Jehova ke Mohlala o Phahameng ka ho Fetisisa oa Molemo
“Rokang Jehova oa mabotho, etsoe Jehova o molemo!”—JEREMIA 33:11.
1. Ke hobane’ng ha re susumelletseha ho rorisa Molimo ka lebaka la molemo oa hae?
JEHOVA MOLIMO o molemo ka ho feletseng. Moprofeta Zakaria o ile a hooa a re: “Molemo oa hae o moholo hakaakang!” (Zakaria 9:17) Ka sebele molemo o bonahala nthong e ’ngoe le e ’ngoe eo Molimo a e entseng ha a ne a lokisa lefatše hore re le thabele. (Genese 1:31) Re ke ke ra utloisisa melao eohle e rarahaneng eo Molimo a entseng hore e sebetse ha a bōpa bokahohle. (Moeklesia 3:11; 8:17) Empa bonyane boo re bo tsebang bo re susumelletsa ho rorisa Molimo ka lebaka la molemo oa hae.
2. U ka hlalosa molemo joang?
2 Molemo ke eng? Ke boitšoaro bo khabane, kapa bo botle. Leha ho le joalo, molemo hase feela bosieo ba sohle se sebe. Molemo ke karolo ea litholoana tsa moea, ’me ke tšoaneleho e bontšoang ka liketso tse ntle le tse nang le thuso. (Bagalata 5:22, 23) Re bontša molemo ha re etsetsa ba bang liketso tse ntle le tse nang le thuso. Tsamaisong ena ea lintho, se nkoang se le molemo maemong a mang, se ka ’na sa nkoa se le sebe ho a mang. Leha ho le joalo, e le hore re tle re thabele khotso le thabo, molemo o tlameha ho ba le molao-motheo o le mong. Ebe ke mang ea nang le tokelo ea ho beha molao-motheo oo?
3. Genese 2:16, 17 e bontša’ng ka molao-motheo oa molemo?
3 Molimo ke eena ea behang molao-motheo oa molemo. Tšimolohong ea histori ea motho, ke Jehova ea ileng a laela motho oa pele a re: “U ka ja tsa sefate se seng le se seng sa serapa hore u khotsofale. Empa ha e le sefate sa tsebo ea botle le bobe u se ke ua ja tsa sona, etsoe ka letsatsi leo ka lona u jang tsa sona ka sebele u tla shoa.” (Genese 2:16, 17) E, batho ba lokela ho lebella ho fumana tsebo ea botle le bobe ho ’Mōpi oa bona.
O Bontša Molemo o sa Tšoanelang
4. Molimo o etselitse batho eng haesale Adama a sitoa?
4 Tšepo ea motho ea hore o tla thaba ka ho sa feleng a phethahetse e ile ea senyeha ha Adama a sitoa ’me a hana ho amohela tokelo ea Molimo ea ho beha melao-motheo ea molemo. (Genese 3:1-6) Leha ho le joalo, pele bana ba Adama ba tsoaloa ba futsitse sebe le lefu, Molimo o ile a bolela esale pele hore ho tla tla Peō e phethahetseng. Jehova o ne a hlile a tobisitse litaba ho “noha ea pele,” e leng Satane Diabolose ha a re: “Ke tla beha bora pakeng tsa hao le mosali le pakeng tsa peō ea hao le peō ea hae. E tla u khoba hlooho ’me uena u tla e loma serethe.” (Tšenolo 12:9; Genese 3:15) Morero oa Jehova e ne e le ho lopolla batho ba baetsalibe. Jehova o hlile o entse tokisetso e joalo e le ha a bontša molemo o sa tšoanelang bakeng sa ho pholosa ba bontšang tumelo sehlabelong sa thekollo sa Mora oa hae ea ratoang.—Matheu 20:28; Baroma 5:8, 12.
5. Le hoja re futsitse lipelo tse sekametseng bobeng, ke hobane’ng ha re ka bontša molemo o itseng?
5 Ha e le hantle, ka lebaka la sebe sa Adama, re futsitse lipelo tse sekametseng bobeng. (Genese 8:21) Leha ho le joalo, ho thabisang ke hore Jehova o re thusa ho bontša molemo o itseng. Ho lula linthong tseo re ithutileng tsona mangolong a hae a bohlokoa a halalelang ho re ‘hlalefisetsa poloko’ le ho re ‘hlomellela mosebetsi o mong le o mong o molemo,’ ’me ho boetse ho re nolofalletsa ho etsa se molemo mahlong a hae. (2 Timothea 3:14-17) Leha ho le joalo, e le hore re rue molemo taeong e fanoang ke Mangolo le hore re bontše molemo, re tlameha ho ba le boikutlo ba mopesaleme ea ileng a bina a re: “[Jehova] u molemo ’me u etsa se molemo. Nthute melao ea hao ea tsamaiso.”—Pesaleme ea 119:68.
Molemo oa Jehova oa Phahamisoa
6. Hoba Morena Davida a tlise areka ea selekane Jerusalema, Balevi ba ile ba bina pina e nang le polelo efe?
6 Morena Davida oa Iseraele ea boholo-holo o ile a lumela hore Molimo o molemo ’me a batla tataiso ea Hae. Davida o ile a re: “Jehova o molemo ’me o lokile. Ke ka lebaka leo a rupelang baetsalibe tseleng.” (Pesaleme ea 25:8) Thuto e tsoang ho Molimo e neng e fuoa Baiseraele e ne e akarelletsa litaelo tse leshome tsa bohlokoa—e leng Melao e Leshome—’me e ne e ngotsoe matlapeng a mabeli ’me e bolokiloe ka lebokoseng le halalelang le neng le bitsoa areka ea selekane. Hoba Davida a tlise Areka Jerusalema, motse-moholo oa Iseraele, Balevi ba ile ba bina pina e neng e akarelletsa polelo ena: “Lebohang Jehova, kaha o molemo, etsoe mosa oa hae o lerato o teng ho isa nakong e sa lekanyetsoang.” (1 Likronike 16:34, 37-41) E ne e le ho thabisang hakaakang ho utloa libini tsa Balevi li bina mantsoe ao a monate!
7. Ho ile ha etsahala’ng hoba Areka e kenngoe ka Sehalalelisisong le ka mor’a thapelo ea Solomone ea nehelo?
7 Mantsoe ’ona ao a thoriso a ile a totobatsoa ha ho ne ho neheloa tempele e hahiloeng ke Solomone mora oa Davida. Hoba areka e kenngoe ka Sehalalelisisong sa tempele e qetang ho hahoa, Balevi ba ile ba qala ho rorisa Jehova, “etsoe o molemo, kaha mosa oa hae o lerato o teng ho isa nakong e sa lekanyetsoang.” Ketsahalong eo, ka mohlolo tempele e ile ea tlala leru le neng le emela boteng bo khanyang ba Jehova. (2 Likronike 5:13, 14) Ka mor’a thapelo ea Solomone ea nehelo, “mollo oa theoha maholimong ’me oa chesa nyehelo ea secheso le mahlabelo.” Ha ba bona sena, “bara bohle ba Iseraele . . . ba inamela fatše ka lifahleho sebakeng se katiloeng ’me ba khumama ba leboha Jehova, ‘etsoe o molemo, kaha mosa oa hae o lerato o teng ho isa nakong e sa lekanyetsoang.’” (2 Likronike 7:1-3) Ka mor’a mokete oa matsatsi a 14, Baiseraele ba ile ba khutlela malapeng a bona ba “thabile ’me [ba] ikutloa [ba] nyakaletse lipelong ka lebaka la molemo oo Jehova a neng a o etselitse Davida le Solomone le sechaba sa hae sa Iseraele.”—2 Likronike 7:10.
8, 9. (a) Le hoja Baiseraele ba ile ba rorisa Jehova ka lebaka la molemo oa hae, qetellong ba ile ba nka tsela efe? (b) Ke eng e ileng ea boleloa esale pele ka Jeremia bakeng sa Jerusalema, ’me boprofeta boo bo ile ba phethahala joang?
8 Ka masoabi, Baiseraele ha baa ka ba tsoela pele ho phela tumellanong le lipina tsa bona tse rorisang Molimo. Ka mor’a nako, batho ba Juda ba ile ba ‘tlotlisa Jehova ka melomo feela.’ (Esaia 29:13) Ho e-na le ho lumellana le melao-motheo ea Molimo ea molemo, ba ile ba qala ho itloaetsa ho etsa bobe. Ba ne ba etsa lintho life tse mpe? Ba ile ba ba molato oa borapeli ba litšoantšo, boitšoaro bo bobe, khatello ea mafutsana le libe tse ling tse feteletseng! Ka lebaka leo, Jerusalema e ile ea timetsoa ’me baahi ba Juda ba isoa botlamuoeng Babylona ka 607 B.C.E.
9 Molimo o ile a khalemela batho ba hae ka tsela e joalo. Leha ho le joalo, o ile a bolela esale pele ka moprofeta Jeremia hore Jerusalema ho tla boela ho utloahale mantsoe a ba reng: “Rokang Jehova oa mabotho, etsoe Jehova o molemo; kaha mosa oa hae o lerato o teng ho isa nakong e sa lekanyetsoang!” (Jeremia 33:10, 11) ’Me ho ile ha e-ba joalo. Hoba naha e lule e le lesupi ka lilemo tse 70, ka 537 B.C.E., masala a Bajuda a ile a khutlela Jerusalema. (Jeremia 25:11; Daniele 9:1, 2) A ile a tsosa aletare Thabeng ea Moria ’me a qala ho nyehela mahlabelo moo. Motheo oa tempele o ile oa raloa ka selemo sa bobeli a khutlile. E ne e le nako ea thabo e kaakang! Esdrase o re: “Ha lihahi li ralile motheo oa tempele ea Jehova, joale baprista ba apereng liaparo tsa mosebetsi, ka literompeta, le Balevi bara ba Asafe, ka licymbala, ba [ile ba] ema ho rorisa Jehova ho ea ka taelo ea Davida morena oa Iseraele. Ba qala ho arabela ka ho rorisa le ho leboha Jehova, ‘etsoe o molemo, kaha mosa oa hae o lerato ho Iseraele o teng ho isa nakong e sa lekanyetsoang.’”—Esdrase 3:1-11.
10. Pesaleme ea 118 e qala le ho qetella ka polelo efe ea bohlokoa?
10 Polelo e joalo ea thoriso mabapi le molemo oa Jehova e hlaha lipesalemeng tse ’maloa. E ’ngoe ea tsona ke Pesaleme ea 118, e neng e binoa ke malapa a Baiseraele ha a koala mokete oa Paseka. Pesaleme eo e qala le ho qetella ka mantsoe ana: “Lebohang Jehova, etsoe o molemo; etsoe mosa oa hae o lerato o teng ho isa nakong e sa lekanyetsoang.” (Pesaleme ea 118:1, 29) Mantsoe ana e ka ’na eaba ke mantsoe a thoriso a ho qetela ao Jesu Kreste a ileng a a bina le baapostola ba hae ba tšepahalang bosiung ba pele ho lefu la hae ka 33 C.E.—Matheu 26:30.
“Ka Kōpo, Etsa Hore ke Bone Khanya ea Hao”
11, 12. Ha Moshe a bona lereli la khanya ea Molimo, o ile a utloa phatlalatso efe?
11 Makholo a lilemo pele ho mehla ea Esdrase, ho ile ha bontšoa ka lekhetlo la pele hore na molemo oa Jehova le mosa oa hae o lerato li amana hokae. Nakoana ka mor’a hore Baiseraele ba rapele namane ea khauta lefeelleng le ha bafosi ba se ba bolailoe, Moshe o ile a kōpa Jehova ka matla a re: “Ka kōpo, etsa hore ke bone khanya ea hao.” Kaha o ne a tseba hore Moshe a ke ke a bona sefahleho sa Hae ’me a phela, Jehova o ile a re: “Ke tla etsa hore molemo oohle oa ka o fete ka pel’a sefahleho sa hao.”—Exoda 33:13-20.
12 Letsatsing le hlahlamang, molemo oa Jehova o ile oa feta ka pel’a sefahleho sa Moshe Thabeng ea Sinai. Nakong eo, Moshe o ile a bona lereli la khanya ea Molimo ’me a utloa phatlalatso ena: “Jehova, Jehova, Molimo ea mohau le ea mosa, ea liehang ho halefa le ea tletseng mosa o lerato le ’nete, ea bolokelang ba likete mosa o lerato, ea tšoarelang phoso le tlōlo le sebe, empa ho hang a ke ke a lokolla kotlong, ea tlisang kotlo bakeng sa phoso ea bo-ntate ho bara le ho litloholo, ho moloko oa boraro le moloko oa bone.” (Exoda 34:6, 7) Mantsoe ana a bontša hore molemo oa Jehova o amana le mosa oa hae o lerato le litšobotsi tse ling tsa botho ba hae. Ho li hlahloba ho tla re thusa ho bontša molemo. A re qaleng ka ho hlahloba tšoaneleho ea pele e boletsoeng habeli phatlalatsong ena e tsotehang ea molemo oa Molimo.
“Molimo . . . ea Tletseng Mosa o Lerato”
13. Phatlalatsong ea molemo oa Molimo, ke tšoaneleho efe e boleloang habeli, ’me ke hobane’ng ha hoo ho loketse?
13 “Jehova [ke] Molimo . . . ea tletseng mosa o lerato . . . , ea bolokelang ba likete mosa o lerato.” Lentsoe la Seheberu le fetoletsoeng e le “mosa o lerato” le boetse le bolela “lerato le tšepahalang.” Ke eona tšoaneleho feela e boletsoeng habeli phatlalatsong ea Molimo ho Moshe. Hoo ho loketse hakaakang kaha lerato ke lona tšoaneleho e khōlō ea Jehova! (1 Johanne 4:8) Polelo ena e tsebahalang ea thoriso e eang ho Jehova e reng, “kaha o molemo, etsoe mosa oa hae o lerato o teng ho isa nakong e sa lekanyetsoang” e totobatsa tšoaneleho ena.
14. Ke bo-mang ka ho khetheha ba thabelang molemo oa Molimo le mosa oa hae o lerato?
14 Ntho e ’ngoe e bontšang molemo oa Jehova ke hore O ‘tletse mosa o lerato.’ Sena se totobala tlhokomelong e bonolo eo a e fang bahlanka ba hae ba batho ba inehetseng le ba tšepahalang. (1 Petrose 5:6, 7) Joalokaha Lipaki tsa Jehova li ka paka, ba mo ratang le ba mo sebeletsang o ba ‘bolokela mosa o lerato.’ (Exoda 20:6) Sechaba sa tlhaho sa Iseraele se ile sa khaotsa ho fumana mosa o lerato oa Jehova, kapa lerato la hae le tšepahalang, hobane se ile sa hana Mora oa hae. Empa molemo oa Molimo le lerato la hae le tšepahalang ho Bakreste ba tšepahalang ba lichaba tsohle li tla ba teng ka ho sa feleng.—Johanne 3:36.
Jehova o Mohau Hape o Mosa
15. (a) Phatlalatso eo Moshe a ileng a e utloa Thabeng ea Sinai e qalile ka polelo efe? (b) Mohau o akarelletsa eng?
15 Phatlalatso eo Moshe a ileng a e utloa Thabeng ea Sinai e qalile ka polelo ena: “Jehova, Jehova, Molimo ea mohau le ea mosa.” Lentsoe la Seheberu le fetoletsoeng e le “mohau” le ka ’na la bolela “mala” ’me le amana haufi le lentsoe “pōpelo.” Kahoo, mohau o akarelletsa boikutlo ba qenehelo e khōlō e botebong ba motho. Empa mohau ha o felle feela ka kutloelo-bohloko ea sebele. O lokela ho re susumelletsa ho etsa ho hong ho imolla ba bang bohloko boo ba bo utloang. Ka mohlala, baholo ba lerato ba Bakreste ba bona tlhokahalo ea ho ba mosa ho balumeli-’moho le bona, ho ‘bontša mohau ka nyakallo’ ha ho loketse.—Baroma 12:8; Jakobo 2:13; Juda 22, 23.
16. Ke hobane’ng ha ho ka boleloa hore Jehova o mosa?
16 Molemo oa Molimo o boetse o bonahala ka mosa oa hae. Motho ea mosa o “nahanela maikutlo a motho e mong ka tsela e totobetseng” ’me o bontša ‘kutloelo-bohloko e etsang hore a ratehe haholo ho ba maemong a tlaase.’ Jehova ke mohlala o molemo ka ho fetisisa oa mosa ha a sebetsana le bahlanka ba hae ba tšepahalang. Ka mohlala, Molimo ka mosa o ile a sebelisa mangeloi hore a matlafatse moprofeta Daniele ea hōlileng le ho tsebisa moroetsana Maria ka tokelo eo a neng a tla e fumana ea ho beleha Jesu. (Daniele 10:19; Luka 1:26-38) Joaloka batho ba Jehova, ka sebele re ananela tsela ea hae e mosa ea ho ipiletsa ho rōna ka Bibele. Re mo rorisa ka pontšo ena ea molemo oa hae ’me re batla ho ba mosa ha re sebelisana le ba bang. Ha ba tšoanelehang moeeng ba khutlisetsa molumeli-’moho le bona tseleng “ka moea o bonolo,” ba leka ho ba bonolo le ho ba mosa.—Bagalata 6:1.
Ke Molimo ea Liehang ho Halefa
17. Ke hobane’ng ha re leboha hore ebe Jehova o “lieha ho halefa”?
17 Ke “Molimo . . . ea liehang ho halefa.” Mantsoe ana a re hlokomelisa ka tšobotsi e ’ngoe ea molemo oa Jehova. Jehova o mamella litšito tsa rōna ’me o re fa nako ea ho hlōla bofokoli bo tebileng le ea ho tsoela pele moeeng. (Baheberu 5:12–6:3; Jakobo 5:14, 15) Le ba e-s’o fetohe barapeli ba hae ba rua molemo ka mamello ea Molimo. Ba sa ntsane ba e-na le nako ea ho nka khato ka molaetsa oa ’Muso le hore ba bake. (Baroma 2:4) Leha ho le joalo, le hoja Jehova a mamella, ka linako tse ling molemo oa hae o mo susumelletsa hore a bontše khalefo ea hae, joalokaha a ile a etsa ha Baiseraele ba ne ba rapela namane ea khauta Thabeng ea Sinai. Khalefo ea Molimo e tla tloha e bontšoa ketsahalong e khōlō haholo ha a felisa tsamaiso e khopo ea Satane.—Ezekiele 38:19, 21-23.
18. Mabapi le ’nete, ho na le phapang efe pakeng tsa Jehova le baeta-pele ba batho?
18 “Jehova [ke] Molimo . . . ea tletseng . . . ’nete.” Jehova o fapane hakaakang le baeta-pele ba batho ba tšepisang batho lintho li hana ho fela empa ba sa li phethahatse! Ho fapana le moo, barapeli ba Jehova ba ka tšepa ntho e ’ngoe le e ’ngoe e boletsoeng ka Lentsoeng la hae le bululetsoeng. Kaha Molimo o tletse ’nete, re ka tšepa litšepiso tsa hae kamehla. Ka lebaka la molemo oa hae, Ntat’a rōna oa leholimo ha a hlōlehe ho araba lithapelo tsa rōna ha re kōpa ’nete ea moea, ’me o re fa eona e le ngata.—Pesaleme ea 43:3; 65:2.
19. Jehova o bontšitse baetsalibe ba bakileng molemo ofe o hlahelletseng?
19 “Jehova [ke] Molimo . . . ea tšoarelang phoso le tlōlo le sebe.” Ka lebaka la molemo oa hae, Jehova o itokiselitse ho tšoarela baetsalibe ba bakang. Ha ho pelaelo hore re leboha haholo hore ebe Ntat’a rōna ea lerato oa leholimo o lokiselitse tšoarelo ka sehlabelo sa Jesu. (1 Johanne 2:1, 2) Ka sebele re thabela hore bohle ba bontšang tumelo thekollong ba khona ho thabela kamano e khethehileng le Jehova, ’me ba na le tšepo ea bophelo bo sa feleng lefatšeng le lecha leo a le tšepisitseng. Ka sebele mabaka ana ke a matla haholo a ho rorisa Jehova hobane o bontšitse batho molemo!—2 Petrose 3:13.
20. Re na le bopaki bofe ba hore Molimo ha a khothalletse bobe?
20 “Ho hang [Jehova] a ke ke a lokolla kotlong.” Ha e le hantle, lena ke lebaka le leng la ho roka Jehova ka lebaka la molemo oa hae. Hobane’ng? Hobane tšobotsi ea bohlokoa ea molemo ke hore ha o khothalletse bobe ka tsela efe kapa efe. Ho feta moo, “tšenolong ea Morena Jesu ho tsoa leholimong le mangeloi a hae a matla,” ho tla iphetetsoa “holim’a ba sa tsebeng Molimo le ba sa mameleng litaba tse molemo.” Ba “tla feta kotlong ea boahloli ea timetso e sa feleng.” (2 Bathesalonika 1:6-9) Barapeli ba pholohileng ba Jehova ba tla khona ho thabela bophelo ka botlalo ba sa tšoenngoe ke batho ba sa tšabeng Molimo, le ba “hlokang lerato la se molemo.”—2 Timothea 3:1-3.
Etsisa Molemo oa Jehova
21. Ke hobane’ng ha re lokela ho bontša molemo?
21 Ha ho pelaelo hore re na le mabaka a mangata a ho rorisa Jehova le ho mo leboha bakeng sa molemo oa hae. Joaloka bahlanka ba hae, na ha rea lokela ho etsa sohle se matleng a rōna ho bontša molemo? Re ka mo etsisa hobane moapostola Pauluse o ile a phehella Bakreste-’moho le eena a re: “Le be baetsisi ba Molimo, joaloka bana ba ratoang.” (Baefese 5:1) Ntat’a rōna oa leholimo o bontša molemo a sa phetse, ’me le rōna re lokela ho etsa joalo.
22. Re tla hlahloba eng sehloohong se latelang?
22 Haeba re inehetse ka pelo eohle ho Jehova, ha ho pelaelo hore re labalabela ho etsisa molemo oa hae. Kaha re litloholo tsa Adama oa moetsalibe, ha ho bonolo hore re etse molemo. Leha ho le joalo, sehloohong se latelang re tla bona hore na ke hobane’ng ha ho ka khoneha hore re bontše molemo. Hape re tla hlahloba litsela tse sa tšoaneng tseo ka tsona re ka etsisang Jehova—mohlala o phahameng ka ho fetisisa oa molemo—le tseo re lokelang ho mo etsisa ka tsona.
U ka Araba Joang?
• Molemo ke eng?
• Ke polelo efe ea Mangolo e totobatsang molemo oa Molimo?
• Ke lintho life tse ling tse bontšang molemo oa Jehova?
• Ke hobane’ng ha re lokela ho etsisa mohlala oa Jehova oa molemo?
[Setšoantšo se leqepheng la 12]
Jehova o ile a khalemela batho ba hae ba boholo-holo hobane ba ne ba sa phelele lipolelo tsa bona tsa thoriso
[Setšoantšo se leqepheng la 12]
Masala a tšepahalang a ile a khutlela Jerusalema
[Setšoantšo se leqepheng la 13]
Moshe o ile a utloa phatlalatso e tsotehang ea molemo oa Molimo
[Setšoantšo se leqepheng la 15]
Molemo oa Jehova o bonoa tseleng eo ka eona a ipiletsang ho rōna ka Bibele