Jehova A ke ke a Behoa Molato
“Joale ka ha ntat’a motho a hauhela bana ba hae, Jehova o hauhela joalo ba mo tšabang. Hobane o tsebisisa ho bōpjoa ha rōna, o elelloa hoba re lerōle feela.”—PESALEME EA 103:13, 14.
1, 2. Abrahama e ne e le mang, hona ho tlile joang hore motsoal’ae Lota a lule motseng o khopo oa Sodoma?
JEHOVA ha a ikarabelle ka mathata ao re ka ’nang ra tobana le ’ona ka baka la liphoso tsa rōna. Tabeng ena nahana ka se ileng sa etsahala lilemong tse 3 900 tse fetileng. Abrahama (Abrame) motsoalle oa Molimo le motsoal’ae Lota ba ile ba atleha haholo leruong. (Jakobo 2:23) Ha e le hantle, leruo la bona le mohlape oa bona o ne o le mongata hoo ‘naha e neng e sa ba lekane ho lula hammoho.’ Ho feta moo, ho ile ha hlaha phapang pakeng tsa balisa ba banna bana ba babeli. (Genese 13:5-7) Ke eng se neng se tla etsoa ka see?
2 E le hore Abrahama a felise phapang e teng, o ile a etsa tlhahiso ea hore ba arohane, ’me a lumella Lota hore a khethe pele. Le hoja Abrahama e ne e le monna ea hōlileng ebile ho ne ho loketse hore motsoal’ae a mo tlohelle hore a khethe sebaka se molemonyana, Lota o ile a khetha naha e ntle ka ho fetisisa—setereke sohle se neng se noselitsoe hantle sa Jordane e Tlaase. Ponahalo ea ka ntle e ne e thetsa, hobane haufi le moo ho ne ho na le metse e hlephileng boitšoarong ea Sodoma le Gomorrha. Qetellong Lota le lelapa la hae ba ile ba fallela Sodoma, ’me sena se ile sa ba beha kotsing e khōlō ea moea. Ho feta moo, ba ile ba isoa botlamuoeng ha Morena Kedorlaomere le marena a ikopantseng le eena ba hlōla morena oa Sodoma. Abrahama le banna ba hae ba ile ba ba pholosa, empa Lota le lelapa la hae ba ile ba khutlela Sodoma.—Genese 13:8-13; 14:4-16.
3, 4. Ho ile ha etsahala joang ka Lota le litho tsa lelapa la hae ha Molimo o ne o felisa Sodoma le Gomorrha?
3 Ka baka la mekhoa eo e seng ea tlhaho ea likamano tsa botona le botšehali le ho hlepha boitšoarong ha Sodoma le Gomorrha, Jehova a etsa qeto ea ho felisa metse eo. Ka mohau a romela mangeloi a mabeli a ileng a ntša Lota, mosali oa hae, le barali ba bona ba babeli Sodoma. Ba ne ba sa tlameha ho hetla, empa mosali oa Lota o ile a hetla, mohlomong a laba-labela lintho tse bonahalang tse setseng morao. O ile a fetoha seemahale sa letsoai.—Genese 19:1-26.
4 Lota le barali ba hae ba ile ba lahleheloa hakaakang! Banana bao ba ile ba tlameha ho siea banna ba neng ba tla ba nyala. Joale Lota o ne a se a hloka mosali le maruo a bonahalang. Ha e le hantle, o ile a qetella a phela lehaheng le barali ba hae. (Genese 19:30-38) Seo ho eena pele se neng se bonahala se le molemo se ile sa fetoha se sebe. Le hoja ka ho totobetseng a ne a ile a etsa liphoso tse tebileng, hamorao o ile a bitsoa “Lota, monna ea lokileng.” (2 Petrose 2:7, 8) ’Me ka sebele Jehova Molimo o ne a ke ke a behoa molato ka liphoso tsa Lota.
“Ke Mang ea ka Lemohang Liphoso?”
5. Davida o ile a ikutloa joang ka liphoso le boikhohomoso?
5 Kaha ha rea phethahala ebile re baetsalibe, kaofela ha rōna re etsa liphoso. (Ba-Roma 5:12; Jakobo 3:2) Joaloka Lota, re ka ’na ra thetsoa ke ponahalo ea kantle ’me ra etsa phoso kahlolong ea rōna. Ka hona, mopesaleme Davida o ile a ipiletsa: “Ke mang ea ka lemohang liphoso? U mpolele ke hloka molato libeng tse patehileng. Hape u boloke mohlanka oa hao liketsong tsa boikhohomoso; u se ke ua li lumella hore li ntaole. Ka tsela eo ke tla ba ea phethehileng, ’me ke tla lula ke hloka molato litšitong tse ngata.” (Pesaleme ea 19:12, 13, NW) Davida o ne a tseba hore o ne a ka ’na a etsa libe tseo a neng a sa li hlokomele. Kahoo, o ile a kōpa hore a tšoareloe litšito tseo e ka ’nang eaba o ne a sa li tsebe. Ha a ne a etsa phoso e tebileng hobane nama ea hae e sa phethahalang e ne e mo susumeletsa hore a nke tsela e fosahetseng, o ile a batla thuso ea Jehova ka tieo. O ne a batla hore Molimo a mo thibele hore a se ke a etsa liketso tse bontšang boikhohomoso. Davida o ne a sa batle hore boikhohomoso e be tšobotsi e mo laolang. Ho e-na le hoo, o ne a batla ho phetheha boinehelong ba hae ho Jehova Molimo.
6. Re ka fumana matšeliso afe ho Pesaleme ea 103:10-14?
6 Le rōna kaha re le bahlanka ba kajeno ba inehetseng ba Jehova, ha rea phethahala ka baka leo re etsa liphoso. Ka mohlala, joaloka Lota, re ka ’na ra khetha sebaka se sebe sa bolulo. Re ka ’na ra tlohela monyetla oa ho atolosa tšebeletso ea rōna e halalelang ho Molimo. Le hoja Jehova a bona liphoso tse joalo, o tseba ba nang le pelo e sekametseng ho lokeng. Esita leha re etsa sebe se tebileng ’me re bontša pako, Jehova o fana ka tšoarelo le thuso ’me o tsoela pele ho re nka re le batho ba tšabang Molimo. Davida o ile a re: “Ha a ka a re etsa kamoo libe tsa rōna li leng kateng, ha a ka a re putsa ka moputso oa makhopo a rōna. Empa joale ka leholimo ha le phahamile holimo ho lefatše, mohau oa hae o moholo joalo ho ba mo tšabang. Joale ka ha Bochabela bo le hole le Bophirimela, o lahlela makhopo a rōna joalo hole le rōna.” (Pesaleme ea 103:10-14) Ntate oa rōna ea mohau oa leholimo a ka boetse a re nolofaletsa hore re lokise liphoso tsa rōna kapa a re neha monyetla o mong oa ho atolosa tšebeletso ea rōna e halalelang, thorisong ea hae.
Phoso ea ho Beha Molimo Molato
7. Ke hobane’ng ha re hlaheloa ke lintho tse bohloko?
7 Ha lintho li senyeha, tloaelo ea botho ke hore re behe e mong kapa ntho e ’ngoe molato bakeng sa se etsahetseng. Ba bang ebile ba beha Molimo molato. Empa Jehova haa tlisetse batho mathata a joalo. O etsa lintho tse molemo eseng tse kotsi. “O chabisetsa ba babe le ba batle letsatsi la hae, ’me o nesetsa ba lokileng le ba khopo”! (Mattheu 5:45) Lebaka le leholo leo ka lona re hlaheloang ke lintho tse bohloko ke hore re phela lefatšeng le sebetsang ka litekanyetso tsa boithati le le leng matleng a Satane Diabolose.—1 Johanne 5:19.
8. Adama o ile a etsa eng ha lintho li sa mo tsamaele hantle?
8 Ho beha Jehova Molimo molato ka mathata a bakoang ke liphoso tsa rōna ke booatla ebile ho kotsi. Ho etsa joalo ho ka ba ha re bolaea. Motho oa pele, Adama, a ka be a file Molimo thoriso bakeng sa lintho tsohle tse molemo tseo a neng a e-na le tsona. E, Adama a ka be a ile a leboha Jehova bakeng sa bophelo le mahlohonolo ao a neng a a thabela lehaeng le kang serapa sa lifate le lipalesa, e leng tšimo ea Edene. (Genese 2:7-9) Adama o ile a etsa joang ha lintho li sa tsamaee hantle hobane a ne a sa bontša kutlo ho Jehova ’me a jele tholoana e hanetsoeng? Adama o ile a belaela ho Molimo: “Mosali eo u ’neileng eena hore ke lule le eena, ke eena ea mphileng tsa sefate, ka li ja.” (Genese 2:15-17; 3:1-12) Ka sebele, ha rea lokela ho beha Jehova molato joaloka Adama.
9. (a) Haeba re tobana le mathata ka baka la liketso tsa rōna tse seng bohlale, re ka tšelisoa ke eng? (b) Ho latela Liproverbia 19:3, ba bang ba etsa joang ha ba itlisetsa mathata e le bona?
9 Haeba re tobana le mathata hobane liketso tsa rōna li se bohlale, re ka tšelisoa ke ho tseba hore Jehova o utloisisa mefokolo ea rōna ho re feta ’me o tla re lopolla bothateng boo re leng ho bona haeba re mo fa boinehelo bo khethehileng. Re lokela ho ananela thuso ea Molimo eo re e fumanang, le ka mohla re se ke ra beha Molimo molato bakeng sa maqakabetsi le mathata ao re itlisetsang ’ona. Tabeng ena maele a bohlale a re: “Booatla ba motho bo mo khelosa tsela, eba pelo ea hae e hlonamela Jehova.” (Liproverbia 19:3) Phetolelo e ’ngoe e re: “Batho ba bang ba ipakela tšenyeho ka baka la liketso tsa bona tsa booatla ebe joale ba beha MORENA molato.” (Today’s English Version) Phetolelo e ’ngoe e re: “Ho hloka tsebo ha motho ho loebehlanya litaba tsa hae ebe joale o halefela Jehova.”—Byington.
10. Booatla ba Adama bo ile ba ‘khelosa tsela ea hae’ joang?
10 Ho ea ka molao-motheo oa maele ana, Adama o ile a etsa ka boithati ’me monahano oa hae oa booatla o ile oa ‘mo khelosa tsela.’ Pelo ea hae e ile ea hlonamela Jehova Molimo, ’me a tsamaea tseleng ea hae ea boithati le ea boitaolo. Adama a hloka teboho hoo a ileng a beha ’Mōpi oa hae molato ’me ka hona a iketsa sera sa Ea Holimo-limo! Sebe sa Adama se ile sa etsa hore tsela ea hae le ea lelapa la hae e felle ka tšenyeho. Taba ee e fana ka temoso e khōlō hakaakang! Batho ba tloaetseng ho beha Jehova molato bakeng sa maemo a sa thabiseng ba etsa hantle ha ba ipotsa: Na ke rorisa Molimo bakeng sa lintho tse molemo tseo ke li thabelang? Na ke bontša teboho hore ebe kea phela joaloka e mong oa pōpo ea hae? Na ebe mohlomong ke liphoso tsa ka tse mpaketseng mathata? Na ke loketsoe ke kamohelo ea Jehova kapa thuso ea hae ka baka la ho latela tataiso ea hae, joalokaha e boletsoe Lentsoeng la hae le bululetsoeng, Bibele?
Kotsi Esita le ho Bahlanka ba Molimo
11. Mabapi le Molimo, baeta-pele ba Bajode ba bolumeli ba lekholong la pele la lilemo ba ne ba le molato oa eng?
11 Baeta-pele ba bolumeli ba Bajode ba lekholong la pele la lilemo C.E. ba ne ba ipolela hore ba sebeletsa Molimo empa ba hlokomoloha lentsoe la hae la ’nete ’me ba itšetleha ka kutloisiso ea bona. (Mattheu 15:8, 9) Ba ile ba bolaea Jesu Kreste hobane a ile a pepesa monahano oa bona o fosahetseng. Hamorao, ba halefela barutuoa ba hae haholo. (Liketso 7:54-60) Tsela ea batho bao e ne e khelohile hoo ba bileng ba halefela Jehova ka boeena.—Bapisa le Liketso 5:34, 38, 39.
12. Ke mohlala ofe o bontšang hore le batho ba bang ba kopanelang le phutheho ea Bokreste ba leka ho beha Jehova molato bakeng sa mathata a bona?
12 Esita le batho ba bang ka phuthehong ea Bokreste ba na le mohopolo o kotsi, ba leka ho beha Molimo molato bakeng sa mathata ao ba thulanang le ’ona. Ka mohlala, baholo ba khethiloeng phuthehong e ’ngoe ba ile ba fumana ho hlokahala hore ba fe mosali e mong e mocha ea nang le lelapa keletso e matla ea Mangolo khahlanong le ho tloaelana le monna oa lefatše. Ka lekhetlo le leng ha ba ntse ba buisana le eena, o ile a beha Molimo molato bakeng sa hore ebe ha a mo thusa hore a hlōle teko eo botsoalle ba hae bo sa khaotseng le monna eo bo neng bo mo tlisetsa eona. Ha e le hantle o ile a bolela hore o ne a halefetse Molimo! Ho mo behela mabaka ka Mangolo le ho etsa boiteko bo pheta-phetoang ba ho mo thusa ha hoa ka ha atleha, ’me hamorao tsela ea boitšoaro bo bobe e ile ea etsa hore a lelekoe ka phuthehong ea Bokreste.
13. Ke hobane’ng ha re lokela ho qoba boikutlo ba ho belaela?
13 Moea oa ho belaela o ka etsa hore motho a behe Jehova molato. “Batho ba sa tšabeng Molimo” ba neng ba khukhunetse phuthehong ea lekholong la pele la lilemo ba ne ba na le moea o mobe oa mofuta ona, ’me ba ne ba bile ba na le mefuta e meng ea khopolo e senyang moeeng. Joalokaha morutuoa Juda a bolela, ba ne ba “fetola mosa o sa tšoanelang oa Molimo oa rōna e le phephi ea ho etsa boitšoaro bo hlephileng ’me ba ipaka ba sa tšepahale ho Mong’a rōna ea mong feela le Morena, Jesu Kreste.” Juda o boetse a re: “Batho bana ke batho ba korotlang, ba belaelang ka seo ba nang le sona bophelong.” (Juda 3, 4, 16, NW) Bahlanka ba tšepahalang ba Jehova ka bohlale ba tla rapella hore ba be le moea oa ho bontša kananelo, eseng boikutlo ba ho belaela boo qetellong bo tla ba utloisa bohloko hoo ba lahleheloang ke tumelo ho Molimo ’me ba behe kamano ea bona le eena kotsing.
14. Motho a ka ’na a etsa joang haeba a khopisitsoe ke Mokreste-’moho, empa ke hobane’ng ha ee e se eona tsela e loketseng?
14 U ka ’na ua ikutloa eka sena se ke ke sa u etsahalla. Leha ho le joalo, lintho tse sa tsamaeeng hantle ka baka la liphoso tsa rōna kapa tsa ba bang qetellong li ka etsa hore re behe Molimo molato. Ka mohlala, motho a ka ’na a khopisoa ke seo molumeli-’moho a se buang kapa a se etsang. Motho ea khopisitsoeng—mohlomong o sebelelitse Jehova ka botšepehi ka lilemo tse ngata—a ka ’na a re: ‘Haeba motho enoa o ka phuthehong, nke ke ka ea libokeng.’ Motho a ka ’na a khopeha hoo a reng ka pelong: ‘Haeba ho etsahala lintho tsa mofuta ona, ha ke batle ho ba karolo ea phutheho.’ Empa na Mokreste o lokela ho ba le boikutlo bo joalo? Haeba u khopisitsoe ke motho e mong ea sa phethahalang, ke hobane’ng ha u halefela phutheho eohle ea batho ba amoheloang ke Molimo le ba mo sebeletsang ka botšepehi? Ke hobane’ng ha motho leha e le ofe ea inehetseng ho Jehova a khaotsa ho etsa thato ea Molimo ’me ebe o halefela Molimo? Ho bohlale hakae ho lumella hore motho kapa maemo a felise kamano e ntle ea motho le Jehova? Ka sebele, e tla ba booatla le sebe ho khaotsa ho rapela Jehova Molimo ka lebaka leha e le lefe.—Jakobo 4:17.
15, 16. Diotrefe o ne a le molato oa eng, empa Gaiuse o ile a itšoara joang?
15 Ak’u nahane u le phuthehong e le ’ngoe le Mokreste ea lerato Gaiuse. O ne a “etsa mosebetsi o tšepahalang” ka ho bontša moea oa ho amohela baeti ho balumeli-’moho—’me ebile e le bao a sa ba tsebeng! Empa kamoo ho bonahalang ka teng, hona phuthehong eo ho ne ho na le monna ea ikhohomosang, Diotrefe. O ne a sa batle ho utloa letho ka Johanne, e mong oa baapostola ba Jesu Kreste. Ha e le hantle, Diotrefe o bile a bua ka Johanne a sebelisa mantsoe a mabe. Moapostola o ile a re: “Kaha a sa khotsofatsoa ke lintho tsena, [Diotrefe ha a] amohele baena ka tlhompho, ’me le ba batlang ho ba amohela o leka ho ba thibela ka ho ba leleka ka phuthehong.”—3 Johanne 1, 5-10, NW.
16 Ha Johanne a tla phuthehong eo, o ne a ikemiselitse ho bua ka seo Diotrefe a neng a se etsa. Khabareng, Gaiuse le Bakreste ba bang ba nang le moea oa ho amohela baeti ba ile ba itšoara joang? Ha ho moo Mangolo a bontšang hore e mong oa bona o ile a re: ‘Ha feela Diotrefe a ntse a le ka phuthehong, ha ke batle ho ba karolo ea eona. U ke ke ua mpona libokeng.’ Ntle ho pelaelo Gaiuse le ba bang ba tšoanang le eena ba ile ba ema ba tiile. Ha ba ka ba lumella letho hore le ba thibele ho etsa thato ea Molimo, ’me ka sebele ha baa ka ba halefela Jehova. Che, ka sebele ha baa ka ba inehela maqiting a Satane Diabolose, ea neng a tla thaba haeba ba sa tšepahale ho Jehova ’me ba beha Molimo molato.—Ba-Efese 6:10-18, NW.
Le ka Mohla U se ke Ua Halefela Jehova!
17. Re lokela ho etsa joang haeba motho e mong kapa boemo bo re khopisa kapa bo sa re thabise?
17 Esita le haeba motho ea itseng kapa boemo ka phuthehong bo ka se thabise kapa ba khopisa mohlanka oa Molimo, motho ea khopisitsoeng ka sebele o tla be a khelosa tsela ea hae haeba a khaotsa ho kopanela le batho ba Jehova. Motho ea joalo o tla be a sa sebelise matla a hae a ho nahana ka mokhoa o loketseng. (Ba-Heberu 5:14, NW) Kahoo ikemisetse ho tobana le mathata ’ohle u le ’moloki oa botšepehi. Boloka botšepehi ho Jehova Molimo, Jesu Kreste, le phutheho ea Bokreste. (Ba-Heberu 10:24, 25) ’Nete e isang bophelong bo sa feleng e ke ke ea fumanoa sebakeng se seng.
18. Le hoja re sa utloisise liketso tsa Molimo ka linako tsohle, re ka kholiseha ka eng mabapi le Jehova Molimo?
18 Hopola hape hore, le ka mohla Jehova ha a leke motho ka lintho tse mpe. (Jakobo 1:13) Molimo, eo e leng boleng ba lerato, o etsa lintho tse molemo, haholo-holo bakeng sa ba mo ratang. (1 Johanne 4:8) Le hoja re sa utloisise liketso tsa Molimo ka linako tsohle, re ka kholiseha hore le ka mohla Jehova Molimo a ke ke a hlōleha ho etsetsa bahlanka ba hae se molemo. Joalokaha Petrose a boletse: ‘Ka baka leo, le ke le ikokobetse ka tlas’a letsoho le matla la Molimo, a tle a le phahamise nakong e tšoanelang. Lahlelang lipelaelo tsohle tsa lōna holim’a hae; hobane oa le hlokomela.’ (1 Petrose 5:6, 7) E, Jehova o hlile o tsotella batho ba hae.—Pesaleme ea 94:14.
19, 20. Re lokela ho etsa joang, esita le haeba liteko tsa rōna ka linako tse ling li re tepeletsa maikutlong?
19 Ka hona, u se ke ua lumella ntho leha e le efe kapa motho leha e le ofe hore a u khopise. Joalokaha mopesaleme a boletse hantle, “ba ratang molao oa [Jehova Molimo] ba na le khotso e kholo, ha ho khopiso ho bona.” (Pesaleme ea 119:165) Kaofela ha rōna re hlaheloa ke liteko, ’me ka linako tse ling li ka ’na tsa re tepeletsa maikutlong le ho re nyahamisa. Empa u se ke ua lumella hore u halefe pelong ea hao, haholo-holo u halefele Jehova. (Liproverbia 4:23) Ka thuso ea hae ebile e le motheong oa Mangolo, sebetsana le bothata boo u ka bo rarollang ’me u mamelle bo sa raroleheng.—Mattheu 18:15-17; Ba-Efese 4:26, 27.
20 Le ka mohla u se ke ua lumella hore maikutlo a hao a etse hore u etse ka booatla ’me ka hona u khelose tsela ea hao. Bua ’me u etse ka mokhoa o tla thabisa pelo ea Molimo. (Liproverbia 27:11) Ipiletse ho Jehova ka thapelo e tiileng, u tseba hore o hlile oa u hlokomela joaloka e mong oa bahlanka ba hae ’me o tla u fa kutloisiso e hlokahalang hore u lule tseleng ea bophelo le batho ba hae. (Liproverbia 3:5, 6) Ka holimo ho tsohle, u se ke ua halefela Molimo. Ha lintho li sa tsamaee hantle, ka mehla u hopole hore Jehova a ke ke a behoa molato.
U ne U Tla Araba Joang?
◻ Lota o ile a etsa phoso efe, empa Molimo o ile a mo talima joang?
◻ Davida o ile a ikutloa joang ka liphoso le boikhohomoso?
◻ Ha lintho li sa tsamaee hantle, ke hobane’ng ha re sa lokela ho beha Molimo molato?
◻ Ke eng e tla re thusa hore re se halefele Jehova?
[Setšoantšo se leqepheng la 15]
Ha Lota a tloha ho Abrahama, o ile a etsa khetho e mpe ea sebaka seo a neng a tla lula ho sona