Ho Hlaolela Tšabo ea Bomolimo

“Tšaba Jehova ’me u furalle bobe.”—LIPROVERBIA 3:7, NW.

 1. Liproverbia e ngoletsoe bo-mang?

BUKA ea Bibele ea Liproverbia e na le leruo la keletso ea moea. Qalong Jehova o ile a fana ka buka ena ea tataiso bakeng sa ho ruta sechaba sa hae sa Iseraele. Kajeno, e fana ka lipolelo tse bohlale ho sechaba se halalelang sa Bakreste, “ba hlahetsoeng ke mehla ea bofelo.”—1 Ba-Korinthe 10:11; Liproverbia 1:1-5; 1 Petrose 2:9.

 2. Ke hobane’ng ha temoso e ho Liproverbia 3:7 e le nakong kajeno?

² Ha re phetla Liproverbia 3:7 (NW) rea bala: “U se ke ua ipona bohlale. Tšaba Jehova ’me u furalle bobe.” Ho tloha nakong ea batsoali ba rōna ba pele, ha Noha e hohela Eva ka tšepiso ea hore ba tla ‘tseba botle le bobe,’ bohlale feela tjee ba batho bo hlōlehile ho khotsofatsa litlhoko tsa moloko oa batho. (Genese 3:4, 5; 1 Ba-Korinthe 3:19, 20) Ha ho mohla sena se ileng sa totobala historing ho feta lekholong lena la bo20 la lilemo—‘mehleng ena ea qetello’ ha moloko oa batho, o kotulang litholoana tsa ho latola boteng ba Molimo, o nang le mohopolo oa hore lintho li iphetotse, o hlasetsoe ke khethollo ea morabe, pefo le mofuta o mong le o mong oa boitšoaro bo bobe. (2 Timothea 3:1-5, 13; 2 Petrose 3:3, 4) Ke ‘ho hloka taolo ha lefatše le lecha’ hoo Machaba a Kopaneng kapa malumeli a lefatše a arohaneng a ke keng a ho lokisa.

 3. Ke liketsahalo life tse profetiloeng bakeng sa mehla ea rōna?

³ Lentsoe la Molimo la boprofeta le re bolella hore makhotla a bademona a ile ho “marena a lefatše le a linaha tsohle tseo ho ahiloeng ho tsona, ho a memela ntoa ea letsatsi le leholo la Molimo o matla ’ohle. . . . thoteng e bitsoang Harmagedone, ka seheberu.” (Tšenolo 16:14, 16) Kapele tšabo e tsoang ho Jehova e tla aparela marena ao kapa babusi. E tla tšoana le tšabo e ileng ea aparela Bakanana ha Joshua le Baiseraele ba ba ahlola. (Joshua 2:9-11) Empa kajeno ke ea tšoantšetsoang ke Joshua, e leng Kreste Jesu—“Morena oa marena, le ’Musi oa babusi”—ea tla ‘alosa lichaba ka lere la tšepe’ ponahatsong ea “bohale le ea khalefo ea Molimo o matla ’ohle.”—Tšenolo 19:15, 16.

 4, 5. Ke bo-mang ba tla bolokeha, hona hobane’ng?

⁴ Ke mang ea tla bolokeha ka nako eo? Ba tla lopolloa e ke ke ea e-ba ba aparetsoeng ke tšabo, empa e tla ba bohle ba hlaoletseng tšabo ea Jehova e bonahatsang tlhompho. Ho e-na le ho ipona bohlale, bana ba ‘furalla bobe.’ Ka boikokobetso, ba fepa likelello tsa bona ka se molemo, e le hore bobe bo tsoe menahanong ea bona. Ba rata ho hlompha ’Musi Morena Jehova hamolemo, “Moahloli oa lefatše,” ea tla tloha a ahlola e mong le e mong ea khomarelang bobe, hantle feela joalokaha a ile a felisa ka ho feletseng batho ba Sodoma ba silafetseng. (Genese 18:25) Ka sebele, bakeng sa batho ba Molimo, “ho tšaba Jehova ke seliba sa bophelo, ho qobisa batho mamena a lefu.”—Liproverbia 14:27.

⁵ Nakong ena ea kahlolo ea bomolimo, bohle ba inehelang ho Jehova ka ho feletseng ba tšabang hore le ka mohla ba mo utloise bohloko ba tla elelloa ’nete e bontšitsoeng ka tsela ea tšoantšetso ho Liproverbia 3:8: “[Tšabo ea Jehova] e tla ba sehlare mesifeng ea hao, le moko masapong a hao.”

Ho Hlompha Jehova

 6. Ke’ng se lokelang ho re susumeletsa ho ela Liproverbia 3:9 hloko?

⁶ Ho tšaba ha rōna Jehova ho bonahatsang kananelo, hammoho le lerato le matla ho eena, li lokela ho re susumeletsa ho ela hloko Liproverbia 3:9: “Tlotlisa Jehova ka moruo oa hao, le ka lilopotsiea tsa tsohle tse u atetseng.” Ha re hatelloe hore re hlomphe Jehova ka linyehelo. E lokela ho ba tsa boithatelo, joalokaha ho bontšitsoe ka makhetlo a 12 ho Exoda 35:29 ho ea ho Deuteronoma 23:23 mabapi le mahlabelo Iseraeleng ea boholo-holo. Lilopotsiea tsena tse fuoang Jehova e lokela ho ba limpho tse molemohali tseo re ka fanang ka tsona, ha re hlokomela molemo le mosa o lerato oo re o thabetseng letsohong la hae. (Pesaleme ea 23:6) Li lokela ho bonahatsa qeto ea rōna ea hore re ‘’ne re batle ’muso pele le ho loka ha hae.’ (Mattheu 6:33, NW) ’Me liphello tse molemo tse tla tlisoa ke ho tlotlisa Jehova ka matlotlo a rōna ke life? “’Me meliko ea hao e tla tlala, e phanya-phanye, mafiso a hao a tlale veine e monate.”—Liproverbia 3:10.

 7. Ke lilopotsiea life tseo re lokelang ho li fa Jehova, ’me phello e tla ba efe?

⁷ Tsela e ka sehloohong eo Jehova a re hlohonolofatsang ka eona ke ea moea. (Malakia 3:10) Kahoo, lilopotsiea tseo re mo fang tsona haholo-holo e lokela ho ba tsa moea. Re lokela ho sebelisa nako ea rōna, le matla a rōna bakeng sa ho etsa thato ea hae. Sena se tla re matlafatsa joalokaha mosebetsi o joalo e ile ea ba “sejo” se matlafatsang ho Jesu. (Johanne 4:34) Meliko ea rōna ea phepelo ea moea e tla tlatsoa, ’me thabo ea rōna, e tšoantšetsoang ke veine e ncha, e tla khaphatseha. Ho phaella moo, ha ka tšepo re rapella lijo tsa nama tse lekaneng bakeng sa letsatsi le leng le le leng, ka tsela e tšoanang re ka nehela ka seatla se bulehileng ho tsoa ho seo re nang le sona bakeng sa ho tšehetsa mosebetsi oa ’Muso oa lefatše lohle. (Mattheu 6:11) Ntho e ’ngoe le e ’ngoe eo re nang le eona, ho akareletsa le lintho tse bonahalang, re li filoe ke Ntate oa rōna oa leholimo ea lerato. O tla re tšollela litlhohonolofatso tse eketsehileng, ho isa bohōleng boo re sebelisang matlotlo ana thorisong ea hae.—Liproverbia 11:4; 1 Ba-Korinthe 4:7.

Likhalemelo tsa Lerato

 8, 9. Re lokela ho talima khalemelo le taeo joang?

⁸ Litemaneng tsa 11 le 12, Liproverbia khaolo ea 3 e bua hape ka kamano e thabileng ea ntate le mora e leng teng malapeng a tšabang Molimo, esita le pakeng tsa Jehova le bana ba hae ba moea ba ratoang ba leng lefatšeng. Rea bala: “Mora oa ka, u se ke ua nyelisa taeo ea Jehova, u se ke ua felloa ke pelo ha u otloa ke eena. Hobane Jehova o khalemela eo a mo ratang, joalo ka ntat’a motho a eeng a khalemele mora oa hae ea ratoang.” Batho ba lefatše ba hloile khalemelo. Batho ba Jehova ba lokela ho e amohela. Moapostola Pauluse o ile a qotsa mantsoe ana ho Liproverbia, a re: “Mora oa ka, se nyatse taeo ea Morena, ’me u se ke ua tepella ha u khalemeloa ke eena; hobane Morena o ee a laee eo a mo ratang . . . Empa taeo ha e hlahela motho, ha ho bonahale kamoo e ka mo thabisang kateng; ea mo llisa; empa hamorao, ba rutoang ka eona e ba kotulisa khotsong litholoana tsa ho loka.”—Ba-Heberu 12:5, 6, 11.

⁹ E, khalemelo le taeo ke karolo e hlokahalang koetlisong ea e mong le e mong oa rōna, ebang re e fumana ho batsoali, phuthehong ea Bokreste kapa ha re ntse re thuisa ka Mangolo nakong ea thuto ea rōna ea botho. Ho ela taeo hloko ha rōna ke taba ea bophelo le lefu, joalokaha le Liproverbia 4:1, 13 e bolela: “Bana ba ka, mamelang thuto ea ntat’a lōna, le e nahane, le tle le fihlele kelello. Tšoara taeo ka matla, u se ke ua e lesa ea phonyoha, u e boloke, hobane, ke bophelo ho uena.”

Thabo e Khōlō ka ho Fetisisa

10, 11. Mantsoe a thabisang a ho Liproverbia 3:13-18 a na le litšobotsi life?

¹⁰ Ke lipolelo tse ntle hakaakang tse latelang, ka sebele ke ‘mantsoe a ’nete a nepahetseng a bileng a thabisang’! (Moeklesia 12:10) Mantsoe ana a bululetsoeng a Salomone a hlalosa thabo ea ’nete. Ke mantsoe ao re lokelang ho a ngola lipelong tsa rōna. Rea bala:

¹¹ “Ho lehlohonolo [“Ho thabile,” NW] motho ea fumaneng bohlale, ea fihletseng kutloisiso; hobane khoebo ea jona e fetisa silefera, ho ata ha jona ho fetisa ha khauta. Bo fetisa liperela ka bohlokoa, tsohle tse lakatsehang ha li lekane le bona. Bo kakatletse bolelele ba litšiu letsohong le letona, le menono le boholo letsohong le letšehali. Litsela tsa bona ke litsela tse khahlehang, mebila ea bona ke khotso. Ke sefate sa bophelo ho ba bo ruileng, ba bo lotolotsang ba na le lehlohonolo.”—Liproverbia 3:13-18.

12. Bohlale le tlhalohanyo li re tsoela molemo joang?

¹² Bohlale—ke hangata hakae ho builoeng ka bona bukeng ea Liproverbia, ka makhetlo a 46! “Qalo ea bohlale ke ho tšaba Jehova.” Bona ke bohlale ba bomolimo, bo sebetsang bo theiloeng tsebong ea Lentsoe la Molimo le nolofaletsang batho ba hae ho tšoarella tseleng e sireletsehileng ho pholletsa le lifefo tse kotsi tse befileng lefatšeng la Satane. (Liproverbia 9:10) Tlhalohanyo eo ho builoeng ka eona ka makhetlo a 19 ho Liproverbia e amana haufi-ufi le bohlale e leng se re thusang ho loantša merero ea bolotsana ea Satane. Tabeng ea ho hlohleletsa maqiti a bolotsana a hae, Mohanyetsi enoa e moholo o na le phihlelo ea lilemo tse likete-kete. Empa re na le tichere ea bohlokoa ho feta phihlelo e leng—tlhalohanyo ea bomolimo, matla a ho khetholla se nepahetseng ho se fosahetseng le ho khetha tsela e nepahetseng eo re lokelang ho tsamaea ho eona. Sena ke seo Jehova a re rutang sona ka Lentsoe la hae.—Liproverbia 2:10-13; Ba-Efese 6:11.

13. Re ka sireletsoa ke’ng nakong e thata ea moruo, hona ka tsela efe?

¹³ Ho se laolehe ho feletseng ha moruo lefatšeng la kajeno ke selelekela sa ho phethahala ha boprofeta ba Ezekiele 7:19: “Ba lahlela silefera ea bona literateng, ’me khauta ea bona e tla ba litšila feela; silefera le khauta tsa bona ha li na matla a ho ba pholosa tsatsing la khalefo ea Jehova.” Leruo lohle la lintho tse bonahalang lefatšeng le ke ke la bapisoa le matla a bolokang a bohlale le tlhalohanyo. Morena Salomone ea bohlale o ile a bua tjena ka lekhetlo le leng: “Bohlale ke tširelo, joalo ka ha le eona chelete e le tširelo; empa moo tsebo e fetisang ka molemo, ke hobane bohlale bo phelisa ba bo ruileng.” (Moeklesia 7:12) Ka sebele ho thabile bohle bao kajeno ba tsamaeang litseleng tsa Jehova tse thabisang le bao ka bohlale ba khethang “bolelele ba litšiu,” bophelo bo sa feleng boo e leng mpho ea Molimo ho e mong le e mong ea bontšang tumelo sehlabelong sa Jesu sa thekollo!—Liproverbia 3:16; Johanne 3:16; 17:3.

Ho Hlaolela Bohlale ba ’Nete

14. Jehova o bonahalitse bohlale bo ikhethang ka litsela life?

¹⁴ Ke ho loketseng hore rōna batho, ba bōpiloeng ka setšoantšo sa Molimo, re loanele ho hlaolela bohlale le tlhalohanyo, e leng litšoaneleho tseo Jehova ka boeena a li bonahalitseng ha a etsa mesebetsi ea hae e hlollang ea pōpo. “Jehova ka boeena o thehile lefatše ka bohlale. A tiisa maholimo ka tlhalohanyo.” (Liproverbia 3:19, 20, NW) O ile a tsoela pele ho etsa lintho tse phelang, eseng ka tšebetso ea mohlolo e sa bonahaleng, e ke keng ea hlalosoa ea ho iphetola ha lintho, empa ka liketso tse tobileng tsa pōpo, e ’ngoe le e ’ngoe ‘ka mofuta oa eona’ ’me e le ka morero o bohlale. (Genese 1:25) Ha qetellong motho a etsoa ka bohlale le ka matla a phahametseng a liphoofolo hōle, e tlameha ebe mehoo ea bara ba Molimo ba mangeloi e ile ea pheta-phetoa ho pholletsa le maholimo. (Bapisa le Jobo 38:1, 4, 7.) Ponelo-pele ea Jehova e nang le tlhalohanyo, bohlale ba hae, le lerato la hae li bonahala ka ho hlaka pōpong eohle ea hae lefatšeng.—Pesaleme ea 104:24.

15. (a) Ke hobane’ng ha ho hlaolela bohlale ho sa lekana? (b) Liproverbia 3:25, 26 e lokela ho tsosolosa kholiseho efe ka ho rōna?

¹⁵ Ha rea lokela ho hlaolela litšoaneleho tsa Jehova tsa bohlale le tlhalohanyo feela empa hape re lokela ho tšoarella ka ho tiea ho tsona, le ka mohla re sa khoehlise thutong ea rōna ea Lentsoe la hae. Oa re eletsa: “Mor’a ka, tseo li se ke tsa ba tsa tloha pel’a hao, boloka bohlale le kutloisiso; ’me e tla ba bophelo moeeng oa hao, le khabiso molaleng oa hao.” (Liproverbia 3:21, 22) Kahoo re ka tsamaea re sireletsehile re bile re na le khotso ea kelello, esita le nakong ea ho atamela ho tlang joaloka lesholu ha letsatsi la ‘pheliso ea tšohanyetso’ le tlang ho senya lefatše la Satane ka tšohanyetso. (1 Ba-Thessalonika 5:2, 3, NW) Nakong ea mahlomola a maholo, “u ke ke ua tšaba letsoso le sehlōhō, leha e le sefefo se tlang ho timetsa ba babe. Hobane Jehova e tla ba tšepo ea hao, a phemise leoto la hao sefi.”—Liproverbia 3:23-26.

Lerato la ho Etsa se Molemo

16. Ho hlokahala khato efe ho Bakreste ho phaella tabeng ea ho chesehela tšebeletso?

¹⁶ Matsatsi ana ke a ho bontša cheseho ha re bolela litaba tsena tse molemo tsa ’Muso bakeng sa bopaki ho lichaba tsohle. Empa mosebetsi ona oa bopaki o tlameha ho tšehetsoa ke mesebetsi e meng ea Bokreste, joalokaha e hlalositsoe ho Liproverbia 3:27, 28: “Ea nang le tokelo, u se ke ua lesa ho mo etsa ka molemo, ha ho le matleng a hao. U se ke ua re ho oa heno: Tsamaea, u tle u boee hosasane, ke tla u nea; athe seo a se hlokang se teng ho uena.” (Bapisa le Jakobo 2:14-17.) Kaha karolo e khōlō ea lefatše e tšoasitsoe ke bofutsana le tlala, ho bile le boipiletso bo potlakileng ba hore re thuse batho ba habo rōna, haholo-holo baena ba rōna ba moea. Lipaki tsa Jehova li arabetse joang?

17-19. (a) Ke tlhoko efe e potlakileng e ileng ea khahlametsoa ka 1993, ’me karabelo e bile efe? (b) Ke’ng se bontšang hore baena ba rōna ba matšoenyehong ba “hlōla ka ho fetisisa”?

¹⁷ Nka mohlala o le mong: Selemong se fetileng, ho bile le boipiletso bo potlakileng bakeng sa thuso bo tsoang naheng eo pele e neng e le Yugoslavia. Baena ba leng linaheng tsa boahisani ba ile ba arabela ka tsela e tsotehang. Likhoeling tse batang haholo tsa mariha a fetileng, ho ile ha khoneha hore lihlopha tsa batho ba tlisang liphallelo li kenelle sebakeng sa ntoa, li tlisa litokollo tsa morao-rao, liaparo tse futhumetseng, lijo le meriana ho Lipaki tse hlokang. Ka lekhetlo le leng, baena ba ile ba kōpa tumello ea ho isa litone tse 15 tsa liphallelo, empa ba fuoa tumello bakeng sa litone tse 30! Lipaki tsa Jehova tsa Austria li ile tsa romela literaka tse eketsehileng tse tharo kapele. Litone tse 25 li ile tsa fihla moo li romeloang teng. Baena ba rōna ba ne ba thabile hakaakang ha ba fumana nala ena ea lijo tsa moea le tokisetso ea lintho tsa nama!

¹⁸ Ba amohetseng lintho tsee ba ile ba arabela joang? Pejana selemong sena, moholo o ile a ngola: “Baena le bo-khaitseli ba Sarajevo ba phela hantle, ’me seo e leng sa bohlokoa ka ho fetisisa, re ntse re le matla moeeng bakeng sa ho mamella ntoa ena e mabifi. Boemo bo ne bo le thata haholo tabeng ea lijo. E se eka Jehova a ka le hlohonolofatsa le ho le putsa bakeng sa boiteko boo le bo entseng molemong oa rōna. Ba boholong ba hlompha Lipaki tsa Jehova ka ho khethehileng ka baka la tsela ea bona ea bophelo e behang mohlala le ka baka la tlhompho ea bona ho ba boholong. Hape re leboha lijo tsa moea tseo le re rometseng tsona.”—Bapisa le Pesaleme ea 145:18.

¹⁹ Hape baena bana ba leng maqakabetsing ba bontšitse kananelo ka tšebeletso ea bona ea tšimo e bonahatsang cheseho. Baahelani ba bona ba bangata ba tla ho bona ba batla lithuto tsa mahae tsa Bibele. Motseng oa Tuzla, moo litone tse hlano tsa lijo tsa liphallelo li ileng tsa romeloa, mohoeletsi ka mong ho ba 40 o ile a tlaleha lihora tse 25 tšebeletsong khoeling eo, ba tšehetsa bo-pula-maliboho ba robong ba phutheho eo hamolemo. Ba bile le lenane le hlollang la ba 243 ba bileng teng Sehopotsong sa lefu la Jesu. Baena bana ba ratehang ka sebele ba “hlōla ka ho fetisisa ka ea re ratileng.”—Ba-Roma 8:37.

20. Ke “ho lekana” hofe ho ileng ha e-ba teng naheng eo pele e neng e le Soviet Union?

²⁰ Ho fana ka seatla se bulehileng ho bonahetseng lihlopheng tse isang liphallelo tsa lijo le liaparo tse futhumetseng tse romeloang naheng eo pele e neng e le Soviet Union le hona ho lekana le cheseho ea baena sebakeng seo. Ka mohlala, Moscow ba bileng teng Sehopotsong selemong sena ba ne ba le 7 549, ha ho bapisoa le ba bileng teng selemong se fetileng ba 3 500. Nakong eona eo, liphutheho tsa motse oo li ile tsa eketseha ho tloha ho 12 ho ea ho 16. Naheng eohle eo pele e neng e le Soviet Union (re sa kenyeletse Baltic States), keketseho ea liphutheho e bile karolo ea 14 lekholong, ea bahoeletsi ba ’Muso e bile karolo ea 25 lekholong, ’me ea bo-pula-maliboho ea e-ba karolo ea 74 lekholong. Ke moea o babatsehang hakaakang oa cheseho le boitelo! O re hopotsa lekholong la pele la lilemo ha ho ne ho e-na le “ho lekana.” Bakreste ba neng ba na le lintho tsa moea le tsa nama ba ile ba fana ka seatla se bulehileng ho ba leng libakeng tse se nang menyetla e khethehileng, ha cheseho ea bana ba mahlomoleng e ne e tlisetsa ba fanang thabo le khothatso.—2 Ba-Korinthe 8:14.

Hloea Bobe!

21. Mantsoeng a Liproverbia khaolo ea 3 a bontša joang phapang pakeng tsa ba bohlale le lithoto?

²¹ Khaolo ea boraro ea Liproverbia e tsoela pele ho fana ka letoto la lintlha tse sa tšoaneng, ’me e qetella ka keletso ena: “U se ke ua khahloa ke ho itšoantša le motšoenyi, mekhoeng ea hae u se ke ua inkela leha o le mong. Ho Jehova motho ea khopo ke manyala, empa ea lokileng o na le lekunutu la hae. Thohako ea Jehova e ka tlung ea moetsalibe, empa o hlohonolofatsa ntlo ea ba lokileng. Basomi o ba soma ruri, empa o hauhela ba ikokobetsang. Ba bohlale ba tla ja lefa la hlompho; ha e le lithoto, botumo ba tsona ke lihlong.”—Liproverbia 3:29-35.

22. (a) Ke joang re ka qobang ho kenyeletsoa har’a lithoto? (b) Ba bohlale ba hloile eng, ’me ba hlaolela eng, ka moputso ofe?

²² Ke joang re ka qobang ho kenyeletsoa har’a lithoto? Re tlameha ho ithuta ho hloea bobe, e, re nyonye seo Jehova a se nyonyang—mekhoa eohle e silafetseng ea lefatše lena le mabifi, le nang le molato oa mali. (Bona le Liproverbia 6:16-19.) Ho fapana le seo, re tlameha ho hlaolela se leng molemo—melao-motheo ea boitšoaro bo lokileng, ho loka le boinyenyefatso—e le hore ka boikokobetso le ka tšabo ea Jehova re ka finyella “leruo, le khanya, le bophelo.” (Liproverbia 22:4) Ona e tla ba moputso ho rōna bohle bao ka botšepehi re sebelisang keletso ena: “U tšepe Jehova ka pelo ea hao eohle.”

Tlhaloso ea Hao ke Efe?

◻ Temana ea sehlooho ea thuto ena e sebetsa joang kajeno?

◻ Re ka tlotlisa Jehova joang?

◻ Ke hobane’ng ha re sa lokela ho nyenyefatsa taeo?

◻ Thabo e khōlō ka ho fetisisa e ka fumanoa hokae?

◻ Re ka rata se molemo ’me ra hloea bobe joang?

[Litšoantšo tse leqepheng la 18]

Ba nehelang lintho tsa bona tse molemohali e le mahlabelo a eang ho Jehova ba tla hlohonolofatsoa haholo