ea bara le barali babo rona le ho khothatsoa.
Etsisang Boikokobetso le Qenehelo ea Jesu
Re bue le ba bang ka bonolo. Boikutlo bo mofuthu bo re susumelletsa ho ‘bua ka mokhoa o tšelisang le meea e tepeletseng maikutlo.’ (1 Th 5:14) Re ka re’ng ho khothatsa batho ba joalo? Re ka ba bolella kamoo re ba tsotellang kateng. Ra ba babatsa ’me ra ba thusa hore ba lemohe litšobotsi tsa bona tse ntle le bokhoni ba bona. Hape re ka ba hopotsa hore ke Jehova ea ba thusitseng hore ba tsebe ’nete, ’me kahoo ke ba bohlokoa ho eena. (Joh 6:44) Re ka boetse ra ba tiisetsa hore Jehova o tsotella bahlanka ba hae “ba lipelo li robehileng” le “ba sithabetseng moeeng.” (Pes 34:18) Ha re bua ka bonolo re ka khatholla batho ba hlokang matšeliso.—Lipr 16:24.
Batlisisa Matlotlo a Patiloeng
(1 Bathesalonika 4:-6) Etsoe sena ke seo Molimo a se ratang, hore le halaletsoe, hore le ile bohlola; 4 hore e mong le e mong oa lona a tsebe ho ruela sejana sa hae khalaletsong le tlhomphong, 5 eseng takatsong ea botona kapa ea botšehali e chachehisang ka mohono e kang eo le lichaba tseo tse sa tsebeng Molimo li nang le eona; 6 hore ho se ke ha e-ba le ea mong ea eang ntlheng ea ho ntša kotsi le ho nyonyobela litokelo tsa mor’abo tabeng ena, hobane Jehova ke eena ea batlang hore ho fanoe ka kotlo bakeng sa lintho tsena kaofela, feela joalokaha re ile ra le bolella esale pele ’me hape ra le fa bopaki bo phethahetseng.
it-1-E 863-864
Bohlola
Bohlola ke ntho e ka etsang hore motho a lelekoe (khaoloe) ka phuthehong ea Bokreste. (1Ko 5:9-13; Heb 12:15, 16) Moapostola o hlalosa hore Mokreste ea etsang bohlola o siteloa ’mele oa hae, ka ho sebelisa litho tsa botona kapa tsa botšehali bakeng sa morero o fosahetseng. Bohlola bo senya kamano ea motho le Molimo kaha bo silafatsa phutheho. Hape, motho o beha bophelo ba hae kotsing ka ho ipepesetsa mafu a tšoaetsanoang a likobo. (1Ko 6:18, 19) Motho o kena-kenana le litokelo tsa Mokreste ’moho le eena (1Th 4:3-7) ka ho (1) tlisa litšila, ntho e lihlong le nyeliso ka phuthehong (Heb 12:15, 16), (2) ho thibela motho ea etsang bohlola le eena hore a lule a hloekile pele a kena lenyalong, haholo haeba motho eo e le lesoha, (3) etsa hore lelapa la habo le se ke la ba le tlaleho e ntle ea bohloeki le ho (4) siteloa batsoali, molekane kapa motho ea neng a tl’o nyalana le eo a entseng bohlola le eena. Motho ea etsang bohlola ha a hlompholle melao ea batho, e ka lumellang bohlola kapa ea bo hanyetsa, empa o hlompholla Molimo ea tla fana ka kotlo bakeng sa sebe seo.—1Th 4:8.
(1 Bathesalonika 4:15-17) Etsoe sena ke seo re le bolellang sona ka lentsoe la Jehova, hore rona ba phelang ba ntseng ba setse ho fihlela ho beng teng ha Morena ka tsela leha e le efe re ke ke ra raka ba robetseng lefung; 16 hobane Morena o tla theoha leholimong ka mohoo o laelang, ka lentsoe la lengeloi le ka sehloohong le ka terompeta ea Molimo, ’me ba shoeleng bonngoeng le Kreste ba tla tsoha pele. 17 Ka mor’a moo rona ba phelang ba ntseng ba setse, hammoho le bona, re tla nkeloa marung ho ea kopana le Morena moeeng; ka tsela ena re tla ba le Morena kamehla.
‘Topollo ea Lona e Atametse’!
Ho tla etsahala’ng ha Gogo oa Magogo a hlasela batho ba Molimo? Bibele e re Mor’a motho “o tla romela mangeloi ’me o tla bokella bakhethoa ba hae ho tsoa meeeng e mene, ho tloha pheletsong ea lefatše ho isa pheletsong ea leholimo.” (Mar 13:27; Mat 24:31) Ho bokelloa hona ha bakhethoa ha ho etsahale nakong eo Bakreste ba tlotsitsoeng ba qalang ho khethoa ka eona. Ebile ha ho etsahale nakong ea tiiso ea ho qetela ea batlotsuoa ba ntseng ba le lefatšeng. (Mat 13:37, 38) Batlotsuoa ba fuoa tiiso ea ho qetela nakoana pele matšoenyeho a maholo a qala. (Tše 7:1-4) Joale ho bokelloa hoo ho etsahala neng? Ho etsahala ha batlotsuoa ba ntseng ba le lefatšeng ba fumana moputso oa bona ’me ba ea leholimong. (1 Th 4:15-17; Tše 14:1) Sena se tla etsahala ka mor’a hore Gogo oa Magogo a qale tlhaselo ea hae. (Eze 38:11) Joale, “ba lokileng ba tla khanya ka ho phatsimang joaloka letsatsi ’musong oa Ntat’a bona,” feela joalokaha Jesu a boletse.—Mat 13:43.
Na see se bolela hore batlotsuoa “ba tla nkeloa sebakeng”? Ba bangata Bokreste-’motoaneng ba lumela hore Bakreste ba tla nkeloa leholimong ka ’mele ea nama. Ba boetse ba nahana hore ba tla bona Jesu ka mahlo ha a khutla ho tla busa lefatšeng. Empa Bibele e bontša ka ho hlaka hore Jesu o tla khutla ka mokhoa o sa bonahaleng, ha e re: “Pontšo ea Mor’a motho e tla bonahala leholimong” ’me Jesu o tla tla “ka maru a leholimo.” (Matheu 24:30) Bibele e boetse e re “nama le mali li ke ke tsa rua ’muso oa Molimo.” Kahoo, batlotsuoa ba tla nkeloa leholimong ba lokela ho “fetoloa, ka motsotsoana, ka ho panya ha leihlo, nakong ea terompeta ea ho qetela.” (Bala 1 Bakorinthe 15:50-53.) Re ke ke ra re “ba tla nkeloa sebakeng,” kaha eo ke thuto ea Bokreste-’motoana. Empa batlotsuoa ba tšepahalang ba tla beng ba ntse ba le lefatšeng ba tla bokelloa hammoho ka ho panya ha leihlo.
’Malo oa Bibele
(1 Bathesalonika 3:1-13) Kahoo, ha re se re sa khone ho mamella, re ile ra bona ho le molemo hore re sale re le bang Athene; 2 eaba re roma Timothea, mor’abo rona le mosebeletsi oa Molimo litabeng tse molemo tse mabapi le Kreste, e le ho le tiisa le ho le tšelisa bakeng sa tumelo ea lona, 3 e le hore ho se ke ha e-ba le ea ka sisinngoang ke matšoenyeho ana. Etsoe lea tseba hore re behetsoe ntho eona ena. 4 Hape, ha e le hantle, ha re ne re e-na le lona, re ne re ee re le bolelle esale pele hore re ne re reretsoe ho utloisoa bohloko ke matšoenyeho, feela joalokaha ho boetse ho etsahetse le joalokaha le tseba. 5 Ke ka lebaka leo, ha ke se ke sa khone ho mamella, ke ileng ka romeletsa hore ke tsebe ka botšepehi ba lona, kaha mohlomong ka tsela e itseng e ka ’na eaba Moleki o le lekile, ’me e ka ’na eaba mosebetsi oa rona o fetohile oa lefeela. 6 Empa Timothea o sa tsoa fihla ho rona a tsoa ho lona ’me o re file litaba tse molemo mabapi le botšepehi ba lona le lerato la lona, le hore le tsoela pele ho re hopola hamolemo kamehla, le hlolohetsoe ho re bona ka tsela e tšoanang, joalokaha le rona re hlolohetsoe ho le bona. 7 Ke ka lebaka leo, barab’eso, re tšelisehileng ka lona ho hlokeng hohle ha rona le matšoenyehong ’ohle a rona ka botšepehi boo le bo bontšang, 8 hobane joale rea phela haeba le ema le tiile Moreneng. 9 Etsoe ke liteboho life tseo re ka fanang ka tsona ho Molimo malebana le lona e le puseletso bakeng sa thabo eohle eo re thabang ka eona ka lebaka la lona ka pel’a Molimo oa rona, 10 ha bosiu le motšehare re ntse re etsa lithapeli tse fetang tse tloaelehileng hore re bone lifahleho tsa lona le ho lokisa lintho tse haellang mabapi le tumelo ea lona? 11 Joale e se eka Molimo le Ntate oa rona le Morena oa rona Jesu ba ka tsamaisa ka katleho tsela ea rona e tlang ho lona. 12 Ho feta moo, e se eka Morena a ka etsa hore le hole, e, a etsa hore le ateloe, ho bontšaneng lerato le ho bohle, esita le joalokaha le rona re etsa joalo ho lona; 13 e le hore a ka tiisa lipelo tsa lona, tse ke keng tsa tšoauoa phoso khalalelong ka pel’a Molimo le Ntate oa rona ho beng teng ha Morena oa rona Jesu le bahalaleli bohle ba hae.
La 15-La 21 JULY
MATLOTLO A TSOANG BIBELENG | 2 BATHESALONIKA 1-3
“Ea sa Eeng ka Molao oa Senoloa”
(2 Bathesalonika 2:6-8) Kahoo joale le tseba ntho e sebetsang e le thibelo, ka sepheo sa hore a senoloe ka nako ea hae e loketseng. 7 Ke ’nete, sephiri sa tlolo ena ea molao se se se ntse se sebetsa; empa ke feela ho fihlela ha ea sebetsang e le thibelo hona joale a tloha tseleng. 8 Joale, ka sebele, ea sa eeng ka molao o tla senoloa, eo Morena Jesu a tla mo felisa ka moea oa molomo oa hae ’me a mo etse lefeela ka ponahalo ea ho ba teng ha hae.
it-1-E 972-973
Boinehelo ba Bomolimo
Hona le sephiri se hananang ka ho feletseng le “sephiri se halalelang.” Ke “sephiri sa tlolo ena ea molao.” Bakreste ba ’nete ba ne ba sa tsebe sephiri sena hobane mehleng ea moapostola Pauluse, “motho ea sa eeng ka molao” o ne a sa tsebahale hantle hore na ke mang hape o ne a e-so senolehe. Ha e le hantle e ne e tla ba ho fetohela bolumeli ba ’nete. Pauluse o ile a re “sephiri sa tlolo ena ea molao” se ne se ntse se le teng mehleng ea hae kaha ka phuthehong ho ne ho e-na le ba bang ba susumetsang ba bang hore ba se ee ka molao eleng ho neng ho tla fella ka hore ho be le bakoenehi. Leha ho le joalo, Jesu Kreste o ne a tla felisa ho se ee ka molao hoo ka ponahalo ea ho ba teng ha hae. “Motho” enoa oa mokoenehi, ea susumetsoang ke Satane, o tla “iphahamisa holim ’a e mong le e mong ea bitsoang “molimo” kapa ntho e fuoang tlhompho ea borapeli.” Mohanyetsi enoa e moholo oa Molimo, ea susumetsoang ke Satane o tla ba leshano haholo ’me ba mamelang lithuto tsa hae ba tla timetsoa. “Motho ea sa eeng ka molao” o tla atleha hobane a ikhakantse, a etsa eka ke morapeli oa Molimo empa e se e eena.—2Th 2:3-12; bapisa le Mat 7:15, 21-23
(2 Bathesalonika 2:9-12) Empa ho ba teng ha ea sa eeng ka molao ho teng ho ea ka tšebetso ea Satane ka mosebetsi o mong le o mong o matla le lipontšo le limakatso tsa leshano 10 le ka thetso e ’ngoe le e ’ngoe e sa lokang bakeng sa ba timelang, e le tefetso hobane ha baa ka ba amohela lerato la ’nete e le hore ba ka pholoha. 11 Kahoo ke ka lebaka leo Molimo a tlohelang tšebetso ea ho fosahetseng hore e ee ho bona, e le hore ba ka lumela leshano, 12 e le hore kaofela ba ka ahloloa hobane ha baa ka ba lumela ’nete empa ba ile ba khahlisoa ke ho se loke.
it-2-E 245 ¶7
Leshano
Jehova Molimo o ‘tlohela tšebetso e fosahetseng’ ho batho ba ratang leshano “e le hore ba ka lumela leshano” eseng litaba tse molemo tsa Jesu Kreste. (2Th 2:9-12) Molao-motheo ona o bontša se ileng sa etsahala lilemong tse fetileng ho Morena Akabe oa Moiseraele. Baprofeta ba leshano ba ile ba tiisetsa Morena Akabe hore o ne a tla hlola ntoeng e khahlanong le Ramothe-gileade, ha moprofeta oa Jehova Mikaia a ile a bolela esale pele hore a ke ke a hlola. Ponong ea Mikaia, Jehova o ile a lumella sebopuoa sa moea hore se fetohe “moea o thetsang” melomong ea baprofeta bohle ba Akabe. E leng hore, sebopuoa sena sa moea se ile sa susumelletsa baprofeta bao hore ba bue lintho tse ratoang ke bona kapa tseo Akabe a batlang ho li utloa. Le hoja a ne a boleletsoe esale pele, Akabe o ile a khetha ho mamela mashano a baprofeta bao ’me a patala ka bophelo ba hae.—1Ma 22:1-38; 2Likr 18
Batlisisa Matlotlo a Patiloeng
(2 Bathesalonika 1:7, 8) Empa, ho lona ba utloisoang bohloko ke matšoenyeho, phomolo hammoho le rona tšenolong ea Morena Jesu ho tsoa leholimong le mangeloi a hae a matla 8 ka mollo o tukang, ha a tlisa phetetso holim’a ba sa tsebeng Molimo le ba sa mameleng litaba tse molemo tse mabapi le Morena oa rona Jesu.
it-1-E 834 ¶5
Mollo
Petrose o ile a ngola hore “maholimo le lefatše tse teng hona joale li boloketsoe mollo.” Ho latela moelelo oa temana eo le tlhakisetso ea litemana tse ling, ho hlakile hore mollo oo ho buuoang ka ona ha se mollo oa sebele empa o bolela timetso ea ka ho sa feleng. Joalokaha moroallo oa mehleng ea Noe o sa ka oa timetsa lefatše la sebele le maholimo, empa o ile oa timetsa batho ba sa mameleng Molimo. Mohlang Jesu a senoloang le mangeloi a hae a matla, ba tla tla ka mollo o tukang, ba felise batho ba sa mameleng Molimo le puso e khopo ea Satane.—2Pe 3:5-7, 10-13, 2Th 1:6-10; bapisa le Esa 66:15, 16, 22, 24
(2 Bathesalonika 2:2) hore le se ke la sisinngoa kapele monahanong oa lona leha e le ho feha matšoafo ebang ke ka polelo e bululetsoeng kapa ka molaetsa oa molomo kapa ka lengolo joalokaha eka le tsoa ho rona, le bolelang hore letsatsi la Jehova le fihlile.
it-1-E 1206 ¶4
Pululelo
“Lipolelo tse bululetsoeng” Tsa ’Nete le Tsa Bohata. Lentsoe la Segerike pneuʹma (le bolelang moea) le sebelisitsoe ka tsela e khethehileng libukeng tsa baapostola. Mohlala, ho 2 Bathesalonika 2:2, Pauluse o khothalletsa barab’abo ba Thesalonika hore ba se ke ba ‘sisinngoa kapele monahanong oa bona leha e le ho feha matšoafo ebang ke ka polelo e bululetsoeng kapa ka molaetsa oa molomo kapa ka lengolo joalokaha eka le tsoa ho rona, le bolelang hore letsatsi la Jehova le fihlile.’ Ho hlakile hore Pauluse o sebelisitse lentsoe la Segerike pneuʹma a le amahanya le mokhoa oa puisano kapa molaetsa, hobane o buile ka “molaetsa oa molomo” kapa “lengolo.” Ka lebaka lena, buka ea Lange ea Commentary on the Holy Scriptures leqhepheng la 126 ha e bua ka temana eena e re: “Ka sena, Moapostola o rera ho eletsa ka ho ba le kamano le Molimo, ho profeta ka boikhakanyo le polelo ea moprofeta.” (E fetoletsoe le ho hlophisoa ke P. Schaff ka 1976) Buka ea Vincent ea Word Studies in the New Testament e re: “Ka moea. Ka lipuo tsa boprofeta tsa batho ba fapaneng liphuthehong tsa Bakreste, ba bolela hore Molimo ke eena ea ba senolelang boitsebiso bona.” (1957, Vol. IV, p. 63) Le hoja liphetolelo tse ling li fetoletse pneuʹma ka hore ke “moea,” liphetolelo tse ling li re ke “molaetsa oa moea” (AT), “boprofeta” (JB), “pululelo” (D’Ostervald; Segond [French]), “lipolelo tse bululetsoeng” (NW)
’Malo oa Bibele
(2 Bathesalonika 1:1-12) Pauluse le Silvanase le Timothea ho phutheho ea Bathesalonika e bonngoeng le Molimo Ntate le Morena Jesu Kreste: 2 E se eka le ka ba le mosa o sa tšoanelang le khotso e tsoang ho Molimo Ntate le Morena Jesu Kreste. 3 Re tlamehile ho leboha Molimo kamehla bakeng sa lona, barab’abo rona, joalokaha ho loketse, hobane tumelo ea lona e hola ka ho fetisisa ’me lerato la e mong le e mong le la lona kaofela lea eketseha e mong ho e mong. 4 Ka lebaka leo re motlotlo ka lona har’a liphutheho tsa Molimo ka lebaka la mamello ea lona le tumelo ea lona mahlorisong ’ohle a lona le matšoenyeho ao le a mameletseng. 5 Sena ke bopaki ba kahlolo e lokileng ea Molimo, e isang ho nkoeng ha lona le le ba tšoaneloang ke ’muso oa Molimo, oo ka sebele le utloang bohloko ka lebaka la oona. 6 Sena ke ho ela hloko hore ho lokile hore Molimo a busetse matšoenyeho ho ba le tšoenyang, 7 empa, ho lona ba utloisoang bohloko ke matšoenyeho, phomolo hammoho le rona tšenolong ea Morena Jesu ho tsoa leholimong le mangeloi a hae a matla 8 ka mollo o tukang, ha a tlisa phetetso holim’a ba sa tsebeng Molimo le ba sa mameleng litaba tse molemo tse mabapi le Morena oa rona Jesu. 9 Bana ba tla feta kotlong ea boahloli ea timetso e sa feleng e tsoang ka pel’a Morena le e tsoang khanyeng ea matla a hae, 10 ka nako eo a tlang hore a tlotlisoe mabapi le bahalaleli ba hae le hore ka letsatsi leo a talingoe ka ho makala mabapi le bohle ba ileng ba bontša tumelo, hobane bopaki boo re ileng ra fana ka bona bo ile ba kopana le tumelo har’a lona. 11 Ho finyella seo, ka sebele re le rapella kamehla, hore Molimo oa rona a ke a le nke le le ba tšoaneloang ke pitso ea hae ’me a etse ka ho feletseng sohle se mo khahlang mabapi le molemo le mosebetsi oa tumelo ka matla; 12 e le hore lebitso la Morena oa rona Jesu le ka tlotlisoa ho lona, le lona bonngoeng le eena, tumellanong le mosa o sa tšoanelang oa Molimo oa rona le oa Morena Jesu Kreste.
LA 22-LA 28 JULY
MATLOTLO A TSOANG BIBELENG | 1 TIMOTHEA 1-3
“Hahamalla Mesebetsi e Metle”
(1 Timothea 3:1) Polelo eo ea tšepahala. Haeba motho leha e le ofe a hahamalla boemo ba molebeli, o lakatsa mosebetsi o motle.
Na U Bona ho Hlokahala Hore U Hatele Pele Moeeng?
Bala 1 Timothea 3:1. Lentsoe la Segerike le fetoletsoeng e le ho “hahamalla” le bolela ho otlolla letsoho u nanabela ntho e hole le uena. Moapostola Pauluse o ile a sebelisa lentsoe leo ha a hatisa ntlha ea hore ho hatela pele moeeng ho hloka boiteko. Nahana ka mor’abo rona ea thuisang ka lipakane tsa hae ka phuthehong. E ka ’na eaba hona joale hase mohlanka ea sebeletsang, empa o oa lemoha hore o lokela ho finyella litšoaneleho tse hlokahalang. O qala ka ho hahamalla ho ba mohlanka ea sebeletsang. Ha nako e ntse e ea, o tšepa hore o tla tšoaneleha ho sebeletsa e le moholo. Maemong ana ka bobeli, o sebetsa ka thata ho finyella litšoaneleho tse hlokahalang e le hore a ka fuoa boikarabelo bo eketsehileng ka phuthehong.
(1 Timothea 3:13) Etsoe banna ba sebeletsang ka mokhoa o motle ba iphumanela boemo bo botle le ho bua ka bolokolohi bo boholo tumelong mabapi le Kreste Jesu.
km-E 10/78 4 ¶7
‘Ba Iphumanelang Boemo bo Botle’
Rea hlokomela hore na ke hobane’ng ha Pauluse a re banna bana “ba iphumanela boemo bo botle.” Taba ena ha e tšoane le eo batho ba e buang ea hore ke ho fumana boemo bo phahameng ka kerekeng. Ho e-na le hoo, bahlanka “ba sebeletsang ka mokhoa o motle” ba fumana litlhohonolofatso tse tsoang ho Jehova le Jesu ’me ba tšehetsoa le ho hlomphuoa ke phutheho eohle. Kahoo, ba khona ho “bua ka bolokolohi bo boholo tumelong mabapi le Kreste Jesu.” Ka lebaka la boemo ba bona, phutheho e ananela mosebetsi oa bona o motle. Hape ba ema ba tiile tumelong ’me ba bolela tumelo ea bona phatlalatsa ba sa tšabe letho.
Batlisisa Matlotlo a Patiloeng
(1 Timothea 1:4) leha e le ho ela hloko lipale tsa bohata le maloko, tseo qetello ea tsona e leng lefeela, empa tse hlahisang lipotso bakeng sa phuputso ho e-na le ho aba ntho leha e le efe e tsoang ho Molimo mabapi le tumelo.
it-1-E 914-915
Leloko
Ha Pauluse a ne a ngolla Timothea, o ile a re ha ho hlokahale hore a itšoenye ka ho ’na a ithuta ka maloko ebile ho ne ho se na thuso. Ho ne ho se bohlokoa ho sheba hore na motho o tsoa lelokong le fe, le ho tseba hore na baholo-holo ba hae ke bo mang. Kaha Molimo o ne a se a sa shebe phapang pakeng tsa Mojuda le molichaba ka phuthehong ea Bokreste. (Gal 3:28) Hape, litlaleho tsena tsa maloko li ne li se li tiisitse hore Kreste o ne a tsoa lelokong la Davida. Ho phaella moo, nakoana ka mor’a hore Pauluse a fane ka keletso ena, Jerusalema e ne e tla timetsoa hammoho le litlaleho tsa Bajuda. Molimo ha a ka a li sireletsa kapa a li boloka. Ka lebaka leo, Pauluse o ne a tšoenyehile ka hore Timothea le phutheho eohle ba se ke ba se ke ba khelosoa ka hore ba nke nako e ngata ba etsa lipatlisiso tsa hore na ba tsoa melokong efeng, e leng ntho e neng e sa tl’o ba thusa hore ba be le tumelo. Tlaleho e buang ka leloko e ka har’a Bibele, e lekane ho paka hore Kreste ke Mesia, e leng tlaleho ea leloko e leng bohlokoa ho Bakreste. Litlaleho tse ling tsa Bibele tse buang ka maloko li bontša hore e ea tšepahala, le hore tlaleho ea histori e ka hare ho eona ke ea ’nete.
(1 Timothea 1:17) Joale ho Morena oa bosafeleng, ea ke keng a bola, ea sa bonahaleng, eo e leng eena feela Molimo, e be tlhompho le khanya ka ho sa feleng le kamehla. Amen.
“Bonang! Enoa ke Molimo oa Rona”
Tlotla e ’ngoe e sebelisoang ho Jehova feela ke “Morena oa bosafeleng.” (1 Timothea 1:17; Tšenolo 15:3) See se bolela eng? Ho thata hore likelello tsa rona tse fokolang li ho utloisise, empa lentsoe la qalong la Segerike le sebelisitsoeng bakeng sa bosafeleng le bontša hore Jehova ha a na qalo le qetello. Pesaleme ea 90:2 e re: “Esita le ho tloha nakong e sa lekanyetsoang ho isa nakong e sa lekanyetsoang u Molimo.” Kahoo Jehova ha a na qalo; haesale a le teng. Ka nepo o bitsoa “Moholo-holo oa Matsatsi”—o bile teng ka ho sa feleng le pele motho leha e le ofe kapa ntho leha e le efe e ’ngoe bokahohleng e e-ba teng! (Daniele 7:9, 13, 22) Ke mang eo ka nepo a ka belaellang tokelo ea hae ea ho ba ’Musi Morena?
’Malo oa Bibele
(1 Timothea 2:1-15) Ka hona kea eletsa, pele ho tsohle, hore lithapeli, lithapelo, lithapello, ho fanoa ha liteboho, li etsoe malebana le batho ba mefuta eohle, 2 malebana le marena le bohle ba boemong bo phahameng; e le hore re ka tsoela pele re phela bophelo bo khutsitseng le bo thotseng ka boinehelo bo feletseng ba bomolimo le ho nka lintho ka botebo bo feletseng. 3 Sena se setle ’me sea khahlisa mahlong a Mopholosi oa rona, Molimo, 4 eo thato ea hae e leng hore batho ba mefuta eohle ba pholohe ’me ba fihle tsebong e nepahetseng ea ’nete. 5 Etsoe ho na le Molimo a le mong, le mokena-lipakeng a le mong pakeng tsa Molimo le batho, motho, Kreste Jesu, 6 ea ileng a inehela e le thekollo e lekanang bakeng sa bohle—sena se tla pakoa ka linako tsa sona. 7 Ka morero oa bopaki bona ke ile ka behoa ’moleli le moapostola—ke bolela ’nete, ha ke bue leshano—mosuoe oa lichaba tabeng ea tumelo le ’nete. 8 Ka hona ke lakatsa hore sebakeng se seng le se seng banna ba tsoele pele ho rapela, ba phahamisa matsoho a tšepahalang, kantle le khalefo le ho pheha khang. 9 Ka ho tšoanang ke lakatsa ha basali ba ikhabisa ka moaparo o hlophehileng hantle, ka boitlhompho le ho hlaphoheloa kelellong, eseng ka mekhoa ea ho loha moriri le khauta kapa liperela kapa liaparo tsa theko e boima haholo, 10 empa ka tsela e tšoanelang basali ba ipolelang hore ba fa Molimo tlhompho ea borapeli, e leng, ka mesebetsi e molemo. 11 Mosali a ke a ithute a khutsitse ka ho ipeha tlaase ho feletseng. 12 Ha ke lumelle mosali ho ruta, kapa ho sebelisa matla holim’a monna, empa hore a khutse. 13 Etsoe Adama o ile a boptjoa pele, ha ntan’o boptjoa Eva. 14 Hape, Adama ha aa ka a thetsoa, empa mosali o ile a thetsoa ka ho phethahetseng ’me a ba tlolong. 15 Leha ho le joalo, o tla sireletsoa ka ho tsoala bana, hafeela ba tsoela pele tumelong le leratong le khalaletsong hammoho le ho hlaphoheloa kelellong.
LA 29 JULY–LA 4 AUGUST
MATLOTLO A TSOANG BIBELENG | 1 TIMOTHEA 4-6
“Boinehelo ba Bomolimo ha bo Bapisoa le Maruo”
(1 Timothea 6:6-8) Ka sebele, ke mokhoa oa ho rua ho hoholo, boinehelo bona ba bomolimo hammoho le ho khotsofala. 7 Etsoe ha rea tlisa letho lefatšeng, leha e le hore re ka tloha le letho. 8 Kahoo, ha re e-na le lintho tsa ho iphelisa le liaparo le tšireletso, re tla li khotsofalla.
Ho Ithuta Sephiri sa ho Khotsofala
Ntlha e kholo e ileng ea tlatsetsa thabong le khotsofalong ea Pauluse ke boikutlo ba hae ba ho khotsofala. Leha ho le joalo, ho khotsofala ho bolela eng? Ka mantsoe a bonolo feela, ho bolela ho khotsofalla lintho tsa motheo. Ntlheng ena, Pauluse o ile a re ho Timothea, molekane oa hae tšebeletsong: “Ka sebele, ke mokhoa oa ho rua ho hoholo, boinehelo bona ba bomolimo hammoho le ho khotsofala. Etsoe ha rea tlisa letho lefatšeng, leha e le hore re ka tloha le letho. Kahoo, ha re e-na le lintho tsa ho iphelisa le liaparo le tšireletso, re tla li khotsofalla.”—1 Timothea 6:6-8.
Hlokomela hore Pauluse o ile a amahanya ho khotsofala le boinehelo ba bomolimo. O ile a hlokomela hore thabo ea sebele e tlisoa ke boinehelo ba bomolimo, ka mantsoe a mang, e tlisoa ke ho etelletsa pele tšebeletso ea rona ho Molimo, eseng lintho tse bonahalang kapa maruo. “Lintho tsa ho iphelisa le liaparo le tšireletso” li ne li mpa li mo thusa feela hore a tsoele pele a hahamalla boinehelo ba bomolimo. Kahoo sephiri sa Pauluse sa ho khotsofala e ne e le ho itšetleha ka Jehova, ho sa tsotellehe hore na maemo e ka ’na ea e-ba afe.
(1 Timothea 6:9) Leha ho le joalo, ba ikemiselitseng ho rua ba oela molekong le lerabeng le litakatsong tse ngata tse se nang kelello le tse kotsi, tse lihelang batho timetsong le tšenyehong.
Ho Ikemisetsa ho Rua—Kamoo U ka Amehang Kateng
Ke ’nete hore hase batho ba bangata ba shoang ka lebaka la ho hahamalla maruo. Empa ba ka ’na ba se fumane khotsofalo ea sebele bophelong ha ba ntse ba lelekisa leruo. Hape ba kulisoa ke haeba khatello ea mosebetsi kapa maemo a sithabetsang a lichelete a etsa hore ba tleloe ke tšabo, ba hlobaele, ba tšoaroe ke hlooho e sa eeng moriting, kapa ba tsoe liso ka maleng—e leng mathata a ka khutsufatsang bophelo ba motho. Esita le haeba motho a ka lemoha hore o lokela ho fetola lintho tse tlang pele bophelong ba hae, a ka ’na a lemoha seo e se e le morao haholo. Mohlomong molekane oa hae o tla be a se a sa mo tšepe, bana ba se ba amehile hampe maikutlong ’me le eena a se a kula. Mohlomong lintho tse ling tse senyehileng li ka loka, empa li tla hloka hore motho a sebetse ka thata. Ruri ba joalo ba “itlhabile hohle ka bohloko bo boholo.”—1 Timothea 6:10.
(1 Timothea 6:10) Etsoe lerato la chelete ke motso oa mefuta eohle ea lintho tse mpe, ’me ka ho hahamalla lerato lena ba bang ba khelositsoe tumelong ’me ba itlhabile hohle ka bohloko bo boholo.
Litsela Tse Tšeletseng Tse ka Atlehisang Motho
Joalokaha re bone sehloohong se qalang, batho ba lumelang hore ho lelekisa leruo ho tlisa katleho, ha e le hantle, ba lelekisa lefeela. Ba ipakela masoabi le mahlomola a mangata. Ka mohlala, batho ba khothalletseng ho lelekisa leruo, ba atisa ho senya kamano ea bona le ba malapa le metsoalle. Ba bang ha ba robale—ka lebaka la mosebetsi, kapa hobane ba tšoenyehile kapa ba khathatsehile. Moeklesia 5:12 e re: “Boroko ba ea sebeletsang bo monate, ho sa tsotellehe hore na ke ho honyenyane kapa ho hongata hoo a ho jang; empa lintho tse ngata tsa morui ha li mo lumelle ho robala.”
Chelete ke monghali ea sehloho le ea bolotsana. Jesu Kreste o ile a bua ka “matla a thetsang a maruo.” (Mareka 4:19) Ka mantsoe a mang, maruo a ka ’na a bonahala eka a ka re tlisetsa thabo, empa ha ho joalo. A etsa feela hore motho a lakatse ho ba le a eketsehileng. Moeklesia 5:10 e re: “Motho ea ratang chelete ha ho mohla a ka bang le e lekaneng.”—The New English Bible.
Ka mantsoe a mang, motho ea ratang chelete oa itematsa, ’me a ka qetella a soetsehile, a tsielehile kapa a tlotse molao. (Liproverbia 28:20) Ho ba motho ea thabileng le ea atlehileng ho tsamaisana le ho fana ka seatla se bulehileng, ho tšoarela, ho itšoara hantle, ho ba le lerato le ho ba motho oa moea.
Batlisisa Matlotlo a Patiloeng
(1 Timothea 4:2) ka boikaketsi ba batho ba buang mashano, ba tšoailoe matsoalong a bona joalokaha eka ke ka tšepe e chesang e tšoaeang.
U ka Lula U E-na le Letsoalo le Molemo Joang?
Moapostola Petrose o ile a ngola a re: “E-bang le letsoalo le molemo.” (1 Petrose 3:16) Letsoalo le hloekileng mahlong a Jehova Molimo ke mpho e kholo. Ha le tšoane le matsoalo a ba bangata haholo kajeno. Pauluse o ne a hlalosa ba ‘tšoailoeng matsoalong a bona joalokaha eka ke ka tšepe e chesang e tšoaeang.’ (1 Timothea 4:2) Tšepe e chesang e tšoaeang e chesa nama, e e siea e e-na le lebali ’me e etsa hore e be shohlo. Ha e le hantle, matsoalo a batho ba bangata a shoele—a chele ’me a shohlo ka tsela eo a seng a sa ba lemose, ebile ha a sa belaela, kapa hona ho ba tšetšetha ka ho ikutloa ba le lihlong kapa ba le molato ha ba entse phoso. Ho bonahala kajeno batho ba bangata ba re, “ka tla ka tsoa nk’hu,” ha ba se ba sa utloe ba e-na le letsoalo le molato.
(1 Timothea 4:13) Ha ke ntse ke tla, u tsoele pele ho ikitlaetsa ho baleng phatlalatsa, ho eletseng, ho ruteng.
it-2-E 714 ¶1-2
Ho Bala Phatlalatsa
Ka Phuthehong ea Bokreste. Mehleng ea baapostola, ke batho ba fokolang ka palo ba neng ba e-na le meqolo ea Bibele, ebile ba ne nka ho le bohlokoa ho e bala phatlalatsa. Moapostola Pauluse o ile a laela hore mangolo ao a neng aa ngolletse liphutheho tsa Bokreste a baloe phatlalatsa libokeng, le hore a boele a fetisetsoe liphuthehong tse ling e le hore a ka baloa. (Kol 4:16; 1Th 5:27) Pauluse o ile a eletsa Timothea eo a neng a etella pela ka phuthehong hore a ikitlaetse “ho baleng phatlalatsa, ho eletseng, ho ruteng.”—1Ti 4:13.
Ho bala phatlalatsa ho lokela ho etsoa ka tsela e phollatsi. (Hab 2:2) Ho bala phatlalatsa ke ho ruta batho ba bang, motho ea balang phatlalatsa o lokela ho ela hloko seo a se balang le ho hlakeloa hantle ke maikutlo kapa sepheo sa mongoli. Hape, o lokela ho ba hlokolosi hore ha a bala a se ke a fana ka maikutlo a fosahetseng ho bamameli. Ho ea ka Tšenolo 1:3, ba ballang boprofeta boo holimo esita le ba utloang mantsoe a bona ’me ba a boloka, ba tla thaba.
’Malo oa Bibele
(1 Timothea 4:1-16) Leha ho le joalo, polelo e bululetsoeng e bolela ka tieo hore linakong tsa morao ba bang ba tla oa tumelong, ba ela hloko lipolelo tse bululetsoeng tse khelosang le lithuto tsa bademona, 2 ka boikaketsi ba batho ba buang mashano, ba tšoailoe matsoalong a bona joalokaha eka ke ka tšepe e chesang e tšoaeang; 3 ba hanela ho nyala, ba laela hore ho iloe lijo tseo Molimo a li bopileng hore li jeoe ka liteboho ke ba nang le tumelo le ba tsebang ’nete ka mokhoa o nepahetseng. 4 Lebaka la sena ke hore popo e ’ngoe le e ’ngoe ea Molimo e ntle, ’me ha ho letho le lokelang ho lahloa haeba le amoheloa ka liteboho, 5 etsoe le halaletsoa ka lentsoe la Molimo le ka ho le rapella. 6 Ka ho fana ka likeletso tsena ho barab’abo rona u tla ba mosebeletsi ea khabane oa Kreste Jesu, ea fepiloeng ka mantsoe a tumelo le a thuto e ntle eo u e latetseng haufi-ufi. 7 Empa u hane lipale tsa bohata tse silafatsang se halalelang le tseo basali-baholo ba li bolelang. Ka lehlakoreng le leng, u ikoetlise boinehelo ba bomolimo e le sepheo sa hao. 8 Etsoe koetliso ea ’mele e na le molemo o monyenyane; empa boinehelo ba bomolimo bo molemo bakeng sa lintho tsohle, kaha bo e-na le tšepiso ea bophelo ba hona joale le ea bo tlang ho tla. 9 Polelo eo ea tšepahala hape e tšoanela ho amoheloa ka botlalo. 10 Etsoe ho finyella sena re sebetsa ka thata ’me rea ikitlaetsa, hobane re behile tšepo ea rona ho Molimo ea phelang, eo e leng Mopholosi oa batho ba mefuta eohle, haholo-holo oa ba tšepahalang. 11 U ’ne u fane ka litaelo tsena ’me u li rute. 12 Ho se ke ha e-ba le motho eo le ka mohla a khellang bocha ba hao tlaase. Ho fapana le hoo, ho ba tšepahalang u be mohlala ho bueng, boitšoarong, leratong, tumelong, tlhoekong. 13 Ha ke ntse ke tla, u tsoele pele ho ikitlaetsa ho baleng phatlalatsa, ho eletseng, ho ruteng. 14 U se ke ua hlokomoloha mpho e ho uena eo u ileng ua e fuoa ka polelo e boletsoeng esale pele le ha sehlopha sa banna ba baholo se u beha matsoho. 15 Nahanisisa ka lintho tsena; u ikakhele ka setotsoana ho tsona, e le hore tsoelo-pele ea hao e ka bonahala ho batho bohle. 16 Ikele hloko kamehla ’me u ele hloko le ho ruta ha hao. Lula linthong tsena, kaha ka ho etsa sena u tla ipholosa ’me u pholose le ba u mamelang.