Lithuto tse Tsoang Mangolong: Lillo Tsa Jeremia 1:1–5:22

Jehova O Fana Ka Tšepo Mesarelong

JEHOVA ke “Molimo o fanang ka tšepo,” esita le mesarelong. (Ba-Roma 15:13, NW) Ntlha ena e hlakisoa bukeng ea Lillo Tsa Jeremia, e ileng ea qeteloa ka 607 B.C.E. ke moprofeta oa Jehova Jeremia eo e neng e bile e le paki ea hae. Empa a re ke re totobatseng tse ling tsa lithuto tseo e li tšoereng.

Tlokotsi ea Jerusalema

Sebe ha se tlise thabo. Bonang! Jerusalema ea moetsalibe, eo e kileng ea e-ba motse o moholo oa Juda, e lutse e le ’notši. Juda ka boeona e joaloka khosatsana e llang, ea mohlolohali hobane e sentsoe. “Barati” ba eona ba kang Egepeta ha baa ka ba e pholosa ha e haptjoa ke Babylona ka 607 B.C.E. Batho ha ba sa phallela Sione bakeng sa mekete. Bana ba eona ke batlamuoa, ’me lira tsa eona lia e tšeha ka ho oa ha eona. Batho ba litšila bao e leng basele ba silafalitse tempele, ’me batho ba eona ba ile ba lokela ho fana ka mabenyane a bona hore ba fumane lijo. Sena sohle se etsahetse ka baka la sebe!—1:1-11.

Jehova o etsa ntho e lokileng ha a otla bafosi. Ha Jerusalema ka boeona e bua e lumela sena. E botsa hore na ho na le mesarelo leha e le efe e tšoanang le bohloko boo Molimo o e tliselitseng bona. O ile oa romela mollo o sentseng tempele. Libe tsa motse tsa fetoha joko, ’me mali a phalla joaloka lero ha Molimo o hatakela “sehatelo” sa eona. Sione e ile ea akha matsoho ka ho sareloa le ka thapeli empa ea hloka motšelisi, ’me Jehova o ne a etsa ntho e lokileng ha a otla Jerusalema ea lerabele. E se eka a ka otla ka mokhoa o bohloko joalo lira tsa eona tse nyakaletseng.—1:12-22.

“Khalefo ea Jehova”

Ba ikarabellang ba jara molato haeba ba sa nyatse sebe. Molimo o ile a liha Jerusalema “Ieholimong, a e lahlela fatše,” a lumella hore e timetsoe ’moho le “bonamelo ba maoto a hae,” tempele. (Pesaleme ea 132:7) Ka ho etsa joalo o ile “a senya ’muso” oa Juda. Joaloka motlotloane feela, tempele eo e ile ea senngoa ke lira tseo mehoo ea tsona ea tlhōlo e neng e tšoana le mehoo ea mokete. Bana ba shoang ba ne ba qela lijo ho bo-’m’a bona. Empa molato e ne e le oa mang haholo-holo? Baprofeta ba bohata ba ileng ba etsa liphatlalatso tse khelosang ho e-na le ho nyatsa sebe sa Jerusalema. (Jeremia 14:13) Thapelo ke e loketseng, hobane ba bangata haholo ba shoele ‘Ietsatsing lena la khalefo ea Jehova’!—2:1-22.

Mohau oa Jehova ke o Tšoarellang

Re lokela ho tšepa Jehova ka mamello. Jeremia o bontša ntlha ena ha a bua lebitsong la batho ba leng mahlomoleng. Molimo o thibela thapelo ea hae, ka hona o fetohile sehlooho sa pina e nyelisang ea lira tsa hae. Tšepo ea hae, kapa “tebello ea [hae] ho Jehova,” e bonahala e timetse. Empa o tla ba le “boikutlo ba ho leta,” (NW) hobane “Jehova o molemo ho ea mo tšepang.”—3:1-27.

Pako ea ’nete e tlisa mohau oa Molimo. A kholisehile ka sena, Jeremia oa phehella: “Re khutlele ho Jehova.” Joalokaha eka ke ka leru la khalefo, Molimo o koetse mocha oa thapelo ka baka la libe tsa batho. Empa Jeremia oa rapela: “Ka bitsa lebitso la hao, Jehova, . . . U se ke ua thibella ho feheloa ha ka . . . tsebe ea hao.” Ke ’nete hore lira tse sa bakeng li tla ripitloa.—3:28-66.

‘Re Khutlise’

Re ka itlisetsa timetso ka libe tsa ka boomo. Ka baka la sebe sa Juda, “bara ba Sione ba bokhabane” ba ne ba talingoa joaloka mafiso a letsopa a pshatlehileng a se nang thuso. Nakong ea tlhaselo, ba bolailoeng ka lerumo ba ne ba iketla ho feta ba bang ba ntseng ba e-shoa butle ke tlala. Ka sebele, Molimo o ne ‘o tšolotse bohale bo chesang ba oona.’ Baprofeta ba silafetseng le baprista ba silafetseng ba ne ba ntse ba lelera ka bofofu, ’me Morena Tsedekia—“motlotsuoa oa Jehova”—o ne a tšoeroe. Joale Molimo o ne o tla retelehela ho Edomo ea moetsalibe.—4:1-22,

Ke Jehova feela ea fanang ka tšepo ea ’nete mesarelong. Jeremia o ne a hlokomela sena, hobane o ile a kōpa: “Hopola, Jehova, seo re hlahetsoeng ke sona.” ‘Basele ba kene matlong a rōna. Re jere molato oa bo-ntat’a rōna, bahlankana ba jara patsi ka mosebetsi oo ba o qobeletsoeng.’ Empa, a tšepile ho fumana mohau, Jeremia a rapela: “Oho Jehova, re khutlisetse ho uena, ’me re tla khutla hang-hang,” (NW).—5:1-22.

Joale, nahanisisa ka lithuto tse rutoang ho Lillo Tsa Jeremia: Sebe ha se tlise thabo, Molimo o etsa ntho e lokileng ha o otla baetsalibe, ’me ba ikarabellang ba jara molato haeba ba sa nyatse lintho tse fosahetseng. Ka mamello re lokela ho tšepa Jehova, re kholisehile hore mohau oa Molimo o tlisoa ke pako ea ’nete, empa ka lehlakoreng le leng re ka itlisetsa timetso ka sebe sa ka boomo. Buka ena e bululetsoeng e boetse e re kholisa hore ke Jehova feela ea fanang ka tšepo ea ’nete mesarelong.

[Lebokose le leqepheng la 27]

LITEMANA TSA BIBELE LIA HLAHLOBJOA

◻ 1:15 (NW)—‘Jehova o ne a hataketse sehatelo sa veine sa moroetsana, morali oa Juda,’ hobane o ne a ile a laela le ho lumella se ileng sa etsahala. “Moroetsana, morali oa Juda” e ne e le Jerusalema, eo ho neng ho nahanoa hore e tšoana le mosali ea hloekileng. Ha Bababylona ba ripitla motse-moholo oo oa Juda ka 607 B.C.E., ho ile ha e-ba le tšollo ea mali e khōlō, e tšoanang le ha ho tlhotloa lero la morara sehatelong. Jehova o tla bona hore Bokreste-’mōtoana, bo tšoantšelitsoeng ka Jerusalema, bo ripitloa ka ho tšoanang.

◻ 2:6 (NW)—“Lephephe” la Molimo e ne e le tempele e Jerusalema. Ha sehalalelo seo se senngoa ke Bababylona, o ne a se lumelletse hore se ‘rutlolloe’ joaloka lephephe feela le ka serapeng. Lephephe le joalo la nakoana, letsatsing le chesang le ne le fela.

◻ 3:16—Tlokotsi e le ’ngoe eo Jehova a ileng a e lumella hore e oele Jerusalema e sa tšepahaleng kamor’a ho oela ha motse ho Bababylona e hlalosoa ka mantsoe ana, “O khephotse meno a ka ka lehlohlojane.” Ka ho totobetseng, ha Baiseraele ba le tseleng ea bona ba e-ea botlamuoeng, ba ile ba lokela ho phea bohobe ka mekotjaneng e chekiloeng fatše. Ka hona, bohobe bo ne bo e-na le lehlohlojane, ’me motho ea jang bohobe bo joalo o ne a ka ’na a khephola meno a hae.

◻ 4:3—Bokhopo ba batsoali ho bana ba bona mona bo bapisoa le tlhokomelo ea bosali e fanoang ke liphiri. Le hoja liphiri li ka ’na tsa nkoa e le libatana tse khopo, esita le tsona ‘li ntša letsoèlè ho anyesa malinyane a tsona.’ Ka baka la khaello e khōlō ea lijo Jerusalema e neng e potapotiloe ke lira, basali ba sohlokiloeng ke tlala ba Bajode ba ile ba fetoha ba khopo ka hore ba ne ba se na lebese leo ba ka le fang bana ba bona ’me ba hla ba e-ja bana ba bona e le hore ba ka ’na ba phela. (Lillo Tsa Jeremia 2:20) Ka hona, basali ba boetse ba tšoana le limpshe tse behelang mahe e be lia a siea.

◻ 5:7—Bajode ba mehleng ea Jeremia ba ile ba lokela ho jara molato oa libe tsa bo-ntat’a bona moholo, empa sena ha se bolele hore Jehova ka ho toba o ahlola bana bakeng sa libe tsa batsoali ba bona. Ha e le hantle, liphello tse mpe tsa boitšoaro bo bobe li utluoa ke ba meloko ea morao. (Jeremia 31:29, 30) Ka hona ke hantle ha re hopola hore ka borōna re tlameha ho ikarabella ho Molimo.—Ba-Roma 14:12.