“O Ntsamaisa Pel’a Metsi a Khutsitseng”

KA LEBAKA la mocheso oa linaha tsa Bochabela bo Hare, ho hlokahala hore linku li noe metsi letsatsi le leng le le leng. Ka lebaka leo, karolo ea bohlokoa mosebetsing oa molisa ke ho fa mohlape oa hae metsi. Ka linako tse ling balisa ba noesa mehlape ea bona selibeng, ba kha metsi ebe ba a tšela ka har’a lijelo e le hore linku li ka noa. (Genese 29:1-3) Leha ho le joalo, haholo-holo nakong ea lipula, sebaka se potolohileng melatsoana le linōka se fetoha “libaka tsa phomolo tse noselitsoeng hantle” tse nang le khotso.—Pesaleme ea 23:2.

Molisa ea hloahloa o lokela ho tseba moo ho nang le metsi le lekhulo le letle bakeng sa mohlape oa hae. Ha a tseba sebaka hantle, linku tsa hae li tla phela. Davida, ea ileng a qeta lilemo tse ngata a alosa linku maralleng a Judea, o ile a tšoantša tataiso ea Molimo ea moea le ea molisa ea isang linku tsa hae makhulong a matle le metsing a fanang ka bophelo. Ho latela phetolelo e ’ngoe, Davida o re: “O ntsamaisa pel’a metsi a khutsitseng.”—Pesaleme ea 23:1-3, Bibele ea Sesotho.

Nako e telele hamorao, ka moprofeta oa hae Ezekiele, Jehova o ile a sebelisa papiso e tšoanang. O ile a tšepisa hore o tla bokella batho ba hae linaheng tseo ba qhalakanyelitsoeng ho tsona joalokaha molisa a bokella linku tsa hae. O ile a ba tiisetsa a re: “Ke tla li ntša . . . ke li tlise naheng ea tsona ke li fulise lithabeng tsa Iseraele, likotopong.”—Ezekiele 34:13.

Jehova Molimo le eena o amehile haholo ka ho fana ka metsi a moea. Buka ea Tšenolo e hlalosa “nōka ea metsi a bophelo” e phallang ho tsoa teroneng ea Molimo. (Tšenolo 22:1) Batho bohle ba fuoa memo ea hore ba noe metsi a nōka ena. “Mang kapa mang ea lakatsang [a ka nka] metsi a bophelo ntle ho tefo.”—Tšenolo 22:17.

Metsi ana a bophelo a tšoantšetso a emela litokisetso tsa Molimo bakeng sa bophelo bo sa feleng. E mong le e mong a ka qala ho noa metsing ana ka ho ‘rua tsebo ka Molimo a le mong feela oa ’nete le ka eo a mo romileng, Jesu Kreste.’—Johanne 17:3.