Lipotso tse Tsoang ho Babali

◼ Ke hobane’ng ha Esaia 11:6 ho New World Translation of the Holy Scriptures e re “phiri e tla lula ka nakoana le konyana”? Na khotso e joalo e ke ke ea e-ba ea ka ho sa feleng?

Khotso e khathollang pōpong ea liphoofolo e profetiloeng ho Esaia 11:6-9 e tla ba ea ka ho sa feleng. Empa phetolelo e hlokolosi ea Esaia 11:6 e hlakisa hore liphoofolo tse joalo li ke ke tsa lula hammoho ka linako tsohle.

Ho New World Translation of the Holy Scriptures, Esaia 11:6 e baleha tjena: “Phiri e tla lula ka nakoana le konyana, ’me lengau ka bolona le tla botha le potsanyane, ’me namane le taoana e nang le moetse le liphoofolo tse nontšitsoeng kaofela li tla ba hammoho; ’me moshanyana e monyenyane o tla li etella pele.”

Temana ena liphetolelong tse ngata tsa Bibele e re: “Phiri le eona e tla lula [kapa, “phela”] le konyana.” Liphetolelo tse joalo li ka ’na tsa fana ka khopolo ea phiri le konyana e le tse lulang hammoho ka mehla, joalokaha eka ke lelapeng le lecha kapa tokisetsong ea bophelo.

Leha ho le joalo, lentsoe la Seheberu le fetoletsoeng e le “lula” kapa “phela” ke gur. Ho ea ka mongoli oa buka ea mantsoe William Gesenius, le bolela “ho aha, ho lula ka nakoana, ho phela joalokaha eka hase hae, ke hore joaloka motho ea sa tsejoeng, ea tsoang sebakeng se seng, moeti.” (A Hebrew and English Lexicon of the Old Testament, e fetoletsoeng ke Edward Robinson) Buka ea mantsoe ea F. Brown, S. Driver, le C. Briggs e fana ka tlhaloso ea “ho aha, ho lula, bakeng sa (nako e itseng kapa e sa feleng), ho lula joaloka ea chakileng . . . ka ntle ho litokelo tsa pele.”

Molimo o sebelisitse gur ha a bolella Abrahama ho “aha joaloka molichaba” Kanana. Mopatriareka o ne a ke ke a rua naha, empa e ne e ka ba moahi ea sireletsehileng moo. (Genese 26:3, NW; Exoda 6:2-4; Ba-Heberu 11:9-13) Ka ho tšoanang, Jakobo o ile a re o ne a ‘ahile joaloka molichaba’ karolong ea Garane, hobane o ne a tla khutlela Kanana.—Genese 29:4; 32:4.

Paradeiseng eo Molimo o tla e theha, haufinyane liphoofolo le batho li tla ba khotsong. Konyana e ke ke ea e-ba kotsing ea ho ba le phiri kapa namane ho ba le lengau. E le ho bontša phapang le nakong ea hona joale, puo ebile e lumella mohopolo oa hore phiri e tla ba moahi ea sirelelitsoeng ke konyana.—Esaia 35:9; 65:25.a

Leha ho le joalo, liphoofolo tse joalo li ka ’na tsa e-ba le libaka tsa bolulo tse arohaneng. Liphoofolo tse ling li tšoaneloa ke ho phela merung, tse ling mahoatateng, ho sa le joalo tse ling li tšoaneloa ke ho phela sebakeng sa leoatleng kapa lithabeng. Esita le nakong ea Paradeise ea mathomo, Molimo o ile oa bua ka ‘liphoofolo tsa hae le liphoofolo tse hlaha.’ (Genese 1:24) Hoa bonahala hore liphoofolo tsa hae e ne e le tseo mohlomong li neng li atisa ho fumanoa pel’a batho le pel’a moo ba lulang teng. Liphoofolo tse hlaha, le hoja li se sōrō, ho bonahala li ne li rata ho lula hōle le batho. Kahoo, joalokaha boprofeta ba Esaia bo boletse esale pele, phiri e tla “lula ka nakoana le konyana,” empa e ke ke ea e-ba haufi le phoofolo e joalo ea hae ka mehla.

[Mongolo o botlaaseng ba leqephe]

[Tlhaloso ea Moo Setšoantšo se Nkiloeng Teng e leqepheng la 31]

Zoological Research Center, Tel-Aviv Hebrew University