“Boka Jehova, Moea oa Ka”

“LIKHOELING tsa morao tjena tšebeletso ea ka ha e sa thahasellisa ebile ha e sa thabisa,” ho rialo Nancy.a Ka lilemo tse ka bang leshome, o ’nile a sebeletsa e le pula-maliboho, ’moleli oa nako e tletseng oa litaba tse molemo. Empa oa eketsa: “Ha ke rate se nketsahallang. Ho bonahala eka ke nehelana ka molaetsa oa ’Muso ka tsela e batlang e sa nkame maikutlo, eseng ho tloha pelong. Ke lokela ho etsa’ng?”

Hape, nahana ka taba ea Keith, moholo phuthehong ea Lipaki tsa Jehova. O ile a makala hakaakang ha a utloa mosali oa hae a re: “E tlameha ebe ho na le ntho eo u toutang ka eona. Thapelong eo u sa tsoa e etsa, u ile ua leboha lijo, le hoja ena e se nako ea lijo!” Keith oa lumela: “Kea bona hore lithapelo tsa ka li fetohile tse etsoang ka tloaelo feela.”

Ha ho pelaelo hore ha u rate hore lipolelo tsa hao tsa thoriso ho Jehova Molimo e be tse sa bontšeng kameho le tse etsoang ka tloaelo feela. Ka ho fapaneng, u batla hore e be tse tlohang pelong, tse susumetsoang ke boikutlo ba teboho. Leha ho le joalo, boikutlo bo ke ke ba aparoa kapa ba hloboloa joaloka seaparo. Bo lokela ho tsoa ka hare ho motho. Motho a ka ba le boikutlo ba ho leboha joang ho tloha pelong? Pesaleme ea 103 e re fa temohisiso tabeng ena.

Morena Davida oa Iseraele ea boholo-holo o ile a qapa Pesaleme ea 103. O qala ka mantsoe ana: ‘Boka Jehova, moea oa ka; tsohle tse ka ho ’na a li ke li boke lebitso la hae le khethehileng.’ (Pesaleme ea 103:1) Buka e ’ngoe ea litšupiso e re: “Lentsoe boka, joalokaha le sebelisitsoe ho Molimo, le bolela ho rorisa, ho fanang ka maikutlo a ho ba le kameho e lerato e matla kamehla bakeng sa hae hammoho le boikutlo ba teboho.” Ka lebaka la ho rata ho rorisa Jehova ka pelo e tletseng lerato le kananelo, Davida o khothalletsa moea oa hae—eena ka boeena—ho “boka Jehova.” Empa ke’ng se susumetsang boikutlo boo bo mofuthu ka pelong ea Davida mabapi le Molimo eo a mo rapelang?

Davida o tsoela pele: “U se ke ua lebala liketso tsohle tsa hae [Jehova].” (Pesaleme ea 103:2, NW) Ho ba le boikutlo ba ho leboha Jehova ka sebele ho amana le ho nahanisisa ka kananelo ka ‘liketso tsa hae.’ Ha e le hantle Davida o nahanne ka liketso life tsa Jehova? Ho talima pōpo ea Jehova Molimo, e kang sepaka-paka se tletseng linaleli bosiung bo hlakileng, ka sebele ho ka tlatsa pelo ka teboho bakeng sa ’Mōpi. Maholimo a tletseng linaleli a ile a ama Davida ka ho teba. (Pesaleme ea 8:3, 4; 19:1) Leha ho le joalo, ho Pesaleme ea 103, Davida o hopola mosebetsi oa Jehova oa mofuta o mong.

Jehova ‘o Tšoarela Liphoso Tsohle Tsa Hao’

Pesalemeng ena, Davida o lokolisa liketso tsa Molimo tse bontšang mosa o lerato. Ha a bua ka ea pele le e ka sehloohong ea tsona, oa bina: ‘Jehova o tšoarela liphoso tsohle tsa hao.’ (Pesaleme ea 103:3, NW) Ka sebele Davida o ne a hlokometse boemo ba hae ba boetsalibe. Ka mor’a hore moprofeta Nathane a mo tobe ka bofebe ba hae le Bathe-sheba, Davida o ile a lumela: “Ke sitetsoe uena [Jehova], uena u inotši; ke entse ho leng hobe mahlong a hao.” (Pesaleme ea 51:4) Ka pelo e robehileng, o ile a kōpa ka tieo: “Mpontše mohau, Molimo, ho ea ka mosa oa hao o lerato. Hlakola litlōlo tsa ka ho ea ka bongata ba mehauhelo ea hao. Ntlhatsoe ka ho phethahetseng phosong ea ka, ’me u ntlhoekise esita le sebeng sa ka.” (Pesaleme ea 51:1, 2, NW) E tlameha ebe Davida o ile a ananela hakaakang ha a tšoaretsoe! Joaloka motho ea sa phethahalang, o ile a etsa libe tse ling bophelong ba hae, empa ha ho mohla a ileng a hlōleha ho baka, ho amohela khalemelo le ho lokisa litsela tsa hae. Ho nahana ka liketso tsa Molimo tse hlollang tsa ho mo bontša mosa ho ile ha susumelletsa Davida ho boka Jehova.

Na le rōna ha re baetsalibe? (Baroma 5:12) Esita le moapostola Pauluse o ile a belaela: “Ka sebele ke thabela molao oa Molimo ho ea ka motho eo ke leng eena ka hare, empa lithong tsa ka ke bona molao o mong o loanang khahlanong le molao oa kelello ea ka le o nkisang ke holehiloe molaong oa sebe o lithong tsa ka. Ke monna ea sōtō hakaakang! Ke mang ea tla mpholosa ’meleng ona o fetang lefung lee?” (Baroma 7:22-24) Re ananela hakaakang hore ebe Jehova ha a boloke tlaleho ea litlōlo tsa rōna! O li hlakola ka thabo ha re baka ’me re kōpa tšoarelo.

Davida oa ikhopotsa: “[Ke Jehova] ea folisang mafu ’ohle a hao.” (Pesaleme ea 103:3, NW) Kaha ho folisa ke ho tsosolosa, ho akarelletsa se fetang ho tšoarela phoso. Ho akarelletsa ho tlosoa ha “mafu”—liphello tse mpe tsa ho fosahala ha litsela tsa rōna. Lefatšeng le lecha leo a le entseng, ka sebele Jehova o tla felisa liphello tsa sebe ’meleng, tse kang ho kula le lefu. (Esaia 25:8; Tšenolo 21:1-4) Leha ho le joalo, esita le kajeno, Molimo o re folisa mafu a moea. Ho ba bang, a akarelletsa letsoalo le lebe le ho khaola kamano le eena. “U se ke ua lebala” seo Jehova a seng a se etselitse e mong le e mong oa rōna tabeng ena.

O ‘Pholosa Bophelo ba Hao’

Davida oa bina: “[Ke Jehova] ea pholosang bophelo ba hao sekoting.” (Pesaleme ea 103:4, NW) ‘Sekoti’ ke lebitla le tloaelehileng la batho—Sheole kapa Hadese. Esita le pele e e-ba morena oa Iseraele, Davida o ile a iphumana a le litleneng tsa lefu. Ka mohlala, Morena Saule oa Iseraele o ile a koetlela Davida lehloeo le bolaeang ’me a leka ho mo bolaea ka makhetlo a sa tšoaneng. (1 Samuele 18:9-29; 19:10; 23:6-29) Bafilista le bona ba ne ba batla hore Davida a shoe. (1 Samuele 21:10-15) Empa ka linako tsohle, Jehova o ile a mo pholosa “sekoting.” E tlameha ebe Davida o ile a ikutloa a thabile hakaakang ha a hopola liketso tsee tsa Jehova!

Ho thoe’ng ka uena? Na Jehova o u tšehelitse linakong tsa ho tepella maikutlo kapa linakong tsa tahlehelo? Kapa na u tseba liketsahalo tseo ho tsona a pholositseng bophelo ba Lipaki tsa hae tse tšepahalang sekoting sa Sheole mehleng ea rōna? Mohlomong u ile ua ameha ha u bala litlaleho tsa liketso tsa hae tsa topollo makasineng ena. Ke hobane’ng ha u sa iphe nako ea ho nahana ka liketso tsee tsa Molimo oa ’nete ka kananelo? Ka sebele, kaofela ha rōna re na le lebaka la ho leboha Jehova ka tšepo ea tsoho.—Johanne 5:28, 29; Liketso 24:15.

Jehova o re fa bophelo hammoho le se etsang hore bo thabise ’me bo be molemo. Mopesaleme o bolela hore Molimo ‘o u roesa moqhaka oa mosa o lerato le mehauhelo.’ (Pesaleme ea 103:4, NW) Nakong ea ha re hloka, Jehova ha a re furalle empa oa re thusa ka mokhatlo oa hae o hlophisitsoeng o bonahalang le ka baholo ba khethiloeng kapa balisa, ka phuthehong. Thuso e joalo e re nolofalletsa ho sebetsana le maemo a lekang re sa lahleheloe ke boitlhompho ba rōna le seriti. Balisa ba Bakreste ba tsotella linku haholo. Ba khothatsa ba kulang le ba tepeletseng maikutlo ’me ba etsa sohle seo ba ka se khonang ho tsosolosa ba oeleng. (Esaia 32:1, 2; 1 Petrose 5:2, 3; Jude 22, 23) Moea oa Jehova o susumetsa balisa bana hore ba qenehele mohlape le ho o rata. Ka sebele “mosa o lerato le mehauhelo” tsa hae li tšoana le moqhaka o re khabisang le o re fang seriti! Re sa lebale liketso tsa hae le ka mohla, a re bokeng Jehova le lebitso la hae le halalelang.

Ha mopesaleme Davida a tsoela pele ho ikhothatsa o re: ‘Jehova o khotsofatsa nako ea hao ea bophelo ka se molemo; bocha ba hao bo lula bo inchafatsa feela joaloka ba ntsu.’ (Pesaleme ea 103:5, NW) Bophelo boo Jehova a fanang ka bona ke ba khotsofalo le thabo. Ka sebele, eona tsebo ea ’nete ka boeona ke letlotlo le ke keng la lekanngoa le mohloli oa thabo e hlollang! ’Me hlokomela kamoo mosebetsi oo Jehova a re fileng ona o khotsofatsang ka ho tebileng, e leng oa ho bolela le ho etsa barutuoa. Ho fumana motho ea thahasellang ho ithuta ka Molimo oa ’nete le ho mo thusa ho tseba Jehova le ho mo boka ho thabisa hakaakang! Empa, ebang sebakeng sa habo rōna ho na le ea mamelang kapa che, ke tokelo e hlollang ho ba le karolo mosebetsing o amanang le ho halaletsoa ha lebitso la Jehova le ho tlosa qoso bobusing ba hae.

Ke mang ea ke keng a tepella kapa a khathala ha a ntse a phehella ho etsa mosebetsi oa ho bolela ka ’Muso oa Molimo? Empa Jehova o tsoela pele ho nchafatsa matla a bahlanka ba hae, a etsa hore ba be ‘joalo ka lintsu’ tse nang le mapheo a matla ’me li fofela holimo-limo sepaka-pakeng. Re leboha hakaakang hore ebe Ntate oa rōna ea lerato oa leholimo o fana ka “matla a feletseng” e le hore ka botšepehi re ka etsa tšebeletso ea rōna letsatsi le letsatsi!—Esaia 40:29-31, NW.

Ka mohlala: Clara o sebetsa mosebetsi oa boipheliso oa nako e tletseng ’me o boetse o qeta lihora tse ka bang 50 khoeli le khoeli tšebeletsong ea tšimo. O re: “Ka linako tse ling kea khathala, ’me ke iqobella ho ea tšebeletsong ea tšimo hobane feela ke entse litokisetso tsa ho sebetsa le motho e mong. Empa hang ha ke tsoile, kamehla ke ikutloa ke matlafetse.” E ka ’na eaba le uena u bile le matla a tlisoang ke tšehetso ea Molimo tšebeletsong ea Bokreste. E se eka u ka susumelletseha ho bua joaloka Davida mantsoeng a qalang a pesaleme ena: ‘Boka Jehova, moea oa ka; tsohle tse ka ho ’na a li ke li boke lebitso la hae le khethehileng.’

Jehova o Lopolla Batho ba Hae

Mopesaleme enoa o boetse oa bina: “Jehova o phethisa liketso tsa ho loka le liqeto tsa boahloli bakeng sa bohle ba ntseng ba etsetsoa bolotsana. O ile a tsebisa Moshe litsela tsa hae, a tsebisa bara ba Iseraele litšebelisano tsa hae.” (Pesaleme ea 103:6, 7, NW) Mohlomong, Davida o nahana ka ho “etsetsoa bolotsana” ha Baiseraele tlas’a bahatelli ba Baegepeta mehleng ea Moshe. Ho nahanisisa ka mokhoa oo Jehova a tsebisitseng Moshe litsela tsa hae tsa topollo e tlameha ebe ho ile ha hlahisa boikutlo ba kananelo pelong ea Davida.

Re ka susumelletseha ho leboha ka ho tšoanang ka ho nahana ka litšebelisano tsa Molimo le Baiseraele. Empa ha rea lokela ho hlokomoloha ho nahanisisa ka liphihlelo tsa bahlanka ba Jehova ba kajeno, tse kang tseo ho buuoang ka tsona khaolong ea 29 le 30 bukeng ea Lipaki tsa Jehova—Baboleli ba ’Muso oa Molimo. Litlaleho tse ho eona le tse libukeng tse ling tsa Mokhatlo oa Watch Tower li re nolofalletsa ho bona kamoo Jehova a thusitseng batho ba hae ba mehleng ea kajeno kateng ho mamella ho kenngoa literonkong, liketso tsa mahoohoo, lithibelo, likampo tsa mahloriso le likampo tseo ho tsona batšoaruoa ba qobelloang ho sebetsa ka thata. Ho ’nile ha e-ba le liteko linaheng tse tsekolotsoeng ke ntoa, tse kang Burundi, Liberia, Rwanda le moo pele e neng e le Yugoslavia. Neng le neng ha mahloriso a ne a qhoma, kamehla letsoho la Jehova le ne le tšehetsa bahlanka ba hae ba tšepahalang. Ho nahana ka liketso tsena tsa Molimo oa rōna e moholo, Jehova, ho ka re etsetsa seo ho nahanisisa ka tlaleho ea ho lopolloa Egepeta ho ileng ha se etsetsa Davida.

Hape nahana ka tsela e mosa eo Jehova a re lopollang ka eona khatellong ea sebe. O fane ka “mali a Kreste” hore a ‘hloekise matsoalo a rōna mesebetsing e shoeleng.’ (Baheberu 9:14) Ha re bakela libe tsa rōna ’me re kōpa tšoarelo motheong oa mali a Kreste a tšolotsoeng, Molimo o behella litlōlo tsa rōna hōle le rōna—“joalokaha bochaba-tsatsi bo le hōle le bophirima-tsatsi”—’me o boela oa re amohela. ’Me nahana ka tokisetso ea Jehova ea liboka tsa Bokreste, botsoalle bo hahang, balisa ka phuthehong le lingoliloeng tse thehiloeng Bibeleng tseo re li fumanang ka “lekhoba le tšepahalang le le masene.” (Matheu 24:45) Na liketso tsee tsohle tsa Jehova ha li re thuse ho matlafatsa kamano ea rōna le eena? Davida o re: “Jehova o mohau ’me o mosa, o lieha ho halefa ’me o tletse mosa o lerato. . . . Ha aa re etsa ho ea ka libe tsa rōna; leha e le hore o re tliselitse se re tšoanelang ho ea ka liphoso tsa rōna.” (Pesaleme ea 103:8-14, NW) Ho nahanisisa ka tlhokomelo ea Jehova e lerato ka sebele ho ka re susumelletsa ho mo tlotlisa le ho phahamisa lebitso la hae le halalelang.

“Bokang Jehova, Lōna Mesebetsi Eohle ea Hae”

Ha ho bapisoa le ho se shoe ha Jehova, “Molimo oa bosafeleng,” “matsatsi” a “motho ea shoang” ka sebele a makhutšoanyane—“joaloka a joang bo botala.” Empa Davida ka kananelo oa nahana: “Mosa o lerato oa Jehova o teng ho tloha nakong e sa lekanyetsoang esita le ho isa nakong e sa lekanyetsoang ho ba mo tšabang, le ho loka ha hae ho bara ba bara, ho ba bolokang selekane sa hae le ho ba hopolang litaelo tsa hae e le hore ba ka li phetha.” (Genese 21:33, NW, mongolo o botlaaseng ba leqephe; Pesaleme ea 103:15-18, NW) Jehova ha a lebale ba mo tšabang. Ka nako e loketseng, o tla ba fa bophelo bo sa feleng.—Johanne 3:16; 17:3.

Ha a hlalosa kananelo ea hae bakeng sa borena ba Jehova, Davida o re: “Jehova ka boeena o tiisitse terone ea hae ka mokhoa o sa sisinyeheng maholimong; ’me borena ba hae bo ’nile ba ba le taolo holim’a ntho e ’ngoe le e ’ngoe.” (Pesaleme ea 103:19, NW) Le hoja borena ba Jehova bo ile ba bontšoa ka tsela e bonahalang ka nako e itseng ho pholletsa le ’muso oa Iseraele, ha e le hantle terone ea hae e leholimong. Kaha ke ’Mōpi, Jehova ke ’Musi ea Phahameng ka ho Fetisisa oa bokahohleng ’me o sebelisa thato ea hae ea bomolimo leholimong le lefatšeng ho latela merero ea hae.

Davida o bile o khothatsa libōpuoa tsa mangeloi a leholimo. Oa bina: “Bokang Jehova, Lōna mangeloi a hae, a matla ka bonatla, a phethang taelo ea hae, ka ho mamela lentsoe la taelo ea hae. Bokang Jehova, lōna mabotho ’ohle a hae, lōna basebeletsi ba hae, ba etsang thato ea hae. Bokang Jehova, lōna mesebetsi eohle ea hae, libakeng tsohle tsa taolo ea hae. Boka Jehova, Uena moea oa ka.” (Pesaleme ea 103:20-22, NW) Na ho nahana ha rōna ka liketso tsa Jehova tsa mosa o lerato ho rōna ha hoa lokela hore ho boele ho re susumelletse ho mo boka? Ka sebele! ’Me re ka tiiseha hore molumo oa mantsoe a rōna ha re rorisa Molimo e ke ke ea e-ba oa lefeela har’a sehlopha sa libini tsa barorisi se akarelletsang esita le mangeloi a lokileng. E se eka ka pelo eohle re ka rorisa Ntate oa rōna oa leholimo, re bue hantle ka eena kamehla. Ka sebele, a re nkeng ka botebo mantsoe a Davida a reng, “Boka Jehova, moea oa ka.”

[Mongolo o botlaaseng ba leqephe]

[Setšoantšo se leqepheng la 23]

Davida o ile a nahanisisa ka liketso tsa Jehova tsa mosa o lerato. Na u etsa joalo?