Jehova, ‘Qhobosheane ea Rōna Nakong ea Mahlomola’

“Poloko ea ba lokileng e tsoa ho Jehova; ke qhobosheane ea bona nakong ea mahlomola.”—PESALEME EA 37:39.

1, 2. (a) Jesu o ile a rapella eng lebitsong la barutuoa ba hae? (b) Thato ea Molimo ke efe ka batho ba hae?

JEHOVA o matla ’ohle. O na le matla a ho sireletsa barapeli ba hae ba tšepahalang ka tsela leha e le efe eo a e ratang. O ne a ka ba a arola batho ba hae ho batho ba bang eaba o ba isa sebakeng se sireletsehileng le sa khotso. Leha ho le joalo, tabeng ea barutuoa ba hae, Jesu o ile a rapela Ntat’ae oa leholimo a re: “Ha ke u kōpe hore u ba ntše lefatšeng, empa ke kōpa hore u ba lebele ka lebaka la ea khopo.”—Johanne 17:15.

² Jehova o khethile hore a se ke a re ‘ntša lefatšeng.’ Ho e-na le hoo, ke thato ea hae hore re phele har’a batho ba bang ba lefatše lena e le hore re bolelle ba bang molaetsa oa hae oa tšepo le matšeliso. (Baroma 10:13-15) Empa, joalokaha Jesu a ile a bolela ka tsela e sa tobang thapelong ea hae, re pepesehile ho “ea khopo” kahobane re phela lefatšeng lena. Moloko oa batho o sa mameleng le makhotla a moea a khopo a baka bohloko bo boholo le tsieleho, ’me mahlomola ha a pote Bakreste ka thōko.—1 Petrose 5:9.

 3. Ke ’nete efe eo esita le barapeli ba tšepahalang ba Jehova ba lokelang ho tobana le eona, empa ke matšeliso afe ao re a fumanang ka Lentsoeng la Molimo?

³ Ha ho makatse hore ebe motho oa nyahama ha a le litekong tsa mofuta ona. (Liproverbia 24:10) Ka Bibeleng ho na le litlaleho tse ngata tsa batho ba tšepahalang ba ileng ba ba mahlomoleng. Mopesaleme o re: “Litlokotsi tsa ea lokileng li ngata, empa Jehova o mo lopolla ho tsona kaofela.” (Pesaleme ea 34:19) Ke ’nete hore le eena “ea lokileng” o hlaheloa ke lintho tse mpe. Joaloka mopesaleme Davida, ka linako tse ling re ka ba ra ‘felloa ke matla ’me ra sithabela ho isa tekanyong e fetisisang.’ (Pesaleme ea 38:8) Leha ho le joalo, hoa tšelisa ho tseba hore “Jehova o haufi le ba lipelo li robehileng; o pholosa ba sithabetseng moeeng.”—Pesaleme ea 34:18; 94:19.

4, 5. (a) Tumellanong le Liproverbia 18:10, re lokela ho etsa’ng e le hore re fumane tšireletso ea Molimo? (b) Ke mehato efe e tobileng eo re ka e nkang e le hore re fumane thuso ea Molimo?

⁴ Tumellanong le thapelo ea Jesu, ka sebele Jehova oa re lebela. Ke ‘qhobosheane ea rōna nakong ea mahlomola.’ (Pesaleme ea 37:39) Buka ea Liproverbia e sebelisa polelo e tšoanang ha e re: “Lebitso la Jehova ke tora e matla. Ea lokileng o balehela ho lona ’me o fuoa tšireletso.” (Liproverbia 18:10) Temana ena e senola ’nete ea motheo tabeng ea kameho e bonolo eo Jehova a nang le eona bakeng sa libōpuoa tsa hae. Molimo o sireletsa ka ho khetheha batho ba lokileng ba mo batlang ka mafolofolo joalokaha eka re ne re balehela toreng e matla bakeng sa tšireletso.

⁵ Ha re tobane le mathata a sithabetsang, re ka balehela ho Jehova joang hore a re sireletse? A re hlahlobeng mehato e meraro ea bohlokoa eo re ka e nkang e le hore re fumane thuso ea Jehova. Oa pele, re lokela ho ea ho Ntat’a rōna oa leholimo ka thapelo. Oa bobeli, re lokela ho etsa lintho tumellanong le moea oa hae o halalelang. Oa boraro, re lokela ho ikokobelletsa tokisetso ea Jehova ka ho batla botsoalle ba Bakreste-’moho le rōna ba ka re imollang mahlomoleng a rōna.

Matla a Thapelo

 6. Bakreste ba ’nete ba nka thapelo e le eng?

⁶ Litsebi tse ling tsa bophelo li buella hore ho tepella maikutlo le ho imeloa kelellong li ka phekoloa ka thapelo. Le hoja ho ka ’na ha etsahala hore motho a imolohe kelellong nakong e khutsitseng ea ha a nahanisisa joalokaha eka oa rapela, kelello e ka boetse ea imolloa ke melumo e itseng ea tlhaho, kapa ho sililoa mokokotlo. Bakreste ba ’nete ha ba nke thapelo hasesaane joalokaha eka ke setlhare se thobang maikutlo. Re nka thapelo e le ho buisana le ’Mōpi ka tlhompho. Thapelo e akarelletsa boinehelo ba rōna le tšepo ea rōna ho Molimo. Ka sebele, thapelo ke karolo ea borapeli ba rōna.

 7. Ho rapela ka tšepo ho bolela eng, ’me lithapelo tse joalo li re thusa joang ho loantša mahlomola?

⁷ Lithapelo tsa rōna li lokela ho etsoa ka kholiseho, kapa ka ho ba le tšepo ho Jehova. Moapostola Johanne o ile a ngola a re: “Ena ke kholiseho eo re nang le eona ho eena, hore, ho sa tsotellehe hore na ke eng eo re e kōpang ho ea ka thato ea hae, oa re utloa.” (1 Johanne 5:14) Jehova, Ea Phahameng ka ho Fetisisa, Molimo a le mong feela oa ’nete le ea matla ’ohle, ka ho khetheha o hlile o ela hloko lithapelo tsa barapeli ba hae tse etsoang ka tieo. Ho tseba feela hore Molimo oa rōna ea lerato oa re utloa ha re mo bolella matšoenyeho le mathata a rōna, hoa tšelisa.—Bafilipi 4:6.

 8. Ke hobane’ng ha Bakreste ba tšepahalang ba sa lokela ho ikutloa ba le lihlong kapa ba sa tšoanelehe ha ba atamela Jehova ka thapelo?

⁸ Bakreste ba tšepahalang ha baa lokela ho ikutloa ba le lihlong, ba sa tšoanelehe, kapa ba se na tšepo ha ba atamela Jehova ka thapelo. Ke ’nete hore ha re ikoatetse kapa re imetsoe ke mathata, hase kamehla re ka ratang ho atamela Jehova ka thapelo. Ka linako tse joalo re lokela ho hopola hore Jehova “o bontša khauho ho batho ba hae ba hlorileng” le hore o ‘tšelisa ba behiloeng tlaase.’ (Esaia 49:13; 2 Bakorinthe 7:6) Ka ho khetheha, ke linakong tsa mahlomola le tsa bohloko bo boholo moo ho hlokahalang hore re ipiletse ka tšepo ho Ntat’a rōna oa leholimo joaloka qhobosheane ea rōna.

 9. Tumelo e phetha karolo efe ha re atamela Molimo ka thapelo?

⁹ E le hore re rue molemo o feletseng tokelong ea thapelo, re lokela ho ba le tumelo ea sebele. Bibele e bolela hore “ea atamelang Molimo o lokela ho lumela hore o teng le hore e ba moputsi oa ba mo batlang ka tieo.” (Baheberu 11:6) Tumelo hase feela ho lumela hore Molimo “o teng.” Tumelo ea ’nete e akarelletsa ho lumela ka tieo hore Molimo o na le matla a ho putsa tsela eo re phelang ka eona ea ho mo mamela ebile o lakatsa ho etsa joalo. “Mahlo a Jehova a talimile ba lokileng, ’me o sekehela thapeli ea bona tsebe.” (1 Petrose 3:12) Ho lula re elelloa hore ka lerato Jehova o amehile ka rōna, ho etsa hore lithapelo tsa rōna li be le moelelo o khethehileng.

10. Re tla fumana matla a tsoang ho Jehova ha lithapelo tsa rōna e le tsa mofuta ofe?

¹⁰ Jehova o mamela lithapelo tsa rōna ha re li etsa ka pelo e feletseng. Mopesaleme o ile a ngola a re: “Ke hoelelitse ka pelo ea ka eohle. U nkarabe, Jehova.” (Pesaleme ea 119:145) Ho fapana le lithapelo tse peteketsoang tse etsoang malumeling a mangata, lithapelo tsa rōna hase tse etsoang ka tloaelo feela kapa ka pelo e sa fellang. Ha re rapela Jehova ka ‘lipelo tsohle’ tsa rōna, mantsoe a rōna a ba le moelelo le morero. Ka mor’a lithapelo tse entsoeng ka tieo joalo, re qala ho ikutloa re imolohile ka lebaka la ho ‘lahlela moroalo oa rōna ho Jehova.’ Joalokaha Bibele e tšepisa, “o tla [re] tšehetsa.”—Pesaleme ea 55:22; 1 Petrose 5:6, 7.

Moea oa Molimo ke Mothusi oa Rōna

11. Tsela e ’ngoe eo Jehova a re arabang ka eona ke efe ha re ‘ntse re kōpa’ thuso ea hae?

¹¹ Jehova hase Ea Utloang lithapelo feela empa hape ke Ea Arabang lithapelo. (Pesaleme ea 65:2) Davida o ile a ngola a re: “Letsatsing la mahlomola a ka ke tla ipiletsa ho uena, etsoe u tla nkaraba.” (Pesaleme ea 86:7) Ka lebaka leo, Jesu o ile a khothalletsa barutuoa ba hae hore ‘ba ’ne ba kōpe’ thuso ea Jehova hobane “Ntate ea leholimong o tla fana ka moea o halalelang . . . ho ba mo kōpang.” (Luka 11:9-13) Ha ho pelaelo hore matla a sebetsang a Molimo a sebetsa e le mothusi, kapa motšelisi oa batho ba hae.—Johanne 14:16.

12. Moea oa Molimo o ka re thusa joang ha ho bonahala mathata a le boima haholo?

¹² Esita leha re tobane le liteko, moea oa Molimo o ka re tlatsa “matla a fetang se tloaelehileng.” (2 Bakorinthe 4:7) Moapostola Pauluse, ea ileng a mamella maemo a mangata a sithabetsang, o ile a re ka kholiseho: “Bakeng sa lintho tsohle ke na le matla ka lebaka la ea mphang bonatla.” (Bafilipi 4:13) Ka tsela e tšoanang, Bakreste ba bangata kajeno ba ile ba ikutloa ba hlaboloha moeeng le maikutlong ha lithapeli tsa bona li arabeloa. Hangata, mathata a sithabetsang a bonahala a se a se boima haholo ka mor’a hore re fumane thuso ea moea oa Molimo. Ka lebaka la matla ana a fanoang ke Molimo, re ka etsisa moapostola ra re: “Re petelitsoe ka tsela e ’ngoe le e ’ngoe, empa ha rea patisoa hoo re ke keng ra sisinyeha; re tsielehile, empa hase hore ho hang ha re na tsela ea ho tsoa; rea hlorisoa, empa ha rea tloheloa kherehloa; re akheloa fatše, empa ha re timetsoe.”—2 Bakorinthe 4:8, 9.

13, 14. (a) Jehova o bontšitse joang ka Lentsoe la hae le ngotsoeng hore ke qhobosheane ea rōna? (b) Ho sebelisa melao-motheo ea Bibele ho u thusitse joang?

¹³ Moea o halalelang o boetse o bululetse Lentsoe la Molimo le ngotsoeng oa ba oa le boloka molemong oa rōna. Jehova o bontšitse joang ka Lentsoe la hae hore ke qhobosheane ea rōna linakong tsa mahlomola? Tsela e ’ngoe eo a entseng sena ka eona ke ka ho re fa bohlale bo sebetsang le matla a ho nahana. (Liproverbia 3:21-24) Bibele e koetlisa matla a rōna a kelello ebile e ntlafatsa matla a rōna a ho nahana. (Baroma 12:1) Ha re bala Lentsoe la Molimo kamehla re bile re ithuta lona, hape re le sebelisa, ‘matla a rōna a ho lemoha a ka koetlisetsoa ho khetholla se nepahetseng le se fosahetseng.’ (Baheberu 5:14) E ka ’na eaba u hlokometse ka bouena kamoo melao-motheo ea Bibele e ileng ea u thusa kateng ho etsa liqeto tse bohlale ha u ne u talimane le mathata. Bibele e re fa masene a ka re thusang ho fumana pheko e sebetsang ea mathata a sithabetsang.—Liproverbia 1:4.

¹⁴ Lentsoe la Molimo le re fa mohloli o mong oa matla—e leng tšepo ea poloko. (Baroma 15:4) Bibele e re bolella hore lintho tse mpe li ke ke tsa tsoela pele ho etsahala ka ho sa feleng. Matšoenyeho leha e le afe a re hlahelang ke a nakoana. (2 Bakorinthe 4:16-18) Re na le “tšepo ea bophelo bo sa feleng boo Molimo, ea ke keng a bua leshano, a ileng a bo tšepisa pele ho linako tse tšoarellang halelele.” (Tite 1:2) Ha re thaba tšepong eo, nako le nako re ntse re elelloa hore ho na le bokamoso bo khanyang boo Jehova a re tšepisang bona, re ka mamella tlas’a matšoenyeho.—Baroma 12:12; 1 Bathesalonika 1:3.

Phutheho ke Pontšo ea Lerato la Molimo

15. Bakreste ba ka thusana joang?

¹⁵ Tokisetso e ’ngoe e tsoang ho Jehova e ka re thusang linakong tsa mahlomola ke botsoalle boo re nang le bona ka phuthehong ea Bokreste. Bibele e re: “Motsoalle oa ’nete o lerato ka linako tsohle, ’me ke mor’abo motho ea tsoaletsoeng ha ho e-na le mahlomola.” (Liproverbia 17:17) Lentsoe la Molimo le khothatsa bohle ba ka phuthehong hore ba hlomphane le hore ba ratane. (Baroma 12:10) Moapostola Pauluse o ile a ngola a re: “E mong le e mong a ’ne a batle, eseng se molemo ho eena, empa se molemo ho motho e mong.” (1 Bakorinthe 10:24) Ho molemo ho ba le boikutlo bo joalo ba kelello hobane bo ka re thusa ho nahanisisa ka litlhoko tsa batho ba bang ho e-na le ho nahanisisa ka liteko tsa rōna. Ha re itella ho thusa batho ba bang, ha re ba thuse feela empa re boetse re ba le thabo e itseng le khotsofalo tse re bebofalletsang meroalo.—Liketso 20:35.

16. Ke joang Mokreste e mong le e mong e ka bang ea khothatsang?

¹⁶ Banna le basali ba hōlileng moeeng ba ka phetha karolo ea bohlokoa ea ho matlafatsa ba bang. Ba ka matlafatsa ba bang ka hore e be batho ba atamelehang le ba lulang ba le malala-a-laotsoe hore ba ka bua le bona. (2 Bakorinthe 6:11-13) Phutheho e rua molemo e le kannete ha bohle ba ipha nako ea ho babatsa bacha, ea ho matlafatsa balumeli ba bacha le ea ho khothatsa ba tepeletseng maikutlo. (Baroma 15:7) Lerato la bara ba motho le tla re thusa le ho qoba moea oa ho belaellana. Ha rea lokela ho potlakela ho etsa qeto ea hore ha motho a e-na le mathata ke pontšo ea hore o fokola moeeng. Ka nepo Pauluse o khothalletsa Bakreste hore ba “bue ka mokhoa o tšelisang le meea e tepeletseng maikutlo.” (1 Bathesalonika 5:14) Bibele e bontša hore le bona Bakreste ba tšepahalang ba hlaheloa ke mahlomola.—Liketso 14:15.

17. Re na le menyetla efe ea ho tiisa maqhama a mokhatlo oa Bokreste oa bara ba motho?

¹⁷ Liboka tsa Bokreste li bula monyetla o motle oa hore re tšelisane le ho khothatsana. (Baheberu 10:24, 25) Kamano ena e lerato ha e felle feela libokeng tsa phutheho. Ho e-na le hoo, batho ba Molimo ba boetse ba batla menyetla ea ho kopanela botsoalle bo hahang le ha ba se libokeng. Ha re hlaheloa ke maemo a sithabetsang, re tla thusana habonolo hobane re se re ntse re thehile maqhama a matla a botsoalle. Moapostola Pauluse o ile a ngola a re: “Ho se ke ha e-ba le karohano ’meleng, empa . . . litho tsa oona li hlokomelane . . . . Haeba setho se seng se utloa bohloko, litho tse ling tsohle li utloa bohloko le sona; kapa haeba setho se seng se tlotlisoa, litho tse ling tsohle li thaba le sona.”—1 Bakorinthe 12:25, 26.

18. Re lokela ho qoba tšekamelo efe ha re ikutloa re nyahame?

¹⁸ Ka linako tse ling, re ka ’na ra ikutloa re nyahame haholo hoo re ke keng ra thabela botsoalle le Bakreste-’moho le rōna. Re lokela ho loantša boikutlo boo e le hore re se ke ra ikamoha matšeliso le thuso tseo balumeli-’moho le rōna ba ka fanang ka tsona. Bibele e re lemosa tjena: “Ea itšehlang thajana o tla batla tabatabelo ea hae ea boithati; o tla phasoloha khahlanong le bohlale bohle bo sebetsang.” (Liproverbia 18:1) Bara le baralib’abo rōna ke pontšo ea hore Molimo oa re tsotella. Ha re ka lemoha tokisetso eo e lerato, re tla imoloha linakong tsa mahlomola.

E-ba le Boikutlo bo Botle

19, 20. Mangolo a re thusa joang ho hana menahano e nyahamisang?

¹⁹ Ha motho a hlaseloa ke ho nyahama le masoabi, ho bonolo hore a be le menahano e nyahamisang. Ka mohlala, batho ba bang ha ba hlaheloa ke bomalimabe ba ka ba ba qala ho halala bomoea ba bona, ba phetha ka hore bothata ba bona ke pontšo ea hore Molimo ha a ba amohele. Leha ho le joalo, hopola hore Jehova ha a leke leha e le mang ka “lintho tse mpe.” (Jakobo 1:13) Bibele e re: “Hase ho tsoa pelong ea hae [Molimo] a hlorisitseng kapa a bakelang bara ba batho mesarelo.” (Lillo tsa Jeremia 3:33) Ho e-na le hoo, Jehova o utloa bohloko haholo ha bahlanka ba hae ba utloa bohloko.—Esaia 63:8, 9; Zakaria 2:8.

²⁰ Jehova ke “Ntate oa mehauhelo e bonolo le Molimo oa matšeliso ’ohle.” (2 Bakorinthe 1:3) Oa re tsotella, ’me o tla re phahamisa ka nako ea teng. (1 Petrose 5:6, 7) Ha re lula re elelloa hore Molimo oa re rata, sena se tla re thusa hore re be le boikutlo bo botle esita le ho lula re thabile. Jakobo o ile a ngola a re: “Ho nkeng e le thabo feela, barab’eso, ha le thulana le liteko tse sa tšoaneng.” (Jakobo 1:2) Hobane’ng? O araba ka ho re: “Hobane ha e e-ba ea amohelehang o tla amohela moqhaka oa bophelo, oo Jehova a o tšepisitseng ba tsoelang pele ho mo rata.”—Jakobo 1:12.

21. Ho sa tsotellehe mathata ao re tobanang le ’ona, Molimo o tiisetsa ba tšepahalang ho eena eng?

²¹ Joalokaha Jesu a ile a re lemosa, lefatšeng re tla ba le matšoenyeho. (Johanne 16:33) Empa Bibele e tšepisa hore ha ho “matšoenyeho kapa mahlomola kapa mahloriso kapa tlala kapa tlhobolo kapa kotsi” tse tla re arohanya le lerato la Molimo le lerato la Mora oa hae. (Baroma 8:35, 39) Ho tšelisa hakaakang ho tseba hore mahlomola leha e le afe ao re tobanang le ’ona ke a nakoana! Khabareng, ha re ntse re letetse hore mahlomola a batho a fele, Ntat’a rōna ea lerato, Jehova, oa re lebela. Ha re balehela ho eena hore a re sireletse, e tla ba “sebaka se phahameng sa tšireletso linakong tsa mahlomola.”—Pesaleme ea 9:9.

Re Ithutile Eng?

• Bakreste ba ka lebella eng ha ba ntse ba phela lefatšeng lee le khopo?

• Lithapelo tsa rōna tse etsoang ka tieo li ka re matlafatsa joang ha re tobane le liteko?

• Moea oa Molimo ke thuso joang?

• Re ka etsa eng hore re thusane?

[Setšoantšo se leqepheng la 18]

Re lokela ho batla Jehova joalokaha eka re balehela toreng e matla

[Litšoantšo tse leqepheng la 20]

Batho ba hōlileng moeeng ba sebelisa monyetla o mong le o mong ho babatsa le ho khothatsa ba bang