Jehova o re Tseba Hantle!

RURI Jehova oa re tseba, haholo-holo haeba re bahlanka ba hae ba tšepahalang. Metsoalle e haufi, beng ka rōna, esita le batsoali, ha ba re tsebe hantle joalokaha eena a re tseba. E, Molimo o re tseba hamolemo le ho feta kamoo rōna re itsebang ka teng!

Tsebo ea Jehova e phethahetseng ka bahlanka ba hae e senotsoe hantle ho Pesaleme ea 139. Davida o itse’ng pesalemeng eo? ’Me ho tsejoa ha rōna ke Molimo ho lokela ho ama lipolelo le liketso tsa rōna joang?

Boholo ba Seo Jehova a se Tsebang!

Kaha Molimo ke ’Mōpi oa rōna, re lokela ho lebella hore o be le tsebo e felletseng ka rōna. (Liketso 17:24-28) Kahoo, Davida o ne a ka re: “Oho Jehova, u ntlhahlobisisitse, ’me ua ntseba.” (Pesaleme ea 139:1, NW) Tsebo ea Molimo ka Davida e ne e tšoana le e fumanoeng ka patlisiso e felletseng. A thabetse hore e be Jehova o mo hlahlobisisitse, mopesaleme o ile a ipeha tlas’a taolo le tataiso ea Molimo ka ho felletseng. Ka ho tšoanang, ka thapelo Lipaki tsa Jehova li ‘laeletsa tsela ea tsona ho Jehova, lia mo tšepa,’ li kholisehile hore ka mehla o tla etsa se nepahetseng. (Pesaleme ea 37:5) Ho na le boikutlo ba tšireletseho ea moea ka lipelong tsa rōna hobane re batla ho tataisoa ke bohlale ba Molimo, ’me ka boithaopo re ikokobeletsa tataiso ea Molimo. (Liproverbia 3:19-26) Joaloka Davida, re ka tšelisoa ke tsebo ea hore Molimo o re talimile, o utloisisa mathata a rōna, ’me ka mehla o itokiselitse ho re thusa.

Mopesaleme o ile a lumela: “U tseba ha ke lula, leha ke tsoha.” (Pesaleme ea 139:2a) Molimo o ne o tseba ntho e ’ngoe le e ’ngoe ka mesebetsi ea Davida, e kang ha a lula fatše qetellong ea letsatsi la mosebetsi le ha a tsoha ka mor’a boroko ba bosiu. Haeba re Lipaki tsa Jehova, kholiseha hore le rōna Molimo o re tseba hantle.

Davida o ile a lumela: “U tseba mohopolo oa ka, u le hole.” (Pesaleme ea 139:2b) Le hoja Molimo o lula maholimong hōle haholo le lefatše, o ne o tseba seo Davida a se nahanang. (1 Marena 8:43) Temoho e joalo ha ea lokela ho re makatsa, hobane Jehova “o bona seo pelo e leng sona.” (1 Samuele 16:7, NW; Liproverbia 21:2) ’Nete ea hore Molimo o talima mehopolo ea rōna e lokela ho re susumelletsa ho nahana ka lintho tse hloekileng, tse khabane, le tse tšoaneloang ke poko. Hape ke ho loketseng hakaakang hore ka mehla re senole mehopolo ea rōna ka thapelo e tlohang botebong ba pelo e le hore re ka fumana tataiso ea Molimo le “khotso ea Molimo”!—Ba-Filippi 4:6-9.

Mopesaleme o ile a phaella: “U ntekola leha ke tsamaea, leha ke robala, u tsebisisa litsela tsa ka kaofela.” (Pesaleme ea 139:3) Ho lekanya maeto a Davida ho tloha sebakeng se seng ho ea ho se seng le ho robala ha hae ha a phomola ka ho hlakileng ho ne ho bolela hore Jehova o lekolisisa ntho e ’ngoe le e ’ngoe eo mopesaleme a e etsang. Ea Holimo-limo a lekanya liketso tsohle tsa Davida ho rera hore na hantle boitšoaro ba hae bo joang. Molimo o ne o e-na le tsebo e felletseng ka litsela tsa Davida, litsela tseo a neng a li latela bophelong. Ha Ntat’a rōna oa leholimo a re hlahloba ka mokhoa o tšoanang, e se eka a ka fumana hore re mo sebeletsa ka botšepehi ’me re lutse “tseleng ea ho loka” e isang bophelong bo sa feleng.—Liproverbia 12:28.

Kaha ha ho letho leo a neng a ka le bua le neng le ka pateha ho Molimo, Davida o itse: “Hobane, ere lentsoe le e-so ho be lelemeng la ka, u se u le tseba kaofela, Jehova.” (Pesaleme ea 139:4) Haeba re saretsoe hoo re sa tsebeng seo re ka se buang thapelong, moea oa Jehova “o re rapella ka mefehelo e ke keng ea boleloa.” (Ba-Roma 8:26) Meqoqong ea rōna, Molimo o hlokomela lintho tseo re batlileng re li bua empa ra li tlohela ra se ke ra li bua, hobane o tseba maikutlo a rōna a ’nete. ’Me haeba re e-na le lerato le tsoang “tumelong e se nang boikaketsi,” le ka mohla re ke ke ra leka ho thetsa ba bang ka “lipolelo tse khahlehang.”—1 Timothea 1:5, TLP; Ba-Roma 16:17, 18.

Davida o ile a phaella: “U ntika kapele le kamorao, letsoho la hao le lutse ho ’na.” (Pesaleme ea 139:5) Ha e le hantle, Jehova o ne a sirelelitse Davida ka mahlakoreng ’ohle joaloka motse o thibelletsoeng ntoeng. Ho bonahala eka mopesaleme o ne a tseba hore ho ne ho e-na le meeli ea seo a ka se etsang nakong ea bophelo ba hae. Hape o ne a tseba hore ha ho kamoo a ka balehang leihlo la Molimo le mo talimileng le letsoho, kapa taolo. Ho hlakile hore Davida ha aa ka a leka ho baleha ka mokhoa o joalo, ’me le rōna ha re leke ho baleha joalo. Empa ka mehla a re itšoareng ka tsela e bontšang ho ela hloko hore letsoho la Jehova le holim’a rōna joaloka Lipaki tsa hae.

Tsebo ea Molimo ka Davida e ile ea mo tlatsa thothomelo. Ka hona, o ile a phatlalatsa: “Tsebo eo ke mohlolo ho ’na; e phahamile haholo, ke sitoa ho e fihlela.” (Pesaleme ea 139:6) Tsebo ea Molimo ka rōna re le batho ka bomong ke e phethahetseng hoo re ke keng ra e utloisisa, ho sa tsotellehe phihlelo kapa koetliso. Kaha e feta kutloisiso ea motho, re ka kholiseha hore Jehova o tseba se molemohali bakeng sa rōna. Kahoo, haeba re rapella ntho e ’ngoe ’me karabelo ea hae e le che, a re ikokobeletseng thato ea Molimo. Ho joalokaha moapostola Johanne a ngotse: “Ha re kōpa ntho ka ho rata ha hae, oa re utloa.”—1 Johanne 5:14.

Ha ho ea ka Balehang Moea oa Molimo

Jehova ha a arabele lithapelo tsa bahlanka ba hae ba tšepahalang feela empa moea oa hae o boetse o sebetsa ho bona ’me o ba thusa ho etsa thato ea hae. Ha e le hantle, Davida o ile a botsa: “Nka ea kae, ka ba hole le moea oa hao? Nka balehela kae, ka ba hole le sefahleho sa hao?” (Pesaleme ea 139:7) Mopesaleme o ne a tseba hore o ne a ke ke a baleha moea oa Jehova, kapa matla a hae a sebetsang, o ka fihlang esita le likarolong tse hōle ka ho fetisisa tsa bokahohle. ’Me ha ho mang kapa mang ea ka balehang pel’a sefahleho sa Molimo, ke hore, a baleha hore o se ke oa ’mona. Ke ’nete, “Jonase [o ile] a tloha ho balehela Tarshishe, hole le sefahleho sa Jehova,” empa moprofeta eo o ne a ke ke a qoba tlhapi e khōlō eo Molimo o ileng oa e khetha hore e mo metse kapa a qoba ho ba le boikarabelo bakeng sa kabelo eo a e fuoeng ke Molimo. (Jonase 1:3, 17; 2:10–3:4) Kahoo a re itšetleheng ka moea oa Jehova hore re khone ho phetha likabelo tseo re li fuoeng ke Molimo.—Zakaria 4:6.

Kaha Davida o ne a tseba hore ho ne ho se kamoo a ka suthelang hōle le Molimo, o ile a re: “Ha nka nyolohela maholimong, u teng; leha nka ea robala nģalong ea bafu, le moo u teng!” (Pesaleme ea 139:8) Mehleng ea mopesaleme, ‘ho nyolohela maholimong’ ho ne ho bolela ho hloella lithabeng tse phahameng, tseo litlhoro tsa tsona li atisang ho siroa ke maru. Leha ho le joalo, haeba re ne re le holim’a tlhoro ea thaba e phahameng ka ho fetisisa, re ne re tla be re se moo moea oa Molimo o ke keng oa fihla. Ho feta moo, re ne re ke ke ra baleha ho talingoa ke oona haeba re robetse Sheol, eo ka tšoantšetso e bolelang likarolo tse ka tlaase-tlaase tsa lefatše.—Bapisa le Deuteronoma 30:11-14; Amose 9:2, 3.

Davia o itse: “Leha nka kalla mapheo a mafube, ka ea ikahela bofellong ba leoatle, le teng seatla sa hao se ka ntsamaisa, ’me letsoho la hao le letona le ka ntšoara.” (Pesaleme ea 139:9) Ho boleloa’ng ka “mapheo a mafube”? Ka thothokiso mantsoe ana a hlalosa kamoo khanya ea mafube, joalokaha eka e na le mapheo, ka potlako e hasanang ho tloha bochabela ho ea bophirimela. Empa ho thoe’ng haeba Davida a ne a ka nka mapheo a mafube ’me a fihla leoatleng le hōle ka ho fetisisa kapa lihleke-hlekeng tse ka bophirimela? O ne a tla be a ntse a le tlas’a letsoho la Molimo, kapa taolo le tsamaiso. Ka moea oa Hae, Jehova o ne a tla be a le teng ho tataisa mopesaleme ka qenehelo.—Pesaleme ea 51:11.

Lefifi Hase Bothata ho Molimo

Sebaka kapa lona lefifi li ke ke tsa beha motho moo Molimo o ke keng oa mo fihlela. Kahoo Davida oa phaella: “Ha nka re: A nke ke patoe ke lefifi, le teng bosiu bo tla ela pel’a ka. Ho uena esita le lefifi le ke ke la e-ba letšo, bosiu bo ka ela joale ka motšehare, lefifi la e-ba joale ka leseli.” (Pesaleme ea 139:10, 11) Motho o ne a ka ’na a apareloa ke lefifi le letšo, joalokaha eka le mo nkile. Empa ho Jehova o ne a tla ’ne a bonahale joalokaha eka o eme khanyeng ea motšehare. Ha ho motho ea ka patelang Molimo libe leha e le life tse entsoeng lefifing.—Esaia 29:15, 16.

Ho ipata ha ho sitise ’Mōpi oa rōna ho re bona. Ntlheng ena Davida o itse: “Hobane uena ka bouena u entse liphio tsa ka; u ile ua mpoloka ke koahetsoe ka mpeng ea ’mè oa ka. Ke tla u boka hobane ka tsela e tšosang ke entsoe ka mokhoa o babatsehang. Mesebetsi ea hao ea babatseha, joalokaha moea oa ka o ela [hoo] hloko haholo. Masapo a ka ha aa ka a pateha ho uena ha ke ntse ke etsoa sephiring, ha ke ntse ke lohuoa likarolong tse ka tlaase-tlaase tsa lefatše. Mahlo a hao a bone esita le qaleho ea pōpeho ea ka, ’me bukeng ea hao likarolo tsohle tsa eona li ne li se li ngotsoe fatše, mabapi le matsatsi ao li [likarolo tsa ’mele] ileng tsa bōptjoa ka ’ona ’me ho ne ho e-s’o be le e ’ngoe [karolo e bonahalang ka ho hlaka ea ’mele] har’a tsona.”—Pesaleme ea 139:13-16, NW.

Jehova Molimo, ea tsebang maikutlo a rōna a ka hare-hare, o ile a etsa liphio tsa Davida. Kaha li kenelletse ka hare-hare ho ’mele, liphio ke tse ling tsa litho tse patehileng ka ho fetisisa le tse finyelloang ka thata, empa Molimo o ka li bona. O ka ba oa talima ka har’a mpa ea ’mè, kapa pōpelo. E, Jehova a ka bona lesea le qalang ho bōpeha! Ho nahana feela ka tsela e babatsehang eo a bōpiloeng ka eona ka pōpelong ho ile ha susumelletsa Davida ho rorisa ’Mōpi oa hae. Ka ho hlakileng mopesaleme o ile a bua ka pōpelo ea ’mè e le ‘likarolo tse ka tlaase-tlaase tsa lefatše.’ Mono, moo ho patehileng moo batho ba sa boneng empa Molimo oona o bona, masapo a ngoana, mesifa, litšutšu, methapo, le methapo ea mali li lohuoa hammoho.

Pele likarolo tsa ’mele oa Davida li bonahala ka ho hlaka ka pōpelong ea ’m’ae, Molimo o ne o se o ntse o tseba ponahalo ea hae. Hobane’ng? Hobane khōlo ea lesea le qalang ho bōpeha e ne e latela kemiso e tobileng, joalokaha eka e utloa litaelo tse tlalehiloeng ka bukeng. See se bontša bohlale le matla a Jehova a ho bona esita le lintho tse patiloeng hakaakang! Se lokela ho etsa hore re ananele hore Molimo o bōpile moloko oa motho ’me o ikarabella bakeng sa tšebetso e babatsehang ea ho ikatisa e felletseng ka hore e be re teng re le batho ka bomong.

Mehopolo ea Molimo ke ea Bohlokoa Hakaakang!

Ho nahana ka khōlo ea lesea ka pōpelong ho ile ha etsa hore Davida a nahanisise ka bohlale ba Molimo. Ka hona, mopesaleme o ile a khotsa: “Kahoo, ho ’na mehopolo ea hao ke ea bohlokoa hakaakang! Oho Molimo, palo ea eona e khōlō e lekana le eng!” (Pesaleme ea 139:17, NW) Davida o ne a ananela mehopolo ea Jehova Molimo, ’me e mengata hoo a ileng a khahloa ke “palo ea eona e khōlō.” Haeba mehopolo ea Molimo ke ea bohlokoa ho rōna, re tla ba liithuti tse hloahloa tsa Mangolo. (1 Timothea 4:15, 16) Mehopolo ea oona e tlalehiloeng e “na le molemo oa ho ruta, oa ho kholisa, oa ho laea, le oa ho hōlisa ka khōlo ea ho loka; motho oa Molimo a tle a phethehe, ’me a rutehele ruri mesebetsing eohle e molemo.”—2 Timothea 3:16, 17.

Mabapi le mehopolo ea Jehova, Davida o itse: “Ha ke rata ho e bala, e fetisa lehlabathe ka palo; leha ke phaphama, ke sa ntse ke le ho uena.” (Pesaleme ea 139:18) Kaha mehopolo ea Molimo e mengata le ho feta lehlabathe, haeba Davida a ne a ka qala ho e bala ka meso, o ne a tla be a ntse a e-s’o qete nakong ea ho robala. Ha a tsoha hoseng, o ne a tla be a ntse a e-na le Jehova. Ke hore, o ne a tla be a ntse a bala mehopolo ea Molimo. Ha e le hantle, kaha re hloka tsamaiso ea Jehova, ho nahanisisa ka thapelo ka mehopolo le merero ea hae e ka ’na ea ba ntho ea ho qetela eo likelello tsa rōna li nahanang ka eona bosiu le ntho ea pele hoseng.—Pesaleme ea 25:8-10.

Moputso oa ba Khopo

Kaha Molimo o fana ka tsamaiso e bohlale, Davida o ile a ikutloa joang ka ba hanang tataiso ea Molimo? O ile a rapela: “Oho Molimo, u ke u bolaee e mobe. Lōna, batho ba mali, suthelang hole le ’na: hobane bao e leng lira ho uena, ba u bolela hampe, ba ntse ba tlaela ka lebitso la hao.” (Pesaleme ea 139:19, 20) Davida ha aa ka a leka ho bolaea ba khopo empa o ile a rapella hore ba fumane moputso o tsoang ho Jehova. Re lokela ho ba le boikutlo bo tšoanang. Ka mohlala, re ka rapella sebete sa ho bolela lentsoe la Molimo ha lira li re hlorisa. (Liketso 4:18-31) Empa ha re batle ho felisa lira tsa rōna, hobane rea tseba hore Jehova o itse: “Phetetso ke ea ka, ke tla ipheteletsa e le ’na.”—Ba-Heberu 10:30; Deuteronoma 32:35.

Haeba Molimo o ne o ka bolaea ba khopo, banna ba joalo ba molato oa mali ba ne ba tla tloha ho Davida. Ba ne ba e-na le tlaleho ea molato oa ho tšolla mali ’me hape ba ne ba boletse lintho tse ling ka Jehova ho latela khopolo ea bona, eseng ho latela mehopolo ea hae. Ho feta moo, ba ne ba tšoaneloa ke lefu ka lebaka la ho tlisa thohako lebitsong la Molimo ka ho tlaela ka lona, mohlomong ka ho le sebelisa ha ba phahamisa merero ea bona e mebe. (Exoda 20:7) E se eka le ka mohla re ke ke ra ba molato oa libe tse tšoanang!

Kahobane ba khopo ba ne ba le molato oa ho tšolla mali le ho tlisetsa lebitso la Molimo thohako, Davida o ile a phatlalatsa: “Jehova, ha ke re, ke hloile ba u hloileng? Ha ke re, ke halefetse ba u phahamelang? Ke ba hloile ka hloeo ea sebele, ho ’na ke lira.” (Pesaleme ea 139:21, 22) Davida o ile a ikutloa a hloile banna bana hobane ba ne ba hloile Jehova haholo ba bile ba Mo fetohela. E ne e le lira tsa mopesaleme hobane o ne a nyonya bokhopo ba bona, ho hloka bomolimo, le ho fetohela Ea Holimo-limo.

Lumella Molimo ho u Hlahlobisisa

Davida o ne a sa batle ho tšoana le banna ba khopo, empa o ne a tseba hore o ne a sa lokela ho ba koetlela bora. Kahoo o ile a ipiletsa: “Molimo, u ntlhohlotse, u lekole pelo ea ka; u nteke, u tsebe mehopolo ea ka, u talime hoba a tsela ea bokhopo e teng ho ’na na, ’me u ntsamaise tseleng e isang bophelong bo sa feleng.” (Pesaleme ea 139:23, 24) Joaloka mopesaleme, re lokela ho batla hore Molimo o hlahlobe lipelo tsa rōna ’me o bone hore na re na le merero e mebe. (1 Likronike 28:9) Re lokela ho kōpa Jehova ho re hlahloba, ho tseba mehopolo ea rōna e tšoenyang, le ho bona haeba ho e-na le tsela ea bokhopo ho rōna. Haeba re hlaseloa ke ho tšoenyeha ka liphoso tsa rōna kapa ho e-na le ho hong ho bohloko ka har’a rōna kapa ho phoso mererong ea rōna, a re rapeleng ka boikokobetso ’me re ipehe ka ho felletseng tlas’a tsamaiso ea moea oa Molimo le keletso ea Lentsoe la oona. (Pesaleme ea 40:11-13) Ka mokhoa o joalo, Motsoalle oa rōna e moholo ka ho fetisisa, Jehova, a ka re tsamaisa tseleng ea bophelo bo sa feleng, a re thusa ho phehella tsela e lokileng e lebisang bophelong bo sa feleng.

Ka hona Pesaleme ea 139 e fana ka khothatso ea sebele. E bontša hore, kaha ha ho letho leo Ntat’a rōna oa leholimo a ke keng a le bona, a ka re thusa ka linako tsohle ha re hloka ho hong. (Ba-Heberu 4:16) Ho feta moo, kahobane Jehova o re tseba hamolemo ho feta kamoo re itsebang ka teng, re sireletsehile tlhokomelong ea hae e lerato. (Deuteronoma 33:27) Haeba ka boikokobetso re mo kōpa hore a re hlahlobisise ’me a re hlokomelise mefokolo ea botho, re ka lokisa litaba ka thuso ea hae. Ka hona, ka sebele tsebo ea Molimo ka rōna re le batho ka bomong e lokela ho ama bophelo ba rōna ka tsela e molemo. E lokela ho re susumelletsa ho ba babuelli ba tšepahalang ba borapeli ba ’nete le ho tsamaea ka boikokobetso pel’a Jehova, ea re tsebang hantle hakana!