Rapelang le Phahamisa Matsoho a Tšepahalang
“Ke lakatsa hore sebakeng se seng le se seng banna ba tsoele pele ho rapela, ba phahamisa matsoho a tšepahalang ka ho sa sekisetseng, ka ntle le khalefo le ho pheha khang.”—1 TIMOTHEA 2:8.
1, 2. (a) Timothea oa Pele 2:8 e sebetsa joang thapelong e amang batho ba Jehova? (b) Joale re tla hlahloba eng?
JEHOVA o lebeletse hore batho ba hae ba tšepahale ho eena le hore ba tšepahale e mong ho e mong. Moapostola Pauluse o ile a amahanya botšepehi le thapelo ha a ne a ngola: “Ke lakatsa hore sebakeng se seng le se seng banna ba tsoele pele ho rapela, ba phahamisa matsoho a tšepahalang ka ho sa sekisetseng, ka ntle le khalefo le ho pheha khang.” (1 Timothea 2:8) Kamoo ho bonahalang kateng, Pauluse o ne a bua ka thapelo ea phatlalatsa “sebakeng se seng le se seng” moo Bakreste ba neng ba kopana hammoho teng. Ke bo-mang ba neng ba lokela ho emela batho ba Molimo ka thapelo libokeng tsa phutheho? E ne e lokela ho ba feela banna ba halalelang, ba lokileng, ba hlomphang, bao ka hloko ba neng ba phetha boikarabelo bohle ba Mangolo ho Molimo. (Moeklesia 12:13, 14) Ba ne ba lokela ho hloeka moeeng le boitšoarong ’me ho se be le pelaelo hore ba inehetse ho Jehova Molimo.
2 Ka ho khetheha baholo ba phutheho ba lokela ho “rapela, ba phahamisa matsoho a tšepahalang ka ho sa sekisetseng.” Lithapelo tsa bona tse tlohang pelong ka Jesu Kreste li bontša botšepehi bo sa sekisetseng ho Molimo ’me li ba thusa ho qoba likhang le ho tlakoloha ka bohale. Bonneteng, motho ofe kapa ofe ea nang le tokelo ea ho emela phutheho ea Bokreste ka thapelo ea phatlalatsa e lokela hore e be ea se nang khalefo, lonya le ho se tšepahale ho Jehova le ho mokhatlo oa hae o hlophisitsoeng. (Jakobo 1:19, 20) Ho na le lintlha life tsa Bibele tse tataisang tse eketsehileng bakeng sa ba nang le tokelo ea ho emela ba bang ka thapelo ea phatlalatsa? ’Me ke melao-motheo efe e meng ea Mangolo eo re lokelang ho e sebelisa lithapelong tsa rōna tsa lekunutung le tsa lelapa?
Nahana ka Thapelo Esale Pele
3, 4. (a) Ke hobane’ng ha ho le molemo ho nahana ka thapelo ea phatlalatsa esale pele? (b) Mangolo a bontša’ng mabapi le bolelele ba lithapelo?
3 Haeba re kōpiloe hore re rapele phatlalatsa, ho ka etsahala hore bonyane re khone ho nahana ka thapelo ea rōna esale pele. Ho etsa sena ho ka ’na ha re nolofalletsa ho akaretsa lintlha tsa bohlokoa tse loketseng ntle le ho etsa thapelo e telele, e potolohang taba. Ka sebele, lithapelo tsa rōna tsa lekunutung le tsona li ka etsoa ka lentsoe le phahameng. E ka ba tsa bolelele bofe kapa bofe. Jesu o ile a qeta bosiu bohle a rapela pele a khetha baapostola ba hae ba 12. Leha ho le joalo, ha a ne a theha Sehopotso sa lefu la hae, lithapelo tsa hae bakeng sa bohobe le veine ho bonahala hore li ne li batla li le khutšoanyane. (Mareka 14:22-24; Luka 6:12-16) ’Me rea tseba hore esita le lithapelo tsa Jesu tse khutšoanyane li ne li amoheleha ka ho feletseng ho Molimo.
4 Nka hore re na le tokelo ea ho emela lelapa ka thapelo pele ho lijo. Thapelo e joalo e ka ba e batlang e le khutšoanyane—empa eng kapa eng e buuoang e lokela ho akarelletsa polelo ea ho lebohela lijo tseo. Haeba re rapela phatlalatsa pele ho seboka sa Bokreste kapa ka morao ho sona, ha ho hlokahale hore re etse thapelo e telele e akarelletsang lintlha tse ngata. Jesu o ile a nyatsa bangoli bao ‘ka boikaketsi ba neng ba etsa lithapelo tse telele.’ (Luka 20:46, 47) Le ka mohla motho ea tšabang Molimo o ne a ke ke a rata ho etsa joalo. Leha ho le joalo, ka linako tse ling thapelo ea phatlalatsa e batlang e le telele e ka ’na ea e-ba e loketseng. Ka mohlala, moholo ea khethiloeng hore a etse thapelo e koalang kopanong o lokela ho nahana ka eona esale pele ’me a ka ’na a lakatsa ho bua ka lintlha tse ’maloa. Empa, esita le thapelo e joalo ha ea lokela ho ba e telele ka ho tlōlisang.
Atamela Molimo ka Tlhompho
5. (a) Re lokela ho hopola’ng ha re rapela phatlalatsa? (b) Ke hobane’ng ha re lokela ho rapela ka tsela e bontšang seriti le tlhompho?
5 Ha re rapela phatlalatsa re lokela ho hopola hore ha re bue le batho. Ho e-na le hoo, re batho ba baetsalibe ba etsang kōpo e matla ho ’Musi Morena Jehova. (Pesaleme ea 8:3-5, 9; 73:28) Ka lebaka leo re lokela ho bontša tšabo e nang le tlhompho ea ho mo khopisa ka seo re se buang le kamoo re se buang kateng. (Liproverbia 1:7) Mopesaleme Davida o ile a bina: “Empa ’na, ka mohau oa hao o moholo, ke kena ka tlung ea hao, ke khumama ka tšabo tempeleng ea hao e khethehileng.” (Pesaleme ea 5:7) Haeba re e-na le boikutlo boo, re tla itlhalosa joang ha re kōpuoa ho rapela phatlalatsa sebokeng sa Lipaki tsa Jehova? Ha e le hantle, haeba re ne re bua le morena oa motho, re ne re tla etsa seo ka tlhompho le ka seriti. Na lithapelo tsa rōna ha lia lokela ho ba le seriti le tlhompho ka ho eketsehileng, kaha re rapela Jehova, “Morena oa bosafeleng”? (Tšenolo 15:3) Ka hona, ha re rapela re tla qoba lipolelo tse kang, “Lumela Jehova,” “Amohela lerato la rōna” kapa “Sala hantle.” Mangolo a bontša hore ha ho mohla Mora oa Molimo ea tsoetsoeng a ’notši, Jesu Kreste, a kileng a bua le Ntate oa hae oa leholimo ka tsela eo.
6. Re lokela ho hopola’ng ha re ‘atamela terone ea mosa o sa tšoanelang’?
6 Pauluse o itse: “A re atameleng ka bolokolohi ba puo teroneng ea mosa o sa tšoanelang.” (Baheberu 4:16) Re ka atamela Jehova ka “bolokolohi ba puo” ho sa tsotellehe boemo ba rōna ba boetsalibe ka lebaka la tumelo ea rōna sehlabelong sa thekollo sa Jesu Kreste. (Liketso 10:42, 43; 20:20, 21) Empa, “bolokolohi ba puo” bo joalo ha bo bolele hore re qoqa le Molimo; leha e le hona hore re lokela ho bua lintho tse bontšang ho hloka tlhompho ho eena. Hore lithapelo tsa rōna tsa phatlalatsa li thabise Jehova, li lokela ho etsoa ka tlhompho le seriti tse loketseng, ’me e ne e ke ke ea e-ba ho loketseng ho li sebelisa ho etsa litsebiso, ho eletsa batho ka bomong kapa ho laea bamameli.
Rapela ka Moea o Ikokobelitseng
7. Solomone o ile a bontša boikokobetso joang ha a ne a rapela nehelong ea tempele ea Jehova?
7 Ebang re rapela phatlalatsa kapa lekunutung, molao-motheo oa bohlokoa oa Mangolo oo re lokelang ho o hopola ke hore re lokela ho bontša boikutlo ba boikokobetso lithapelong tsa rōna. (2 Likronike 7:13, 14) Morena Solomone o ile a bontša boikokobetso thapelong ea hae ea phatlalatsa ha ho neheloa tempele ea Jehova e Jerusalema. Solomone o ne a sa tsoa phetha o mong oa mehaho e metle ka ho fetisisa e kileng ea hahoa lefatšeng. Empa, ka boikokobetso o ile a rapela: “Na kannete Molimo o tla lula lefatšeng? Bona! Maholimo, e, leholimo la maholimo, ka booona a ke ke a u lekana; joale, ntlo ee eo ke e hahileng e nyenyane hakaakang!”—1 Marena 8:27, NW.
8. Boikokobetso bo bontšoa ka litsela life tse ling thapelong ea phatlalatsa?
8 Joaloka Solomone, re lokela ho ikokobetsa ha re emela ba bang ka thapelo phatlalatsa. Le hoja re lokela ho qoba ho utloahala eka rea halalela, boikokobetso bo ka bontšoa ka molumo oa mantsoe a rōna. Lithapelo tse bontšang boikokobetso ha li na lipolelo tsa boikakaso kapa tsa boikaketsi. Ha li lebise tlhokomelo ho motho ea rapelang, empa li lebisa tlhokomelo ho Eo ho buisanoang le eena. (Matheu 6:5) Boikokobetso bo boetse bo bontšoa ka seo re se buang thapelong. Haeba re rapela ka boikokobetso, re ke ke ra utloahala eka re batla hore Molimo a etse lintho tse itseng ka tsela ea rōna. Ho e-na le hoo, re tla kōpa Jehova ka tieo hore a nke bohato ka tsela e lumellanang le thato ea hae e khethehileng. Mopesaleme o ile a beha mohlala oa boikutlo bo loketseng ha a ne a kōpa ka tieo: “Oho! Jehova, ka kōpo, u fele u pholose! Oho! Jehova, ka kōpo, u fele u fane ka katleho!”—Pesaleme ea 118:25, NW; Luka 18:9-14.
Rapela ho Tloha Pelong
9. Jesu o ile a fana ka keletso efe e ntle e fumanoang ho Matheu 6:7, hona e ka sebelisoa joang?
9 E le hore lithapelo tsa rōna tsa phatlalatsa kapa tsa lekunutung li thabise Jehova, li lokela ho tloha pelong. Kahoo, re ke ke ra pheta-pheta mantsoe a le mang feela a thapelo re sa nahane ka seo re se buang. Thutong ea hae ea Thabeng, Jesu o ile a eletsa: “Ha u rapela, u se ke ua pheta-pheta lintho tse tšoanang, feela joalokaha batho ba lichaba ba etsa, kaha [ka phoso] ba nahana hore ba tla utluoa ka lebaka la ho sebelisa ha bona mantsoe a mangata.” Ka mantsoe a mang, Jesu o itse: “Le se ke la pheremetsa; le se ke la pheta-pheta mantsoe a lefeela.”—Matheu 6:7; mongolo o botlaaseng ba leqephe ho NW.
10. Ke hobane’ng ha e ne e tla ba ho loketseng ho rapella ntho e le ’ngoe ka makhetlo a fetang le le leng?
10 Ka sebele, ho ka ’na ha hlokahala hore re rapelle ntho e le ’ngoe ka makhetlo-khetlo. Seo ha sea fosahala hobane Jesu o ile a phehella: “Le ’ne le tsoele pele ho kōpa, ’me le tla fuoa; le ’ne le tsoele pele ho batla, ’me le tla fumana; le ’ne le tsoele pele ho kokota, ’me le tla buleloa.” (Matheu 7:7) Mohlomong ho hlokahala Holo ea ’Muso e ncha kaha Jehova o atlehisa mosebetsi oa boboleli sebakeng sa heno. (Esaia 60:22) E ne e tla ba ho loketseng ho tsoela pele ho bua ka tlhoko ena ha re rapela lekunutung kapa ha re rapela phatlalatsa libokeng tsa batho ba Jehova. Ho etsa joalo ho ne ho ke ke ha bolela hore re “pheta-pheta mantsoe a lefeela.”
Hopola ho Leboha le ho Rorisa
11. Bafilippi 4:6, 7 e sebetsa joang thapelong ea lekunutung le ea phatlalatsa?
11 Batho ba bangata ba rapella feela ho kōpa ntho e itseng, empa lerato la rōna ho Jehova Molimo le lokela ho re susumelletsa ho mo leboha le ho mo rorisa thapelong ea lekunutung le ea phatlalatsa. Pauluse o ile a ngola: “Le se ke la tšoenyeha ka ntho leha e le efe, empa nthong e ’ngoe le e ’ngoe ka thapelo le thapeli hammoho le liteboho likōpo tsa lōna tse matla a li tsebisoe Molimo; ’me khotso ea Molimo e fetang monahano oohle e tla lebela lipelo tsa lōna le matla a lōna a kelello ka Kreste Jesu.” (Bafilippi 4:6, 7) E, ho phaella lithapeling le likōpong tse matla, re lokela ho leboha Jehova bakeng sa litlhohonolofatso tsa moea le tsa nama. (Liproverbia 10:22) Mopesaleme o ile a bina: “U abele Molimo liteboho tsa hao, u lefe likano tsa hao ho Mookameli ea phahameng!” (Pesaleme ea 50:14) ’Me pina ea thapelo ea Davida e ne e akarelletsa mantsoe ana a amang maikutlo: “Ke tla rorisa lebitso la Molimo ka lithoko, ke le tumise ka lipoko.” (Pesaleme ea 69:30) Na ha rea lokela ho etsa se tšoanang thapelong ea phatlalatsa le ea lekunutung?
12. Pesaleme ea 100:4, 5 e phethahala joang kajeno, ka lebaka leo re ka leboha le ho rorisa Molimo ka eng?
12 Mabapi le Molimo, mopesaleme o ile a bina: “Kenang likhorong tsa hae ka liteboho, le mabaleng a hae ka lithoko! Mo leboheng, le rorise lebitso la hae! Hobane Jehova o molemo, mohau oa hae o hlola ka ho sa eeng kae, le botšepehi ba hae melokong le melokong.” (Pesaleme ea 100:4, 5) Kajeno, batho ba lichaba tsohle ba kena mabaleng a sehalalelo sa Jehova, ’me re ka mo rorisa le ho mo leboha bakeng sa sena. Na u leboha Molimo ka Holo ea ’Muso ea heno le ho bontša kananelo ea hao ka hore u be teng moo kamehla hammoho le ba mo ratang? Ha u le moo, na u phahamisa lentsoe la hao ka pelo eohle ha u binela Ntate oa rōna ea lerato lipina tsa thoriso le teboho?
Le ka Mohla U se ke Ua Ikutloa U le Lihlong ho Rapela
13. Ke mohlala ofe oa Mangolo o bontšang hore re lokela ho etsa thapeli ho Jehova esita leha re ikutloa re sa tšoanelehe ka lebaka la boikutlo ba ho ba molato?
13 Esita le haeba re ikutloa re sa tšoanelehe kahobane re ikutloa re le molato, re lokela ho retelehela ho Molimo ka thapeli e tiileng. Ha Bajuda ba ne ba entse sebe ka ho nka basali ba balichaba, Esdrase o ile a khumama, a otlollela liatla tsa hae ho Molimo, ’me a rapela ka boikokobetso: “Oho, Molimo oa ka, ke soabile, ke lihlong tsa ho emisetsa sefahleho sa ka ho uena, Molimo oa ka! Hobane makhopo a rōna a totile ho feta lihlooho tsa rōna, molato oa rōna o hōlile ho ea fihla maholimong. Ha e sa le le mehleng ea bo-ntat’a rōna, re bile molato haholo ho fihlela kajeno. . . . Ha e le moo re se re kile ra hlaheloa ke tse ngata ka baka la ketso tsa rōna tse mpe, le ka baka la melato e meholo ea rōna, kanthe uena, Molimo oa rōna, u kile ua re hauhela, u sa ka ua re otla ka kotlo e lekanang le makhopo a rōna u bile u re boloketse masala a makalo, re boela re tlōla melao ea hao joang, le ho itsoakanya le lichaba tseo tse manyala, ka ho nyallana le tsona? Na u ke ke ua re halefela, u be u re timetse, u se ke ua siea le masala, leha e le ea phonyohang na? Oho, Jehova, Molimo oa Iseraele, u lokile; rōna re setse re le masala a phonyohileng joalo ka ha ho le joalo le kajeno. Ke rōna mona, re eme pel’a hao re le molato; athe ha ho ea ka emang pel’a hao a le joalo!”—Esdrase 9:1-15; Deuteronoma 7:3, 4.
14. Joalokaha ho bontšitsoe mehleng ea Esdrase, ho hlokahala eng e le hore Molimo a ka re tšoarela?
14 E le hore Molimo a ka re tšoarela, ha re ipolela ho eena re lokela hore ebe re bakile re bile re beha “litholoana tse tšoanelang pako.” (Luka 3:8; Jobo 42:1-6; Esaia 66:2) Mehleng ea Esdrase, boikutlo ba pako bo ne bo tsamaea le boiteko ba ho lokisa phoso ka ho leleka basali ba lichaba lisele. (Esdrase 10:44, NW; bapisa le 2 Bakorinthe 7:8-13.) Haeba re batla hore Molimo a re tšoarele phoso e tebileng, a re ipoleleng ka thapelo e etsoang ka boikokobetso ’me re hlahise litholoana tse tšoanelang pako. Moea oa pako le takatso ea ho lokisa phoso li ka boela tsa re susumelletsa ho batla thuso ea moea ho baholo ba Bakreste.—Jakobo 5:13-15.
Fumana Matšeliso Thapelong
15. Phihlelo ea Anna e bontša joang hore re ka fumana matšeliso thapelong?
15 Ha lipelo tsa rōna li le bohloko ka lebaka le itseng, re ka fumana matšeliso thapelong. (Pesaleme ea 51:17; Liproverbia 15:13) Ho bile joalo ka Anna ea tšepahalang. O ne a phela nakong eo ka eona malapa a maholo a neng a atile Iseraele, empa o ne a se na bana. Monna oa hae, Elkana, o ne a e-na le bara le barali ka mosali e mong, Peninna, ea neng a soma Anna ka ho ba nyopa. Anna o ile a rapela ka tieo ’me a tšepisa hore ha a ka hlohonolofatsoa ka mora, ‘o ne a tla mo fa Jehova matsatsi ’ohle a bophelo ba hae.’ A tšelisitsoe ke thapelo ea hae le ke mantsoe a Moprista ea Phahameng Eli, Anna ‘ha aa ka a hlola a tšoenyeha.’ O ile a beleha moshanyana eo a ileng a mo reha lebitso la Samuele. Hamorao, o ile a nehelana ka eena sehalalelong sa Jehova bakeng sa tšebeletso. (1 Samuele 1:9-28, NW) Kaha o ne a leboha mosa oa Molimo ho eena, o ile a etsa thapelo ea teboho—e neng e roka Jehova e le eo ho seng ea lekanang le eena. (1 Samuele 2:1-10) Joaloka Anna, re ka fumana matšeliso thapelong, re kholisehile hore Molimo o araba likōpo tsohle tse tumellanong le thato ea hae. Ha re tšollela lipelo tsa rōna ho eena, a re ‘se keng ra hlola re tšoenyeha,’ hobane o tla tlosa moroalo oa rōna kapa a re nolofaletse ho o jara.—Pesaleme ea 55:22.
16. Joalokaha ho bontšitsoe tabeng ea Jakobo, ke hobane’ng ha re lokela ho rapela ha re tletse tšabo kapa re tšoenyehile?
16 Haeba boemo bo itseng bo tlisa tšabo, pelo e bohloko kapa matšoenyeho, a re se keng ra hlōleha ho retelehela ho Molimo ho kōpa matšeliso ka thapelo. (Pesaleme ea 55:1-4) Jakobo o ne a tletse tšabo ha a le mothating oa ho kopana le mor’abo ea fetohileng sera, Esau. Empa Jakobo o ile a rapela: “Molimo oa ntate Abrahama, Molimo oa ntate Isaaka, Jehova ea itseng ho ’na: Boela fatšeng la heno, le ho ba heno, ’me ke tla u etsa hantle! ha kea lekanoa ke mehau ea hao kaofela, le ke litšepiso tsohle tsa hao tseo u tšepisitseng mohlanka oa hao ka tsona, kanthe ke ne ke tšele Jordane ena ke na le lere la ka feela, ’me joale ke fetohile matšoele a le mabeli. Oho, u ntoele letsohong la moholoane oa ka, letsohong la Esau, hobane kea mo tšaba, hoba a ka tla a mpolaea, le ’m’a bana le bana. Kanthe ua na ua re: Ruri ke tla u etsa hantle, ’me ke tla atisa litloholo tsa hao, li be ka ka lehlabathe la leoatle le sitoang ho baloa ka baka la bongata ba lona.” (Genese 32:9-12) Esau ha aa ka a futuhela Jakobo le ba tsamaeang le eena. Kahoo Jehova o ile a fela a ‘etsa Jakobo hantle’ ketsahalong eo.
17. Tumellanong le Pesaleme ea 119:52, thapelo e ka re tšelisa joang ha re lekoa ka liteko tse matla?
17 Ha re etsa lithapeli tsa rōna, re ka ’na ra tšelisoa ke ho hopola lintho tse boletsoeng Lentsoeng la Molimo. Pesalemeng e telele ka ho fetisisa—eo e leng thapelo e monate e tsamaisanang le ’mino—e ka ’na eaba Khosana Hezekia ke eena ea ileng a bina: “Jehova, ke elelloa likahlolo tsa hao tsa khale, kea itšelisa.” (Pesaleme ea 119:52) Thapelong e etsoang ka boikokobetso ha re lekoa ka liteko tse matla, re ka ’na ra hopola molao-motheo kapa molao o itseng oa Bibele o ka re thusang ho phehella tsela e fellang ka kholiseho e tšelisang ea hore re thabisa Ntate oa rōna oa leholimo.
Ba Tšepahalang ba Phehella Thapelong
18. Ke hobane’ng ha ho ka boleloa hore ‘e mong le e mong ea tšepahalang o tla rapela Molimo’?
18 Bohle ba tšepahalang ho Jehova Molimo ba tla ‘phehella thapelong.’ (Baroma 12:12) Pesalemeng ea 32, eo e ka ’nang eaba e ngotsoe ka mor’a hore Davida a etse sebe le Bathe-sheba, o ile a hlalosa bohloko ba hae bo otlang pelo bo tlisitsoeng ke ho hlōleha ho kōpa tšoarelo le ho imoloha hoo pako le ho ipolela ho Molimo li ileng tsa mo tlisetsa hona. Eaba Davida oa bina: “Ka lebaka lena [hobane Jehova o tšoarela ba bakileng e le kannete] e mong le e mong ea tšepahalang o tla u rapela ka nako eo u ka fumanoang ka eona feela.”—Pesaleme ea 32:6, NW.
19. Ke hobane’ng ha re lokela ho rapela re phahamisitse matsoho a tšepahalang?
19 Haeba re nka kamano ea rōna le Jehova Molimo e le ea bohlokoa, re tla rapella mohau oa hae motheong oa sehlabelo sa thekollo sa Jesu. Ka tumelo, re ka atamela terone ea mosa o sa tšoanelang ka bolokolohi ba puo bakeng sa ho fumana mohau le thuso e tlang ka nako e nepahetseng. (Baheberu 4:16) Empa ho na le mabaka a mangata haholo a ho rapela! Ka lebaka leo a re ‘rapeleng re sa phetse’—re rapele hangata ka mantsoe a thoriso le teboho tse eang ho Molimo tse tlohang pelong. (1 Bathesalonika 5:17) Bosiu le motšehare, a re rapeleng, re phahamisa matsoho a tšepahalang.
U ne U Tla Araba Joang?
◻ Ho nahana ka thapelo ea phatlalatsa esale pele ho na le molemo ofe?
◻ Ke hobane’ng ha re lokela ho rapela ka tsela e nang le tlhompho le seriti?
◻ Re lokela ho bontša moea ofe ha re rapela?
◻ Ha re rapela, ke hobane’ng ha re lokela ho hopola ho leboha le ho rorisa?
◻ Bibele e bontša joang hore re ka fumana matšeliso thapelong?
[Setšoantšo se leqepheng la 12]
Morena Solomone o ile a bontša boikokobetso thapelong ea hae ea phatlalatsa ha tempele ea Jehova e neheloa
[Setšoantšo se leqepheng la 18]
Joaloka Anna, u ka fumana matšeliso thapelong