Mohau oa Jehova o re Boloka ho Nyahameng
“Nkhauhele, Uena Molimo, ka mosa oa hao o lerato. Ka bongata ba mohau oa hao hlakola litlōlo tsa ka.”—PESALEME EA 51:1, NW.
1, 2. Ke joang e mong oa bahlanka ba Jehova a ka angoang ke sebe se tebileng?
MOLAO oa Jehova o ke ke oa tlōloa ntle ho kotlo. Sena se bonahala hakaakang ha re etsa sebe se tebileng khahlanong le Molimo! Le hoja ho ka etsahala hore ebe re sebelelitse Jehova ka botšepehi ka lilemo tse ngata, ho tlōla molao oa hae ho ka baka matšoenyeho le ho tepella ho tebileng ha maikutlo. Re ka ’na ra ikutloa hore Jehova o re lahlile le hore ha re sa tšoaneleha ho mo sebeletsa. Sebe sa rōna se ka tšoana le leru le letenya le sirang khanya ea kamohelo ea Molimo.
2 Morena Davida oa Iseraeleng ea boholo-holo ka lekhetlo le leng o kile a iphumana a le boemong bo joalo. Boemo boo bo ile ba ba teng joang?
Mehato e sa Nepahalang e ka Lebisa Sebeng se Tebileng
3, 4. Ho ile ha etsahala joang ka Morena Davida nakong ea ha a atlehile linthong tse bonahalang?
3 Davida o ne a rata Molimo empa o ile a nka mehato e fosahetseng e ileng ea etsa hore a etse libe tse tebileng. (Bapisa le Ba-Galata 6:1.) Sena se ka etsahalla motho leha e le ofe ea sa phethahalang, haholo-holo haeba a na le matla a taolo holim’a ba bang. Davida kaha e ne e le morena ea atlehileng, o ne a thabela botumo le matla. Ke mang ea neng a ka leka ho ba khahlanong le seo a se buang? Banna ba linatla ba ne ba loketse ’me ba ikemiselitse ho mo sebeletsa, ’me batho ba ne ba etsa seo a ba laelang sona ntle ho tika-tiko. Leha ho le joalo, Davida o ile a etsa phoso ka ho ikekeletsa basali le ho bala sechaba.—Deuteronoma 17:14-20; 1 Likronike 21:1.
4 Nakong ena ea ha a atlehile linthong tse bonahalang, Davida o ile a etsa libe tse tebileng khahlanong le Molimo le motho. Libe tsa hae li ne li latellana joalokaha eka ke likhole tse lohellaneng tsa seaparo se rokiloeng ke Satane! Nakong ea ha Baiseraele-’moho le Davida ba loana le Baammone, o ne a shebeletse a le ka holim’a ntlo ea hae ha mosali oa Uria e motle, Bathe-Sheba, a hlapa. Kaha Uria o ne a le ntoeng, morena o ile a laela hore mosali a tlisoe ntlong ea hae ea borena eaba o etsa bofebe le eena. Nahana hore na o ile a tšoha hakaakang ha hamorao a utloela hore o ithoetse! Davida a lata Uria, a tšepile hore o ne a tla robala le Bathe-Sheba ’me a nke hore ngoana eo ke oa hae. Le hoja Davida a ile a mo noesa joala hore a tahoe, Uria a hana ho robala le eena. Kaha joale Davida o ne a le maqakabetsing, a laela molaoli Joabe ka lekunutu hore a etse hore Uria a be ka pele ntoeng e leng moo joang kapa joang a neng a tla bolaoa. Uria a shoela ntoeng, mosali oa hae eo e leng mohlolohali a mo llela ka nako e tloaelehileng ea ho lla, ’me Davida a mo nyala pele batho ba ka hlokomela hore o ithoetse.—2 Samuele 11:1-27.
5. Ho ile ha etsahala joang ka mor’a hore Davida a etse sebe le Bathe-Sheba, hona libe tsa hae li bile le phello efe ho eena?
5 Ka moprofeta Nathane, Molimo a pepesa libe tsa Davida ’me a re: “Ke tla u tsosetsa bobe tlung ea hao.” Ka baka la ’ona mantsoe ao, ngoana ea tsoetsoeng ke Bathe-Sheba a shoa. (2 Samuele 12:1-23) Mora oa Davida oa matsibolo, Amnone, a beta khaitseli ea hae ka ntat’a bona Tamare ’me a bolaoa ke khaitseli ea Tamare. (2 Samuele 13:1-33) Absalome mora oa morena o ile a leka ho inkela borena ’me a tlotlolla ntate oa hae ka ho robala le linyatsi tsa Davida. (2 Samuele 15:1–16:22) Ntoa ea lehae e ile ea fella ka lefu la Absalome le mahlomola a eketsehileng ho Davida. (2 Samuele 18:1-33) Leha ho le joalo, libe tsa Davida li ile tsa mo kokobetsa ’me tsa etsa hore a elelloe tlhokahalo ea hore a lule haufi le Molimo oa hae ea nang le kutloelo-bohloko. Haeba re ka etsa phoso, a re bontšeng pako ka boikokobetso ’me re atamele haufi le Jehova.—Bapisa le Jakobo 4:8.
6. Ke hobane’ng ha Morena Davida a ne a le molato ka ho khethehileng?
6 Davida o ne a le molato ka ho khethehileng hobane e ne e le morena oa Iseraele ea tsebang Molao oa Jehova hantle. (Deuteronoma 17:18-20) E ne e se faro oa Egepeta kapa morena oa Babylona ea neng a sa o tsebe ’me a ka ’na a tloaela ho etsa lintho tseo Molimo a sa li rateng. (Bapisa le Ba-Efese 2:12; 4:18.) Joalokaha e ne e le setho sa sechaba se inehetseng ho Jehova, Davida o ne a tseba hore bofebe le polao ke libe tse tebileng. (Exoda 20:13, 14) Le Bakreste ba tseba molao oa Molimo. Leha ho le joalo, joaloka Davida, ba bang ba bona ba o tlōla ka baka la sebe se futsitsoeng, bofokoli ba botho, le teko eo ba sa kang ba e thibela. Haeba seo se ka etsahalla leha e le mang oa rōna, ha ho hlokahale hore re lule boemong bo lefifi bo koahelang pono ea rōna ea moea ’me bo re khurumetsa ka ho nyahama ho hoholo.
Ho Ipolela ho Tlisa Pheko
7, 8. (a) Ho etsahetse’ng ka Davida ha a ne a leka ho pata libe tsa hae? (b) Ke hobane’ng ha re tlameha ho ipolela libe le ho li tlohela?
7 Haeba re le molato oa ho tlōla molao oa Molimo ka ho tebileng, re ka ho fumana ho le thata ho bolela libe tsa rōna, esita le ho Jehova. Ho ka etsahala eng tlas’a maemo a joalo? Pesalemeng ea 32, Davida o ile a lumela hore: “Enere ha ke khutsitse, masapo a ka a na a felisoa ke ho bobola ha ka ka letsatsi lohle. Hobane letsoho la hao le ne le le boima ho ’na nyene le bosiu; metsi a bophelo ba ka a na a omeletse joale ka hola ke lebatama la selemo.” (Litemana 3, 4) Ho leka ho pata sebe le ho hatella letsoalo la hae ho ile ha qeta Davida oa mofosi matla. Ho tsieleha ho ile ha fokotsa matla a hae hoo a neng a tšoana le sefate se omeletseng se se nang mongobo o fanang ka bophelo. Ha e le hantle, e ka ’na eaba o ile a kula kelellong le nameng. Ho sa tsotellehe se ileng sa etsahala, o ile a felloa ke thabo. Haeba leha e le mang oa rōna a iphumana a le boemong bo tšoanang, re lokela ho etsa joang?
8 Ho ipolela ho Molimo ho ka tlisa tšoarelo le pheko. Davida o ile a bina: “Ka ba ka u bolella sebe sa ka, ’me ha kea ka ka pata bokhopo ba ka, ka re: Ke tla bolela ho tlōla ha ka ho Jehova; ’me ua hlakola bokhopo ba sebe sa ka.” (Pesaleme ea 32:5) Na u mahlomoleng ka baka la sebe se patiloeng? Na ho ne ho ke ke ha ba molemo ho ipolela le ho khaotsa ho etsa sebe e le hore u ka fumana mohau oa Molimo? Ke hobane’ng ha u sa bitse baholo ba phutheho ’me u batle pholiso ea moea? (Liproverbia 28:13; Jakobo 5:13-20) Moea oa hao o bontšang pako o tla amoheleha, ’me qetellong u tla boela u be le thabo ea hao ea Bokreste. Davida o itse: “Ho lehlohonolo [“thabile,” NW] eo tšito ea hae e tšoaretsoeng, eo sebe sa hae se apesitsoeng! Ho lehlohonolo [“thabile,” NW] motho eo Jehova a sa ’malleng bokhopo ba hae, eo thetso e leng sieo pelong ea hae!”—Pesaleme ea 32:1, 2.
9. Pesaleme ea 51 e qapiloe neng, hona hobane’ng?
9 Davida le Bathe-Sheba ba ne ba ikarabella ho Jehova Molimo bakeng sa phoso ea bona. Le hoja ba ne ba ka bolaeloa libe tsa bona, Molimo o ile a ba hauhela. O ile a bontša mohau ka ho khethehileng ho Davida ka baka la selekane sa ’Muso. (2 Samuele 7:11-16) Boikutlo ba Davida bo bontšang pako ka libe tsa hae tse amang Bathe-Sheba bo bonoa Pesalemeng ea 51. Pesaleme ena e amang pelo e ile ea qapjoa ke morena ea ikoahlaeang ka mor’a hore moprofeta Nathane a etse hore letsoalo la hae le sebetse ka ho ’montša botebo ba ho tlōla ha hae molao oa Molimo. Ho ile ha hlokahala sebete hore Nathane a bontše Davida libe tsa hae, joalokaha ho hlokahala hore baholo ba khethiloeng ba Bakreste ba be sebete e le hore ba ka etsa joalo kajeno. Ho e-na le ho hana molato le ho laela hore Nathane a bolaoe, ka boikokobetso morena o ile a ipolela libe. (2 Samuele 12:1-14) Pesaleme ea 51 e bontša seo a ileng a se bua ho Molimo ka thapelo mabapi le liketso tsa hae tse tlotlollang ’me e loketse haholo hore re thuise ka eona ka thapelo, haholo haeba re entse phoso ’me re laba-labela mohau oa Jehova.
Re Ikarabella ho Molimo
10. Davida o ne a ka boela a ba matla moeeng joang?
10 Davida o ne a sa batle ho behela sebe sa hae mabaka empa o ile a kōpa: “Nkhauhele, Uena Molimo, ka mosa oa hao o lerato. Ka bongata ba mohau oa hao hlakola litlōlo tsa ka.” (Pesaleme ea 51:1, NW) Ka ho etsa phoso, Davida o ne a tlōtse meeli ea molao oa Molimo. Leha ho le joalo, ho ne ho na le tšepo ea hore o ne a tla boela a be matla moeeng, haeba Molimo a ne a ka mo amohela ka mosa oa Hae o lerato, kapa lerato le tšepahalang. Bongata ba mohau oa Molimo nakong e fetileng bo ile ba neha morena ea bontšitseng pako motheo oa ho ba le tumelo ea hore Moetsi oa hae o tla hlakola litlōlo tsa hae.
11. Mahlabelo Letsatsing la Lipheko a ne a emela eng, hona kajeno ho hlokahala eng bakeng sa ho bolokeha?
11 Ka lintho tsa boprofeta tse neng li tšoantšetsa mahlabelo a Letsatsi la Lipheko, Jehova o ile a bontša hore o na le tsela ea ho hloekisa ba bontšitseng pako libeng tsa bona. Rea tseba hore mohau oa hae le ho tšoarela ha hae li fetisetsoa ho rōna motheong oa tumelo sehlabelong sa thekollo sa Jesu Kreste. Haeba Davida, ka baka la ho nahana ka litšoantšetso tsena le mefuta ena ea sehlabelo, o ile a tšepela leratong le mosa la Jehova le mohaung oa hae, bahlanka ba Molimo ba kajeno ba tlameha ho bontša tumelo e kaakang thekollong e fanoeng bakeng sa poloko ea bona!—Ba-Roma 5:8; Ba-Heberu 10:1.
12. Ho etsa sebe ho bolela eng, hona Davida o ile a ikutloa joang ka liphoso tsa hae?
12 E le ha Davida a ipiletsa ho Molimo, o ile a eketsa: “Ntlhatsoe, u be u ntlhatsoisise bokhopo ba ka, u mphekole sebe sa ka! Hobane ke tseba litlōlo tsa ka, sebe sa ka se pel’a ka ka mehla.” (Pesaleme ea 51:2, 3) Sebe ke ho fosa pakane mabapi le litekanyetso tsa Jehova. Ka sebele Davida o ne a fositse pakane. Leha ho le joalo, o ne a sa tšoane le ’molai kapa mofebi ea sa tsotelleng phoso ea hae, ea mpang a ba tsielehong ka baka la kotlo kapa hore ho ka ’na ha etsahala hore a tšoaetsoe lefu le itseng. Davida joaloka motho ea ratang Jehova, o ne a hloile bobe. (Pesaleme ea 97:10) O ne a tennoe ke sebe ka bosona ’me a batla hore Molimo a mo hloekise sona ka ho feletseng. Davida o ne a hlokomela liphoso tsa hae ka ho feletseng ’me o ne a soabile ka ho tebileng hore ebe o ile a lumella hore takatso ea hae ea boetsalibe e mo hlōle. Sebe sa hae se ne se le ka pele ho eena ka mehla, hobane letsoalo la motho ea tšabang Molimo ha ho mohla le khutsang ho fihlela a bontša pako, a ipolela, ’me a fumana tšoarelo ho Jehova.
13. Ke hobane’ng ha Davida a ka bolela hore o ne a entse sebe khahlanong le Molimo feela?
13 Davida a lumela hore o ikarabella ho Jehova, o ile a re: “Ke sitetsoe uena, uena u inotši; ke entse ho leng hobe mahlong a hao; ke moo ho loka ha hao ho tla bonahala ha u bua, le hloeko ea hao ha u ahlola.” (Pesaleme ea 51:4) Davida o ne a tlōtse melao ea Molimo, a tlotlolotse boemo ba hae e le morena, ’me “ntle ho pelaelo o ile a hlompholla Jehova,” a etsa hore A rohakoe. (2 Samuele 12:14, NW; Exoda 20:13, 14, 17) Liketso tsa Davida tsa boetsalibe e ne e boetse e le litlōlo khahlanong le sechaba sa Baiseraele le litho tsa lelapa la hae, joalokaha kajeno mofosi ea kolobelitsoeng a baka masoabi le tsieleho ka phuthehong ea Bokreste le ho baratuoa ba hae. Le hoja morena ea bontšitseng pako a ne a tseba hore o entse sebe khahlanong le batho ba kang Uria, o ne a ikutloa a ikarabella haholoanyane ho Jehova. (Bapisa le Genese 39:7-9.) Davida o ile a lumela hore kahlolo ea Jehova e tla ba e lokileng. (Ba-Roma 3:4) Ho hlokahala hore le Bakreste ba entseng libe ba be le pono e tšoanang.
Maemo a Utloahalang
14. Davida o bua ka maemo afe a susumetsang?
14 Le hoja Davida a sa ka a leka ho itokafatsa, o ile a re: “Bona, ke tsoaletsoe bokhopong, ’mè o nkemoletse sebeng.” (Pesaleme ea 51:5) Davida o ile a tsoalloa bokhopong, ’me ’mè oa hae o ile a tšoaroa ke mahlaba a pelehi ka baka la sebe se futsitsoeng. (Genese 3:16; Ba-Roma 5:12) Mantsoe a hae ha a bolele hore likamano tse loketseng tsa lenyalo, kemolo, le pelehi ke libe, joalokaha Molimo a fane ka lenyalo le pelehi; kahoo Davida o ne a sa bue ka sebe se tobileng sa ’mè oa hae. O ne a emoletsoe sebeng hobane batsoali ba hae e ne e le baetsalibe joaloka batho ba sa phethahalang.—Jobo 14:4.
15. Le hoja Molimo a ka ’na a nahanela maemo a susumetsang, ha rea lokela ho etsa eng?
15 Haeba re entse sebe, re ka bolella Molimo maemo leha e le afe a susumetsang ao e ka ’nang eaba a ile a tlatsetsa hore re etse phoso. Empa re se ke ra fetola mosa o sa tšoanelang oa Molimo boikemelo ba hore re etse boitšoaro bo hlephileng kapa re sebelise boetsalibe boo re bo futsitseng e le lesira leo re itšireletsang ka lona hore re se ke ra ikarabella bakeng sa libe tsa rōna. (Juda 3, 4) Davida o ile a amohela boikarabelo bakeng sa ho bapala ka mehopolo e litšila le ho inehella teko. A re rapeleng hore re se ke ra tlohelloa ha re le tekong ’me re nke khato tumellanong le thapelo e joalo.—Mattheu 6:13.
Kōpo ea ho Hloekisoa
16. Molimo o thabisoa ke tšoaneleho efe, hona see se lokela ho ama boitšoaro ba rōna joang?
16 Batho ba ka bonahala e le ba batle ba inehetseng ho Molimo, empa ha a shebe ka holimo feela empa o bona se ka hare. Davida o itse: “Empa uena u rata ’nete pelong ea motho. U ntsebise bohlale sephiring sa ka.” (Pesaleme ea 51:6) Davida o ne a le molato oa leshano le bolotsana ka ho laola lintho hore Uria a bolaoe le ka ho leka ho pata linnete tabeng ea hore Bathe-Sheba o ithoetse. Leha ho le joalo, o ne a tseba hore Molimo o thabela ’nete le khalalelo. Sena se lokela ho ama boitšoaro ba rōna ka tsela e ntle, hobane Jehova o tla re nyatsa haeba re le bolotsana. (Liproverbia 3:32) Davida o boetse a hlokomela hore haeba Molimo a ‘tla mo tsebisa bohlale,’ joaloka morena ea bontšitseng pako, o ne a tla sebetsa tumellanong le litekanyetso tsa bomolimo bophelong bohle ba hae.
17. Ke eng se neng se tšoantšetsoa ke ho rapella hore a hloekisoe ka hysopa?
17 Ka baka la hore mopesaleme a ile a bona hore o hloka thuso ea Molimo hore a hlole tšekamelo ea hae ea boetsalibe, o ile a ipiletsa ka ho eketsehileng: “U foke holim’a ka ka hysopa, ke tle ke phekolehe! U ntlhatsoe, ke tle ke fetise lehloa ka bosoeu!” (Pesaleme ea 51:7) Har’a lintho tse ling, semela sa hysopa (mohlomong marjoram, kapa Origanum maru) se ne se sebelisoa litšebeletsong tsa ho hloekisa batho bao pele ba neng ba tšoeroe ke lepera. (Levitike 14:2-7) Kahoo ho ne ho loketse hore Davida a rapelle hore a hloekisoe sebe sa hae ka hysopa. Khopolo ea bohloeki e boetse e amahanngoa le kōpo ea hae hore Jehova a mo hlatsoe e le hore a tle a hloeke ka ho feletseng, a be mosoeu ho feta lehloa le se nang mooa kapa litšila tse ling. (Esaia 1:18) Haeba leha e le mang oa rōna a khathatsoa ke letsoalo ka baka la phoso e itseng, a re beng le tumelo ea hore haeba re batla tšoarelo ea Molimo hobane re bontšitse pako, o tla re hloekisa a re hlatsoe motheong oa sehlabelo sa Jesu sa thekollo.
Kōpo ea Tsosoloso
18. Boemo ba Davida e ne e le bofe pele a bontša pako ’me a ipolela, hona ke joang ho tseba see ho ka thusang kajeno?
18 Mokreste leha e le ofe ea kileng a khathatsoa ke letsoalo a ka utloisisa mantsoe a Davida: “U nkutloise nyakallo le thabo! Masapo a ka ao u a robileng a ke a hlasimolohe!” (Pesaleme ea 51:8) Pele Davida a ka bontša pako ’me a ipolela libe tsa hae, letsoalo la hae le neng le mo khathatsa le ile la mo hlomola pelo. O ne a sa thabisoe le ke lipina tsa nyakallo le thabo tse neng li binoa ke libini tse ntle tsa likheleke. Mahlomola a Davida ka baka la ho se amoheloe ke Molimo a ne a le maholo hoo a neng a tšoana le motho eo masapo a hae a robiloeng ka ho utloisang bohloko. O ne a laba-labela hore a tšoareloe, a boele a be matla moeeng, ’me a buseletsoe thabo eo a neng a na le eona pele. Kajeno mofosi ea bontšitseng pako o boetse o hloka tšoarelo ea Jehova hore a be le thabo eo a neng a na le eona pele a etsa ntho e ileng ea beha kamano ea hae le Molimo kotsing. Ho buseletsoa “thabo ea moea o halalelang” ho motho ea bontšitseng pako ho bontša hore Jehova o mo tšoaretse le hore oa mo rata. (1 Ba-Thessalonika 1:6) Sena se tlisa matšeliso a makaakang!
19. Davida o ne a tla ikutloa joang haeba Molimo a ne a ka hlakola liphoso tsohle tsa hae?
19 Davida o ile a tsoela pele a rapela: “U furalle libe tsa ka, u hlakole makhopo a ka kaofela!” (Pesaleme ea 51:9) Jehova a ke ke a lebelloa hore a amohele libe. Kahoo, o ile a kōpuoa hore a pate sefahleho sa hae libeng tsa Davida. Morena o boetse a kōpa hore Molimo a hlakole liphoso tsohle tsa hae, a phumole ho se loke ha hae ka ho feletseng. E se e ka Jehova o ne a ka etsa seo! Se ne se tla matlafatsa Davida, se tlose moroalo oa ho khathatsoa ke letsoalo, ’me ho etse hore morena ea bontšitseng pako a tsebe hore o tšoaretsoe ke Molimo oa hae o lerato.
Ho Thoe’ng Haeba U Entse Sebe?
20. Ke eng se khothaletsoang bakeng sa Mokreste leha e le ofe ea entseng sebe se tebileng?
20 Pesaleme ea 51 e bontša hore leha e le bafe ba bahlanka ba Jehova ba inehetseng ba entseng sebe se tebileng empa ba bontšitse pako ba ka mo kōpa ka kholiseho hore a ba amohele ’me a ba hloekise libeng tsa bona. Haeba u Mokreste ea entseng phoso ka tsela e joalo, ke hobane’ng ha u sa kōpe tšoarelo ea Ntate oa rōna oa leholimo ka ho etsa thapelo e ikokobelitseng? Lumela hore u hloka thuso ea Molimo e le hore u amoheloe ke eena, ’me u kōpe hore a u buseletse thabo eo u neng u na le eona pele. Bakreste ba bontšitseng pako ba ka rapela Jehova ka kholiseho ba kōpa lintho tse joalo, hobane “o tšoarela haholo.” (Esaia 55:7; Pesaleme ea 103:10-14) Ha e le hantle, baholo ba phutheho ba lokela ho bitsoa e le hore ba ka fana ka thuso e hlokahalang ea moea.—Jakobo 5:13-15.
21. Re tla hlahloba eng hape?
21 Efela mohau oa Jehova o boloka batho ba hae ho nyahameng. Empa a re keng re hlahlobe kōpo e ’ngoe ea Davida e tsoang botebong ba pelo ho Pesaleme ea 51. Thuto ea rōna e tla bontša hore Jehova ha a khese pelo e robehileng.
U Ne U Tla Araba Joang?
◻ Sebe se tebileng se ka ba le phello efe ho e mong oa bahlanka ba Jehova?
◻ Davida o ile a ameha joang ha a ne a leka ho pata sebe sa hae?
◻ Ke hobane’ng ha Davida a re o entse sebe khahlanong le Molimo feela?
◻ Le hoja Molimo a ka nahanela maemo a susumetsang haeba re etsa sebe, ha rea lokela ho etsa eng?
◻ Mokreste o lokela ho etsa joang haeba a entse sebe se tebileng?