Re Tla Tsamaea ka Lebitso la Jehova ka ho sa Feleng!
“Re tla tsamaea ka lebitso la Jehova Molimo oa rōna ho isa nakong e sa lekanyetsoang, esita le ka ho sa feleng.”—MIKEA 4:5.
1. Ke melaetsa efe e phatlalalitsoeng ho Mikea khaolo ea 3 ho isa ho ea 5?
JEHOVA o na le seo a batlang ho se bolella batho ba hae, ’me o sebelisa Mikea e le moprofeta oa hae. Molimo o rerile ho nkela bafosi khato. O tla otla Iseraele ka lebaka la bokoenehi ba eona. Leha ho le joalo, ho thabisang ke hore Jehova o tla hlohonolofatsa ba tsamaeang ka lebitso la hae. Melaetsa ena e phatlalalitsoe khaolong ea 3 ho isa ho ea 5 ea boprofeta ba Mikea.
2, 3. (a) Baeta-pele ba Iseraele ba lokela ho bonahatsa tšobotsi efe, empa ha e le hantle ba etsa’ng? (b) U ne u ka hlalosa mokhabo-puo o sebelisitsoeng ho Mikea 3:2, 3 joang?
2 Moprofeta oa Molimo o re: “Ka kōpo, utloang lōna lihlooho tsa Jakobo le lōna balaoli ba ntlo ea Iseraele. Na hase mosebetsi oa lōna ho tseba toka?” E tšoanela ebe ke mosebetsi oa bona, empa ke’ng seo ba hlileng ba se etsang? Mikea o re: “Lōna ba hloileng se molemo le ba ratang bobe, ba qaqapolotsang batho letlalo la bona le nama ea bona masapong a bona; lōna bao hape le jeleng nama ea sechaba sa ka, ’me la tlosa letlalo la sona ho sona, la ba la robokella masapo a sona, ’me la a silakanya joaloka se leng ka pitseng e molomo o moholo le joaloka nama e leng ka har’a pitsa.”—Mikea 3:1-3.
3 Baeta-pele ba hatella batho ba futsanehileng, ba se nang mang-oe! Batho ba mametseng Mikea ba utloisisa habonolo mokhabo-puo o sebelisitsoeng mona. Ha nku e hlabiloeng e phehoa, e buuoa pele ebe ea khabeloa. Ka linako tse ling masapo aa rojoa hore moko o tsoe. Nama le masapo li phehoa ka pitseng e khōlō, e kang eo Mikea a buang ka eona. (Ezekiele 24:3-5, 10) Ke papiso e loketseng hakaakang e bontšang tšoaro e mpe eo baeta-pele ba khopo ba tšoereng batho ba mehleng ea Mikea ka eona!
Jehova o Lebeletse Hore re Sebelise Toka
4. Ho na le phapang efe pakeng tsa Jehova le baeta-pele ba Iseraele?
4 Ho na le phapang e khōlō pakeng tsa Molisa ea lerato, Jehova, le baeta-pele ba Iseraele. Kaha ha ba sebelise toka, ba hlōleha ho phethahatsa thōmo ea bona ea ho sireletsa mohlape. Ho e-na le hoo, joalokaha ho boletsoe ho Mikea 3:10, ka boithati ba tlatlapa linku tsa tšoantšetso, ha ba li sebeletse ka toka ’me ba li pepesetsa “liketso tsa tšollo ea mali.” Re ka ithuta’ng boemong boo?
5. Jehova o lebeletse eng ho ba etellang batho ba hae pele?
5 Molimo o lebeletse hore ba etellang batho ba hae pele ba sebelise toka. Sena ke ’nete ka bahlanka ba Jehova kajeno. Ho feta moo, sena se tumellanong le Esaia 32:1, e reng: “Bonang! Morena o tla busa ka ho loka; ha e le likhosana, li tla busa e le likhosana ka toka.” Empa re fumana eng mehleng ea Mikea? “Ba hloileng se molemo le ba ratang bobe” ba tsoela pele ho khopamisa toka.
Ke Bo-mang Bao ho Arajoang Lithapelo Tsa Bona?
6, 7. Ho totobatsoa ntlha efe ea bohlokoa ho Mikea 3:4?
6 Na batho ba khopo ba mehleng ea Mikea ba ka lebella hore Jehova a ba amohele? Le hanyenyane! Mikea 3:4 e re: “Ba tla hoeletsa ho Jehova ho kōpa thuso, empa a ke ke a ba araba. O tla ba patela sefahleho sa hae nakong eo, ho ea kamoo ba entseng bobe kateng mesebetsing ea bona.” Sena se totobatsa ntlha ea bohlokoahali.
7 Jehova a ke ke a araba lithapelo tsa rōna haeba re itloaetsa ho etsa sebe. Haholo haeba re phela bophelo bo habeli, re pata liphoso tsa rōna re iketsa eka re sebeletsa Molimo ka botšepehi. Ho ea ka Pesaleme ea 26:4, Davida o ile a bina: “Ha kea lula le batho ba leshano; ha ke kene setsoalleng le ba patang seo ba leng sona.” Ruri le Jehova a ke ke a araba lithapelo tsa ba tlōlang Lentsoe la hae ka boomo.
Ho Matlafatsoa ke Moea oa Molimo
8. Baprofeta ba bohata ba mehleng ea Mikea ba ile ba lemosoa ka eng?
8 Ho atile mekhoa e soabisang hakaakang har’a baeta-pele ba moea ba Iseraele! Baprofeta ba bohata ba etsa hore batho ba Molimo ba hlahlathele moeeng. Batho ba meharo baa hooa, ba re “Khotso!” empa ha e le hantle, ba halaletsa ntoa khahlanong le motho leha e le ofe ea sa ba feng ho eang ka maleng. Jehova o re: “Ka hona le tla ba le bosiu, e le hore ho se ke ha e-ba le pono; ’me le tla ba le lefifi, e le hore le se ke la sebelisa bonohe. Ka sebele letsatsi le tla likella baprofeta, le motšehare o tla ba fifalla. Ba bonang lipono ba tla lokela ho hlajoa ke lihlong, ’me ka sebele linohe li tla soetseha. Ba tla lokela ho koahela litelu tse holim’a molomo.”—Mikea 3:5-7a.
9, 10. Ho “koahela litelu tse holim’a molomo” ho bolela’ng, hona ke hobane’ng ha Mikea a se na lebaka la ho etsa seo?
9 Ke hobane’ng ha ba “koahela litelu tse holim’a molomo”? Sena ke seo batho ba khopo ba mehleng ea Mikea ba se etsang ka lebaka la ho hlajoa ke lihlong. ’Me batho bana ba khopo ba lokela ho hlajoa ke lihlong. Ho ea ka bona “ha ho na karabo e tsoang ho Molimo.” (Mikea 3:7b) Jehova ha a mamele lithapelo tsa batho leha e le bafe ba khopo ba ikhohomosang.
10 Mikea ha a na lebaka la ho “koahela litelu tse holim’a molomo.” Ha a hlajoe ke lihlong. Jehova o araba lithapelo tsa hae. Ela hloko Mikea 3:8, moo moprofeta enoa ea tšepahalang a reng: “Ka lehlakoreng le leng, ke tletse matla, ka moea oa Jehova, le oa toka le bonatla.” Mikea o leboha hakaakang hore ebe nakong eohle ea tšebeletso ea hae e telele le e tšepahalang, esale a ntse a “tletse matla, ka moea oa Jehova”! Sena se mo file matla a “ho bolella Jakobo bofetoheli ba hae le Iseraele sebe sa hae.”
11. Batho ba matlafalletsoa ho phatlalatsa melaetsa ea Molimo joang?
11 Mikea o hloka matla a fetang a batho hore a phatlalatse molaetsa oa Molimo oa kahlolo e bohloko. Moea oa Jehova, kapa matla a hae a sebetsang, ke oa bohlokoa. Ho thoe’ng ka rōna? Thōmo ea rōna ea boboleli e ka finyelloa feela haeba Jehova a re matlafatsa ka moea oa hae o halalelang. Boiteko ba ho bolela bo tla hlōleha ka ho feletseng haeba re tloaela ho etsa sebe ka boomo. Boemong bo joalo Molimo a ke ke a araba lithapelo tsa rōna tsa hore a re fe matla a ho etsa mosebetsi ona. Ka sebele re ke ke ra phatlalatsa melaetsa ea kahlolo ea Ntate oa rōna oa leholimo ntle leha “moea oa Jehova” o le holim’a rōna. Ka lithapelo tse utluoang le ka thuso ea moea o halalelang, re khona ho bolela lentsoe la Molimo ka sebete, joaloka Mikea.
12. Ke hobane’ng ha barutuoa ba Jesu ba mehleng ea pele ba ile ba khona ho ‘tsoela pele ba bolela lentsoe la Molimo ka sebete sohle’?
12 Mohlomong u hopola tlaleho e ho Liketso 4:23-31. Nka hore u e mong oa barutuoa ba Jesu ba lekholong la pele la lilemo. Bahlorisi ba sehlōhō ba ’nile ba batla ho khutsisa balateli ba Kreste. Empa balateli bana ba tšepahalang ba rapela Morena ’Musi oa bona, baa ipiletsa: “Jehova, lebisa tlhokomelo litšokelong tsa bona, ’me u etse hore makhoba a hao a ’ne a bolele lentsoe la hao ka sebete sohle.” Ka phello efe? Ha ba etsa thapeli, sebaka seo ba bokaneng ho sona sea sisinyeha, ’me kaofela ba tlala moea o halalelang ’me ba bolela lentsoe la Molimo ka sebete. Ka hona e se eka re ka ea ho Jehova ka thapelo le ho itšetleha ka eena e le hore a re thuse ka moea o halalelang ha re ntse re phethahatsa tšebeletso ea rōna.
13. Ho tla etsahala’ng ka Jerusalema le Samaria, hona hobane’ng?
13 Ak’u boele u nahane ka mehleng ea Mikea. Ho ea ka Mikea 3:9-12, babusi ba molato oa mali ba ahlola ka tjotjo, baprista ba rupela ka tefo ’me baprofeta ba bohata ba sebelisa bonohe ho etsa chelete. Ha ho makatse hore ebe Molimo o entse qeto ea hore motse-moholo oa Juda, e leng Jerusalema, o “tla fetoha qubu feela ea lithako.” Kaha borapeli ba bohata le boitšoaro bo silafetseng bo jele setsi le har’a Baiseraele, Mikea o bululeloa ho lemosa hore Molimo o tla etsa Samaria “qubu ea lithako.” (Mikea 1:6) Ha e le hantle, moprofeta enoa o phela ho fihlela a bona Samaria e timetsoa ke mabotho a Assyria ka 740 B.C.E. joalokaha ho ne ho boletsoe esale pele. (2 Marena 17:5, 6; 25:1-21) Ho totobetse hore melaetsa ena e matla khahlanong le Jerusalema le Samaria e ka fetisoa feela ka matla a Jehova.
14. Boprofeta bo tlalehiloeng ho Mikea 3:12 bo ile ba phethahala joang, hona hoo ho lokela ho re ama joang?
14 Ka sebele Juda e ke ke ea phema kahlolo ea Jehova e bohloko. Phethahatsong ea boprofeta bo tlalehiloeng ho Mikea 3:12, Sione “e tla lengoa joaloka tšimo feela.” Ha rōna lekholong lena la bo21 la lilemo re sheba litaba, rea hlokomela hore lintho tsena li ile tsa etsahala ha Bababylona ba timetsa Juda le Jerusalema ka 607 B.C.E. Sena se etsahetse lilemo ka mor’a hore Mikea a profete, empa o ne a kholisehile hore timetso eo e tla tla. Ka sebele re lokela ho kholiseha ka ho tšoanang hore tsamaiso ena e khopo ea lintho e tla fela ka “letsatsi la Jehova” le boletsoeng esale pele.—2 Petrose 3:11, 12.
Jehova o Lokisa Litaba
15. U ka hlalosa boprofeta bo tlalehiloeng ho Mikea 4:1-4 joang ka mantsoe a hao?
15 Ha re hetla morao, re bona hore ka mor’a moo Mikea o fana ka molaetsa o hlollang oa tšepo. Re fumana mantsoe a khothatsang hakaakang ho Mikea 4:1-4! Har’a tse ling, Mikea o re: “Karolong e qetellang ea matsatsi thaba ea ntlo ea Jehova e tla tiisoa ka thata ka holim’a litlhōrō tsa lithaba, ’me ka sebele e tla phahamela maralla; ’me lichaba li tla phallela ho eona. . . . Ka sebele o tla ahlola har’a lichaba tse ngata, ’me a lokise litaba lichabeng tse matla tse hōle haholo. Ba tla lokela ho tea lisabole tsa bona hore e be mehoma le marumo a bona hore e be likere tse faolang limela. Sechaba se ke ke sa phahamisetsa sechaba se seng sabole, ha ba sa tla hlola ba ithuta ntoa. Ka sebele e mong le e mong o tla lula tlas’a sefate sa hae sa morara le tlas’a sefate sa hae sa feiga, ho ke ke ha e-ba le ea etsang hore ba thothomele; kaha molomo oa Jehova oa mabotho o boletse.”
16, 17. Mikea 4:1-4 e phethahatsoa joang kajeno?
16 “Lichaba tse ngata” le ‘lichaba tse matla’ tseo ho buuoang ka tsona moo ke life? Hase lichaba le mebuso ea lefatše lena. Ha e le hantle, boprofeta bona bo sebetsa ho batho ka bomong ba tsoang lichabeng tsohle bao hona joale ba kopaneng tšebeletsong e halalelang thabeng ea Jehova ea borapeli ba ’nete.
17 Tumellanong le boprofeta ba Mikea, haufinyane borapeli bo hloekileng ba Jehova bo tla sebelisoa ka botlalo lefatšeng ka bophara. Hona joale, batho ba nang le “tšekamelo e nepahetseng bakeng sa bophelo bo sa feleng” ba ntse ba rupeloa ka litsela tsa Jehova. (Liketso 13:48) Jehova o fana ka kahlolo le ho lokisa litaba ka kutloisiso ea moea ho balumeli ba emelang ’Muso. Ba tla pholoha ‘matšoenyeho a maholo’ e le karolo ea “bongata bo boholo.” (Tšenolo 7:9, 14) Kaha ba teile lisabole tsa bona hore e be mehoma, esita le hona joale ba phela ka khotso le Lipaki tse ling Tsa Jehova le batho ba bang. Ke ho thabisang hakaakang ho ba har’a bona!
Ho Ikemisetsa ho Tsamaea ka Lebitso la Jehova
18. Ke’ng se tšoantšetsoang ke ‘ho lula tlas’a sefate sa morara le sefate sa feiga’?
18 Mehleng ea rōna, ha lefatše le aparetsoe ke tšabo e joaloka leru le letšo, rea thaba hore ebe ba bangata ba ithuta litsela tsa Jehova. Re labalabela nako e seng e le haufinyane eo ka eona bohle ba ratang Molimo ba ke keng ba hlola ba ithuta ntoa, ho e-na le hoo ba tla lula tlas’a lifate tsa bona tsa morara le tsa feiga. Lifate tsa feiga li atisa ho lengoa serapeng ea morara. (Luka 13:6) Ho lula tlas’a sefate sa morara le sa feiga ho tšoantšetsa maemo a khotso, nala le tšireletseho. Esita le hona joale, kamano ea rōna le Jehova e re fa khotso ea kelello le tšireletseho moeeng. Re ke ke ra tšoha ’me re tla sireletseha ka ho feletseng, ha maemo a joalo a se a le teng tlas’a puso ea ’Muso.
19. Ho tsamaea ka lebitso la Jehova ho bolela’ng?
19 E le hore Molimo a re hlohonolofatse, re lokela ho tsamaea ka lebitso la Jehova. Sena se hatisitsoe ka matla ho Mikea 4:5, moo moprofeta a reng: “Lichaba tsohle li tla tsamaea se seng le se seng ka lebitso la molimo oa sona; empa re tla tsamaea ka lebitso la Jehova Molimo oa rōna ho isa nakong e sa lekanyetsoang, esita le ka ho sa feleng.” Ho tsamaea ka lebitso la Jehova ha ho bolele feela hore ke Molimo oa rōna. Ha ho bolele feela ho kopanela libokeng tsa Bokreste le mosebetsing oa boboleli ba ’Muso, le hoja mesebetsi eo le eona e le ea bohlokoa. Haeba re tsamaea ka lebitso la Jehova, re inehela ho eena ’me re ikitlaelletsa ho mo sebeletsa ka botšepehi re susumetsoa ke ho mo rata ka moea oohle. (Matheu 22:37) Joaloka barapeli ba hae ba ’nete, ruri re ikemiselitse ho tsamaea ka lebitso la Jehova Molimo oa rōna ka ho sa feleng.
20. Ke eng se boletsoeng esale pele ho Mikea 4:6-13?
20 Joale ak’u hlahlobe mantsoe a boprofeta a ho Mikea 4:6-13. “Morali oa Sione” o lokela ho ea botlamuoeng a be a e’o “fihla Babylona.” Ke sona se ileng sa hlahela baahi ba Jerusalema lekholong la bosupa la lilemo B.C.E. Leha ho le joalo, boprofeta ba Mikea bo bontša hore masala a tla khutlela Juda, ’me ha Sione e tsosolosoa, Jehova o tla tiisa hore lira tsa eona lia silakanngoa.
21, 22. Mikea 5:2 e ile ea phethahatsoa joang?
21 Mikea khaolo ea 5 e bolela esale pele liketsahalo tse ling tse hlollang. Ka mohlala, hlokomela se boleloang ho Mikea 5:2-4. Mikea o profeta hore ’Musi eo Molimo a mo khethileng—“eo lesika la hae le tsoang linakong tsa pele”—o tla tsoa Bethlehema. O tla busa e le molisa “ka matla a Jehova.” Ho feta moo, ’Musi enoa o tla ba moholo, eseng Iseraele feela, empa “ho ea fihla lipheletsong tsa lefatše.” Lefatše ka kakaretso le ka ’na la tsieleha hore na ke mang, empa ho rōna hoo hase sephiri.
22 Motho oa bohlokoa ka ho fetisisa ea kileng a tsoalloa Bethlehema ke mang? Hona ke mang ea tla “ba moholo ho ea fihla lipheletsong tsa lefatše”? Ha ho e mong haese Mesia, Jesu Kreste! Ha Heroda e Moholo a botsa baprista ba ka sehloohong le bangoli hore na Mesia o ne a tla tsoalloa hokae, ba ile ba re: “Bethlehema ea Judea.” Ba bile ba qotsa mantsoe a Mikea 5:2. (Matheu 2:3-6) Le batho feela tjee ba ne ba tseba sena, hobane Johanne 7:42 e ba qotsa ba re: “Na Lengolo ha lea re Kreste o tsoa baneng ba Davida, le hore o tsoa Bethlehema motsana oo Davida a neng a le ho oona?”
Khatholoho ea Sebele ho Batho
23. Ho etsahala eng hona joale e phethahatsang Mikea 5:7?
23 Mikea 5:5-15 e bua ka tlhaselo ea Assyria e tlang ho atleha ka motsotsoana feela, ’me e bolela hore Molimo o tla iphetetsa ho lichaba tse sa mameleng. Mikea 5:7 e tšepisa hore masala a bakileng a Bajuda a tla khutlisetsoa naheng ea habo ’ona, empa mantsoe ana a boetse a sebetsa le mehleng ena ea rōna. Mikea o re: “Ba setseng ba Jakobo ba tla ba joaloka phoka e tsoang ho Jehova har’a lichaba tse ngata, joaloka lipula tsa melupe holim’a limela.” Tšoantšetso ena e babatsehang e sebelisoa ho bolela esale pele hore masala a Jakobo, kapa Iseraele ea moea, e tla ba tlhohonolofatso e tsoang ho Molimo ho batho. “Linku tse ling” tsa Jesu, tse nang le tšepo ea lefatšeng, li thabela ho sebetsa mahetla a bapile le masala a kajeno a “Iseraele ea Molimo,” li thusa ho khatholla ba bang moeeng. (Johanne 10:16; Bagalata 6:16; Sofonia 3:9) Ntlheng ena, ho na le taba e ’ngoe ea bohlokoa eo re lokelang ho nahana ka eona. Joaloka baboleli ba ’Muso, kaofela ha rōna re lokela ho ananela tokelo ea rōna ea ho tlisetsa batho ba bang khatholoho ea sebele.
24. U khahliloe ke lintlha life ho Mikea khaolo ea 3 ho isa ho ea 5?
24 U ithutile’ng khaolong ea 3 ho isa ho ea 5 ea boprofeta ba Mikea? Mohlomong u ithutile lintlha tse kang hore: (1) Molimo o lebeletse hore ba etellang batho ba hae pele ba sebelise toka. (2) Jehova a ke ke a araba lithapelo tsa rōna haeba re tloaela ho etsa sebe ka boomo. (3) Thōmo ea rōna ea boboleli e ka finyelloa feela haeba Molimo a re matlafatsa ka moea oa hae o halalelang. (4) E le hore Molimo a re amohele, re lokela ho tsamaea ka lebitso la Jehova. (5) Re le baboleli ba ’Muso, re lokela ho ananela tokelo ea rōna ea ho tlisetsa batho khatholoho ea sebele. Mohlomong ho na le lintlha tse ling tse u khahlileng. Re ka ithuta eng hape bukeng ee ea Bibele ea boprofeta? Sehlooho se latelang se tla re thusa ho ithuta lithuto tsa bohlokoa likhaolong tse peli tse qetellang tsa boprofeta ba Mikea bo matlafatsang tumelo.
U ka Araba Joang?
• Molimo o lebeletse eng ho ba etellang batho ba hae pele?
• Ke hobane’ng ha thapelo le moea o halalelang e le tsa bohlokoa tšebeletsong ea rōna ho Jehova?
• Batho ba ‘tsamaea ka lebitso la Jehova’ joang?
[Setšoantšo se leqepheng la 15]
Na u ka hlalosa papiso ea Mikea e buang ka pitsa?
[Litšoantšo tse leqepheng la 16]
Joaloka Mikea, re etsa tšebeletso ea rōna ka sebete