“Jesu Kreste ke Morena”—Joang Hona Neng?

“MORENA o itse ho Morena oa ka, Lula letsohong la ka le letona, ho fihlela ke etsa lira tsa hao bonamelo ba maoto a hao.” Ena ke phetolelo ea Pesaleme ea 110:1 ho latela King James Version. “MORENA” ke mang moo, hona o bua le mang?

Phetolelo e nepahetseng haholoanyane ea temana ea Seheberu e ka araba potso ea pele ka potlako. “Polelo ea Jehova ho Morena oa ka ke: . . . ” Kahoo, “MORENA” e ngotsoeng ka litlhaku tse khōlō ke Molimo ea matla ’ohle, Jehova ka boeena. Le hoja King James Version e lumela lebitso la Molimo ka ho sebelisa “MORENA” ho fapana le “Morena,” hase ea pele e ileng ea ferekanya litlotla tsena, hobane Septuagint ea Segerike sa boholo-holo, e fetoletsoeng ho tsoa Seheberung, e sebelisitse “Morena” bakeng sa Jehova likoping tsa eona tsa morao-rao. Hobane’ng? Hobane tlotla “Morena” e ile ea nkela lebitso la Molimo sebaka, Litlhaku tse ’nè tsa Seheberu tse Emelang Lebitso la Molimo (יהוה). Setsebi A. E. Garvie se re: “Tšebeliso ea tlotla Morena [kyʹri·os] mohlomong e hlalosoa habonolo haholo tšebelisong ea tlotla eo synagogeng ea Bajode ho e-na le lebitso la selekane Yahveh [Jehova], ha Mangolo a ne a baloa.”

Bibele e khetholla Jehova e le “Morena ’Musi.” (Genese 15:2, 8, NW; Liketso 4:24, NW; Tšenolo 6:10, NW) Hape o bitsoa “Morena oa ’nete” le “Morena oa lefatše lohle.” (Exoda 23:17, NW; Joshua 3:13; Tšenolo 11:4, NW) Joale, “Morena” e mong oa Pesaleme ea 110:1 ke mang, hona ho tlile joang hore Jehova a mo hlokomele e le “Morena”?

Jesu Kreste e le “Morena”

Ho buuoa ka Jesu e le “Morena” Likosepeleng tse ’nè, khafetsa ho Luka le Johanne. Lekholong la pele la lilemo C.E., tlotla ena e ne e bonahatsa tlhompho le mekhoa e metle, e tšoana le “Monghali.” (Johanne 12:21; 20:15, Kingdom Interlinear) Kosepeleng ea Mareka lentsoe “Tichere,” kapa Rab·boʹni, le sebelisoa hangata ha ho buuoa ka Jesu. (Bapisa Mareka 10:51 le Luka 18:41.) Esita le potso ea Saule tseleng e eang Damaseka, “U mang, Morena?” e ne e na le moelelo ona o akaretsang oa patlisiso e bonahatsang mekhoa e metle. (Liketso 9:5) Empa eitse ha balateli ba Jesu ba tseba Monghali oa bona, hoa bonahala hore ho sebelisa ha bona tlotla “Morena” ho ne ho bolela ho fetang tlhompho feela tjee.

Ka mor’a lefu la hae le tsoho empa e le pele a nyolohela leholimong, Jesu o ile a hlaha ho barutuoa ba hae ’me a etsa tsebiso ena e makatsang: “Ke neiloe borena bohle leholimong le lefatšeng.” (Mattheu 28:18) Joale, ka letsatsi la Pentekonta, ka tlas’a tšusumetso ea moea o halalelang o ileng oa tšolloa, Petrose o ile a bua ka Pesaleme ea 110:1 ’me a re: “Ntlo eohle ea Iseraele e ke e tsebe ka ’nete, hobane Jesu eo le mo thakhisitseng, Molimo o mo entse Morena le Kreste.” (Liketso 2:34-36) Ka lebaka la ho tšepahala ha hae ho fihlela lefung le lihlong thupeng ea tlhokofatso, Jesu o ile a tsosoa ’me a fuoa moputso o phahameng ka ho fetisisa. Eaba o kena boreneng ba hae leholimong.

Moapostola Pauluse o ile a tiisa mantsoe a Petrose ha a ngola hore Molimo o ile “oa mo [Kreste] lulisa letsohong le letona la oona, maholimong, ka holim’a boholo bohle, le puso eohle, le matla ’ohle, le borena bohle, le mabitso ’ohle a ka bitsoang, e seng lefatšeng lena feela, empa e leng le ho le tlang ho tla.” (Ba-Efese 1:20, 21) Borena ba Jesu Kreste bo phahametse borena bohle, ’me bo tla tsoela pele ho fihlela lefatšeng le lecha. (1 Timothea 6:15) O ile a ‘phahamisoa ka ho fetisa’ ’me a fuoa “lebitso le holim’a mabitso ’ohle” e le hore e mong le e mong a lumele “hore Jesu Kreste ke Morena, e be tlotliso ea Molimo Ntate.” (Ba-Filippi 2:9-11) Karolo ea pele ea Pesaleme ea 110:1 e ile ea phethahala ka tsela eo, ’me “mangeloi, le marena, le mebuso” li ne li le tlas’a borena ba Jesu.—1 Petrose 3:22; Ba-Heberu 8:1.

Mangolong a Seheberu, polelo “Morena oa marena” e sebetsa ho Jehova feela. (Deuteronoma 10:17; Pesaleme ea 136:2, 3) Empa Petrose ka tlas’a pululelo o ile a re ka Kreste Jesu: “Enoa ke Morena oa bohle [kapa, “Morena oa rōna bohle,” Goodspeed].” (Liketso 10:36, NW) Ka sebele ke “Morena oa ba shoeleng le ba phelang.” (Ba-Roma 14:8, 9, NW) Ntle ho tika-tiko Bakreste ba nka Jesu Kreste e le Morena le Mong’a bona ’me ba ikemiselitse ho mo utloa e le bafo ba hae, ba rekiloeng ka mali a hae a bohlokoahali. ’Me Jesu Kreste o busitse e le ’Musi oa babusi le Morena oa marena holim’a phutheho ea hae ho tloha ka Pentekonta ea 33 C.E. Empa hona joale, ho tloha ka 1914, o filoe matla a bobusi hore a buse boemong boo ho bona, lira tsa hae li behiloeng ‘bonamelo ba maoto a hae.’ Joale nako e ne e fihlile ea hore a ‘hlome ’muso har’a tsona,’ tsohle tsena li phethahatsa Pesaleme ea 110:1, 2.—Ba-Heberu 2:5-8; Tšenolo 17:14; 19:16.

Joale mantsoe a Jesu “ntho tsohle li beiloe ho ’na ke Ntate,” ao a ileng a a bua pele ho lefu la hae le tsoho, a lokela ho utloisisoa joang? (Mattheu 11:25-27, NW; Luka 10:21, 22) Polelo ena hase e pharaletseng joaloka tseo ho seng ho builoe ka tsona. Ho Mattheu le Luka, moelelo o senola hore Jesu o ne a bua ka tsebo e patetsoeng batho ba bohlale ba lefatše empa e senotsoe ka eena hobane ‘ka ho feletseng o tseba’ Ntate. Ha a kolobetsoa metsing ’me a tsoaloa e le Mora oa Molimo oa moea, Jesu o ile a khona ho hopola bophelo ba hae ba leholimong pele e e-ba motho le tsebo eohle e neng e amana le bona, empa ena e ne e le ntho e fapaneng le borena ba hae hamorao.—Johanne 3:34, 35.

Ho Khetholla Jesu Kreste e le Morena

Liphetolelo tse ling tsa Mangolo a Segerike a Bokreste li ba le bothata ha li fetolela litaba tse qotsitsoeng Mangolong a Seheberu a buang ka ho hlaka ka “MORENA,” Jehova Molimo. Ka mohlala, bapisa Luka 4:19 le Esaia 61:2 ho King James Version kapa The New Jerusalem Bible. Batho ba bang ba nahana hore Jesu o ile a nka tlotla “Morena” ho Jehova le hore Jesu ha a le nameng e ne e hlile e le Jehova, empa sena ke khang eo ho seng Mangolo a e tšehetsang. Jehova Molimo le Mora oa hae, Jesu Kreste, kamehla ba khetholloa ka hloko Mangolong. Jesu o ile a tsebahatsa lebitso la Ntat’ae ’me a mo emela.—Johanne 5:36, 37.

Mehlaleng e latelang, hlokomela litaba tse qotsitsoeng Mangolong a Seheberu joalokaha li hlaha Mangolong a Segerike. Jehova Molimo le Motlotsuoa oa hae, kapa Messia, ka bobeli ho builoe ka bona ho Liketso 4:24-27 (NW), e qotsang ho Pesaleme ea 2:1, 2. (NW) Taba e potolohileng Ba-Roma 11:33, 34 (NW) ka ho hlakileng e bua ka Molimo, Mohloli oa bohlale bohle le tsebo, ka ho qotsa ho Esaia 40:13, 14. (NW) Ha a ngolla phutheho ea Korinthe, Pauluse o pheta taba ena e qotsitsoeng, “Ke mang ea tsebang mohopolo oa Jehova?” ’me oa phaella: “Empa re na le mohopolo oa Kreste.” Morena Jesu o ile a senolela balateli ba hae mohopolo oa Jehova litabeng tse ngata tsa bohlokoa.—1 Ba-Korinthe 2:16, NW.

Ka linako tse ling temana e leng Mangolong a Seheberu e bua ka Jehova, empa ka lebaka la ho nehelana ka matla a Hae le bolaoli, e phethahalitsoe ho Jesu Kreste. Ka mohlala, Pesaleme ea 34:8, e re memela ho ‘latsoa, le ho bona hoba Jehova o molemo.’ Empa Petrose o sebelisa sena ho Morena Jesu Kreste ha a re: “Haeba le latsoitse hore Morena o mosa.” (1 Petrose 2:3, NW) Petrose o nka molao-motheo ’me o bontša kamoo o sebetsang le ho Jesu Kreste. Ka ho fumana tsebo ka Jehova Molimo le Jesu Kreste le ho e sebelisa, Bakreste ba ka thabela litlhohonolofatso tse enneng tse tsoang ho Ntate le Mora oa hae. (Johanne 17:3) Mohopolo ona oa Petrose ha o etse hore Morena ’Musi Jehova e be motho a le mong le Morena Jesu Kreste.—Bona mongolo o botlaaseng ba leqephe ho 1 Petrose 2:3, NW.

Maemo a sa lekaneng a Jehova Molimo le Mora oa hae, Jesu Kreste a hlakisitsoe haholo ke moapostola Pauluse ha a re: “Ho rōna Molimo o mong feela, e leng Ntat’a rōna, e leng oo tsohle li tsoang ho oona, oo re leng ho oona; ’me re na le Morena a le mong feela, e leng Jesu Kreste, eo tsohle li entsoeng ka eena, le rōna re leng ka eena.” (1 Ba-Korinthe 8:6; 12:5, 6) Ha a ngolla phutheho ea Bokreste e Efese, Pauluse o ile a khetholla “Morena a le mong,” Jesu Kreste, e le ea arohaneng le ‘Molimo a le mong, e leng Ntat’a bohle.’—Ba-Efese 4:5, 6.

Jehova ea Phahametseng Tsohle

Ho tloha ka selemo sa 1914, mantsoe a Tšenolo 11:15 a ipakile ho ba ’nete: “Mebuso ea lefatše e fetohile ’muso oa Morena oa rōna [Jehova Molimo] le oa Kreste oa hae, ’me o tla busa ka ho sa feleng.” The New International Dictionary of New Testament Theology (Buka 2, leqephe 514) e re: “Ha Kreste a se a hlōtse bolaoli bohle (1 Ba-Kor. 15:25), o tla ikokobeletsa Molimo Ntate. Kahoo borena ba Jesu bo tla be bo finyeletse pakane ea bona ’me Molimo e tla ba tsohle ho bohle (1 Ba-Kor. 15:28).” Qetellong ea Puso ea hae ea Lilemo tse Sekete, Kreste Jesu o busetsa matla le bolaoli tseo a neng a li neiloe ho Ntat’ae, Molimo ea Matla ’Ohle. Kahoo, khanya eohle le borapeli ka nepo li nehiloe Jehova, “Molimo oa Morena oa rōna Jesu Kreste.”—Ba-Efese 1:17.

Le hoja hona joale Jesu e le Morena oa marena, ha ho mohla a kileng a bitsoa Molimo oa melimo. Jehova o lula a phahametse tsohle. Ka tsela ena, Jehova e tla ba “tsohle ho bohle.” (1 Ba-Korinthe 15:28) Borena ba Jesu bo ’meha sebakeng se loketseng joaloka Hlooho ea phutheho ea Bokreste. Le hoja re ka ’na ra bona “marena” a mangata a matla a le litulong tse phahameng lefatšeng lena, re beha tšepo ea rōna ho eo e leng Morena oa marena. Leha ho le joalo, Jesu Kreste, boemong ba hae bo phahameng le bo holimo, o ntse a lula a le ka tlas’a Ntat’ae, “e le hore Molimo a buse tsohle.” (1 Ba-Korinthe 15:28, The Translator’s New Testament) Jesu o behetse barutuoa ba hae mohlala o motle hakaakang oa boikokobetso e le hore ba ka o latela, esita le hoja ba mo nka e le Morena oa bona!

[Lebokose le leqepheng la 30]

“Ha bangoli ba Testamente e Ncha ba bua ka Molimo ba bolela Molimo le Ntate oa Morena oa rōna Jesu Kreste. Ha ba bua ka Jesu Kreste, ha ba bue ka eena, leha e le hona ho mo nahana e le Molimo. Ke Kreste oa Molimo, Mor’a Molimo, Bohlale ba Molimo, Lentsoe la Molimo. Esita le Selelekela sa St. John, se leng haufi-ufi le Thuto ea Bolumeli ea Nicene, se tlameha ho baloa leseling la boemo bo tlaasana ba mora bo leng teng Kosepeleng eohle; ’me Selelekela sena ka Segerike ha sea hlaka ha [the·osʹ] e sebelisitsoe ka ntle ho lereho-lekhethi kapa lereho-leakaretsi ho feta kamoo se bonahalang se le kateng ka Senyesemane.”—“The Divinity of Jesus Christ,” ka John Martin Creed.