“Molimo ke Lerato”

“Ea sa rateng ha a tsebe Molimo, hobane Molimo ke lerato.”—1 JOHANNE 4:8.

1-3. (a) Bibele e re’ng ka tšobotsi ea Jehova ea lerato, hona polelo ee e ikhetha ka tsela efe? (b) Ke hobane’ng ha Bibele e re “Molimo ke lerato”?

LITŠOBOTSI tsohle tsa Jehova li phahame ka ho fetisisa, li phethahetse, ebile lia ipiletsa. Empa lerato ke lona le ipiletsang ka ho fetisisa litšobotsing tsa Jehova. Ha ho ntho leha e le efe e ’ngoe e re susumelletsang ho atamela ho Jehova ka matla joaloka lerato la hae. Hoa thabisa hore ebe lerato e sa ntse e le eona tšobotsi ea hae e hlahelletseng ka ho fetisisa. Re tseba seo joang?

² Bibele e bua ho hong ka lerato hoo e sa ho bueng ka litšobotsi tse ling tsa Jehova tse ka sehloohong. Mangolo ha a re Molimo ke matla kapa Molimo ke toka esita le hona ho re Molimo ke bohlale. O na le litšobotsi tseo, ’me ka boraro ba tsona ke eena mohloli oa tsona o phahameng ka ho fetisisa. Leha ho le joalo, ho 1 Johanne 4:8 ho boleloa ntho e ’ngoe e ikhethang ka lerato ha ho thoe: “Molimo ke lerato.” E, Jehova o na le lerato le tebileng. Boo ke boleng ba hae. Ha re akaretsa taba, re ka ’na ra nahana ntlha ena ka tsela ena: Matla a Jehova a mo nolofalletsa ho etsa lintho. Toka ea hae le bohlale ba hae li laola tsela eo a etsang lintho ka eona. Empa lerato la Jehova lona le mo susumelletsa ho etsa lintho. ’Me kamehla o bontša lerato tseleng eo a sebelisang litšobotsi tsa hae tse ling ka eona.

³ Hangata ho boleloa hore Jehova ke mothofatso oa lerato. Ka hona, haeba re batla ho ithuta ka lerato, re tlameha ho ithuta ka Jehova. Kahoo, a re hlahlobeng tse ling tsa litšobotsi tse se nang moeli tsa lerato la Jehova.

Ketso e Khōlō ka ho Fetisisa e Lerato

4, 5. (a) Ketso e lerato ka ho fetisisa e kileng ea etsoa ke efe? (b) Ke hobane’ng ha re ka re Jehova le Mora oa hae ba kopantsoe ke tlamo e matla ka ho fetisisa ea lerato e kileng ea e-ba teng?

⁴ Jehova o bontšitse lerato ka litsela tse ngata, empa ho na le tsela e ’ngoe e ikhethang. Ke efe? Ke tsela ea ho romela Mora oa hae ho tla utloa bohloko bakeng sa rōna le ho re shoela. Re ka bolela ntle ho tikatiko hore ena e bile ketso e khōlō ka ho fetisisa e lerato e kileng ea etsoa. Ke hobane’ng ha re ka bua joalo?

⁵ Bibele e re Jesu ke “letsibolo la pōpo eohle.” (Bakolose 1:15) Ak’u nahane—Mora oa Jehova o phetse pele bokahohle bo bonahalang bo bōptjoa. Joale, Ntate le Mora ba bile ’moho halelele hakae? Bo-rasaense ba bang ba hakanya hore bokahohle bo bile teng ka lilemo tse limilione tse likete tse 13. Leha ho le joalo, esita le haeba khakanyo ena e nepahetse, e ne e ke ke ea e-ba telele ka ho lekaneng ho emela nako eo Mora oa Jehova a e phetseng! O ne a ntse a etsa’ng ka lilemo-lemo tseo tsohle? Mora o ile a sebeletsa ka thabo e le “mosebetsi ea hloahloa” oa Ntat’ae. (Liproverbia 8:30; Johanne 1:3) Jehova le Mora oa hae ba ile ba sebetsa ’moho ho hlahisa lintho tse ling kaofela. Ba ile ba e-ba le nako e monate le e thabisang hakaakang! Joale, ke mang ho rōna ea ka utloisisang matla a tlamahano e bileng teng ka nako e telele joalo? Ho hlakile hore Jehova Molimo le Mora oa hae ba kopantsoe ke tlamo e matla ka ho fetisisa ea lerato e kileng ea e-ba teng.

 6. Jehova o ile a tsebahatsa maikutlo a hae ka Mora oa Hae joang ha Jesu a kolobetsoa?

⁶ Leha ho le joalo, Jehova o ile a romela Mora oa hae lefatšeng hore a tl’o tsoaloa e le lesea. Seo se ne se bolela hore Jehova o ne a tla tela botsoalle bo haufi le Mora oa hae ea ratoang leholimong ka lilemo tse mashome a ’maloa. O ile a shebella ka thahasello e khōlō a le leholimong ha Jesu a hōla ’me e e-ba motho ea phethahetseng. Jesu o ile a kolobetsoa ha a le lilemo tse ka bang 30. Ketsahalong ena Ntate o ile a bua ka boeena a le leholimong a re: “Enoa ke Mora oa ka, ea ratoang, eo ke mo amohetseng.” (Matheu 3:17) Kaha ka botšepehi Jesu o ile a etsa sohle se neng se profetiloe, e leng sohle se neng se lebeletsoe ho eena, e tlameha ebe Ntate oa hae o ne a thabile haholo!—Johanne 5:36; 17:4.

7, 8. (a) Ke eng seo Jesu a ileng a se mamella ka la 14 Nisane, 33 C.E., hona Ntate oa hae oa leholimo o ile a ameha joang? (b) Ke hobane’ng ha Jehova a ile a lumella Mora oa hae ho utloa bohloko le ho shoa?

⁷ Leha ho le joalo, Jehova o ile a ikutloa joang ka la 14 Nisane, 33 C.E., ha Jesu a ekoa ’me hamorao a tšoaroa ke mahoohoo a halefileng? Ha a ntse a songoa, a tšoeloa ka mathe le ha a otloa ka lifeisi? Ha a ntse a shapuoa, le ha mokokotlo oa hae o hlenhlane ke ho tleroa? Ha a ntse a khokhotheloa matsoho le maoto thupeng ’me a siuoa a leketlile moo ha batho ba ntse ba mo nyefola? Ntate o ile a ikutloa joang ha Mora oa hae ea ratoang a ipiletsa ho eena a le bohlokong bo otlang pelo? Jehova o ile a ikutloa joang ha Jesu a e-shoa, ’me ka lekhetlo la pele ho tloha tšimolohong ea pōpo eohle, Mora oa Hae ea ratoang a e-ba sieo?—Matheu 26:14-16, 46, 47, 56, 59, 67; 27:26, 38-44, 46; Johanne 19:1.

⁸ Kaha Jehova o na le maikutlo, bohloko boo a ileng a bo utloa ha Mora oa hae a shoa ke boo re ke keng ra bo hlalosa ka mantsoe. Seo re ka se hlalosang ke se ileng sa susumelletsa Jehova hore a lumelle seo ho etsahala. Ke hobane’ng ha Ntate a ile a ikutloisa bohloko bo bokaalo? Jehova o re senolela ho hong ho tsotehang ho Johanne 3:16—e leng temana ea Bibele eo e leng ea bohlokoa hoo e ’nileng ea bitsoa Kosepele e nyenyane. E re: “Molimo o ratile lefatše haholo hoo a ileng a fana ka Mora oa hae ea tsoetsoeng a ’notši, e le hore e mong le e mong ea bontšang tumelo ho eena a se ke a timetsoa empa a be le bophelo bo sa feleng.” Kahoo, Molimo o ne a susumetsoa ke lerato hore a etse joalo. Ha ho na lerato le kileng la bontšoa le fetang lena.

Kamoo Jehova a re Tiisetsang Kateng Hore oa re Rata

 9. Satane o batla hore re lumele hore Jehova o re talima joang, empa Jehova o re tiisetsa eng?

⁹ Leha ho le joalo, ho hlaha potso ea bohlokoa: Na Molimo oa re rata re le batho ka bomong? Ba bang ba ka ’na ba lumela hore Molimo o rata batho ka kakaretso, joalokaha Johanne 3:16 e bolela. Empa ha e le hantle, ba nka hore ‘Molimo a ke ke a nthata ke le motho ka mong.’ ’Nete ke hore Satane o batla hore re lumele hore Jehova ha a re rate ebile ha a re nke re le ba bohlokoa. Ka lehlakoreng le leng, ho sa tsotellehe hore na re ka ’na ra inahana re le ba sa rateheng kapa ba se nang thuso hakae, Jehova o re tiisetsa hore mohlanka e mong le e mong oa hae ea tšepahalang ke oa bohlokoa ho eena.

10, 11. Papiso ea Jesu ea lirobele e bontša joang hore re ba bohlokoa ho Jehova?

¹⁰ Ka mohlala, a re nahaneng ka mantsoe a Jesu a tlalehiloeng ho Matheu 10:29-31. Ha Jesu a bontša hore na barutuoa ba hae ke ba bohlokoa hakae, o ile a re: “Na lirobele tse peli ha li rekisoe ka chelete ea tšepe ea bohlokoa bo bonyenyane? Empa leha ho le joalo ha ho le se seng sa tsona se tla oela fatše kantle le hore Ntat’a lōna a tsebe. Empa moriri oa lihlooho tsa lōna o baliloe kaofela. Ka hona le se ke la tšaba: le ba bohlokoa ho feta lirobele tse ngata.” Nahana ka seo mantsoe ao a ileng a se bolela ho bamameli ba Jesu ba lekholong la pele la lilemo.

¹¹ Mehleng ea Jesu serobele e ne e le nonyana e theko e tlaase ka ho fetisisa e neng e rekisoa e le lijo. Motho o ne a fumana lirobele tse peli ka chelete e le ’ngoe ea tšepe ea bohlokoa bo bonyenyane. Empa hamorao, ho ea ka Luka 12:6, 7, Jesu o ile a bolela hore haeba motho a ne a ntša lichelete tse peli tsa tšepe, o ne a fumana lirobele tse hlano, eseng tse ’nè. Nonyana eo e ne e fanoa e le pasela joalokaha eka e ne e se ea bohlokoa ba letho. Mohlomong linonyana tseo e ne e se tsa bohlokoa ho batho, empa ’Mōpi eena o ne a li talima joang? Jesu o ile a re: “Ha ho le se seng sa tsona [esita le sona sa pasela] se lebaloang ka pel’a Molimo.” Joale re qala ho utloisisa ntlha ea Jesu. Haeba Jehova o nka serobele se le seng e le sa bohlokoa hakaalo, e tlameha ebe o nka motho e le oa bohlokoa le ho feta! Joalokaha Jesu a boletse, Jehova o tseba sohle ka rōna. Ka lebaka leo, le moriri o lihloohong tsa rōna o baliloe!

12. Ke hobane’ng ha re ka kholiseha hore Jesu o ne a bua taba ea sebele ha a re moriri oa lihlooho tsa rōna o baliloe?

¹² Ba bang ba ka ’na ba nka hore mona Jesu o ne a feteletsa taba. Leha ho le joalo, ak’u nahane feela ka tsoho. E tlameha ebe Jehova o re tseba hantle hakaakang e le hore a re bōpe bocha! O re nka re le ba bohlokoa hoo a hopolang ntho e ’ngoe le e ’ngoe ka rōna, ho akarelletsa liphatsa tsa rōna tsa lefutso le mehopolo le liphihlelo tseo re bileng le tsona bophelong bohle ba rōna. Ho bala moriri oa rōna—oo ka karolelano ho ka bang le e 100 000 hloohong—e ne e tla ba linyane feela ha ho bapisoa. Mantsoe a Jesu a re tiisetsa ka bokhabane hakaakang hore Jehova oa re tsotella re le batho ka bomong!

13. Taba ea Morena Josafate e bontša joang hore Jehova o batla se molemo ho rōna esita leha re sa phethahala?

¹³ Bibele e senola ho hong ho re tiisetsang lerato la Jehova. O sheba se molemo ho rōna ’me o se nka e le sa bohlokoa. Ka mohlala, nahana ka Morena Josafate ea molemo. Ha morena eo a etsa ketso e booatla, moprofeta oa Jehova o ile a re ho eena: “Ka lebaka lena Jehova o u halefetse.” Ee e ne e le taba e tebileng hakaakang! Empa molaetsa oa Jehova ha oa ka oa fella moo. O ile oa tsoela pele ho re: “Leha ho le joalo, ho na le lintho tse ntle tse fumanoeng ho uena.” (2 Likronike 19:1-3) Kahoo khalefo ea Jehova e lokileng ha ea ka ea mo sitisa ho bona “lintho tse ntle” tse fumanoeng ho Josafate. Na ha ho khothatse ho tseba hore Molimo oa rōna o sheba se molemo ho rōna esita leha re sa phethahala?

Ke Molimo ea ‘Itokiselitseng ho Tšoarela’

14. Ke boikutlo bofe bo ka ’nang ba re tšoenya ha re etsa sebe, empa ho tšoarela ha Jehova ho ka re tsoela molemo joang?

¹⁴ Ha re entse sebe, masoabi, ho hlajoa ke lihlong le boikutlo ba ho ba molato li ka ’na tsa etsa hore re nahane hore re ke ke ra tšoaneleha ho sebeletsa Jehova. Leha ho le joalo, hopola hore Jehova o “itokiselitse ho tšoarela.” (Pesaleme ea 86:5) E, ha re bakela libe tsa rōna, ’me re leka ka matla ho se hlole re li etsa, ho tšoarela ha Jehova ho ka re ruisa molemo. Nahana kamoo Bibele e hlalosang tšobotsi ena e babatsehang ea lerato la Jehova kateng.

15. Jehova o suthisetsa libe tsa rōna hōle hakae?

¹⁵ Mopesaleme Davida o sebelisa polelo ena e hlakileng ha a hlalosa kamoo Jehova a tšoarelang kateng, o re: ‘Joalokaha bochabela bo le hōle le bophirimela, o lahlela makhopo a rōna joalo hōle le rōna.’ (Pesaleme ea 103:12, Bibele ea Sesotho, mongolo o tšekaletseng ke oa rōna.) Bochabela bo hōle hakae le bophirimela? Kamoo ho utloisisoang kateng, bochabela bo lula bo le hōle le bophirimela ka hohle kamoo motho a ka nahanang kateng; ha ho mohla libaka tseo tse peli li ka kopanang. Setsebi se seng se re polelo ena e bolela “hōle kamoo ho ka khonehang; hōle kamoo re ka nahanang kateng.” Mantsoe a Davida a bululetsoeng a re bolella hore ha Jehova a tšoarela, o suthisetsa libe tsa rōna hōle le rōna ka hohle kamoo re ka nahanang kateng.

16. Ha Jehova a re tšoarela libe, ke hobane’ng ha re ka kholiseha hore o re nka re hloekile ka morao ho moo?

¹⁶ Na u kile ua leka ho tlosa letheba seaparong se ’mala o khanyang? Mohlomong ho sa tsotellehe boiteko bo matla ka ho fetisisa boo u ileng ua bo etsa, letheba le ile la sala le ntse le bonahala. Hlokomela kamoo Jehova a hlalosang matla a hae a ho tšoarela kateng: “Le hoja libe tsa lōna li ka ba joaloka sekareleta, li tla soeufala joaloka lehloa; le hoja li ka ba khubelu joaloka lesela la krimsone, li tla tšoana le boea.” (Esaia 1:18) Lentsoe “sekareleta” le bolela ’mala o bofubelu bo khanyang.a “Krimsone” e ne e le o mong oa mebala e loileng ea lesela le dailoeng. Re ke ke ra tlosa letheba la sebe ka matla a rōna. Empa Jehova a ka tlosa libe tse joaloka sekareleta le krimsone a li soeufatsa tsa ba joaloka lehloa kapa boea bo sa dauoang. Kahoo, ha Jehova a re tšoarela libe, ha ho hlokahale hore re ikutloe re ntse re jere letheba la libe tseo bophelo bohle ba rōna.

17. Jehova o lahlela libe tsa rōna ka mor’a hae ka kutloisiso efe?

¹⁷ Pineng e susumetsang ea teboho eo Ezekiase a ileng a e qapa ka mor’a hore a pholosoe ho kuleng ho bolaeang, o ile a re ho Jehova: “U lahletse libe tsohle tsa ka ka mor’a hao.” (Esaia 38:17) Mona Jehova o hlalosoa a nka libe tsa mofosi ea bakileng a li lahlela ka mor’a Hae moo A ke keng a hlola a li bona kapa hona ho li hlokomela. Dikishinari e ’ngoe e bontša hore khopolo e fetisoang mona e ka ’na ea hlalosoa ka ho re: “U entse hore eke [libe tsa ka] ha lia ka tsa etsahala.” Na see ha se khothatse?

18. Moprofeta Mikea o bontša joang hore ha Jehova a tšoarela, O tlosa libe tsa rōna ka ho feletseng?

¹⁸ Tšepisong ea tsosoloso, moprofeta Mikea o ile a re o kholisehile hore Jehova o tla tšoarela sechaba sa hae se bakileng: “Ke mang Molimo ea kang uena, . . . ea tlohelang tlōlo ea masala a lefa la hae? . . . U tla lahlela libe tsohle tsa bona bolibeng ba leoatle.” (Mikea 7:18, 19) Ak’u nahane hore na mantsoe ao a ne a bolela’ng ho batho ba neng ba phela mehleng ea Bibele. Na ho ne ho e-na le monyetla leha e le ofe oa hore motho a boele a fumane ntho e lahletsoeng “bolibeng ba leoatle”? Kahoo, mantsoe a Mikea a bontša hore ha Jehova a tšoarela, o tlosa libe tsa rōna ka ho feletseng.

“Qenehelo e Bonolo ea Molimo oa Rōna”

19, 20. (a) Leetsi la Seheberu le fetoletsoeng e le “ho bontša mohau” kapa “ho hauhela” le bolela eng? (b) Bibele e sebelisa maikutlo ao ’mè a nang le ’ona ka lesea la hae joang ho re ruta ka qenehelo ea Jehova?

¹⁹ Qenehelo ke tšobotsi e ’ngoe ea lerato la Jehova. Qenehelo ke eng? Ka Bibeleng, qenehelo e amahanngoa haufi le mohau. Mantsoe a ’maloa a Seheberu le Segerike a fetisa maikutlo a qenehelo. Ka mohlala, hangata leetsi la Seheberu ra·chamʹ, le fetoleloa e le “ho bontša mohau” kapa “ho hauhela.” Lentsoe lena la Seheberu, leo Jehova a le sebelisang ho eena, le amana le lentsoe le bolelang “pōpelo” ’me le ka hlalosoa e le “qenehelo ea ’mè.”

²⁰ Bibele e sebelisa boikutlo boo ’mè a nang le bona ka lesea la hae ho re ruta se boleloang ke qenehelo ea Jehova. Esaia 49:15 e re: “Na mosali a ka lebala ngoana oa hae ea anyang, hore a se ke a qenehela [ra·chamʹ] mora oa pōpelo ea hae? E, ba ka ’na ba lebala, empa ’na nke ke ka u lebala.” (The Amplified Bible) Ho thata ho nahana hore ’mè a ka lebala ho fepa le ho hlokomela lesea la hae le anyang. Ka sebele lesea ha le khone ho iketsetsa letho; le hloka tlhokomelo ea ’m’a lona bosiu le motšehare. Leha ho le joalo, ka masoabi re utloa ka bo-’mè ba bang ba sa tsotelleng bana ba bona, haholo-holo ‘linakong tsena tse mahlonoko.’ (2 Timothea 3:1, 3) Jehova o re: “Empa ’na nke ke ka u lebala.” Qenehelo e bonolo eo Jehova a nang le eona ho bahlanka ba hae e matla ho feta boikutlo ba tlhaho bo bonolo ka ho fetisisa boo re ka bo nahanang, e leng qenehelo eo ka tlhaho ’mè a bang le eona ho lesea la hae.

21, 22. Baiseraele ba ile ba hlaheloa ke eng Egepeta, hona Jehova o ile a nka khato efe ka mahlomola a bona?

²¹ Jehova joaloka motsoali ea lerato, o bontša qenehelo joang? Tšobotsi ena e bonahala ka ho hlaka tseleng eo a ileng a sebetsana le sechaba sa boholo-holo sa Iseraele ka eona. Qetellong ea lekholo la bo16 la lilemo B.C.E., Baiseraele ba limilione ba ne ba le bokhobeng Egepeta, moo ba neng ba hateletsoe ka thata. (Exoda 1:11, 14) Mahlomoleng a bona, Baiseraele ba ile ba hoeletsa ho Jehova hore a ba thuse. Molimo oa qenehelo o ile a arabela joang?

²² Pelo ea Jehova e ile ea ameha. O ile a re: “Ke bone mahloreho a sechaba sa ka se Egepeta, ’me ke utloile mohoo oa sona . . . ke tseba hantle bohloko boo se bo utloang.” (Exoda 3:7) Jehova o ne a ke ke a bona mahlomola a sechaba sa hae kapa a utloa mehoo ea sona feela eaba ha a se utloele bohloko. Jehova ke Molimo ea utloelang bohloko. ’Me kutloelo-bohloko—ho utloa bohloko boo ba bang ba bo utloang—e amana haufi-ufi le qenehelo. Empa Jehova ha aa ka a qenehela sechaba sa hae feela; o ile a susumelletseha ho nka khato molemong oa sona. Esaia 63:9 e re: “Leratong la hae le qenehelong ea hae o ile a ba rekolla.” O ile a lopolla Baiseraele Egepeta ka “letsoho le matla.” (Deuteronoma 4:34) Ka mor’a moo, o ile a ba fa lijo ka mohlolo le ho ba kenya naheng ea bona e behang litholoana.

23. (a) Mantsoe a mopesaleme a re tiisetsa joang hore Jehova o amehile ka botebo ka rōna re le batho ka bomong? (b) Jehova o re thusa ka litsela life?

²³ Jehova ha a qenehele batho ba hae e le sehlopha feela. Molimo oa rōna ea lerato o amehile ka ho teba ka e mong le e mong oa rōna. O elelloa ka hohle mahlomola leha e le afe ao re ka ’nang ra feta ho ’ona. Mopesaleme o ile a re: “Mahlo a Jehova a talimile ba lokileng, o sekehela mohoo oa bona o kōpang thuso tsebe. Jehova o haufi le ba lipelo li robehileng; o pholosa ba sithabetseng moeeng.” (Pesaleme ea 34:15, 18) Jehova o re thusa joang re le batho ka bomong? Ha ho bolele hore o tlosa sesosa sa mahlomola a rōna. Empa o entse litokisetso tse ngata ho thusa ba ipiletsang ho eena ba kōpa thuso. Lentsoe la hae le fana ka keletso e sebetsang e ka re thusang haholo. Ka phuthehong, o fana ka balebeli ba tšoanelehang moeeng, ba lekang ho bonahatsa qenehelo ea hae ha ba thusa batho ba bang. (Jakobo 5:14, 15) Kaha Jehova ke “Ea utloang thapelo,” o fana ka “moea o halalelang . . . ho ba mo kōpang.” (Pesaleme ea 65:2; Luka 11:13) Litokisetso tsena kaofela ke pontšo ea “qenehelo e bonolo ea Molimo oa rōna.”—Luka 1:78.

24. U tla arabela joang leratong la Jehova?

²⁴ Na ha ho thabise ho nahanisisa ka lerato la Ntate oa rōna oa leholimo? Sehloohong se tlileng pele ho sena, re hopolitsoe hore Jehova o bontšitse matla a hae, toka ea hae le bohlale ba hae ka litsela tse lerato, molemong oa rōna. Sehloohong sena teng, re bone hore ka litsela tse tsotehang, Jehova o bontšitse ka ho toba lerato la hae molokong oa batho le ho rōna re le batho ka bomong. Joale, ke hantle hore e mong le e mong ho rōna a ipotse, ‘Ke tla arabela joang leratong la Jehova?’ E se eka u ka arabela ka ho mo rata ka pelo eohle, kelello eohle, moea oohle le matla ’ohle. (Mareka 12:29, 30) E se eka letsatsi le leng le le leng u ka phela ka tsela e tla bontša takatso ea hao e tebileng ea ho atamela Jehova ka ho eketsehileng. Hape e se eka Jehova, Molimo eo e leng lerato, a ka u atamela ka ho eketsehileng—ka ho sa feleng!—Jakobo 4:8.

[Mongolo o botlaaseng ba leqephe]

Na Ua Hopola?

• Re tseba joang hore lerato ke tšobotsi e ka sehloohong ea Jehova?

• Ke hobane’ng ha re ka re ho romela ha Jehova Mora oa hae hore a tl’o utloa bohloko le ho re shoela ke ketso e khōlō ka ho fetisisa e lerato e kileng ea etsoa?

• Jehova o re tiisetsa joang hore o re rata re le batho ka bomong?

• Bibele e hlalosa ho tšoarela ha Jehova ka litsela life tse hlakileng?

[Setšoantšo se leqepheng la 15]

‘Molimo o fane ka Mora oa hae ea tsoetsoeng a ’notši’

[Setšoantšo se leqepheng la 16, 17]

“Le ba bohlokoa ho feta lirobele tse ngata”

[Tlhaloso ea Moo Setšoantšo se Nkiloeng Teng]

© J. Heidecker/VIREO

[Setšoantšo se leqepheng la 18]

Boikutlo ba ’mè ka lesea la hae bo ka re ruta ka qenehelo ea Jehova