Ho Lula ba Hlophiselitsoe ho Pholohela ho Millennium

“Mohlape o tla ba mong, molisa le eena a be mong.”—JOHANNE 10:16.

 1. Ho Molimo o phelang ka nako eohle, lilemo tse sekete li tšoana le eng?

JEHOVA ke eena ’Mōpi oa nako bakeng sa batho. ’Me ho eena, Molimo o sa shoeng o leng teng ho tloha ho bo sa hlaheng ho isa ho bo sa feleng, lilemo tse sekete li tšoana le letsatsi le fetang ka potlako kapa joaloka nako ea tebelo nakong ea bo bong ba masiu a rōna.—Pesaleme ea 90:4; 2 Petrose 3:8.

 2. Ke nako efe eo Jehova a e behileng ka thōko bakeng sa ho hlohonolofatsa batho bohle?

² Molimo o behile letsatsi la tšoantšetso la lilemo tse sekete leo ka lona o tla hlohonolofatsa malapa ’ohle a lefatše. (Genese 12:3; 22:17, 18; Liketso 17:31) Hona ho akarelletsa ba shoeleng hona joale le ba ntseng ba phela hona joale. See Molimo o tla se etsa joang? O tla se etsa ka ’Muso oa Oona ka Jesu Kreste, “peō” ea mosali oa Oona oa tšoantšetso!—Genese 3:15.

 3. (a) Serethe sa Peō ea mosali oa Molimo se ile sa longoa joang, empa leqeba leo le ile la phekoloa joang? (b) Qetellong ea Puso ea Lilemo tse Sekete ea Jesu Kreste, o tla etsa joang ka noha ea tšoantšetso?

³ Serethe sa tšoantšetso sa Peō ea mosali oa Molimo (kapa mokhatlo o hlophisitsoeng oa leholimo) se ile sa longoa ha Jesu Kreste a e-shoa lefu la ho shoela tumelo ’me a lula a le boemong ba lefu likarolo tsa matsatsi a mararo ka selemo sa 33 sa Mehla e Tloaelehileng ea rōna. Empa ka letsatsi la boraro, Molimo o Matla ’Ohle, Monehi-Bophelo e Moholo, o ile oa phekola leqeba leo ka hore o tsosetse Mora oa oona oa Morena bophelong ba ho se shoe sebakeng sa moea. (1 Petrose 3:18) Kaha Jesu a ke ke a hlola a e-shoa hape, o boemong ba ho busa e le Morena holim’a batho ka lilemo tse sekete le ho “khoba” hlooho ea noha ea tšoantšetso, a e thumakanya hore e se hlole e e-ba teng ka morao ho Puso ea Lilemo tse Sekete. E tla ba lehlohonolo le lekaakang bakeng sa batho ba tšepahalang ba tsosolositsoeng!

 4. Molimo o ’nile oa ntšetsa pele lenaneo la mofuta ofe le batho ba oona?

⁴ Tlhophiso e ngata e ’nile ea tsoela pele har’a batho ba Jehova lefatšeng ka bophara nakong ena ea “ho fela ha tsamaiso ea lintho” ho tloha qetellong ea Mehla ea Balichaba ka 1914. (Mattheu 24:3, NW; Luka 21:24, King James Version) Lenaneo lena la tlhophiso le etellang pele Millennium le ntšetsoa pele tumellanong le thato ea Mohlophisi e Moholo, Jehova Molimo le tlas’a tataiso ea hae. Ka thuso ea mosali oa hae, mokhatlo o hlophisitsoeng oa hae oa leholimo o kang mosali, ho tsoaloa ha ’Muso oa hae o tšepisitsoeng ka Jesu Kreste ho ile ha etsahala ka 1914, joalokaha ho tiisoa ke phethahatso ea boprofeta ba Bibele.

 5. Ke ho tsoaloa ha eng ho ileng ha profetoa ho Tšenolo 12:5, ’me see se ile sa hlalosoa neng ka lekhetlo la pele ho The Watch Tower?

⁵ Kahoo ho phethahalitsoe ka mokhoa o khanyang mantsoe ana a Tšenolo 12:5: “A beleha mora, ngoana e motona, ea tla alosa lichaba tsohle ka lere la tšepe, ’me ngoan’a hae a nkeloa ho Molimo le teroneng ea oona.” Ho tsoaloa ha ’Muso oa Jehova ka Kreste, joalokaha ho tšoantšelitsoe ka ngoana ea tsoa tsoaloa oa mosali oa Molimo, ho ile ha hlalosoa ka lekhetlo la pele ho The Watch Tower, ea la 1 March, 1925. Ho tsoaloa ha ’Muso ona oa Messia leholimong ka 1914 ho fapane le ho tsoaloa ha “sechaba” sa “bana” ba Sione lefatšeng ka 1919.—Esaia 66:7, 8.

 6. (a) Ho tsoaloa ha ’Muso ho ile ha hloka mosebetsi ofe o neng o profetiloe ke Jesu? (b) Ho etsa mosebetsi ona ho ile ha hloka eng ka lehlakoreng la batho ba Jehova, ’me hona joale ba itlhahisa e le batho ba mofuta ofe?

⁶ Ho tsoaloa ha ’Muso oa Jehova oo ka oona a tlang ho phahamisa bobusi ba hae bo loketseng bokahohleng bohle—khele! ke ena ntho e neng e lokela ho phatlalatsoa lefatšeng lohle! Ena hape e ne e le nako ea ho phethahatsoa ha mantsoe ana a Jesu mabapi le bopaki ba ‘ho ba teng’ ha hae ho sa bonahaleng: “Evangeli ena ea ’muso e tla boleloa lefatšeng lohle, e tle e be bopaki ho lichaba tsohle; ’me e tla ba hona bofelo bo hlahang.” (Mattheu 24:3, 14) Boboleli bo momahaneng le bo lumellanang bo etsoang lichabeng tsohle, ka tekanyo ea lefatše lohle ka sebele bo ne bo tla hloka hore karolo e bonahalang ea mokhatlo o hlophisitsoeng oa bokahohle oa Jehova e hlophisoe. Watch Tower Bible and Tract Society, joalokaha e ne e emeloa ke eo e neng e le mopresidente oa eona ka nako eo, J. F. Rutherford, e ne e lumellana le sena. Kahoo, ho tloha selemong sa ka morao ho ntoa sa 1919, ho hlophisoa ha batšehetsi ba tšepahalang ba Mokhatlo e le sechaba se tsosolositsoeng ho ile ha tsoela pele ka boikemisetso, ka thapelo bakeng sa tataiso le tlhohonolofatso ea Mohlophisi e Moholo, Jehova Molimo. Li tobane le Ntoa ea II ea Lefatše, ho sa tsotellehe khanyetso e matla ea Mokha oa Puso ea Bohatelli, mokha oa Nazi oa Hitler, le Mokha oa K’hatholike, Lipaki tsa Jehova lefatšeng ka bophara li ile tsa itlhahisa li momahane lefatšeng la sera.

 7. (a) Ke feela ka ho lula kamanong efe e mong ho ba bang batho ba Jehova ba ka lebellang ho pholoha mahlomola a maholo? (b) Baphonyohi ba Moroallo ba ile ba feta joang Moroallong oa lefatše lohle, ’me ba ne ba tšoantšetsa bo-mang?

⁷ Ke Lipaki tsa Jehova feela, bao ba masala a tlotsitsoeng le “bongata bo boholo ba batho,” joaloka mokhatlo o hlophisitsoeng o momahaneng tlas’a tšireletso ea Mohlophisi e Moholo, tse nang le tšepo leha e le efe ea Mangolo ea ho pholoha bofelo bo haufi ba tsamaiso ena e ahlotsoeng e busoang ke Satane Diabolose. (Tšenolo 7:9-17; 2 Ba-Korinthe 4:4) Ke tsona tseo e tlang ho ba “nama” eo Jesu Kreste a itseng e ne e tla bolokoa mahlomoleng a mabe ka ho fetisisa a histori eohle ea motho. Joalokaha ho bile mehleng ea Noe, Jesu o itse ho ne ho tla ba joalo letsatsing leo A neng a tla senoloa ka lona. Ka hare ho areka e ileng ea nka lilemo tse ngata tsa boiteko bo hlophisitsoeng hore e phethoe, ke meea e robeli feela ea batho e ileng ea pholoha Moroallo oa phikoloho eohle. Meea eo e ile ea pholoha e le sehlopha se kopaneng sa lelapa. (Mattheu 24:22, 37-39, NW; Luka 17:26-30) Mosali oa Noe o tšoana le monyaluoa oa Kreste, ’me bara ba hae le lingoetsi ba tšoana le “linku tse ling” tsa Jesu tsa hona joale, tse eketsehileng hore e be bongata bo boholo, boo palo ea bona ea ho qetela re sa e tsebeng hona joale. (Johanne 10:16) Bakeng sa ho pholohela ho Millennium tlas’a Noe e Moholoanyane, Jesu Kreste, li lokela ho lula li hlophisitsoe le masala a tlotsitsoeng, “bakhethoa” bao ka lebaka la bona matsatsi a ‘mahlomola a maholo’ a tlang ho khutsufatsoa.—Mattheu 24:21, 22.

Ho Pholohela ho Millennium

 8. Ha a phethela boprofeta ba ho ba teng ha hae, Jesu o ile a etsa setšoantšo sefe, ’me letsatsi la la 1 Phuptjane 1935, le bile bohlokoa joang mabapi le kutloisiso ea lona?

⁸ Ho ea ka Molaetsa o Molemo oa Mattheu, Jesu o ile a phethela boprofeta ba hae ba pontšo ea boteng ba hae ka setšoantšo. Ka ho tloaelehileng se bitsoa setšoantšo sa linku le lipōli, se sebetsa hona joale, nakong ena ea ho fela ha tsamaiso ena ea lintho, e qalileng ha ho fela Mehla ea Balichaba ka 1914. (Mattheu 25:31-46) Letsatsi la Moqebelo, la 1 Phuptjane, 1935, e bile la bohlokoa tabeng ea ho utloisisa hore linku tsa setšoantšo sena ke litho tsa bongata bo boholo ba batho. Ka letsatsi leo, kopanong ea Lipaki tsa Jehova e neng e le Washington, D.C., ho ile ha kolobetsoa batho ba 840 tšoantšetsong ea boinehelo ba bona ho Jehova Molimo ka Jesu Kreste. Ba bangata ho bona ba ile ba nka bohato bona karabelong e potlakileng puong e neng e theiloe ho Tšenolo 7:9-17 e neng e fanoa ke J. F. Rutherford. E ne e le takatso ea bona ho ba karolo ea bongata bo boholo ba linku tse ling tsa Molisa ea Molemo, tse nang le monyetla oa ho pholoha mahlomola a maholo a tlang le ea ho feta li ntse li phela bofelong ba tsamaiso ena le ho kena Pusong ea Millennium ea Morena le Molisa, Jesu Kreste. Qetellong, li finyella bophelo bo sa feleng lefatšeng la paradeise.—Mattheu 25:46; Luka 23:43.

 9. Ke hobane’ng ha linku li memeloa ho ‘amohela ’Muso oo esale li o lokisetsoa,’ ’me ke joang li leng boemong bo molemo ka ho fetisisa ba ho etsa molemo ho baena ba Morena?

⁹ Ke hobane’ng ha bana ba kang linku ba memeloa ho ‘amohela ’muso oo ba o lokiselitsoeng ha e sa le lefatše le theoa’? Morena o ba bolella hore ke hobane ba ile ba etsa “baena” ba hae hantle, ’me ka lebaka leo ba ho entse ho eena. Ka lentsoe “baena,” Morena o bolela masala a baena ba hae ba moea ba sa ntsaneng ba le lefatšeng bofelong bona ba tsamaiso ea lintho. Kaha ba fetohile mohlape o le mong le baena bana ba Morena le Molisa, Jesu Kreste, ba ne ba tla ipoloka kamanong e haufi kamoo ho ka khonehang le masala a joalo ’me kahoo ba be boemong bo molemo ka ho fetisisa ba ho ba etsa hantle. Le ka litsela tse bonahalang, ba ne ba tla thusa baena ba Jesu ho bolela molaetsa oa ’Muso o hlomiloeng lefatšeng ka bophara pele bofelo bo e-tla. Ntlheng ena linku li ne li tla nka tokelo ea tsona e le ea bohlokoa hore li lule li hlophisitsoe le masala e le mohlape o le mong oa Molisa a le mong.

10. Ho bolela eng hore linku li ‘amohele ’muso oo e sa le li o lokisetsoa ha lefatše le theoa’?

¹⁰ Ho rua ‘’muso oo li o lokiselitsoeng’ ha ho bolele hore linku tsena li tla busa ka lilemo tse sekete le Jesu Kreste le baena ba hae leholimong. Ho e-na le hoo, hantle feela qalong ea Millennium, linku li tla rua sebaka sa lefatšeng sa ’Muso. Kaha ke bana ba Adama le Eva, sebaka sena sa lefatšeng seo ’Muso oa Molimo ka Kreste o tla se hapa li ile tsa se lokisetsoa ‘ha e sa le ho theoa lefatše’ la batho ba boemong ba hore ba ka pholosoa. Ho feta moo, kaha linku li fetoha bana ba lefatšeng ba Morena, ea fetohang “Ra-bo-sa-feleng” oa bona, li rua sebaka sa lefatšeng, kapa naha, tlas’a ’Muso oa Molimo.—Esaia 9:6, 7.

11. Linku li bontša joang hore li emela ’Muso, ’me ka lebaka la sena, ke lehlohonolo lefe le tobaneng le tsona?

¹¹ Ha ho bapisoa le lipōli tsa tšoantšetso, ntle ho phoso bana ba kang linku ba bontša hore ba emetse ’Muso. Joang? Ka liketso, e seng ka mantsoe feela. Ka lebaka la ho se bonahale ha Morena maholimong, ba ke ke ba mo etsa hantle ka ho toba e le ho tšehetsa ’Muso oa hae. Kahoo ba etsa hantle baena ba hae ba moea ba ntseng ba le lefatšeng. Le hoja hona ho mema lehloeo, khanyetso, le mahloriso tse etsoang ke lipōli, ka lebaka la ho etsa botle joalo, Morena o bolella linku hore ‘li hlohonolofalitsoe ke Ntat’ae.’

12. Linku tse pholohang li tla fuoa tokelo ea ho amohela bafe hape, ’me ntlheng ena, ke khopolo efe eo litho tsa masala li ’nileng tsa ba le eona?

¹² Bongata bo boholo ba batho bo kang linku bo etsang hantle baena ba moea ba Morena bo tla hlohonolofatsoa ka tokelo e thabisang ea ho pholohela ho Millennium. Ka nako ea teng, bo tla kopanela ho amoheleng hape batho ba shoeleng ba mabitleng a khopotso. (Johanne 5:28, 29, NW; 11:23-25) Bana ba tla akarelletsa bapatriareka le baprofeta ba tšepahalang ba ileng ba e-shoa le ho mamella ho hongata bakeng sa ho phahamisa bobusi ba Jehova e le hore ba ka “finyella tsoho e molemonyana,” eo mohlomong e tla ba ea pelenyana. (Ba-Heberu 11:35, NW) Banna le basali ba joalo ba tumelo ba tsositsoeng, bao ho sa boleloang lenane la bona kaofela ho Ba-Heberu khaolo ea 11, ba ne ba tla akarelletsa Johanne Mokolobetsi. (Mattheu 11:11) Ba bang ho masala a tlotsitsoeng ba ’nile ba nahana ka ho pholoha le ho phelela ho amohela hape ba joalo ba tšepahalang ba tsositsoeng ba shoeleng pele ho Pentekonta ea 33 C.E. Na masala a tla fuoa tokelo e joalo?

13. Ke hobane’ng ha e ke ke ea e-ba tlamo hore masala a be teng ho amohela hape le ho hlokomela ba tsositsoeng lefatšeng?

¹³ Hase tlamo hore ho be joalo. Bongata bo boholo ba batho ba pholohileng mahlomola bo tla ba teng ka palo e ngata ho hlokomela boemo bona le ho tloaetsa ba tsositsoeng “lefatše le lecha” tlas’a “maholimo a macha.” (2 Petrose 3:13) Le hona joale, bongata bo boholo ba batho bo ntse bo hlophisetsoa sena. Kajeno, ha ho tlalehoa hore palo ea baena ba moea ba Jesu ba lefatšeng e ka tlaase ho 9 000, ba tla pholoha har’a bona, ka sebele ba tla be ba fokola haholo ka palo hore ba ka hlokomela mosebetsi oohle oa selelekela o isang tsohong e akaretsang. (Ezekiele 39:8-16) Mona, ke moo bongata bo boholo ba batho, bo baloang ka limillione, bo tla sebeletsa ka mokhoa o babatsehang haholo. ’Me ha ho pelaelo hore tokelo e joalo e boloketsoe bona.

14. (a) Ba bangata ho ba bongata bo boholo ba batho ba koetlisetsoa eng, ’me ke hobane’ng ha hona joale ba bangata ho bona ba lokela ho nka boikarabelo? (b) Ke liketsahalo life tse tlamehang ho etsahala kapele, ’me ke mosebetsi ofe o emetseng linku tse ling?

¹⁴ Ba bangata ho bongata bo boholo ba batho ba se ba ntse ba koetlisoa boikarabelong ba liphutheho le ka mananeo a kaho ao mokhatlo o hlophisitsoeng oa Molimo o a ntšetsang pele lefatšeng lohle. ’Me ke ho khothatsang ho bona banna ba hōlileng moeeng ba eketsehileng ba bongata bo boholo ba batho ba abeloa ho nka boikarabelo bo boholoanyane mokhatlong o hlophisitsoeng oo Jehova a o sebelisang lefatšeng hona joale. Ba setseng ho ba tlotsitsoeng ba hōlile lilemong ’me ha ba sa na hona hore ba ka jara moroalo oohle. Baena bana ba Morena ba amohela thuso e lerato ea tlhophiso eo baholo le bahlanka ba sebeletsang ba tšoanelehang moeeng ba linku tse ling ba khonang ho fana ka eona. Haufinyana, Babylona e Moholo o tla be a tlositsoe lefatšeng. Joalokaha Tšenolo 19:1-8 e bontša, lenyalo la Konyana le monyaluoa oa eona oa ba 144 000 kaofela le tla phethahatsoa maholimong, ’me linku tse ling, tse sebeletsang joaloka lefatše le lecha tlas’a maholimo a macha, li tla emela Morena ho phethahatsa mosebetsi o moholo oa ho tsosolosa ho fihlela lefatše lohle le fetoha paradeise e tletseng baahi thorisong ea Jehova.—Esaia 65:17; bapisa le Esaia 61:4-6.

15. Bongata bo boholo ba batho bo lebelletse eng nakong ea Millennium?

¹⁵ Nakong ea Puso ea Millennium ea Kreste, ha ho tsosoa bafu ba lopolotsoeng ba batho, bongata bo boholo ba batho bo pholohileng bo tla thabela litokelo tse khōlō le tse tlotlehang ka ho fetisisa. Ka nako eo bo tla fetoha bara le barali ba Morena. Ho tla ba bonolo bakeng sa bara ba joalo ba har’a bona ho ba boemong ba mahosana, joalokaha bara ba Morena Davida e ne e le mahosana a nang le boikarabelo bo fapa-fapaneng.a Hona ho re hopotsa Pesaleme ea 45, e qapiloeng mabapi le “morena” ea tlotsitsoeng oa Jehova.

16. Hantle-ntle Pesaleme ea 45 e tobisitsoe ho mang, ’me hona ho ka pakoa joang?

¹⁶ Hantle-ntle Pesaleme ea 45 e tobisitsoe ho morena ofe? Jesu Kreste! Ba-Heberu 1:9 e e sebelisa ka tsela eo ha e qotsa Pesaleme ea 45:7, e reng: “U rata ho loka, ’me u hloile bokhopo. Ka baka leo, Molimo, Molimo oa hao, o u tlotsitse ka oli ea nyakallo ho fetisa balekane ba hao.” Ka hona ka sebele Pesaleme ea 45 e bua le Jesu Kreste ea tlotlisitsoeng ha e re: “Litulong tsa bo-ntat’ao ho tla lula bara ba hao, u tla ba bea mahosana lefatšeng lohle.”

17. Morena Jesu Kreste ka ho khethehileng o thahasella haholoanyane eng le bo-mang?

¹⁷ Ka nepo, Jesu o thahasella haholoanyane bokamoso ba hae e le Morena ea busang ho feta kamoo a thahasellang nako e fetileng ea ha a ne a le lefatšeng. Joalokaha ho ka lebelloa, ha a lebale nako eo e fetileng ’me haholo-holo ha a lebale baholo-holo ba hae ba batho ba akarelletsoang tšepisong ea Jehova ea ho hlohonolofatsa malapa ’ohle ka Peō ea Abrahama. Empa hona joale thahasello ea hae e khōlō e bokamosong bo haufi joalokaha bo reriloe ke Ea khethileng morena, Jehova Molimo. Ka hona bana ba Jesu ba lefatšeng, har’a bona ho qoolloa ka ho khethehileng bara ba tla tšoanelehela ho sebeletsa tlas’a hae liofising tsa bohosana, ke bona bao a tlang ho ba thahasella haholo ho feta bo-ntat’ae moholo ba lefatšeng.

18. Liphetolelo tse ling tsa Pesaleme ea 45:16 li hatisa joang thahasello e kholoanyane ea Jesu ho bara bao e leng mahosana ho feta ho bo-ntat’ae moholo ba lefatšeng?

¹⁸ Thahasello e kholoanyane ea Jesu ho bara bao e leng mahosana ho feta ho bo-ntat’ae moholo e hatisoa ke liphetolelo tsa Bibele tse fapa-fapaneng. Mona ke kamoo tse ling tsa tsona li ngolang Pesaleme ea 45:16: “Bara ba hao ba tla kena litulong tsa bo-ntat’ao, ’me ba phahamele ho ba mahosana holim’a naha eohle.” (Moffatt) “Litulo tsa bo-ntat’ao li tla nkoa ke bara ba hao; u tla ba etsa mahosana ka hare ho naha eohle.” (Temana ea 17, The New American Bible) “Sebakeng sa bo-ntat’ao, u tsoalloa bana: u tla ba etsa mahosana holim’a lefatše lohle.”—The Septuagint Version, e hatisitsoeng ke Samuel Bagster and Sons.

19. Banna ba bang ba itseng ba bongata bo boholo ba batho hona joale ba na le boikarabelo bofe ka phuthehong, ’me Morena Jesu Kreste a ka ’na a ba khethela boemong bofe nakong ea Puso ea Lilemo tse Sekete ea hae?

¹⁹ Ho re thabisang haholo, bao ba lebelletsoeng hore e tla ba mahosana, ba teng har’a rōna. Ba fumanoa har’a linku tse ling tse mamelang lentsoe la Molisa ea Molemo, Jesu Kreste. Ba ’nile ba le mamela ka ho khethehileng ho tloha ka 1935, ha Tšenolo 7:9-17 e ne e hlalosoa kopanong ea Lipaki tsa Jehova Washington, D.C. Kajeno, ba likete ba bongata bo boholo ba batho ba linku tse ling ba sebeletsa e le baholo, kapa balebeli, liphuthehong tsa Lipaki tsa Jehova tse fetang 57 670 linaheng tse 212 ho pota lefatše. Ka ho lula ba hlophisitsoe le masala a sa ntsaneng a le lefatšeng a baena ba moea ba Jesu, banna bana ba mocheng oa ho nkoa ka ho felletseng e le bara ba lefatšeng ba Morena Jesu Kreste nakong ea Puso ea Lilemo tse Sekete ea hae holim’a lefatše le lecha le tšepisitsoeng. (2 Petrose 3:13) Ba le joalo, ba ka ’na ba khetheloa ho ba mahosana ho sebeletsa lefatšeng le lecha.

20. (a) Morena o tla ba le boikutlo bofe ho bao a ba khethileng lefatšeng? (b) Bongata bo boholo ba batho bo tla amohela hape bo-mang, ’me ke monyetla ofe o behiloeng ka pel’a ba khutlang?

²⁰ Morena Jesu Kreste o tla thabela ho amohela boemo ba mahosana ana a khethiloeng bocha, joalokaha hona joale a amohela boemo ba bolebeli ba linku tse ling tse tšepahalang liphuthehong tsa hona joale tsa Lipaki tsa Jehova. Litho tsohle tsa bongata bo boholo ba linku tse ling—basali hammoho le banna—ba tla ba le tokelo e hlollang ea ho amohela bohle ba khutlang bafung ba tla utloa lentsoe la Jesu ’me ba tsohele monyetla oa ho fumana bophelo bo sa feleng e le batho ba phethahetseng lefatšeng le hloekisitsoeng le tlang ho fetoloa paradeise ea lefatše. (Johanne 5:28, 29) Bao ba hauhetsoeng ka ho fetisisa ba tsositsoeng ba tla akarelletsa bo-ntate-moholo ba Jesu Kreste ba lopolotsoeng, banna ba tumelo ba ileng ba utloisisa ho paka boinehelo ba bona ho Jehova Molimo haesita le ho isa lefung ka tšepo ea ho fumana “tsoho e molemonyana.” (Ba-Heberu 11:35, NW) Empa ho phahamisetsoa bophelong bo phethahetseng ba botho nakong ea Puso ea Lilemo tse Sekete ea Morena le Molopolli oa bona, Jesu Kreste, ke qalo feela. Ka ho lula ba hlophisitsoe ka mokhoa o sa sisinyeheng tlas’a Jehova Molimo nakong ea teko ea ho qetela holim’a batho ba tsosolositsoeng qetellong ea Millennium, ba tla ipaka ba tšoaneleha hore ba ka lokafatsoa ho kena bophelong bo sa feleng Paradeiseng e le karolo ea lefatše ea mokhatlo o hlophisitsoeng oa bokahohleng oa Jehova.—Mattheu 25:31-46; Tšenolo 20:1–21:1.

[Mongolo o botlaaseng ba leqephe]

U ne u Tla Arabela Joang?

◻ Jehova o khethile nako efe bakeng sa ho hlohonolofatsa batho bohle?

◻ Ke feela ka ho lula kamanong efe e mong le ba bang re ka pholohang mahlomola a maholo?

◻ Ho bolela eng ho re linku li ‘amohele ’muso oo e sa le li o lokisetsoa ha lefatše le theoa’?

◻ Nakong ea Millennium, bongata bo boholo ba batho bo ka ’na ba kopanela litokelong life?