Na ho na le Sebaka se Itseng Seo Molimo a Lulang ho Sona?

▪ Malumeli a fapa-fapaneng a ruta hore Molimo o ka hohle, e leng se bolelang hore bolulo ba Molimo bo hohle. Ka mohlala, New Catholic Encyclopedia e bua ka Molimo e le “ea teng libakeng tsohle le linthong tsohle.” Ka tsela e tšoanang, John Wesley, eo e leng mothehi oa Kereke ea Methodiste, o ile a ngola thero eo sehlooho sa eona se reng “Boteng ba Molimo Hohle,” eo ho eona a ileng a bolela hore “ha ho na sebaka se itseng sepakapakeng, pōpong kapa leha e le kae moo Molimo a leng sieo.”

Bibele eona e ruta’ng? Na Molimo o ka hohle, o lula libakeng tsohle tse teng leholimong, lefatšeng esita le molokong oa batho ka nako e le ’ngoe?

Ha e le hantle, Bibele e bontša hore Molimo o na le sebaka se khethehileng seo a lulang ho sona—e leng maholimong. E tlaleha ka thapelo ea Morena Solomone eo a ileng a re ho Molimo: “E se eka u ka mamela u le maholimong, sebaka sa hao sa bolulo se tiisitsoeng.” (1 Marena 8:43) Ha a ruta barutuoa ba hae hore na ba rapele joang, Jesu Kreste o ile a ba bolella hore ba lebise lithapelo tsa bona ho “Ntat’a rōna ea maholimong.” (Matheu 6:9) Bibele e re ka mor’a hore a tsohe bafung, Kreste o ile a ‘kena leholimong, joale ho hlaha ka pel’a Molimo bakeng sa rōna.’—Baheberu 9:24.

Litemana tsena li bontša ka ho hlaka hore Jehova Molimo ha a lule hohle, empa o lula maholimong. Ke ’nete hore ‘maholimo’ ao ho buuoang ka ’ona litemaneng tsena hase leholimo le potolohileng lefatše kapa sepakapaka se seholohali seo re se bonang. Maholimo ao re a bonang a ke ke a lekana ’Mōpi. (1 Marena 8:27) Bibele e re bolella hore “Molimo ke Moea.” (Johanne 4:24) O lula maholimong a moea, sebaka se ikemetseng se seng bokahohleng boo re bo bonang.—1 Bakorinthe 15:44.

Empa ho thoe’ng ka litemana tse ling tsa Bibele tseo ho utloahalang eka li re Molimo o teng hohle? Ka mohlala, ho Pesaleme ea 139:7-10, Davida o ile a re ka Molimo: “Nka ea hokae ho tloha moeeng oa hao, nka balehela hokae ho tloha sefahlehong sa hao? Haeba ke ne nka nyolohela leholimong, u ne u tla ba teng; haeba ke ne nka phutholla setulo sa ka se kang bethe Sheole, bona! u ne u tla ba teng. Haeba ke nka mapheo a mafube, e le hore nka lula leoatleng le hōle ka ho fetisisa, le moo, letsoho la hao le ne le tla ntsamaisa.” Na litemana tsee li bontša hore ha e le hantle Molimo o ka hohle, o lula sebakeng se seng le se seng se boletsoeng?

Hlokomela hore Davida o ile a qala ka ho botsa: “Nka ea hokae ho tloha moeeng oa hao?”a Ka moea oa hae o halalelang, Molimo a ka bona ntho leha e le efe ebile a ka sebelisa matla a hae hohle, ha ho hlokahale hore a be a ee moo kapa a lule teng. Ka mohlala: Lilemong tsa morao tjena bo-rasaense ba khonne ho hlahloba mobu o polaneteng ea Mars, e bohōle ba lik’hilomithara tse limilione ho tloha Lefatšeng. Ba entse seo joang? Ha baa ea moo ka ho toba, ho e-na le hoo, ba hlahlobile ka hloko litšoantšo tse hlakileng hammoho le boitsebiso bo bong bo romeloang Lefatšeng ke lifofa-sebakeng tse se nang motho tseo ba li rometseng polaneteng ea Mars.

Ka tsela e tšoanang, ha ho hlokahale hore Jehova Molimo a be a lule hohle e le hore a bone hore na ho ntse ho etsahala’ng hohle bokahohleng. Lentsoe la Molimo le re: “Ha ho pōpo e sa bonahaleng mahlong a hae.” (Baheberu 4:13) Ka sebele matla a sebetsang a Molimo, kapa moea o halalelang, o ka fihla hohle, oa etsa hore a bone hohle a be a phethahatse morero oa hae a ntse a le moo a leng hona teng, ‘sebakeng sa hae se halalelang sa bolulo,’ e leng maholimong.—Deuteronoma 26:15.

[Mongolo o botlaaseng ba leqephe]

[Tlhaloso ea Moo Setšoantšo se Nkiloeng Teng e leqepheng la 27]

IAC/RGO/David Malin Images