“Matsoho a Hao a se ke a Tepella”
“Matsoho a hao a se ke a tepella! Jehova, Molimo oa hao, o ka hare ho uena; ke mohale ea pholosang.”—SOFONIA 3:16, 17.
1. Setsebi se seng sa Bibele se ile sa re’ng mabapi le boprofeta ba Sofonia?
BOPROFETA ba Sofonia bo ne bo fetela ka ’nģane ho phethahatso ea bona ea lekholong la bosupa le la botšelela la lilemo B.C.E. Tlhalosong ea hae ea Sofonia, Moprofesa C. F. Keil o ile a ngola: “Boprofeta ba Sofonia . . . ha bo qale feela ka phatlalatso ea kahlolo e akaretsang ea lefatše lohle, leo kahlolo e tla oela holim’a Juda ka lebaka la libe tsa eona e tsoang ho lona, le holim’a lichaba ka lebaka la bora ba tsona ho batho ba Jehova; empa bo sebetsa ho pholletsa le letsatsi la Jehova le leholo le tšabehang.”
2. Ke ho tšoana hofe ho leng teng pakeng tsa boemo ba mehleng ea Sofonia le boemo bo ka har’a Bokreste-’mōtoana kajeno?
2 Kajeno, qeto ea Jehova ea boahloli ke ho bokellela lichaba timetso ka tekanyo e fetang ea mehleng ea Sofonia hōle. (Sofonia 3:8) Lichaba tseo tse ipolelang hore ke tsa Bokreste li molato ka ho khetheha mahlong a Molimo. Joalokaha Jerusalema e ile ea otloa haboima ka lebaka la ho se tšepahale ha eona ho Jehova, ka ho tšoanang Bokreste-’mōtoana bo tlameha ho ikarabella ho Molimo bakeng sa mekhoa ea bona ea boitšoaro bo litšila ka ho feletseng. Likahlolo tsa bomolimo tse ileng tsa phatlalatsoa khahlanong le Juda le Jerusalema mehleng ea Sofonia li sebetsa ka matla a eketsehileng likerekeng le lihlopheng tsa bokhelohi tsa Bokreste-’mōtoana. Hape li silafalitse borapeli bo hloekileng ka lithuto tsa tsona tsa bolumeli tse hlomphollang Molimo, tse ngata li simolohile boheteneng. Li entse bara ba tsona ba limilione ba phelang hantle ’meleng sehlabelo aletareng ea kajeno ea ntoa. Ho feta moo, baahi ba Jerusalema e tšoantšetsoang ke ea boholo-holo ba kopanya seo ho thoeng ke Bokreste le bolepi ba linaleli, mekhoa ea ho sebelisana le meea le boitšoaro bo bobe ba likamano tsa botona le botšehali, e leng lintho tse amanang le borapeli ba Baale.—Sofonia 1:4, 5.
3. Ho ka thoe’ng ka baeta-pele ba bangata ba lefatše le mebuso ea lipolotiki kajeno, ’me Sofonia o ile a profeta eng?
3 Baeta-pele ba bangata ba lipolotiki ba Bokreste-’mōtoana ba rata ho hlahella ka kerekeng. Empa joaloka “marena” a Juda, bongata ba bona bo tlatlapa batho joaloka “litau tse rorang” le “liphiri” tse meharo. (Sofonia 3:1-3) Lithoto tsa lipolotiki tse latelang batho ba joalo ‘li tlatsa ntlo ea morena oa bona ka tse hapiloeng ka bohoroso le ka thetso.’ (Sofonia 1:9) Tjotjo le tšenyeho li atile. Ha e le mebuso ea lipolotiki ka hare le ka ntle ho Bokreste-’mōtoana, palo ea eona e ntseng e hōla e ‘ikhohomosetsa’ batho ba Jehova oa makhotla, Lipaki tsa hae, e li tšoara joaloka “sehlopha sa bokhelohi.” (Sofonia 2:8; Liketso 24:5, 14, NW) Sofonia o ile a profeta tjena mabapi le baeta-pele bohle ba joalo ba lipolotiki le balateli ba bona: “Leha e le silefera ea bona, leha e le khauta ea bona, li ke ke tsa tseba ho ba namolela tsatsing la khalefo ea Jehova; ’me ka mollo oa poulelo ea hae, lefatše lohle le tla chesoa, hobane o tla felisa, a be a timeletse baahi bohle ba lefatše ka sehlōhō.”—Sofonia 1:18.
‘Ho Patoa Letsatsing la Bohale ba Jehova’
4. Ke’ng se bontšang hore ho tla ba le baphonyohi ba letsatsi la Jehova le leholo, empa ba tlameha ho etsa’ng?
4 Hase baahi bohle ba Juda ba ileng ba timetsoa lekholong la bosupa la lilemo B.C.E. Ka ho tšoanang, ho tla ba le bapholohi ba letsatsi le leholo la Jehova. Jehova o ile a bua le ba joalo tjena ka moprofeta oa hae Sofonia: “Ha ho e-so ho tle letsatsi leo joalo ka mooko o fefoloang, ha ho e-so ho tle holim’a lōna ho tuka ha bohale ba Jehova, ha le e-so ho tle ho lōna, tsatsi la bohale ba Jehova! Batlang Jehova, baikokobetsi bohle ba lefatše, ba etsang ka taelo ea hae; batlang ho lōka, le batle boikokobetso; ekaba le ka tšoha le patoa tsatsing la bohale ba Jehova.”—Sofonia 2:2, 3.
5. Nakong ena ea bofelo, ke bo-mang bao e bileng ba pele ba ho ela hloko temoso ea Sofonia, ’me Jehova o ba sebelisitse joang?
5 Nakong ena ea bofelo ba lefatše, ba pele ba ileng ba ela hloko memo ea boprofeta e bile masala a Iseraele oa moea, Bakreste ba tlotsitsoeng. (Ba-Roma 2:28, 29; 9:6; Ba-Galata 6:16) Kaha ba batlile ho loka le boikokobetso ba bile ba hlomphile liqeto tsa Jehova tsa boahloli, ba ile ba lokolloa Babylona e Moholo, ’muso oa lefatše oa bolumeli ba bohata, ’me ba buselitsoe mohaung oa bomolimo ka 1919. Ho tloha ka nako eo, ’me haholo-holo ho tloha ka 1922, masala ana a tšepahalang a ’nile a bolela likahlolo tsa Jehova a sa tšabe khahlanong le likereke le lihlopha tsa bokhelohi tsa Bokreste-’mōtoana le khahlanong le lichaba tsa lipolotiki.
6. (a) Sofonia o ile a profeta eng mabapi le masala a tšepahalang? (b) Boprofeta boo bo phethahalitsoe joang?
6 Sofonia o ile a profeta tjena ka masala ana a tšepahalang: “Ke tla siea ka hare ho uena sechaba se kokobetseng, se fokolang, ’me ba tla tšepa lebitso la Jehova. Masala a Iseraele a ke ke a etsa bokhopo, a ke ke a bolela leshano, leleme la bohata le ke ke la fumanoa melomong ea bona; ba tla fula, ba ee ba bothe, ho se ea ba tšosang!” (Sofonia 3:12, 13) Bakreste bana ba tlotsitsoeng kamehla ba ’nile ba tumisa lebitso la Jehova, empa sena ba se entse haholo-holo ho tloha ka 1931, ha ba ne ba amohela lebitso la Lipaki tsa Jehova. (Esaia 43:10-12) Ka ho totobatsa taba ea bobusi ba Jehova, ba hlomphile lebitso lena la Molimo, ’me sena se ipakile e le setšabelo ho bona. (Liproverbia 18:10) Jehova o ba fepile haholo moeeng, ’me ba lula ntle ho tšabo paradeiseng ea moea.—Sofonia 3:16, 17.
‘Ho Tuma le ho Rorisoa Har’a Lichaba Tsohle’
7, 8. (a) Ke boprofeta bofe hape bo phethahalitsoeng ho masala a Iseraele oa moea? (b) Batho ba limilione ba se ba hlokometse eng, ’me uena ka bouena u ikutloa joang mabapi le see?
7 Ho khomarela ka tieo ha masala lebitso la Jehova le melao-motheo e lokileng ea Lentsoe la hae ha hoa hlokomolohuoa. Batho ba tšepahalang ba se ba hlokometse phapang pakeng tsa boitšoaro ba masala le tšenyeho le boikaketsi tsa baeta-pele ba lefatše lena ba lipolotiki le ba bolumeli. Jehova o hlohonolofalitse “masala a Iseraele [oa moea].” O a hlomphile ka tokelo ea ho jara lebitso la hae, ’me o entse hore a be le botumo bo botle har’a lichaba tsa lefatše. Ho bile joalokaha Sofonia a profetile: “Nakong eo, ke tla le tlisa, ke le bokelle nakong eo; hobane ke tla le etsa ba tumileng le ba rorisoang har’a lichaba tsohle tsa lefatše, mohla ke khutlisang baholehuoa ba lōna pel’a mahlo a lōna, ho bolela Jehova.”—Sofonia 3:20.
8 Ho tloha ka 1935, batho ba limilione ba hlokometse hore Jehova o hlile o hlohonolofatsa masala. Ka thabo ba latela Bajode bana ba moea, kapa Baiseraele, ba re: “Re tla ea le lōna, hobane re utloile hoba Jehova o na le lōna.” (Zakaria 8:23) “Linku tse ling” tsena li hlokomela masala a tlotsitsoeng e le “mohlanka ea khabane, ea bohlale,” ea khethiloeng ke Kreste ho ba “moalosi oa mesebetsi ea hae [ea lefatšeng] kaofela.” Ka thabo li ja lijo tseo sehlopha sa mohlanka se li lokiselitseng “nakong ea teng.”—Johanne 10:16; Mattheu 24:45-47.
9. Batho ba limilione ba ithutile ho bua ‘puo’ efe, ’me linku tse ling tse sebeletsang “mahetla a bapile” le masala a batlotsuoa li etsa mosebetsi ofe o moholo?
9 Linku tsena tse ling tse limilione hammoho le masala, li ithuta ho phela le ho bua tumellanong le ‘puo e hloekileng.’a Jehova o ile a profeta ka Sofonia: “Nakong eo ke tla neha lichaba hore li fetohele puong e hloekileng, e le hore kaofela ha tsona li ka ipiletsa lebitsong la Jehova, e le hore li tle li mo sebeletse mahetla a bapile.” (Sofonia 3:9, NW) E, linku tse ling li sebeletsa Jehova ka kutloano “mahetla a bapile” le litho tse tlotsitsoeng tsa “mohlatsoana” mosebetsing o potlakileng oa ho bolela “Evangeli ena ea ’muso . . . e tle e be bopaki ho lichaba tsohle.”—Luka 12:32; Mattheu 24:14.
“Letsatsi la Jehova le Tla Tla”
10. Masala a batlotsuoa kamehla a ’nile a kholiseha ka eng, ’me, e le sehlopha a tla phelela ho bona eng?
10 Masala a tlotsitsoeng kamehla a ’nile a hopola polelo e bululetsoeng ea moapostola Petrose: “Morena ha a liehise lipallo tsa hae, joalo ka ha ba bang ba lekanya hobane tieho e teng; empa o sa mameletse ka baka la rōna; hobane ha a rate ha ba bang ba ka timela, empa o rata hore bohle ba finyelle pakong. Letsatsi la [Jehova, NW] lona le tla tla ka mokhoa oa lesholu.” (2 Petrose 3:9, 10) Litho tsa sehlopha sa mohlanka ea khabane le ka mohla ha lia ka tsa e-ba le pelaelo mabapi le ho tla ha letsatsi la Jehova mehleng ea rōna. Letsatsi leo le leholo le tla qala ka ho phethahatsoa ha likahlolo tsa Molimo khahlanong le Bokreste-’mōtoana, bo tšoantšelitsoeng ka Jerusalema, le karolo e setseng ea Babylona e Moholo.—Sofonia 1:2-4; Tšenolo 17:1, 5; 19:1, 2.
11, 12. (a) Ke karolo efe e ’ngoe ea boprofeta ba Sofonia e phethahalitsoeng ho masala? (b) Masala a batlotsuoa a etse hloko joang taelo ee, “Matsoho a hao a se ke a tepella”?
11 Masala a tšepahalang a thabela hore ebe ka 1919 a ile a lokolloa botlamuoeng ba moea ba Babylona e Moholo, ’muso oa lefatše oa bolumeli ba bohata. Ba latsoitse phethahatso ea boprofeta ba Sofonia: “Luluetsa ka thabo, morali oa Sione! Iseraele, u hlabe litlatse! U thabe, u be u nyakalle ka pelo eohle, uena morali oa Jerusalema! Jehova o tlositse likahlolo tsa hao, o fietse eo e leng sera ho uena; morena oa Iseraele, Jehova, o ka hare ho uena: ha u sa tla hlola u bona bobe. Tsatsing leo, ho tla thoe ho Jerusalema: Sione, u se ke ua tšaba! matsoho a hao a se ke a tepella! Jehova, Molimo oa hao, o ka hare ho uena; ke mohale ea pholosang.”—Sofonia 3:14-17.
12 Kaha masala a tlotsitsoeng a ne a kholisehile a bile a e-na le bopaki bo bongata ba hore Jehova o har’a ’ona, a ile a tsoela pele ho phethahatsa thōmo ea ’ona ea bomolimo a sa tšabe. A boletse litaba tse molemo tsa ’Muso ’me a tsebahalitse likahlolo tsa Jehova khahlanong le Bokreste-’mōtoana, karolo e setseng ea Babylona e Moholo, le tsamaiso eohle ea lintho ea Satane e khopo. Har’a mathata a mefuta eohle, ho theosa le mashome a lilemo ho tloha ka 1919, a utloile taelo ea bomolimo: “Sione, u se ke ua tšaba! matsoho a hao a se ke a tepella!” Ha aa khoehlisa ho abeng lipampitšana, limakasine, libuka le libukana tse limilione tse likete, tse tsebahatsang ’Muso oa Jehova. E bile mohlala o matlafatsang tumelo ho linku tse ling tseo, ho tloha ka 1935, li ’nileng tsa bokana ka lehlakoreng la ’ona.
“Matsoho a Hao a se ke a Tepella”
13, 14. (a) Ke hobane’ng ha Bajode ba bang ba ile ba khaotsa ho sebeletsa Jehova, ’me see se ile sa bonahala joang? (b) Ke’ng seo e neng e tla ba bothoto hore re se etse, ’me re lokela hore matsoho a rōna a se ke a tepella mosebetsing ofe?
13 Ha re ‘ntse re lebeletse’ letsatsi la Jehova le leholo, re ka fumana thuso e sebetsang joang boprofeteng ba Sofonia? Taba ea pele, re lokela ho itebela khahlanong le ho tšoana le Bajode ba mehleng ea Sofonia ba ileng ba qoba ho latela Jehova hobane ba ile ba ba le lipelaelo ka bohaufi ba letsatsi la Jehova. Bajode ba joalo ha baa ka ba hla ba bontša lipelaelo tsa bona phatlalatsa, empa tsela eo ba neng ba etsa lintho ka eona e ne e senola hore ha e le hantle ba ne ba sa lumele hore letsatsi la Jehova le leholo le ne le le haufi. Ba ile ba ameha haholo ka ho bokella leruo ho e-na le ho lula ba lebeletse Jehova.—Sofonia 1:12, 13; 3:8.
14 Kajeno hase nako ea ho lumella lipelaelo hore li mele ka metso lipelong tsa rōna. E ne e tla ba booatla bo boholo haeba likelellong le lipelong tsa rōna re chechisetsa ho tla ha letsatsi la Jehova morao. (2 Petrose 3:1-4, 10) Re lokela ho qoba ho khaotsa ho latela Jehova kapa ho ‘lumella matsoho a rōna hore a tepelle’ tšebeletsong ea hae. Sena se akarelletsa ho se sebetse ka “letsoho le botsoa” ha re bolela “Evangeli.”—Liproverbia 10:4; Mareka 13:10.
Ho Loantša Boiphapanyo
15. Ke’ng se ka etsang hore re khoehlise tšebeletsong ea Jehova, ’me bothata boo bo ile ba boleloa joang esale pele boprofeteng ba Sofonia?
15 Taba ea bobeli, re lokela ho itebela khahlanong le litšusumetso tse fokolisang tsa ho iphapanya. Linaheng tse ngata tsa Bophirimela, ho se thahaselle lintho tsa moea e ka ba mohloli oa ho nyahama har’a baboleli ba bang ba litaba tse molemo. Ho iphapanya ho joalo ho ne ho le teng mehleng ea Sofonia. Ha a bua ka moprofeta oa hae, Jehova o ile a re: ‘Ke tla khalemela banna bao ba reng pelong tsa bona: Jehova ha a na ho etsa hantle, leha e le ho etsa hampe.’ (Sofonia 1:12) A. B. Davidson ha a ngola mabapi le temana ena ho Cambridge Bible for Schools and Colleges, o ile a bontša hore e bua ka batho ba “tetebetseng boiphapanyong boo ho bona ba sa ikutloeng kapa hona ho hlokeng tumelo ea hore matla a phahameng a ka kenella ka mokhoa leha e le ofe litabeng tsa moloko oa batho.”
16. Ke boemo bofe ba kelello bo leng teng lithong tse ngata tsa likereke tsa Bokreste-’mōtoana, empa Jehova o re fa khothatso efe?
16 Ho iphapanya ke boitšoaro bo leng teng kajeno likarolong tse ngata tsa lefatše, haholo-holo lichabeng tse ruileng haholoanyane. Esita le litho tsa likereke tsa Bokreste-’mōtoana ha li hlile ha li lumele hore Jehova Molimo o tla kenella litabeng tsa batho mehleng ea rōna. Ba qhela boiteko ba rōna ba ho ba finyella ka litaba tse molemo tsa ’Muso ka ho bososela ho bontšang ho belaela kapa ka ho araba ka bokhutšoanyane: “Ha ke thahaselle!” Tlas’a maemo ana, ho mamella mosebetsing oa ho paka e ka ba phephetso ea sebele. Sena se leka mamello ea rōna. Empa Jehova o matlafatsa batho ba tšepahalang ka boprofeta ba Sofonia, a re: “Matsoho a hao a se ke a tepella! Jehova, Molimo oa hao, o ka hare ho uena; ke mohale ea pholosang. O tla u thabela ka thabo e kholo, a be a khutse ka baka la lerato la hae; o tla u nyakallela ka meluluetsa.”—Sofonia 3:16, 17.
17. Ba bacha ’neteng har’a linku tse ling ba lokela ho latela mohlala ofe o motle, hona joang?
17 Ke ’nete historing ea kajeno ea batho ba Jehova hore masala, esita le ba hōlileng har’a linku tse ling, ba finyeletse mosebetsi o moholo haholo oa ho bokella mehleng ena ea qetello. Bakreste bana bohle ba tšepahalang ba bontšitse mamello ho theosa le mashome a lilemo. Ha ba lumelle ho iphapanya ha ba bangata Bokreste-’mōtoaneng hore ho ba nyahamise. Ka hona e se eka ba bacha ’neteng har’a linku tse ling ba ke ke ba itumella ho nyahamisoa ke ho iphapanyetsa lintho tsa moea ho atileng hakana kajeno linaheng tse ngata. E se eka ba ke ke ba lumella ‘matsoho a bona ho tepella,’ kapa ho khoehlisa. E se eka ba ka sebelisa monyetla o mong le o mong bakeng sa ho aba Molula-Qhooa, Tsoha! le lingoliloeng tse ling tse ntle tseo ka ho khetheha li etselitsoeng ho thusa batho ba kang linku ho ithuta ’nete mabapi le letsatsi la Jehova le litlhohonolofatso tse tla latela.
Tsoelang Pele ha le Ntse le Letetse Letsatsi le Leholo!
18, 19. (a) Re fumana khothatso efe ea ho mamella ho Mattheu 24:13 le ho Esaia 35:3, 4? (b) Re tla hlohonolofatsoa joang ha re tsoela pele re kopane tšebeletsong ea Jehova?
18 Jesu o itse: “Empa ea tiisetsang ho fihlela qetellong, ke eena ea tla bolokeha.” (Mattheu 24:13) Ka hona, ha re na “matsoho a tepeletseng” kapa “mangole a tetemang” ha re ntse re letetse letsatsi la Jehova le leholo! (Esaia 35:3, 4) Boprofeta ba Sofonia bo bua tjena ka tsela e kholisang mabapi le Jehova: “Ke mohale ea pholosang.” (Sofonia 3:17) E, Jehova o tla boloka “bongata bo boholo” ho pholletsa le karolo ea ho qetela ea ‘mahlomola a maholo,’ ha a laela Mora oa hae ho tsekolla lichaba tsa lipolotiki tse tsoelang pele li ‘ikhohomosetsa’ batho ba hae.—Tšenolo 7:9, 14; Sofonia 2:10, 11; Pesaleme ea 2:7-9.
19 Ha letsatsi la Jehova le leholo le ntse le atamela, e se eka re ka tsoela pele ka cheseho, re mo sebeletsa “mahetla a bapile”! (Sofonia 3:9, NW) Ka ho etsa joalo, rōna ka borōna le ba bang ba se nang palo re tla behoa boemong ba ho “patoa tsatsing la bohale ba Jehova” ’me re bone ka mahlo ha lebitso la hae le halalelang le halaletsoa.
[Mongolo o botlaaseng ba leqephe]
a Bakeng sa puisano e feletseng ea ‘puo e hloekileng,’ bona Molula-Qhooa oa April 1, 1991, maqepheng a 20-5 le May 1, 1991, maqepheng a 10-20.
Tlhahlobo
◻ Boemo ba bolumeli Bokreste-’mōtoaneng bo tšoana le ba mehleng ea Sofonia lintlheng life?
◻ Kajeno baeta-pele ba bangata ba lipolotiki ba tšoana le “marena” a lefatše a mehleng ea Sofonia joang?
◻ Ke litšepiso life tse ho Sofonia tse phethahalitsoeng ho masala?
◻ Batho ba limilione ba se ba hlokometse eng?
◻ Ke hobane’ng ha re sa lokela ho lumella matsoho a rōna ho tepella tšebeletsong ea Jehova?
[Litšoantšo tse leqepheng la 15]
Joaloka Sofonia, masala a tšepahalang a Bakreste ba tlotsitsoeng a ’nile a bolela likahlolo tsa Jehova a sa tšabe
[Litšoantšo tse leqepheng la 18]
“Linku tse ling” ha lia lumella ho iphapanya ha batho hore ho li nyahamise