Lentsoe la Jehova Lea Phela
Lintlha-khōlō Tsa Buka ea Bohlano ea Lipesaleme
BARUI ba ka ’na ba re: “Bara ba rōna ba joaloka limela tse nyenyane tse hōlileng bocheng ba tsona, barali ba rōna ba joaloka likhutlo tse betliloeng ka mokhoa oa ntlo ea ’muso, meliko ea rōna e tletse, . . . mehlape ea rōna e ata ka likete.” Ho feta moo, ba hafang ka nkatana ba ka ’na ba re: “Ho thaba batho bao ho bona ho leng feela joalo!” Leha ho le joalo, ho fapana le seo, mopesaleme o re: “Ho thaba batho bao Molimo oa bona e leng Jehova!” (Pesaleme ea 144:12-15) Empa ba ne ba ke ke ba thaba hobane’ng? Jehova ke Molimo ea thabileng, ’me thabo ke kabelo ea barapeli ba hae. (1 Timothea 1:11) ’Nete ena e totobala ka ho hlaka pokellong ea lipina tse bululetsoeng ke Molimo, tsa Pesaleme ea 107 ho ea ho ea 150.
Buka ea Bohlano ea Lipesaleme le eona e totobatsa litšobotsi tse ntlehali tsa Jehova, tse akarelletsang mosa oa hae o lerato, ’nete le molemo. Ha re fumana temohisiso e khōloanyane ka botho ba Molimo, re tla ikutloa re mo rata ebile re mo tšaba le ho feta. Sena le sona sea re thabisa. Re fumana molaetsa oa bohlokoa hakaakang Bukeng ea Bohlano ea Lipesaleme!—Baheberu 4:12.
HO THABISOA KE MOSA O LERATO OA JEHOVA
Bajuda ba neng ba khutla botlamuoeng Babylona ba ile ba bina ba re: “Batho ba ke ba lebohe Jehova ka mosa oa hae o lerato le ka mesebetsi ea hae e hlollang ho bara ba batho.” (Pesaleme ea 107:8, 15, 21, 31) Ha Davida a rorisa Molimo o ile a bina tjena: “’Nete ea hao e khōlō ho ea fihla maholimong.” (Pesaleme ea 108:4) Pineng e latelang, o ile a rapela a re: “Nthuse, Jehova Molimo oa ka; mpholose ho ea ka mosa oa hao o lerato.” (Pesaleme ea 109:18, 19, 26) Pesaleme ea 110 e profeta ka puso ea Mesia. Pesaleme ea 111:10 e re: “Ho tšaba Jehova ke tšimoloho ea bohlale.” Ho ea ka pesaleme e latelang, “ho thaba motho ea tšabang Jehova.”—Pesaleme ea 112:1.
Pesaleme ea 113 ho ea ho ea 118 li bitsoa Lipesaleme tsa Hallel, ’me li bitsoa joalo kahobane khafetsa li sebelisa lentsoe le reng “Hallelujah,” kapa “Rorisang Jah!” Ho ea ka Mishnah—e leng buka e ngotsoeng lekholong la boraro la lilemo eo ho eona ho ileng ha tlalehoa neano ea molomo ea lintho tse etsahetseng pele ho moo—lipina tsena li ne li binoa ka Paseka le meketeng e meng e meraro ea selemo le selemo ea Bajuda. Pesaleme e telele ka ho fetisisa le e nang le likhaolo tse ngata ka Bibeleng, e leng Pesaleme ea 119 e tlotlisa lentsoe la Jehova le senotsoeng, kapa molaetsa oa hae.
Lipotso Tsa Mangolo Lia Arajoa:
109:23—Davida o ne a bolela’ng ha a re: “Joaloka moriti ha o sekama, ke tlameha ho tsamaea”? Ka mokhoa oa thothokiso, Davida o ne a bolela hore o ikutloa a le makhatheng a lefu.—Pesaleme ea 102:11.
110:1, 2—Jesu Kreste, e leng “Morena oa [Davida],” o ile a etsa’ng ha a ntse a lutse ka letsohong le letona la Molimo? Ka mor’a hore Jesu a tsosoe bafung, o ile a nyolohela leholimong ’me a leta a le ka letsohong le letona la Molimo ho fihlela ka 1914 hore a qale ho busa e le Morena. Nakong eo, Jesu o ne a busa balateli ba hae ba tlotsitsoeng, a ba tataisa mosebetsing oa bona oa ho bolela le ho etsa barutuoa hammoho le ho ba hlomella ho ea busa le eena ’Musong oa hae.—Matheu 24:14; 28:18-20; Luka 22:28-30.
110:4—Ke eng eo Jehova a ‘hlapantseng ka eona a sa ikoahlaee’? Kano ena ke selekane seo Jehova a se entseng le Jesu Kreste hore e be Morena le Moprista ea Phahameng.—Luka 22:29.
113:3—Ke ka tsela efe lebitso la Jehova le lokelang ho rorisoa “ho tloha ha letsatsi le chaba ho fihlela ha le likela”? Sena ha se akarelletse feela sehlopha sa batho ba rapelang Molimo letsatsi le letsatsi. Mahlaseli a letsatsi a khantša lefatše lohle ho tloha bochabela moo letsatsi le chabang teng ho ea bophirimela moo le likelang teng. Ka ho tšoanang, Jehova o lokela ho rorisoa lefatšeng lohle. Sena se ke ke sa finyelloa haeba ho sa etsoe boiteko bo hlophisitsoeng hantle. Joaloka Lipaki Tsa Jehova, re na le tokelo ea bohlokoa haholo ea ho rorisa Molimo le ho kopanela ka cheseho mosebetsing oa ho bolela ka ’Muso.
116:15—‘Lefu la ba tšepahalang ba Jehova le bohlokoa hakae mahlong a hae’? Barapeli ba Jehova ke ba bohlokoa haholo ho eena hoo a talimang taba ea hore ba shoe kaofela, e le ntho eo ho hang a ke keng a e lumella. Haeba Jehova a ne a ka lumella hore seo se etsahale, ho ne ho tla ba joalokaha eka lira tsa hae li matla ho mo feta. Ho feta moo, ho ne ho se motho ea tla sala lefatšeng e le motheo oa lefatše le lecha.
119:71—Ho hlorisoa ho ka tlisa molemo ofe? Tsietsi e ka re ruta ho tšepa Jehova ka botlalo, ho mo rapela ka tieo haholoanyane le ho khothalla ho ithuta Bibele haholoanyane le ho sebelisa seo e se bolelang. Ho feta moo, tsela eo re itšoarang ka eona ha re hlorisoa e ka pepesa mefokolo eo re nang le eona e lokelang ho lokisoa. Mahlomola a ke ke a re hlonamisa haeba re a lumella hore a ntlafatse botho ba rōna.
119:96—Ho boleloa eng ha ho thoe ‘bofelo ba phetheho eohle’? Mopesaleme o bua ka phetheho ho ea kamoo batho ba e utloisisang kateng. Mohlomong o ne a nahanne hore maikutlo a batho ka phetheho a na le moo a fellang teng. Ho fapana le seo, taelo ea Molimo ha e na bofokoli bo joalo. Tataiso ea eona e sebetsa likarolong tsohle tsa bophelo. New International Version e re: “Ke bona bofokoli phethehong eohle, empa litaelo tsa hao ha li na moeli.”
119:164—Ho ‘rorisa Molimo ka makhetlo a supileng ka letsatsi’ ho bolela’ng? Hangata supa ke palo e bontšang phetheho. Ka hona, mopesaleme o bolela hore Jehova o lokeloa ke thoriso eohle.
Seo re Ithutang Sona:
107:27-31. Bohlale ba lefatše bo tla ‘ferekana’ ha ntoa ea Armagedone e tlisa timetso. (Tšenolo 16:14, 16) Bo ke ke ba sireletsa motho leha e le ofe hore a se ke a timetsoa. Ke ba talimang ho Jehova feela bakeng sa poloko ba tla phela hore ‘ba mo lebohe ka mosa oa hae o lerato.’
109:30, 31; 110:5. Ka tloaelo, letsoho le letona leo lesole le tšoarang sabole ka lona ha le sireletsoe ke thebe, e neng e tšoaroa ka letsoho le letšehali. Ka tsela ea tšoantšetso, Jehova o ka ‘letsohong le letona’ la bahlanka ba hae hore a ba loanele. Kahoo oa ba sireletsa ebile oa ba thusa—e leng lebaka le letle la hore re ‘mo roke haholo’!
113:4-9. Jehova o phahame haholo hoo a lokelang ho itheola boemong ba hae e le hore “a talime [esita le] leholimong.” Leha ho le joalo, o qenehela ea tlaase, ea futsanehileng, le mosali oa nyopa. Morena ’Musi Jehova o ikokobelitse ’me o batla hore barapeli ba hae le bona ba tšoare batho ba joalo ka tsela e tšoanang.—Jakobo 4:6.
114:3-7. Ho ithuta ka mesebetsi e hlollang eo Jehova a ileng a e etsetsa batho ba hae Leoatleng le Lefubelu, Nōkeng ea Jordane le Thabeng ea Sinai ho lokela ho re susumetsa ka ho teba. Moloko oa batho, o emeloang ke “lefatše,” o lokela ho bontša tšabo e nang le tlhompho—ka tšoantšetso o be ‘bohlokong bo boholo’—ka lebaka la Morena.
119:97-101. Re sireletsoa kotsing ea moea ha re fumana bohlale, temohisiso le kutloisiso Lentsoeng la Molimo.
119:105. Lentsoe la Molimo ke lebone la maoto a rōna ka hore le ka re thusa ho sebetsana le mathata ao re tobanang le ’ona. Hape, ka tšoantšetso le bonesa tsela ea rōna, kaha le bolela esale pele morero oa Molimo mabapi le nako e tlang.
HO THABA LE HA RE LE LITLOKOTSING
Ke joang re ka tobanang le maemo a lekang ’me ra pholoha litlokotsi? Pesalemeng ea 120 ho ea ho ea 134 re fumana karabo e hlakileng potsong ena. Re pholoha mathateng le ho lula re thabile ka hore re kōpe thuso ho Jehova. Lipesaleme tsena, tse bitsoang Lipina Tsa Methati, mohlomong li ne li binoa ha Baiseraele ba ne ba nyolohela Jerusalema ho ea tšoara mekete ea bona ea selemo le selemo.
Pesaleme ea 135 le ea 136 li hlalosa hore Jehova ke Moetsi oa ntho leha e le efe eo a e batlang, ho fapana le litšoantšo tse rapeloang tse sa khoneng ho iketsetsa letho. Pesaleme ea 136 e qapiloe ka tsela ea hore ea e binang a arabeloe ke ba bang, ’me karolo ea ho qetela ea temana ka ’ngoe e binoa ka hore ba bang ba arabele pina. Pesaleme e latelang e hlalosa boemo bo hlomolang pelo ba Bajuda ba neng ba le Babylona ba neng ba batla ho rapela Jehova ba le Sione. Pesaleme ea 138 ho ea ho ea 145 ke tsa Davida. O batla ho ‘roka Jehova ka pelo ea hae eohle.’ Hobane’ng? O re: “Hobane ka tsela e tšosang ke entsoe ka mokhoa o hlollang.” (Pesaleme ea 138:1; 139:14) Lipesalemeng tse hlano tse latelang, Davida o rapella hore a sireletsoe ho batho ba babe, a khalemeloe ke ea lokileng, a lopolloe ho ba mo hlorisang ’me a tataisoe boitšoarong. O totobatsa se thabisang batho ba Jehova. (Pesaleme ea 144:15) Ka mor’a hore Davida a hlahlobe boholo le molemo oa Molimo, o re: “Molomo oa ka o tla bolela thoriso ea Jehova; nama eohle e boke lebitso la hae le halalelang ho isa nakong e sa lekanyetsoang, esita le ka ho sa feleng.”—Pesaleme ea 145:21.
Lipotso Tsa Mangolo Lia Arajoa:
122:3—Jerusalema e ne e le “motse o kopantsoeng hammoho bonngoeng” joang? Joalokaha ho ne ho tloaelehile metseng ea boholo-holo, matlo a Jerusalema a ne a hahelloa ’moho a atamelane. Motse o ne o teteane, ’me ka lebaka leo ho le bonolo ho o sireletsa. Ho feta moo, hore ebe matlo a ne a atamelane joalo ho ne ho e-ba bonolo hore batho ba lulang motseng oo ba thusane ’me ba sireletsane. Sena se bontša bonngoe ba moea ba meloko e 12 ea Iseraele ha e ne e bokana hammoho bakeng sa borapeli.
123:2—Papiso ea mahlo a bahlanka e bolela’ng? Bahlanka le makhabunyane ba sheba letsohong la mong’a bona ka mabaka a mabeli: ho lemoha hore na o batla eng le hore ba fumane tšireletso le lintho tse hlokahalang bophelong. Ka ho tšoanang, re talima ho Jehova hore re lemohe thato ea hae le hore re amohelehe ho eena.
131:1-3—Davida o ile a ‘tšelisa ’me a khutsisa moea oa hae joang joaloka ngoana ea sa tsoa khoesoa’? Joalokaha ngoana ea khoesitsoeng a ithuta hore a tšelisoe a be a khotsofatsoe ke liatla tsa ’mè oa hae, Davida o ile a ithuta ho tšelisa le ho khutsisa moea oa hae “joaloka ngoana ea sa tsoa khoesoa ha a le ho ’m’ae.” Joang? Ka hore a se ke a ikhohomosa pelong le hore mahlo a hae a se ke a iphahamisa le ka hore a se ke a ipatlela lintho tse mo fetang. Ho e-na le ho batla bophahamo, ka tloaelo Davida o ne a lemoha mefokolo ea hae a bile a bontša boikokobetso. Re bontša bohlale ha re etsisa boikutlo ba hae, haholo-holo ha re hahamalla litokelo ka phuthehong.
Seo re Ithutang Sona:
120:1, 2, 6, 7. Liketselletso le lipuo tse hlabang li ka bakela ba bang bohloko boo ba sitoang ho bo mamella. Tsela e ’ngoe ea ho bontša hore re ‘emela khotso’ ke ka ho laola maleme a rōna.
120:3, 4. Haeba re lokela ho mamella motho ea nang le “leleme le qhekellang,” re ka tšelisoa ke ho tseba hore Jehova o tla lokisa litaba ka nako ea hae e loketseng. Baetselletsi ba tla timetsoa ke “monna ea matla.” Ka sebele ba tla fumana kahlolo e bohale ea Jehova e tšoantšetsoang ke “mashala a tukang a sehlahla sa lefielo.”
127:1, 2. Linthong tsohle tseo re li etsang, re lokela ho kōpa Jehova hore a re tataise.
133:1-3. Bonngoe ba batho ba Jehova boa thoba, bo molemo ebile boa khatholla. Ha rea lokela ho bo senya ka ho nyatsa-nyatsa ba bang, ka ho phehisana likhang kapa ho belaela.
137:1, 5, 6. Barapeli ba Jehova ba neng ba le botlamuoeng ba ile ba ikutloa ba khomaretse Sione—e neng e emetse mokhatlo o hlophisitsoeng oa Molimo. Ho thoe’ng ka rōna? Na re khomaretse ka botšepehi mokhatlo o hlophisitsoeng oo Jehova a o sebelisang kajeno?
138:2. Jehova o ‘hōlisa polelo ea hae esita le ka holim’a lebitso lohle la hae’ ka hore litšepiso tsohle tsa hae li tla phethahala le ho feta kamoo re neng re ka lebella kateng. Ka sebele re lebeletse lintho tse hlollang.
139:1-6, 15, 16. Jehova o tseba mesebetsi ea rōna, menahano ea rōna le mantsoe a rōna esita le pele re a bua. O re tseba ho tloha re sa le masea a sa tsoa emoloa, pele setho ka seng sa ’mele se ka hlokomeleha. Tsela eo Molimo a re tsebang ka eona re le batho ka bomong ke e “hlollang haholo” hore re ka e utloisisa. Ka sebele ho tšelisa hakaakang ho tseba hore Jehova ha a bone feela boemo bo lekang boo re ka ’nang ra thulana le bona empa hape o utloisisa kamoo bo ka re amang kateng!
139:7-12. Ha ho sebaka seo re ka eang ho sona se leng hōle haholo ho Molimo hore a re matlafatse.
139:17, 18. Na ho tseba Jehova ke ntho e khahlisang ho rōna? (Liproverbia 2:10) Haeba ho joalo, re fumane seliba se sa cheng sa nyakallo. Menahano ea Jehova “e mengata le ho feta lehlabathe.” Kamehla ho tla ’ne ho be le lintho tse ngata tseo re ka ithutang tsona ka eena.
139:23, 24. Re lokela ho batla hore Jehova a hlahlobe motho oa rōna oa ka hare ho bona hore na re na le ‘litsela tse bohloko’—e leng menahano, litakatso le mekhoa e sa lokelang—’me a re thuse hore re e ntše ka metso.
143:4-7. Ke joang re ka mamellang esita le mathata a boima haholo? Mopesaleme o re fa mokhoa oa ho etsa seo: Re thuise ka mosebetsi oa Jehova, re nahanisise ka mosebetsi oa matsoho a hae ’me re rapelle hore a re thuse.
“Rorisang Jah!”
Pokello e ’ngoe le e ’ngoe ea tse ’nè tse qalang tsa lipesaleme e qetella ka mantsoe a rorisang Jehova. (Pesaleme ea 41:13; 72:19, 20; 89:52; 106:48) Pokello ea ho qetela le eona e qetella ka mantsoe a rorisang Jehova. Pesaleme ea 150:6 e re: “Ntho e ’ngoe le e ’ngoe e phefumolohang—e ke e rorise Jah. Rorisang Jah!” Ka sebele seo se tla etsahala lefatšeng le lecha la Molimo.
Ha re ntse re lebeletse ka thabo nako eo e monate, re na le mabaka a mangata a ho tlotlisa Molimo oa ’nete le ho rorisa lebitso la hae. Ha re nahana ka thabo eo re nang le eona hobane re tseba Jehova ebile re na le kamano e ntle le eena, na ha re susumelletsehe hore re mo rorise ka lipelo tse tletseng teboho?
[Setšoantšo se leqepheng la 15]
Mesebetsi ea Jehova e hlollang ea tšosa
[Setšoantšo se leqepheng la 16]
Menahano ea Jehova “e mengata le ho feta lehlabathe”