19, 20. Ho ile ha etsahala’ng ka Bajuda ba tšepileng Jehova?

¹⁹ Leha ho le joalo, tšepo ea ba tšepileng Jehova ha e na ho soetseha. Jehova o tšepahalla lilekane tseo a li entseng le Abrahama le Davida, ’me o hauhela ba mo ratang joaloka Mikea le ba utloisoang bohloko ke ho ikarola ha batho ba habo bona ho Molimo. Molemong oa bao ba lokileng, ho tla ba le tsosoloso ka nako ea Molimo e loketseng.

²⁰ Seo se etsahala ka 537 B.C.E., ka mor’a hore Babylona e oe ’me masala a Bajuda a khutlele naheng ea habo ’ona. Ka nako eo, mantsoe a Mikea 2:12 a phethahala ka lekhetlo la pele. Jehova o re: “Ka sebele ke tla bokella Jakobo, kaofela ha lōna; ruri ke tla phutha ba setseng ba Iseraele. Ke tla ba beha bonngoeng, joaloka mohlape ka lesakeng, joaloka mohlape o leng har’a lekhulo la oona; moo ho tla tlala lerata la batho.” Jehova o lerato hakaakang! Ka mor’a ho laea batho ba hae, o lumella masala hore a khutle ’me a mo sebeletse naheng eo a e fileng baholo-holo ba bona.

22. Ke lihlopha life tse peli tse tšepileng ’Muso oa Molimo?

²² Ka 1919, Bakreste ba tšepahalang ba tlotsitsoeng ba ile ba ikarola ka ho feletseng Bokreste-’mōtoaneng ’me ba ikemisetsa ho phatlalatsa litaba tse molemo tsa ’Muso lichabeng tsohle. (Matheu 24:14) Qalong, ba ile ba batla masala a Iseraele ea Molimo. Ha ntan’o qaloa ho bokella “linku tse ling,” ’me lihlopha tsena ka bobeli ea e-ba “mohlape o le mong, molisa a [le] mong.” (Johanne 10:16) Le hoja hona joale barapeli bana bohle ba tšepahalang ba sebeletsa Molimo linaheng tse 234, ba fela ba le “bonngoeng.” Hona joale, lesaka la linku le ‘tletse lerata la banna,’ hammoho le la basali le bana. Tšepo ea bona ha e tsamaisong ena ea lintho, empa e ’Musong oa Molimo, oo haufinyane o tlang ho tlisa Paradeise lefatšeng.