Na Molimo oa re Tsotella?

NA U iphumana u imetsoe maikutlo ka lebaka la mathata a lelapa la hao, bophelo bo botle ba ’mele, mosebetsi kapa boikarabelo bo bong bo boima? Batho ba bangata ba imetsoe maikutlo. Na kajeno ho na le motho ea sa angoeng ke ho hloka toka, tlōlo ea molao le pefo? Ruri ho joalo feela kaha Bibele e re: “Pōpo eohle e ntse e tsoela pele ho bobola hammoho le ho ba bohlokong hammoho ho fihlela joale.” (Baroma 8:22) Ha ho makatse hore ebe batho ba botsa potso e reng: ‘Na Molimo oa tsotella? Na o tla re thusa?’

Morena Solomone ea bohlale o ile a re ho Molimo thapelong: “Ke uena feela ea tsebang lipelo tsa bara ba moloko oa batho hantle.” Solomone o ne a e-na le tšepo ea hore Molimo ha a re tsebe feela empa hape oa re tsotella re le batho ka bomong. O ile a khona ho kōpa Molimo hore ‘a utloe a le maholimong’ le hore a arabe lithapelo tsa motho e mong le e mong ea tšabang Molimo, ea senolelang Molimo “lefu la hae le bohloko ba hae.”—2 Likronike 6:29, 30.

Kajeno, Jehova Molimo o sa ntsane a re tsotella ’me o re memela hore re ipiletse ho eena ka thapelo. (Pesaleme ea 50:15) O tšepisa hore o tla arabela lithapelo tse tlohang pelong tse tumellanong le thato ea hae. (Pesaleme ea 55:16, 22; Luka 11:5-13; 2 Bakorinthe 4:7) E, Jehova o utloa “thapelo leha e le efe, kōpo leha e le efe ea mohau e ka etsoang ke motho leha e le ofe kapa sechaba sohle sa [hae].” Kahoo, haeba re tšepa Molimo, re rapella thuso ea hae re bile re atamela ho eena, re tla fumana tlhokomelo ea hae e lerato le tataiso. (Liproverbia 3:5, 6) Mongoli oa Bibele Jakobo oa re tiisetsa o re: “Atamelang ho Molimo, ’me o tla atamela ho lōna.”—Jakobo 4:8.