Ho Batla Jehova ka Pelo e Itokisitseng
ESDRASE, moprista oa Moiseraele, e ne e le mofuputsi, setsebi, mokopitsi le mosuoe oa Molao ea ikhethang. E boetse ke mohlala o motle oa Bakreste ba kajeno tabeng ea tšebeletso ea moea oohle. Ka tsela efe? Ka hore o ile a boloka boinehelo ba hae ba bomolimo esita leha a sa ntse a le Babylona, motse o neng o tletse melimo ea bohata le borapeli ba bademona.
Boinehelo ba bomolimo ba Esdrase ha boa itlela feela ka lehlohonolo. O ile a bo sebeletsa. Ka sebele, o re bolella hore o “ne a lokiselitse pelo ea hae ho bala molao oa Jehova le ho o phetha.”—Esdrase 7:10, NW.
Joaloka Esdrase, kajeno batho ba Jehova ba batla ho etsa sohle seo Jehova a se batlang ho bona ha ba ntse ba phela lefatšeng le hanyetsang borapeli ba ’nete. Ka hona, a re hlahlobeng litsela tseo ka tsona le rōna re ka lokisetsang lipelo tsa rōna, e leng motho ea ka hare—ho akarelletsa le menahano, maikutlo, litakatso le litšusumetso tsa rōna—ho “bala molao oa Jehova le ho o phetha.”
Ho Lokisa Lipelo Tsa Rōna
“Ho lokisa” ho bolela “ho etsa hore ntho e loke esale pele bakeng sa morero o itseng: ho e beha boemong ba hore e sebelisoe ka tsela e itseng, kapa e be le tšekamelo e itseng.” Ka sebele, haeba u e-na le tsebo e nepahetseng ea Lentsoe la Molimo ’me u nehetse bophelo ba hao ho Jehova, joale, ka sebele ho bonahala hore pelo ea hao e boemong bo loketseng ’me e ka tšoantšoa le ‘mobu o motle’ oo Jesu a buileng ka oona papisong ea hae ea mojali.—Matheu 13:18-23.
Leha ho le joalo, ho hlokahala hore lipelo tsa rōna li hlokomeloe li be li hloekisoe kamehla. Hobane’ng? Ka mabaka a mabeli. La pele, hobane litšekamelo tse kotsi, tse kang lehola serapeng, li ka mela habonolo, haholo-holo ‘matsatsing ana a ho qetela’ ha “moea” oa tsamaiso ea Satane o tletse peō e kotsi ea monahano oa lefatše ho feta leha e le neng. (2 Timothea 3:1-5; Baefese 2:2) Lebaka la bobeli le amana le mobu ka booona. Ha mobu o sa hlokomeloe, kapele o ka omella, oa thatafala, ’me oa nyopa. Kapa batho ba bangata haholo ba ka ’na ba hatakela mobu ho fihlela e e-ba sekaka. Hoa tšoana le tabeng ea mobu oa tšoantšetso oa lipelo tsa rōna. O ka ’na oa khaotsa ho beha litholoana haeba o sa hlokomeloe kapa o hatakeloa ke batho ba sa thahaselleng boiketlo ba rōna ba moea.
Joale, ke habohlokoa hakaakang hore kaofela ha rōna re sebelise keletso ea Bibele e reng: “Boloka pelo ea hao ka ho fetisisa, hobane ke eona mehloli ea bophelo.”—Liproverbia 4:23.
Lintho Tse Nontšang ‘Mobu’ oa Lipelo Tsa Rōna
A re nahaneng ka lintlha tse ling, kapa litšoaneleho tse tla nontša ‘mobu’ oa lipelo tsa rōna e le hore o nolofatse khōlo e molemo. Ha e le hantle, ho na le lintho tse ngata tse tla ntlafatsa lipelo tsa rōna, empa mona re tla hlahloba tse tšeletseng: ho lemoha litlhoko tsa rōna tsa moea, boikokobetso, botšepehi, tšabo ea bomolimo, tumelo le lerato.
Jesu o itse: “Ho thaba ba elang hloko tlhoko ea bona ea moea.” (Matheu 5:3) Joalokaha ho lapela lijo tsa nama ho re hopotsa hore ho hlokahala hore re je, ho ela hloko litlhoko tsa rōna tsa moea ho etsa hore re lule re lapetse lijo tsa moea. Ka tlhaho, batho ba ba le takatso e matla haholo ea lijo tse joalo hobane li etsa hore bophelo bo be le seo bo se bolelang ’me bo be le morero. Likhatello tsa tsamaiso ea lintho ea Satane kapa botsoa feela tjee ba ho ithuta li ka ’na tsa etsa hore re tsoafe ho falimehela litlhoko tsena. Leha ho le joalo, Jesu o itse: “Motho o lokela ho phela, eseng ka bohobe feela, empa ka polelo e ’ngoe le e ’ngoe e tsoang molomong oa Jehova.”—Matheu 4:4.
Ka kutloisiso ea sebele, lijo tse jeoang kamehla ka nako, tse matlafatsang le tse hahang ’mele li etsa hore motho a phele hantle ’meleng, hape li etsa hore ha nako e fihla a be le takatso ea lijo tse latelang. Ho joalo le ka kutloisiso ea moea. U ka ’na ua se ke ua inka u le motho ea khothalletseng ho ithuta, empa haeba u itloaetsa ho bala Lentsoe la Molimo letsatsi le letsatsi ’me u ithuta lingoliloeng tse thehiloeng Bibeleng kamehla, u tla fumana hore takatso ea hao ea lijo tsa moea ea eketseha. Ha e le hantle, u tla lebella ka thahasello linako tsa hore u ithute Bibele. Ka hona, u se ke ua tela habonolo; sebetsa ka thata ha u hlaolela takatso e molemo ea lijo tsa moea.
Boikokobetso bo Nolofatsa Pelo
Boikokobetso ke ntlha ea bohlokoahali ho beng le pelo e itokisitseng hobane bo etsa hore re rutehe bo bile bo re thusa ho amohela habonolo haholoanyane keletso e lerato le khalemelo. Nahana ka mohlala o motle oa Morena Josiase. Nakong ea puso ea hae ho ile ha fumanoa tokomane ea Molao oo Molimo a faneng ka oona ka Moshe. Ha Josiase a ne a utloa mantsoe a Molao ’me a hlokomela hore na baholo-holo ba hae ba ne ba khelohile hakae borapeling bo hloekileng, o ile a hahola liaparo tsa hae ’me a lla ka pel’a Jehova. Ke hobane’ng ha Lentsoe la Molimo le ile la ama pelo ea morena ka ho teba hakaale? Tlaleho ena e bolela hore pelo ea hae e ne e le “bonolo,” ka hona o ile a ikokobetsa ha a utloa mantsoe a Jehova. Jehova o ile a ela hloko pelo ea Josiase e ikokobelitseng, e arabelang hamolemo ’me a mo hlohonolofatsa ka ho loketseng.—2 Marena 22:11, 18-20.
Boikokobetso bo ile ba nolofalletsa barutuoa ba Jesu “ba sa rutehang le ba tloaelehileng” ho utloisisa le ho sebelisa linnete tsa moea tse neng li sa tsejoe ke ba “bohlale le ba likelello” empa ba le joalo “ka tsela ea nama” feela. (Liketso 4:13; Luka 10:21; 1 Bakorinthe 1:26) Bana ba bohlale ka tsela ea nama ba ne ba sa itokisetsa ho amohela lentsoe la Jehova hobane lipelo tsa bona li ne li thatafalitsoe ke boikhohomoso. Na hoa makatsa hore ebe Jehova o hloile boikhohomoso?—Liproverbia 8:13; Daniele 5:20.
Botšepehi le Tšabo ea Bomolimo
Moprofeta Jeremia o ile a ngola a re “pelo e mano ho fetisa tsohle, e bolile hampe; e ka tsejoa ke mang?” (Jeremia 17:9) Mano ana a iponahatsa ka litsela tse sa tšoaneng, tse kang ha re itokafatsa ha re etsa phoso. A boetse a iponahatsa ha re emela bofokoli ba rōna bo tebileng. Leha ho le joalo, botšepehi bo tla re thusa ho hlōla pelo e mano ka ho re thusa ho talimana le ’nete e mabapi le seo re leng sona e le hore re ka ntlafatsa. Mopesaleme o ile a bontša botšepehi bo joalo ha a ne a rapela: “Ntlhahlobe, Jehova, ’me u nteke; hloekisa liphio tsa ka le pelo ea ka.” Ho hlakile hore mopesaleme o ne a lokiselitse pelo ea hae ho amohela ho hloekisoa le ho hlahlojoa ke Jehova, le hoja ho ne ho ka bolela hore motho a lumele hore o na le litšobotsi tsa ho se hloeke e le hore li ka hlōloa.—Pesaleme ea 17:3; 26:2, NW.
Tšabo ea bomolimo, e akarelletsang “ho hloea bobe,” ke thuso e matla bohatong bona ba ho hloekisa. (Liproverbia 8:13) Le hoja a ananela mosa o lerato le molemo oa Jehova, motho eo ka sebele a tšabang Jehova o lutse a tseba hore Jehova o na le matla a ho otla, esita le ho bolaea ba sa mo mameleng. Jehova o bontšitse hore ba mo tšabang ba ne ba tla boela ba mo mamele ha a ne a re ka Baiseraele: “Hoja ba ka ba le pelo e joalo ka mehla, ea ho ntšaba, le ea ho boloka litaelo tsa ka tsohle ka mehla, ba tle ba be le lehlohonolo, bona, le bana ba bona, ka ho sa feleng!”—Deuteronoma 5:29.
Ho hlakile hore morero oa tšabo ea bomolimo hase ho re boloka re le boemong ba ho ikokobetsa ka lebaka la tšabo, empa ke ho re susumelletsa ho mamela Ntate oa rōna ea lerato, eo re tsebang hore o amehile ka se molemong oa rōna ka ho fetisisa. Ha e le hantle, tšabo e joalo ea bomolimo ea hlasimolla ebile ea thabisa, e leng se ileng sa bontšoa haholo ke Jesu Kreste ka boeena.—Esaia 11:3; Luka 12:5.
Pelo e Itokisitseng e Enne Tumelong
Pelo e matla tumelong ea tseba hore eng kapa eng eo Jehova a e batlang kapa a e laelang ka Lentsoe la hae ka linako tsohle e nepahetse ’me e ka re tsoela molemo ka ho fetisisa. (Esaia 48:17, 18) Motho ea nang le pelo e joalo o khotsofatsoa ka ho tebileng ke ho sebelisa khothatso e ho Liproverbia 3:5, 6, e reng: “U tšepe Jehova ka pelo ea hao eohle, u se ke ua itšepa hlalefo ea hao. U mo kenye mererong ea hao eohle, ’me o tla u tsamaisa litseleng tsohle tsa hao.” Leha ho le joalo, pelo e se nang tumelo e ka etsa hore motho a be leqe ho tšepa Jehova, haholo-holo haeba ho etsa seo ho akarelletsa ho itela, ho kang ho nolofatsa bophelo ba hae e le hore a ka lebisa tlhokomelo lithahasellong tsa ’Muso. (Matheu 6:33) Ke ka lebaka le letle Jehova a talimang pelo e se nang tumelo e le e “khopo.”—Baheberu 3:12.
Tumelo ea rōna ho Jehova e bonahatsoa likarolong tse ngata, ho akarelletsa le linthong tseo re li etsang boinotšing malapeng a rōna. Ka mohlala, nahana ka molao-motheo o ho Bagalata 6:7 o reng: “Le se ke la khelosoa: Molimo hase ea ka songoang. Etsoe leha e le sefe seo motho a se jalang, sena ka ho tšoanang o tla se kotula.” Tumelo ea rōna molao-motheong ona e tla bonahala linthong tse kang libaesekopo tseo re li shebellang, libuka tseo re li balang, tekanyo ea thuto ea rōna ea Bibele, le lithapelo tsa rōna. E, tumelo e matla e re susumelletsang ho jala “ka sepheo sa ho jalla moea” ke ntlha e ka sehloohong tabeng ea ho ba le pelo e itokiselitseng ho amohela Lentsoe la Jehova le ho le mamela.—Bagalata 6:8.
Lerato—Tšoaneleho e Fetisisang
Ho feta litšoaneleho tse ling kaofela, ka sebele lerato le etsa hore mobu oa lipelo tsa rōna o arabele Lentsoeng la Jehova. Ka lebaka leo, ha moapostola Pauluse a le bapisa le tumelo le tšepo, o ile a hlalosa lerato e le tšoaneleho “e khōlō ka ho fetisisa ho tsena.” (1 Bakorinthe 13:13) Pelo e tletseng lerato la Molimo e ba le khotsofalo e matla le thabo ka lebaka la ho mo mamela; ka sebele ha e tenoe ke litekanyetso tsa Molimo. Moapostola Johanne o itse: “Se boleloang ke lerato la Molimo ke sena, hore re boloke litaelo tsa hae; ’me leha ho le joalo litaelo tsa hae ha li boima.” (1 Johanne 5:3) Ha a bua ka taba e tšoanang le eo, Jesu o itse: “Haeba leha e le mang a nthata, o tla boloka lentsoe la ka, ’me Ntate o tla mo rata.” (Johanne 14:23) Hlokomela hore lerato le joalo lea fapanyetsanoa. E, Jehova o bontša lerato le tebileng ho ba huleloang ho eena ka lerato.
Jehova oa tseba hore ha rea phethahala ’me nako le nako rea mo siteloa. Leha ho le joalo, ha a emelle hōle le rōna. Seo Jehova a se batlang ho bahlanka ba hae ke “pelo e feletseng,” e re susumelletsang ho mo sebeletsa ka ho rata ka “moea o thabileng.” (1 Likronike 28:9, NW) Ho hlakile hore Jehova oa tseba hore ho nka nako ebile ho hlokahala boiteko hore re hlaolele litšoaneleho tse molemo ka lipelong tsa rōna ’me ka tsela eo re hlahise litholoana tsa moea. (Bagalata 5:22, 23) Kahoo, ha a re felle pelo, ‘hobane o tsebisisa ho bōptjoa ha rōna, o elelloa hoba re lerōle feela.’ (Pesaleme ea 103:14) Ha Jesu a bonahatsa boikutlo bona boo, ha ho mohla a kileng a nyatsa barutuoa ba hae ka matla ka lebaka la liphoso tsa bona empa ka mamello o ile a ba thusa le ho ba khothatsa. Na lerato le joalo, mohau le ho se fele pelo ka lehlakoreng la Jehova le Jesu ha li u susumelletse ho ba rata haholoanyane?—Luka 7:47; 2 Petrose 3:9.
Haeba ka linako tse ling u ho fumana e le ntoa ho tlohela mekhoa e metseng ka metso, e kang lehola kapa ho felisa litšobotsi tse seng kae tse kang letsopa le thata, u se ke ua sithabela kapa ua nyahama. Ho e-na le hoo, tsoela pele ho sebeletsa ho ntlafatsa ha u ntse u ‘phehella thapelong,’ ho akarelletsa le ho kōpa Jehova ka tieo hore a u fe moea oa hae. (Baroma 12:12) Ka thuso ea hae e lerato, le uena, joaloka Esdrase, u tla atleha tabeng ea ho ba le pelo e itokiselitseng ka ho feletseng “ho bala molao oa Jehova le ho o phetha.”
[Setšoantšo se leqepheng la 31]
Esdrase o ile a boloka boinehelo ba hae ba bomolimo esita le ha a le Babylona
[Tlhaloso ea Moo Setšoantšo se Nkiloeng Teng e leqepheng la 29]
Garo Nalbandian