“Tlisang Tlung ea Polokelo Karolo ea Leshome ea Tsohle”

“Le nteke ka hoo, . . . ha nke ke ka le thibollela liphororo tsa leholimo.”—MALAKIA 3:10.

 1. (a) Lekholong la bohlano la lilemo B.C.E., Jehova o ile a fa batho ba hae memo efe? (b) Lekholong la pele la lilemo C.E., phello ea ho tla ha Jehova tempeleng bakeng sa kahlolo e bile efe?

LEKHOLONG la bohlano la lilemo B.C.E., Baiseraele ba ne ba sa tšepahale ho Jehova. Ba ne ba sa ntše karolo ea leshome ’me ba tlisa liphoofolo tse sa tšoaneleheng tempeleng e le linyehelo. Leha ho le joalo, Jehova o ile a tšepisa hore haeba ba ne ba ka tlisa karolo e feletseng ea leshome tlung ea polokelo, o ne a tla ba tšollela tlhohonolofatso ka tekanyo e khōlō. (Malakia 3:8-10) Lilemo tse ka bang 500 hamorao, Jehova a emetsoe ke Jesu joaloka lenģosa la Hae la selekane, o ile a tla tempeleng e Jerusalema bakeng sa kahlolo. (Malakia 3:1) Iseraele e le sechaba e ile ea fumanoa e fokola, empa batho ba ileng ba khutlela ho Jehova ba ile ba hlohonolofatsoa ka ho enneng. (Malakia 3:7) Ba ile ba tlotsoa hore e be bara ba Jehova ba moea, “Iseraele oa Molimo.”—Ba-Galata 6:16; Ba-Roma 3:25, 26.

 2. Malakia 3:1-10 e ne e tla ba le phethahatso ea bobeli neng, hona re mengoa hore re etse eng mabapi le see?

² Hoo e ka bang lilemo tse 1 900 ka mor’a sena, ka 1914, Jesu o ile a behoa teroneng e le Morena oa ’Muso oa Molimo oa leholimo, ’me mantsoe a bululetsoeng ke Molimo a ho Malakia 3:1-10 a ne a tla phethahala la bobeli. Mabapi le ketsahalo ena e thabisang, kajeno Bakreste ba mengoa hore ba tlise karolo e feletseng ea leshome tlung ea polokelo. Haeba re etsa joalo, le rōna re tla thabela tlhohonolofatso ka tekanyo e khōlō.

 3. Lenģosa le neng le hleka tsela bakeng sa Jehova ke mang (a) lekholong la pele la lilemo? (b) pele ho ntoa ea pele ea lefatše?

³ Mabapi le ho tla ha Jehova tempeleng, o ile a re: “Bonang, ke roma lenģosa la ka, le tle le hleke tsela pel’a ka.” (Malakia 3:1) E le phethahatso ea lekholong la pele la lilemo ea sena, Johanne Mokolobetsi o ile a tla Iseraeleng a bolela ka pako ea libe. (Mareka 1:2, 3) Na ho bile le mosebetsi oa ho hleka mabapi le ho tla ha Jehova la bobeli tempeleng ea hae? E. Mashomeng a lilemo pele ho ntoa ea pele ea lefatše, Liithuti tsa Bibele li ile tsa hlahella ponong ea lefatše li ruta thuto e hloekileng ea Bibele ’me li pepesa mashano a hlomphollang Molimo a kang, thuto ea Boraro-bo-bong le mollo oa lihele. Li boetse tsa lemosa ka bofelo bo tlang ba Mehla ea Balichaba ka 1914. Ba bangata ba ile ba arabela ho bajari bana ba leseli la ’nete.—Pesaleme ea 43:3; Mattheu 5:14, 16.

 4. Ke potso efe e neng e tlameha ho arabeloa nakong ea letsatsi la Morena?

⁴ Selemo sa 1914 se ile sa qala seo Bibele e se bitsang ‘letsatsi la Morena.’ (Tšenolo 1:10) Liketsahalo tsa bohlokoa li ne li tla etsahala letsatsing leo, ho kopanyeletsa ho khetholla “mohlanka ea khabane, ea bohlale” le ho khethoa ha hae e le “moalosi oa mesebetsi ea [Monghali oa hae] kaofela.” (Mattheu 24:45-47) Morao ka 1914, likereke tse likete li ne li ipolela hore ke tsa Bokreste. Ke sehlopha sefe se neng se tla amoheloa ke Monghali, Jesu Kreste, e le mohlanka ea khabane ea bohlale? Potso eo e ne e tla arabeloa ha Jehova a tla tempeleng.

Ho Tla Tempeleng ea Moea

5, 6. (a) Jehova o ile a tla tempeleng efe bakeng sa kahlolo? (b) Bokreste-’mōtoana bo ile ba fumana kahlolo efe e tsoang ho Jehova?

⁵ Leha ho le joalo, o ile a tla tempeleng efe? Ka ho hlakileng o ne a sa tle tempeleng ea sebele e Jerusalema. Tempele ea ho qetela ea litempele tseo e ile ea felisoa ka 70 C.E. Leha ho le joalo, Jehova o na le tempele e khōloanyane e tšoantšetsoang ke e neng e le Jerusalema. Pauluse o ile a bua ka tempele ena e khōloanyane ’me a bontša kamoo ka sebele e leng khōlō ka teng, e nang le sehalalelo leholimong le lebala la tempele mona lefatšeng. (Ba-Heberu 9:11, 12, 24; 10:19, 20) Ke tempeleng ena e khōlō ea moea moo Jehova a tlileng bakeng sa mosebetsi oa kahlolo.—Bapisa le Tšenolo 11:1; 15:8.

⁶ See se etsahetse neng? Ho latela bopaki bo utloahalang bo teng, se etsahatse ka 1918.a Phello e bile efe? Ha e le bakeng sa Bokreste-’motōana, Jehova o ile a bona e le mokhatlo oo matsoho a oona a lutlang mali, tsamaiso e senyehileng ea bolumeli e febileng le lefatše, e ikentseng motsoalle oa barui ’me ea hatella mafutsana, e rutang lithuto tsa bohetene ho e-na le ho sebelisa borapeli bo hloekileng. (Jakobo 1:27; 4:4) Ka Malakia, Jehova o ile a lemosa: “Ke tla ba paki e akofang holim’a baloi, le bafebi, le ba hlapanyang ka leshano, le ba jang moputso oa ea sebetsang, le ba jang mosali oa mohlolohali le khutsana.” (Malakia 3:5, bapisa le NW.) Bokreste-’motōana bo entse sena sohle ebile bo entse le ho fetang sena. Ka 1919 ho ile ha bonahala ka ho hlakileng hore Jehova o bo ahloletse timetso hammoho le karolo e ’ngoe ea Babylona e Moholo, motheo oa lefatše ka bophara oa bolumeli ba bohata. Ho tloha ka nako eo ho ea pele, ho ile ha tsoa pitso e eang ho ba lipelo li lokileng: “Tlohang ho eena, lōna sechaba sa ka.”—Tšenolo 18:1, 4.

 7. Jesu o ile a re mohlanka oa hae ea khabane ea bohlale ke mang?

⁷ Joale, mohlanka ea khabane ea bohlale ke mang? Lekholong la pele la lilemo, o ile a qala ka sehlotšoana se ileng sa arabela mosebetsing oa bopaki oa Johanne Mokolobetsi le Jesu, lenģosa la selekane. Lekholong la rōna la lilemo, ho ile ha arabela ba likete tse ’maloa feela mosebetsing oa ho hleka oa Liithuti tsa Bibele lilemong tsa pele ho 1914. Bana ba ile ba mamella liteko tse matla ntoeng ea pele ea lefatše, empa ba ile ba bontša hore pelo tsa bona li ne li le ho Jehova.

Mosebetsi oa ho Hloekisa

8, 9. Morao ka 1918, mohlanka ea khabane le ea bohlale o ne a hloka ho hloekisoa ka litsela life, hona Jehova o ne a entse tšepiso efe tabeng ee?

⁸ Leha ho le joalo, esita le sehlopha sena se ne se tlameha ho hloekisoa. Ba bang ba neng ba ikopantse le sona ba ile ba fetoha lira tsa tumelo ’me ba tlameha ho ntšuoa. (Ba-Filippi 3:18) Ba bang ba ne ba sa ikemisetsa ho jara boikarabelo bo neng bo ameha ho sebeletseng Jehova eaba ba suthela hōle. (Ba-Heberu 2:1) Ntle le moo, ho ne ho sa na le litloaelo tsa Babylona tse neng li lokela ho tlosoa. E le mokhatlo, mohlanka ea khabane le ea bohlale o ne a boetse a tlameha ho hloekisoa. O ne a tlameha ho ithuta le ho sebelisa boemo bo loketseng ba ho se nke lehlakore mabapi le lefatše lena. Ha lefatše le ntse le senyeha ka ho eketsehileng, ho ne ho hlokahala hore a loane ntoa e matla ho boloka litšila tsa boitšoaro le tsa moea li le sieo ka liphuthehong.—Bapisa le Juda 3, 4.

⁹ E, ho ne ho hlokahala hore a hloekisoe, ’me ka lerato Jehova o ile a etsa tšepiso mabapi le Jesu ea behiloeng teroneng: “O tla lula a ntse a qhibilisa, a hloekisa silevera; o tla hloekisa bara ba Levi, a ba tšeke joale ka gauda le joale ka silevera, ’me ba tla hlahisetsa Jehova sehlabelo ka ho loka.” (Malakia 3:3) Ho tloha ka 1918, Jehova ka lenģosa lena la selekane, o phethahalitse tšepiso ena ’me o hloekisitse batho ba hae.

10. Batho ba Molimo ba ile ba tlisa nyehelo ea mofuta ofe, hona Jehova o ile a ba fa memo efe?

¹⁰ Baena ba tlotsitsoeng ba Kreste le bongata bo boholo boo hamorao bo ileng ba kopanela le bona tšebeletsong ea Jehova kaofela ba ile ba rua molemo hore ebe Jehova o ile a sebetsa joaloka moqhibilihisi le mohloekisi oa silevera. (Tšenolo 7:9, 14, 15) E le mokhatlo o hlophisitsoeng, ba ile ba tla, ’me ba ntse ba tla, ba nehelana ka mahlabelo ka ho loka. ’Me mahlabelo a bona a “khahlisa Jehova, joale ka mehleng ea khale, le joale ka mengoaheng ea boholo-holo.” (Malakia 3:4) Ke bona bao Jehova a ileng a ba mema ka boprofeta: “Tlisang tlung ea polokelo karolo ea leshome ea tsohle tseo le li ruileng, lijo li tle li be teng tlung ea ka; le nteke ka hoo, ho bolela Jehova oa makhotla, ’me le bone ha nke ke ka le thibollela liphororo tsa leholimo, ke be ke le tšollele hlohonolofatso ka tekanyo e fetisisang.”—Malakia 3:10.

Linyehelo le Karolo ea leshome

11. Ke hobane’ng ha linyehelo tse neng li hlokoa ke Molao oa Moshe li se li sa hlokahale?

¹¹ Mehleng ea Malakia batho ba Molimo ba ne ba tlisa linyehelo tsa sebele le karolo ea leshome, joaloka lithollo, litholoana, le liphoofolo. Esita le mehleng ea Jesu, Baiseraele ba tšepahalang ba ne ba etsa linyehelo tsa sebele tempeleng. Leha ho le joalo, ka mor’a lefu la Jesu sena se ile sa fetoha. Molao o ile oa hlakoloa, ho kopanyeletsa le taelo ea hore ho tlisoe linyehelo tse tobileng tsa lintho tse bonahalang le karolo ea leshome. (Ba-Efese 2:15) Jesu o ile a phethahatsa mofuta oa boprofeta oa linyehelo tse tlas’a Molao. (Ba-Efese 5:2; Ba-Heberu 10:1, 2, 10) Joale, Bakreste ba ka tlisa linyehelo le karolo ea leshome ka tsela efe?

12. Bakreste ba fana ka mofuta ofe oa linyehelo le mahlabelo a moea?

¹² Bakeng sa bona, ka ho khetheha linyehelo ke tsa mofuta oa moea. (Bapisa le Ba-Filippi 2:17; 2 Timothea 4:6.) Ka mohlala, Pauluse o ile a bua ka mosebetsi oa boboleli e le nyehelo ha a re: “A re hlahiseng ka mehla ho Molimo ka eena sehlabelo sa poko, e leng tholoana ea melomo e bolelang lebitso la hae.” O ile a bua ka mofuta o mong oa sehlabelo ha a phehella: “Le se ke la lebala ho etsa batho hantle, le ho fana; hobane Molimo o khahlisoa ke mahlabelo a joalo.” (Ba-Heberu 13:15, 16) Ha batsoali ba khothaletsa bana ba bona hore ba kenele tšebeletso ea bopula-maliboho, ho ka ’na ha boleloa hore ba ba nyehela ho Jehova, joalokaha Jafeta a ile a nyehela morali oa hae e le “secheso” ho Molimo, ea neng a ile a mo fa tlhōlo.—Baahloli 11:30, 31, 39.

13. Ke hobane’ng ha ho sa hlokoe hore Bakreste ba fane ka karolo ea sebele ea leshome ea moputso oa bona?

¹³ Leha ho le joalo, ho thoe’ng ka karolo ea leshome? Na Bakreste ba tlas’a tlamo ea ho behella ka thoko karolo ea leshome ea moputso oa bona ’me ba e fe mokhatlo o hlophisitsoeng oa Jehova, joalokaha ho etsoa joalo likerekeng tse ling tsa Bokreste-’motōana? Che, seo ha se hlokahale. Ha ho lengolo le behang molao o joalo bakeng sa Bakreste. Ha Pauluse a ne a bokella monehelo bakeng sa ba hlokang ba leng Judea, ha a ka a bolela karolo e itseng e lokelang ho ntšuoa. Ho e-na le hoo o ile a re: “E mong le e mong a ntše kamoo a seng a lekantse pele pelong ea hae; e seng ka ho soaba, leha e le ka ho khannoa; hobane Molimo o rata ea fanang a thabile.” (2 Ba-Korinthe 9:7) Ha Pauluse a bua ka ba leng tšebeletsong e khethehileng, o ile a bontša hore le hoja ba bang ba ne ba hlile ba tšehetsoa ka ho loketseng ka menehelo ea boithatelo, o ne a ikemiselitse ho sebetsa le ho iphelisa. (Liketso 18:3, 4; 1 Ba-Korinthe 9:13-15) Ha ho karolo ea leshome e neng e fanoa bakeng sa merero ena.

14. (a) Ke hobane’ng ha ho tlisa karolo ea leshome ho sa emele ho fana ha rōna ka lintho tsohle ho Jehova? (b) Karolo ea leshome e emela eng?

¹⁴ Ka ho hlakileng, bakeng sa Bakreste karolo ea leshome ke tšoantšetso, kapa e emela ntho e itseng. Kaha ke karolo ea leshome ’me hangata palo ea leshome e tšoantšetsa phetheho ea lefatšeng ka Bibeleng, na karolo ea leshome e tšoantšetsa ho fana ka lintho tsohle tsa rōna ho Jehova? Che. Ha re inehela ho Jehova ’me re tšoantšetsa sena ka kolobetso ea metsing, ke hona ha re fana ka tsohle tsa rōna ho eena. Ho tloha nakong ea ha re ne re inehela, ha ho na letho leo re nang le lona leo e seng la Jehova. Leha ho le joalo, Jehova o lumella hore batho ba fane ka seo ba nang le sona. Kahoo karolo ea leshome e emela karolo eo e leng ea rōna eo re e tlisang ho Jehova, kapa eo re e sebelisang tšebeletsong ea Jehova, e le pontšo ea lerato la rōna ho eena le ho amohela ’nete ea hore re ba hae. Karolo ea leshome kajeno e ke ke ea e-ba feela karolo ea leshome ea seo re nang le sona. Maemong a mang e tla ba tlaase. Ho a mang e be holimo. Motho ka mong o tlisa seo pelo ea hae e mo susumeletsang hore a se tlise le seo maemo a hae a mo lumellang hore a se tlise.

15, 16. Ho kopanyeletsoa eng karolong ea rōna ea leshome ea moea?

¹⁵ Ho kopanyeletsoa eng ho karolo ee ea leshome ea moea? Tabeng ea pele, re fa Jehova nako ea rōna le matla. Nako eo re e qetang re le libokeng, re ile likopanong tse nyenyane le tse khōlō, re le tšebeletsong ea tšimo, kaofela ke seo re se fang Jehova—karolo ea rōna ea leshome. Nako le matla tseo re li qetang re etela ba kulang ’me re thusa ba bang—hape, ke karolo ea rōna ea leshome. Ho thusa ho haha Liholo tsa ’Muso le ho kopanela mosebetsing oa ho boloka le ho hloekisa holo ka ho tšoanang ke karolo eo.

¹⁶ Karolo ea rōna ea leshome e boetse e kopanyeletsa menehelo ea rōna ea lichelete. Ka baka la keketseho e sa tloaelehang e teng ka mokhatlong o hlophisitsoeng oa Jehova lilemong tsa morao tjena, litlamo tsa lichelete li eketsehile. Ho hlokahala Liholo tse ncha tsa ’Muso, hammoho le mehaho e mecha ea makala le Liholo tse ncha tsa Likopano, hammoho le ho hlokomela tse seng li ntse li le teng. Ho koahela litšenyehelo tsa ba ikentseng ba fumanehang bakeng sa tšebeletso e khethehileng—hangata ba etsa boitelo bo boholo ba botho hore ba fumanehe—ka ho tšoanang ho hlahisa phephetso e boima. Ka 1991 chelete e ntšitsoeng ho thusa baromuoa, balebeli ba tsamaeang, le bo-pula-maliboho ba khethehileng e ile ea feta liranta tse limillione tse 110, eo kaofela ha eona e fanoeng ka menehelo ea boithatelo.

17. Ha e le hantle re lokela ho fana ka eng e le karolo ea rōna ea leshome ea moea?

¹⁷ Ha e le hantle re lokela ho fana ka eng e le karolo ea rōna ea leshome ea moea? Jehova ha a behe karolo e itseng. Leha ho le joalo, boikutlo ba boinehelo, lerato le tebileng ho Jehova le baena, haesita le boikutlo ba ho potlaka ka baka la ho elelloa hore ho na le bophelo bo tlamehang ho pholosoa, li re khothaletsa hore re tlise karolo ea rōna eohle ea leshome ea moea. Re ikutloa re susumeletseha ho sebeletsa Jehova kahohle kamoo ho ka khonehang. Haeba re ne re ka fana ka borōna kapa ka lintho tsa rōna hanyenyane kapa ra fana re korotla, sena se ne se tla lekana le ho utsoetsa Molimo oa rōna.—Bapisa le Luka 21:1-4.

Ho Hlohonolofatsoa ka Tekanyo e Fetisisang

18, 19. Batho ba Jehova ba hlohonolofalitsoe joang bakeng sa ho tlisa karolo ea bona e feletseng ea leshome?

¹⁸ Ho tloha ka 1919, batho ba Jehova ba ile ba arabela ka ho fana ka seatla se bulehileng ka nako ea bona, matla, le lichelete bakeng sa litlhoko tsa mosebetsi oa boboleli. Ka sebele ba tlisitse karolo e feletseng ea leshome tlung ea polokelo. Ka baka leo, Jehova o phethahalitse tšepiso ea hae ’me o ba tšolletse tlhohonolofatso ka tekanyo e fetisisang. Sena se hlakile haholo palong ea bona e ntseng e hōla. Ho tloha ho likete tse ’maloa tsa batlotsuoa ba neng ba sebeletsa Jehova ha a ne a tla tempeleng ea hae ka 1918, ba eketsehile ho fihlela kajeno ha batlotsuoa hammoho le metsoalle ea bona ea linku tse ling, ba feta limillione tse ’nè linaheng tse 211 tse fapa-fapaneng. (Esaia 60:22) Bana le bona ba hlohonolofalitsoe ka khōlo e ntseng e tsoela pele ea ho utloisisa ’nete. Lentsoe la boprofeta le entsoe le tiileng haholoanyane ho bona. Kholiseho ea bona phethahatsong ea merero ea Jehova e theiloe ka ho tiileng. (2 Petrose 1:19) Ka sebele ke batho ba ‘rutoang ke Jehova.’—Esaia 54:13.

¹⁹ Ka Malakia, Jehova o ile a bolela esale pele ka tlhohonolofatso e eketsehileng: “Eaba ba tšabang Jehova ba buisana hammoho, e mong le e mong le ngoan’abo, ’me Jehova a theetsa tsebe, a mamela; buka ea khopotso ea ngoloa pel’a hae, ea ngolloa ba tšabang Jehova le ba hlokomelang lebitso la hae.” (Malakia 3:16) Ho mekhatlo eohle e hlophisitsoeng e ipolelang hore ke ea Bokreste, ke Lipaki tsa Jehova feela tse nahanang ka lebitso la hae le tse le phahamisang har’a lichaba. (Pesaleme ea 34:3) Li thabile hakaakang ho tiisetsoa hore Jehova o hopola botšepehi ba tsona!

20, 21. (a) Bakreste ba ’nete ba thabela kamano efe e hlohonolofetseng? (b) Mabapi le Bokreste, ke phapang efe e ntseng e hlaka haholoanyane?

²⁰ Masala a tlotsitsoeng ke batho ba khethehileng ba Jehova, ’me bongata bo boholo, bo bokellanang ho ikopanya le ’ona, bo kotula tlhohonolofatso ea borapeli bo hloekileng. (Zakaria 8:23) Ka Malakia, Jehova o tšepisa hore: “Bana e tla ba ba ruiloeng ke ’na; ke tla ba qenehela joale ka ha motho a qenehela mora oa hae ea mo sebeletsang.” (Malakia 3:17) Ke tlhohonolofatso e kaakang hore ebe Jehova o na le tlhokomelo e bonolo joalo ka bona!

²¹ Ka sebele, phapang e eketsehileng pakeng tsa Bakreste ba ’nete le ba bohata ea bonahala. Ha batho ba Jehova ba ntse ba loanela ho boloka litekanyetso tsa hae, Bokreste-’motoana bo ntse bo tetebela haholoanyane qhafutsong ea litšila tsa lefatše lena. Ka sebele, mantsoe a Jehova a ipakile hore ke ’nete: “Le tla boela le bone, kamoo ho fapaneng ea lokileng le ea khopo, ea sebeletsang Molimo le ea sa o sebeletseng.”—Malakia 3:18.

22. Re ka kholiseha hore re tla thabela tlhohonolofatso efe haeba re tsoela pele ho tlisa karolo e feletseng ea leshome?

²² Haufinyane, letsatsi la ho ikarabella le tla tla bakeng sa Bakreste ba bohata. “Bonang, letsatsi lea tla, le chesang joale ka mollo oa sebopi, ’me baikhohomosi kaofela le bohle ba etsang bolotsana ba tla ba joale ka matlakala; tsatsi leo le tlang le tla ba chesa, ho bolela Jehova oa makhotla.” (Malakia 4:1) Batho ba Jehova baa tseba hore o tla ba sireletsa ka nako eo, joalokaha a ile a sireletsa sechaba sa hae sa moea morao ka 70 C.E. (Malakia 4:2) Ba thabile hakaakang hore ba fuoe tiisetso eo! Ka hona, ho fihlela ka nako eo, e se eka e mong le e mong oa rōna a ka bontša kananelo le lerato ho Jehova ka ho tlisa karolo e feletseng ea leshome tlung ea polokelo. Joale re ka kholiseha hore o tla tsoela pele ho re hlohonolofatsa ka tekanyo e fetisisang.

[Mongolo o botlaaseng ba leqephe]

Na U ka Hlalosa?

◻ Mehleng ea kajeno, Jehova o ile a tla neng tempeleng le lenģosa la hae la selekane?

◻ Mohlanka ea khabane ea bohlale ke mang, hona o ile a fumana tlhoekiso ea mofuta ofe ka mor’a 1918?

◻ Bakreste ba ’nete ba tlisetsa Jehova linyehelo tsa moea tsa mofuta ofe?

◻ Karolo ea leshome eo Bakreste ba mengoang hore ba e tlise tlung ea polokelo ke efe?

◻ Batho ba Molimo ba thabela tlhohonolofatso efe ka ho nehelana ka karolo ea leshome ea moea?

[Setšoantšo se leqepheng la 15]

Karolo ea rōna ea leshome ea moea e kopanyeletsa ho nehelana ka matla le lichelete ho haheng Liholo tsa ’Muso

[Setšoantšo se leqepheng la 16]

Ka baka la tlhohonolofatso ea Jehova holim’a batho ba hae, ho ’nile ha hlokahala kaho e ngata, ho akareletsa Liholo tsa ’Muso le Liholo tsa Likopano