Kamoo U ka Atlehang Kateng
FEELA joalokaha batsoali ba hlokomela bana ba bona ’me ba batla hore ba atlehe, Ntate oa rōna oa leholimo oa re hlokomela ’me o batla hore re atlehe. Ho bontša hore o re hlokomela ka lerato, o re bolella litaba tse ngata mabapi le ho atleha le ho se atlehe. Ha e le hantle, ha Bibele e bua ka motho ea mamelang seo Molimo a se buang, e bua ka matla ’me e re: “Ntho e ’ngoe le e ’ngoe eo a e etsang e tla atleha.”—Pesaleme ea 1:3.
Haeba ho joalo, ke hobane’ng ha batho ba bangata ba sa atleha, ba sa thaba ba bile ba sa khotsofala bophelong? Ho hlahlobisisa pesaleme ena ho tla re fa karabo ’me ho re bontše kamoo le rōna re ka atlehang kateng.
‘Keletso ea ba Khopo’
Mopesaleme o re lemosa ka kotsi ea ho tsamaea “keletsong ea ba khopo.” (Pesaleme ea 1:1) Motho “ea khopo” ka ho fetisisa ke Satane Diabolose. (Matheu 6:13) Mangolo a re bolella hore ke “’musi oa lefatše lena” le hore “lefatše lohle le rapaletse matleng a ea khopo.” (Johanne 16:11; 1 Johanne 5:19) Kahoo, ha ho makatse hore ebe boholo ba keletso e fanoang lefatšeng e bontša mohopolo oa eo ea khopo.
Ba khopo ba fana ka keletso ea mofuta ofe? Ba khopo ba atisa ho hlompholla Molimo. (Pesaleme ea 10:13) Keletso ea bona, e hlokomolohang kapa e hlomphollang Molimo, e tletse hohle. Batho ba kajeno ba khothalletsa “takatso ea nama le takatso ea mahlo le pontšo ea mponeng ea mokhoa oa motho oa boipheliso.” (1 Johanne 2:16) Mecha ea phatlalatso e re foqa lerato la lintho tse bonahalang, e leng filosofi e reng, “fumana lintho tse bonahalang tse ngata ka hohle kamoo u ka khonang.” Lefatšeng lohle, lik’hamphani li sebelisa liranta tse limilione tse limilione tse 3,3 ka selemo papatsong e le ho susumelletsa batho ho reka lihlahisoa tsa tsona—ebang bareki baa li hloka kapa che. Liphatlalatso tsena ha lia fetola feela mokhoa oo batho ba rekang ka oona, empa li fetotse le tsela eo batho ba talimang katleho ka eona.
Ka lebaka leo, le hoja hona joale batho ba bangata ba se ba e-na le lintho tseo mehleng ea khale ba neng ba ka li lakatsa feela, ba ntse ba sa khotsofalle lintho tseo ba nang le tsona. Ho na le maikutlo a hore ha u se na lintho tsena u ke ke ua thaba kapa ua atleha. Mohopolo ona ke bohata ’me ‘ha o simolohe ho Ntate, empa o simoloha lefatšeng.’—1 Johanne 2:16.
’Mōpi oa rōna o tseba se tla re atlehisa e le kannete. Keletso ea hae ha e tšoane le ‘keletso ea ba khopo.’ Ka lebaka leo, ho leka ho fumana tlhohonolofatso ea Molimo empa re ntse re tsamaea tseleng eo lefatše le lumelang hore e lebisa katlehong, ho tšoana le ho leka ho tsamaea litseleng tse peli tse sa tšoaneng ka nako e le ’ngoe. Hase ntho e ka etsahalang. Hase feela Bibele e fanang ka temoso ena: “Le se ke la phela tumellanong le litekanyetso tsa lefatše lena”!—Baroma 12:2, Today’s English Version.
U se ke Ua Lumella Lefatše Hore le U Susumetse
Lefatše lena le susumetsoang ke Satane le leka ho etsa eka le thahasella boiketlo ba rōna. Leha ho le joalo, re lokela ho ba hlokolosi. Hopola hore ka boithati Satane o ile a thetsa mosali oa pele, Eva e le hore a phethe merero ea hae. Eaba o mo sebelisa hore a khannele Adama sebeng. Kajeno Satane o boetse o sebelisa batho ho hasa keletso ea hae e khopo.
Ka mohlala, David eo ho builoeng ka eena sehloohong se etellang sena pele, ho ne ho lebeletsoe hore a sebetse nako e eketsehileng le ho nka maeto a mosebetsi a mangata. David o re: “Ke ne ke ee ke tsohelle tseleng ka Mantaha ebe ke khutla ka Labone mantsiboea.” Kaha metsoalle ea David e nang le sepheo se setle, litho tsa lelapa le basebetsi-’moho le eena ba ne ba lumela hore boitelo bo joalo boa hlokahala e le hore motho a ka atleha lefatšeng, ba ile ba khothatsa David ba re: “Itelle lelapa la hao.” Ba bontša hore o tlameha ho sebetsa ka tsela eo ka lilemo tse seng kae feela ho fihlela a tsitsa. David o re: “Ba ile ba beha mabaka a hore sena se ne se tla etsa hore lelapa la ka le phele hamonate kaha ke ne ke tla tlisa chelete e ngata hae—ke atlehe haholoanyane. Le hoja ke ne ke sa lule le lelapa la ka, metsoalle ea ka e ile ea nkholisa hore ha e le hantle ke ne ke fa lelapa la ka lintho tse eketsehileng.” Batho ba bangata ba kang David ba sebetsa ka thata hore ba fe litho tsa malapa a bona ntho e ’ngoe le e ’ngoe eo ba nahanang hore baratuoa bana ba bona baa e hloka. Empa na ho latela keletso ea mofuta oo ho tlisa katleho? Ha e le hantle lelapa le hloka’ng?
David o ile a fumana karabo nakong eo a neng a le leetong le leng la mosebetsi. O ile a re: “Ke ne ke buisana le morali oa ka Angelica thelefonong, ’me a re: ‘Ntate, ke hobane’ng ha u sa rate ho lula le rōna?’ Ke ile ka sithabela maikutlo.” Mantsoe ana a morali oa hae a ile a matlafatsa takatso ea hae ea ho tlohela mosebetsi. David o ile a etsa qeto ea ho fa litho tsa lelapa la hae seo li neng li hlile li se hloka—e leng eena.
Ho Sebelisa Keletso ea Molimo ho ka U Atlehisa
Ke joang u ka hanyetsang boitsebiso bo khelosang bo tletseng hohle lefatšeng lee? Mopesaleme o re bolella hore motho ea atlehileng le ea thabileng ke ea ‘thabelang molao oa Jehova, molao oa hae a o bala ka lentsoe le tlaase bosiu le motšehare.’—Pesaleme ea 1:2.
Ha Molimo a ne a khetha Joshua hore e be moeta-pele oa sechaba sa Iseraele, o ile a bolelloa: “U . . . bale [Lentsoe la Molimo] ka lentsoe le tlaase bosiu le motšehare.” E, ho ne ho hlokahala hore Joshua a bale Lentsoe la Molimo le ho thuisa ka lona, empa hape o ne a lokela hore a ‘hlokomele ho etsa ka sohle se [neng] se ngoliloe ho lona.’ Ka sebele, ho bala Bibele ka bohona ho ke ke ha u atlehisa ka mohlolo. U lokela ho sebelisa seo u se balang. Joshua o ile a bolelloa hore: “Ka ho etsa joalo u tla atlehisa tsela ea hao ’me ka ho etsa joalo u tla etsa ka bohlale.”—Joshua 1:8.
Nahana ka ngoana ea bososelang a lutse holim’a motsoali ea lerato ha ba ntse ba bala hammoho pale eo ba e ratang haholo. Ho sa tsotellehe hore na ba kile ba e bala ka makhetlo a makae, ba ananela linako tseo tsa bohlokoa. Ka ho tšoanang, motho ea ratang Molimo o thabela ho bala Bibele letsatsi le letsatsi—e leng nako e molemo eo a e qetang a e-na le Ntate oa hae oa leholimo. Ka ho sebelisa keletso ea Jehova le tataiso, motho ea joalo o “ba joaloka sefate se lenngoeng haufi le melapo ea metsi, se fanang ka litholoana tsa sona nakong ea tsona le seo makhasi a sona a sa poneng, ntho e ’ngoe le e ’ngoe eo a e etsang e tla atleha.”—Pesaleme ea 1:3.
Sefate seo mopesaleme a se hlalosang ha se hōle ka mohlolo. Se lengoa ka hloko pel’a mohloli oa metsi ’me se hlokomeloa ke sehoai. Ka ho tšoanang, Ntate oa rōna oa leholimo o fetola tsela eo re nahanang ka eona le ho e lokisa ka keletso e ka Mangolong. Ka lebaka leo, rea atleha re bile re hlahisa litšobotsi tse tumellanong le molao oa Molimo.
Leha ho le joalo, “ba khopo ha ba joalo.” Ke ’nete hore ho ka ’na ha bonahala eka baa atleha ka nakoana, empa qetellong lintho li ba tsamaela hampe. Ba ‘ke ke ba ema kahlolong.’ Ho e-na le hoo, “litsela tsa ba khopo li tla timela.”—Pesaleme ea 1:4-6.
Kahoo u se ke ua lumella lefatše ho u susumetsa hore na u iketsetse lipakane life le hore na u nke lintho life e le tsa bohlokoa. Le hoja ho ka etsahala hore ebe u na le tsebo e itseng ’me u na le monyetla oa hore u atlehe lefatšeng, hlokomela kamoo u sebelisang tsebo ea hao kateng kapa kamoo u lumellang lefatše ho e sebelisa. Ho lelekisa lintho tse se nang thuso, tse bonahalang ho ka etsa hore motho a ‘pone.’ Ka lehlakoreng le leng, ho ba le kamano e ntle le Molimo ho fella ka katleho ea sebele le thabo.
Kamoo U ka Atlehang Kateng
Ke hobane’ng ha ntho e ’ngoe le e ’ngoe eo motho a e etsang e atleha ha a mamela keletso ea Molimo? Mopesaleme o ne a sa bue ka katleho lefatšeng lena. Katleho ea motho ea tšabang Molimo e amahanngoa le hore a etse thato ea Molimo—’me kamehla thato ea Molimo ea atleha. A re boneng kamoo ho sebelisa melao-motheo ea Bibele ho ka re atlehisang kateng.
Lelapa: Mangolo a eletsa banna “ho rata basali ba bona joaloka ’mele ea bona,” ’me mosali oa Mokreste o laeloa “ho ba le tlhompho e tebileng ho monna oa hae.” (Baefese 5:28, 33) Batsoali ba khothalletsoa ho qeta nako le bana ba bona, ho tšeha le bona le ho ba ruta lintho tsa bohlokoa bophelong. (Deuteronoma 6:6, 7; Moeklesia 3:4) Hape Lentsoe la Molimo le eletsa batsoali le re: “Le se ke la halefisa bana ba lōna.” Ha ho sebelisoa keletso ena, ho bonolo hore bana ba “mamele batsoali ba [bona]” le ho ‘hlompha ntat’a bona le ’m’a bona.’ (Baefese 6:1-4) Ho mamela keletso ena ea Molimo ho ka etsa hore ho be le thabo ka lapeng.
Metsoalle: Batho ba bangata ba batla ho ba le metsoalle. Re ka khona ho rata batho ba bang le hore ba re rate. Jesu o ile a bolella balateli ba hae hore ba lokela ho ‘ratana.’ (Johanne 13:34, 35) Har’a bona, re fumana metsoalle eo re ka e ratang le ho e tšepa, hoo re ka e bolellang litaba tsa rōna tsa lekunutu le ho e phetlela lifuba. (Liproverbia 18:24) Ntho ea bohlokoa ka ho fetisisa ke hore ha re sebelisa melao-motheo ea Bibele, re ka “atamela ho Molimo” ’me joaloka Abrahama, ra ba ra bitsoa ‘metsoalle ea Jehova.’—Jakobo 2:23; 4:8.
Morero Bophelong: Ho e-na le ho phela ba se na morero, batho ba atlehileng e le kannete ba ba le morero bophelong. Bophelo ba bona ha boa itšetleha ka maemo a sa tsitsang a tsamaiso ena ea lintho. Lipakane tsa bona li ba tlisetsa khotsofalo ea ’nete le e tšoarellang, kaha li thehiloe morerong oa sebele oa bophelo. Ke’ng se etsang hore motho a be le morero bophelong? “Tšaba Molimo oa ’nete ’me u boloke litaelo tsa hae. Etsoe sena ke sohle seo motho a tlamehang ho se etsa.”—Moeklesia 12:13.
Tšepo: Ha Molimo e le Motsoalle oa rōna, re boetse re ba le tšepo mabapi le nako e tlang. Moapostola Pauluse o ile a khothalletsa Bakreste hore “ba se ke ba beha tšepo ea bona maruong a sa tsitsang, empa ba e behe ho Molimo.” Ka tsela ena, ba ne ba tla be ba ‘ipolokela ka mokhoa o sireletsehileng motheo o motle bakeng sa ka moso, e le hore ba ka tšoara ka tieo bophelo ba sebele.’ (1 Timothea 6:17-19) Bophelo bona ba sebele bo tla tla haufinyane ha ’Muso oa Molimo oa leholimo o tsosolosa Paradeise lefatšeng lena.—Luka 23:43.
Le hoja u phela tumellanong le melao-motheo ea Bibele, u ke ke ua lokoloha mathateng, empa u tla khona ho qoba boholo ba masisa-pelo le mesarelo eo ba khopo ba ipakelang eona. David, eo ho builoeng ka eena pejana, le ba bang ba limilione ba boemong bo tšoanang le ba hae ba ithutile molemo oa ho sebelisa melao-motheo ea Bibele bophelong ba bona. Ka mor’a ho fumana mosebetsi o mo fang nako, David o ile a re: “Ke thabela kamano ea ka le mosali oa ka le bana ba ka hammoho le tokelo ea ho sebeletsa Jehova Molimo ke le moholo oa phutheho.” Ha ho makatse hore ebe pesaleme ha e bua ka motho ea mamelang keletso ea Molimo e re: “Ntho e ’ngoe le e ’ngoe eo a e etsang e tla atleha”!
[Chate e leqepheng la 6]
MEHATO E MEHLANO E LEBISANG KATLEHONG
1 Hanela tšusumetso ea litekanyetso tsa lefatše lena.
2 Bala Lentsoe la Molimo letsatsi leletsatsi u be u thuise ka lona.
3 Sebelisa keletso ea Bibele bophelong ba hao.
4 Etsa hore Molimo e be motsoalle oa hao.
5 Tšaba Molimo oa ’nete ’me u boloke litaelo tsa hae.
[Litšoantšo tse leqepheng la 7]
Na u phela tumellanong le mehato e lebisang katlehong?