‘Na eo e ne e se Taba ea ho Ntseba?’

1, 2. Ke hobane’ng ha e ne e se bohlale hore Jojakime a kene morerong oa ho haha?

MORENA JOJAKIME o ne a haha ntlo, ’me e ne e lokela ho ba khōlō. O ne a rerile ho haha likamore tse khōlō bonyane mekatong e ’meli. Lifensetere tse khōlō li ne li tla kenya khanya ea letsatsi ’me li etse hore ho lule ho foka moea o pholileng, e le hore morena le lelapa la hae ba ne ba ka lula hamonate ntlong eo. Mabota a ne a lokela ho manehoa ka kedare ea Lebanone e nkhang hamonate. Pente e khubelu e rekiloeng linaheng tse ling, e ne e tla etsa hore mabota a be le ’mala o loileng o mofubelu o neng o ratoa ke batho ba phahameng le ba matla ba linaha tse ling.—Jer. 22:13, 14.

² Morero oo o ne o tla ja chelete e ngata. Nakong eo, ho bonahala eka letlotlo la naha le ne le felile ka lebaka la tšireletso ea sechaba le chelete ea sethabathaba eo Egepeta e neng e e batla. (2 Mar. 23:33-35) Leha ho le joalo, Jojakime o ile a fumana tsela ea ho lefella ntlo ea hae e ncha ea borena. Ha aa ka a lefa lihahi! O ne a li tšoere joaloka makhoba, a li sehlisa mahala ho tšehetsa borena ba hae.

 3. Jojakime o ne a fapane joang le ntate oa hae, hona hobane’ng?

³ Molimo o ile a sebelisa Jeremia ho nyatsa Jojakime ka lebaka la boikhabi ba hae.a O ile a hopotsa morena hore ntate oa hae, e leng Morena Josiase, o ne a ile a bontša mosa o sa tloaelehang ho basebetsi le mafutsana a ba a ba fa lintho ka seatla se bulehileng. Ntho e ’ngoe hape eo Josiase a neng a ile a e etsa, e ne e le ho buella litseko tsa bona khotla. Ha a hlokomelisa Jojakime ka taba ea hore Josiase o ne a nahanela batho ba tlaase, Jehova o ile a botsa a re: ‘Na eo e ne e se taba ea ho ntseba?’—Bala Jeremia 22:15, 16.

 4. Ke hobane’ng ha u lokela ho nka ho tseba Jehova e le habohlokoa?

⁴ Ha maemo a ntse a senyeha lefatšeng la Satane, re hloka thuso le tšireletso eo Jehova a e fang batho ba mo tsebelang haufi. Ka tsela eo, re lokela ho ba haufi le Molimo haholoanyane. Hape, e le hore re atlehe ha re bolela litaba tse molemo, re lokela ho bonahatsa litšobotsi tsa hae tse ntle. Leha ho le joalo, u ka ’na ua ipotsa, ‘Ke ka tsela efe Mokreste a ka tsebang Jehova hantle joaloka Morena Josiase?’

5, 6. (a) Ntate ea molemo o susumetsa bana ba hae joang? (b) Ho tseba litsela tsa Jehova ho lokela ho re susumelletsa hore re etse’ng, ho fapana le seo Jojakime a ileng a se etsa?

⁵ Nahana ka litsela tseo ka tsona ntate ea molemo a susumetsang bophelo ba bana ba hae. Ka mohlala, ha ba hlokomela kamoo a fanang kateng ho batho ba hlokang, le bona ba susumelletseha hore ba fane. Ha ba hlokomela kamoo a tšoarang ’mè oa bona ka lerato le ka tlhompho kateng, seo se ka ’na sa ba thusa hore le bona ba nahanele batho ba bong bo fapaneng. Ha ba utloa hore ntate oa bona ke motho ea nang le toka le ea tšepahalang litabeng tsa lichelete, seo se lokela ho ba susumetsa hore le bona ba sebetse litaba ka toka le ka botšepehi. Ka sebele, ha bana ba joalo ba ithuta litsela tseo ntate oa bona a etsang lintho ka tsona le litšobotsi tsa hae, e ka ’na eare ha ba hōla ba batla ho tšoara batho ba bang ka tsela eo ntate oa bona a tšoarang batho ka eona.

⁶ Ka tsela e tšoanang, Mokreste ea tsebang Jehova ka tsela eo Josiase a neng a mo tseba ka eona ha a Mo nke feela e le ’Musi oa Bokahohle. Ha Mokreste a bala Bibele o tla tseba hore na Molimo o tšoara batho joang, ’me o tla batla ho etsisa Ntate oa hae ea leholimong. Letsatsi le letsatsi ha a nahana ka lintho tseo Molimo a li ratang le tseo a sa li rateng, lerato leo a ratang Jehova ka lona lea matlafala. Ka lehlakoreng le leng, motho ea iphapanyetsang melao ea Molimo le likhopotso tsa hae ’me ka tsela eo a hana ho amohela tataiso eo Molimo a fanang ka eona, a ke ke a tseba Molimo oa ’nete. O tšoana le Jojakime, ea ileng a lahlela mollong lentsoe la Jehova le neng le tla ka Jeremia.—Bala Jeremia 36:21-24.

 7. Ke hobane’ng ha u lokela ho batla ho tseba Jehova joaloka Morena Josiase?

⁷ Ho atleha ha rōna tšebeletsong e halalelang le tšepo eo re nang le eona ea ho fumana bophelo lefatšeng le lecha ho itšetlehile ka hore re tsebe Jehova e le kannete. (Jer. 9:24) A re ke re hlahlobeng litšobotsi tsa Molimo tse ’maloa joalokaha li hlalositsoe libukeng tseo Jeremia a li ngotseng. Ha ho ntse ho tšohloa litšobotsi tsa Molimo sehloohong sena, batla litsela tseo uena ka bouena u ka tsebang Molimo ka tsona u be u mo etsise joaloka Morena Josiase.

 8. Mosa o lerato ke eng?

⁸ Lipuong tse ngata ho thata ho fetolela tšobotsi ea botho ba Molimo eo ho thoeng ke mosa o lerato kapa lerato le tšepahalang. Ho latela dikishinari e ’ngoe ea Bibele, lentsoe la Seheberu le sebelisitsoeng mona le hlalosa tšebelisano e teng pakeng tsa matla, ho tiea le lerato. Dikishinari eo e tsoela pele ho re: “Tlhaloso efe kapa efe ea lentsoe lena e sa akarelletseng matla, ho tiea le lerato ha e hlalose lentsoe leo ka botlalo.” Kahoo, motho ea bontšang mosa o lerato hase feela motho ea molemo. A amehile haholo, o leka ka hohle hore a thuse batho ba bang hore ba fumane lintho tseo ba li hlokang, haholo-holo tseo ba li hlokang moeeng. Lebaka le ka sehloohong le etsang hore a etse lintho ka boitelo joalo ke hobane o batla ho khahlisa Molimo ea Matla ’Ohle.

 9. Tsela eo Jehova a ileng a tšoara Baiseraele ka eona e ile ea bontša eng?

⁹ Tsela e molemo ka ho fetisisa ea hore motho a utloisise poleloana e hlahang ka Bibeleng e le “mosa o lerato,” ke ka hore a ithute hore na Molimo o ’nile a tšoara barapeli ba hae ba ’nete joang ha lilemo li ntse li feta. Jehova o ile a sireletsa Baiseraele a ba a ba fepa lilemong tse 40 tseo ba li qetileng lefeelleng. Naheng e Tšepisitsoeng, Molimo o ile a fana ka baahloli hore ba ba lopolle lireng tsa bona le hore ba ba khutlisetse borapeling ba ’nete. Kaha Jehova o ile a oa a tsoha le bona lilemong tseo tsohle tse makholo, o ne a ka re ho bona: ‘Ke le ratile ka lerato ho isa nakong e sa lekanyetsoang. Ke ka lebaka leo ke le hutseng ka mosa o lerato.’—Jer. 31:3.b

10. Joalokaha ho bontšoa ke se etsahetseng ho Bajuda ba neng ba le Babylona, Jehova o bontša mosa o lerato joang ka tsela eo a mamelang lithapelo ka eona?

¹⁰ Mehleng ea rōna, Molimo o ntse a tsoela pele ho bontša mosa o lerato ka litsela tseo ka ho toba li tsoelang barapeli ba hae molemo. Nahana ka taba ea thapelo. Jehova o mamela lithapelo tsohle tse etsoang ka tieo, empa o mamela ka ho khetheha ha bahlanka ba hae ba inehetseng ba mo rapela. Esita le haeba ka lilemo re tsoela pele ho rapela ka mathata a tšoanang a sa khaotseng, ha a re tenehele ebile ha a tenoe ke ho mamela lithapelo tsa rōna. Ka lekhetlo le leng, Jehova o ile a re Jeremia a romele molaetsa ho sehlopa sa Bajuda ba neng ba se ba ntse ba le kholehong Babylona. Ba ne ba le lik’hilomithara tse 800 hōle le tempele, ba le hōle le malapa le metsoalle e neng e le Juda. Leha ho le joalo, ho ba hōle ha bona le tempele ha hoa ka ha etsa hore Jehova a se ke a mamela lithoriso tsa bona le likōpo tsa bona tsa hore a ba hauhele. U ntse u nahanne ka lithapelo tsa hao tse tiileng, nahana hore na Bajuda ba ile ba khothala hakaakang ha ba ne ba utloa mantsoe a Molimo a fumanoang ho Jeremia 29:10-12.—E bale.

11, 12. (a) Jehova o ile a tšepisa batho ba Jerusalema eng? (b) Ke thuso efe eo motho ea fuoeng khalemelo eo a neng a e hloka a ka e fumanang?

¹¹ Re bona bopaki bo bong ba mosa o lerato oa Jehova ka tsela e molemo eo a shebang lintho ka eona. Ha ho timetsoa ha Jerusalema ho ntse ho atamela, ’me baahi ba motse oo ba ntse ba tsoela pele ka bofetoheli ba bona boo ha e le hantle e neng e le ho fetohela Molimo, bokamoso ba bona e ne e tla ba bofe? Ebe mohlomong ba ne ba tla bolaoa ke tlala kapa ke Bababylona? Ho ne ho ka ba molemo hore ba mpe ba ee kholehong nako e telele kapa ba shoele naheng esele. Leha ho le joalo, batho ba neng ba tla baka le ba neng ba tla fetola bophelo ba bona, Jehova o ile a ba tšepisa ‘lentsoe le molemo.’ O ile a tšepisa hore o ne a tla “lebisa tlhokomelo” ho bona. O ne a tla ba “khutlisetsa sebakeng sena,” e leng ha habo bona, ba e-tsoa sebakeng se hōle sa Babylona. (Jer. 27:22) Ka lebaka leo, ba ne ba tla hooa ba re: “Rokang Jehova oa mabotho, etsoe Jehova o molemo; kaha mosa oa hae o lerato o teng ho isa nakong e sa lekanyetsoang!”—Jer. 33:10, 11.

¹² Ka lebaka la mosa oa hae o lerato, Jehova ke Mohloli oa khothatso ho batho bao ho nkoang hore ba mahlomoleng. Ho na le batho ba bang kajeno bao e neng e le karolo ea phutheho ea Bokreste empa ba ile ba fuoa khalemelo eo ba neng ba e hloka ebile e le e loketseng. E ka ’na eaba ba imeloa ke letsoalo le molato ’me joale ba leqe ho boela ba kopanela le batho ba Molimo. E ka ’na eaba ba ipotsa hore na ebe Jehova o tla ke a ba tšoarele a be a ba amohele hape. Molimo ea Matla ’Ohle o na le ‘lentsoe le molemo’ bakeng sa batho bohle ba joalo. Ba ka fumana thuso e mosa ea hore ba etse liphetoho tse hlokahalang tseleng eo ba nahanang ka eona le eo ba itšoarang ka eona. Hape, seo re se balileng serapeng se ka pele ho sena, se ka sebetsa le ho bona—Jehova o tla ba ‘khutlisetsa sebakeng sa habo bona’ har’a batho ba hae ba thabileng.—Jer. 31:18-20.

13. Ke hobane’ng ha tsela eo Jehova a ileng a thusa Jeremia ka eona e lokela ho u khothatsa?

¹³ Kaha ke Molimo ea nang le mosa o lerato, ka botšepehi Jehova o boetse o thusa bahlanka ba hae ba tšepahalang. Matsatsing ana a ho qetela a lefatše la Satane, re na le mabaka a ho tšepa hore Jehova o tla tšehetsa batho bohle ba batlang ’Muso oa hae pele a be a ba sireletse. Hopola hore matsatsing a ho qetela a Jerusalema, Jeremia o ne a tšepile Jehova hore a mo fe lijo a be a mo sireletse. Le ka mohla Molimo ha aa ka a mo phoqa. (Jer. 15:15; bala Lillo Tsa Jeremia 3:55-57.) Haeba ho e-na le ntho ea mofuta ofe kapa ofe e u tšoenyang haholo, kholiseha hore Jehova o hopola liketso tsa hao tse bontšang botšepehi. Ka lebaka la mosa oa hae o lerato, o batla ho u thusa e le hore ‘u se ke ua fela.’—Lillo 3:22.

14. Ke lintho life tse bontšang ho hloka toka tseo u li boneng haufinyane?

¹⁴ Batho ba bang ba qeta lilemo tse ngata chankaneng ka lebaka la melato eo ba sa e etsang. Ho bile ha e-ba le liketsahalo tseo ho tsona makhotla a ileng a ahlolela motho lefu ’me ha motho eo a se a bolailoe, ebe ke hona ho hlahang bopaki bo supang hore o ne a se na molato. Linaheng tse ling batsoali ba batla lijo ka mahlo a matšo hoo ba beng ba rekise bana ba bona hore e be makhoba e le hore lelapa le mpe le fumane se eang ka maleng. U ikutloa joang ha u utloa ka liketso tse joalo tse bontšang ho hloka toka kajeno? U nahana hore Jehova eena o ikutloa joang? Bibele e hlakisa hore o batla ho felisa lintho tsohle tse utloisang bohloko. Ke Eena feela ea nang le matla a ho etsa joalo. Kahoo, batho ba futsanehileng le ba se nang molato ba utloang bohloko kajeno, ba lokela ho khothala. Jehova, e leng Molimo oa toka, o ntse a nka mehato e tla ba lopolla mathateng ao ba nang le ’ona hona joale.—Jer. 23:5, 6.

15, 16. (a) Jeremia o ile a totobatsa ntlha efe ka Jehova? (b) Ke hobane’ng ha u ka tšepa melao ea Molimo le litšepiso tsa hae?

¹⁵ Mehleng ea Jeremia, batho ba bang ba ne ba tseba hore Molimo o na le tšobotsi e phahameng ka ho fetisisa ea toka. Ka mohlala, Jeremia o ile a bolela hore Baiseraele ba ne ba ka ’na ba bakela libe tsa bona ebe ka liketso tsa bona tse bontšang hore ba fetohile, ho tšoana le ha ba re: “Ka Jehova ea phelang ka ’nete, ka toka le ka ho loka!” (Jer. 4:1, 2) Seo ke ’nete hobane ho hloka toka hase karolo ea morero oa Jehova. Empa ho na le lintho tse ling tse bontšang hore Jehova o rata toka.

¹⁶ Ho hlakile hore Molimo o phetha seo a se buileng ebile hase moikaketsi. Le hoja batho ba bangata ba sa phethahatse litšepiso tseo ba li etsetsang batho ba bang, Jehova eena ha a joalo. Esita le melao ea tlhaho eo a e hlomamisitseng e bileng e re tsoelang molemo, ha e fetohe. (Jer. 31:35, 36) Re ka boela ra tšepa litšepiso tsa hae le liqeto tsa hae tsa boahloli, kaha kamehla li molemo.—Bala Lillo Tsa Jeremia 3:37, 38.

17. (a) Jehova o etsa’ng ha a ahlola litaba? (b) Ke hobane’ng ha u ka tšepa tsela eo baholo ba sebetsang mathata ka eona ka phuthehong? (Sheba lebokose le nang le sehlooho se reng, “Ba Ahlolela Jehova,” le leqepheng la 148.)

¹⁷ Ha Jehova a ahlola, le ka mohla ha a khotsofalle ho ahlola a shebile taba ka holimo feela. O sheba litaba ka botebo. O boetse o hlahloba hore na sepheo sa batho ba amehang ke sefe. Hona joale lingaka li ka sebelisa thepa e khethehileng le mekhoa e ikhethang ho hlahloba pelo ea mokuli nakong eo e ntseng e pompa mali, ’me ka tsela eo tsa fumana hore na e boemong bofe. Kapa li ka hlahloba liphio tse hloekisang mali. Jehova a ka etsa se fetang seo. O hlahloba pelo ea tšoantšetso a bone hore na sepheo sa motho ke sefe, ebile o hlahloba liphio tsa tšoantšetso tse bontšang maikutlo a motho a ka hare-hare. Ka tsela eo, a ka fumana hore na ke hobane’ng ha motho a ile a etsa ntho e itseng le hore na o ikutloa joang ka liketso tsa hae. Ho feta moo, Ea Matla ’Ohle ha a tsietsoe ke boitsebiso bo bongata boo a bo fumanang ha a hlahlobisisa lintho. O feta moahloli ea bohlale ka ho fetisisa oa motho, kaha O sebelisa boitsebiso boo kaofela ka tsela e nepahetseng le e leka-lekaneng ho rera hore na bokamoso ba rōna ke bofe.—Bala Jeremia 12:1a; 20:12.

18, 19. Ho tseba hore Molimo o na le toka ho ka re ama joang?

¹⁸ Ka lebaka leo, u na le lebaka le matla la hore u tšepe Jehova, le haeba ka linako tse ling u khoebethoa ke letsoalo ka lebaka la liphoso tseo u li entseng nakong e fetileng. Le ka mohla u se ke ua lebala hore Jehova hase mochochisi ea leqoophe ea batlang lebaka la hore motho a ahloloe, empa ho e-na le hoo, ke Moahloli ea nang le qenehelo ea batlang ho thusa batho. Haeba u sa je litheohelang ka lebaka la tsela eo u neng u phela ka eona nakong e fetileng kapa ka lebaka la taba e amang motho e mong, kōpa Jehova hore a nke “litsekisano,” kapa ho imeloa maikutlong hoo u nang le hona e le hore u ka lebala ka taba eo.c Ka thuso ea hae, u ka bona hore na Molimo o nka e le habohlokoa hakae hore u tsoele pele u etsa tšebeletso e halalelang.—Bala Lillo Tsa Jeremia 3:58, 59.

¹⁹ Ke ho utloahalang hore Molimo ea nang le toka e phethahetseng, a batle hore batho ba batlang hore a ba amohele le bona ba sebelise toka. (Jer. 7:5-7; 22:3) Ho se khetholle batho ba bang ha re bolela litaba tse molemo ke tsela ea bohlokoa eo re bontšang toka ea Molimo ka eona. Ha u le hlokolosi ha u etsa maeto a ho boela le ha u khanna lithuto tsa Bibele, u tla be u etsisa toka e phahameng ka ho fetisisa ea Molimo, ka tsela e molemo e le kannete. Ka tsela efe? O batla hore batho ba mefuta eohle ba ithute ka eena e le hore ba tle ba pholohe. (Lillo 3:25, 26) U na le tlotla e kaakang ka hore ebe u mosebetsi-’moho le Molimo ’me u bonahatsa toka ea hae mosebetsing oo o pholosang bophelo!

20. (a) Jeremia o ile a totobatsa ntlha efe e mabapi le tsela eo Molimo a sebetsanang le batho ka eona? (b) Taba ea hore Jehova a ‘ikutloe a soabile’ e amana joang le hore oa tšoarela? (Sheba lebokose le nang le sehlooho se reng, “Jehova o ‘Ikutloa a Soabile’ ka Tsela Efe?”)

²⁰ Batho ba bangata ba nka hore buka ea Jeremia le ea Lillo Tsa Jeremia ke melaetsa e phatlalatsang bobe feela. Maikutlo a joalo a hlokomoloha tšepiso e khothatsang e tlalehiloeng libukeng tsena, eo Jehova a ileng a e fa batho ba hae ea hore o ne a tla ba tšoarela. O ile a phehella Bajuda a re: “Ka kōpo, furallang, e mong le e mong tsela ea hae e mpe, ’me le etse hore litsela tsa lōna le mesebetsi ea lōna e be metle.” Ka lekhetlo le leng Jeremia o ile a ba eletsa a re: “Etsang hore litsela tsa lōna le mesebetsi ea lōna e be metle, ’me le mamele lentsoe la Jehova Molimo oa lōna, ’me Jehova o tla ikutloa a soabile ka lebaka la tlokotsi eo a e buileng khahlanong le lōna.” (Jer. 18:11; 26:13) Mehleng ea rōna, Jehova o tsoela pele ho tšoarela batho bohle ba ikoahlaeang e le kannete le ba khaotsang ho etsa lintho tse fosahetseng.

21. Ha Jehova a tšoarela motho, o batla ho finyella eng?

²¹ Leha ho le joalo, Jehova ha a bue ka ho tšoarela feela. O nka bohato bo loketseng. Jehova o ile a sebelisa Jeremia ho fana ka keletso ena: “Khutlang, lōna Baiseraele ba koenehileng . . . Nke ke ka le sosobanyetsa sefahleho ka bohale . . . Nke ke ka lula ke halefile ho isa nakong e sa lekanyetsoang.” (Jer. 3:12) Ha Molimo a tšoaretse e mong oa batho ba hae, ha a lule a mo halefetse. Ho e-na le hoo, le hoja motho a entse phoso, Jehova o batla ho lokisa likamano tse senyehileng. Ho sa tsotellehe libe tseo e ka ’nang eaba motho o li entse, haeba moetsalibe eo a baka e le kannete, ’me a kōpa hore Molimo a mo tšoarele, Jehova o ‘tla mo khutlisetsa’ mohaung oa Hae a be a mo hlohonolofatse. (Jer. 15:19) Tiisetso eo e lokela ho khothatsa motho ofe kapa ofe ea arohaneng le Molimo oa ’nete hore a khutlele ho eena. Ruri taba ea hore Jehova oa tšoarela e etsa hore re be le kamano e haufi le eena!—Bala Lillo Tsa Jeremia 5:21.

22, 23. Sepheo sa hao e lokela ho ba sefe ha u etsisa Jehova tabeng ea ho tšoarela?

²² Ha motho e mong a u utloisa bohloko ka ho u hlaba ka mantsoe kapa ka ho etsa liketso tse sa nahaneleng, na u tla etsisa Jehova? Tabeng ea Bajuda ba mehleng ea boholo-holo, Molimo o ile a re o ne a tla “hloekisa” batho bao a neng a ba tšoaretse. (Bala Jeremia 33:8.) A ka hloekisa batho ba bakileng ka hore a lebale liphoso tsa bona, ’me a etsa hore ba qalise bocha tšebeletsong ea Hae. Ke ’nete hore ho tšoareloa ke Molimo ha ho bolele hore motho o se a hloekisitsoe ho se phethahale hoo re ho futsitseng, ’me joale o se a phethahetse a bile a se na sebe. Leha ho le joalo, ho na le seo re ka ithutang sona ho seo Molimo a se buileng ka ho hloekisa batho. Re ka leka hore re lebale phoso eo motho e mong a re etselitseng eona, ’me hoo ho tšoana le ha re hloekisa tsela eo re nkang motho eo ka eona ka pelong. Ka tsela efe?

²³ Nka hore u jele sejana sa bohlokoa lefa. Haeba se ne se ka silafala, na ntho ea pele eo u neng u tla e etsa e ne e tla ba ho se lahla? Mohlomong u ne u ke ke ua etsa joalo. Ho ka etsahala hore ebe u ne u tla etsa boiteko ba ho se hloekisa ka hloko, u tlose maqaphaqapha kapa litšila life kapa life tseo se ka bang le tsona, mohlomong u be u tlose le letheba le setseng. U batla ho bona botle ba sona, u bone tsela eo se phatsimang ka eona ha se le letsatsing. Ka tsela e tšoanang, u ka sebetsa ka thata hore u tlose mesaletsa efe kapa efe ea khalefo eo ebang u na le eona ka mora kapa morali oeno ea ileng a u khopisa. Loantša mokhoa oa ho lula u nahana ka mantsoe ao ebang o ile a u hlaba ka ’ona kapa liketso tse ileng tsa u utloisa bohloko. Ha u atleha ho li lebala, u hloekisa maikutlo ao u nang le ’ona le seo u se hopolang ka motho eo u mo tšoaretseng. Ha pelo ea hao e se e se na maikutlo a mabe ka motho eo, ho ka etsahala hore u boele u thabele setsoalle se haufi le eena seo ho neng ho bonahala eka se senyehetse ruri.

24, 25. U tla rua molemo ofe ha u tseba Jehova joaloka Morena Josiase?

²⁴ Re hlahlobile litšobotsi tse seng kae feela tsa Jehova hammoho le litsela tseo a ’nileng a sebetsana le batho ka tsona tseo re ithutang tsona ha re ntse re mo tseba haholoanyane. Rea bona hore molemo oa ho tsebela Jehova haufi ke hore seo se re susumetsa ka matla hore re mo rapele ka tsela eo a e amohelang. Haeba re tsebela Jehova haufi joaloka Morena Josiase, bophelong ba rōna ho tla rena thabo, e leng tšobotsi e ’ngoe ea botho ba Molimo.

²⁵ Ha re tseba Jehova haholo, seo se tla ntlafatsa likamano tsa rōna le batho ba bang. Ha re loanela ho bontša mosa o lerato, toka le tšoarelo joaloka Jehova, seo se tla etsa hore setsoalle seo re bang le sona ka phuthehong ea Bokreste se be matla ’me e be sa bohlokoa haholo. Ho feta moo, re tla ntlafatsa tsela eo re rutang ka eona ha re ntse re etsa maeto a ho boela tšimong ea habo rōna le ha re khanna lithuto tsa Bibele tse tsoelang pele. Batho ba thahasellang molaetsa ba tla nolofalloa ke ho phela ka tsela ea Bokreste eo ba e bonang ho rōna. Kahoo, re tla ba boemong bo botle ba ho ba thusa hore ba rapele Jehova ka tsela e amohelehang le hore ba latele “tsela e ntle.”—Jer. 6:16.