Monna ea Behang Mohlala ea Ileng a Amohela Khalemelo
“LIKOENA Tsa Zambia li ja Batho ba 30 ka Khoeli.” Koranta e ’ngoe ea Afrika e ile ea tlaleha seo lilemong tse itseng tse fetileng. Ho ea ka setsebi se seng sa bophelo ba liphoofolo se ileng sa tšoara lihahabi tsena bakeng sa ho ithuta tsona, “ho ile ha hlokahala banna ba 12 ho koebetella koena e le ’ngoe.” Ka mohatla o matla le litlena tse tiileng, koena e ka ba phoofolo e tšosang!
Ho totobetse hore ’Mōpi o bolela koena ha a bua ka “Leviathane,” a sebelisa “morena [enoa] oa libatana kaofela” ho ruta mohlanka oa hae Jobo thuto ea bohlokoa. (Jobo 41:1, 34) Sena se etsahetse lilemong tse fetileng tse ka bang 3 500 naheng ea Utse, mohlomong kae-kae Arabia e ka leboea. Ha Molimo a hlalosa sebōpuoa sena ho Jobo, o ile a re ho eena: “Ha ho mohale ea ka betang pelo ho ea e tsosa. Ha ho le joalo, ke mang ea ka emang pel’a ka na?” (Jobo 41:10) Ke ’nete e tsoileng matsoho! Haeba re tšaba koena, re lokela ho tšaba haholoanyane hakaakang ho bua se hanyetsang Ea e bōpileng! Jobo o ile a bontša kutloisiso e feletseng ea thuto ena ka ho bolela phoso ea hae.—Jobo 42:1-6.
Ha ho buuoa ka Jobo, re ka ’na ra hopola mohlala oa hae o khabane oa ho mamella teko. (Jakobo 5:11) Ha e le hantle, Jehova o ne a khahlisoa ke Jobo le pele tumelo ea hae e lekoa ka matla. Ho latela pono ea Molimo, ka nako eo ‘ho ne ho se motho ea joalo ka eena lefatšeng, ea tsamaeang ka ho loka [“ea sa tšoauoeng phoso,” NW] le ka bokhabane, ea tšabang Molimo, ea sesefang bobe.’ (Jobo 1:8) Sena se lokela ho re susumelletsa ho ithuta ho eketsehileng ka Jobo, kaha ho etsa joalo ho tla re thusa ho bona hore na re ka khahlisa Molimo joang.
Kamano ea Hae le Molimo e ne e Tla Pele
Jobo e ne e le monna oa morui. Ntle ho khauta, o ne a e-na le linku tse 7 000, likamele tse 3 000, liesele tse tšehali tse 500, mohlape oa likhomo tse 1 000 le letšoele le leholo la bahlanka. (Jobo 1:3) Empa Jobo o ne a tšepile Jehova, eseng maruo. O ile a beha taba tjena: “Ha ekaba ke entse khauta tšepo ea ka, ka ba ka re ho khauta e hloekileng: Tšepo ea ka e ho uena; ha ekaba ke nyakalletse boholo ba maruo a ka le tse ngata tse bokeletsoeng ke matsoho a ka; . . . le teng e be e tla ba sebe se tšoanetseng ho otloa ke baahloli, hobane ho etsa joalo ke ho latola Molimo o phahameng.” (Jobo 31:24-28) Joaloka Jobo, re lokela ho nka kamano e haufi le Jehova Molimo e le ea bohlokoa haholo ho feta lintho tse bonahalang.
O ne a Sebetsana le Batho ba Bang ka Toka
Jobo o ne a sebetsana joang le bahlanka ba hae? Hore ba ne ba hlokomela hore ke motho oa toka le ea atamelehang ho bontšoa ke mantsoe a Jobo ka boeena: “Ha ekaba ke hanne tokelo ea mohlanka oa ka e motona, kapa ea e motšehali, mohla ba tsekisanang le ’na, ke ne tla etsa joang, hoja Molimo o no o ka tsoha, le hoja o no o ka batlisisa litaba, ke be ke tla re’ng ho oona?” (Jobo 31:13, 14) Jobo o ne a nka hore mohau oa Jehova ke oa bohlokoa, ’me ka lebaka leo a sebetsana le bahlanka ba hae ka mosa. Ke mohlala o motle hakaakang, haholo bakeng sa ba nang le boikarabelo ba bolebeli ka phuthehong ea Bokreste! Le bona ba lokela hore e be ba sa eeng ka tšobotsi, ba seng leeme, ’me e be ba atamelehang.
Jobo o ne a boetse a bontša thahasello ho ba ka ntle ho lelapa la hae. Ha a senola kameho ea hae ka ba bang o ile a re: “Ha ekaba ke ne ke hane thapelo ea mofutsana, ka lebellisa mosali oa mohlolohali, a ba a khathala mahlo, . . . ha ekaba letsoho la ka le kile la otla khutsana, kahobane ke bone ha ke emetsoe ke ba lutseng khorong; ha ho ka ba joalo, lehetla la ka a le ke le oe makopanong a lona, ’me letsoho la ka le oe, le robehe.” (Jobo 31:16-22) E se eka re ka ba ba nahanelang ba mathateng bao re ba tsebang ka phuthehong.
Ka lebaka la ho thahasella ba bang ntle ho boithati, Jobo o ne a amohela ka mofuthu baeti bao a sa ba tsebeng. Kahoo, o ne a ka re: “Moeti o na a se na ho hlola bosiu kantle, hobane ke ne ke ntse ke buletse baeti monyako oa ka.” (Jobo 31:32) Mohlala ona ke o motle hakaakang bakeng sa bahlanka ba Molimo kajeno! Ha re amohela ka mofuthu batho ba sa tsoa thahasella ’nete ea Bibele ha ba e-tla Holong ea ’Muso, ho ka ’na ha tlatsetsa tsoelo-peleng ea bona ea moea. Ho hlakile hore balebeli ba tsamaeang le Bakreste ba bang le bona ba hloka kamohelo ea rōna e mofuthu ea baeti.—1 Petrose 4:9; 3 Johanne 5-8.
Jobo o ne a e-na le maikutlo a matle le ho lira tsa hae. O ne a sa thabele tlokotsi e neng e ka ’na ea hlahela e mong ea mo hloileng. (Jobo 31:29, 30) Ho e-na le hoo, o ne a rata ho etsa batho ba joalo hantle, joalokaha ho bonahala tabeng ea ha a ithaopela ho rapella batšelisi ba hae ba bohata ba bararo.—Jobo 16:2; 42:8, 9; bapisa le Matheu 5:43-48.
O ne a Hloekile Tabeng ea ho Kopanela Liphate
Jobo o ne a tšepahala ho molekane oa hae oa lenyalo, ho se mohla a lumellang pelo ea hae hore e hōlise lerato le sa tšoanelang bakeng sa mosali e mong. Jobo o ile a re: “Ke ne ke hlabe selekane le mahlo a ka, sa hore nke ke ka talima moroetsana. Ha ekaba pelo ea ka e kile ea thetsoa ke mosali, kapa ha nkile ka lalla monyako oa eo ke ahisaneng le eena, ha ho ka ba joalo, mosali oa ka a silele e mong, ’me a fejoe ke ba bang; hobane hoo ke sebe se tšabehang [“boitšoaro bo hlephileng,” NW], ke bokhopo bo tšoanetseng ho otloa ke baahloli.”—Jobo 31:1, 9-11.
Jobo ha aa ka a lumella litakatso tsa boitšoaro bo bobe hore li silafatse pelo ea hae. Ho e-na le hoo, o ile a phehella tsela e khabane. Hase feela Jehova Molimo a ileng a khahlisoa ke monna enoa ea tšepahalang ea neng a loantša ho hokoa ke boitšoaro bo bobe!—Matheu 5:27-30.
O ne a Amehile ka Bomoea ba Lelapa
Ka linako tse ling bara ba Jobo ba ne ba lokisetsa mekete eo bara le barali ba hae kaofela ba neng ba e-ba teng ho eona. Ha matsatsi ana a mokete a fetile, Jobo o ne a ameha haholo ka hore mohlomong bana ba hae ba sitetsoe Jehova ka tsela e ’ngoe e itseng. Kahoo, Jobo o ne a nka khato, hobane tlaleho ea Mangolo e re: “Enere hobane e mong le e mong a qete letsatsi la ’mōka oa hae, Jobo o na a romela ho ba bitsa, ’me a ba hlatsoe, a tsohe e sa le ka meso, a hlabe mahlabelo a licheso a lekanang lihlooho tsa bona; hobane Jobo o na a re: Ekaba mohlomong bara ba ka ba sitiloe ka ho lebala Molimo lipelong tsa bona.” (Jobo 1:4, 5) E tlameha ebe see se ne se hatisa hakaakang likelellong tsa litho tsa lelapa la Jobo hore o amehile ka hore li be le tšabo e nang le tlhompho ho Jehova le hore li tsamaee litseleng tsa Hae!
Kajeno, ho hlokahala hore lihlooho tsa malapa tsa Bakreste li rute malapa a tsona Lentsoe la Molimo, Bibele. (1 Timothea 5:8) Ka sebele ke ho loketseng ho rapella litho tsa lelapa.—Baroma 12:12.
O Ile a Mamella ka Botšepehi Tlas’a Teko
Babali ba Bibele ba bangata ba tseba liteko tse matla tse ileng tsa oela Jobo. Satane Diabolose o ne a boletse ka tieo hore tlas’a maemo a lekang, Jobo o ne a tla rohaka Molimo. Jehova o ile a amohela phephetso ena, eaba ka potlako Satane o lihela Jobo tlokotsi. O ile a lahleheloa ke mehlape eohle ea hae. Ho hobe ka ho fetisisa, o ile a shoeloa ke bana ba hae kaofela. Nakoana ka mor’a moo, Satane o ile a otla Jobo ka mathopa a bolaeang ho tloha hloohong ho fihlela leotong.—Jobo, khaolo 1, 2.
Phello e ile ea e-ba eng? Ha mosali oa hae a mo phehella hore a rohake Molimo, Jobo o ile a re: ‘U bua joalo ka leoatla ha le bua. Na re tla amohela tse molemo letsohong la Molimo, re se ke ra amohela tse mpe na?’ Tlaleho ea Bibele ea phaella: “Tabeng tseo kaofela, Jobo ha a ka a etsa sebe ka molomo oa hae.” (Jobo 2:10) E, Jobo o ile a mamella ka botšepehi, ’me ka lebaka leo a paka hore Diabolose o leshano. E se eka ka tsela e tšoanang re ka mamella liteko ’me ra paka hore tšebeletso ea rōna ho Molimo e susumetsoa ke lerato le hloekileng bakeng sa Jehova.—Matheu 22:36-38.
O ne a Amohela Khalemelo ka Boikokobetso
Le hoja Jobo a ne a beha mohlala ka litsela tse ngata, e ne e se motho ea phethahetseng. Eena ka boeena o ile a re: “Na ho ka ntšuoa motho ea hloekileng mothong ea litšila? Le hanyenyane.” (Jobo 14:4; Baroma 5:12) Kahoo, ha Molimo a ne a re Jobo ke ea sa tšoauoeng phoso, sena e ne e le ’nete ka kutloisiso ea hore o ne a phela tumellanong le sohle seo Molimo a se lebeletseng ho e mong oa bahlanka ba hae ba batho ba sa phethahalang le ba baetsalibe. Ke mohloli o mokaakang oa khothatso!
Jobo o ile a mamella teko ea hae, empa e ile ea senola bofokoli. Ha batšelisi ba bohata ba bararo ba utloa tlokotsi eohle e mo hlahetseng, ba ile ba mo etela. (Jobo 2:11-13) Ba ile ba beha qoso ea hore Jehova o ne a otla Jobo kahobane a entse libe tse tebileng. Ka tlhaho, Jobo o ile a hlabehisoa ke liqoso tsena tsa bohata, ’me ka matla o ile a batla ho itšireletsa. Empa o ile a ba leeme ha a leka ho itokafatsa. Ha e le hantle, Jobo o bile a fana ka maikutlo a hore o lokile ho feta Molimo!—Jobo 35:2, 3.
Kaha Molimo o ne a rata Jobo, O ile a sebelisa mohlankana e mong hore a totobatse phoso ea Jobo. Tlaleho e re: “Bohale ba Elihu, . . . ba tukela Jobo, hobane a ipeile ea lokileng ho fetisa Molimo.” Kamoo Elihu a hlokometseng kateng: “Jobo o itse: Ke lokile, ’me Molimo o nkamohile toka ea ka.” (Jobo 32:2; 34:5) Leha ho le joalo, Elihu ha aa ka a ba ntsoe-leng le “batšelisi” bana ba bararo qetong e fosahetseng ea hore Molimo o ne a otla Jobo ka lebaka la libe tsa hae. Ho e-na le hoo, Elihu o ile a bontša hore o kholisehile hore Jobo oa tšepahala, eaba oa mo eletsa: ‘Nyeoe e ka pel’a [Jehova], u mo letele ka tabatabelo.’ Ka sebele, Jobo a ka be a ile a letela Jehova ho e-na le hore a bue ka lepotla-potla a itšireletsa. Elihu o ile a tiisetsa Jobo: “[Molimo] a ke ke a nyenyefatsa toka le ho loka ho hongata.”—Jobo 35:14; 37:23, NW.
Ho ne ho hlokahala hore monahano oa Jobo o lokisoe. Kahoo, Jehova o ile a mo ruta kamoo motho a leng monyenyane kateng ha a bapisoa le boholo ba Molimo. Jehova o ile a supa lefatše, leoatle, maholimo a tletseng linaleli, liphoofolo le meeka e meng e mengata ea pōpo. Qetellong, Molimo o ile a bua ka Leviathane—e leng koena. Jobo o ile a amohela khalemelo ka boikokobetso, ’me ho sena o beha mohlala o tsoelang pele.
Le hoja e ka ’na eaba re etsa hantle tšebeletsong ea Jehova, re tla etsa liphoso. Haeba phoso e tebile, Jehova a ka ’na a re khalemela ka mekhoa e meng. (Liproverbia 3:11, 12) Re ka ’na ra hopola lengolo le leng le tsosang matsoalo a rōna. Mohlomong Molula-Qhooa kapa sengoliloeng se seng sa Mokhatlo oa Watch Tower se ka ’na sa bua ho hong ho tla re hlokomelisa phoso. Kapa ho ka etsahala hore Mokreste-’moho le rōna ka mosa a re bontše hore re hlōlehile ho sebelisa molao-motheo o itseng oa Bibele. Re tla itšoara joang khalemelong e joalo? Jobo o ile a bonahatsa moea oa tšoabo, a re: “Ke fela ke baka ke le lerōleng le moloreng.”—Jobo 42:6, NW.
O Ile a Putsoa ke Jehova
Jehova o ile a putsa Jobo, a lumella mohlanka enoa oa hae hore a phele lilemo tse ling tse 140. Nakong eo, o ile a fumana ho hongata ho feta ho neng ho mo lahlehetse. Le hoja qetellong Jobo a ile a shoa, ha ho tika-tiko hore o tla tsohela lefatšeng le lecha la Molimo.—Jobo 42:12-17; Ezekiele 14:14; Johanne 5:28, 29; 2 Petrose 3:13.
Le rōna re ka kholiseha hore re tla fumana kamohelo le tlhohonolofatso ea Molimo haeba re mo sebeletsa ka botšepehi le ho amohela khalemelo eohle e tlang ho rōna e thehiloeng Bibeleng. Ka lebaka leo, re tla ba le tšepo e tiileng ea bophelo tsamaisong e ncha ea lintho ea Molimo. Habohlokoa haholo, re tla tlotlisa Molimo. Boitšoaro ba rōna bo tšepahalang bo tla putsoa ’me e tla ba bopaki bo eketsehileng ba hore batho ba hae ha ba mo sebeletse ka mabaka a boithati empa ba mo sebeletsa ka lerato le tiileng. Re na le tokelo e kaakang ea hore re thabise pelo ea Jehova joaloka Jobo ea tšepahalang, ea ileng a amohela khalemelo ka boikokobetso!—Liproverbia 27:11.
[Litšoantšo tse leqepheng la 26]
Jobo o ne a bontša kameho e lerato bakeng sa likhutsana, bahlolohali le ba bang
[Litšoantšo tse leqepheng la 28]
Jobo o ile a putsoa haholo ka ho amohela khalemelo ka boikokobetso