Ho Lopolloa Lifing Tsa ea Tšoasang Linonyana

“[Jehova] o tla u lopolla sefing sa ea tšoasang linonyana.”—PESALEME EA 91:3.

 1. Motho enoa “ea tšoasang linonyana” ke mang, hona ke hobane’ng ha a le kotsi?

BAKRESTE bohle ba ’nete ba tobane le senonnori, se bohlale le se mano ho feta motho. Ho Pesaleme ea 91:3 se bitsoa “ea tšoasang linonyana.” Sera see ke mang? Ho tloha tokollong ea June 1, 1883, makasine ena e ’nile ea re sera sena ke Satane Diabolose. Sera sena se matla se sebelisa mano ho leka ho khelosa le ho tšoasa batho ba Jehova joaloka motšoasi oa linonyana ha a leka ho tšoasa nonyana.

 2. Ke hobane’ng ha Satane a tšoantšoa le motho ea tšoasang linonyana?

² Mehleng ea boholo-holo, linonyana li ne li tšoasetsoa lipina tsa tsona tse mathe-maloli, masiba a tsona a mebala-bala, ho jeoa le ho etsa sehlabelo. Leha ho le joalo, ka tlhaho linonyana li seli, li tšoha le feela, ebile ho thata ho li tšoasa. Ka lebaka leo, mehleng ea ha ho ngoloa Bibele motho ea tšoasang linonyana o ne a qala ka ho ithuta ka hloko litšobotsi le mekhoa ea linonyana tsa mofuta o itseng tseo a neng a batla ho li tšoasa. Ebe ka mor’a moo o loha mano a ho li tšoasa. Bibele e tšoantša Satane le motho ea tšoasang linonyana, ’me seo se re thusa ho utloisisa mekhoa eo a e sebelisang. Diabolose o ithuta rōna re le batho ka bomong. O hlokomela mekhoa ea rōna le litšobotsi tsa rōna ebe o cheha maraba e le hore a leke ho re tšoasa re phela. (2 Timothea 2:26) Ho tšoasoa ke Satane ho ka senya kamano ea rōna le Molimo ’me ho ka etsa hore qetellong re timetsoe. Kahoo, e le hore re itšireletse, re lokela ho tseba mekhoa e sa tšoaneng e sebelisoang ke motho enoa “ea tšoasang linonyana.”

3, 4. Ke neng moo maqiti a Satane a tšoanang le a tau? le a masumu?

³ Mopesaleme le eena o sebelisa setšoantšo se hlakileng ha a tšoantša maqiti a Satane le a taoana kapa a masumu. (Pesaleme ea 91:13) Ho tšoana le tau, ka linako tse ling Satane o hlasela ka ho toba ka ho sebelisa mahloriso kapa bohato boo ’muso o bo nkang khahlanong le batho ba Jehova. (Pesaleme ea 94:20) Litlhaselo tse joalo tse kang tsa tau li ka ’na tsa khelosa batho ba seng bakae. Leha ho le joalo, hangata litlhaselo tsena tse totobetseng li ba le liphello tse fapaneng le se neng se lebeletsoe ’me li kopanya batho ba Molimo. Joale, ho thoe’ng ka litlhaselo tsa Satane tse bolotsana haholo tse kang tsa masumu?

⁴ Diabolose o sebelisa bohlale ba hae bo fetang ba motho e le hore a qale litlhaselo tse bolotsana le tse kotsi tse tšoanang le tsa noha e mahloko e hlaselang e le sebakeng se patehileng. Ka tsela ena, o atlehile ho senya likelello tsa ba bang ba batho ba Molimo, a ba thetsa hore ba etse thato ea hae ho e-na le ho etsa thato ea Jehova, ’me seo se hlahisitse liphello tse bohloko. Ka lehlohonolo, re tseba merero ea Satane. (2 Bakorinthe 2:11) Joale a re tšohleng lifi tse ’nè tse kotsi tse sebelisoang ke motho ea tšoasang linonyana.

Ho Tšaba Batho

 5. Ke hobane’ng ha leraba la ho “thothometsoa ke batho” le atleha hakaale?

⁵ Motho enoa ea “tšoasang linonyana” oa tseba hore ka tlhaho batho ba rata ho amoheloa le ho ratoa ke batho ba bang. Bakreste ha ba iphapanyetse menahano le maikutlo a batho ba bang. Kaha Diabolose o tseba sena, o batla ho sebelisa hampe taba ea ho ameha ha bona ka seo batho ba bang ba se nahanang ka bona. Ka mohlala, o tšoasa batho ba bang ba Molimo ka ho sebelisa leraba la ho “thothometsoa ke batho.” (Liproverbia 29:25) Haeba ka lebaka la ho tšaba batho, bahlanka ba Molimo ba kopanela ho etsa lintho tseo Jehova a li hanelang kapa ba sa etse seo Lentsoe la Molimo le ba laelang hore ba se etse, ba tšoasitsoe ke motho enoa “ea tšoasang linonyana.”—Ezekiele 33:8; Jakobo 4:17.

 6. Ke mohlala ofe o bontšang kamoo mocha a ka tšoasoang ke motho enoa “ea tšoasang linonyana”?

⁶ Ka mohlala, mocha a ka ’na a inehela khatellong ea bana bao a kenang sekolo le bona eaba o tsuba sakerete. Mohlomong ha a ea sekolong letsatsing leo o ne a sa ka a nahana ho hang ka hore a ka tsuba sakerete. Leha ho le joalo, kapele feela o iphumana a se a etsa ntho e kotsi ’meleng le e sa khahliseng Molimo. (2 Bakorinthe 7:1) O ile a ekoa joang? Mohlomong o ile a tloaelana le metsoalle e fosahetseng ’me a tšaba hore e tla mo tšeha. Bacha, le se ke la lumela hore motho enoa “ea tšoasang linonyana” a le eke le ho le tšoasa! E le hore le qobe hore a le tšoase le phela, itebeleng hore le se ke la sekisetsa esita le linthong tse nyenyane. Elang hloko temoso ea Bibele ea ho qoba litloaelano tse mpe.—1 Bakorinthe 15:33.

 7. Satane a ka ’na a etsa joang hore batsoali ba bang ba hloke botsitso linthong tsa moea?

⁷ Batsoali ba Bakreste ba hlokolosi, ba nka ka ho teba boikarabelo ba bona ba Mangolo ba ho hlokomela malapa a bona nameng. (1 Timothea 5:8) Leha ho le joalo, Satane o batla hore Bakreste ba hloke botsitso tabeng ena. Mohlomong Bakreste ba bang ba lofa liboka khafetsa ka lebaka la ho inehela khatellong ea bahiri ba bona ea hore ba etse mosebetsi o eketsehileng. Mohlomong ba tšaba ho ikōpa hore ba be teng mananeong ’ohle a kopano ea setereke e le hore ba rapele Jehova ba e-na le barab’abo bona. Ho “tšepa Jehova” ho ka re sireletsa lerabeng lena. (Liproverbia 3:5, 6) Ho phaella moo, ho hopola hore kaofela re litho tsa lelapa la Jehova le hore o itlamme hore o tla re hlokomela ho tla re thusa hore re lule re tsitsitse. Batsoali, na lea lumela hore ka tsela e itseng Jehova o tla le hlokomela hammoho le malapa a lōna haeba le etsa thato ea hae? Kapa na Diabolose o tla le tšoasa le phela ’me a etse hore le etse thato ea hae ka lebaka la ho tšaba batho? Re kōpa hore le nahane lipotso tsena ka botebo.

Leraba la Lintho Tse Bonahalang

 8. Satane o cheha batho ka lintho tse bonahalang joang?

⁸ Sefing sa hae, Satane o boetse o re cheha ka lintho tse bonahalang. Hangata tsamaiso ea khoebo ea lefatše lena e buella mekhoa ea ho rua kapele e ka ’nang ea qhekella le ba bang ba batho ba Molimo. Ka linako tse ling, batho ba ka ’na ba khothalletsoa: “Sebetsa ka thata. Ha u se u tsitsitse hantle licheleteng, joale u ka raha qhebelele ’me ua thabela bophelo. U ka ba ua nka le bopula-maliboho.” Ba bang ka phuthehong ba batlang ho etsa chelete ka bara le baralib’abo bona ka phuthehong ea Bokreste ba ka ’na ba bua mantsoe a joalo a bontšang ho hloka botsitso. U lokela ho nahana ka hloko ka khothalletso e joalo. Na ha e bonahatse monahano o “se nang kahlolo e molemo” oa monna ea ruileng eo ho builoeng ka eena setšoantšong sa Jesu?—Luka 12:16-21.

 9. Ke hobane’ng ha Bakreste ba bang ba ka ’na ba tšoasoa ke leraba la ho lakatsa lintho tse itseng?

⁹ Satane o laola tsamaiso ea hae e khopo ka tsela e susumetsang batho hore ba lakatse ho ba le lintho tse itseng. Qetellong takatso ena e ka ama bophelo ba Mokreste hampe, ea bipetsa lentsoe ’me ea etsa hore e be le sa “beheng.” (Mareka 4:19) Bibele e re khothalletsa hore re khotsofalle lintho tsa ho iphelisa le liaparo le tšireletso. (1 Timothea 6:8) Leha ho le joalo, ba bangata ba tšoasoa ke motho enoa “ea tšoasang linonyana” hobane ha ba sebelise keletso ena. Na ebe mohlomong boikhohomoso bo etsa hore ba nahane hore ba lokela ho khomarela mofuta o itseng oa bophelo? Ho thoe’ng ka rōna re le batho ka bomong? Na takatso ea rōna ea ho ba le lintho tse itseng e etsa hore re nke lintho tse amanang le borapeli ba ’nete e se tsa bohlokoa haholo? (Hagai 1:2-8) Ka masoabi, ba bang ha ba le mathateng a lichelete ba ile ba tela bomoea ba bona e le hore ba khomarele mokhoa oa bona oa bophelo o tloaelehileng. Boikutlo bona ba ho rata lintho tse bonahalang bo khahla motho enoa “ea tšoasang linonyana”!

Sefi sa Boithabiso bo Kotsi

10. Mokreste ka mong o lokela ho itlhahloba tabeng efe?

¹⁰ Leqheka le leng le sebelisoang ke motho enoa “ea tšoasang linonyana” ke ho senya boikutlo ba batho ba tlhaho ba ho tseba lintho tse molemo le tse mpe. Karolo e khōlō ea indasteri ea boithabiso e susumelitsoe ke monahano o tšoanang le oa batho ba Sodoma le Gomora. Esita le litaba thelevisheneng le limakasineng li bontša pefo le ho khothalletsa batho ho ba le takatso e tšosang litabeng tsa ho kopanela liphate. Boholo ba lintho tse hlahisoang e le boithabiso mecheng ea liphatlalatso bo thatafalletsa batho “ho khetholla se nepahetseng le se fosahetseng.” (Baheberu 5:14) Leha ho le joalo, hopola mantsoe ao Jehova a ileng a a bua ka moprofeta Esaia: “Ho malimabe ba reng botle ke bobe le bobe ke botle!” (Esaia 5:20) Na ka bolotsana motho enoa “ea tšoasang linonyana” o susumelitse monahano oa hao ka boithabiso bo joalo bo sa lokang? Ho bohlokoa hore re itlhahlobe.—2 Bakorinthe 13:5.

11. Makasine ee e ile ea fana ka temoso efe ka lipale tse tsoelang pele tsa TV?

¹¹ Lilemo tse ka bang 25 tse fetileng, ka lerato Molula-Qhooa o ile oa lemosa barapeli ba ’nete ba Molimo ka lipale tse tsoelang pele tsa TV.a Ho ile ha fanoa ka tlhokomeliso e latelang ka tšusumetso e mano ea lipale tse tsoelang pele tse ratoang haholo: “Ho batla lerato ho sebelisoa e le lebaka la ho kopanela boitšoarong ba mofuta ofe kapa ofe. Ka mohlala, mocha e mong oa moimana ea neng a sa nyaloa o re ho motsoalle oa hae: ‘Empa ke rata Victor. Ha ke tsotelle. . . . Ho ba le ngoana oa hae ke eona ntho ea bohlokoahali ho ’na!’ ’Mino o llelang tlaase o thatafalletsa batho ho hlokomela bobe ba tsela ea motho enoa. Le uena u se u rata Victor. U qenehela ngoanana enoa. U ‘lumellana le boitšoaro bona ba hae bo bobe.’ Moshebelli e mong eo hamorao a ileng a hlaphoheloa o re: ‘Hoa makatsa ho bona kamoo u ka ikemelang kateng ha u e-na le monahano o joalo. Rea tseba hore boitšoaro bo bobe ha boa loka. . . . Empa ke ile ka hlokomela hore ka kelellong ke ne ke bo emela.’”

12. Ke lintlha life tse bontšang hore temoso e fanoang hona joale mabapi le mananeo a itseng a TV e loketse?

¹² Ho tloha nakong ea ha ho ne ho hatisoa lihlooho tseo, mananeo a mofuta ona a hlephisang boitšoaro a eketsehile haholo. Libakeng tse ngata, mananeo a joalo a hasoa lihora tse 24 ka letsatsi. Banna, basali le bacha ba bangata khafetsa ba fepa likelello le lipelo tsa bona ka boithabiso ba mofuta ona. Leha ho le joalo, rōna ha rea lokela ho ithetsa ka monahano oa bohata. E ka ba phoso ho nahana hore boithabiso bo bontšang boitšoaro bo bobe ha bo kotsi joaloka boo batho ba hlileng ba bo etsang. Na ruri Mokreste a ka lokafatsa taba ea hore ebe o khethile ho thabisoa ke mofuta oa batho bao le ka mohla a neng a ke ke a nahana ho ba memela lelapeng la hae?

13, 14. Ba bang ba ile ba hlalosa joang molemo oo ba o ruileng ka litemoso tse ileng tsa fanoa mabapi le TV?

¹³ Batho ba bangata ba ruile molemo ka ho ela hloko temoso e fanoeng ke “lekhoba le tšepahalang le le masene.” (Matheu 24:45-47) Ka mor’a ho bala keletso e hlakileng e thehiloeng Bibeleng, ba bang ba ile ba ngolla bahlophisi ba makasine ena ba bolela kamoo lihlooho tsena li ileng tsa ba ama kateng.b E mong o ile a re: “Ke bile lekhoba la lipale tse tsoelang pele ka lilemo tse 13. Ke ne ke nahana hore ke sireletsehile ka ho ea feela libokeng tsa Bokreste le ka ho kopanela ka seoelo tšebeletsong ea tšimo. Empa ke ile ka ba le maikutlo a batho ba lefatše ka lipale tse tsoelang pele hore haeba monna oa hao a u sotla kapa u ikutloa u sa ratoe, ho lokile hore u etse bofebe—monna ke eena ea phoso. Kahoo ke ile ka ‘lokafatsa’ taba ena eaba ke etsa bofebe ’me ka siteloa Jehova le molekane oa ka.” Mosali enoa o ile a khaoloa. Qetellong, o ile a lumela sebe sa hae, a baka eaba o khutlisetsoa ka phuthehong. Lihlooho tse lemosang ka lipale tse tsoelang pele tsa TV li ile tsa mo fa matla a hore a qobe ho ithabisa ka lintho tseo Jehova a li hloileng.—Amose 5:14, 15.

¹⁴ ’Mali e mong eo bophelo ba hae bo ileng ba ameha o ile a re: “Ke ile ka lla ha ke bala lihlooho tsena, hobane ke ile ka hlokomela hore ke ne ke se ke sa rate Jehova ka pelo ea ka eohle. Ke ile ka tšepisa Molimo oa ka hore ha ke sa tla hlola ke e-ba lekhoba la lipale tsena tse tsoelang pele.” Ka mor’a ho bolela kamoo a thabetseng lihlooho tsena kateng, mosali e mong oa Mokreste o ile a lumela hore o ne a lemalletse lipale tsena eaba oa ngola: “Ke ne ke ntse ke ipotsa . . . hore na ebe kamano ea ka le Jehova e ke ke ea ameha na. Na nka ba motsoalle oa libapali tsa lipale tse tsoelang pele ka ba ka ba motsoalle oa Jehova?” Haeba lipale tsena tsa TV li ile tsa khona ho silafatsa lipelo tsa batho lilemo tse 25 tse fetileng, li ka ba le liphello life kajeno? (2 Timothea 3:13) Re lokela ho falimehela sefi sa Satane sa mefuta eohle ea boithabiso bo sa lokang, ebang ke lipale tse tsoelang pele tsa TV, lipapali tse mabifi tsa video, kapa livideo tsa ’mino oa boitšoaro bo bobe.

Sefi sa Likhohlano

15. Diabolose o tšoasa ba bang ba phela joang?

¹⁵ Satane o sebelisa likhohlano e le sefi sa ho arola batho ba Jehova. Sefi sena se ka re tšoasa ho sa tsotellehe hore na re na le litokelo life tsa tšebeletso. Ba bang Diabolose o ba tšoasa ba phela hobane ba lumella likhohlano hore li senye khotso le bonngoe le nala ea moea eo Jehova a faneng ka eona.—Pesaleme ea 133:1-3.

16. Ke joang Satane ka bolotsana a ’nileng a leka ho senya bonngoe ba rōna?

¹⁶ Nakong ea Ntoa ea I ea Lefatše, Satane o ile a leka ho felisa karolo e lefatšeng ea mokhatlo o hlophisitsoeng oa Jehova ka ho e hlasela ka ho toba, empa o ile a hlōleha. (Tšenolo 11:7-13) Ho tloha ka nako eo, ka bolotsana o ’nile a leka ho senya bonngoe ba rōna. Haeba re lumella likhohlano hore li bake likarohano, re tla be re file motho enoa “ea tšoasang linonyana” lebaka la hore a ntšetse pele morero oa hae. Seo se ka sitisa ho phalla ha moea o halalelang bophelong ba rōna hammoho le ka phuthehong. Haeba seo se ne se ka etsahala, Satane o ne a tla thaba hobane ntho leha e le efe e senyang khotso le bonngoe ba phutheho e sitisa mosebetsi oa boboleli.—Baefese 4:27, 30-32.

17. Ke eng e ka thusang batho ba nang le likhohlano hore ba li lokise?

¹⁷ U ka etsa joang haeba u e-na le likhohlano le Mokreste-’moho le uena? Ke ’nete hore maemo ha aa tšoane. Leha ho le joalo, le hoja ho ka ’na ha e-ba le mabaka a mangata a etsang hore mathata a be teng, ha ho na lebaka la hore likhohlano li lule li sa lokisoe. (Matheu 5:23, 24; 18:15-17) Keletso e ka Lentsoeng la Molimo, e bululetsoe ebile e phethahetse. Melao-motheo ea Bibele e ke ke ea hlōleha, haeba e sebelisoa. Kamehla e hlahisa liphello tse molemo!

18. Ho etsisa Jehova ho ka re thusa joang hore re lokise likhohlano?

¹⁸ Jehova o “itokiselitse ho tšoarela,” ebile o ‘tšoarela e le kannete.’ (Pesaleme ea 86:5; 130:4) Haeba re mo etsisa, re bontša hore re bana ba Jehova ba ratoang. (Baefese 5:1) Kaofela ha rōna re baetsalibe ’me re hloka tšoarelo ea Jehova e le kannete. Kahoo, re lokela ho ba hlokolosi haeba re sa batle ho tšoarela ba bang. Re ka tšoana le lekhoba leo ho builoeng ka lona setšoantšong sa Jesu le ileng la hana ho tšoarela lekhoba-’moho le lona sekoloto se senyenyane haholo ha se bapisoa le seo mong’a lona a neng a le tšoaretse sona. Ha mong’a lona a bolelloa ka taba ena, o ile a laela hore lekhoba leo le sa tšoareleng le lahleloe chankaneng. Ha Jesu a phethela setšoantšo sa hae o ile a re: “Ntate oa ka oa leholimo le eena o tla sebetsana le lōna ka mokhoa o tšoanang haeba le sa tšoarele e mong le e mong mor’abo ho tloha lipelong tsa lōna.” (Matheu 18:21-35) Ho thuisa ka papiso eo le ho nahana ka makhetlo a mangata ao Jehova a re tšoaretseng ka ’ona ruri ho lokela ho re thusa ha re leka ho lokisa likhohlano le mor’abo rōna!—Pesaleme ea 19:14.

Re Sireletsehile “Sebakeng se Sephiring sa Ea Phahameng ka ho Fetisisa”

19, 20. Linakong tsee tse kotsi re lokela ho talima ‘sebaka se sephiring’ sa Jehova le “moriti” oa Jehova joang?

¹⁹ Re phela mehleng e kotsi. Ka sebele Satane a ka be a re felisitse kaofela ha rōna hoja e ne e se ka tšireletso e lerato ea Jehova. Ka hona, e le hore re se ke ra tšoasoa ke motho enoa “ea tšoasang linonyana,” re lokela ho lula sebakeng sa tšireletso sa tšoantšetso, re lule “sebakeng se sephiring sa Ea Phahameng ka ho Fetisisa,” re ‘iphumanele bolulo tlas’a moriti oa Ea Matla ’Ohle.’—Pesaleme ea 91:1.

²⁰ E se eka kamehla re ka talima likhopotso le litaelo tsa Jehova e le tšireletso, le ka mohla re se ke ra li talima e le tšitiso. Kaofela ha rōna re tobane le senonnori se nang le bohlale bo fetang ba motho. Kantle le thuso e lerato ea Jehova, ha ho ea ka phemang lifi tsa sona. (Pesaleme ea 124:7, 8) Kahoo a re rapeleng Jehova hore a re lopolle lifing tsa “ea tšoasang linonyana”!—Matheu 6:13.

[Mongolo o botlaaseng ba leqephe]

Na U sa Hopola?

• Ke hobane’ng ha “ho thothometsoa ke batho” e le sefi se kotsi?

• Diabolose o sebelisa leraba la ho rata lintho tse bonahalang joang?

• Satane o tšoasitse ba bang joang ka sefi sa boithabiso bo sa lokang?

• Diabolose o sebelisa sefi sefe ho senya bonngoe ba rōna?

[Mantsoe a Hlalosang Setšoantšo a leqepheng la 27]

Ba bang ba tšoasitsoe ke leraba la “ho thothometsoa ke batho”

[Mantsoe a Hlalosang Setšoantšo a leqepheng la 28]

Na u ithabisa ka lintho tseo Jehova a li hloileng?

[Mantsoe a Hlalosang Setšoantšo a leqepheng la 29]

U lokela ho etsa’ng haeba u e-na le likhohlano le Mokreste-’moho le uena?