Re Hloka Metsoalle ea ’Nete
JENNY le Sue ba tšoere moqoqo o phetseng. Ho bonahala pososelo, mahlo a phatsima—kamoo ba leng kateng, ntho e ’ngoe le e ’ngoe e senola thahasello e matla eo ba nang le eona ka seo e mong a se buang. Le hoja ba hōtse ka litsela tse fapaneng, ka ho hlakileng ba na le lithahasello tse ngata tse tšoanang ’me ba hlomphana haholo.
Sebakeng se seng, Eric le Dennis ba sebetsa ’moho ho o mong oa mesebetsi e mengata eo ba sebetsaneng le eona ka lilemo. Ba khatholohile, ’me ba itšehela habonolo. Ha moqoqo o lebisa litabeng tse tebileng, ba fapanyetsana maikutlo ka botšepehi. Baa hlomphana. Joaloka Jenny le Sue, Eric le Dennis ke metsoalle ea ’nete.
Litlhaloso tsena li ka ’na tsa u futhumatsa pelo, tsa etsa hore u nahane ka metsoalle ea hao. Ka lehlakoreng le leng, li ka ’na tsa etsa hore u laba-labele setsoalle se joalo. Le uena u ka ba le sona!
Lebaka Leo ka Lona re Hlokang Metsoalle ea ’Nete
Setsoalle se molemo sea hlokahala bakeng sa boiketlo ba kelello le ’mele ea rōna. Leha ho le joalo, hase hore ho na le ho phoso ka rōna ha re ikutloa re le bolutu. Bafuputsi ba bang ba bolela hore bolutu ke tlholohelo, sesupo sa tlhaho sa hore re hloka bolekane. Ha ho pelaelo hore, feela joalokaha lijo li fokotsa kapa li felisa tlala, mofuta o nepahetseng oa setsoalle o ka fokotsa bolutu kapa hona ho bo felisa. Ho feta moo, ha ho thata ho fumana metsoalle e molemo, e re nkang re le ba bohlokoa.
Batho ba bopeletsoe le tlhoko ea bolekane. (Genese 2:18) Bibele e bolela hore motsoalle oa ’nete, kapa molekane, “o tsoaletsoe ho thusa, ho thusa mohl’a tsatsi la litsietsi.” (Liproverbia 17:17) Kahoo, metsoalle ea ’makhonthe e lokela ho kōpana thuso ha e e hloka. Empa setsoalle se bolela ho fetang feela ho ba le motho eo u ka retelehelang ho eena kapa eo e leng molekane mosebetsing kapa papaling. Metsoalle e molemo e hlahisa ka ho e mong litšobotsi tse ntle. Liproverbia 27:17 e re: “Tšepe e leotsa tšepe; sefahleho sa motho se leotsa sefahleho sa motsoalle oa hae joalo.” Joalokaha sekotoana sa tšepe se ka sebelisetsoa ho leotsa lehare le entsoeng ka tšepe e tšoanang, motsoalle a ka atleha ho leotsa boemo ba kelello le ba moea ba motsoalle oa hae. Haeba re nyahamisoa ke ho soetseha ho itseng, ho talima ho tletseng kutloelo-bohloko ha motsoalle le khothatso ea hae ea Mangolo ho ka re matlafatsa haholo.
Ka Bibeleng, setsoalle se amahanngoa le lerato, tloaelano, lekunutu le bolekane. Setsoalle se ka ’na sa akarelletsa baahisani, basebetsi-’moho le ba bang ba joalo. Ba bang ba boetse ba nka beng ka bona ba itseng e le metsoalle ea bona e haufi-ufi. Leha ho le joalo, ho ba bangata kajeno, ho thata ho fumana metsoalle ea ’nete le ho e boloka. Ke hobane’ng ha ho le joalo? Na u ka thabela setsoalle sa ’nete le se tšoarellang?