Ba ne ba Tseba Lebitso la Molimo
BUKA ea pele eo ho tsejoang hore e ile ea ngoloa le ho hatisoa likoloneng tsa Engelane tse Amerika ke Bay Psalm Book. Khatiso ea eona ea pele e ile ea hatisoa ke Stephen Daye selemong sa 1640 Koung ea Kolone ea Massachusetts. Khatiso eo ea pele e ne e e-na le Buka ea Bibele ea Lipesaleme, e fetoletsoeng ho tsoa ho Seheberu ho ea puong ea Senyesemane joalokaha e ne e buuoa le ho ngoloa ka nako eo.
Tšobotsi e hlokomelehang ea Bay Psalm Book e ne e le tšebeliso ea lebitso la bomolimo litemaneng tse ling. Kahoo, e mong le e mong ea neng a bala buka ena lilemo tse ka bang 350 tse fetileng o ne a le boemong ba ho tseba lebitso la ’Mōpi oa rōna. Ka mohlala, khatisong eo Pesaleme ea 83:17, 18 e baleha tjena: “A ba ke ba eme hlooho ka ho felletseng, ’me ba be tsielehong e tšabehang: e, ba ke ba hlabisoe lihlong, ’me ba felisoe. Hore batho ba tle ba tsebe; hore uena eo lebitso la hao e leng IEHOVAH ke uena feela, ea phahameng ka ho fetisisa le ea holimo-limo lefatšeng lohle.”
Ho hlakile hore Molimo ea phahameng ka ho fetisisa o hloka ho ka holimo ho ho lumela lebitso la hae hore ke Jehova (Iehovah). Ho Bay Psalm Book, Pesaleme ea 1:1, 2 e re bolella hore “motho ea lehlohonolo” ha a tsamaee ka keletso ea ba khopo, “empa molao oa Iehovah, ke thabo eo a e lakatsang.” New England Psalms e ntlafalitsoeng ea 1648 e re: “Empa eena molaong oa Jehova o behile thabo ea hae eohle.”
Mona New World Translation of the Holy Scriptures ea lekholo la bo20 la lilemo e baleha tjena: “Ho thaba motho ea sa tsamaeang ka keletso ea ba khopo, ’me a sa ema tseleng ea baetsalibe, ’me a sa lula setulong sa basomi. Empa thabo ea hae e molaong oa Jehova, ’me molaong oa hae o bala ka lentsoe le tlaase motšehare le bosiu.”
Hore motho a thabe ka ’nete, o tlameha ho hana keletso ea batho ba khopo. O tlameha ho se latele mohlala oa baetsalibe ’me a ke ke a itsoakanya le basomi ba se nang bomolimo. Har’a tse ling, ho hlokahala hore a qobe setsoalle sa bao keletso le boitšoaro ba bona bo ka mo hulelang boitšoarong bo bobe ba likamano tsa botona le botšehali, tšebeliso e mpe ea lithethefatsi, le liketso tse ling tse khahlanong le molao oa Molimo. E, thabo ea sebele e itšetlehile ka ho ithuta ka Molimo oa ’nete, eo lebitso la hae e leng Jehova, le ho sebelisa melao ea hae joalokaha e senotsoe ka Bibeleng.