“Le Batle Jehova” ka Borapeli Boo a bo Amohelangs

 1. Ke litlhohonolofatso life tseo u li thabelang ka ho ba e mong oa batho ba Molimo?

U FUOE tlotla e khōlō hakaakang ea hore ebe u tseba Molimo ea phethahatsang boprofeta! U boemong bo boletsoeng ke moprofeta Hosea ha a ne a ngola a re: “Ke tla u lebeletsa ka botšepehi; ’me ka sebele u tla tseba Jehova.” Hosea o ne a hlalosa boemo bo sireletsehileng bo kang ba paradeise, boo batho ba Molimo ba neng ba tla bo thabela ha ba khutla botlamuoeng Babylona. Ka ho tšoanang, batho ba Molimo kajeno ba naleng ea moea ba bile ba sireletsehile moeeng; ho joalokaha eka ba paradeiseng. (Hosea 2:18-20) U se u bitsoa ka lebitso la Molimo joalokaha u le e mong oa bahlanka ba hae ba inehetseng—e mong oa Lipaki Tsa Jehova—’me u batla ho tsoela pele u bitsoa ka lona.—Esaia 43:10, 12; Liketso 15:14.

2, 3. (a) Ke hobane’ng ha Jehova a ile a qetella a hloile tsela eo batho ba hae ba boholo-holo ba neng ba mo rapela ka eona? (b) Ke hobane’ng ha re lokela ho nahanisisa ka melaetsa e ileng ea fetisoa ke baprofeta?

² Baiseraele ba boholo-holo e ne e le sechaba se inehetseng ho Jehova, ea ileng a ba fa litaelo tse neng li sa fuoa lichaba tse ling. (Deuteronoma 4:33-35) Leha ho le joalo, ho elella bofelong ba lilemo tsa bo-800 B.C.E., boemo ba Baiseraele bo ne bo mpefetse hoo Molimo a ileng a re moprofeta Amose a re ho bona: “Ke hloile, ke lahlile mekete ea lōna . . . Haeba le nyehela ho ’na linyehelo tse feletseng tsa secheso, esita le linyehelo tsa lōna tsa limpho nke ke ka khahlisoa ke tsona.” (Amose 5:21, 22) Le hoja Molimo a sa bue mantsoe ana phuthehong ea hae ea lefatšeng lohle kajeno, u ne u tla ikutloa joang ha A ne a ka bua joalo ka borapeli ba hao? Na ho na le seo e mong le e mong oa rōna a ka ithutang sona ntlheng ee?

³ Mehleng eo e fetileng, batho ba Molimo ba ne ba ipolela hore ba rapela Jehova ka tsela eo a e amohelang. Empa ba bangata ba ne ba sebeletsa melimo ea bahetene, e kang litšoantšo tsa Baale le tsa manamane tsa Bakanana, kapa ba etsa mahlabelo libakeng tse phahameng. Ba ne ba inamela lekhotla la maholimo ’me ka nako e tšoanang ba etsetsa Jehova likano. Ke ka lebaka leo Molimo oa ’nete a ileng a romela baprofeta ho ea khothalletsa batho hore ba khutlele ho eena borapeling bo hloekileng. (2 Marena 17:7-17; 21:3; Amose 5:26) Kahoo, ho hlakile hore esita le bahlanka ba Molimo ba inehetseng ba ka ’na ba fumana ho e-na le moo ho hlokahalang hore ba lokise teng—ba lokela ho hlahloba liketso tsa bona kapa boikutlo ba bona e le ho tiisa hore li bontša hore ba rapela Jehova ka tsela eo a e amohelang.

 4. Ho ne ho le joang nakong ea puso ea Morena Jeroboame oa Bobeli?

⁴ Hopola nakong ea ha baprofeta ba pele sehlopheng sena sa baprofeta ba 12 ba ne ba buella Molimo. Ba ile ba bolela esale pele hore letsatsi la Jehova le ne le tla tla khahlanong le ’muso oa Iseraele oa meloko e leshome. Leha ho le joalo, ho ne ho bonahala eka sechaba seo se iphelela ka boiketlo. Joalokaha Jonase a ne a profetile, Morena Jeroboame oa Bobeli o ile a tsosa moeli o tlohang ka leboea Iseraele ho elella Damaseka ho ea fihla Leoatleng le Shoeleng. (2 Marena 14:24-27) Le hoja Jeroboame a ne a ile a etsa se sebe, Jehova o ile a mamella, a sa batle ho hlakola lebitso la Iseraele tlas’a maholimo. Molimo o ile a fa Baiseraele nako ea ho baka, hore ‘ba batle Jehova, ’me ba ’ne ba phele.’—Amose 5:6.

 5. Ke eng seo Baiseraele ba neng ba haelloa ke sona se ileng sa etsa hore Jehova a se ke a ba amohela?

⁵ Baiseraele bao ba iphelelang ka boiketlo ba ka be ba ile ba sebelisa monyetla oo ho khutlela ho Jehova ka ho batla ho mo tseba haholoanyane le ho phehella ho etsa seo a se batlang. Empa ba ne ba itšepile, ba nahana hore “tlokotsi e ke ke ea atamela kapa ea fihla ho [bona].” (Amose 9:10) U ka ’na ua re ba ile ba lebala Jehova kahobane “ba ile ba khora ’me lipelo tsa bona tsa qala ho iphahamisa.” (Hosea 13:6) Ha rea lokela ho nahana hore e mpa feela e le taba e etsahetseng khale koana e sa re ameng. Hlokomela hore na ke hobane’ng ha Jehova a ne a qosa Baiseraele: “Kahobane u lahlile tsebo, le ’na ke tla u lahla hore u se ke ua sebeletsa u le moprista ho ’na.” Ba ne ba inehetse ho Jehova ba bile ba le har’a litho tsa lelapa tse inehetseng. Leha ho le joalo, e le batho ka bomong, ba ne ba haelloa ke “tsebo [ea ’nete] ea Molimo.”—Hosea 4:1, 6.

 6. Ke hobane’ng ha ho ka thoe Baiseraele ba ne ba haelloa ke tsebo ea Molimo?

⁶ Hase hore ba ne ba e-s’o ka ba utloa mantsoe a Molimo, ao batsoali ba Baiseraele ba neng ba lokela ho a ruta bana ba bona. Mohlomong ba bangata ba ne ba utloile ha batsoali ba bona kapa batho ba bang ba ba qoqela lintho tse tlalehiloeng ka Bibeleng, kapa ba li utloile lipokanong tsa sechaba. (Exoda 20:4, 5; Deuteronoma 6:6-9; 31:11-13) Ka mohlala, ba ne ba utloile se ileng sa etsahala ha Arone a etsa namane ea khauta ha Moshe a ntse a le Thabeng ea Sinai a il’o lata Melao e Leshome. (Exoda 31:18–32:9) Kahoo, mehleng ea baprofeta, Baiseraele ba ne ba tseba Molao ho isa bohōleng bo itseng ba bile ba boleletsoe lintho tse etsahetseng nakong e fetileng. Leha ho le joalo, tsebo ea bona e ne e se na thuso hobane e ne e sa ba susumelletse ho rapela Molimo ka tsela eo eena a e batlang.

 7. (a) Ho tlile joang hore ho be bonolo hakaalo hore Baiseraele e be ba sa mameleng? (b) Mokreste a ka ‘qala ho lebala Moetsi oa hae’ joang?

⁷ U ka ’na ua ipotsa hore na ‘ho tlile joang hore Baiseraele ba ekoe habonolo hakaalo hore ba se ke ba mamela?’ Hosea o ile a hlalosa hore na ho tlile joang ha a re: “Iseraele e ile ea qala ho lebala Moetsi oa eona.” (Hosea 8:14) Leetsi la Seheberu sa mathomo le fetoletsoe hantle e le ho “qala ho lebala.” Baiseraele ba ne ba sa lebala Jehova ka lebaka la ho tšoaroa ke lefu la bolebali ka tšohanyetso. Ho e-na le hoo, butle-butle ba ile ba lebala bohlokoa ba ho mo rapela ka tsela eo a e amohelang. Na u nahana hore Mokreste a ka oela lerabeng le joalo? Ka mohlala, nahana ka monna ea ikemiselitseng ho hlokomela lelapa la hae. (1 Timothea 5:8) E le hore a etse joalo, hoa utloahala hore o ne a tla nka mosebetsi oa hae oa boipheliso e le oa bohlokoa. Mohlomong ho hlaha boemo bo itseng, ’me o etsa qeto ea ho se ee libokeng tse ling tsa Bokreste ka lebaka la mosebetsi. Ha nako e ntse e feta, ho se ho e-ba bonolo hore a se ee libokeng, ’me o etsa sena khafetsa. Hanyane ka hanyane kamano ea hae le Molimo e qala ho fokola—o se a ‘qalile ho lebala Moetsi oa hae.’ Mokreste eo batsoali ba hae kapa beng ka eena ba seng tumelong e le ’ngoe le eena a ka etsahalloa ke se tšoanang. Liphephetso tseo a tobaneng le tsona ke hore: O tla qeta nako e kae a e-na le bona, hona o tla ba le bona neng? (Exoda 20:12; Matheu 10:37) Ebe tabeng ea ho eta, ho itlosa bolutu kapa ho ithabisa, teng o tla qeta nako e kae?

 8. Mehleng ea Amose, “bohloeki ba meno” bo ne bo bolela’ng?

⁸ Re ithutile Lentsoe la Molimo ra ba ra sebelisa tsebo eo re nang le eona. Leha ho le joalo, e mong le e mong oa rōna a ka nahana ka poleloana ena e sebelisitsoeng bukeng ea Amose, e reng: “bohloeki ba meno.” Molimo o ile a sebelisa Amose ho lemosa batho ba Hae, a re: “’Na ke ile ka le fa bohloeki ba meno metseng eohle ea lōna le ho hloka bohobe libakeng tsohle tsa lōna.” (Amose 4:6) Hase hore meno a ne a hloekile hobane a hlatsoitsoe. A ne a hloekile kahobane lijo li le sieo, e le tlala feela. Ho feta moo, polelo ena e ne e lemosa ka “tlala, eseng bakeng sa bohobe, le lenyora, eseng bakeng sa metsi, empa bakeng sa ho utloa mantsoe a Jehova.”—Amose 8:11.

9, 10. (a) Mokreste a ka qetoa ke tlala ea moea joang? (b) Ke hobane’ng ha re lokela ho itebela kotsing ea tlala ea moea?

⁹ Ka kutloisiso ea moea, seo Amose a se boletseng se phethahala boemong bo utloisang bohloko ba Bokreste-’mōtoana. Empa batho ba Molimo lefatšeng ka bophara ba buletsoe “likhoro tsa moroallo tsa maholimo.” Ba hlohonolofalitsoe ka nala ea lijo tsa moea. (Malakia 3:10; Esaia 65:13, 14) Empa Mokreste a ka ’na a ipotsa, ‘Ke ja lijo tsee tsa moea hakae?’ Hlokomela hore bafuputsi ba bang ba fumane hore haeba karolo e laolang tlala bokong ba liphoofolo tseo ho etsoang liteko ka tsona e senyehile, li hloka takatso ea lijo hoo li ka bang tsa bolaoa ke tlala le hoja li le ka har’a matletsetletse a lijo! Na karolo e laolang tlala ea moea bokong ba Mokreste e ka lemala hoo a ka qalang ho bolaoa ke tlala le hoja a le ka har’a matletsetletse a lijo tsa moea?

¹⁰ A k’u itlhahlobe ’me u nahane ka taba ena: Jehova o ne a file Baiseraele lijo tse ngata tsa moea. Ba ne ba e-na le Molao o neng o ka matlafatsa kamano ea bona le eena; ba ne ba e-na le tokisetso ea ho ruta bana ba bona ka ho pheta-pheta hore ba tsebe Molimo; hape ba ne ba e-na le baprofeta ba neng ba ba thusa hore ba utloisise thato ea Molimo. Ho ntse ho le joalo, ba ile ba qala ho lebala Jehova. Bibele e re matsatsing a Hosea, “ba ile ba khora [ba e-ba le lintho tse bonahalang] ’me lipelo tsa bona tsa qala ho iphahamisa.” (Hosea 13:6; Deuteronoma 8:11; 31:20) Haeba re sa batle hore lintho tse bonahalang e be tsa bohlokoa ho feta kamano ea rōna le Molimo, ho hlokahala hore letsatsi le letsatsi re ele hloko kotsi ena.—Sofonia 2:3.

11, 12. (a) Nakong ea puso ea Morena Uzia, ke hobane’ng ha ho ne ho hlokahala hore baprofeta ba khothalletse batho hore ba khutlele ho Jehova? (b) Joele o ile a hlakisa hore ho ne ho hlokahala’ng?

¹¹ Ha Jeroboame oa Bobeli a busa Iseraele, Uzia (eo hape a bitsoang Azaria) o ne a busa Juda. Uzia o ile a atolosa sebaka sa puso ea hae a ba a hōlisa le Jerusalema. “O ile a bontša matla ka tekanyo e sa tloaelehang” hobane “Molimo oa ’nete [o ile] a tsoela pele ho mo thusa.” O ile “a ’na a etsa se nepahetseng mahlong a Jehova” ’me “a sekamela ho batleng Molimo.” Leha ho le joalo, batho ba bangata ba Juda ba ile ba tsoela pele ho etsa mosi oa sehlabelo libakeng tse phahameng.—2 Likronike 26:4-9.

¹² Sena se bontša hore le hoja Bajuda le Baiseraele ba ne ba bitsoa ka lebitso la Molimo, hangata ho ne ho e-na le lintho tseo Molimo a neng a sa li rate borapeling ba bona. Baprofeta ba ile ba leka ho ba thusa ho khetholla borapeli ba ’nete le ba bohata. A sebelisa Joele, Molimo o ile a ipiletsa ka ho re: “Khutlelang ho ’na ka lipelo tsohle tsa lōna, le ka ho itima lijo le ka ho lla le ka ho bokolla.” (Joele 2:12) Hlokomela: Molimo o ne a batla hore batho ba hae ba tle ho eena ka ‘lipelo tsohle tsa bona.’ E, bothata bo ne bo le lipelong tsa bona. (Deuteronoma 6:5) Ho tšoana le ha ba ne ba rapela Jehova ho phetha molao feela, eseng ka lipelo tsohle. Nako le nako o ne a sebelisa baprofeta ho hatisa bohlokoa ba mosa o lerato, toka le bonolo—e leng lintho tseo kaofela e leng litšobotsi tsa pelo.—Matheu 23:23.

13. Ke eng seo ho neng ho hlokahala hore Bajuda ba khutlileng botlamuoeng Babylona ba nahane ka sona?

¹³ Ka mor’a moo, nahana ka se ileng sa etsahala ka mor’a hore Bajuda ba khutlele naheng ea habo bona. Le hoja ho ile ha tsosolosoa borapeli ba ’nete bo neng bo lumellana le Molao, ba ne ba ntse ba sa etse sohle seo Molimo a se amohelang. Bajuda ba ile ba itima lijo ka matsatsi ao e neng e le sehopotso sa liketsahalo tse amanang le ho timetsoa ha Jerusalema. Jehova o ile a botsa: “Na ka sebele le ile la itima lijo ka lebaka la ka?” Motse oo o ne o ripitliloe kahobane Molimo a ne a phethisitse toka, kahoo, ho ne ho sa hlokahale hore ba hlomohe. Ho e-na le hore Bajuda bao ba lakatse se fetileng ’me ba itime lijo ka ho hlomoha, ba ne ba lokela ho nyakalla, ba thabele linako tsa mekete ka lebaka la litlhohonolofatso tse tlisitsoeng ke borapeli ba ’nete. (Zakaria 7:3-7; 8:16, 19) Hape ba ne ba lokela ho ela hloko lintho tse ling. Lintho tse kang life? “Etsang kahlolo ea lōna ka toka ea ’nete; ’me le etsetsane mosa o lerato le mehauhelo . . . ’me le se ke la rerelana letho le lebe ka lipelong tsa lōna.” (Zakaria 7:9, 10) Kaofela re ka rua molemo ho seo baprofeta bao ba ileng ba se ruta batho ba Molimo mabapi le ho rapela Molimo ka pelo eohle.

14. (a) Ke eng seo ho neng ho hlokahala hore batho ba khutlileng botlamuoeng ba se akarelletse borapeling ba bona? (b) Baprofeta ba ile ba totobatsa litšobotsi tsa bohlokoa haholoanyane tsa borapeli joang?

¹⁴ Borapeli bo etsoang ka pelo eohle bo akarelletsa eng? Ho ne ho hlokahala hore batho ba Molimo ba etse’ng pele ba e-ea botlamuoeng le ha ba se ba khutlile teng? Ua tseba hore ba ne ba lokela ho hlompha melao-motheo ea Molimo litabeng tsa boitšoaro. Ho ne ho boetse ho e-na le mehato eo ba lokelang ho e nka kapa mesebetsi eo ba lokelang ho e etsa e neng e laetsoe ke Molao, e kopanyelletsang ho bokana ho tla mamela le ho ithuta thato ea Molimo. Leha ho le joalo, Molimo o ile a re baprofeta ba hae ba boele ba hatise bohlokoa ba ho hlaolela ho bontša mosa o lerato, toka, bonolo, mohau le boinyenyefatso. Hlokomela kamoo Jehova a ileng a totobatsa litšobotsi tsena kateng ha a re: “Ke khahliloe ke mosa o lerato, eseng sehlabelo; le tsebo ea Molimo ho e-na le linyehelo tse feletseng tsa secheso.” “Itjalleng peō ka ho loka; kotulang tumellanong le mosa o lerato.” (Hosea 6:6; 10:12; 12:6) Mikea o ile a re: “Jehova o batla eng ho uena haese hore u sebelise toka u rate mosa ’me u inyenyefatse ha u tsamaea le Molimo oa hao?” (Mikea 6:6-8) Le moprofeta Sofonia o ile a ipiletsa ho batho ba Molimo a re: “Le batle Jehova, lōna bohle ba bonolo ba lefatše . . . Batlang ho loka, le batle bonolo.” (Sofonia 2:3) Litšobotsi tsena lia hlokahala hore borapeli e be bo amoheloang ke Molimo.

15. Tumellanong le keletso ea baprofeta, ke eng seo ho hlokahalang hore Bakreste ba se etse borapeling ba bona?

¹⁵ Litšobotsi tsee ke tsa bohlokoa hakae borapeling ba rōna? Ua tseba hore ho bolela litaba tse molemo tsa ’Muso ke ntho ea bohlokoa. (Matheu 24:14; Liketso 1:8) Empa u ka ’na ua ipotsa: ‘Na ke nka ho bolela tšimong ea heso e le moroalo kapa mokhoka-khoale? Kapa ke ho nka e le monyetla oa ho thusa batho bao ho hlokahalang hore ba utloe molaetsa oa Bibele o pholosang? Na ke ba bontša mohau?’ E, mohau le mosa o lerato li lokela ho re susumelletsa hore re lemose ba bang ka letsatsi la Jehova. Toka le ho loka le tsona lia ameha ha re ntse re leka ho finyella batho ba mefuta eohle ka molaetsa ona.—1 Timothea 2:4.

16, 17. Ke hobane’ng ha ho hlokahala bonolo le boinyenyefatso borapeling ba rōna?

¹⁶ Mohlala o mong hape ke ona: Nahana ka boikarabelo ba rōna ba ho ba teng libokeng tsa Bokreste, tseo u tsebang hore ke tsa bohlokoa. (Baheberu 10:24, 25) Na u kile ua nahana hore na bonolo le boinyenyefatso li ameha joang tabeng eo? Batho ba bonolo ba ikokobelitse hoo ba ka amohelang taeo ba be ba sebelise seo ba ithutang sona, ’me ka ho etsa joalo ba sebelisa qeto ea Jehova ea boahloli. Motho ea inyenyefatsang, ea tsebang mefokolo ea hae, o tla utloisisa hore o hloka khothatso le tsebo tse fumanehang libokeng.

¹⁷ Mehlaleng ena ua bona kamoo se ileng sa rutoa ke baprofeta se ka re ruisang molemo kateng. Leha ho le joalo, ho thoe’ng haeba u lemoha hore ho hlokahala hore u etse liphetoho ho e ’ngoe ea lintho tse boletsoeng ka holimo kapa ho tse ’maloa tsa tsona? Kapa ho thoe’ng haeba u entse liphoso tse tebileng, hoo u ntseng u khoebethoa ke letsoalo ha u li hopola? Baprofeta ba 12 baa u tšelisa ebile baa u thusa.

18. (a) Ke bo-mang haholo-holo ba tšelisoang ke molaetsa oa baprofeta ba 12? (b) U ikutloa joang ka Jehova, ea ipiletsang ho batho ba hae hore ba khutlele ho eena?

¹⁸ Joalokaha re bone, mosebetsi oa baprofeta bao re buang ka bona e ne e se feela ho nyatsa le ho ahlola. Ba ne ba bontša kamoo Jehova a khothalletsang batho hore ba khutlele ho eena kateng. Ak’u nahane ka maikutlo a senoloang ke mantsoe a Hosea ha a ba khothatsa a re: “Tloong, ’me re khutleleng ho Jehova, etsoe o rusolotse empa o tla re folisa. O ’nile a otla, empa o tla re tlamisa. . . . Re tla tseba, re tla phehella ho tseba Jehova.” (Hosea 6:1-3) Ke ’nete hore Jehova Molimo o ile a sebelisa toka eaba o phethisa kahlolo ea hae Iseraele esita le Juda hamorao. Leha ho le joalo, batho ba hae ba ne ba lokela ho nka likotlo tseo e le mokhoa oa ho ba khutlisetsa tseleng le ho ba folisa moeeng. (Baheberu 12:7-13) Haeba batho ba Jehova ba khelohileng ba ne ba ka khutla, o ne a tla ba “folisa” a be a ba ‘tlamise.’ A k’u nahane ka monna ea khumameng, ea tlamisang leqeba la e mong. Joale ak’u nahane e le Jehova ea etsang joalo. Jehova ke Molimo ea mohau hakaakang, ea tlamisang ba ikemiselitseng ho khutlela ho eena! Na see ha se re susumelletse hore re batle ho khutlela ho eena haeba re mo sitetsoe?—Joele 2:13.

19. Ho tseba Jehova ho akarelletsa’ng?

¹⁹ Ho khutlela ho Molimo ho akarelletsa’ng? Hosea o re hopotsa hore ha rea lokela ho “tseba” Molimo feela empa hape re lokela ho “phehella ho tseba Jehova.” Buka e ’ngoe ea kajeno e fanang ka boitsebiso bo eketsehileng e re ka Hosea 6:3: “Ho na le phapang e khōlō pakeng tsa ho tseba ka Molimo le ho tseba Molimo. Ho tšoana le phapang e pakeng tsa ho bala ka lerato le ho ratana.” Ha ho hlokahale hore re be le tsebo e ka holimo feela ka Jehova. E lokela ho ba motho oa sebele ho rōna, e be Motsoalle oa rōna eo re mo tšepang eo re ka mo atamelang ka bolokolohi. (Jeremia 3:4) Ha u e-na le kamano e joalo, u ka khona ho lemoha hore na ebe o ikutloa joang ha u etsa lintho ka tsela e itseng, ’me sena se tla u thusa haholo hore u ikakhele ka setotsoana borapeling boo a bo amohelang.

20, 21. Morena Josiase o ile a sebelisa tsebo ea Molimo bophelong ba hae joang?

²⁰ Morena Josiase e ne e le mohlala o motle oa ho ikakhela ka setotsoana borapeling ba ’nete. Ak’u nahane ka lintho tse ling tse ileng tsa etsahala bophelong ba hae. Ha Josiase e e-ba morena, sechaba se ne se sentsoe ke borapeli ba litšoantšo, pefo le bolotsana tse neng li atile pusong ea Manase le Amone. (2 Marena 21:1-6, 19-21) E tlameha ebe keletso ea Sofonia ea hore ba ‘batle Jehova’ e ile ea tsoela Josiase molemo hobane o ile “a qala ho batla Molimo oa . . . Davida.” Josiase o ile a qala letšolo la ho felisa borapeli ba litšoantšo Juda, a ba a bo felisa le libakeng tseo pele li neng li le ’musong o ka leboea.—Sofonia 1:1, 14-18; 2:1-3; 3:1-4; 2 Likronike 34:3-7.

²¹ Ha Josiase a qeta mosebetsi ona oa ho hloekisa, o ile a tsoela pele ho batla Jehova. O ile a laela hore ho lokisoe tempele. Ha mosebetsi oo o ntse o tsoela pele, ba ile ba fumana “buka ea molao oa Jehova e fanoeng ka letsoho la Moshe,” eo ho bonahalang eka e ne e le buka ea pele-pele e ngotsoeng ka letsoho ea Molao. Josiase o ile a etsa’ng ha ho baloa buka eo? “Hang ha morena a utloa mantsoe a buka ea molao, kapele-pele a hahola liaparo tsa hae.” Hape o ile a ‘hahola pelo ea hae’ ’me ka potlako a sebelisa seo a se balileng. Ha aa ka a leka ho ikemela ka ho bolela hore o ne a se a entse lintho tse ngata. Na u sa hopola hore na tsosoloso eo e ile ea fella ka eng? “Ka matsatsi ’ohle a hae [bara ba Iseraele] ha baa ka ba kheloha ho latela Jehova Molimo oa baholo-holo ba bona.”—2 Likronike 34:8, 14, 19, 21, 30-33; Joele 2:13.

22. Mohlala oa Josiase o ka re thusa joang?

²² U ka ’na ua re: ‘Ebe ’na nka be ke ile ka etsa joang?’ Na joaloka Josiase u ka be u ile ua mamela mantsoe a baprofeta ’me ua etsa liphetoho tse hlokahalang liketsong tsa hao le monahanong oa hao? Le hoja re sa phele mehleng ea Sofonia le Josiase, rea hlokomela hore ho hlokahala hore re mamele melaetsa ea Molimo le keletso ea hae kajeno. Kahoo, haeba pelo ea Mokreste e mo bolella hore ho hlokahala hore a fetole tsela eo a phelang ka eona kapa eo a rapelang ka eona, ho nahana ka libuka tsena tsa baprofeta ba 12 ho ka mo susumelletsa hore a nke khato.—Baheberu 2:1.

23. Haeba u ikutloa hore ho na le moo ho hlokahalang hore u ntlafatse teng, u ka etsa’ng?

²³ Ka linako tse ling u ka ’na ua ikutloa joaloka Jonase ha a ne a le ka mpeng ea tlhapi ’me a re: “Ke lelekiloe ka pel’a mahlo a hao! Ke tla boela ke talime tempele ea hao e halalelang joang?” (Jonase 2:4) Leha ho le joalo, mantsoe a Jehova a re khothatsa hakaakang, rōna batho ba sa phethahalang ba tloaetseng ho etsa liphoso! O re: “Khutlelang ho ’na, ’me ke tla khutlela ho lōna.” (Malakia 3:7) Haeba u bona ho hlokahala hore u matlafatse kamano ea hao le Jehova, baholo phuthehong ea heno ba tla thabela ho u thusa. Joaloka ho khanna koloi, u lokela ho qala ka ho tloha butle. Ha u se u kene tseleng, ho se ho tla ba bonolo haholoanyane ho tsoela pele. Kholiseha hore Jehova o tla u amohela a be a u thuse kaha “o mosa ’me o mohau, o lieha ho halefa ’me o tletse mosa o lerato.” (Joele 2:12-14) Ka sebele, melaetsa ea baprofeta bana e khothatsa bohle ba ikakhetseng ka setotsoana borapeling boo Molimo a bo amohelang.