Itebele Hore U se ke Ua ba le Pelo e Bolotsana

1, 2. Ke hobane’ng ha ho le thata hore re tsebe boemo ba sebele ba lipelo tsa rōna tsa tšoantšetso?

A RE re mohlomong hoseng ho hong ha u ntse u le likobong u utloa u otloa ke lehlaba le bohale bohareng ba sefuba, ebile u felloa ke moea. U ka ’na ua ipotsa, ‘Ebe ke lefu la pelo?’ Ho iphapanyetsa bothata boo ho ne ho ke ke ha u thusa ka letho. E ne e tla ba hantle hore u nke bohato hang-hang. Kahoo, u ka ’na ua letsetsa ambulense e le hore u tsebe ho fumana thuso ea litsebi tsa bongaka. Ngaka e ka ’na ea u hlahloba ka hloko, mohlomong e sebelisa mochine o hlahlobang hore na pelo ea mokuli e otla joang. Hore na u tla phela kapa u tla shoa, ho itšetlehile ka hore ho fumanoe ka potlako hore na u tšoeroe ke eng u be u phekoloe.

² Lipelo tsa rōna tsa tšoantšetso tsona ho etsahala’ng ka tsona? Ho ka ’na ha se ke ha e-ba bonolo ho tseba boemo ba tsona. Hobane’ng? Ka Bibeleng re bala sena: “Pelo e bolotsana ho feta ntho leha e le efe ’me e tsitlella seo e se batlang. Ke mang ea ka e tsebang?” (Jer. 17:9) Kahoo, lipelo tsa rōna li ka re thetsa, tsa etsa hore re nahane hore ha re na mathata moeeng, empa ba bang bona ba ka ’na ba bona lintho tse ba lemosang eaba baa tšoenyeha. Ke hobane’ng ha re ka ’na ra thetsoa? Ha e le hantle, litšekamelo tsa rōna tsa boetsalibe li ka ’na tsa re sitisa, ’me Satane le tsamaiso ena ea lintho ba ka ’na ba re sitisa ho bona boemo ba sebele ba lipelo tsa rōna. Mabapi le ho hlahloba lipelo tsa rōna ho na le seo re ka ithutang sona ho Jeremia le ho batho ba Juda ba mehleng ea hae.

 3. Ke lintho life tse fetohileng melimo ho batho ba bangata?

³ Boholo ba Bajuda bo ne bo bontšitse hore lipelo tsa bona li ne li le boemong bo hlobaetsang. Ba ile ba furalla Molimo a le mong feela oa ’nete ka lebaka la melimo ea Bakanana, ’me ba ile ba etsa seo ka matsoalo a khutsitseng. Jehova o ile a botsa barapeli bao a re: ‘Melimo ea lōna eo le iketselitseng eona e hokae? E ke e tsohe haeba e ka le pholosa nakong ea tlokotsi ea lōna. Etsoe melimo ea lōna e lekana le palo ea metse ea lōna.’ (Jer. 2:28) Ho totobetse hore rōna ha re nahane hore re ka rapela melimo ea litšoantšo. Leha ho le joalo, tlas’a sehlooho se reng “molimo,” dikishinari e ’ngoe e re: “Ke motho kapa ntho ea bohlokoa ka ho fetisisa.” Ntho e tlang pele bophelong ba batho ba bangata lefatšeng ke mosebetsi oa bona, bophelo, lelapa esita le liphoofolo tsa lapeng. Ba bang ba nka hore lipapali, batho ba hlaheletseng, theknoloji, ho eta kapa meetlo ea bona, ke lintho tsa bohlokoa ka ho fetisisa. Ba bangata ba phehella lintho tsena le haeba ho etsa joalo ho senya kamano ea bona le ’Mōpi. Na Bakreste ba ’nete ba ka angoa ke taba ee joalokaha e ile ea ama batho ba Juda ba mehleng ea Jeremia?

 4. Batho ba neng ba re: “Lentsoe la Jehova le hokae? Ka kōpo, le ke le kene,” ba ne ba tiile hakae?

⁴ U ka ’na ua thahasella ho tseba hore na Jeremia o ne a bua ka eng ha a tla re pelo e tsitlella seo e se batlang. O ile a hlokomela hore batho ba ne ba re: “Lentsoe la Jehova le hokae? Ka kōpo, le ke le kene.” (Jer. 17:15) Empa na ba ne ba tiile? Ha e le hantle, khaolo eo ea Jeremia e qala ka ho re: “Sebe sa Juda se ngotsoe fatše ka pene ea tšepe. Se ngotsoe ka ho fatoa ka motsu oa [taemane] matlapeng a lipelo tsa bona.” Bothata bo boholo ke hore Bajuda bao ba ne ba ‘tšepa motho oa lefatše ’me ba etsa nama letsoho la bona, ’me ba etsa hore lipelo tsa bona li furalle Jehova.’ Seo se fapane le se neng se etsoa ke batho ba fokolang ka palo ba neng ba tšepile Molimo, ba batla hore a ba tataise a be a ba hlohonolofatse.—Jer. 17:1, 5, 7.

 5. Batho ba habo Jeremia ba ne ba etsa joang ha Jehova a ne a ba tataisa?

⁵ Hore na lipelo tsa bongata ba bona li ne li le joang, ho ile ha totobatsoa ke hore na ba ne ba etsa joang ha ba ne ba utloa seo Molimo a neng a se bua. (Bala Jeremia 17:21, 22.) Ho etsa mohlala, ka Sabatha batho ba ne ba lokela ho phomola mesebetsing e tloaelehileng, ’me ba ne ba e-ba le monyetla oa hore ba kenye letsoho mesebetsing ea moea. Batho ba habo Jeremia ba ne ba sa lokela ho etsa khoebo kapa ho phetha mabaka ka Sabatha. Empa seo ba neng ba se etsa se ne se bontša hore na lipelo tsa bona li ne li le joang. “Ha baa ka ba mamela kapa ba sekeha tsebe, ’me ba satalatsa melala ea bona e le hore ba se ke ba utloa le hore ba se ke ba amohela taeo.” Le hoja ba ne ba tseba molao oa Molimo, ba ne ba e-na le maikutlo a bona—ba ne ba ikhethela ho iketsetsa lintho ka Sabatha.—Jer. 17:23; Esa. 58:13.

6, 7. (a) Ka booatla, Mokreste a ka ’na a ba le maikutlo afe, ho sa tsotellehe keletso eo sehlopha sa lekhoba le tšepahalang le fanang ka eona kajeno? (b) Ho ba teng ha rōna libokeng ho ka ’na ha ameha joang?

⁶ Kajeno, ha re tlas’a molao oa Sabatha. Leha ho le joalo, ho na le temoso eo re ka ithutang eona ho seo batho bao ba neng ba se etsa, e leng se neng se bontša hore na lipelo tsa bona li ne li le joang. (Bakol. 2:16) E le hore re etse thato ea Molimo, re tlohetse ho lelekisa lintho tsa boikhabi kapa lintho tse tloaelehileng tsa letsatsi le letsatsi. Rea hlokomela hore na e ne e tla be e le booatla bo bokaakang haeba re ne re ka ikhethela tsela e bonolo ea ho khahlisa Molimo. Ho ka etsahala hore ebe re tseba batho ba bangata ba ’nileng ba tsepamisa likelello tabeng ea ho etsa thato ea Molimo ’me ba fumana hore seo sea khatholla. Kahoo, re ka ’na ra ithetsa joang?

⁷ Ka phoso Mokreste a ka ’na a nahana hore le ka mohla pelo ea hae e ke ke ea mo thetsa joalokaha ho ile ha etsahala ho batho ba bangata ba mehleng ea Jeremia. Ka mohlala, monna a ka ’na a re, ‘Ke lokela ho sebetsa e le hore ke hlokomele lelapa la ka,’ e leng ntho e utloahalang. Empa ho tla etsahala’ng haeba seo se ka etsa hore a nahane see, ‘Ke lokela ho ruteha ho feta mona e le hore ke tsebe ho fumana mosebetsi o motle kapa o se ke oa ntahlehela’? Seo se ka ’na sa bonahala eka sea utloahala, ’me sa etsa hore a fihlele qeto ena, ‘Linako li fetohile, e le hore u phomelle kajeno ho hlokahala hore u fumane thuto ea k’holeje kapa ea univesithi hore u tle u se ke ua lahleheloa ke mosebetsi.’ Ho ka ba bonolo hore motho a qale ho khella fatše keletso e bohlale le e shebang lintho ka tsela e loketseng, e tsoang ho lekhoba le tšepahalang le le masene, e mabapi le ho ntšetsa lithuto pele, ebe o qala ho lofa liboka! Tabeng ena, butle-butle batho ba bang ba ’nile ba susumetsoa ke maikutlo a lefatše le ke tsela eo le talimang lintho ka eona. (Baef. 2:2, 3) Ka nepo Bibele ea re lemosa e re: “U se ke ua lumella lefatše le u potolohileng hore le u bōpe ka tsela e ratoang ke lona.”—Bar. 12:2, Phillips.a

 8. (a) Ke ntho efe eo Mokreste a ka ikhantšang ka eona? (b) Ke hobane’ng ha ho sa hlokahale feela hore motho a tsebe ho itseng ka Molimo le ka tsela eo a neng a sebelisana le batho ka eona?

⁸ Ke ’nete hore lekholong la pele la lilemo, Bakreste ba bang e ne e le barui, mohlomong ba bile ba hlaheletse lefatšeng. Ho joalo le ka Bakreste ba bang le mehleng ea rōna. Ba lokela ho ba le maikutlo afe ka seo ba se fihletseng, hona rōna re lokela ho ba nka joang? Jehova o ile a sebelisa Jeremia ho fana ka karabo. (Bala Jeremia 9:23, 24.) Ho e-na le hore motho a ithorise ka lintho tseo a li finyeletseng, o tla be a le bohlale haeba a bontša hore ho tseba ’Musi oa Bokahohle ke hona habohlokoa haholo. (1 Bakor. 1:31) Leha ho le joalo, ho ba le temohisiso le ho tseba Jehova ho bolela’ng? Ha e le hantle, batho ba mehleng ea Jeremia ba ne ba tseba lebitso la Molimo. Ba ne ba bile ba tseba hore na o ile a etsa’ng ho pholosa baholo-holo ba bona Leoatleng le Lefubelu, nakong eo ba neng ba kena Naheng e Tšepisitsoeng, nakong ea Baahloli le nakong ea puso ea marena a neng a tšepahala. Ho sa tsotellehe seo, ba ne ba hlile ba sa tsebe Jehova ba bile ba sa bontše tumelo ea ’nete ho eena. Leha ho le joalo, ba ne ba re: “Ke lutse ke hloka molato. Ruri bohale ba [Molimo] bo tlohile ho ’na.”—Jer. 2:35.

 9. Ke hobane’ng ha re ka kholiseha hore ho fetola pelo ke ntho e ka etsahalang, hona see se ka etsoa joang?

⁹ Ho ne ho hlokahala hore Bajuda bao Jeremia a neng a ba bolella molaetsa oa Molimo ba fetole lipelo tsa bona. Seo se ne se ka etsahala hobane ha Molimo a ne a bua ka ba neng ba tla khutla kholehong o ile a re: “Ke tla ba fa pelo ea ho ntseba, hore ke ’na Jehova; ’me e tla ba sechaba sa ka, ’me ke tla ba Molimo oa bona, etsoe ba tla khutlela ho ’na.” (Jer. 24:7) Le kajeno ho ka etsahala phetoho e tšoanang. Ho feta moo, boholo ba rōna re ka ntlafatsa boemo ba lipelo tsa rōna tsa moea. Ho na le lintho tse tharo tseo e leng tsa bohlokoa haholo: ho ithuta Lentsoe la Molimo ka matla, ho utloisisa ka ho hlaka hore na ke sefe seo Molimo a re etsetsang sona bophelong ba rōna le ho sebelisa seo re ithutileng sona ka eena. Ho fapana le batho ba mehleng ea Jeremia, re lokela ho batla hore Mohlahlobi e Moholo oa lipelo a hlahlobe lipelo tsa rōna. Re ka hlahloba lipelo tsa rōna ka hore re sebelise Bibele le ka hore re hlokomele hore na Jehova o re etselitse’ng. (Pes. 17:3) Ruri ho bohlale ho etsa joalo!

10, 11. (a) Ke hobane’ng ha Jeremia a ile a ea ho sebōpi? (b) Seo Jehova a se etsang ka batho ha a ba bōpa se itšetlehile ka eng?

¹⁰ Satane o batla ho qobella batho bohle hore ba be ka tsela eo eena a e batlang, empa Molimo eena ha a bōpa batho, o nahana ka maemo a motho ka mong. Sena se bontšoa ke se ileng sa etsahala ho Jeremia. Ka letsatsi le leng Molimo o ile a re a ee ntlong ea sebōpi. Sebōpi se ne se ntse se sebetsa lebiling la sona, empa ha sejana seo se neng se ntse se se bōpa se ne se senyeha, se ne boela se bōpa sejana se seng ka letsopa leo le neng le ntse le le bonolo. (Bala Jeremia 18:1-4.) Ke hobane’ng ha Jeremia a ile a laeloa hore a shebelle see, hona ke sefe seo re ka ithutang sona ketsahalong ee?

¹¹ Jehova o ne a batla ho bontša Jeremia le Baiseraele hore O na le matla a ho bōpa batho le lichaba hore ba be seo A batlang hore ba be sona. Molimo o sebelisa letsopa joang? Ho fapana le libōpi tsa batho, Jehova ha a etse liphoso ebile ha a senye mosebetsi oa hae hobane feela a nkiloe ke maikutlo. Seo Jehova a se etsang ka batho, se itšetleha ka hore na ba etsa’ng ha a ba bōpa.—Bala Jeremia 18:6-10.

12. (a) Jojakime o ile a etsa joang ha Jehova a ne a etsa boiteko ba ho mo bōpa? (b) U ithuta’ng tlalehong e buang ka Jojakime?

¹² Joale, Jehova o bōpa batho ka bomong joang? Ntho e ka sehloohong eo a e sebelisang kajeno ke Bibele. Ha motho a bala Lentsoe la Molimo a bile a etsa seo le se buang, o bontša hore na ke motho oa mofuta ofe ’me Molimo a ka mo bōpa. Joale, a re ke re hlahlobeng mohlala oa Morena Jojakime e le hore re bone hore na e ka ’na eaba batho ba mehleng ea Jeremia ba ne ba susumelitsoe joang litabeng tsa bophelo ba bona ba letsatsi le letsatsi. Molao o ne o ile oa bolela hore motho a “se ke [a] etsa bolotsana ho mosebetsi ea hiriloeng,” empa ke sona se ileng sa etsoa ke morena, o ile a tlatlapa Baiseraele ba habo ka hore a ba sebelise ho haha “ntlo e khōlō” empa a ba lefa moputso o tlaase. (Deut. 24:14; Jer. 22:13, 14, 17) Molimo o ile a leka ho bōpa Jojakime a sebelisa lentsoe la Hae le neng le phatlalatsoa ke baprofeta. Leha ho le joalo, morena o ile a latela tšekamelo ea pelo ea hae e bolotsana. O ile a re, “nke ke ka mamela” ’me a tsoela pele ka tsela eo e sa leng a tsamaea ka eona ho tloha bocheng ba hae. Kahoo, Molimo o ile a re: “[Jojakime] o tla patoa ka lepato la esele e tona, ka ho hulanngoa le ka ho lahloa.” (Jer. 22:19, 21) E ne e ka ba booatla bo bokaakang haeba re ne re ka re: ‘Ke bojoalo ba ka!’ Kajeno, Molimo ha a romele baprofeta ba kang Jeremia, empa O fana ka tataiso. Sehlopha sa lekhoba le tšepahalang le le masene se re thusa hore re utloisise melao-motheo ea Bibele re be re e sebelise. Melao-motheo ena e ka akarelletsa likarolo tse ling tsa bophelo ba rōna ba letsatsi le letsatsi, tse kang tsela eo re aparang ka eona kapa ’mino le litantši tse etsoang machatong kapa meketjaneng e meng ea boithabiso. Na re tla lumela hore Lentsoe la Molimo le re bōpe?

13, 14. (a) Ke hobane’ng ha batho ba neng ba e-na le makhoba Jerusalema ba ile ba lumela ho lokolla makhoba a bona a Baheberu? (b) Ke eng e ileng ea bontša hore na ha e le hantle lipelo tsa beng ba makhoba li ne li le joang?

¹³ Nahana ka mohlala o mong. Bababylona ba ile ba beha Tsedekia teroneng ea Juda e le morena ea laoloang ke bona. Ka mor’a moo, Tsedekia ha aa ka a latela keletso eo Molimo a ileng a mo fa eona ka Jeremia; o ile a fetohela Babylona. (Jer. 27:8, 12) Kahoo, Bababylona ba ile ba thibella Jerusalema. Morena le likhosana tsa hae ba ile ikutloa ba tlameha ho etsa ho hong ho mamela Molao e le hore ba amoheloe ke Molimo. Kaha Tsedekia o ne a tseba hore makhoba a Baheberu a ne a lokela ho lokolloa selemong sa bosupa sa botlamuoa ba ’ona, o ile a etsa selekane sa hore makhoba ao a lokolloe. (Ex. 21:2; Jer. 34:14) Ka sebele, kaha Jerusalema e ne e likalikelitsoe ke lira, joale ho ile ha bonahala ho se ho loketse hore batho ba lokolle makhoba a bona!—Bala Jeremia 34:8-10.

¹⁴ Hamorao, lebotho la sesole la Egepeta le ile la thusa Jerusalema, la etsa hore Bababylona ba ikhule. (Jer. 37:5) Joale ba neng ba lokolotse makhoba a bona ba ne ba tla etsa’ng? Ba ile ba qobella batho bao ba neng ba ba lokolotse hore e boele e be bahlanka ba bona. (Jer. 34:11) Taba ke hore, ha Bajuda ba ne ba le kotsing ba ne ba bonahala ba mamela melao ea Molimo, joalokaha eka seo se ne se tla lokafatsa boitšoaro ba bona ba nako e fetileng. Empa ha kotsi e ne e kokobela, ba ne ba khutlela mekhoeng ea bona ea khale. Ho sa tsotellehe taba ea hore ba ne ba iketsa eka ba mamela se boleloang ke Molao, liketso tseo ba ileng ba li etsa hamorao li ile tsa bontša hore botebong ba pelo ba ne ba sa batle ho mamela tataiso e ka Lentsoeng la Molimo ’me ba ne ba sa batle hore e ba bōpe.

15. U rata hore Jehova a u bōpe ho isa kae? Bontša.

¹⁵ Ka thuso ea phutheho ea Jehova ea lefatšeng lohle, re ka ’na ra tseba melao-motheo ea Bibele e amanang le taba e itseng ka ho khetheha. Ka mohlala, re ka ’na ra tseba hore na re lokela ho etsa’ng haeba ho bonahala mor’abo rōna a re khopisa. (Baef. 4:32) Re ka ’na ra lumela hore keletso ea Bibele e nepahetse ebile e bohlale. Leha ho le joalo, re tla ba letsopa la mofuta ofe? Na re tla hle re lumele ho bōptjoa ke Jehova? Haeba lipelo tsa rōna li le bonolo, re tla etsa liphetoho tse tla re ntlafatsa, ’Mōpi e Moholo o tla re bōpa hore re be lijana tse loketseng hore a ka li sebelisa. (Bala Baroma 9:20, 21; 2 Timothea 2:20, 21.) Ho e-na le hore re be le pelo e kang ea Jojakime kapa ea beng ba makhoba ba mehleng ea Tsedekia, re lokela ho amohela ho bōptjoa ke Jehova bakeng sa morero o hlomphehang.

16. Jeremia o ne a tseba ’nete efe ea bohlokoa?

¹⁶ Esita le Jeremia o ile a bōptjoa ke Molimo. Maikutlo a moprofeta eo e ne e le afe? A bontšoa ke seo a ileng a se bua ha a ne a re: “Ha ho matleng a motho ea tsamaeang hore a tsamaise mehato ea hae.” Ka mor’a moo, o ile a kōpa ka tieo a re: “Jehova, u nkhalemele.” (Jer. 10:23, 24) Bacha, na le tla etsisa Jeremia? Ho ka etsahala hore ebe ho na le liqeto tse ngata tseo le tla lokela ho li etsa. Bacha ba bang ba batla ho ‘tsamaisa mehato ea bona.’ Na le tla batla tataiso ea Molimo ha le etsa liqeto? Joaloka Jeremia, na ka boikokobetso le tla amohela hore batho ba hlōlehile ho tsamaisa mehato ea bona? Hopola: Haeba u batla tataiso ea Molimo, o tla u bōpa.

17-19. (a) Ke hobane’ng ha Jeremia a ile a nka leeto le lelelele la ho ea Eufrate? (b) Ho ka etsahala hore ebe ho mamela ha Jeremia ho ile ha lekoa ka tsela efe? (c) Lintho tseo Jeremia a ileng a li etsa mabapi le lebanta li ile tsa finyella eng?

¹⁷ Mosebetsi oa Jeremia o ne o hloka hore a mamele tataiso ea Molimo. Haeba u ne u le Jeremia, na u ka be u ile ua mamela litaelo tse joalo tseo u li fuoang? Ka nako e ’ngoe Jehova o ile a bolella Jeremia hore a batle lebanta la line ’me a itlame ka lona. Ka mor’a moo, Molimo o ile a mo laela hore a tsamaee a ee Eufrate. Ha u sheba ’mapa u tla hlokomela hore seo se ne se bolela hore o ne a tla lokela ho tsamaea lik’hilomithara tse ka bang 500. Ha a fihla moo, Jeremia o ne a lokela ho pata lebanta leo lefarung la lefika ebe o khutlela Jerusalema. Hamorao Molimo o ile a re a khutlele morao a e’o nka lebanta leo. (Bala Jeremia 13:1-9.) Ka kakaretso, Jeremia o ne a tla be a tsamaile lik’hilomithara tse ka bang 1 900. Batho ba tšoaeang Bibele liphoso ha ba lumele hore o ne a ka tsamaea sebaka se selelele hakaalo, ebe o nka likhoeli a ntse a tsamaea.b (Esdr. 7:9) Leha ho le joalo, ke sona seo Molimo a ileng a se bolela ’me ke sona seo Jeremia a ileng a se etsa.

¹⁸ Nahana ka moprofeta eo a phunyeletsa lithabeng tsa Juda, ’me ho itšetlehile ka hore na o ne a nkile tsela efe, hamorao a haola lehoatateng a e-ea a lebile Eufrate. O entse sena sohle hore feela a e’o pata lebanta la line! Ho ka etsahala hore ebe ho ba sieo ha hae nako e telele ho ile ha etsa hore baahelani ba hae ba ipotse lipotso. Ha a khutla o ne a se a sa nka lebanta leo la line. Joale Molimo o ile a mo bolella hore a boele a nke leeto le lelelele ho ea lata lebanta ’me ka nako eo, le ne le se le bolile ’me “le sa lokela letho.” Nahana feela hore na ho ne ho ka ba bonolo hakaakang hore a re: ‘Joale ena ntho e boima. Ha ke bone molemo oa eona.’ Leha ho le joalo, kaha o ne a bōpiloe ke Molimo ha aa ka a nahana joalo. Ho e-na le hore a koma-kome, o ile a etsa seo a neng a laeloa hore a se etse!

¹⁹ Ke feela ka mor’a hore a nke leeto la bobeli moo Molimo a ileng a mo hlalosetsa litaba. Seo Jeremia a neng a se entse e ne e le mohlala oo a neng a ka o sebelisa ha a phatlalatsa molaetsa o matla: “Sechaba sena se sebe se hanang ho mamela mantsoe a ka, se tsamaeang ka manganga a lipelo tsa sona le se ntseng se latela melimo e meng e le hore se e sebeletse le ho e inamela, le sona se tla ba feela joaloka lebanta lena le sa lokelang letho.” (Jer. 13:10) Ke tsela e hlollang hakaakang eo Jehova a ileng a ruta sechaba sa hae ka eona! Taba ea hore ebe Jeremia o ile a mamela Jehova ka pelo eohle ho se neng se bonahala eka ke ntho e nyenyane, e ile ea phetha karolo ea bohlokoa matsapeng ao Jehova a ileng a a etsa a hore a finyelle lipelo tsa bona.—Jer. 13:11.

20. Ke hobane’ng ha batho ba bang ba ka ’na ba makatsoa ke ha u mamela, empa u ka kholiseha ka eng?

²⁰ Kajeno Bakreste ha ba kōptjoe hore ba tsamaee lik’hilomithara tse ngata e le hore Molimo a ba rute se itseng. Leha ho le joalo, ebe ho ka ’na ha etsahala hore tsela ea Bokreste eo u phelang ka eona e makatse baahelani ba hao kapa mohlomong batho bao u ba tloaetseng ba be ba u nyatse ka lebaka la eona? E ka ’na ea ama tsela eo u aparang ka eona, thuto eo u e khethang, mosebetsi oo o u khethang kapa hore na maikutlo a hao ke afe ka joala. Na u tla ikemisetsa ho latela tataiso ea Molimo joaloka Jeremia? Lintho tseo u khethang ho li etsa hobane u lumetse hore pelo ea hao e bōptjoe ke Molimo li ka ’na tsa etsa hore u fane ka bopaki bo botle. Ntle ho moo, ho mamela tataiso ea Jehova e fumanoang ka Lentsoeng la hae, le ho amohela tataiso e fanoang ka sehlopha sa lekhoba le tšepahalang le le masene, ho tla u tsoela molemo nako e telele. Ho e-na le ho laoloa ke pelo e bolotsana, u ka tšoana le Jeremia. Kahoo, ikemisetse ho bōptjoa ke Molimo, u lumele hore a u bōpe hore u be sejana se hlomphehang seo a tla se sebelisa nako e telele.