Ho Rua Molemo ka “Lijo-thollo Tsa Leholimo”

NAKOANA ka mor’a hore ba lopolloe ka mohlolo Egepeta, Baiseraele ba ile ba bontša ho hloka tumelo ka tsela e tebileng ho Molopolli oa bona, Jehova. Ka lebaka leo, Jehova o ile a etsa hore ba lelere lefeelleng la Sinai ka lilemo tse 40. Nakong eo eohle, Baiseraele hammoho le “letšoele le kopakaneng” la balichaba ba neng ba ikopantse le bona ba ile ba ja le ho noa ho fihlela ba “khotsofetse.” (Exoda 12:37, 38) Pesaleme ea 78:23-25, (NW) e re bolella kamoo sena se ileng sa etsahala kateng: “Eaba [Jehova] o laela maholimo a koahetsoeng ke maru holimo, ’me a bula mamati a leholimo. A ’na a ba nesetsa manna hore ba je, ’me a ba fa lijo-thollo tsa leholimo. Batho ba ja bohobe ba batho ba matla; a ba romela mefaho ho fihlela ba khotsofetse.”

Kaha o ile a kopanela ho jeng manna ao, Moshe o hlalosa lijo tsena tse ikhethang. O ile a ngola hore hoseng, “ha phoka e neng e letse e tlohile . . . , holim’a lebala la nahathothe ho bo ho le ntho e kang lihlakunyana, e tšesane joalo ka matlepula holim’a lefatše. Bana ba Iseraele ha ba e bona, ba botsana, ba re: Ke’ng ee?” kapa ka ho toba ba re ka Seheberu, “man huʼ?” Mohlomong lentsoe lena e ne e le qaleho ea lentsoe “manna,” e leng lebitso leo Baiseraele ba ileng ba le reha lijo tseo. Moshe o itse: “E ne e tšoana le hlaku tse tšoeu tsa koriandere, ’me monateng e le joalo ka linkhoa tse lubiloeng ka linotši.”—Exoda 16:13-15, 31, NW, botlaaseng ba leqephe.

Manna e ne e se lijo tse bang teng ka tsela ea tlhaho, joalokaha ba bang ba bolela. Ho ne ho ameha matla a fetang a tlhaho hore a be teng. Ka mohlala, ho fumaneha ha ’ona ho ne ho sa itšetleha ka sebaka kapa nako e itseng ea selemo. Haeba a ne a ka sala ho fihlela hosesane a ne a tsoha a tsoile tšenyane ebile a nkha hampe; empa leha ho le joalo, karolo e habeli eo lelapa ka leng le neng le e bokella letsatsing le etellang pele Sabatha ea beke le beke, e ne e sa senyehe ha e tlohetsoe bosiu, e le hore e ka jeoa ka Sabatha—letsatsi leo ka lona manna a neng a sa be teng. Ka sebele manna e ne e le lijo tsa mohlolo.—Exoda 16:19-30.

Hore ebe ho buuoa ka “ba matla,” kapa “mangeloi,” ho Pesaleme ea 78 ho fana ka maikutlo a hore e ka ’na eaba Jehova o ne a sebelisitse mangeloi hore a lokisetse manna. (Pesaleme ea 78:25, NW, botlaaseng ba leqephe) Ho sa tsotellehe hore na boemo e bile bofe, batho ba ne ba e-na le mabaka ’ohle a ho leboha Molimo bakeng sa mosa oa hae. Leha ho le joalo, ba bangata ba ile ba bontša boikutlo ba ho hloka teboho ho eena Ea neng a ba lopolotse bokhobeng Egepeta. Le rōna re ka ’na ra khella fatše litokisetso tsa Jehova kapa esita le ho hloka teboho haeba re hlōleha ho nahanisisa ka mosa oa hae o lerato. Kahoo re ka leboha hore ebe Jehova o akarellelitse tlaleho ea ho lopolloa ha Iseraele le liketsahalo tse ileng tsa latela bakeng sa “taeo ea rōna.”—Baroma 15:4.

Thuto ho Iseraele e Ruisa Bakreste Molemo

Ha Jehova a ne a fana ka manna, o ne a nahanne ka ho fetang feela ho khotsofatsa litlhoko tsa nama tsa Baiseraele ba ka bang limilione tse tharo. O ne a batla ‘ho ba kokobetsa le ho ba leka’ e le hore a ba hloekise boitšoarong le ho ba laea hore ba rue molemo ka bobona. (Deuteronoma 8:16; Esaia 48:17) Hoja ba ile ba arabela tlhoekisong le taeong eo, Jehova o ne a tla khahloa ke ho ba ‘etsetsa se molemo mehleng ea bona e tlang’ ka ho ba fa khotso, nala le thabo Naheng e Tšepisitsoeng.

Ntho e ’ngoe ea bohlokoa eo ba neng ba lokela ho ithuta eona e ne e le hore “motho a ke ke a phela ke bohobe feela, motho o tla mpe a phele ke tsohle tse tsoang molomong oa Jehova.” (Deuteronoma 8:3) Hoja Molimo o ne a sa ka a laela hore manna a be teng, batho ba ka be ba ile ba shoa ke tlala—e leng ’nete eo ba ileng ba e lumela ntle ho tikatiko. (Exoda 16:3, 4) Baiseraele ba nang le kananelo ba ne ba hopotsoa letsatsi le letsatsi ka ho itšetleha ha bona ka Jehova ka ho feletseng ’me kahoo ba ile ba kokobetsoa. Hang ha ba le Naheng e Tšepisitsoeng e nang le matletsatletse a lintho tse bonahalang, ho hang ba ne ba ke ke ba lebala Jehova le hore ba itšetlehe ka eena.

Joaloka Baiseraele, Bakreste ba tlameha ho lula ba falimehetse ho itšetleha ha bona ka Molimo bakeng sa lintho tse hlokahalang bophelong—tsa nama le tsa moea. (Matheu 5:3; 6:31-33) Ha Jesu Kreste a arabela e ’ngoe ea liteko tsa Diabolose, o ile a qotsa mantsoe a Moshe a fumanoang ho Deuteronoma 8:3, a re: “Ho ngoliloe, ‘Motho o tla phela, eseng ka bohobe feela, empa ka polelo e ’ngoe le e ’ngoe e tsoang molomong oa Jehova.’” (Matheu 4:4) E, barapeli ba ’nete ba Molimo ba matlafatsoa ke ho bala lipolelo tsa Jehova tse fumanoang ka Lentsoeng la hae. Ho phaella moo, tumelo ea bona ea matlafala ha ba latsoa liphello tse ruisang molemo tsa lipolelo tsena bophelong ba bona ha ba ntse ba tsamaea le Molimo ’me ba etelletsa pele lithahasello tsa ’Muso oa hae.

Batho ba sa phethahalang le bona ba ka felloa ke kananelo bakeng sa lintho tse etsoang kamehla e le karolo ea bophelo—esita le hoja lintho tseo e le pontšo ea kameho e lerato ea Jehova. Ka mohlala, lijo tse phahametseng tlhaho tsa manna li ile tsa makatsa le ho khotsofatsa Baiseraele qalong, empa ha nako e ntse e feta ba bangata ba bona ba ile ba belaela. Ka tsela e se nang tlhompho, ba ile ba tletleba ka ho re: “Pelo tsa rōna li tennoe ke bohobe bona bo sa tsebisahaleng,”—pontšo ea hore joale ba ne ba qala “ho suthela hōle le Molimo ea phelang.” (Numere 11:6; 21:5; Baheberu 3:12) Ka hona, mohlala oa bona o sebeletsa e le “temoso ho rōna bao bofelo ba litsamaiso tsa lintho bo ba fihletseng.”—1 Bakorinthe 10:11.

Re ka ela hloko mohlala oo o lemosang joang? Tsela e ’ngoe ke hore le ka mohla re se ke ra lumella hore lithuto tsa Bibele kapa litokisetso tseo re li fumanang ka sehlopha sa lekhoba le tšepahalang le le masene e be tse tloaelehileng feela tjee kapa tse sa reng letho. (Matheu 24:45) Hang ha re qala ho khella fatše limpho tsa Jehova kapa li re tena, kamano ea rōna le eena e qala ho fola.

Ka lebaka le utloahalang, Jehova ha a lule a re foqa lintho tse ncha tse susumetsang maikutlo. Ho e-na le hoo, butle-butle o khantša leseli le eketsehileng Lentsoeng la hae, ka tsela e tsoelang pele. (Liproverbia 4:18) Sena se etsa hore batho ba hae ba utloisise ka ho feletseng le ho sebelisa lintho tseo ba ithutang tsona. Jesu o ile a latela mohlala oa Ntate oa hae ha a ne a ruta barutuoa ba hae ba pele. O ne a ba hlalosetsa Lentsoe la Molimo “ho fihlela moo ba neng ba khona ho mamela,” kapa “ho utloisisa,” joalokaha liphetolelo tse ling li rialo.—Mareka 4:33; bapisa le Johanne 16:12.

Matlafatsa Kananelo ea Hao ka Litokisetso Tsa Molimo

Jesu le eena o ne a sebelisa pheta-phetane. Ke ’nete hore kelello e ka ’na ea utloisisa ntlha e itseng kapele—ka mohlala, molao-motheo oa Bibele—empa ho o ela hloko le ho o etsa karolo ea “botho bo bocha” ba Mokreste ho ka ’na ha nka nako e teletsana, haholo-holo haeba litsela tsa khale tsa lefatše le boikutlo li metse ka metso. (Baefese 4:22-24) Ka sebele ho ne ho le joalo ho barutuoa ba Jesu mabapi le ho hlōla boikhohomoso le hore ba hlaolele boikokobetso. Jesu o ile a lokela ho ba ruta ka boikokobetso ka makhetlo a mangata, ’me lekhetlo ka leng a ntse a bolela ntlha e tšoanang ea motheo, a e hlahisa ka tsela e fapaneng e le hore e ka hatiseha ka ho teba, ’me qetellong ho ile ha e-ba joalo.—Matheu 18:1-4; 23:11, 12; Luka 14:7-11; Johanne 13:5, 12-17.

Mehleng ea kajeno, liboka tsa Bokreste le lingoliloeng tsa Watch Tower li latela mohlala oa Jesu ka ho pheta-pheta lintho ka tsela e nahannoeng hantle. Kahoo, a re ananeleng sena e le pontšo ea kameho e lerato ea Molimo ho rōna ’me le ka mohla re se ke ra khathala ka seo re se fumanang, joalokaha Baiseraele ba ile ba khathala ke manna. Ka sebele, ha re ntse re ikitlaetsa ka mamello ho amohela likhopotso tsa Jehova kamehla, re tla bona litholoana tse molemo bophelong ba rōna. (2 Petrose 3:1) Ka sebele, boikutlo bo joalo ba kananelo bo bontša hore re “utloisisa” Lentsoe la Molimo ka lipelo tsa rōna hammoho le ka likelello tsa rōna. (Matheu 13:15, 19, 23) Mabapi le sena, re na le mohlala o motle oa mopesaleme Davida, eo, le hoja a ne a se na lijo tse ngata tse sa tšoaneng tsa moea tseo re li fumanang kajeno, a ileng a hlalosa molao oa Jehova e le o ‘fetisang linotši ka monate, le tse rothang khekheng ea tsona’!—Pesaleme ea 19:10.

“Manna” a Fanang ka Bophelo bo sa Feleng

Jesu o ile a re ho Bajuda: “Ke ’na bohobe ba bophelo. Baholo-holo ba lōna ba ile ba ja manna lefeelleng ’me leha ho le joalo ba shoa. . . . Ke ’na bohobe bo phelang bo theohileng leholimong; haeba leha e le mang a ja bohobe bona o tla phela ka ho sa feleng . . . Bohobe boo ke tla fana ka bona ke nama ea ka bakeng sa bophelo ba lefatše.” (Johanne 6:48-51) Bohobe ba sebele kapa manna ha boa ka ba fana ka bophelo bo sa feleng ebile bo ke ke ba etsa joalo. Empa ba sebelisang tumelo sehlabelong sa Jesu sa thekollo qetellong ba tla thabela tlhohonolofatso ea bophelo bo sa feleng.—Matheu 20:28.

Boholo ba batho ba ruang molemo thekollong ea Jesu ba tla thabela bophelo bo sa feleng lefatšeng la paradeise. “Bongata bo boholo” ba bana—bo neng bo tšoantšetsoa ke “letšoele le kopakaneng” la balichaba ba ileng ba ikopanya le Baiseraele Phallong ea bona ha ba tsoa Egepeta—ba tla pholoha “matšoenyeho a maholo” a tlang, a tlang ho felisa bokhopo bohle lefatšeng. (Tšenolo 7:9, 10, 14; Exoda 12:38) Ba thabelang moputso o moholo le ho feta ke ba neng ba tšoantšetsoa ke Baiseraele ka bobona. Moapostola Pauluse o ile a hlalosa bana, bao palo ea bona e leng 144 000, e le ba etsang Iseraele ea moea ea Molimo. Ha ba e-shoa, moputso oa bona ke ho tsohela bophelong leholimong. (Bagalata 6:16; Baheberu 3:1; Tšenolo 14:1) Ha ba le moo, Jesu o tla ba fa mofuta o khethehileng oa manna.

Se Boleloang ke “Manna a Patiloeng”

Jesu ea tsositsoeng o ile a re ho Iseraele ea moea: “Ea hlōlang ke tla mo fa a mang a manna a patiloeng.” (Tšenolo 2:17) Manna ana a patiloeng a tšoantšetso a re hopotsa ka manna ao Molimo a ileng a laela Moshe hore a a boloke ka nkhong ea khauta ka har’a areka e halalelang ea selekane. Areka eo e ile ea bolokoa ka kamoreng ea Sehalalelisiso ea tabernakele. Ha a le moo a ne a sa bonoe, ho le joalokaha eka a patiloe. A bolokiloe moo e le sehopotso, manna ana a mohlala ha aa ka a bola ha a ntse a le ka moo ka Arekeng, kahoo e ne e tla ba letšoao le loketseng la lijo tse sa boleng. (Exoda 16:32; Baheberu 9:3, 4, 23, 24) Ka ho fa ba 144 000 manna a patiloeng, Jesu o tiisa hore ba tla fumana ho se shoe le ho se bole e le bara ba Molimo ba moea.—Johanne 6:51; 1 Bakorinthe 15:54.

Mopesaleme o itse: “Etsoe seliba sa bophelo se ho uena [Jehova].” (Pesaleme ea 36:9) Tokisetso ee ea manna—a sebele hammoho le a tšoantšetso—e tiisa ’nete eo ea motheo hakaakang! Manna ao Molimo a ileng a a fa Iseraele ea boholo-holo, manna a tšoantšetso ao a faneng ka ’ona e le nama ea Jesu molemong oa rōna le manna a tšoantšetso a patiloeng ao a a fang ba 144 000 a sebelisa Jesu kaofela ha rōna a re hopotsa ho itšetleha ha rōna ka ho feletseng ka Molimo bakeng sa bophelo. (Pesaleme ea 39:5, 7) Ka boikokobetso, ka boinyenyefatso le ka linako tsohle a re hlokomeleng hore re itšetlehile ka eena. Jehova le eena o tla re ‘etsetsa se molemo mehleng ea rōna e tlang.’—Deuteronoma 8:16.

[Litšoantšo tse leqepheng la 26]

Ho re ba fumane bophelo bo sa feleng, batho bohle ba itšetlehile ka “bohobe bo phelang bo theohileng leholimong”

[Setšoantšo se leqepheng la 28]

Ho ba teng libokeng tsohle tsa Bokreste ho bontša hore re ananela likhopotso tsa Jehova