Buka ea Liproverbia e na le litemana tse ngata tse emeng li le ling joaloka lipoleloana tsa keletso, empa Liproverbia 27:23, (NW) ke karolo ea sehlopha sa litemana: “U tlameha ho tsebisisa ponahalo ea mohlape oa hao. Beha pelo ea hao mohlapeng oa hao; hobane letlotlo le ke ke la hlola ka ho sa feleng, le moqhaka e ke ke ea e-ba oa meloko kaofela. Joang bo botala bo shoele, ’me joang bo bocha bo hlahile, le limela tsa lithaba li se li bokelletsoe. Lipheleu tse nyenyane ke tsa liaparo tsa hao, ’me lipotsanyane ke moputso oa tšimo. ’Me ho na le lebese la lipoli le lekaneng bakeng sa lijo tsa hao, bakeng sa lijo tsa lelapa la hao, le mokhoa oa bophelo oa makhabunyane a hao.”—Liproverbia 27:23-27, NW.

Liproverbia 27:26, 27, (NW) e bolela phello e ’ngoe ea mosebetsi o joalo—lijo le liaparo. Tlhaloso ena hase ea lijo tsa limenye-menye tsa mofuta o khethehileng ka ho fetisisa, ebile ha e fane ka lebaka la hore a sebetse ka thata a lebelletse ho fumana liaparo tsa moseho oa morao-rao, kapa lesela la boemo bo phahameng. Empa haeba a ne a ikemiselitse ho etsa boiteko, molisa hammoho le lelapa la hae ba ne ba ka fumana lebese mohlapeng (le chisi), hammoho le boea ba ho loha liaparo tse tšoarellang nako e telele.