Katleho e ka Leka Tumelo ea Hao
KATLEHO e ka leka tumelo ea motho ea lokileng. Ho hahamalla katleho ea lintho tse bonahalang ho ka lebisa ho lahleheloeng ke tumelo. (1 Timothea 6:9, 10) Empa katleho e ka boetse ea leka tumelo ka tsela e ’ngoe. Ha motho ea lokileng a hlokomela hore batho ba bangata ba khopo baa atleha linthong tse bonahalang ha eena a ntse a pulufalloa, a ka ’na a lekoa hore a phehelle tsela e bontšang ho se tšabe Molimo. Sena se entse hore esita le ba bang ba bahlanka ba Jehova ba belaelle bohlokoa ba ho phehella bophelo bo lokileng!
Sena se ile sa etsahalla Asafe sebini sa Molevi nakong ea puso ea Davida morena oa Iseraele. Asafe o ile a qapa lipesaleme tse neng li sebelisoa borapeling ba sechaba. Hammoho le Hemane le Jeduthune, o boetse a profeta, a neha Jehova Molimo thoriso le liteboho ka liletsa tsa ’mino. (1 Likronike 25:1; 2 Likronike 29:30) Le hoja Asafe a ne a e-na le tokelo e joalo, Pesaleme ea 73 e bontša hore ho atleha ha batho ba khopo linthong tse bonahalang ho ile ha ipaka e le teko e khōlō ea tumelo ea hae.
Boikutlo bo Kotsi ba Asafe
“Molimo o fela o le molemo ho Iseraele, ho ba pelo tse hloekileng. Ha e le ’na, leoto la ka le batlile le khopjoa, mehato ea ka e batlile e thella.” (Pesaleme ea 73:1, 2) Ka mantsoe ana, Asafe o ile a lumela hore Jehova o molemo ho sechaba sa Iseraele. Ka ho khethehileng o ne a le molemo ho ba “pelo tse hloekileng,” hobane takatso ea bona e ne e le ho neha Molimo boinehelo bo eang ho eena a ’notši ’me ba tlatsetsa ho halaletsoeng ha lebitso la hae le halalelang. Haeba re na le boikutlo boo, re tla boka Jehova ka ho bua ka eena hantle esita le haeba re lekoa ka mokhoa o utloisang bohloko ke katleho ea ba khopo kapa ke boemo leha e le bofe.—Pesaleme ea 145:1, 2.
Le hoja Asafe a ne a hlokomela molemo oa Jehova, maoto a hae a ile a batla a kheloha tseleng e lokileng. Ho ne ho le joalokaha eka a ne a thella leqhoeng nakong ea lebelo la mokoka le khathatsang. Ke hobane’ng ha tumelo ea hae e ne e fokola hakaalo? O ile a hlalosa: “Hobane ke ne ke honohela baikakasi, ha ke bona lehlohonolo la banyefoli. Hobane ha ba tsebe matšoenyeho ho isa lefung la bona, ’mele oa bona o ōtleha hantle; ba lutse ka ntle ho mahlomola a batho, ’me ha ba otloe joalo ka ba bang.”—Pesaleme ea 73:3-5.
Ho atleha ha batho ba khopo linthong tse bonahalang ho ile ha etsa hore Asafe a ba honohele. Ho ne ho bonahala eka ba thabela bophelo bo nang le khotso, esita le hoja ba ne ba ipokelletse leruo ka mekhoa e bolotsana. (Bapisa le Pesaleme ea 37:1.) Ho sa tsotellehe liketso tsa bona tse mpe, ponahalong ea ka ntle ba ne ba sireletsehile. Ho ne ho bonahala eka bophelo ba bona bo fela ntle le ho utloisoa bohloko ke mahlaba a lefu! Ka linako tse ling ba ne ba shoa ka khotso ’me ba itšepile bobona, ba sa falimehela tlhoko ea moea. (Mattheu 5:3) Ka lehlakoreng le leng, ba bang ba bahlanka ba Molimo ba utloisoa bohloko ke boloetse le lefu, empa oa ba tšehetsa, ’me ba na le tšepo e hlollang ea tsoho.—Pesaleme ea 43:1-3; Johanne 5:28, 29.
Batho ba bangata ba khopo ha ba na mathata a bophelo a ba thibelang ho thabela matle-tletse a lijo tsa bona. “’Mele oa bona o ōtleha hantle,” limpa tsa bona li khōlō. Ho feta moo, ba “lutse ka ntle ho mahlomola a batho,” hobane ho fapana le batho ba bangata, ha ba hloke ho etsa boiteko bo matla ho fumana lintho tse hlokehang bophelong. Asafe o ile a etsa qeto ea hore ba khopo “ha ba otloe joalo ka ba bang.” Haholo-holo ba qoba liteko tseo batho ba tšabang Molimo ba fetang har’a tsona lefatšeng le khopo la Satane ka lebaka la ho khomarela litekanyetso tse lokileng tsa Jehova.—1 Johanne 5:19.
Kaha ba khopo baa atleha, Asafe o ile a tsoela pele ho re ka bona: “Ka baka leo, boikhohomoso bo ba ngomela joalo ka lepetu, sehlōhō se ba aparetse joalo ka kobo. Mafura a rotola mahlo a bona, mehopolo ea pelo tsa bona ea itlhahisa. Ke basomi, ke ba bolotsana, ba bolela ho tuba; ba bua ka puo tse phahameng. Ba phahamisetsa melomo ea bona maholimong, ’me maleme a bona a lelera lefatšeng.”—Pesaleme ea 73:6-9.
Ba khopo ba roala boikhohomoso “joalo ka lepetu,” ’me liketso tsa bona tse mabifi li ngata hoo li ‘ba aparetseng joalo ka kobo.’ Ba ikemiselitse ho etsa seo ba se batlang, ba tšosa ba bang ka lipolelo. Mahlo a ba khopo ha aa khohlela ka lebaka la phepo e mpe empa a ‘rotoha ke mafura,’ ka lebaka la monono o tlisoang ke bonyollo. (Liproverbia 23:20) Merero ea bona ke e atlehileng hoo ba bileng ‘ba fetisang mehopolo ea lipelo tsa bona.’ (NW) Ba bua ka bolotsana ba bona ka boikhohomoso, “ka puo tse phahameng.” “Ba phahamisetsa melomo ea bona maholimong, ’me maleme a bona a lelera lefatšeng”! Ba sa hlomphe leha e le mang leholimong kapa lefatšeng, ba nyefola Molimo le ho bua batho hampe.
Kamoo ho bonahalang ka teng, e ne e se Asafe feela ea neng a angoa habohloko ke seo a neng a se bona. O itse: “Ke ka baka leo sechaba se retelehetseng ka ’nģa ho bona; se rata ho inoesa metsing a mangata, se re: Na Molimo o ka tseba joang? Mookameli ea phahameng a ka ba le tsebo joang?” (Pesaleme ea 73:10, 11) Temana ea Seheberu e ka ’na ea bolela hore kaha ba khopo ba bonahala ba atleha, ba bang har’a batho ba Molimo ba ba le pono e fosahetseng ’me ba ba boemong bo tšoanang le ba khopo, ba re: ‘Molimo ha a tsebe se etsahalang ’me a ke ke a nka bohato khahlanong le ba khopo.’ Ka lehlakoreng le leng, ho bona batho ba babe ba etsa bokhopo ’me ho bonahala eka ha ho kotsi ho joaloka ho itokisetsa ho noa seno se babang, se susumetsang ba lokileng ho botsa: ‘Ke hobane’ng ha Molimo a ka mamella lintho tsee? Na ha a bone se etsahalang?’
Ha a bapisa maemo a hae le a ba khopo, Asafe o ile a re: “Bonang! Bana ke ba khopo, ba iketlileng kamehla. Ba ekelitse mekhoa ea bona ea ho rua. Ka sebele ke lefeela hore ebe ke hloekisitse pelo ea ka leha ke hlatsoitse matsoho ka ho hloka molato. ’Me ke otloa letsatsi lohle, ’me ke lokisoa hoseng ho hong le ho hong.” (Pesaleme ea 73:12-14, NW) Asafe o ne a ikutloa hore ha ho na molemo ho phela ka ho loka. Batho ba khopo ba ne ba atleha, mohlomong ‘ba eketsa mekhoa ea bona ea ho rua’ ka litsela tse bolotsana. Ba ne ba bonahala ba qoba kahlolo bakeng sa ho etsa bokhopo bo feteletseng, empa Asafe o ne a otloa “letsatsi lohle”—ho tloha ha a tsoha ho fihlela a robala bosiu. O ne a ikutloa hore Jehova o mo khalema hoseng ho hong le ho hong. Kaha hona ho ne ho bonahala ho se na toka, ho ile ha leka tumelo ea Asafe.
Ho Lokisa Monahano
Qetellong ha a hlokomela hore monahano oa hae o ne o fosahetse, Asafe o ile a re: “Hola nka re: Ke tla bua joalo, moo e ka b’e le ho eka moloko oa bana ba hao. Eaba kea nahana hore ke utloisise taba tseo, ’me ka fihlela hoba ke mosebetsi o thata, ho fihlela ha ke kena sehalalelong sa Molimo, ea e-ba moo ke elang bofello ba batho bao hloko. Ka re: U mpa u ba beile ’nģalong tse thellang, ua ba liha, ’me ba senyehile. Ba felile joang hang hang! Ba timela, ba senyeha, ba oa ba tšohile hampe. Ha e-ba joalo ka toro phaphamong, ua ba tsosa joalo, Morena; u entse seriti sa bona ntho feela e nyelisehang.”—Pesaleme ea 73:15-20.
Ho ne ho le molemo hore ebe Asafe ha aa ka a belaela ka ho bua, hobane ho bolela phatlalatsa hore ha ho na thuso ho sebeletsa Jehova ho ne ho ka ’na ha nyahamisa litho tsa lelapa la hae tsa barapeli kapa ha fokolisa tumelo ea bona. Ho molemo hakaakang ho khutsa le ho etsisa Asafe! Ho bona hore na ke hobane’ng ha ba khopo ba bonahala eka ba tsoella hantle ka bokhopo ha ba lokileng ba ntse ba utloa bohloko, o ile a ea sehalalelong sa Molimo. Tikoloho eo e ile ea lumella Asafe ho thuisa ka khutso har’a barapeli ba Jehova, ’me monahano oa hae o ile oa lokisoa. Ka hona kajeno, haeba re tsietsoa ke seo re se bonang, a re batleng likarabelo lipotsong tsa rōna ka ho kopanela le batho ba Molimo ho e-na le ho itšehla thajana.—Liproverbia 18:1.
Asafe o ile a hlokomela hore Molimo o behile ba khopo “’nģalong tse thellang.” Kaha bophelo ba bona bo likoloha linthong tse bonahalang, ba kotsing ea ho thulana le tahlehelo e sa lebelloang. Hamorao, lefu le tla ba khaoletsa ba se ba tsofetse, ’me leruo la bona le fumanoeng ka bolotsana le ke ke la ba sireletsa hore ba fumane bophelo bo eketsehileng. (Pesaleme ea 49:6-12) Leruo la bona le tla tšoana le toro e fetang ka potlako. Mohlomong ka lebaka la toka ba ka ba ba tšoaroa le pele ba tsofala e le ha ba kotula seo ba se jetseng. (Ba-Galata 6:7) Kaha ka boomo ba hlokomolohile a le Mong feela ea ka khonang ho ba thusa, ba setse ho se ea ka ba thusang, ’me ha ba na tšepo. Ha Jehova a nka bohato khahlanong le bona, o tla talima “seriti” sa bona—khanya le boemo ba bona—ka nyeliso.
Lebela Tsela eo U Arabelang ka Eona
A sa ka a arabela hantle mabapi le seo a se boneng, Asafe o ile a lumela: “Enere ha pelo ea ka e ntse e tlokoma, ke utloa tsenene e hlaba lethekeng la ka, ke ne ke le letlaopa le sa tsebeng letho, ke ne ke le joalo ka phoofolo pel’a hao. Empa joale ke ntse ke u khomarela, u ntataisa ka letsoho la ka le letona. U tla ntsamaisa ka keletso ea hao, ’me qetellong u ntholle khanyeng ea hao.”—Pesaleme ea 73:21-24.
Ho lebisa tlhokomelo katlehong ea lintho tse bonahalang ea ba khopo le ho utloeng bohloko ha ba lokileng ho ka ntšofatsa pelo ea motho kapa ha mo utloisa bohloko. Ka hare botebong—ka liphiong tsa hae—pherekano ea Asafe ka sena e ile ea mo bakela lehlaba le leholo. Ho tsoa ponong ea Jehova, o ile a tšoana le phoofolo e se nang kelello e arabelang motheong oa seo e se utloang ’meleng. Leha ho le joalo, Asafe o ne a ‘ntse a khomarela Molimo, ea neng a mo tataisa ka letsoho la hae le letona.’ Haeba re fosa monahanong oa rōna empa re batla keletso ea Jehova joalokaha Asafe a entse, Molimo o tla re tšoara ka letsoho, ho re tšehetsa le ho re tataisa. (Bapisa le Jeremia 10:23.) Ke feela ka ho sebelisa keletso ea hae re ka isoang bokamosong bo thabileng. Re ka ’na ra utloisoa bohloko ke masoabi ka nakoana, empa Jehova o tla tlisa phetoho, ‘a re tholle khanyeng’ kapa hlomphong.
A ananela tlhokahalo ea ho itšetleha ka Jehova, Asafe o ile a eketsa: “Ke na le mang maholimong ha e se uena? Ka ntle ho uena ha ke khahlisoe ke letho lefatšeng. Nama ea ka le pelo ea ka li ntse li fela; lefika le pelo ea ka le kabelo ea ka ke Molimo, ka ho sa eeng kae! Hobane ba u koenehelang ba tla fela. U timetsa bohle ba eang ho itšilafaletsa hole le uena. Empa ha e le ’na, ho ba haufi le Molimo, ke molemo ho ’na; ke beile setšabelo sa ka ho Morena Jehova, ke tle ke tsebe ho bolela mesebetsi ea hao kaofela.”—Pesaleme ea 73:25-28.
Joaloka Asafe, ha ho motho ntle le Jehova eo re ka itšetlehang ka eena bakeng sa tšireletseho le matšeliso a ’nete. (2 Ba-Korinthe 1:3, 4) Ka hona ho e-na le ho lakatsa maruo a lefatše a motho leha e le ofe, a re sebeletseng Molimo ’me re bokelle matlotlo leholimong. (Mattheu 6:19, 20) Ho ba le boemo bo amohelehang ho Jehova e lokela ho ba thabo ea rōna e khōlō. Esita le haeba ’mele ea rōna le pelo ea rōna li ka fokola, o tla re matlafatsa a re fe botsitso pelong e le hore re se felloe ke tšepo le sebete ha re le har’a mahlomola. Botsoalle le Jehova ke ntho ea bohlokoahali eo re nang le eona. Ho bo lahla ho tla fella ka tlokotsi ho rōna hammoho le bohle ba mo lahlang. Ka hona, joaloka Asafe, a re atameleng haufi le Molimo ’me re lahlele lipelaelo tsohle tsa rōna ho eena. (1 Petrose 5:6, 7) Sena se phahamisa boiketlo ba rōna ba moea ’me se re susumeletsa ho bolella ba bang ka mesebetsi e hlollang ea Jehova.
Lula U Tšepahala ho Jehova
Asafe o ne a khathatsehile hobane o ne a bona baetsalibe ba atleha Iseraeleng, naheng ea habo. Har’a bahlanka ba Jehova ba tšepahalang, ho ne ho e-na le “ba khopo” ba molato oa boikakaso, boikhohomoso, pefo, ho soma, le bolotsana, le ba neng ba latola hore Molimo o tseba seo ba neng ba se etsa. (Pesaleme ea 73:1-11) Ke temoso e kaakang! Ho thabisa Jehova Molimo, re tlameha ho lesa ho bontša litšoaneleho tse kang boikhohomoso, pefo, ho soma, le ho se tšepahale. Joaloka Asafe, e se eka bahlanka bohle ba Jehova ba ka ‘tla ka sehalalelong se seholo sa Molimo,’ ka ho kopana ka mehla le barapeli ba Hae ba tšepahalang. Ruri, bohle ba ratang Jehova ba ke ‘ba atamele haufi le Molimo,’ ba itšetlehe ka eena hore a ba tšehetse har’a mahlomola, ho sa tsotellehe seo ba bang ba ka ’nang ba se bua kapa ho se etsa.—Pesaleme ea 73:12-28; 3 Johanne 1-10.
Kannete, matlotlo a bonahalang a baetsalibe a ka ’na a leka tumelo ea rōna, joalokaha a ile a leka ea Asafe. Leha ho le joalo, re ka mamella teko ena haeba bophelo ba rōna bo likoloha tšebeletsong ea Jehova. Re tla putsoa bakeng sa ho etsa sena hobane ‘Molimo ha o khopo; o ke ke oa lebala mesebetsi ea rōna, le kamoo lerato la rōna le sebelitseng kateng ka baka la lebitso la hae.’ (Ba-Heberu 6:10, NW) Liteko tsa rōna e tla ba tsa “nakoana le tse bobebe” ha li bapisoa le moputso oa rōna. (2 Ba-Korinthe 4:17) Esita le lilemo tse 70 kapa 80 tsa ho utloa bohloko li joaloka phefumoloho e fetang molomong feela ha u hoeshetsa ha li bapisoa le bophelo bo thabileng ba ka ho sa feleng boo Jehova a bo tšepisitseng bahlanka ba hae ba tšepahalang.—Pesaleme ea 90:9, 10.
E se eka re ke ke ra lumella matlotlo a bonahalang a baetsalibe ha a bapisoa le ho utloisoa ha rōna bohloko ka lebaka la ho loka ho re thibele ho bontša tumelo eo e leng tholoana ea moea o halalelang oa Molimo. (Ba-Galata 5:22, 23; 1 Petrose 3:13, 14) Satane o tla thabisoa ke haeba re etsisa ba khopo, bao hangata ba atlehang hobane ba le bolotsana. Ho e-na le hoo, a re hlompheng lebitso la Jehova ka ho hana meleko ea ho lahla litekanyetso tsa hae tse lokileng. (Sofonia 2:3) A re se keng ra utloisoa bohloko ke katleho ea baetsalibe, hobane, sohle seo ba ka se finyellang ke ho atleha linthong tse bonahalang feela. ’Me seo se na le bohlokoa bofe? Esita le hanyenyane se ke ke sa bapisoa le katleho ea moea e thabeloang ke ba bontšang tumelo ho ’Musi Morena Jehova.