Li Bohlokoa ho Feta Lik’horale
Lipalo tse ntseng li eketseha tsa baeti li ’nile tsa hlolloa ke lipontšo tse kang ena e ka metsing a Leoatle le Lefubelu.
Litlhapi tse ngata-ngata tse nang le mebala e kang ea mookoli le mebala e meng e mengata lia hlolla ho ba sesang metsing a hloekileng. Empa hlokomela hore ho potoloha litlhapi tse mebala-bala tse bonoang mona, ho na le pontšo e khahlang mahlo ea limakatso tse ling tse ka tlaase ho leoatle, ho akareletsa le lik’horale tse mebala e khanyang.
Lik’horale tse ntle-ntle li fumaneha ka libōpeho le mebala e mengata. Joalokaha u ka nahana, esita le mehleng ea boholo-holo likotoana tse ntle tsa k’horale li ne li talingoa e le tsa bohlokoahali. Batho ba etsang mesebetsi ea matsoho ba ne ba etsa mekhabiso ea feshene e ratehang ka tsona, ’me bangoli ba Bibele ba ile ba bua ka lik’horale hammoho le khauta, silevera, le rubise. (Liproverbia 3:14, 15; Ezekiele 27:16) Empa bangoli bao ba re thusa ho bona ka ’nģane ho botle le bohlokoa ba lik’horale ka botsona.
Ba ile ba totobatsa hore lintho tse ling li bohlokoa le ho feta le hore re lokela ho li talima e le tsa bohlokoa haholoanyane. Ho hong ke mosali ea molemo, ea ipabolang, hobane rea bala: “Mosali ea ipabolang ke mang ea tla mo fumana? Bohlokoa ba hae bo fetisa ba lik’horale hole.” (Liproverbia 31:10, NW) Na u monna ea nyetseng? Talima hape lik’horale tsena tse hlollang ka botle, ’me u ke u nahane u khutsitse ka hore na u talima mosali oa hao e le oa bohlokoahali joalokaha ho mo loketse.
Hore na re banna kapa re basali, re nyetse kapa re masoha, pono ea lik’horale tse hlollang ka botle e lokela ho re thusa ho ananela bohlokoa bo boholoanyane ba bohlale, temoho, le tsebo tsa bomolimo. Lentsoe la Molimo le re: “Ho lehlohonolo [“thabile,” NW] motho ea fumaneng bohlale, ea fihletseng kutloisiso; hobane khoebo ea jona e fetisa silefera, ho ata ha jona ho fetisa ha khauta. Bo fetisa liperela [“lik’horale,” NW] ka bohlokoa, tsohle tse lakatsehang ha li lekane le bona.”—Liproverbia 3:13-15; 8:11.
Kahoo hore na re li bona ka ho sesa kapa setšoantšong, lik’horale tsa Leoatle le Lefubelu li lokela ho fetisetsa ho rōna botle le boitsebiso bakeng sa ho nahanisisoa hamolemo.