Na U na le Tumelo e Kang ea Elia?

MOKHATLO oa batho kajeno o khella tumelo fatše. Ba bohlale ba soma boteng ba Molimo. Baikaketsi ba bolumeli ba soma Molimo. ’Me lefatše le re pota-potileng le tsoela pele ho itšoara joalokaha eka Molimo ha o tsotelle. Ebang maikutlo ana a tšosa motho, kapa a mo nyahamisa, kapa a mo etsa hore a iphapanye, boemong leha e le bofe phello ea tšoana: Tumelo ea hae ea senyeha. Ha ho makatse ha moapostola Pauluse a ile a bitsa ho hloka tumelo “sebe se tšoasang feela”!—Ba-Heberu 12:1.

Mohlomong ke ka baka leo Pauluse a entseng boiteko bo khethehileng ba ho lebisa tlhokomelo ea rōna bophelong ba banna le basali ba tumelo e matla. (Ba-Heberu, khaolo 11) Mehlala e joalo e ka re susumetsa le ho matlafatsa tumelo ea rōna. Ka mohlala, a re nahaneng ka moprofeta Elia, re shebe feela karolo ea pele ea mosebetsi oa hae o molelele le o tletseng oa boprofeta. O phetse nakong ea ho busa ha Morena Akabe le mosali oa hae oa mohetene, Mofumahali Jezebele, nakong eo, joaloka hona joale, tumelo ho Molimo oa ’nete e neng e fokola haholo.

’Muso o Senyehileng oa Meloko e Leshome

Batho bao ba babeli ba ne ba tšoana hakaakang! Akabe e ne e le morena oa bosupa oa ’Muso oa meloko e leshome ea Iseraele. Le hoja ba busitseng pele ho eena ba ne ba le babe, Akabe o ne a le mobe ho ba feta. Ha aa ka a ntšetsa pele borapeli ba naha bo bobe ba namane feela empa o ile a nyala mofumahali Jezebele oa molichaba, kahoo a hlahisa borapeli bo matla ba molimo oa bohata Baale ho feta boo naha e kileng ea bo tseba.—1 Marena 16:30-33.

Jezebele o ne a kentsoe borapeling ba Baale ho tloha boseeng. Ntate oa hae Ethebaale, moprista oa Ashtarothe (mosali oa Baale), o ile a bolaea batho ba bang hore e be eena morena oa Sidone, ’muso o ka leboea ho Iseraele. Jezebele o ile a susumetsa monna oa hae ea fokolang boitšoarong hore a thehe borapeli ba Baale Iseraele. Ka nako e khutšoanyane, naha e ne e se e e-na le baprofeta ba molimo oo oa bohata ba 450 le baprofeta ba 400 ba molimotsana Ashera, bohle ba jela tafoleng ea borena. Mofuta oa bona oa borapeli e ne e le o manyala hakaakang mahlong a Molimo oa ’nete, Jehova! Litšoantšo tse bontšang litho tsa botona le botšehali, litšebeletso tsa kemolo, matekatse a tempele (a banna le a basali), esita le mahlabelo a bana—tsena e ne e le likarolo tse khethollang bolumeli bona ba bofetoheli. Ka tlhohonolofatso ea Akabe, bo ile ba nama bo sa sitisoe ’musong.

Baiseraele ba limillione ba ile ba lebala Jehova, ’Mōpi oa lefatše le tikoloho ea metsi a lona. Ho bona e ne e le Baale ea ileng a hlohonolofatsa naha ka lipula ha ho fela nako ea selemo ea komello. Selemo se seng le se seng ba ne ba lebella ka tšepo ho ‘Mopalami oa Maru’, ea neng a bitsoa molimo oa kemolo le oa nako ea selemo ea pula, hore a felise nako ea komello. Selemo le selemo, lipula tsa na. Selemo le selemo, Baale a neoa tlotla.

Elia o Phatlalatsa Komello

Mohlomong e ne e le qetellong ea nako e telele ea selemo e se nang pula—hantle feela ha batho ba ne ba qala ho lebella hore Baale a nese lipula tse fang bophelo—ha Elia a hlahella.a O hlahella kapele tlalehong ea Bibele joaloka ho luma ha sealuma. Re bolelloa hanyenyane ka semelo sa hae, ha re bolelloe letho ka ho tsoaloa ha hae. Empa ho fapana le sealuma, Elia e ne e se ’muelli oa pula ea sefefo. O ile a tsebisa Akabe: “Ka Jehova, Molimo oa Iseraele, ea utloang, eo ke emeng pel’a hae, ha ho ka ke ha lala phoka, leha e le ho na pula, ka lilemo tsena, ha e se ka polelo ea ka.”—1 Marena 17:1.

Ak’u nahane ka monna enoa, a apere seaparo sa hae sa libaka tsa mahae se entsoeng ka boea. O tsoaletsoe maralleng a makukuno a Gileade, ho bonahala a hōlisitsoe har’a balisa ba mehlape ba futsanehileng. O ema pel’a morena Akabe ea matla, mohlomong har’a ntlo ea hae ea borena e khōlō, le ntlo ea eona e tummeng e entsoeng ka manaka a tlou, mekhabiso ea eona e metle le e sa tloaelehang le litšoantšo tse khōlō tse rapeloang. Moo, motseng oa marako a maholo o fereselang ka mosebetsi oa Samaria, moo borapeli ba Jehova bo seng bo batlile bo lebaloa, a bolella Akabe hore molimo ona oa hae, Baale, ha o na matla, ha o phele. Bakeng sa selemo sena le lilemong tse tlang, Elia o phatlalatsa hore, ho ke ke ha ba le pula kapa phoka!

O fumane kae tumelo e joalo? Na ha a ka a ikutloa a tšohile, ho ema moo pel’a morena enoa ea ikakasang, oa mokoenehi? Mohlomong. Lilemo tse sekete hamorao, ngoan’abo Jesu Jakobo oa re tiisetsa hore Elia e ne e le “motho ea ikutloang joale ka rōna.” (Jakobo 5:17) Empa hlokomela mantsoe a Elia: “Ka Jehova, Molimo oa Iseraele, ea utloang, eo ke emeng pel’a hae.” Elia o ’nile a hopola hore joaloka mosebeletsi oa Jehova, o ne a eme pel’a terone e khōlō haholo ho feta ea Akabe—terone ea Morena ‘Musi oa bokahohleng! E ne e le moemeli, moromuoa, oa terone eo. A e-na le pono eo, o ne a tla tšaba eng ho Akabe, morena feela oa motho ea lahlehetsoeng ke tlhohonolofatso ea Jehova?

Ha hoa ka ha etsahala ka kotsi hore ebe Jehova e ne e le motho oa sebele ho Elia. Ha ho pelaelo hore moprofeta o ne a ithutile tlaleho ea litšebelisano tsa Molimo le batho ba Oona. Jehova o ne a lemositse Bajode hore o tla ba otla ka komello le tlala haeba ba fetohela borapeling ba melimo ea bohata. (Deuteronoma 11:16, 17) A kholisehile hore ka mehla Jehova o phethahatsa lentsoe la hae, Elia “a kōpa ka merapelo hore ho se ke ha na pula.”—Jakobo 5:17.

Tumelo e Bontšoa ka ho Latela Litaelo

Leha ho le joalo, ka nakoana, phatlalatso ea Elia e ne e ’meha kotsing ea ho bolaoa. E ne e le nako eo tšobotsi e ’ngoe ea tumelo e neng e hlokahala ka eona. Hore a tsoele pele a phela, o ne a lokela ho latela litaelo tsa Jehova ka botšepehi: “Tloha mona, u ee ’nģa Bochaba-tsatsi, u ipate molatsoaneng oa Kerithe o mabapa le Jordane. U tla noa molatsoaneng; ke se ke laetse makhoaba hore a ’ne a u fepe teng.”—1 Marena 17:3, 4.

Elia a utloa hang-hang. Haeba a ne a batla ho pholoha komello le tlala tse oetseng naha, o ne a lokela ho itšetleha ka litokisetso leha e le life tseo Jehova a mo etsetsang tsona. Hona ho ne ho se bonolo. Ho ne ho bolela ho ipata, a phele ka ho itšehla thajana ka ho felletseng ka likhoeli tse ngata. Ho ne ho bolela ho ja nama le bohobe tse tlisoang ho eena ke makhoaba—linonyana tse jang nama ea liphoofolo tse ichoeletseng tse neng li nkoa li le litšila Molaong oa Moshe—le ho tšepa Jehova hore nama eo e ne e se ea phoofolo e ichoeletseng empa e le nama e ntšitsoeng mali hantle ho lumellana le molao. Ho bafetoleli ba bang ba Bibele mohlolo ona o moholo o bonahala o sa etsahala hoo ba hlahisang hore lentsoe le sebelisitsoeng mona le bolela “Arabs” e seng “makhoaba.” Empa makhoaba e ne e le khetho e tšoanelehang. Ha ho motho ea neng a ka nahana hore ha e le hantle linonyana tsena tse nkeloang fatše, tse litšila li ne li ka fofela lefeelleng le makumane a tsona a lijo ho ea fepa Elia, eo Akabe le Jezebele ba neng ba ’matla mebusong eohle e ba potolohileng!—1 Marena 18:3, 4, 10.

Ha komello e ntse e tsoela pele, mohlomong Elia o ile a ameha haholo ka phepelo ea hae ea metsi a phula ea khohloana ea Kerithe. Liphula tse ngata tsa likhohloana tsa Iseraele li ne li psha ka nako ea komello, le ena e ile ea psha “ho qetelleng ha matsatsi a itseng.” Na u ka nahana kamoo Elia a ileng a ikutloa ka teng ha metsi a ntse a fela a e-ea tlaase le matangoana a ntse a fokotseha letsatsi le letsatsi? Ruri e tlameha ebe o ile a ipotsa hore na ho tla etsahala’ng ha metsi a se a felile. Leha ho le joalo, Elia o ile a lula moo a tšepahetse. Ha molatsoana o se o omelletse Jehova a mo fa litaelo tse ling hape. Moprofeta o ile a bolelloa hore a ee Sarepta. Moo o ne a tla fumana lijo lelapeng la mohlolohali.—1 Marena 17:7-9.

Sarepta! Motse oo e ne e le oa Sidone, moo Jezebele a hlahang teng le moo ntate oa hae a neng a busa teng joaloka morena! Na ho ne ho sireletsehile? Mohlomong Elia o ile a ipotsa. Empa “o ile a ema ’me a tsamaea.”—1 Marena 17:10, NW.

Jehova o Fana ka Lijo le Bophelo

Kapele kutlo ea hae e ile ea putsoa. O ile a kopana le mohlolohali joalokaha ho boletsoe esale pele, a fumana a e-na le tumelo e neng e le sieo har’a batho ba naha ea habo. Mohlolohali enoa ea futsanehileng o ne a saletsoe ke phofo le oli tse lekanang feela eena le mora oa hae e le lijo tsa ho qetela. Leha ho le joalo, esita le tlhokong e kaalo, o ne a rata ho etsetsa Elia bohobe pele, a itšepetse tšepisong ea Elia ea hore Jehova o tla boloka nkho ea oli le nkho ea phofo li tletse hafeela tlhokahalo e ka ba teng. Ha ho makatse ha Jesu Kreste a ile a hopola mohlala o tšepahalang oa mohlolohali enoa ha a pepesa Baiseraele ba mehleng ea hae ba se nang tumelo!—1 Marena 17:13-16; Luka 4:25, 26.

Leha ho le joalo, ho sa tsotellehe mohlolo ona, tumelo ea mohlolohali le Elia li ne li tla tloha li tobana le teko e matla. Mora oa mohlolohali a shoa hang-hang. A utloile bohloko, mohlolohali o ne a ka nahana hore tsietsi ena e tšabehang e ne e amana ka tsela e itseng le Elia, “monna oa Molimo.” O ile a ipotsa hore na ebe o ne a otloa ka baka la sebe sa nakong e fetileng. Empa Elia o ile a nka mora oa hae ea shoeleng matsohong a mohlolohali a mo nkela kamoreng e ka holimo. O ne a tseba hore Jehova a ka fana ka ho fetang lijo. Jehova ke mohloli oa bophelo ka bobona! Elia a rapela ka tieo le ka makhetlo a mangata hore bophelo ba ngoana bo khutle.

Elia e ne e se motho oa pele oa ho ba le tumelo tsohong, empa tlalehong ea Bibele, e ne e le motho oa pele ea ileng a sebelisoa ho e phethahatsa. Moshemane “a boela a phela”! Thabo ea ’m’ae e tlameha ebe e bile pono e tsotehang ha Elia a tlisa mora oa hae ho eena ka mantsoe a bonolo: “Bona, mor’a hao oa phela.” Ha ho pelaelo hore a ntse a lla, o itse: “Kea tseba joale hobane u monna oa Molimo, le hobane, polelo ea Jehova, e molomong oa hao, ke ea ’nete.”—1 Marena 17:17-24.

“Molimo oa Ka ke Jehova”

Ke ho amang maikutlo, le ho loketseng hakaakang, hore ebe lebitso la Elia le bolela “Molimo oa Ka ke Jehova”! Ka nako ea komello le tlala, Jehova o mo file lijo le lino; nakong ea boitšoaro bo ferekaneng, Jehova a mo neha tataiso e ntle; nakong ea lefu, Jehova o mo sebelisitse ho khutlisa bophelo. Ho bonahala hore nako le nako ha ho ne ho hlokahala hore Elia a bonahatse tumelo ea hae ho Molimo oa hae—ka ho tšepela ho Oona bakeng sa thuso, ka ho latela litaelo tsa Oona, ka ho itšetleha ho Oona bakeng sa ho halaletsa lebitso la Oona—o ne a putsoa le ka mabaka a eketsehileng a ho bontša tumelo ho Jehova. Mohlala ona e bile ’nete ha a tsoela pele ho amohela likabelo tse boima le tse tšosang tse tsoang ho Molimo, Jehova; ha e le hantle, e meng ea mehlolo ea hae e meholo e ne e sa ntsane e le ka pel’a hae.—Bona 1 Marena, khaolo 18.

Ho joalo le ho bahlanka ba Jehova kajeno. Mohlomong re ke ke ra fepjoa ka mohlolo kapa ra sebelisoa ho tsosa motho; ena hase nako ea mehlolo e joalo. Leha ho le joalo, Jehova ka boeena ha a fetoha le hanyenyane ho tloha mehleng ea Elia.—1 Ba-Korinthe 13:8; Jakobo 1:17.

Le rōna re ka fumana likabelo tse tepelletsang, masimo a mang e le a boima le a tšosang ho a finyella ka molaetsa oa rōna oo re o filoeng ke Molimo. Re ka tobana le mahloriso. Re ka ba ra lapa. Empa bakeng sa batho ba tšepahalang le bakeng sa mokhatlo oa hae o hlophisitsoeng kaofela, Jehova o ’nile a paka ka makhetlo a mangata hore ka mehla o tataisa le ho sireletsa bahlanka ba hae. Le joale o sa ba fa matla a ho phetha mosebetsi leha e le ofe oo a ba abetseng oona. Hape o santsane a ba thusa ho mamella liteko leha e le life tse ka ba hlahelang lefatšeng lena le tletseng mathata.—Pesaleme ea 55:22.

[Mongolo o botlaaseng ba leqephe]

[Setšoantšo se leqepheng la 18]

Joaloka Elia, na u na le tumelo ea hore Jehova o tla hlokomela litlhoko tsa bahlanka ba hae?