-
Ke’ng e Tla U Thusa Hore U Tsoele Pele U Ithuta Bibele?U ka Thaba ka ho sa Feleng!—Lenaneo la ho Ithuta Bibele
-
-
KHAOLO EA 12
Ke’ng e Tla U Thusa Hore U Tsoele Pele U Ithuta Bibele?
Ho ithuta Bibele ho molemo haholo, empa ha se kamehla ho leng bonolo. Ka linako tse ling, u ka ’na oa ipotsa hore na u tla khona ho tsoela pele u ntse u ithuta Bibele. Ke hobane’ng ha e le habohlokoa ho etsa boiteko ba hore u tsoele pele u ithuta Bibele? Ke’ng e tla u thusa hore u mamelle ho sa tsotellehe mathata ao u ka bang le ’ona?
1. Ke hobane’ng ha ho ithuta Bibele e le ntho ea bohlokoa?
“Lentsoe la Molimo lea phela ’me le fana ka matla.” (Baheberu 4:12) Bibele ke ea bohlokoa hobane e re bolella menahano ea Molimo le tsela eo a ikutloang ka eona ka uena. E tla u thusa hore u be le tsebo, u be bohlale hape u be le tšepo. Habohlokoa le ho feta, Bibele e u thusa hore u be motsoalle oa Jehova. Ha u ithuta Bibele, u e lumella hore e fetole bophelo ba hao.
2. Ke hobane’ng ha re lokela ho nka ’nete ea Bibele e le ea bohlokoa?
’Nete e ka Bibeleng e tšoana le matlotlo a bohlokoa. Ke kahoo Bibele e re khothaletsang hore re ‘reke ’nete ’me re se ke ra e rekisa.’ (Liproverbia 23:23) Ha re tseba bohlokoa ba ’nete ea Bibele, re leka ka thata ho lula re ithuta eona le haeba ho ka ba le lintho tse re sitisang.—Bala Liproverbia 2:4, 5.
3. Jehova a ka u thusa joang hore u lule u ntse u ithuta?
Kaha Jehova ke ’Mopi ea Matla ’Ohle le Motsoalle, o batla ho u thusa hore u ithute ka eena. A ka etsa hore u rate seo u ithutang sona le hore u se sebelise. (Bala Bafilipi 2:13.) Kahoo, o tla u thusa haeba ka linako tse ling u hloka matla a hore u tsoele pele u ithuta kapa u sebelisa seo u ithutang sona. Haeba u hloka matla a eketsehileng e le hore u sebetsane le mathata kapa litšitiso, o tla khona ho u thusa. Kamehla u rapele Jehova u mo kope hore a u thuse hore u tsoele pele u ithuta Bibele.—1 Bathesalonika 5:17.
ITHUTE LINTLHA TSE LING
Ithute hore na u ka tsoela pele u ithuta Bibele joang ho sa tsotellehe hore na u phathahane hakae kapa batho ba bang baa u hanyetsa. Joale nahana ka hore na Jehova o tla u thusa joang hore u mamelle.
4. Etsa hore thuto ea Bibele e be ea bohlokoa ho uena
Ka linako tse ling ho ba le lintho tse ngata tseo re li etsang hoo re bonang eka ha re na nako e lekaneng ea ho ithuta Bibele. Ke’ng e ka u thusang? Bala Bafilipi 1:10 ebe le buisana ka lipotso tsena:
U nahana hore tse ling tsa “lintho tsa bohlokoa haholo” bophelong ke life?
U ka etsa’ng e le hore thuto ea Bibele e be ea bohlokoa ho uena?
Haeba u tlatsa emere ka lehlabathe ebe u leka ho tšela majoe, a ke ke a fella ka moo
Haeba u tšela majoe pele, u tla fumana sebaka sa ho tšela lehlabathe. Ka tsela e tšoanang, haeba u etsa “lintho tsa bohlokoa haholo” pele bophelong ba hao, u tla khona ho li finyella le ho ba le nako ea ho etsa lintho tse ling
Ho ithuta Bibele ho khotsofatsa tlhoko ea rona ea moea, e leng ho batla ho tseba le ho sebeletsa Molimo. Bala Matheu 5:3 ebe le buisana ka potso ena:
Re fumana molemo ofe ha re etsa hore thuto ea rona ea Bibele e be ntho ea bohlokoa bophelong ba rona?
5. Mamella ha u hanyetsoa
Ka linako tse ling, batho ba bang ba ka ’na ba u nyahamisa hore u se ke oa ithuta Bibele. A re boneng mohlala oa ntate Francesco. Bapala VIDEO ebe le buisana ka lipotso tse latelang.
Videong ee, metsoalle ea ntate Francesco le ba lelapa la hae ba ile ba etsa’ng ha ba utloa hore o se a ithuta Bibele?
Ho mamella ho ile ha mo tsoela molemo joang?
Bala 2 Timothea 2:24, 25 ebe le buisana ka lipotso tsena:
Lelapa la hao le metsoalle ea hao e ikutloa joang ha u ithuta Bibele?
Ho latela litemana tsee, u lokela ho etsa’ng haeba motho e mong a sa thabele taba ea hore u ithuta Bibele? Hobane’ng?
6. Tšepa hore Jehova o tla u thusa
Ha re ntse re ithuta ka Jehova, re batla ho etsa lintho tse tla mo thabisa. Leha ho le joalo, ho ka ba thata hore re etse liphetoho bophelong ba rona e le hore re phele ka tsela eo Jehova a batlang hore re phele ka eona. Haeba u na le hore u ikutloe ka tsela eo, u se ke oa nyahama. Jehova o tla u thusa. Bapala VIDEO ebe le buisana ka lipotso tse latelang.
Videong ee, ke liphetoho life tseo ntate Jim a ileng a li etsa e le hore a thabise Jehova?
Ke eng e u khahlileng mohlaleng oa hae?
Bala Baheberu 11:6 ebe le buisana ka lipotso tsena:
Jehova o tla etsa’ng bakeng sa batho ba “mo batlang ka tieo,” e leng ba lekang ka thata hore ba mo tsebe le ho mo thabisa?
See se u bolella’ng ka tsela eo Jehova a ikutloang ka eona ha a bona boiteko ba hao ba ho ithuta Bibele?
MOTHO A KA ’NA A RE: “Ke hobane’ng ha u ithuta Bibele?”
U tla mo araba joang?
KAKARETSO
Le hoja e se kamehla ho leng bonolo, ho ithuta Bibele ho ka u thusa hore u thabele bophelo ka ho sa feleng. Tsoela pele ho tšepa Jehova ’me o tla u hlohonolofatsa.
Re Ithutile’ng?
Ke hobane’ng ha ’nete ea Bibele e le bohlokoa ho uena?
U ka “nepisisa lintho tsa bohlokoa haholo” joang?
Ke hobane’ng ha u lokela ho kopa Jehova hore a u thuse hore u tsoele pele u ithuta Bibele?
BATLA
Hlokomela lintho tse ’nè tse thusitseng batho ba bangata ho sebelisa nako ea bona hamolemo.
“Kamoo U ka Sebelisang Nako ea Hao ka Bohlale” (Tsoha!, February 2014)
Hlokomela kamoo Jehova a thusitseng ’mè e mong eo monna oa hae a neng a sa utloisise boiteko ba hae ba ho batla ho thabisa Jehova.
Bona kamoo ntate e mong a ileng a fetoha kateng ka lebaka la ho mamella ha mosali oa hae.
Ka linako tse ling Lipaki Tsa Jehova li etselletsoa ka hore li qhala malapa. Empa na seo ke ’nete?
“Na Lipaki Tsa Jehova li Qhala Malapa Kapa Lia a Momahanya?” (Sehlooho se websaeteng)
-
-
Re ka Thusoa Ke’ng ho Etsa Liqeto Tse Nepahetseng?U ka Thaba ka ho sa Feleng!—Lenaneo la ho Ithuta Bibele
-
-
KHAOLO EA 35
Re ka Thusoa Ke’ng ho Etsa Liqeto Tse Nepahetseng?
Kaofela re lokela ho etsa liqeto ’me boholo ba liqeto tseo re li etsang li ka re ama hape tsa ama setsoalle sa rona le Jehova. Ka mohlala, re ka ’na ra tlameha ho etsa qeto ea hore na re tla lula hokae, re tla iphelisa joang le hore na re tla kena lenyalong kapa che. Ha re etsa liqeto tse nepahetseng, re tla thaba bophelong re be re thabise Jehova.
1. Bibele e ka u thusa joang ho etsa liqeto tse nepahetseng?
Pele u etsa qeto, rapela Jehova hore a u thuse ebe u bala Bibele ho bona hore na Jehova o ikutloa joang ka taba eo. (Bala Liproverbia 2:3-6.) Ka linako tse ling Jehova o fana ka taelo e tobileng. Kahoo, ha u mamela taelo eo, u tla be u etsa qeto e nepahetseng.
U ka etsa’ng moo Bibele e sa fanang ka taelo e tobileng? Jehova o tla u tataisetsa “tseleng eo u lokelang ho tsamaea ka eona.” (Esaia 48:17) O tla u tataisa joang? Ho ka ba le melao-motheo e u tataisang. Melao-motheo ke lithuto tse re senolelang hore na Jehova o nahana joang le hore na o ikutloa joang. Hangata rea bona hore na Jehova o ikutloa joang ha re bala tlaleho e itseng ka Bibeleng. Ha re bona hore na Jehova o ikutloa joang, re ka etsa liqeto tse mo thabisang.
2. Re lokela ho nahana ka lintho life pele re etsa liqeto?
Bibele e re: “Ea masene o nahana ka mehato ea hae.” (Liproverbia 14:15) Sena se bolela hore pele re etsa qeto, re lokela hore re inahane hantle. Ha u ntse u nahana ka liqeto tseo u ka li nkang, ipotse: ‘Ke molao-motheo ofe o ka nthusang? Ke qeto efe eo etlare ha ke qeta ho e etsa ebe ha ke tšoenyehe? Qeto ea ka e tla ama batho ba bang joang? Potso ea bohlokoa ka ho fetisisa ke hore na e tla thabisa Jehova?’—Deuteronoma 32:29.
Jehova o na le tokelo ea ho re joetsa hore na ke’ng e nepahetseng le hore na ke’ng e fosahetseng. Re ka koetlisa matsoalo a rona ka hore re ithute melao le melao-motheo ea Bibele hantle le hore re ikemisetse ho e latela. Letsoalo ke boikutlo bo re bolellang hore na ntho e nepahetse kapa e fosahetse. (Baroma 2:14, 15) Letsoalo le koetlisitsoeng le tla re thusa ho etsa liqeto tse nepahetseng.
ITHUTE LINTLHA TSE LING
Ithute hore na melao-motheo ea Bibele le letsoalo li bohlokoa hakae ha re etsa liqeto.
3. Batla tataiso ka Bibeleng
Melao-motheo ea Bibele e ka u thusa joang ha u etsa liqeto? Bapala VIDEO ebe le buisana ka lipotso tse latelang:
Jehova o re file mpho efe ea bohlokoa?
Ke hobane’ng ha Jehova a re file bokhoni ba ho iketsetsa liqeto?
Jehova o re file eng e tla re thusa ho etsa liqeto tse nepahetseng?
Bala Baefese 5:15, 16 e le hore u bone mohlala oa o mong oa melao-motheo ea Bibele. Ka mor’a moo, buisanang ka hore na ke joang re ka ‘ithekelang nako’ . . .
ea ho bala Bibele kamehla.
ea ho ba molekane, motsoali, mora kapa morali ea molemo.
ea ho ba teng libokeng.
4. Koetlisa letsoalo la hao e le hore u etse liqeto tse nepahetseng
Ho ka bonahala ho le bonolo ho etsa qeto e nepahetseng moo Bibele e fanang ka taelo e tobileng. Re lokela ho etsa’ng ha ho se na taelo e tobileng? Bapala VIDEO ebe le buisana ka potso e latelang.
Videong ee, morali oa bo rona o entse’ng e le hore a koetlise letsoalo la hae le hore a etse liqeto tse khahlisang Jehova?
Ke hobane’ng ha re sa lokela ho kopa batho ba bang hore ba re etsetse liqeto? Bala Baheberu 5:14 ebe le buisana ka lipotso tse latelang:
Le hoja ka linako tse ling ho ka bonahala ho le bonolo ho kopa batho ba bang hore ba re etsetse liqeto, ke’ng eo re lokelang ho tseba ho e khetholla ka borona?
Ke’ng eo re nang le eona e ka re thusang ho koetlisa matsoalo a rona e le hore re etse liqeto tse nepahetseng?
Letsoalo le tšoana le ’mapa kaha lea re tataisa liqetong tseo re lokelang ho li nka bophelong
5. Hlompha matsoalo a batho ba bang
Kaha batho ha ba tšoane, ba etsa liqeto tse fapaneng. Re ka etsa’ng ho bontša hore re hlompha matsoalo a batho ba bang? Hlokomela maemo ana a mabeli:
Boemo ba pele: Morali oa bo rona e mong ea ratang ho itlotsa ka makeup o fallela phuthehong eo barali ba bo rona ba moo ba tšoenyehang ha ba bona motho a o sebelisa.
Bala Baroma 15:1 le 1 Bakorinthe 10:23, 24 ebe le buisana ka lipotso tsena:
Ho ea ka litemana tsee, morali oa bo rona a ka ’na a etsa qeto efe? U tla etsa’ng ha u e-na le motho eo letsoalo la hae le mo hanelang ho etsa ntho eo letsoalo la hao le u lumellang ho e etsa?
Boemo ba bobeli: Mora oa bo rona oa tseba hore Bibele ha e thibele ho noa joala, empa o khetha hore a se ke a bo noa ho hang. O mengoa moketjaneng ’me moo o bona bara ba bo rona ba bang ba inoella.
Bala Moeklesia 7:16 le Baroma 14:1, 10 ebe le buisana ka lipotso tsena:
Ho ea ka litemana tsee, mora oa bo rona a ka ’na a etsa qeto efe? U tla etsa’ng ha u bona motho e mong a etsa ntho eo letsoalo la hao le u hanelang ho e etsa?
Ke mehato efe e tla re thusa ho etsa liqeto tse nepahetseng?
1. Kopa Jehova hore a u thuse ho etsa qeto e nepahetseng.—Jakobo 1:5.
2. Etsa lipatlisiso ka Bibeleng le ka lingoliloeng tse thehiloeng Bibeleng ho fumana melao-motheo e tla u thusa. U ka boela oa buisana le Bakreste ba nang le boiphihlelo.
3. Nahana ka liphello tsa liqeto tsa hao. Li tla u ama li be li ame le batho ba bang joang?
BATHO BA BANG BA RE: “Motho e mong le e mong o na le tokelo ea ho ikhethela hore na eena o batla ho etsa’ng. Ha ho tsotellehe hore na batho ba bang bona ba nahana’ng.”
Ke hobane’ng ha re lokela ho tsotella hore na Jehova o ikutloa joang le hore na batho ba bang ba ikutloa joang?
KAKARETSO
Re ka khona ho etsa liqeto tse nepahetseng haeba re tseba hore na Jehova o ikutloa joang. Hape re ka nahana ka hore na liqeto tsa rona li tla thusa batho ba bang kapa li tla ba ntša kotsi.
Re Ithutile’ng?
U ka etsa liqeto tse thabisang Jehova joang?
U ka koetlisa letsoalo la hao joang?
U ka bontša joang hore u hlompha matsoalo a batho ba bang?
BATLA
U ka etsa liqeto tse tla u thusa ho matlafatsa setsoalle sa hao le Molimo joang?
“Etsa Liqeto Tse Tlotlisang Molimo” (Molula-Qhooa, April 15, 2011)
Ithute haholoanyane ka hore na Jehova o re eletsa joang.
Bona hore na ke’ng e ileng ea thusa mohlankana e mong ha a ne a lokela ho etsa qeto e boima.
Ithute haholoanyane hore na re ka thabisa Jehova joang le maemong ao a sa fanang ka taelo e tobileng.
“Na Kamehla U Hloka Taelo ea Bibele?” (Molula-Qhooa, December 1, 2003)
-