U se ke Ua Sithabetsoa ke Matšoenyeho

“LE KA mohla le se ke la tšoenyeha ka letsatsi le hlahlamang, etsoe letsatsi le hlahlamang le tla ba le matšoenyeho a lona. Letsatsi ka leng le lekanoa ke bobe ba lona.” (Matheu 6:34) Ka sebele, keletso ena e fanoeng ke Jesu Kreste ea sebetsa ho rōna bohle ba phelang lefatšeng la kajeno le potlakileng le le hatellang.

Leha ho le joalo, na ho ka etsahala hore re se ke ra tšoenyeha ka mathata a rōna, liqeto tseo re li etsang, lintho tse re tlamang le boikarabelo boo re nang le bona? Batho ba limilione ba ikutloa ba nyahame, ba sithabetse, ’me ba imetsoe. Ke ka lebaka leo lithethefatsi tse kokobetsang ho tšoenyeha ha kelello e leng khoebo ea liranta tse limilione-milione.

Moo ho Lokelang ho ba le Moeli

Re lokela ho hlophisetsa le ho lokisetsa lintho tse re tlamang, tseo re li abetsoeng, liqeto tseo re li etsang le mathata a rōna—e bang lintho tsena li potlakile kapa che. Bibele e re khothalletsa hore re ‘lule fatše ’me re bale litšenyehelo’ pele re qalisa ho etsa tšebetso efe kapa efe e khōlō. (Luka 14:28-30) Sena se akarelletsa ho nahanisisa ka lintho tseo re lokelang ho khetha ho tsona, ho seka-seka kamoo liphello tsa tsona li ka re amang kateng le ho lekanya hore na litšenyehelo e tla ba life tabeng ea nako, matla le chelete.

Le hoja motho a lokela ho ba hlokolosi ho nahanela se ka ’nang sa etsahala, ha ho bonolo e bile ha ho bohlale hore a leke ho nahana ka lintho tsohle tse ka ’nang tsa etsahala. Ka mohlala, molemong oa polokeho ea lelapa, u ka ’na ua nahana ka seo u tla se etsa haeba ho qhoma mollo lapeng. U ka ’na ua reka ’me ua kenya lintho tse nkhellang mosi le tse timang mollo. Le ka ’na la lokisetsa litsela tsa ho baleha likarolong tse fapaneng tsa ntlo le ho ikoetlisetsa ho li sebelisa. Empa tokisetso e etsoang ka kelello le e molemo e fela neng ’me ho tšoenyeha ho feteletseng le ho sa lokelang ho qaleha neng? Ho tšoenyeha ho joalo ho hlaha ha u qala ho khathatseha ka maemo a mangata a inahaneloang, ao bongata ba ’ona mohlomong a hlahisoang ke ho touta ka lintho tse ngata. Metouto e ka ’na ea u ferekanya, e etsa hore u lumele hore u tlameha ebe ho na le hoo u ho hlokomolohileng kapa hore ha ua etsa ho lekaneng ho sireletsa lelapa la hao. Mojaro ona oo u itjarisitseng oona o ka u sithabetsa hoo u ka bang ua felloa ke boroko ka lebaka la oona.

Moshe ka Pel’a Faro

Jehova Molimo o ile a abela moprofeta oa hae Moshe kabelo e boima. Ntlha ea pele, Moshe o ne a lokela ho itlhahisa ka pele ho Baiseraele ’me a ba kholise hore Jehova o mo khethile hore a ba ntše Egepeta. E latelang, Moshe o ne a lokela ho itlhahisa ka pele ho Faro le ho mo kōpa hore a lokolle Baiseraele. Ea ho qetela, Moshe o ne a lokela ho etella pele letšoelehali la batho ba limilione lehoatateng ho ea kena naheng ea batho ba tletseng bora. (Exoda 3:1-10) Sena sohle e tlameha ebe se ne se tšosa haholo, empa na Moshe o ile a lumella hore boikarabelo boo bo tlatse kelello ea hae ka matšoenyeho a sa hlokahaleng?

Ho hlakile hore Moshe o ne a amehile ka lintlha tse ’maloa. O ile a botsa Jehova: “Bona, ke tla ea ho bana ba Iseraele, ’me ke tla re ho bona: Molimo oa bo-ntat’a lōna o nthomile ho lōna; etlare ha ba re ho ’na: Lebitso la oona ke mang? ke tla re’ng ho bona?” Jehova o ile a mo arabela. (Exoda 3:13, 14) Moshe o ne a boetse a amehile ka se ka ’nang sa etsahala haeba Faro a hana ho mo lumela. Le mona hape, Jehova o ile a arabela moprofeta eo. Bothata bo bong ba ho qetela—Moshe o ile a lumela hore e ne e se “monna ea buang habonolo.” Bothata boo bo ne bo ka rarolloa joang? Jehova o ile a fana ka Arone ho ba ’muelli oa Moshe.—Exoda 4:1-5, 10-16.

A hlomelletsoe ka likarabo lipotsong tsa hae ’me a e-na le tumelo ho Molimo, Moshe o ile a tsoela pele ho etsa seo Jehova a neng a mo laetse sona. Ho fapana le hore a ikopise hlooho ka ho nahana lintho tse tšosang tse ka ’nang tsa etsahala ha a tobana le Faro, Moshe o ile a ‘fela a etsa joalo.’ (Exoda 7:6) Haeba a ne a ile a lumella ho sithabetsoa ke matšoenyeho, sena se ka be se ile sa mo fokolisa tumelo le sebete tseo a neng a li hloka hore a phethe kabelo ea hae.

Tsela ea Moshe e bontšang ho leka-lekana ha a phetha kabelo ea hae ke mohlala oa seo moapostola Pauluse a se bitsitseng hore ke “ho hlaphoheloa kelellong.” (2 Timothea 1:7; Tite 2:2-6) Haeba Moshe a ne a sa ka a bontša ho hlaphoheloa kelellong, habonolo feela a ka be a ile a sithabetsoa ke boholo ba kabelo ea hae hoo mohlomong a ka beng a sa ka a e amohela.

Ho Laola Mehopolo ea Hao

U itšoara joang bophelong ba letsatsi le letsatsi ha u thulana le liteko tsa tumelo kapa liteko tse ling? Na u atisa ho tšoha le ho nahana feela ka litšitiso le liphephetso tse larileng ka pele? Kapa na u li talima ka tsela e leka-lekaneng? Ba bang ba ee ba re, ‘U se ke ua re u tla roalla le sa sele.’ Hobane mohlomong le ke ke la na! Kahoo, ke hobane’ng ha u ka ikopisa hlooho ka ntho e ka ’nang ea se ke ea etsahala le ho etsahala? Bibele e re: “Matšoenyeho a ka pelong ea motho ke ’ona a tla etsa hore e thulame.” (Liproverbia 12:25, NW) Hangata phello ke hore motho o tla lieha ho etsa liqeto, a chechise lintho ho fihlela e se e le morao haholo.

Ho kotsi le ho feta ke tšenyo eo matšoenyeho a sa hlokahaleng a ka e bakang moeeng. Jesu Kreste o ile a bontša hore kananelo ea “lentsoe la ’muso” e ka pupetsoa ke matla a thetsang a leruo le ke “matšoenyeho a tsamaiso ena ea lintho.” (Matheu 13:19, 22) Feela joalokaha meutloa e ka sitisa sethopo ho hōla le ho beha litholoana, matšoenyeho a sa laoloeng le ’ona a ka re sitisa ho tsoela pele moeeng le ho beha litholoana thorisong ea Molimo. Ho itlhaba ka mahlomola ho kotsi ho bile ho thibetse ba bang hore ba inehele ho Jehova. Baa tšoenyeha, ‘Ho tla etsahala’ng haeba ke hlōleha ho phelela boinehelo ba ka?’

Moapostola Pauluse o ile a re bolella hore ntoeng ea rōna ea moea, re ikitlaelletsa ho tlisa “monahano o mong le o mong kholehong ho o etsa hore o mamele Kreste.” (2 Bakorinthe 10:5) Sera sa rōna se seholo, Satane Diabolose, se hlile se thabela ho sebelisa litsietsi tsa rōna ho re nyahamisa le ho re fokolisa ’meleng, maikutlong le moeeng. Ke setsebi sa ho sebelisa lipelaelo ho tšoasa ba sa falimehang. Ke ka lebaka leo Pauluse a ileng a eletsa Bakreste hore ba se ke ba “lumella Diabolose sebaka.” (Baefese 4:27) Joaloka “molimo oa tsamaiso ena ea lintho,” Satane o atlehile ho ‘foufatsa likelello tsa ba sa lumelang.’ (2 Bakorinthe 4:4) E se eka le ka mohla re ke ke ra mo lumella hore a laole likelello tsa rōna!

Thuso ea Fumaneha

Ha ngoana a le bothateng a ka ea ho ntate ea lerato ’me a fumana tataiso le khothatso. Ka ho tšoanang, re ka ea ho Ntate oa rōna oa leholimo, Jehova, ka mathata a rōna. Ha e le hantle, Jehova o khothalletsa hore re lahlele meroalo le matšoenyeho a rōna ho eena. (Pesaleme ea 55:22) Joaloka ngoana ea seng a sa tšoenyehe ka mathata a hae ka mor’a hore a kholisoe ke ntate oa hae, ha rea lokela ho lahlela meroalo ea rōna ho Jehova feela empa hape re lokela ho e siea ho eena.—Jakobo 1:6.

Re lahlela matšoenyeho a rōna joang ho Jehova? Bafilippi 4:6, 7 ea araba: “Le se ke la tšoenyeha ka ntho leha e le efe, empa nthong e ’ngoe le e ’ngoe ka thapelo le thapeli hammoho le liteboho likōpo tsa lōna tse matla a li tsebisoe Molimo; ’me khotso ea Molimo e fetang monahano oohle e tla lebela lipelo tsa lōna le matla a lōna a kelello ka Kreste Jesu.” E, tumellanong le lithapelo le lithapeli tsa rōna tse phehellang, Jehova a ka re fa khutso ea ka hare e sireletsang likelello tsa rōna hore li se ke tsa ferekanngoa ke matšoenyeho a sa hlokahaleng.—Jeremia 17:7, 8; Matheu 6:25-34.

Leha ho le joalo, e le hore re sebetse tumellanong le lithapelo tsa rōna, ha rea lokela ho itšehla thajana kapa ho ikarola ho batho ba bang kelellong. (Liproverbia 18:1) Ha e le hantle, e ka ba hantle hore re hlahlobe melao-motheo ea Bibele le tataiso ea eona mabapi le bothata ba rōna, e le hore re qobe ho itšetleha ka kutloisiso ea rōna. (Liproverbia 3:5, 6) Ba banyenyane le ba baholo ka ho tšoanang ba ka ea Bibeleng le likhatisong tsa Watch Tower bakeng sa ho fumana boitsebiso bo bongata tabeng ea ho etsa liqeto le ho sebetsana le mathata. Ho phaella moo, ka phuthehong ea Bokreste, re hlohonolofalitsoe ka baholo ba bohlale le ba nang le phihlelo le Bakreste ba bang ba hōlileng tsebong ba lulang ba ikemiselitse ho buisana le rōna. (Liproverbia 11:14; 15:22) Hangata bao mathata a rōna a sa ba ameng ka ho toba maikutlong le ba nang le monahano oa Molimo tabeng, ba ka re thusa ho talima mathata a rōna ka leihlo le leng. Le hoja ba ke ke ba re etsetsa liqeto, e ka ba mohloli o moholo oa khothatso le tšehetso.

“Itšepele Molimo”

Ha ho le ea mong ea ka latolang hore ke ho sithabetsang ho sebetsana le mathata a rōna a sebele a letsatsi le letsatsi re sa a eketse ka ho tšoenyeha ka lintho tseo re inahanelang tsona. Haeba ho tšoenyeha ka se ka ’nang sa etsahala ho etsa hore re ikutloe re tšohile ’me re sa phutholoha, a re reteleheleng ho Jehova ka thapelo le thapeli. Re itšetlehe ka Lentsoe la hae le mokhatlo oa hae o hlophisitsoeng bakeng sa tataiso, bohlale le kelello e hlaphohetsoeng. Re tla fumana hore ho sa tsotellehe hore na ho hlaha boemo bofe, ho na le thuso ea ho sebetsana le bona.

A ikutloa a sithabetse a bile a khathatsehile, mopesaleme o ile a bina: “Moea oa ka, u hlorela’ng, u nyarohetse’ng ka hare ho ’na? U itšepele Molimo; ke sa tla o roka, ke ’Moloki oa ka le Molimo oa ka.” (Pesaleme ea 42:11) Ao a e ke e be maikutlo a rōna.

E, itokisetse se ka lebelloang ka ho utloahalang, ’me se sa lebelloang u se siele Jehova. ‘Le lahlele matšoenyeho ’ohle a lōna ho eena, hobane oa le tsotella.’—1 Petrose 5:7.

[Setšoantšo se leqepheng la 23]

Na ho tšoana le Davida u lahlela meroalo ea hao le matšoenyeho a hao ho Jehova?