Tsamaea le Molimo, ’me U Kotule se Molemo
“Ba ntse ba jala moea, ’me ba tla kotula moea oa sefefo.”—HOSEA 8:7.
1. Re ka tsamaea le Jehova joang?
U KA tsamaea u sireletsehile haholoanyane sebakeng se kotsi haeba u eteletsoe pele ke motho ea nang le phihlelo ’me a u bontša tsela. E ka ba bohlale ho tsamaea le motho ea joalo ho e-na le ho itsamaela u le mong. Ka tsela e itseng, seo se bontša boemo boo re leng ho bona. Ha e le hantle, Jehova o ithaopetse ho re tataisa lefeelleng le leholo la lefatše la kajeno le khopo. Ke bohlale ho tsamaea le eena ho e-na le ho leka hore re itsamaise. Re ka tsamaea le Molimo joang? Ka ho latela tataiso eo a fanang ka eona Lentsoeng la hae.
2. Ho tla tšohloa eng sehloohong see?
2 Sehloohong se ka pele re tšohlile ketsahalo e tšoantšetsang e ho Hosea khaolo ea 1 ho ea ho ea 5. Joalokaha re bone, tšoantšiso eo e na le thuto e molemo e ka re thusang ho tsamaea le Molimo. Joale, a re tšohleng lintlha-khōlō tse seng kae tsa khaolo ea 6 ho ea ho ea 9. Ho ka ba molemo ha re ka qala ka kakaretso e khutšoanyane ea likhaolo tsena tse ’nè.
Kakaretso e Khutšoanyane
3. Ka bokhutšoanyane hlalosa hore na Hosea khaolo ea 6 ho ea ho ea 9 e bua ka eng.
3 ’Muso oo ka ho toba Jehova a neng a romme Hosea hore a profete ho oona, e ne e le oa meloko e leshome o neng o le ka leboea. Sechaba seo, se neng se boetse se tsejoa e le Efraime, se neng se reheletsoe ka moloko oa sona o ka sehloohong, se ne se furaletse Molimo. Hosea khaolo ea 6 ho ea ho ea 9 e bontša hore sechaba se ile sa hloka botšepehi ka ho tlōla selekane sa Jehova le ka ho etsa bokhopo. (Hosea 6:7) Se ile sa tšepa lilekane tsa lefatše ho e-na le ho khutlela ho Jehova. Kahobane se ile sa tsoela pele ho jala bobe, se ne se tla kotula bobe. Ka mantsoe a mang, se ne se le haufi le ho ahloloa habohloko. Empa boprofeta ba Hosea bo boetse bo na le molaetsa o khothatsang. Sechaba se ile sa tiisetsoa hore se ne se ka khutlela ho Jehova le hore se ne se ka hauheloa haeba se ne se ka bontša pako e tsoang botebong ba pelo.
4. Re tla hlahloba lintho life tse molemo tseo re ka ithutang tsona boprofeteng ba Hosea?
4 Likhaolong tsena tse ’nè tsa boprofeta ba Hosea, re ka fumana tataiso e eketsehileng e tla re thusa ho tsamaea le Molimo. A re hlahlobeng lintho tse ’nè tse molemo tseo re ka ithutang tsona: (1) Pako ea sebele e bontšoa ka liketso, eseng ka mantsoe feela; (2) Molimo ha a khahlisoe ke mahlabelo feela; (3) Jehova o utloa bohloko ha barapeli ba hae ba mo furalla; ’me (4) re lokela ho jala se molemo e le hore re kotule se molemo.
Kamoo Pako ea Sebele e Bontšoang Kateng
5. Fana ka moko-taba oa se boleloang ho Hosea 6:1-3.
5 Boprofeta ba Hosea bo re ruta ho hongata ka pako le mohau. Ho Hosea 6:1-3, rea bala: “Tloong, ’me re khutleleng ho Jehova, etsoe o rusolotse empa o tla re folisa. O ’nile a otla, empa o tla re tlamisa. O tla re phelisa ka mor’a matsatsi a mabeli. Letsatsing la boraro o tla re emisa, ’me re tla phela ka pel’a hae. Re tla tseba, re tla phehella ho tseba Jehova. Joaloka mafube, ho tsoa ha hae ho tiisitsoe ka thata. O tla kena joaloka pula e tšolohang ho rōna; joaloka pula ea selemo e nosetsang lefatše.”
6-8. Bothata e ne e le bofe ka pako ea Baiseraele?
6 Mantsoe a tlalehiloeng litemaneng tsee a builoe ke mang? Ba bang ba re mantsoe ana a builoe ke Baiseraele ba sa tšepahaleng ’me ba re sechaba seo se sa mameleng se ne se etsa eka se bakile ’me se bapala ka mohau oa Molimo. Leha ho le joalo, ba bang bona ba re ke moprofeta Hosea ea neng a bua, a ipiletsa ho sechaba hore se khutlele ho Jehova. Ho sa tsotellehe hore na mantsoe ana a builoe ke mang, potso ea bohlokoa ke hore, Na ka kakaretso sechaba sa ’muso oa Iseraele oa meloko e leshome se ile sa khutlela ho Jehova, ’me sa bontša pako ea sebele? Karabo ke che. Jehova o re ka Hosea: “Ke tla etsa’ng ho uena, Efraime? Ke tla etsa’ng ho uena, Juda, ha mosa oa lōna o lerato o le joaloka maru a hoseng le joaloka phoka e tlohang kapele?” (Hosea 6:4) Ka sebele sena se ne se bontša boemo bo sisimosang ba moea ba sechaba sa Molimo! Mosa o lerato, kapa lerato le tšepahalang, o ne o batla o felile joaloka mouoane oa hoseng o nyamelang kapele ha letsatsi le chaba. Le hoja ho hlakile hore sechaba se ne se etsa eka se bakile, Jehova ha aa ka a fumana lebaka la hore a se hauhele. Bothata e ne e le bofe?
7 Lebaka ke hore pako ea Baiseraele e ne e hlile e sa tsoe pelong. Hosea 7:14 ha e bua ka ho se thabe ha Jehova ka sechaba sa hae e re: “Ha baa ka ba hoeletsa ho ’na ho kōpa thuso ka lipelo tsa bona, le hoja ba ile ba ’na ba bokolla ba le holim’a libethe tsa bona.” Temana ea 16 e phaella ka ho re: “Ha baa ka ba khutlela nthong leha e le efe e phahameng”—ke hore, “ha baa ka ba khutlela mofuteng oa borapeli bo phahameng.” (Mongolo o botlaaseng ba leqephe ho NW) Sechaba se ne se sa ikemisetsa ho khutlela borapeling bo phahameng ba Jehova ka ho etsa liphetoho tse hlokahalang e le hore se tsosolose kamano ea sona le eena. Ha e le hantle se ne se hlile se sa batle ho tsamaea le Molimo.
8 Ho ne ho e-na le bothata bo bong ka pako ea Baiseraele. Sechaba se ne se tsoela pele ho etsa sebe—ha e le hantle, se ne se etsa libe tse ngata tsa mefuta-futa, tse akarelletsang bolotsana, ho bolaea, ho utsoa, borapeli ba litšoantšo le ho etsa lilekane tsa booatla le lichaba tse ling. Ho Hosea 7:4, sechaba se tšoantšoa le “sebōpi,” kapa onto ea moapehi, kaha kamoo ho bonahalang kateng, se ne se chesoa ke litakatso tse fosahetseng. Ka lebaka la boemo ba moea bo sisimosang joalo, na sechaba see se ne se tšoaneloa ke ho hauheloa? Le hanyenyane! Hosea o bolella sechaba seo sa marabele hore Jehova o tla “hopola phoso ea [sona]” ’me o tla “ela hloko libe tsa [sona].” (Hosea 9:9) Se ne se ke ke sa hauheloa!
9. Mantsoe a Hosea a re ruta eng ka pako le mohau?
9 Ha re ntse re bala mantsoe a Hosea, re ithuta’ng ka pako le mohau? Mohlala o lemosang oa Baiseraele ba se nang tumelo o re ruta hore re lokela ho bontša pako e tsoang botebong ba pelo e le hore re ka rua molemo mohaung oa Jehova. Pako e joalo e bontšoa joang? Jehova ha a thetsoe ke mantsoe feela kapa meokho. Pako ea sebele e bontšoa ka liketso. Hore mofosi a hauheloe, o lokela ho furalla tsela ea hae ea boetsalibe ka ho feletseng ’me a etse hore bophelo ba hae bo lumellane le litekanyetso tse phahameng tsa borapeli bo phahameng ba Jehova.
Jehova ha a Khahlisoe ke Mahlabelo Feela
10, 11. Joalokaha mohlala oa Baiseraele o bontša, ke hobane’ng ha Jehova a sa khahlisoe ke mahlabelo feela?
10 Joale a re tšohleng ntho ea bobeli eo re ithutang eona e ka re thusang ho tsamaea le Jehova. Ke ena: Molimo ha a khahlisoe ke mahlabelo feela. Hosea 6:6 e re: “[’Na Jehova] ke khahliloe ke mosa o lerato, eseng sehlabelo; le tsebo ea Molimo ho e-na le linyehelo tse feletseng tsa secheso.” Hlokomela hore Jehova o khahlisoa ke mosa o lerato, kapa lerato le tšepahalang, le bontšoang ho tloha pelong ebile o khahlisoa ke ho mo tseba. Empa mohlomong u ka ’na ua ipotsa: ‘Ke hobane’ng ha temana ee e re Jehova ha a khahlisoe ke “sehlabelo” le “linyehelo tse feletseng tsa secheso”? Na Molao oa Moshe o ne o sa hloke hore ho etsoe lintho tsee?’
11 Molao o ne o hloka hore ho etsoe mahlabelo le linyehelo, empa batho ba mehleng ea Hosea ba ne ba e-na le bothata bo tebileng. Kamoo ho bonahalang kateng, ho ne ho e-na le Baiseraele ba neng ba ikutloa ba tlamehile ho etsa mahlabelo a joalo e le ha ba iketsa eka ba inehetse. Leha ho le joalo, ba ne ba tsoela pele ho etsa libe. Ka boetsalibe ba bona ba ne ba bontša hore ba ne ba se na lerato le tšepahalang ka lipelong tsa bona. Hape ba ile ba bontša hore ba ne ba lahlile tsebo ea Molimo, hobane ba ne ba sa phele tumellanong le eona. Haeba lipelo tsa sechaba li ne li sa loka ebile se sa latele tsela e nepahetseng ea bophelo, mahlabelo a sona e ne e le a bohlokoa bofe? Mahlabelo a sona a ne a nyonyeha mahlong a Jehova Molimo.
12. Hosea 6:6 e fana ka temoso efe ho batho ba phelang kajeno?
12 Mantsoe a Hosea ke temoso ho batho ba bangata ba kenang kereke kajeno. Ba etsetsa Molimo linyehelo ka mesebetsi e itseng ea bolumeli. Empa borapeli ba bona ha bo susumetse boitšoaro ba bona ba letsatsi le letsatsi ka tsela leha e le efe. Na batho ba joalo ba khahlisa Molimo e le kannete haeba lipelo tsa bona li sa ba susumelletse ho rua tsebo e nepahetseng ka eena le ho sebelisa tsebo eo ka ho lahla mekhoa ea boetsalibe? Ho se ke ha e-ba le motho ea nahanang hore Molimo o khahlisoa ke mesebetsi ea bolumeli feela. Jehova ha a khahlisoe ke batho ba lekang ho fumana mohau oa hae ka ho latela mokhoa feela oa borapeli ho e-na le ho phela ka Lentsoe la hae.—2 Timothea 3:5.
13. Ke mahlabelo a mofuta ofe ao re fanang ka ’ona, empa ke eng seo re lokelang ho se hopola ka bohlokoa ba ’ona?
13 Joaloka Bakreste ba ’nete, re lokela ho hopola hore Molimo ha a khahlisoe ke mahlabelo feela. Ke ’nete hore ha re etsetse Jehova mahlabelo a liphoofolo. Leha ho le joalo, re ‘nyehela ho Molimo sehlabelo sa thoriso, ke hore, litholoana tsa melomo e bolelang lebitso la hae phatlalatsa.’ (Baheberu 13:15) Ke habohlokoa hore re se ke ra tšoana le Baiseraele ba baetsalibe ba mehleng ea Hosea, ebe re nahana hore re tla lefella liphoso tsa rōna ka ho etsetsa Molimo mahlabelo a joalo a moea. Nahana ka mohlala oa mocha e mong ea neng a kopanela boitšoarong bo bobe ba ho kopanela liphate sephiring. Hamorao o ile a lumela a re: “Ke ile ka eketsa tšebeletso ea ka ea tšimo, ke nahana hore mohlomong sena se tla lefella phoso ena ka tsela e itseng.” Baiseraele ba sa mameleng le bona ba ile ba leka ho etsa joalo. Empa Jehova o amohela mahlabelo a rōna a thoriso hafeela a etsoa ka sepheo se setle le ka boitšoaro ba bomolimo.
Jehova o Utloa Bohloko ha Barapeli ba Hae ba mo Furalla
14. Boprofeta ba Hosea bo senola eng ka maikutlo a Molimo?
14 Ntho ea boraro eo re ithutang eona ho Hosea khaolo ea 6 ho ea ho ea 9 e amana le tsela eo Jehova a ikutloang ka eona ha barapeli ba hae ba mo furalla. Molimo o na le maikutlo a matla le a mofuthu. Oa thaba ebile o bontša kutloelo-bohloko ha batho ba bakela libe tsa bona. Leha ho le joalo, ha batho ba hae ba sa bake, o nka khato e matla, ea makhaola-khang. Kaha Molimo o re tsotella ka ho teba, oa thaba ha re tsamaea le eena ka botšepehi. Pesaleme ea 149:4 e re: “Jehova o khahlisoa ke batho ba hae.” Empa Molimo o ikutloa joang ha bahlanka ba hae ba sa tšepahale?
15. Ho ea ka Hosea 6:7, Baiseraele ba bang ba ne ba itšoara joang?
15 Ha Jehova a bua ka Baiseraele ba sa tšepahaleng o re: “Joaloka motho oa lefatše, ba tlōtse selekane. Ke hona moo ba ntšebelitseng ka bolotsana.” (Hosea 6:7) Lentsoe la Seheberu le fetoletsoeng e le ‘sebetsa ka bolotsana’ le boetse le bolela “ho sebetsa ka thetso, (ho sebetsa) ka ho se tšepahale.” Ho Malakia 2:10-16, ho sebelisoa lentsoe le tšoanang la Seheberu ho hlalosa ho hloka ’nete ha Baiseraele ba neng ba sa tšepahale ho balekane ba bona ba lenyalo. Mabapi le kamoo lentsoe lena le sebelisitsoeng kateng ho Hosea 6:7, buka e ’ngoe ea litšupiso e re ke “puo ea tšoantšetso e buang ka lenyalo e bontšang litšobotsi tsa botho likamanong tsa batho . . . Ke boemo bo khethehileng boo ho bona melao-motheo ea lerato e tlōtsoeng.”
16, 17. (a) Baiseraele ba ile ba itšoara joang mabapi le selekane seo Molimo a neng a se entse le bona? (b) Re lokela ho hopola eng mabapi le liketso tsa rōna?
16 Jehova o ne a nka Baiseraele e le mosali oa hae oa tšoantšetso ka lebaka la selekane seo a neng a se entse le bona. Kahoo ha sechaba sa hae se tlōla litaelo tsa selekane seo ka boomo, ho ne ho tšoana le ha se etsa bofebe. Molimo o ne a tšoana le monna ea tšepahalang, empa sechaba sa hae se ile sa mo furalla!
17 Ho thoe’ng ka rōna? Molimo oa tsotella hore na ebe re tsamaea le eena kapa che. Re lokela ho hopola hore “Molimo ke lerato” le hore liketso tsa rōna lia mo ama. (1 Johanne 4:16) Haeba re latela tsela e fosahetseng, re ka ’na ra utloisa Jehova bohloko ’me ruri seo se ke ke sa mo thabisa. Ho hopola sena e ka ba tšireletso e matla le tšusumetso ea hore re se ke ra inehela ha re lekoa.
Kamoo re ka Kotulang se Molemo Kateng
18, 19. Ke molao-motheo ofe oo re o fumanang ho Hosea 8:7, hona molao-motheo oo o ile oa phethahala joang ho Baiseraele?
18 A re tšohleng ntho ea bone eo re ithutang eona boprofeteng ba Hosea—e leng kamoo re ka kotulang se molemo kateng. Mabapi le Baiseraele le tsela ea bona ea booatla, ea ho hloka tumelo le ea lefeela, Hosea oa ngola: “Ba ntse ba jala moea, ’me ba tla kotula moea oa sefefo.” (Hosea 8:7) Mona re fumana molao-motheo oo re lokelang ho o hopola: Seo re se etsang hona joale se amana ka ho toba le se tla re etsahalla nakong e tlang. Molao-motheo oo o ile oa phethahala joang ho Baiseraele ba sa tšepahaleng?
19 Ka ho tsoela pele ba etsa sebe, Baiseraele bao ba ne ba jala se sebe. Na ba ne ba tla tsoela pele ba etsa joalo ba sa hlaheloe ke letho? Ka sebele ba ne ba ke ke ba phema kahlolo e bohloko. Hosea 8:13 e re: “[Jehova] o tla hopola phoso ea bona le ho ahlola litaba bakeng sa libe tsa bona.” ’Me ho Hosea 9:17, rea bala: “Molimo oa ka o tla ba lahla, etsoe ha baa ka ba mo mamela, ’me ba tla fetoha babalehi har’a lichaba.” Baiseraele ba ne ba tla ikarabella ho Jehova bakeng sa libe tsa bona. Kaha ba ne ba jetse se sebe, ba ne ba tla kotula se sebe. Molimo o ile a phethahatsa kahlolo ea hae ho bona ka 740 B.C.E. ha Baassyria ba liha ’muso oa Iseraele oa meloko e leshome ’me ba isa baahi ba oona kholehong.
20. Re ithuta’ng ka se ileng sa etsahalla Baiseraele?
20 Se ileng sa etsahalla Baiseraele bao se re ruta ’nete ena ea bohlokoa: Re kotula seo re se jalang. Lentsoe la Molimo lea re lemosa: “Le se ke la thetsoa: Molimo a ke ke a songoa. Etsoe leha e le sefe seo motho a se jalang, o tla boela a se kotule.” (Bagalata 6:7) Haeba re jala se sebe, re tla kotula se sebe. Ka mohlala, ba phehellang bophelo ba boitšoaro bo bobe ba tla kotula litholoana tse babang. Moetsalibe ea sa bakeng o tla hlaheloa ke liphello tse sa thabiseng.
21. Re ka kotula se molemo joang?
21 Ebe re ka kotula se molemo joang? Re ka araba potso ena ka papiso e bonolo. Haeba molemi a batla ho kotula poone, na a ka jala koro? Le hanyenyane! O lokela ho jala seo a batlang ho se kotula. Ka ho tšoanang, haeba re batla ho kotula se molemo, re lokela ho jala se molemo. Na u batla ho tsoela pele u kotula se molemo—e leng bophelo bo khotsofatsang hona joale u lebeletse ho fumana bophelo bo sa feleng lefatšeng le lecha la Molimo? Haeba ho joalo, u lokela ho tsoela pele u jala se molemo ka ho tsamaea le Molimo le ho phela ka tsela e lumellanang le litekanyetso tsa hae tse lokileng.
22. Re ithutile eng ho Hosea khaolo ea 6 ho ea ho ea 9?
22 Ho tloha ho Hosea khaolo ea 6 ho ea ho ea 9, re ithutile lintho tse ’nè tse ka re thusang ho tsamaea le Molimo: (1) Pako ea sebele e bontšoa ka liketso; (2) Molimo ha a khahlisoe ke mahlabelo feela; (3) Jehova o utloa bohloko ha barapeli ba hae ba mo furalla; ’me (4) re lokela ho jala se molemo e le hore re kotule se molemo. Boitsebiso bo fumanoang likhaolong tse hlano tsa ho qetela tsa buka ee ea Bibele bo ka re thusa joang hore re tsamaee le Molimo?
U ka Araba Joang?
• Pako ea sebele e bontšoa joang?
• Ke hobane’ng ha Ntate oa rōna oa leholimo a sa khahlisoe ke mahlabelo feela?
• Molimo o ikutloa joang ha barapeli ba hae ba mo furalla?
• Re lokela ho jala eng haeba re batla ho kotula se molemo?
[Setšoantšo se leqepheng la 23]
Lerato le tšepahalang la Baiseraele le ile la nyamela joaloka maru a hoseng
[Setšoantšo se leqepheng la 23]
Litakatso tse mpe tsa Baiseraele li ne li ba chesa joaloka sebōpi
[Setšoantšo se leqepheng la 24]
Ke hobane’ng ha Jehova a ile a hana mahlabelo a sechaba sa hae?
[Setšoantšo se leqepheng la 25]
E le hore re kotule se molemo, re lokela ho jala se molemo