Tšaba Jehova ’me U Thabele Bophelo
“Tšabang Jehova, lōna bahalaleli ba hae, etsoe ba mo tšabang ha ba haelloe ke letho.”—PESALEME EA 34:9.
1, 2. (a) Bokreste-’mōtoana bo ’nile ba talima ho tšaba Molimo ka litsela life tse sa tšoaneng? (b) Hona joale re tla tšohla lipotso life?
HANGATA baruti ba likereke tsa Bokreste-’mōtoana ba rutang batho hore ba tšabe Molimo ba ruta seo ka thuto eo e seng ea Mangolo ea hore Molimo o hlokofatsa baetsalibe ka ho sa feleng mollong o tukang oa lihele. Thuto eo e khahlanong le seo Bibele e se rutang ha e re Jehova ke Molimo ea lerato le oa toka. (Genese 3:19; Deuteronoma 32:4; Baroma 6:23; 1 Johanne 4:8) Baruti ba bang ba Bokreste-’mōtoana bona ba etsa se fapaneng le seo. Ha ho mohla ba buang ka ho tšaba Molimo. Ho e-na le hoo, ba ruta hore Molimo o lumella ntho e ’ngoe le e ’ngoe ebile o amohela motho e mong le e mong ho sa tsotellehe hore na o phela bophelo ba mofuta ofe. Thuto eo le eona ha e rutoe ke Bibele.—Bagalata 5:19-21.
2 Ha e le hantle, Bibele e re khothalletsa hore re tšabe Molimo. (Tšenolo 14:7) ’Nete eo e etsa hore motho a ipotse lipotso tse itseng. Ke hobane’ng ha Molimo ea lerato a batla hore re mo tšabe? Molimo o batla tšabo ea mofuta ofe? Ho tšaba Molimo ho ka re tsoela molemo joang? Re tla araba lipotso tsena ha re ntse re tsoela pele ho tšohla Pesaleme ea 34.
Lebaka la ho Tšaba Molimo
3. (a) U talima taelo e reng re tšabe Molimo joang? (b) Ke hobane’ng ha batho ba tšabang Jehova ba thabile?
3 Joalokaha Jehova e le ’Mōpi ebile e le Morena ’Musi oa bokahohleng, o tšoaneloa ke ho tšajoa. (1 Petrose 2:17) Leha ho le joalo, tšabo ena hase tšabo e feteletseng joalokaha eka ho tšajoa molimo ea khopo. Ke tšabo e nang le tlhompho ka lebaka la seo Jehova a leng sona. Hape ke ho tšaba ho mo khopisa. Tšabo ena ea bomolimo ke ea boleng bo phahameng le e hlasimollang, ha e tetebetse kapa hona ho tšosa batho. Jehova, “Molimo ea thabileng,” o batla hore batho bao a ba bōpileng ba thabele bophelo. (1 Timothea 1:11) Leha ho le joalo, re tlameha ho phela tumellanong le melao ea Molimo e le hore re thabele bophelo. Ho batho ba bangata, sena se bolela hore ba fetole tsela ea bona ea bophelo. Mantsoe ana a mopesaleme Davida a phethahala ho bohle ba etsang liphetoho tse hlokahalang: “Latsoang ’me le bone hore Jehova o molemo; ho thaba monna ea shahlileng ea tšabelang ho eena. Tšabang Jehova, lōna bahalaleli ba hae, etsoe ba mo tšabang ha ba haelloe ke letho.” (Pesaleme ea 34:8, 9) Kaha bohle ba tšabang Jehova ba na le kamano e ntle le Molimo, ha ba haelloe ke ntho leha e le efe ea bohlokoa.
4. Davida le Jesu ba ile ba tiisa eng?
4 Hlokomela hore Davida o ile a tlotla banna ba hae ka ho ba bitsa “bahalaleli,” joalokaha ho ne ho hlile ho le joalo mehleng ea hae. E ne e le litho tsa sechaba se halalelang sa Molimo. Hape ba ne ba behile bophelo ba bona kotsing ka ho latela Davida. Le hoja ba ne ba baleha Morena Saule, Davida o ne a kholisehile hore Jehova o ne a tla tsoela pele ho ba fa lintho tsa motheo tseo ba neng ba li hloka. Davida o ile a ngola tjena: “Litaoana tse moetse li fumane ho honyenyane ’me li lapile; empa ha e le ba batlang Jehova, ba ke ke ba haelloa ke letho le molemo.” (Pesaleme ea 34:10) Jesu le eena o ile a tiisetsa balateli ba hae hore ho tla etsahala ntho e tšoanang.—Matheu 6:33.
5. (a) Bongata ba balateli ba Jesu e ne e le batho ba boemo bofe? (b) Jesu o ile a fana ka keletso efe tabeng ea tšabo?
5 Batho ba bangata ba neng ba mamela Jesu e ne e le ba sehlopha sa Bajuda se sotlehileng le sa boemo bo tlaase. Kahoo, Jesu o ile ‘a ba hauhela, hobane ba ne ba sohlokehile ’me ba qhalakane joaloka linku tse se nang molisa.’ (Matheu 9:36) Na batho bao ba boemo bo tlaase ba ne ba tla ba le sebete sa ho latela Jesu? Hore ba mo latele, ba ne ba tla lokela ho tšaba Jehova, eseng batho. Jesu o itse: “Le se ke la tšaba ba bolaeang ’mele ’me ka mor’a moo ba sa khone ho etsa letho le fetang moo. Empa ke tla le bontša eo le lokelang ho mo tšaba: Tšabang eo ka mor’a ho bolaea a nang le matla a ho lahlela Gehena. E, kea le bolella, le tšabe Enoa. Lirobele tse hlano li rekisoa ka lichelete tsa tšepe tse peli tsa bohlokoa bo bonyenyane, na ha ho joalo? Empa leha ho le joalo ha ho le se seng sa tsona se lebaloang ka pel’a Molimo. Empa esita le moriri oa lihlooho tsa lōna kaofela o baliloe. Le se ke la tšaba; le ba bohlokoa ho feta lirobele tse ngata.”—Luka 12:4-7.
6. (a) Ke mantsoe afe a Jesu a ’nileng a matlafatsa Bakreste? (b) Ke hobane’ng ha Jesu e le mohlala o motlehali oa ho bontša tšabo ea bomolimo?
6 Ha lira tsa batho ba tšabang Jehova li ba hatella hore ba khaotse ho sebeletsa Molimo, ba hopola keletso ena ea Jesu e reng: “E mong le e mong ea bolelang hore o kopanong le ’na ka pel’a batho, Mor’a motho le eena o tla bolela hore o kopanong le eena ka pel’a mangeloi a Molimo. Empa ea ntatolang ka pel’a batho o tla latoloa ka pel’a mangeloi a Molimo.” (Luka 12:8, 9) Mantsoe ao a ’nile a matlafatsa Bakreste, haholo-holo linaheng tseo ho tsona borapeli ba ’nete bo thibetsoeng. Ba tsoela pele ho rorisa Jehova ka mokhoa o hlokolosi libokeng tsa Bokreste le tšebeletsong ea bona ea phatlalatsa. (Liketso 5:29) Jesu ke mohlala o motle ka ho fetisisa oa ho bontša ‘tšabo ea bomolimo.’ (Baheberu 5:7) Lentsoe la boprofeta le ile la bua ka eena tjena: “Moea oa Jehova o tla lula holim’a hae, moea . . . oa ho tšaba Jehova; ’me o tla thabela ho tšaba Jehova.” (Esaia 11:2, 3) Kahoo, ke Jesu ea tšoanelehang ka ho fetisisa ho re ruta melemo ea tšabo ea bomolimo.
7. (a) Ha e le hantle, Bakreste ba nka bohato bofe tumellanong le memo e tšoanang le eo Davida a ileng a e etsa? (b) Batsoali ba ka latela mohlala o motle oa Davida joang?
7 Ha e le hantle, bohle ba latelang mohlala oa Jesu le ba mamelang lithuto tsa hae, ba nka bohato tumellanong le memo e tšoanang le eo Davida a ileng a e etsa: “Tloong, lōna bara, le ’mamele; ke tla le ruta ho tšaba Jehova.” (Pesaleme ea 34:11) Ho ne ho loketse hore Davida a bitse banna ba hae “bara” hobane ba ne ba mo nka e le moeta-pele oa bona. Davida ka boeena o ne a thusa balateli ba hae moeeng e le hore ba ka momahana ’me ba fumana mohau oa Molimo. Ka sebele oo ke mohlala o motle hakaakang bakeng sa batsoali ba Bakreste! Jehova o ba file matla a ho “hōlisa [bara le barali ba bona] ka taeo le kelello e laoloang ke Jehova.” (Baefese 6:4) Ka ho tšohla litaba tsa moea letsatsi le letsatsi le ka ho ba khannela thuto ea Bibele ea kamehla, batsoali ba thusa bana ba bona ho tšaba Jehova le ho thabela bophelo.—Deuteronoma 6:6, 7.
Tsela ea ho Phela ka Tšabo ea Molimo
8, 9. (a) Ke hobane’ng ha ho phela ka ho tšaba Molimo e le ntho e khahlisang? (b) Ho sireletsa maleme a rōna ho akarelletsa eng?
8 Joalokaha ho boletsoe pejana, ho tšaba Jehova ha ho re time thabo. Davida o ile a botsa potso ena: “Ke mang ea thabelang bophelo, ea ratang matsatsi a lekaneng hore a bone se molemo?” (Pesaleme ea 34:12) Ho hlakile hore ke habohlokoa hore motho a tšabe Jehova e le hore a thabele bophelo ka nako e telele ’me a bone se molemo. Leha ho le joalo, ho bonolo hore motho a re, “Ke tšaba Molimo.” Empa ha ho bonolo ho bontša ka liketso hore re tšaba Molimo. Ka lebaka leo, Davida o ile a tsoela pele ho hlalosa hore na ke joang re ka bontšang tšabo ea bomolimo.
9 “Sireletsang maleme a lōna ho se sebe, le melomo ea lōna le e sireletse ho bueng thetso.” (Pesaleme ea 34:13) Moapostola Petrose o ile a bululeloa hore a qotse karolo ena ea Pesaleme ea 34 ka mor’a ho eletsa Bakreste hore ba bontšane boikutlo bo mofuthu ba bara ba motho. (1 Petrose 3:8-12) Ho sireletsa maleme a rōna ho se sebe ho bolela hore re tla qoba ho jala lesebo le kotsi. Ho fapana le hoo, re tla loanela hore ka linako tsohle re hahe batho ba bang ha re bua le bona. Ho feta moo, re tla loanela ho ba sebete ’me re bue ’nete.—Baefese 4:25, 29, 31; Jakobo 5:16.
10. (a) Hlalosa hore na ho furalla se sebe ho bolela eng. (b) Ho etsa se molemo ho akarelletsa eng?
10 “Furallang se sebe, ’me le etse se molemo; batlang ho fumana khotso, ’me le e phehelle.” (Pesaleme ea 34:14) Re qoba lintho tseo Molimo a li nyatsang, joaloka boitšoaro bo bobe ba ho kopanela liphate, litšoantšo tse manyala tse hlephisang boitšoaro, bosholu, ho sebelisana le meea, pefo, botahoa le ho sebelisa lithethefatsi hampe. Re boetse re qoba boithabiso bo bontšang lintho tse joalo tse manyala. (Baefese 5:10-12) Ho fapana le hoo, re qeta nako ea rōna re etsa se molemo. Ntho e molemo ka ho fetisisa eo re ka e etsang ke ho kopanela kamehla mosebetsing oa ho bolela ka ’Muso le oa ho etsa barutuoa, re thusa batho ba bang hore ba pholohe. (Matheu 24:14; 28:19, 20) Ho etsa se molemo ho boetse ho akarelletsa ho lokisetsa liboka tsa Bokreste le ho ba teng ho tsona, ho tšehetsa ka lichelete mosebetsi oa lefatše lohle, ho hlokomela Holo ea ’Muso le ho ameha ka lintho tseo Bakreste ba futsanehileng ba li hlokang.
11. (a) Ke joang Davida a ileng a etsa seo a neng a se bolella batho ba bang ka khotso? (b) U ka etsa eng e le hore u ‘phehelle khotso’ ka phuthehong?
11 Davida o ile a beha mohlala o motle oa ho phehella khotso. O ile a ba le menyetla e ’meli ea ho bolaea Saule. Empa liketsahalong tseo ka bobeli, o ile a ithiba hore a se ke a ba mabifi ’me hamorao a bua le morena eo ka tlhompho, a e-na le tšepo ea ho tsosolosa maqhama a khotso. (1 Samuele 24:8-11; 26:17-20) Kajeno ho ka etsoa’ng ha ho bonahala eka boemo bo itseng bo ka luka khotso ka phuthehong? Re lokela ho ‘batla ho fumana khotso, ’me re e phehelle.’ Kahoo, ha re bona hore likamano tsa rōna le molumeli-’moho le rōna ha li sa le ntle, re mamela keletso ea Jesu e reng: “Etsa khotso le mor’eno pele.” Ebe re tsoela pele ho phetha likarolo tse ling tsa borapeli ba ’nete.—Matheu 5:23, 24; Baefese 4:26.
Ho Tšaba Molimo ho na le Meputso e Mengata
12, 13. (a) Hona joale ba tšabang Molimo ba rua melemo efe? (b) Haufinyane barapeli ba tšepahalang ba tla fumana moputso ofe o hlollang?
12 “Mahlo a Jehova a talimile ba lokileng, o sekehela mohoo oa bona o kōpang thuso tsebe.” (Pesaleme ea 34:15) Tlaleho ea tsela eo Molimo a ileng a sebelisana le Davida ka eona e bontša hore mantsoe ao ke ’nete. Kajeno, re ba le thabo e tlohang pelong le khotso e tebileng hobane rea tseba hore Jehova o re hlokometse. Re kholisehile hore ka linako tsohle o tla re fa lintho tseo re li hlokang, esita le haeba re sithabetse haholo. Rea tseba hore, joalokaha ho boletsoe esale pele, haufinyane barapeli bohle ba ’nete ba tla hlaseloa ke Gogo oa Magogo ebe ho fihla “letsatsi le leholo le le tšosang la Jehova.” (Joele 2:11, 31; Ezekiele 38:14-18, 21-23) Ho sa tsotellehe hore na ka nako eo re tla tobana le boemo bofe, mantsoe a Davida a tla phethahala ho rōna, a reng: “Ba ile ba hoeletsa, ’me Jehova a utloa, a ba lopolla mahlomoleng ’ohle a bona.”—Pesaleme ea 34:17.
13 E tla ba ho thabisang hakaakang ka nako eo ha re bona Jehova a phahamisa lebitso la hae le leholo! Ho feta leha e le neng pele, lipelo tsa rōna li tla tlala tšabo e nang le tlhompho, ’me bahanyetsi bohle ba tla felisoa ka tsela e tlotlollang. “Sefahleho sa Jehova se khahlanong le ba etsang se sebe, ho felisa ho boleloa ha bona lefatšeng.” (Pesaleme ea 34:16) E tla ba moputso o mokaakang ha re lopolloa ka tsela e hlollang joalo ’me re kena lefatšeng le lecha la Molimo la ho loka!
Litšepiso Tse re Thusang ho Mamella
14. Ke eng e tla re thusa ho mamella ho sa tsotellehe litlokotsi?
14 Khabareng, ho hlokahala mamello e le hore re tsoele pele ho mamela Jehova lefatšeng lena le bolileng le le tletseng bora. Tšabo ea bomolimo e re thusa haholo hore re be batho ba mamelang. Ka lebaka la linako tse mahlonoko tseo re phelang ho tsona, bahlanka ba bang ba Jehova ba hlaheloa ke mathata a tšabehang haholo ao ho ka thoeng a ba roba lipelo le ho ba sithabetsa moeeng. Leha ho le joalo, ba ka kholiseha ka ho feletseng hore haeba ba itšetleha ka Jehova, o tla ba thusa ho mamella. Mantsoe a Davida a tšelisa e le kannete ha a re: “Jehova o haufi le ba lipelo li robehileng; o pholosa ba sithabetseng moeeng.” (Pesaleme ea 34:18) Davida o ile a tsoela pele ho bua mantsoe ana a khothatsang: “Litlokotsi tsa ea lokileng li ngata, empa Jehova o mo lopolla ho tsona kaofela.” (Pesaleme ea 34:19) Ho sa tsotellehe hore na re hlaheloa ke litlokotsi tse ngata hakae, Jehova o na le matla a ho re lopolla ho tsona.
15, 16. (a) Nakoana ka mor’a ho qapa Pesaleme ea 34, Davida o ile a utloela ka tlokotsi efe? (b) Ke eng e tla re thusa ho mamella liteko?
15 Nakoana ka mor’a ho qapa Pesaleme ea 34, Davida o ile a utloela ka tlokotsi e neng e oetse baahi ba Nobe, hore Saule o ile a ba bolaea ka sehlōhō ho akarelletsa le baprista ba bangata. E tlameha ebe Davida o ile a sithabela maikutlo hakaakang ha a hopola hore Saule o loloma ke bohale tjena ka lebaka la hore Davida o ile a fapohela Nobe! (1 Samuele 22:13, 18-21) Ha ho pelaelo hore Davida o ile a itšetleha ka Jehova hore a mo thuse, ’me ka sebele o ile a tšelisoa ke tšepo ea tsoho ea “ba lokileng” e tla etsahala nakong e tlang.—Liketso 24:15.
16 Kajeno, le rōna re matlafatsoa ke tšepo ea tsoho. Rea tseba hore ha ho letho leo lira tsa rōna li ka le etsang le ka re lematsang ka ho sa feleng. (Matheu 10:28) Davida o ile a bua a kholisehile ka tsela e tšoanang, ha a ne a re: “O lebela masapo ’ohle a [ea lokileng]; ha ho le le leng la ’ona le robehileng.” (Pesaleme ea 34:20) Temana eo e ile ea phethahala ka tsela ea sebele ho Jesu. Le hoja Jesu a ile a bolaoa ka sehlōhō, ha ho le le leng la masapo a hae le ileng la “silakanngoa.” (Johanne 19:36) Pesaleme ea 34:20 e phethahala ka tsela e pharalletseng hobane e re kholisa hore ho sa tsotellehe hore na Bakreste ba tlotsitsoeng le metsoalle ea bona ea “linku tse ling” ba hlaheloa ke eng, ba ke ke ba lematsoa ka ho sa feleng. Ka puo ea tšoantšetso, ha ho mohla masapo a bona a tla ke a silakanngoe.—Johanne 10:16.
17. Batho ba hloileng batho ba Jehova ba sa bake ba tla hlaheloa ke tlokotsi ea mofuta ofe?
17 Boemo ba ba khopo bo fapane le ba ba lokileng. Haufinyane ba tla kotula bobe boo ba bo jetseng. “Tlokotsi e tla bolaea ea khopo; ba hloileng ea lokileng ba tla nkoa ba le molato.” (Pesaleme ea 34:21) Bohle ba tsoelang pele ho hanyetsa batho ba Molimo ba tla hlaheloa ke tlokotsi e tšabehang ka ho fetisisa e kileng ea e-ba teng. Tšenolong ea Jesu Kreste, ba “tla feta kotlong ea boahloli ea timetso e sa feleng.”—2 Bathesalonika 1:9.
18. “Bongata bo boholo” bo se bo ntse bo lopollotsoe ka kutloisiso efe, hona bo letetsoe ke eng nakong e tlang?
18 Davida o phethela pesaleme ena ka mantsoe ana a kholisang: “Jehova o lopolla meea ea bahlanka ba hae; ha ho le ea mong oa ba tšabelang ho eena ea tla nkoa a le molato.” (Pesaleme ea 34:22) Ho elella qetellong ea puso ea hae ea lilemo tse 40, Morena Davida o ile a re: ‘Molimo o lopolotse moea oa ka mahlomoleng ’ohle.’ (1 Marena 1:29) Haufinyane, ba tšabang Jehova ba tla hetla morao ’me ba thabe joaloka Davida hobane ba lopollotsoe molatong leha e le ofe oa sebe ’me ba pholositsoe litekong tsohle tsa bona. Boholo ba Bakreste ba tlotsitsoeng bo se bo ntse bo fumane moputso oa bona oa leholimo. Hona joale “bongata bo boholo” bo tsoang lichabeng tsohle bo ikopanya le masala a barab’abo Jesu e le hore bo ka sebeletsa Molimo le ’ona. Ka lebaka leo, bo ema ka pel’a Jehova bo hloekile hobane bo bontša tumelo matleng a lopollang a mali a Jesu a tšolotsoeng. Pusong e tlang ea Kreste ea Lilemo Tse Sekete, bo tla rua molemo ka botlalo sehlabelong seo sa thekollo, bo fihle boemong ba ho ba batho ba phethahetseng.—Tšenolo 7:9, 14, 17; 21:3-5.
19. Litho tsa “bongata bo boholo” li ikemiselitse ho etsa’ng?
19 Ke hobane’ng ha “bongata bo boholo” ba barapeli ba Molimo bo tla fumana litlhohonolofatso tsee tsohle? Hobane bo ikemiselitse ho tsoela pele bo tšaba Jehova, bo mo sebeletsa ka tšabo e tebileng le ho mo mamela ka tlhompho. Ka sebele ho tšaba Jehova ho etsa hore bophelo bo be monate hona joale ’me ho re thusa hore re ‘tšoare ka tieo bophelo ba sebele’—e leng bophelo bo sa feleng lefatšeng le lecha la Molimo.—1 Timothea 6:12, 18, 19; Tšenolo 15:3, 4.
Na U sa Hopola?
• Ke hobane’ng ha re lokela ho tšaba Molimo, hona ho mo tšaba ho bolela’ng?
• Ho tšaba Molimo ho lokela ho ama boitšoaro ba rōna joang?
• Melemo ea ho tšaba Molimo ke efe?
• Ke litšepiso life tse re thusang ho mamella?
[Setšoantšo se leqepheng la 26]
Ha mosebetsi oa bona o thibetsoe, ba tšabang Jehova ba ba hlokolosi
[Setšoantšo se leqepheng la 28]
Ntho e molemo ka ho fetisisa eo re ka e etsetsang baahelani ba rōna ke ho ba bolella litaba tse molemo tsa ’Muso