‘Ratang ’Nete le Khotso’!
“Lentsoe la Jehova oa makhotla la ntlela, la re: . . . [Ratang, NW] ’nete le khotso.”—ZAKARIA 8:18, 19.
1, 2. (a) Tlaleho ea moloko oa batho ke efe mabapi le khotso? (b) Ke hobane’ng ha lefatše la kajeno le ka mohla le ke ke la e-ba le khotso?
“LE KA mohla lefatše ha le e-s’o be le khotso. Kae-kae—’me hangata e le libakeng tse ngata ka nako e le ’ngoe—kamehla ho ’nile ha e-ba le lintoa.” Ho boletse Moprofesa Milton Mayer oa Univesithi ea Massachusetts, U.S.A. Ke tlhaloso e bohloko hakaakang ea moloko oa batho! Ke ’nete hore batho ba ’nile ba batla khotso. Bo-ralipolotiki ba lekile mekhoa eohle ea ho e boloka, ho tloha ho Pax Romana ea mehleng ea Roma ho ea leanong la “Tiiso ea Hore ho ka Timetsanoa” nakong ea Ntoa ea Mantsoe. Leha ho le joalo, qetellong, boiteko bohle ba bona bo ile ba hlōleha. Joalokaha Esaia a ile a bontša makholong a mangata a lilemo a fetileng, “manģosa a khotso a lla habohloko.” (Esaia 33:7) Hobane’ng?
2 Ke hobane khotso e tšoarellang e lokela ho hlaha moo lehloeo le meharo li leng sieo; e tlameha ho thehoa ’neteng. Khotso e ke ke ea thehoa mashanong. Ke ka lebaka leo eitseng ha Jehova a ne a tšepisa Baiseraele ba boholo-holo tsosoloso le khotso a ileng a re: “Bonang, ke tla phallisa khotso ho eena joalo ka nōka.” (Esaia 66:12) Molimo oa tsamaiso ena ea lintho, Satane Diabolose, ke “’molai,” le “ea leshano, le ntate oa ea leshano.” (Johanne 8:44; 2 Ba-Korinthe 4:4) Lefatše le nang le molimo ea tjee le ka ba le khotso joang le ka mohla?
3. Jehova o file batho ba hae mpho efe e hlollang, ho sa tsotellehe ho phela ha bona lefatšeng le ferekaneng?
3 Leha ho le joalo, hoa hlolla hore ebe Jehova o fa batho ba hae khotso esita leha ba phela lefatšeng la Satane le tsekolotsoeng ke ntoa. (Johanne 17:16) Lekholong la botšelela la lilemo B.C.E., o ile a phethahatsa tšepiso ea hae ka Jeremia ’me a fa sechaba sa hae se khethehileng “khotso le ’nete” ha a ne a se khutlisetsa naheng ea habo sona. (Jeremia 33:6) ’Me mehleng ena ea qetello, o file batho ba hae “khotso le ’nete” ‘naheng’ ea bona, kapa sebakeng sa moea se lefatšeng, le hoja ba ’nile ba phela nakong e mpe ka ho fetisisa ea khathatso eo lefatše lena le bileng ho eona ho fihlela hona joale. (Esaia 66:8; Mattheu 24:7-13; Tšenolo 6:1-8) Ha re ntse re tsoela pele ka puisano ea rōna ea Zakaria khaolo ea 8, re tla ba le kananelo e tebileng haholoanyane ea khotso le ’nete tsena tseo Molimo a fanang ka tsona ’me re bone hore na re lokela ho etsa eng hore re lule re e-na le eona.
“Matsoho a Lōna a ke a Tiee”
4. Zakaria o ile a khothatsa Baiseraele hore ba itšoare joang e le hore ba be le khotso?
4 Ka lekhetlo la botšelela ho Zakaria khaolo ea 8, re utloa phatlalatso e thabisang e tsoang ho Jehova: “Ho itsoe ke Jehova oa makhotla: Matsoho a lōna a ke a tiee, lōna ba utloang mantsoe ana a tsoang melomong ea baporofeta tšiung tsena, e leng tseo ho theiloeng ka tsona ntlo ea Jehova oa makhotla, e leng tempele, hore e hahuoe. Hobane pele ho tšiu tseo, moputso oa motho o no o le sieo, le moputso oa phoofolo o no o le sieo, ’me ho ea eang le ho ea khutlang ho no ho se khotso ka baka la sera; ’me ke ne ke nehela batho bohle hore ba loantšane.”—Zakaria 8:9, 10.
5, 6. (a) Ka lebaka la ho nyahama ha Baiseraele, boemo e ile ea e-ba bofe Iseraeleng? (b) Jehova o ile a tšepisa Baiseraele phetoho efe haeba ba eteletsa borapeli ba hae pele?
5 Zakaria o ile a bua mantsoe ana ha tempele e ne e hahuoa bocha Jerusalema. Pele, Baiseraele ba neng ba tsoa Babylona ba ile ba nyahama ’me ba khaotsa mosebetsi oa ho haha tempele. Kaha ba ile ba lebisa tlhokomelo ea bona boiketlong ba bona, ha baa ka ba fumana tlhohonolofatso ea Jehova le khotso ea hae. Le hoja ba ile ba lema masimo a bona le ho hlaolela masimo a morara, ha baa ka ba atleha. (Haggai 1:3-6) Ho ne ho tšoana leha ba sebeletsa ‘moputso o sieo.’
6 Joale kaha tempele e ne e hahoa bocha, Zakaria o ile a khothaletsa Bajode hore ba “tiee,” le hore ka sebete ba eteletse borapeli ba Jehova pele. Ho ne ho tla etsahala eng haeba ba ne ba ile ba etsa joalo? “Joale, ho masala a sechaba sena, ha ke sa tla ba seo ke neng ke le sona tšiung tsa pele, ho bolela Jehova oa makhotla. Hobane peō ea khotso e tla ba teng; morara o tla beha litholoana tsa oona, lefatše le behe lijo tsa lona, leholimo le nee phoka ea lona, ’me ntho tseo tsohle ke tla li nea masala a sechaba sena, hore e be lefa la sona. Joalo ka ha le kile la ba thohako har’a lichaba, lōna ntlo ea Juda, le lōna ntlo ea Iseraele, ke tla le pholosa joalo, ’me le tla ba hlohonolofalo. Se tšoheng, matsoho a lōna a ke a tiee!” (Zakaria 8:11-13) Haeba Baiseraele ba ne ba tla nka bohato ka boikemisetso, ba ne ba tla atleha. Pejana, ha lichaba li ne li lakatsa ho supa mohlala oa thohako, li ne li ka supa Baiseraele. Joale Baiseraele e ne e tla ba mohlala oa tlhohonolofatso. Ke lebaka le letle hakaakang la hore ba ‘tiise matsoho a bona!’
7. (a) Batho ba Jehova ba fetile liphetohong life tse thabisang, tse fihlileng tlhōrong ea tsona selemong sa tšebeletso sa 1995? (b) Ha u sheba tlaleho ea selemo, ke linaha life tseo u bonang li e-na le tlaleho e hlollang ea bahoeletsi, bo-pula-maliboho le karolelano ea lihora?
7 Kajeno teng? Ha e le hantle, lilemong tsa pele ho 1919, batho ba Jehova ba ne ba batla ba haelloa ke cheseho. Ha baa ka ba nka boemo ba ho se jele pate ka ho feletseng ntoeng ea pele ea lefatše, ’me ba ile ba ba le tšekamelo ea ho latela motho ho e-na le Morena oa bona Jesu Kreste. Ka lebaka leo, ba bang ba ile ba nyahamisoa ke khanyetso e tsoang ka hare le kantle ho mokhatlo o hlophisitsoeng. Joale, ka 1919, ka thuso ea Jehova ba ile ba tiisa matsoho a bona. (Zakaria 4:6) Jehova o ile a ba fa khotso, ’me ba ile ba atleha haholo. Sena se bonoa tlalehong ea bona ea lilemo tse 75 tse fetileng, e fihlileng tlhōrong ea eona selemong sa tšebeletso sa 1995. E le sechaba, Lipaki tsa Jehova li phema bochaba, khethollo ea morabe, leeme le mehloli e meng eohle ea lehloeo. (1 Johanne 3:14-18) Li sebeletsa Jehova ka cheseho ea sebele tempeleng ea hae ea moea. (Ba-Heberu 13:15; Tšenolo 7:15) Selemong se fetileng feela, li ile tsa qeta lihora tse fetang limilione tse sekete li buisana le ba bang ka Ntate oa tsona oa leholimo! Khoeli e ’ngoe le e ’ngoe, li ile tsa khanna lithuto tsa Bibele tse 4 865 060. Ka karolelano tse 663 521 li ile tsa kopanela tšebeletsong ea bopula-maliboho khoeli e ’ngoe le e ’ngoe. Ha baruti ba Bokreste-’mōtoana ba batla ho fana ka mohlala oa batho ba chesehelang borapeli ba bona e le kannete, ka linako tse ling ba supa Lipaki tsa Jehova.
8. Mokreste ka mong a ka fumana molemo ‘peōng ea khotso’ joang?
8 Jehova o fa batho ba hae “peō ea khotso” ka lebaka la cheseho ea bona. Motho e mong le e mong ea hlaolelang peō eo o tla bona khotso e hōla ka pelong ea hae le bophelong ba hae. Mokreste e mong le e mong ea lumelang ea phehellang khotso le Jehova le Bakreste-’moho le eena o kopanela ’nete le khotso ea batho ba bitsoang ka lebitso la Jehova. (1 Petrose 3:11; bapisa le Jakobo 3:18.) Na seo ha se babatsehe?
“Se Tšoheng”
9. Jehova o ile a tšepisa phetoho efe litšebelisanong tsa hae le batho ba hae?
9 Joale re bala phatlalatso ea bosupa e tsoang ho Jehova. Ke efe? “Ho itsoe ke Jehova oa makhotla: Joalo ka ha ke ne ke hopole ho le etsa hampe, mohla bo-ntat’a lōna ba nkhalefisitseng, ho bolela Jehova oa makhotla, ’me ke sa kang ka fetoha, ke boetse ke hopotse matsatsing ana ho etsa Jerusalema le ntlo ea Juda hantle. Se tšoheng!”—Zakaria 8:14, 15.
10. Ke tlaleho efe ea Lipaki tsa Jehova e bontšang hore ha lia tšoha?
10 Le hoja ntoeng ea pele ea lefatše batho ba Jehova ba ne ba qhalane ka kutloisiso ea moea, ka lipelong tsa bona ba ne ba batla ho etsa se nepahetseng. Ka hona, Jehova, ka mor’a ho ba laea ka tsela e itseng, o ile a fetola tsela ea hae ea ho sebetsana le bona. (Malakia 3:2-4) Kajeno, re hetla morao ’me re mo leboha ka tieo ka seo a se entseng. Ruri, re ’nile ra “hlouoa ke lichaba tsohle.” (Mattheu 24:9) Ba bangata ba ’nile ba kenngoa literonkong, ’me ba bang ba bile ba shoetse tumelo ea bona. Hangata re tobana le boiphapanyo kapa bora. Empa ha rea tšoha. Rea tseba hore Jehova o matla ho feta khanyetso leha e le efe, e bonahalang kapa e sa bonahaleng. (Esaia 40:15; Ba-Efese 6:10-13) Re ke ke ra khaotsa ho ela hloko mantsoe ana: “U itšepele Jehova, u be matla, pelo ea hao e tiee! U itšepele Jehova.”—Pesaleme ea 27:14.
“Bolelang ’Nete e Mong le e Mong ho oa Habo”
11, 12. Re lokela ho hopola eng ka bomong e le hore re ka kopanela ka ho feletseng litlhohonolofatsong tseo Jehova a li fang batho ba hae?
11 E le hore re ka kopanela ka ho feletseng litlhohonolofatsong tse tsoang ho Jehova, ho na le lintho tseo re lokelang ho li hopola. Zakaria o re: “Tseo le tšoanetseng ho li etsa ke tsena: Bolelang ’nete e mong le e mong ho oa habo; ahlolang ka ’nete le ka kahlolo ea khotso makhotleng a lōna; le se ke la rerela banab’abo lōna kotsi pelong tsa lōna, le se ke la rata kano ea leshano; hobane tseo tsohle ke li hloile, ho bolela Jehova.”—Zakaria 8:16, 17.
12 Jehova o re phehella hore re bue ’nete. (Ba-Efese 4:15, 25) Ha a utloe lithapelo tsa ba rerang lintho tse kotsi, ba patang ’nete molemong oa bona oa botho, kapa ba etsang likano tsa leshano. (Liproverbia 28:9) Kaha o hloile bokoenehi o rata hore re khomarele ’neteng ea Bibele. (Pesaleme ea 25:5; 2 Johanne 9-11) Ho feta moo, joaloka banna ba hōlileng likeiting tsa motse Iseraeleng, baholo ba sebetsanang le linyeoe tsa boahloli ba lokela ho theha keletso le liqeto tsa bona ’neteng ea Bibele, e seng maikutlong a botho. (Johanne 17:17) Jehova o batla hore ba batle “kahlolo ea khotso,” joaloka balisa ba Bakreste, ba leke ho tsosolosa khotso lipakeng tsa mahlakore a loantšanang le ho thusa baetsalibe ba bakileng hore ba boele ba be le khotso le Molimo. (Jakobo 5:14, 15; Juda 23) Ka nako e tšoanang, ba boloka khotso ea phutheho ka hore ka sebete ba leleke ba senyang khotso eo ka ho phehella ho etsa liphoso ka boomo.—1 Ba-Korinthe 6:9, 10.
“Thabo le Nyakallo”
13. (a) Zakaria o ile a profeta phetoho efe mabapi le ho itima lijo? (b) Ke ho itima lijo hofe ho neng ho etsoa Iseraeleng?
13 Joale, re utloa phatlalatso ea borobeli e tiileng: “Ho itsoe ke Jehova oa makhotla: Ho itima lijo ha khoeli ea bone, le ho itima lijo ha ea bohlano, le ho itima lijo ha ea bosupa, le ho itima lijo ha ea leshome, ho tla fetohela ntlo ea Juda thabo le nyakallo le mekete e metle; feela, [ratang, NW] ’nete le khotso.” (Zakaria 8:18, 19) Tlas’a Molao oa Moshe, Baiseraele ba ne ba itima lijo Letsatsing la Lipheko ka morero oa ho bontša ho soabela libe tsa bona. (Levitike 16:29-31) Ho itima lijo ka makhetlo a mane ho boletsoeng ke Zakaria ho bonahala ho ne ho etsoa ka morero oa ho llela liketsahalo tse amanang le tlhōlo le timetso ea Jerusalema. (2 Marena 25:1-4, 8, 9, 22-26) Leha ho le joalo, ka nako eo tempele eo e ne e hahuoa bocha ’me Jerusalema e ile ea boela ea e-ba le baahi. Ho siama ho ne ho fetoha thabo, ’me ho itima lijo ho ne ho ka fetoha linako tsa mekete.
14, 15. (a) Mokete oa Sehopotso e ne e le mohloli o moholo oa thabo ka tsela efe, ’me see se lokela ho re hopotsa eng? (b) Joalokaha ho bonoa tlalehong ea selemo, ke linaha life tse bileng le palo e ikhethang ea ba bileng teng Sehopotsong?
14 Kajeno, ha re boloke ho itima lijo hoo Zakaria a ho boletseng leha e le ho laetsoeng Molaong. Kaha Jesu o nehetse bophelo ba hae bakeng sa libe tsa rōna, re thabela litlhohonolofatso tsa Letsatsi la Lipheko le leholoanyane. Re tšoareloa libe tsa rōna, e seng karolo e itseng feela ea tsona, empa ka ho feletseng. (Ba-Heberu 9:6-14) Ho latela taelo ea Moprista ea Phahameng oa leholimo, Jesu Kreste, re keteka Sehopotso sa lefu la hae e le oona feela mokete o ketekoang ke Bakreste. (Luka 22:19, 20) Na ha re be le “thabo le nyakallo” ha re bokana hammoho selemo ka seng bakeng sa mokete oo?
15 Selemong se fetileng, ba 13 147 201 ba ile ba bokana hammoho ho keteka Sehopotso, ba fetang ba bileng teng ka 1994 ka ba 858 284. Ke letšoele le lekaakang! Nahana ka thabo e neng e le ka liphuthehong tsa Lipaki tsa Jehova tse 78 620 ha ba bangata ka ho sa tloaelehang ba ne ba phallela Liholong tsa tsona tsa ’Muso bakeng sa mokete ona. Ruri, bohle ba neng ba le teng ba ile ba susumeletseha ho ‘rata ’nete le khotso’ ha ba hopola lefu la eo e leng “tsela, le ’nete, le bophelo” le eo hona joale a busang e le “Morena oa khotso” ea ka sehloohong oa Jehova! (Johanne 14:6; Esaia 9:6) Mokete oo o bile le moelelo o khethehileng ho ba neng ba o keteka linaheng tse hlasetsoeng ke pherekano le ntoa. Ka 1995 baena ba rōna ba bang ba bone matšabeho ao ba sitoang ho a hlalosa. Ho ntse ho le joalo, ‘khotso ea Molimo, e fetisang kutloisiso eohle, e ile ea boloka lipelo tsa bona le mehopolo ea bona ho Jesu Kreste.’—Ba-Filippi 4:7.
‘A re Rapeleng Sefahleho sa Jehova’
16, 17. Batho ba lichaba ba ka “rapela sefahleho sa Jehova” joang?
16 Leha ho le joalo, limilione tseo kaofela tse bileng teng Sehopotsong li ne li e-tsoa hokae? Phatlalatso ea Jehova ea borobong ea hlalosa: “Ho itsoe ke Jehova oa makhotla: Ho sa tla tla lichaba le baahi ba metse e mengata; baahi ba motse o mong ba tla ea ho ba o mong, ba ntse ba re: A re eeng! re eeng ho rapela sefahleho sa Jehova le ho batla Jehova oa makhotla! le rōna, re tla ea! Lichaba tse ngata le merabe e matla e tla tla ho batla Jehova oa makhotla Jerusalema, le ho rapela sefahleho sa Jehova.”—Zakaria 8:20-22.
17 Batho ba neng ba le teng Sehopotsong ba ne ba “batla Jehova oa makhotla.” Bongata ba bona e ne e le bahlanka ba hae ba inehetseng le ho kolobetsoa. Ba bang ba limilione ba neng ba le teng ba ne ba e-s’o fihle boemong boo. Linaheng tse ling ba neng ba le teng Sehopotsong ba ne ba mena palo ea bahoeletsi ba ’Muso hane kapa hahlano. Bana ba bangata ba thahasellang ba hloka thuso e le hore ba ka hatela pele. A re ba ruteng ho nyakallisoa ke ho tseba hore Jesu o shoetse libe tsa rōna ’me hona joale oa busa ’Musong oa Molimo. (1 Ba-Korinthe 5:7, 8; Tšenolo 11:15) ’Me re ba khothaletse ho inehela ho Jehova Molimo le ho ikokobeletsa Morena oa hae ea khethiloeng. Ka tsela ena ba tla “rapela sefahleho sa Jehova.”—Pesaleme ea 116:18, 19; Ba-Filippi 2:12, 13.
“Banna ba Leshome ba Lipuo Tsohle Tsa Lichaba”
18, 19. (a) Phethahatsong ea Zakaria 8:23, ‘Mojode’ ke mang kajeno? (b) “Banna ba leshome” ba ‘itšoarellang ka moseho oa kobo ea monna oa Mojode’ ke bo-mang kajeno?
18 Ka lekhetlo la ho qetela khaolong ea borobeli ea Zakaria, rea bala: ‘Ho itsoe ke Jehova oa makhotla: Tšiung tseo, banna ba leshome ba lipuo tsohle tsa lichaba ba tla itšoarella ka moseho oa kobo ea monna oa Mojode, ba re: Re tla ea le lōna, hobane re utloile hoba Jehova o na le lōna.’ (Zakaria 8:23) Mehleng ea Zakaria, Baiseraele ba tlhaho e ne e le sechaba sa Molimo se khethiloeng. Leha ho le joalo, lekholong la pele la lilemo, Baiseraele ba ile ba hana Messia oa Jehova. Ka hona, Molimo oa rōna o ile a khetha ‘Mojode’—Iseraele e mocha—e le sechaba sa hae se khethehileng, “Iseraele oa Molimo” e entsoeng ka Bajode ba moea. (Ba-Galata 6:16; Johanne 1:11; Ba-Roma 2:28, 29) Palo e feletseng ea bana, e leng ba khethiloeng har’a moloko oa batho e le hore ba ka busa le Jesu ’Musong oa hae oa leholimo, e ne e lokela ho ba 144 000.—Tšenolo 14:1, 4.
19 Bongata ba bana ba 144 000 bo shoele bo tšepahetse ’me bo fumane moputso oa bona oa leholimo. (1 Ba-Korinthe 15:51, 52; Tšenolo 6:9-11) Ba seng bakae ba setse lefatšeng ’me bana ba thabela ho bona hore “banna ba leshome” ba ikhethelang ho tsamaea le ‘Mojode’ ruri ke “bongata bo boholo . . . ba lichaba tsohle, le ba mefuta eohle, le ba merabe eohle, le ba lipuo tsohle.”—Tšenolo 7:9; Esaia 2:2, 3; 60:4-10, 22.
20, 21. Ha bofelo ba lefatše lena bo ntse bo atamela, re ka tsoela pele ho ba le khotso le Jehova joang?
20 Ha bofelo ba lefatše lena bo ntse bo atamela ka ho ke keng ha qojoa, Bokreste-’mōtoana bo tšoana le Jerusalema mehleng ea Jeremia: “Re lebeletse khotso, empa ha re bone molemo; le nako ea pholiso, empa bonang, hoa tšabeha.” (Jeremia 14:19) Tšabo eo e tla fihla tlhōrong ha lichaba li hlasela bolumeli ba bohata ’me li bo felisa ka mabifi. Nakoana ka mor’a moo, lichaba ka botsona li tla timetsoa ntoeng ea Molimo ea makhaola-khang, Armageddone. (Mattheu 24:29, 30; Tšenolo 16:14, 16; 17:16-18; 19:11-21) Nako eo e tla ba ea pherekano e kaakang!
21 Ho pholletsa le eona kaofela, Jehova o tla sireletsa ba ratang ’nete ba bile ba hlaolela “peō ea khotso.” (Zakaria 8:12; Sofonia 2:3) Joale a re luleng re sireletsehile ka har’a naha ea batho ba hae, ka cheseho re mo roriseng phatlalatsa re be re thuse ba bangata kamoo re ka khonang ho “rapela sefahleho sa Jehova.” Haeba re etsa joalo, re tla thabela khotso ea Jehova kamehla. E, “Jehova o tla nea sechaba sa hae matla; Jehova o tla hlohonolofatsa sechaba sa hae ka khotso.”—Pesaleme ea 29:11.
Na U ka Hlalosa?
◻ Batho ba Molimo ba ile ba ‘tiisa matsoho a bona’ joang mehleng ea Zakaria? Kajeno teng?
◻ Re ka arabela joang mahlorisong, boreng le boiphapanyong?
◻ Ho ‘bolela ’nete e mong le e mong ho oa habo’ ho akarelletsa eng?
◻ Motho a ka “rapela sefahleho sa Jehova” joang?
◻ Mohloli oa thabo o moholo o bonoang phethahatsong ea Zakaria 8:23 ke ofe?
[Setšoantšo se leqepheng la 18]
Selemong se fetileng, Lipaki tsa Jehova li ile tsa qeta lihora tse 1 150 353 444 li bua le batho ka ’Muso oa Molimo