Khotso ea Lefatše—Joang Hona Neng?
KHOTSO ea lefatše ke e ’ngoe ea litoro tseo batho ba li lakatsang. Empa ho nahana hore mebuso ea batho e ka finyella sena ke ho ithetsa. Lithuto tsa histori li lumellana le ’nete ena ea Bibele: “Motho ea tsamaeang a ke ke a lokisa lika tsa hae.”—Jeremia 10:23.
Ke feela ’Mōpi ea matla oa bokahohleng, Jehova Molimo, ea ka tlisang khotso e sa feleng. O tšepisitse hore o tla etsa joalo. Joang? E seng ka boiteko ba motho empa ka seo Jesu Kreste a se entseng sehlooho sa lithuto tsa hae kaofela—’Muso oa leholimo oa Molimo. (Mattheu 6:9, 10) ’Musi oa ’Muso oo, Kreste Jesu, boprofeteng o bitsoa “Morena oa khotso” oa ’nete. (Esaia 9:6) Molimo o tšepisa hore taolong ea ’Muso oo ho tla ba le “khotso e khōlō” lefatšeng lohle.—Pesaleme ea 72:7, NW.
Leha ho le joalo, Bibele e bontša ka ho hlakileng hore pele sena se etsahala, tsamaiso ea hona joale ea lintho e khopo e lokela ho felisoa. (1 Johanne 2:15-17) ’Me boprofeta ba Bibele bo bontša hore timetso ea tsamaiso ena e haufi haholo.—Mattheu 24:3-14, 22, 34; Luka 21:25-28; 1 Timothea 3:1-5.
Kahoo, oona ke morero o sa fetoheng oa Molimo “o sa thetseng.” (Tite 1:2) Na baetapele ba bolumeli, haholo-holo ba Bokreste-’mōtoana, ba rapetse tumellanong le morero oo? Na ba sebelelitse morero oo? Ha ho lea mong ho baemeli bao ba bolumeli Assisi, ea boletseng hore tsamaiso ena e haufi le ho felisoa esita le ho tla ha puso ea ’Muso oa Molimo, molaetsa oa motheo oa Jesu le Lentsoe la Molimo.
Sena ha se makatse hobane malumeli ao ha a ruta balateli ba ’ona ’nete ka merero ea Molimo. Ho e-na le hoo, ke karolo ea lefatše lena le tlas’a Satane, ’me boiteko ba bona ke ho le tšehetsa. Ka lebaka leo, batho ba bona ba arohane, ba bua haholo ka bochaba, ho e-na le ’Muso oa Molimo. Hona ho ba entse hore ba bolaeane lintoeng tsa lefatše lena. Ka hona, mantsoe ana a sebetsa hantle ho malumeli a joalo: “Banna le basali ba bafebi, hleka ha le tsebe hoba ho rata lefatše ke ho loantša Molimo na?”—Jakobo 4:4.
Kahoo, boipiletso ba khotso bo etsoang ke malumeli ana bo oela litsebeng tse sa utloeng. Ba re hopotsa boemo ba mehleng ea moprofeta Jeremia. Nakong eo, baprofeta ba bolumeli ba bohata ba ile ba re: “Khotso! Khotso!” Empa, bonneteng, “ha ho khotso” bakeng sa bona.—Jeremaia 6:14.
Mosebetsi oa ho Ruta Lefatšeng Lohle
Morero oa Molimo o tla phethahala. (Esaia 55:11) Kajeno mosebetsi oa lefatše lohle oa thuto ea Bibele o tsoela pele. Sena se tumellanong le boprofeta ba Mattheu 24:14, NW, bo reng: “’Me litaba tsena tse molemo tsa ’muso li tla boleloa lefatšeng lohle le ahiloeng e be bopaki ho lichaba tsohle; ’me e tla ba hona bofelo bo hlahang.”
Bao e leng karolo ea mokhatlo ’ona oa lefatše lohle oa barapeli ba ’nete ba ikokobeletsa melao ea Molimo, ’me ba lahlile tšusumetso e arolang ea bochaba. Ke mokhatlo o nang le khotso oa batho ba ratanang, ba phelelang ’Muso oa Molimo. Ka lebaka leo, ba phethahatsa boprofeta bo hlollang ba Mikea 4, bo reng:
“Mehleng ea bofelo, thaba ea ntlo ea Jehova [borapeli ba hae ba ’nete] e tla be e theoe qhooeng tsa lithaba, e okamele maralla [mefuta eohle ea bolumeli], ’me lichaba li tla phallela teng. Lichaba tse ngata li tla ea, li re: Tlong, re nyolohele thabeng ea Jehova, tlung ea Molimo oa Jakobo, a tle a re rute litsela tsa hae, re tsamaee ka ’mila oa hae. . . . Ka lisabole tsa bona ba tla tea mehoma, ka marumo a bona ba tee lisekele; sechaba se seng se ke ke sa hlola se tsohela sechaba se seng ka lerumo, ha ba sa tla hlola ba ithuta ntoa.”—Mikea 4:1-3.
Ho hlakile hantle hore boprofeta bona bo ne bo ke ke ba phethahatsoa ke seboka sa Assisi. Batho ba phallelang thabeng ea tšoantšetso ea borapeli bo hloekileng ke batho ba rutiloeng ka litsela tsa Jehova tsa khotso le lerato ’me ba tsamaea tumellanong le morero le litlhokahalo tsa hae. Ha se batho ba khomaretseng bolumeli ba bona ba pele, ba arotsoeng ke lithuto tse loantšanang. Ho ena le hoo, ba bokelloa ’moho joalokaha Mikea 2:12 e profetile: “Ke tla ba bea hammoho joalo ka linku tse har’a lesaka, joale ka mohlape o har’a makhulo.”
Phello ea mosebetsi ona oa ho ruta ke ho etsoa ha batho ba fetang limillione tse tharo lefatšeng lohle baboleli ba “litaba tse molemo tsa ’muso.” Ke batho ba nang le khotso, ’me tlas’a maemo leha e le afe ba ke ke ba bolaea batho ’moho le bona. Joalokaha Mikea a profetile, ba se ba teile “lisabole tsa bona mehoma . . . ha ba sa tla hlola ba ithuta ntoa.” ’Me batho ba bang ba limillione ba khahlehang lefatšeng lohle ba rutoa ke bona.
Lipaki tsa Jehova li lebelletse lefatše le lecha le kopaneng moo Mikea 4:4 e tla phethahatsoa ho batho bohle: “Ba tla lula e mong le e mong ka tlas’a feiga ea hae le ka tlas’a morara oa hae, ho se ea ba tšosang, hobane molomo oa Jehova oa makhotla [a leholimo] o boletse.” Hape, temaneng ea 5, Mikea o bontša phapang mahareng a ba rapelang melimo e mengata ea bohata le ba rapelang Molimo o le mong oa ’nete, o re: “Hobane lichaba kaofela li tsamaea se seng le se seng ka lebitso la molimo oa sona, empa rōna, re tla tsamaea ka lebitso la Jehova, Molimo oa rōna, ka mehla le mehla.” Ke ho hlakileng hore, lebitso la Molimo ha lea ka la boleloa Assisi. Leha ho le joalo, na u rata ho ithuta ka Molimo ’ona oa Bibele? Lipaki tsa Jehova li tla thabela ho u thusa ho etsa sena.
[Setšoantšo se leqepheng la 12]
Ke bomang bao ka ’nete ba teileng lisabole tsa bona mehoma?