’Nete e Fetola Bophelo

HO BOHLOKO empa ke ’nete hore bophelo ba batho ba bangata kajeno bo boima, bo bile bo maqakabetsing. Na ho ka khoneha hore batho ba joalo ba thabe? Ba bang ke linokoane ’me ba phela ka tsa batho ba bang. Na ho ka etsahala hore e be batho ba tšepahalang sechabeng? Karabo ea lipotso tsena ka bobeli ke e. Batho ba ka fetoha. Bophelo bo ka fetoloa. Moapostola Pauluse o ile a bontša hore na sena se ka finyelloa joang ha a ngola: “Le fetohe ka ho nchafatsa likelello tsa lōna, e le hore le ka ipakela e le lōna thato ea Molimo e molemo le e amohelehang le e phethahetseng.”—Baroma 12:2.

Ho boleloa ha ‘thato ea Molimo e phethahetseng’ ho ka ’na ha re hopotsa seo Jesu a ileng a se bolella barutuoa ba hae lilemong tse fetang 20 pele Pauluse a ngola mantsoe ao a ka holimo. Jesu o ile a re: “Le tla tseba ’nete, ’me ’nete e tla le lokolla.” (Johanne 8:32) Ha Jesu a bua ka “’nete,” o ne a bolela boitsebiso bo bululetsoeng ba bomolimo—haholo-holo boitsebiso bo amanang le thato ea Molimo—boo re bo boloketsoeng ka Bibeleng. (Johanne 17:17) Na ka sebele ’nete ea Bibele e lokolla batho? Na ho phela tumellanong le thato ea Molimo ho hlile ho fetola bophelo? Ka sebele hoa bo fetola. Nahana ka mehlala e seng mekae.

Morero Bophelong

Hase khale haholo ha Moisés oa Gibraltar, e ne e le motho ea sa thabang ho hang. O re: “Ke ne ke le letahoa ’me ke robala seterateng. Ke ne ke le sekatana. Bosiu bo bong le bo bong ke ne ke kōpa Molimo hore a nkhauhele ’me a se ke a ntumella hore ke boele ke bone letsatsi le leng la tšotleho. Ke ne ke lla ha ke botsa Molimo hore na ke ne ke tsoalloa eng ha e le moo ke ne ke se na thuso, ke sa sebetse, ke se na ba heso ’me ho se ea nthusang. Ke hobane’ng ha ke ne ke lokela ho tsoela pele ke phela?” Joale ho ile ha etsahala ho hong.

Moisés o tsoela pele: “Ke ile ka tseba hore Molimo o utloile thapelo ea ka ha ke kopana le Roberto, e mong oa Lipaki tsa Jehova. Roberto o ile a mpha Bibele le bukana e thusang ho ithuta Bibele e reng Ke Eng Seo Molimo a se Hlokang ho Rōna?a Letsatsi le leng le le leng re ne re ithuta Bibele hammoho bencheng eo ke neng ke robala ho eona bosiu. Ka mor’a khoeli, Roberto o ile a nkisa libokeng Holong ea ’Muso ea Lipaki tsa Jehova e sebakeng seo. Ka potlako, ’nete ea Bibele e ne e fetotse tsela eo ke talimang lintho ka eona ka ho feletseng. Ha ke sa robala seterateng; leha e le hore ke sa ntse ke e-noa kapa hona ho tsuba. Bophelo ba ka bo fetohile ’me ke thabile. Ke tšepa hore ke tla kolobetsoa haufinyane ’me ke sebeletse Jehova ke le e mong oa Lipaki tsa hae.”

E bile phetoho e kaakang! Ha batho ba se na tšepo, hangata ke kahobane ba hloka tsebo. Ha ba tsebe letho ka Molimo le merero ea hae e babatsehang. Tabeng ea Moisés, tsebo eo a neng a e fumane e ile ea mo fa matla le sebete sa hore a fetole bophelo ba hae. Boemong ba Moisés, thapelo ea mopesaleme ho Molimo e ile ea arabeloa: “Romela leseli la hao le ’nete ea hao, li tle li ntsamaise, li nkise thabeng e khethehileng ea hao, le meahong ea hao.”—Pesaleme ea 43:3.

Daniel oa Belize o bile le phihlelo e tšoanang. Daniel o ne a sa robale literateng—o ne a e-na le mosebetsi o phahameng. Empa, ka lilemo tse 20 o ile a loana le ho lemalla lithethefatsi le joala ’me o ne a phela bophelo bo litšila. Le hoja a hōlisitsoe e le Mok’hatholike, Daniel o ne a sa bone morero oa bophelo, ’me o ne a belaella boteng ba Molimo. O ile a batla thuso likerekeng tse fapaneng empa a fumana hore metsoalle e mengata ea hae e neng e e-ea kerekeng, haesitana le metsoalle e meng ea hae ea baruti, e ne e sebelisa lithethefatsi le joala hampe. Nakong eo, mosali oa hae o ne a le makhatheng a ho mo hlala.

A tsietsoe, Daniel o ile a ikisa setsing sa ho thusa motho ho hlōla ho lemalla lithethefatsi. Leha ho le joalo, o ne a tseba hore ha a lokolloa moo, o ne a tla boela a khutlela ka potlako lithethefatsing ntle leha a ne a ka fumana thuso. Empa e ne e tla ba thuso ea mofuta ofe? Ka May 1996, matsatsi a mabeli ka mor’a hore a lokolloe setsing seo, Daniel o ile a ikisa ho e mong oa Lipaki tsa Jehova ’me a mo kōpa se ileng sa mo makatsa, “Ke kōpa hore u nthute Bibele.” Paki eo e ile ea lokisetsa ho ruta Daniel Bibele habeli ka beke, ’me ka potlako Daniel o ile a qala ho lumellanya bophelo ba hae le thato ea Molimo, ’me ho e-na le ho ikamahanya le metsoalle ea hae ea khale, o ile a ba le metsoalle ea Bakreste e neng e sa sebelise lithethefatsi kapa joala hampe ’me e le e phemang boitšoaro bo bobe. Kahoo, Daniel o hlokometse hore seo Bibele e se bolelang ke ’nete: “Ea tsamaeang le ba bohlale o tla hlalefa; empa ea tloaelaneng le maoatla o tla senyeha.” (Liproverbia 13:20) Ka mor’a nakoana, o ile a re: “Lena ke lekhetlo la pele bophelong ba ka leo ke tsebang hore na ho ba le letsoalo le hloekileng ke eng.” Bophelo ba Daniel le bona bo ile ba fetoha.

Monna e mong o ile a etsa phetoho e hlokomelehang Puerto Rico. O ne a le chankaneng ’me o ne a nkoa a le kotsi haholo kaha o ne a bolaile batho ba bangata. Na o ne a ka fetoloa ke ’nete ea Bibele? E. E mong oa Lipaki tsa Jehova o ile a khona ho mo fa likopi tse itseng tsa limakasine tsa Molula-Qhooa le Tsoha!, ’me o ile a kōpa tse ling ka potlako. Ho ile ha qaloa thuto ea Bibele le eena, ’me ha ’nete ea Bibele e qala ho mo ama pelo, liphetoho tseo a ileng a li etsa li ne li bonahala ho bohle. Pontšo e ’ngoe ea liphetoho tsa hae tsa pele e bile ea hore o ile a kuta moriri oa hae o molelele le litelu tsa hae tse hlahlabetseng.

Bibele e re Molimo o tšoarela baetsalibe ba bakang ka tieo ’me ba fetola tsela eo ba phelang ka eona. Pauluse o ngotse: “Na ha le tsebe hore batho ba sa lokang ha ba na ho rua ’muso oa Molimo? . . . ’Me leha ho le joalo ke seo ba bang ba lōna ba neng ba le sona. Empa le hlatsoitsoe hore le hloeke.” (1 Bakorinthe 6:9, 11) Ha ho na pelaelo hore mantsoe ana a ile a khothatsa monna enoa, joalokaha ho entse mantsoe a ho Liketso 24:15: “Ho tla ba le tsoho ea ba lokileng hammoho le ba sa lokang.” O itse: “Ke batla ho ba teng ha tsoho ea bafu e etsahala e le hore nka kōpa tšoarelo ho bao ke ileng ka ba amoha bophelo ba bona.”

Lelapa le Lecha

Ka letsatsi le leng, Luis, moevangeli oa nako e tletseng oa Lipaki tsa Jehova Argentina, o ile a tsebisoa mohlankana e mong ea neng a bile le phihlelo e hlomolang. Kaha batsoali ba hae ba ne ba ile ba mo lahla ha a qeta ho hlaha, o ne a hōletse litsing tse sa tšoaneng tsa tlhokomelo. Ha a se a ka ba lilemo li 20, o ile a utloela moo ’mè oa hae a leng teng ’me a etsa qeto ea ho ea lula haufi le eena. O ile a sebetsa ka thata, a bokella chelete e ngata ’me a ea motseng oo ’mè oa hae a leng ho oona. ’Mè oa hae o ile a mo lumella hore a lule le eena ho fihlela ha chelete ea hae e felile eaba joale oa mo leleka. Ho lahloa hona ho ile ha etsa hore a batle ho ipolaea.

Leha ho le joalo, Luis o ile a khona ho arolelana ’nete ea Bibele le mohlankana enoa. ’Nete eo e akarelletsa tiisetso ena: “Leha ntate le ’mè ba ka ntahla, Jehova o tla nthola.” (Pesaleme ea 27:10) Mohlankana eo o ile a tseba hore o na le Ntate oa leholimo ea neng a ke ke a mo lahla le ka mohla. Hona joale o thabetse ho ba karolo ea lelapa le lecha, e leng lelapa la Jehova.

Naheng eona eo, monna e mong o ile a bolella e mong oa Lipaki tsa Jehova hore o rata makasine ea Molula-Qhooa. Hobane’ng? Hobane e ne e pholositse lenyalo la hae. Ho bonahala eka ka letsatsi le leng ha monna enoa a ne a oroha mosebetsing, o ile a bona makasine ea Molula-Qhooa e neng e e-na le sehlooho se ngotsoeng ka litlhaku tse khōlō se reng “Tlhalo,” ka moqomong oa lithōle. Kaha lenyalo la hae le ne le le mathateng ’me eena le mosali oa hae ba qalile ho nka mehato ea hore ba arohane ka molao, o ile a ntša makasine eo ’me a qala ho e bala. O ile a ea le eona hae ’me a e bala le mosali oa hae. Banyalani bao ba ile ba leka ho sebelisa keletso ea makasine eo e thehiloeng Bibeleng. (Baefese 5:21–6:4) Kamano ea bona e ile ea ntlafala ka potlako. Ba ile ba emisa mehato ea ho arohana ’me hona joale ba ithuta Bibele e le banyalani ba momahaneng.

Uruguay, monna e mong hape ea bitsoang Luis o ne a sa thaba ho hang. Ho lemalla lithethefatsi, ho sebelisana le meea, ho rapela litšoantšo le ho sebelisa joala hampe—tsena ke tse ling tsa lintho tse neng li ferekantse bophelo ba hae. A ferekane ka ho feletseng, qetellong Luis o ile a lumela hore Molimo ha a eo. Motsoalle oa hae o ile a mo fa buka e reng Life—How Did It Get Here? By Evolution or by Creation?b Sena se ile sa etsa hore a kopane ho se hokae le Lipaki tsa Jehova, empa ka potlako Luis o ile a khutlela joaleng le lithethefatsing. Ha a iphumana a lutse ka mokoting o tletseng lithōle ka nako e ’ngoe ha a ne a sithabetse haholo, o ile a rapela a lebisa thapelo ea hae ho “ntate oa Jesu Kreste,” kaha o ne a sa tsebe lebitso la Molimo.

O ile a kōpa hore Molimo a mo bontše haeba ho ne ho e-na le lebaka la hore a be teng lefatšeng. Luis oa tlaleha: “Letsatsing le hlahlamang feela, motsoalle oa ka o ile a mpha buka eo a neng a se a sa e sebelise. Sehlooho sa eona se ne se reng? Tšenolo—Tlhōrō ea Eona e Hlollang ka Botle e Haufi!”c Buka eo e ile ea mo thusa ho arabela lipotso tsa hae. Luis o ile a boela a rapella thuso ea hore a fumane bolumeli bo tla mo bontša hore na a sebeletse Molimo joang. Mehlolo! Ho ile ha kokotoa monyako ’me ka ntle ho ne ho eme Lipaki tsa Jehova tse peli. Luis o ile a qala ho ithuta Bibele le tsona hang-hang. O ile a hatela pele ka potlako ’me hona joale o ikutloa a hlohonolofetse ka ho ba Paki e kolobelitsoeng. O phela bophelo bo hloekileng ’me o thusa ba bang hore le bona ba fumane morero bophelong ba bona. Mantsoe a Pesaleme ea 65:2 a fetohile ’nete ho eena: “Uena ea utloang merapelo, batho bohle ba tla tla ho uena.”

Allan oa Philippines e ne e kile ea e-ba seithuti sa moitseki. O ne a kenetse mokhatlo oo morero oa oona e neng e le ho “felisa puso e le hore moloko oa ka moso o phele ka ho lekana.” Leha ho le joalo, ka letsatsi le leng o ile a kopana le Lipaki tsa Jehova ’me a ithuta Bibeleng hore na morero oa Molimo ke ofe bakeng sa moloko oa batho. Morero oo o akarelletsa tšepiso e bululetsoeng: “Ho se ho se hokae, ’me molotsana o tla ba sieo . . . Empa ba bonolo ba tla rua lefatše, ba iketle khotsong e kholo.” (Pesaleme ea 37:10, 11) Allan o itse: “Ke ile ka hlokomela ka potlako hore mokha oa rōna o ne o loanela seo e leng khale Bibele e ile ea se tšepisa. Lintho tsohle tseo re neng re li chachehela li tla fumaneha tlas’a ’Muso oa Molimo.” Hona joale Allan o tšehetsa ’Muso oa Molimo ’me o thusa ba bang hore ba be le tumelo ’neteng ea Bibele.

E, bophelo boa fetoha ha batho ba mamela ’nete ea Lentsoe la Molimo, Bibele. Ka sebele, nako ea tla eo ka eona moloko oohle oa batho o pholohileng o tla beng o entse hore bophelo ba oona bo lumellane le thato ea Molimo. Eo e tla ba phetoho e kaakang! Joale ho tla phethahala boprofeta bona: “’Me ha ho sa tla etsoa hampe, ha ho sa tla hlola ho senngoa thabeng eohle e halalelang ea ka, hobane lefatše le tla tlala tsebo ea Jehova, joalo ka ha metsi a aparetse leoatle.”—Esaia 11:9.

[Mongolo o botlaaseng ba leqephe]