Ke Mang ea Tla Pholoha “Nako ea Tlokotsi”?
“Ho tla bolokeha e mong le e mong ea rapelang lebitso la Jehova.”—JOELE 2:32.
1. Ho latela se boletsoeng ke Daniele le Malakia, ke eng se khethollang ba leng mocheng oa ho bolokeha “nakong ea tlokotsi” e tlang?
MOPROFETA Daniele o ngotse tjena esale pele a lebisitse mehleng ea rōna: “Ka sebele ho tla ba le nako ea tlokotsi e e-s’o ka e etsoa hore e be teng ho tloha ha ho e-ba le sechaba se itseng ho fihlela nakong eo. ’Me nakong eo batho ba heno ba tla pholoha, e mong le e mong ea fumanoang a ngotsoe bukeng.” (Daniele 12:1, NW) Ruri ao ke mantsoe a tšelisang! Jehova o tla hopola batho ba hae ba amohelehang, joalokaha Malakia 3:16 le eona e bolela: “Eaba ba tšabang Jehova ba buisana hammoho, e mong le e mong le ngoan’abo, ’me Jehova a theetsa tsebe, a mamela; buka ea khopotso ea ngoloa pel’a hae, ea ngolloa ba tšabang Jehova le ba hlokomelang [“ba nahanang ka,” NW] lebitso la hae.”
2. Ho nahana ka lebitso la Jehova ho tlisa liphello life?
2 Ho nahana ka lebitso la Jehova ho lebisa ho fumaneng tsebo e nepahetseng ka eena, Kreste oa hae, le merero ea hae eohle ea ’Muso e hlollang. Ka hona, batho ba hae ba ithuta ho mo hlompha, ho kena kamanong e haufi-ufi le eena ka boinehelo, le ho mo rata ‘ka lipelo tsa bona tsohle le ka kutloisiso ea bona eohle le ka matla a bona ’ohle.’ (Mareka 12:33; Tšenolo 4:11) Jehova o entse tokisetso e mosa, ka sehlabelo sa Jesu Kreste, ea hore batho ba ikokobelitseng ba lefatše ba fumane bophelo bo sa feleng. Ka hona, ka kholiseho ba ka thoholetsa mantsoe a lebotho la leholimo le ileng la rorisa Molimo nakong ea tsoalo ea Jesu, le re: “Khanya e be ho Molimo maholimong a holimo, khotso e be lefatšeng ho batho bao o khahloang ke bona.”—Luka 2:14.
3. Pele khotso e ka tla lefatšeng lena, ke ketso efe ea Jehova e tlamehang ho etsahala?
3 Khotso eo e haufi ho feta kamoo batho ba bangata ba nahanang ka teng. Empa ho tlamehang ho tla pele ke ho liha ha Jehova kahlolo holim’a lefatše le silafetseng. Moprofeta oa hae Sofonia o re: “Letsatsi la Jehova le leholo le atametse, le atametse, le bile le akofa ka ho fetisisa.” Letsatsi leo ke la mofuta ofe? Boprofeta bo tsoela pele: “Utloang! letsatsi la Jehova ke lena! Teng mohale o meketsa habohloko. Tsatsi leo ke tsatsi la khalefo, ke tsatsi la tlokotsi le la matsoalo, ke tsatsi la tšenyo le la tšenyeho, ke tsatsi la lefifi le la botšo, ke tsatsi la maru le la lefifi le letšo! Ke tsatsi la phala le la mokhosi o hlabeloang metse e matla le marako a phahamileng. Ke tla bea batho tlokotsing, ’me ba tla tsamaea joale ka lifofu, kahobane ba sitetsoe Jehova.”—Sofonia 1:14-17; bona hape le Habakuke 2:3; 3:1-6, 16-19.
4. Ke bo-mang kajeno ba arabelang memong ea ho tseba Molimo le ho o sebeletsa?
4 Ka thabo, batho ba limillione kajeno ba arabela memo ea ho tseba Molimo le ho o sebeletsa. Ho profetiloe tjena ka Bakreste ba tlotsitsoeng, ba nketsoeng selekaneng se secha: “Ba tla ntseba kaofela, ho qala ka e monyenyane ho bona ho isa ho e moholo, ho bolela Jehova.” (Jeremia 31:34) Bakreste bana ba ’nile ba etella pele mosebetsing oa kajeno oa ho paka. ’Me ha ba bangata ka ho eketsehileng ho masala a tlotsitsoeng ba ntse ba qeta tsela ea bona ea bophelo lefatšeng, “bongata bo boholo” ba “linku tse ling” bo tlil’o ‘nehelana ka tšebeletso e halalelang ho Molimo motšehare le bosiu’ tokisetsong ea oona e kang tempele. (Tšenolo 7:9, 15; Johanne 10:16) Na u e mong ea thabelang tokelo ee e ke keng ea lekanngoa?
Kamoo “tse Lakatsehang” li Tlang ka Teng
5, 6. Pele lichaba tsohle li sisinngoa ka ho timetsoa, ke mosebetsi ofe oa pholoho o ntseng o etsoa?
5 Joale a re phetleng Haggai 2:7, moo Jehova a profetang ka ntlo ea hae ea moea ea borapeli. O re: “Ke tla sisinya le lichaba tsohle, ’me tse lakatsehang tsa lichaba tsohle li tla tla mona, ke be ke tlatse ntlo ena ka khanya.” Boprofeta ba Bibele bo bontša hore ‘ho sisinngoa ha lichaba’ ho bolela ho liha ha Jehova kahlolo holim’a lichaba. (Nahume 1:5, 6; Tšenolo 6:12-17) Ka hona, ketso ea Jehova e profetiloeng ho Haggai 2:7 e tla fihla sehlohlolong ka hore lichaba li sisinngoe hore li se hlole li e-ba teng—lia timetsoa. Empa ho thoe’ng ka “tse lakatsehang tsa lichaba tsohle”? Na ho hlokahala hore li emele ho tlisoa ke ho sisinngoa hoo ha makhaola-khang ha timetso? Le hanyenyane.
6 Joele 2:32 e re “ho tla bolokeha e mong le e mong ea rapelang lebitso la Jehova; hobane thabeng ea Sione le Jerusalema ba phonyohileng ba tla ba teng, joale ka ha Jehova a boletse; ’me ho ba phetseng, ba bang ke ba tla bitsoa ke Jehova.” Jehova oa ba bitsa, ’me ba bitsa lebitso la hae ka ho bontša tumelo sehlabelong sa Jesu pele ho tšisinyeho e tla fihla sehlohlolong ka mahlomola a maholo. (Bapisa le Johanne 6:44; Liketso 2:38, 39.) Ka thabo, bongata bo boholo ba batho bo hlollang, boo hona joale palo ea bona e fetang limillione tse ’nè, bo ‘tla’ ka tlung ea Jehova ea borapeli ka tebello ea hore a ‘sisinye lichaba tsohle’ ka Harmagedone.—Tšenolo 7:9, 10, 14.
7. ‘Ho bitsa lebitso la Jehova’ ho akarelletsa eng?
7 Baphonyohi baa ba bitsa lebitso la Jehova joang? Jakobo 4:8 e re fa pontšo, e re: “Atamelang Molimo, ’me o tla le atamela. Baetsalibe, hatlelang, ’me lōna ba pelo li peli, hlatsoang lipelo tsa lōna.” Joaloka masala a tlotsitsoeng a etelletseng pele, ba nang le tšepo ea ho ba ba bang ba bongata bo boholo ba baphonyohi ba Harmagedone ba tlameha ho nka khato e tiileng. Haeba u na le tšepo ea ho pholoha, u tlameha ho noa ka hare ho Lentsoe la Jehova le hloekisang ’me u sebelise litekanyetso tsa hae tse lokileng bophelong ba hao. U tlameha ho etsa qeto ea ho nehela bophelo ba hao ho Jehova, u tšoantšetse sena ka ho kolobetsoa metsing. Ho bitsa ha hao Jehova ka tumelo ho boetse ho akarelletsa ho mo pakela. Ka hona, ho Ba-Roma khaolo 10, litemana 9 le 10, Pauluse oa ngola: “Ekare ha u bolela ka molomo oa hao hobane Jesu ke Morena, ’me u lumela pelong ea hao hobane Molimo o mo tsositse bafung, u tla bolokeha. Hobane motho o lumela ka pelo, hore a beoe ea lokileng, ’me o bolela ka molomo, hore a bolokehe.” Joale, temaneng ea 13, moapostola o qotsa boprofeta ba Joele, bo hatisang hore “mang le mang ea rapelang lebitso la Morena [“Jehova,” NW], o tla bolokeha.”
‘Batla, Batla, Batla’
8. (a) Ho latela se boletsoeng ke moprofeta Sofonia, Jehova o hloka eng bakeng sa poloko? (b) Lentsoe “mohlomong” ho Sofonia 2:3 le fana ka temoso efe ho rōna?
8 Ha re phetla buka ea Bibele ea Sofonia, khaolo 2, litemana 2 le 3, re bala seo Jehova a se hlokang bakeng sa poloko: “Ha ho e-so ho tle holim’a lōna ho tuka ha bohale ba Jehova, ha le e-so ho tle ho lōna, tsatsi la bohale ba Jehova! Batlang Jehova, baikokobetsi bohle ba lefatše, ba etsang ka taelo ea hae; batlang ho lōka, le batle boikokobetso; ekaba [“mohlomong,” BPN] le ka tšoha le patoa tsatsing la bohale ba Jehova.” Hlokomela lentsoe “mohlomong.” Hase taba ea hore hang ha u pholositsoe u lula u pholositsoe. Ho patoa ha rōna letsatsing leo ho itšetlehile ka ho tsoela pele ha rōna ho etsa lintho tseo tse tharo. Re tlameha ho batla Jehova, re batle ho loka, ’me re batle boikokobetso.
9. Ba batlang boikokobetso ba putsoa joang?
9 Ka sebele, ho batla boikokobetso ho na le moputso o tsotehang hakaakang! Ho Pesaleme ea 37, litemana 9 ho ea ho 11, rea bala: “Ba itšepetseng Jehova ba tla rua lefatše. Ho se ho se hokae, ’me molotsana o tla ba sieo . . . empa ba bonolo ba tla rua lefatše, ba iketle khotsong e kholo.” ’Me ho thoe’ng ka ho batla ho loka? Temana 29 e re: “Ba lokileng ba tla ja lefa la lefatše, ’me ba tla hlola ho lona ka ho sa feleng.” Mabapi le ho batla Jehova, litemana 39 le 40 lia re bolella: “Poloko ea ba lokileng e tsoa ho Jehova; ke eena qhobosheane ea bona letsatsing la matsoalo [“nakong ea tlokotsi,” BPN]; Jehova oa ba thusa, oa ba boloka; o ba namolela ho ba babe, oa ba pholosa, kahobane ba beile tšepo ea bona ho eena.”
10. Ke bo-mang ba ’nileng ba ikhetha ka ho hana ho batla Jehova le ho batla boikokobetso?
10 Lihlotšoana tsa bokhelohi tsa Bokreste-’mōtoana li hlōlehile ho batla Jehova. Baruti ba tsona ba bile ba nena lebitso la hae le hlollang, ka boikhohomoso ba le tlosa liphetolelong tsa bona tsa Bibele. Ba khetha ho rapela Morena kapa Molimo o se nang lebitso le ho hlompha Boraro-bo-bong ba bohedene. Ho feta moo, Bokreste-’mōtoana ha bo batle ho loka. Balateli ba bona ba bangata ba amohela mekhoa ea bophelo ea ho iketsetsa bōrata kapa baa e tšehetsa. Ka mohlala, ho e-na le hore ba batle boikokobetso joaloka Jesu, ba ikhantša ka bophelo ba bona bo mabotho-botho boo hangata e leng bo hlephileng ’me ba bo bontša thelevisheneng. Baruti ba inontša ka ho hanyapetsa mehlape ea bona. Ho latela mantsoe a Jakobo 5:5, ba “ipheletse lefatšeng ka menate, [ba] bone menyaka.” Ha letsatsi la Jehova le ntse le atamela, ruri ba tla fumana hore mantsoe ana a bululetsoeng a sebetsa ho bona: “Maruo ha a thuse letho mohl’a letsatsi la bohale.”—Liproverbia 11:4.
11. Motho ea hlokang molao ke mang, ’me o na le molato o moholo oa mali joang?
11 Lekholong la pele la lilemo C.E., joalokaha moapostola Pauluse a bolela lengolong la hae la bobeli le neng le ea ho Bathessalonika, Bakreste ba bang ba ile ba nyakalla, ba nahana hore letsatsi la Jehova le se le fihlile ho bona ka nako eo. Empa Pauluse o lemositse hore pele ho ne ho lokela ho hlaha bokoenehi bo boholo, ’me “motho ea hlokang molao” o ne a lokela ho senoloa. (2 Ba-Thessalonika 2:1-3, NW) Joale, lekholong lena la bo20 la lilemo, re ka utloisisa ho ata ho pharalletseng ha bokoenehi boo le kamoo baruti ba Bokreste-’mōtoana ba hlokang molao ka teng mahlong a Molimo. Mehleng ena ea qetello ho tloha ka 1914, baruti ba na le molato o moholo oa mali ka ho tšehetsa ntoa ‘ka ho teha mehoma lisabole.’ (Joele 3:10) Hape ba ’nile ba tsoela pele ho ruta lithuto tsa bohata, tse kang ho se shoe ha sephefumolohi sa motho ho futsitsoeng, pelekatori, tlhokofatso ea mollo oa lihele, ho kolobetsoa ha masea, Boraro-bo-bong, joalo-joalo. Boemo ba bona e tla ba bofe ha Jehova a phethahatsa qeto ea hae ea boahloli? Liproverbia 19:5 e re: “Paki ea bohata e ke ke ea phema kotlo.”
12. (a) “Maholimo” le “lefatše” la batho tse tla felisoa haufinyane ke life? (b) Re ithuta eng timetsong e tlang ea lefatše lee le khopo?
12 Ho 2 Petrose 3:10, rea bala: “Letsatsi la Morena [“Jehova,” NW] lona le tla tla ka mokhoa oa lesholu la bosiu, ’me ka lona maholimo a tla feta ka lerata le tšabehang, ’me metheo ea lintho e tla felisoa ke ho cha, le lefatše le tla cha ruri le mesebetsi e ho lona.” Lipuso tse silafetseng tse khurumelitseng batho joaloka maholimo, hammoho le likarolo tsohle tse bōpang mokhatlo oa kajeno oa batho o bolileng, li tla tlosoa lefatšeng la Molimo. Baetsi le barekisi ba libetsa tsa timetso, baqhekelli, balateli ba bolumeli ba baikaketsi le baruti ba bona, batšehetsi ba boitšoaro bo hlephileng, pefo, le tlōlo ea molao—kaofela ba tla nyamela. Ba tla qhibilihisoa ke khalefo ea Jehova. Empa litemaneng 11 le 12, Petrose o phaella ka tlhokomeliso ena ho Bakreste: “Ha e le moo ntho tseo tsohle li abetsoe ho felisoa, e ka khona le be batho ba matla hakakang liketsong tse halalelang tsa borapeli; le ntse le lebeletse ’me le akofisa [“le hopola ka mehla,” NW] ho tla ha letsatsi la Molimo.”
Mikaele o Nka Khato!
13, 14. Motho e moholo ea Tlosang Qoso bobusing ba Jehova ke mang, ’me o ’nile a tšoareha joang ho tloha ka 1914?
13 Motho o tla pholoha joang ‘nakong ea Jehova ea tlokotsi’? Moemeli oa Molimo bakeng sa ho fana ka pholoho ke arekangeloi Mikaele, eo lebitso la hae le bolelang “Ke Mang ea Tšoanang le Molimo?” Ka hona, ka nepo ke Eena ea tlosang qoso bobusing ba Jehova, ea tšehetsang Jehova joaloka Molimo o le mong oa ’nete le ’Musi Morena ea loketseng oa bokahohleng bohle.
14 Tšenolo khaolo 12, litemana 7 ho ea ho 17, e hlalosa liketsahalo tse tsotehang hakaakang mabapi le “letsatsi la Morena” ho tloha ka 1914! (Tšenolo 1:10) Arekangeloi Mikaele o lihela Satane oa mohanyetsi lefatšeng a tsoa leholimong. Hamorao, joalokaha ho hlalositsoe ho Tšenolo khaolo 19, litemana 11 ho ea ho 16, ea bitsoang “Motšepehi le Oa ’nete” o ‘hata sehatelong sa veine ea bohale le ea khalefo ea Molimo o Matla ’Ohle.’ Lebitso la mohlabani enoa ea matla oa leholimo ke “Morena oa marena, le ’Musi oa babusi.” Qetellong, Tšenolo khaolo 20, litemana 1 le 2, li bua ka lengeloi le leholo le lihelang Satane sekoting ’me le mo koalla teng ka lilemo tse sekete. Ka ho hlakileng, mangolo ana kaofela a supa ho Motho a le mong ea Tlosang Qoso bobusing ba Jehova, Morena Jesu Kreste, eo Jehova a ’mehileng teroneng ea hae e khanyang ea leholimo ka 1914.
15. Mikaele o tla “ema” joang ka tsela e khethehileng haufinyane?
15 Mikaele o ’nile a ‘ema,’ joalokaha ho boletsoe ho Daniele 12:1, (NW) molemong oa batho ba Jehova ho tloha ha a hlomamisoa e le Morena ka 1914. Empa haufinyane Mikaele o tla “ema” ka kutloisiso e khethehileng haholo—joaloka Moemeli oa Jehova ho tloseng bokhopo bohle lefatšeng le joaloka Molopolli oa mokhatlo oa batho ba Molimo o lefatšeng ka bophara. Hore na ‘nako eo ea tlokotsi’ e tla ba khōlō hakae ho bontšoa ke mantsoe a Jesu a ho Mattheu 24:21, 22: “Mohlang oo, mahlomola a tla ba maholo, ha e sa le le tšimolohong ea lefatše, ho fihlela joale, tsietsi e kalo ha e e-so ho ka e e-ba teng, ’me ha e ka ke ea boela ea e-ba teng le ka mohla o le mong. Le hojane matsatsi ao a se ke a khutšofatsoa palo, ho no ho ke ke ha phonyoha motho; empa ka baka la bakhethoa, matsatsi ao a tla khutšofatsoa.”
16. Ke batho bafe ba tlang ho bolokeha mahlomoleng a maholo?
16 Re lokela ho thaba hakaakang hore ebe batho ba bang ba tla bolokeha ka nako eo! Che, eseng ba kang Bajode ba bafetoheli ba ileng ba thibelloa Jerusalema ka 70 C.E., bao ba bang ho bona ba ileng ba isoa Roma e le makhoba. Ho fapana le hoo, ba pholohang ‘nako ea bofelo’ ba tla tšoana le phutheho ea Bokreste e neng e se e balehile Jerusalema ha e lika-liketsoa ka lekhetlo la ho qetela. E tla ba batho ba Molimo, bongata bo boholo ba batho ba limillione hammoho le batlotsuoa leha e le bafe bao mohlomong ba tla beng ba ntse ba setse lefatšeng. (Daniele 12:4) Batho ba bongata bo boholo ‘ba tsoa mahlomoleng a maholo.’ Hobane’ng? Hobane “ba hlatsoitse liaparo tse telele tsa bona, ba li soeufalitse maling a Konyana.” Ba bontša tumelo matleng a rekollang a mali a Jesu a tšollotsoeng ’me ba bonahatsa tumelo eo ka ho sebeletsa Molimo ka botšepehi. Esita le hona joale, Jehova, “ea lutseng teroneng,” o atolosa tente ea hae ea tšireletso holim’a bona, athe Konyana, Kreste Jesu, oa ba alosa ’me o ba tataisetsa lilibeng tsa metsi a bophelo.—Tšenolo 7:14, 15.
17. Bongata bo boholo ba batho haholo-holo bo khothalletsoa joang hore bo nke khato e tla etsa hore bo patoe letsatsing le tlang la tlokotsi?
17 Ha batho ba limillione ba bongata bo boholo ba ntse ba batla Jehova, ho loka, le boikokobetso, le ka mohla ha baa lokela ho lumella lerato la bona la pele bakeng sa ’nete hore le tape! Haeba u e mong oa batho bana ba kang linku, u tlameha ho etsa eng? Joalokaha ho boletsoe ho Ba-Kolosse khaolo 3, litemana 5 ho ea ho 14, u tlameha ‘ho hlobola ka ho felletseng botho ba khale hammoho le mekhoa ea bona.’ Ha u ntse u batla thuso ea Molimo, loanela ‘ho apara botho bo bocha, bo thehiloeng tsebong e nepahetseng.’ Ka boikokobetso, hlaolela ’me u boloke cheseho ea ho rorisa Jehova le ho tsebisa ba bang ka merero ea hae e hlollang. Ka hona, mohlomong u ka patoa “nakong ea tlokotsi,” letsatsing la “ho tuka ha bohale ba Jehova.”
18, 19. Mamello e ’nile ea ba ea bohlokoa joang bakeng sa poloko?
18 Letsatsi leo le haufi! Le potlaketse ho rōna. Ho bokelloa ha batho ba bongata bo boholo ho ’nile ha tsoela pele ka lilemo tse 57 joale. Ba bangata ho bona ba se ba shoele ’me ba emetse tsoho ea bona. Empa boprofeta ba Tšenolo bo re kholisa hore bongata bo boholo e le sehlopha bo tla tsoa mahlomoleng a maholo e le khubu ea mokhatlo oa “lefatše le lecha.” (Tšenolo 21:1) Na u tla ba teng ho lona? Ho ka etsahala, hobane ho Mattheu 24:13 Jesu o re: “Ea tiisetsang ho fihlela qetellong, ke eena ea tla bolokeha.”
19 Likhatello tseo batho ba Jehova ba fetang ho tsona tsamaisong ena ea khale li ka ’na tsa tsoela pele ho phaellana. ’Me ha mahlomola a maholo a tlokotsi a fihla, u ka ’na ua thulana le mathata. Empa ipoloke haufi le Jehova le mokhatlo oa hae o hlophisitsoeng. Lula u falimehile! “Ntebelleng he, ho bolela Jehova, tsatsing leo ke tlang ho ema ka lona ho hapa, hobane ke rerile ho phutha lichaba le ho bokella mebuso, ke tle ke tšollele holim’a eona khalefo ea ka, ho tuka hohle ha bohale ba ka; hobane ka mollo oa poulelo ea ka lefatše lohle le tla chesoa.”—Sofonia 3:8.
20. Ha “nako ea tlokotsi” e mahlonoko e ntse e atamela, re tlameha ho etsa eng?
20 Ka mosa Jehova o file batho ba hae “puo e hloekileng,” e akarelletsang molaetsa o hlollang oa ’Muso oa hae o tlang, molemong oa ho ba sireletsa le ho ba khothatsa, “e le hore kaofela ha [bona ba] ka bitsa lebitso la Jehova, e le hore [ba] tle [ba] mo sebeletse mahetla a bapile.” (Sofonia 3:9, NW) Ha “nako ea tlokotsi” e mahlonoko e ntse e atamela ka potlako, e se eka re ka sebeletsa ka cheseho, re thuse batho ba bang ba ikokobelitseng ho ‘bitsa lebitso la Jehova’ hore ba bolokehe.
Na U sa Hopola?
◻ Ke ketso efe ea Jehova e tla etella pele ho tlisoa ha khotso lefatšeng?
◻ Ho latela se boletsoeng ke Joele, motho o tlameha ho etsa eng e le hore a ka bolokeha?
◻ Ho latela se boletsoeng ke Sofonia, batho ba ikokobelitseng ba ka ’na ba sireletsoa joang bohaleng bo tukang ba Jehova?
◻ “Motho ea hlokang molao” ke mang, ’me o ’nile a ba le molato oa mali joang?
◻ Mamello ke ea bohlokoa joang tabeng ea poloko?