Ho Senola Sephiri sa Lebitso le Leholo ka ho Fetisisa

Hoa thahasellisa hore ebe Koran ea Mamosleme le Bibele ea Bakreste li bua ka lebitso le leholo ka ho fetisisa. Se ngotsoeng mona se hlalosa se boleloang ke lebitso lena le leholo ka ho fetisisa le bohlokoa ba lona. Se boetse se bontša kamoo lebitso lena le amang moloko oohle oa batho le bokamoso ba rōna mona lefatšeng.

LEFATŠENG lena ho se ho phetse ha ba ha shoa banna le basali ba limillione. Hangata mabitso a bona a shoele le bona, ’me ha ba sa hopoloa. Empa mabitso a mang a tummeng—a kang Avicenna, Edison, Pasteur, Beethoven, Gandhi, le Newton—a sa le teng. Mabitso ana a amahanngoa le se finyeletsoeng, se sibolotsoeng, le se qapiloeng ke beng ba ’ona.

Leha ho le joalo, ho na le lebitso le leholo ho feta mabitso a mang kaofela. Lintho tsohle tse hlollang tse bileng teng le tse leng teng hona joale bokahohleng bohle li amana le lona. Tšepo ea batho ea ho phela halelele le ka thabo e amana le lebitso lena!

Batho ba bangata ba batlile ho tseba lebitso lena. Ba ile ba fuputsa ’me ba botsa ka lona, empa ha baa le fumana. Ho bona le fetohile sephiri. Ha e le hantle, ha ho motho ea ka sibollang lebitso lena ka ntle le hore Mong’a lona a mo senolele lona. Hoa thabisa hore ebe, sephiri sa lebitso lena leo ho seng le ka bapisoang le lona se senotsoe. Ke Molimo ea entseng sena e le hore ba lumelang ho eena ba ka tseba ka eena. O ile a senolela Adama lebitso la hae, ha latela Abrahama, ea ba Moshe le bahlanka ba bang ba Hae ba tšepahalang ba boholo-holo.

Ho Batla Lebitso le Leholo ka ho Fetisisa

Koran e bua ka motho e mong “ea neng a tseba Mangolo haholo.” (27:40) Buka e tsejoang e le Tafsīr Jalālayn ha e hlalosa temana ena, e re: “Asaf mora oa Barkhiyā e ne e le monna ea lokileng. O ne a tseba lebitso la Molimo le leholo ka ho fetisisa, ’me neng le neng ha a ne a kōpa thuso ka lona, o ne a arajoa.” Sena se re hopotsa mongoli oa Bibele Asafe, eo ho Pesaleme ea 83:18 a itseng: “Ba tle ba tsebe hore uena, eo lebitso la hao e leng Jehova, u rena u ’notši lefatšeng lohle.”

Ho Koran 17:2, rea bala: “Re file Moshe Mangolo ’me ra a etsa tataiso bakeng sa Baiseraele.” Mangolong ao, Moshe o bua le Molimo, o re: “Bona, ke tla ea ho bana ba Iseraele, ’me ke tla re ho bona: Molimo oa bo-ntat’a lōna o nthomile ho lōna; etlare ha ba re ho ’na: Lebitso la oona ke mang? ke tla re’ng ho bona? Molimo oa eketsa oa re ho Moshe: U tle u re ho bana ba Iseraele: Jehova, Molimo oa bo-ntat’a lōna, Molimo oa Abrahama, Molimo oa Isaaka, Molimo oa Jakobo, o nthomile ho lōna. Ke lona lebitso la ka ka ho sa feleng.”—Exoda 3:13, 15.

Mehleng ea boholo-holo, Baiseraele ba ne ba tseba lebitso lena le leholo la Molimo. Le ne le bile le kenyeletsoa mabitsong a bona. Joalokaha kajeno ho na le lebitso Abdullah, le bolelang “Mohlanka oa Molimo,” batho ba Iseraele oa boholo-holo ba ne ba na le lebitso Obadiah, le bolelang “Mohlanka oa Jehova.” ’Mè oa moprofeta Moshe o ne a bitsoa Jokebete, eo mohlomong e bolelang “Jehova ke Khanya.” Lebitso Johanne le bolela “Jehova o Bile Mohau.” ’Me lebitso la moprofeta Elia le bolela “Molimo oa ka ke Jehova.”

Baprofeta ba ne ba tseba lebitso lena le leholo ’me ba le sebelisa ka tlhompho e tebileng. Le fumanoa ka makhetlo a fetang 7 000 ka Mangolong a Halalelang. Jesu Kreste, mora oa Maria, o ile a totobatsa bohlokoa ba lona thapelong ea hae ho Molimo ha a re: “Lebitso la hao ke le senoletse batho bao u ’neileng bona . . . Ke ba tsebisitse lebitso la hao, ’me ke tla ’ne ke ba tsebise lona, hore lerato leo u nthatileng ka lona le be ho bona.” (Johanne 17:6, 26) Bukeng ea hae e tummeng e hlalosang Koran, Bayḍāwī o hlalosa Koran 2:87, ’me o bolela hore Jesu o ne a tloaetse ho “tsosa bafu ka lebitso le leholo ka ho fetisisa la Molimo.”

Joale ho etsahetse’ng, e entseng hore lebitso lena e be sephiri? Lebitso lena le amana joang le bokamoso ba e mong le e mong oa rōna?

Lebitso Lena le Fetohile Sephiri Joang?

Ba bang ba nahana hore ka Seheberu “Jehova” e bolela “Allah” (Molimo). Empa “Allah” e tšoana le ʼElo·himʹ ea Seheberu, e leng lentsoe ʼelohʹah (molimo) ka bongateng. Ho ile ha hlaha tumela-khoela har’a Bajode e ileng ea ba thibela ho bitsa lebitso la Molimo, Jehova. Ka lebaka leo, ha ba bala Mangolo a Halalelang ’me ba bona lebitso Jehova, ba ile ba tloaela ho re ʼAdho·naiʹ, e bolelang “Morena.” Libakeng tse ling, ba bile ba fetola taba e ngotsoeng ea pele ea Seheberu hore ho e-na le “Jehova” e be ʼAdho·naiʹ.

Baeta-pele ba bolumeli ba Bokreste-’mōtoana ba ile ba etsa ka mokhoa o tšoanang. Ba ile ba sebelisa “Molimo” (“Allah” ka Searabia) le “Morena” bakeng sa lebitso Jehova. Sena se ile sa tlatsetsa hore thuto ea bohata ea Boraro-bo-bong, e sa tšehetsoeng ke Mangolo a Halalelang e hōle. Ka lebaka la sena, ka phoso batho ba limillione ba rapela Jesu le moea o halalelang ’me ba nka hore ba lekana le Molimo.a

Kahoo, baeta-pele ba tsamaiso ea Sejode ea bolumeli le ba Bokreste-’mōtoana ba molato bakeng sa ho hloka tsebo ho atileng mabapi le lebitso le leholo ka ho fetisisa. Empa Molimo o ile a profeta: “Le hona ke tla halaletsa lebitso la ka le leholo, . . . hore lichaba li tle li tsebe hoba ke ’na Jehova.” E, Jehova o tla tsebahatsa lebitso la hae har’a lichaba tsohle. Hobane’ng? Hobane hase Molimo oa Bajode kapa oa sechaba kapa batho ba itseng feela. Jehova ke Molimo oa moloko oohle oa batho.—Ezekiele 36:23; Genese 22:18; Pesaleme ea 145:21; Malakia 1:11.

Lebitso le Leholo ka ho Fetisisa le Bokamoso ba Rōna

Mangolo a Halalelang a re: “E mong le e mong ea bitsang lebitso la Jehova o tla bolokeha.” (Ba-Roma 10:13, NW) Poloko ea rōna letsatsing la kahlolo e tla amana le ho tseba ha rōna lebitso la Molimo. Ho tseba lebitso la hae ho kopanyeletsa ho tseba litšoaneleho tsa hae, mesebetsi ea hae, le merero ea hae le ho phela tumellanong le melao-motheo ea hae e phahameng. Ka mohlala, Abrahama o ne a tseba lebitso la Molimo ’me a bitsa lebitso leo. Ka lebaka la sena, o ile a thabela ho ba le kamano e ntle le Molimo, a bontša tumelo ho eena, a mo tšepa, ’me a mo utloa. Ka hona Abrahama e ile ea e-ba motsoalle oa Molimo. Ka ho tšoanang, ho tseba lebitso la Molimo ho re atametsa haufi le eena ’me ho re thusa ho haha kamano ea botho le eena, ho tšoarella ka matla leratong la hae.—Genese 12:8; Pesaleme ea 9:10; Liproverbia 18:10; Jakobo 2:23.

Ka Bibeleng rea bala: “Jehova a ’na a hlokomela ’me a mamela. ’Me buka ea khopotso ea qala ho ngoloa pel’a hae bakeng sa ba tšabang Jehova le ba nahanang ka lebitso la hae.” (Malakia 3:16, NW) Ke hobane’ng ha re lokela ho ‘nahana ka’ lebitso le leholo ka ho fetisisa? Lebitso Jehova ha e le hantle le bolela “O Etsa Hore ho be Teng.” Le senola hore Jehova ke Eena ea iketsang Mophethahatsi oa litšepiso. Ka linako tsohle o phethahatsa merero ea hae. Ke Molimo ea matla ’ohle, ’Mōpi a ’notši, ea nang le tšoaneleho e ’ngoe le e ’ngoe e ntle. Ha ho lentsoe le le leng le ka hlalosang botho ba Molimo ka ho feletseng. Empa Molimo o ikhethetse lebitso le leholo ka ho fetisisa—Jehova—’me le re hopotsa litšoaneleho tsohle tsa hae, le merero ea hae.

Mangolong a Halalelang, Molimo o re bolella ka merero ea hae ka batho. Jehova Molimo o bōpile motho hore a thabele bophelo bo sa feleng, bo thabisang Paradeiseng. Thato ea hae bakeng sa moloko oa batho ke hore batho bohle e be lelapa le le leng, le kopaneng leratong le khotsong. Molimo oa lerato o tla phethahatsa morero ona nakong e tlang e haufi.—Mattheu 24:3-14, 32-42; 1 Johanne 4:14-21.

Molimo o hlalosa mabaka a hore ebe batho ba utloa bohloko ’me o bontša hore poloko e ka ba teng. (Tšenolo 21:4) Ho Pesaleme ea 37:10, 11, rea bala: “Ho se ho se hokae, ’me molotsana o tla ba sieo; u tla qamaka tulo tsa hae, empa o tla be a setse a le sieo; empa ba bonolo ba tla rua lefatše, ba iketle khotsong e khōlō.”—Bona hape le Koran 21:105.

E, Molimo o tla tsejoa ka lebitso la hae le leholo. Lichaba li tla tlameha ho tseba hore ke Jehova. Ke tokelo e hlollang hakaakang ho tseba lebitso le leholo ka ho fetisisa, ho le pakela, le ho le khomarela! Ka tsela ena, morero oa Molimo o thabisang o tla phethahatsoa ho e mong le e mong oa rōna: “Ereka ha a beile lerato la hae ho ’na, ke tla ’moloka, ke ’mee qhobosheaneng e phahameng, kahobane a tsebile lebitso la ka. O tla bitsa ho ’na, ’me ke tla mo araba. . . . Ke tla mo khorisa ka matsatsi a mangata-ngata, ke ’montše poloko ea ka.”—Pesaleme ea 91:14-16.

[Mongolo o botlaaseng ba leqephe]

[Setšoantšo se leqepheng la 5]

Sehlahleng se tukang, Molimo o ile a itsebisa Moshe e le ‘Jehova, Molimo oa Abrahama’

[Tlhaloso ea Moo Setšoantšo se Nkiloeng Teng]

Moses and the Burning Bush, ka W. Thomas, Sr.