Lentsoe la Jehova Lea Phela
Lintlha-khōlō Tsa Buka ea Malakia
HO SE ho fetile lilemo tse fetang 70 tempele ea Jerusalema e tsosolositsoeng e phethiloe. Leha ho le joalo, ha nako e ntse e feta kamano ea Bajuda le Molimo e ntse e senyeha. Esita le baprista ba bolile. Ke mang ea tla etsa hore ba hlokomele boemo ba bona ’me a leke ho ba tsosolosa moeeng? Jehova o fa moprofeta Malakia mosebetsi oo.
Buka ea ho qetela ea Mangolo a Seheberu e ngotsoeng ke Malakia ka puo e matla e na le boprofeta bo bululetsoeng ke Molimo. Ho ela hloko lentsoe la boprofeta la Malakia ho ka re thusa ho itokisetsa “letsatsi le leholo le le tšosang la Jehova,” ha tsamaiso ena e khopo ea lintho e fela.—Malakia 4:5.
BAPRISTA BA “ENTSE HORE BA BANGATA BA KHOPTJOE”
Jehova o bolela hore na o ikutloa joang ka Baiseraele, o re: “Ke le ratile.” Empa baprista ba nyelisitse lebitso la Molimo. Ka tsela efe? “Ka ho hlahisa holim’a aletare ea [hae] bohobe bo silafetseng” le ka ho nyehela sehlabelo sa “phoofolo e holofetseng kapa e kulang.”—Malakia 1:2, 6-8.
Baprista ba “entse hore ba bangata ba khoptjoe molaong.” Batho ba ne ba “sebetsana ka bolotsana.” Ba bang ba nyetse basali basele. Ba bang ba ne ba sebetsa ‘basali ba bocha ba bona’ ka bolotsana.—Malakia 2:8, 10, 11, 14-16.
Lipotso Tsa Mangolo Lia Arajoa:
2:2—Jehova o ile a “rohaka litlhohonolofatso” tsa baprista ba tsoileng tseleng ka tsela efe? Molimo o ile a etsa sena ka kutloisiso ea hore litlhohonolofatso tseo baprista ba neng ba li kōpa li ne li tla fetoha thohako.
2:3—Ho “hasanya bolokoe” lifahlehong tsa baprista ho ne ho bolela’ng? Ho latela Molao, bolokoe ba phoofolo ea sehlabelo bo ne bo lokela ho lahleloa ka ntle ho liahelo ’me bo chesoe. (Levitike 16:27) Ho hasanya bolokoe lifahlehong tsa baprista ho ne ho bolela hore Jehova o ne a sa amohele mahlabelo ao, ’me ba a nyehelang ba ne ba nyonyeha ho eena.
2:13—Aletare ea Jehova e ne e tla koaheloa ka meokho ea bo-mang? Ke meokho ea basali ba neng ba e-tla sehalalelong sa tempele ’me ba tšollela lipelo tsa bona ho Jehova. Ba ne ba tšoentsoe ke eng? Banna ba bona ba Bajuda ba ne ba ba hlalile ka mabaka a sa lumelloeng ke molao, ’me ho ka etsahala hore e ne e le ka morero oa ho nyala basali basele ba bacha.
Seo re Ithutang Sona:
1:10. Jehova ha aa ka a thabisoa ke linyehelo tsa baprista ba meharo, ba neng ba lefisa chelete esita le bakeng sa litšebeletso tse kang ho koala mamati kapa ho hotetsa mollo oa aletare. Ke habohlokoa hakaakang hore liketso tsa borapeli, ho akarelletsa le tšebeletso ea rōna ea Bokreste li susumetsoe ke ho rata Molimo le moahelani re se na boithati, le ka mohla li se ke tsa susumetsoa ke ho rata chelete!—Matheu 22:37-39; 2 Bakorinthe 11:7.
1:14; 2:17. Jehova ha a mamelle boikaketsi.
2:7-9. Ba fuoeng tokelo ea ho ruta ka phuthehong ba lokela ho etsa bonnete ba hore seo ba se rutang se iphaphathile le Lentsoe la Molimo, e leng Mangolo a Halalelang, le lingoliloeng tse thehiloeng Bibeleng tsa “motsamaisi ea tšepahalang.”—Luka 12:42; Jakobo 3:11.
2:10, 11. Jehova o lebeletse hore barapeli ba hae ba nke ka ho teba keletso ea ho nyala “feela Moreneng.”—1 Bakorinthe 7:39.
2:15, 16. Barapeli ba ’nete ba lokela ho hlompha ka ho teba tumellano ea bona ea lenyalo le basali ba bocha ba bona.
‘MORENA OA ’NETE O TLA TLA TEMPELENG EA HAE’
“Ka tšohanyetso ho tla tla Morena oa ’nete [Jehova Molimo] tempeleng ea Hae” a e-na le “lenģosa la selekane [Jesu Kreste].” Molimo o “tla atamela haufi le [batho ba hae] bakeng sa kahlolo” ’me e be paki e potlakang khahlanong le mefuta eohle ea batho ba etsang bobe. Ho feta moo, “buka ea khopotso” e lokela ho ngoloa bakeng sa ba tšabang Jehova.—Malakia 3:1, 3, 5, 16.
Letsatsi “le chesang joaloka sebōpi” le tla tla ’me le timetse bohle ba khopo. Pele letsatsi leo le e-tla, moprofeta o tla romeloa e le hore a ka “khutlisetsa lipelo tsa bo-ntate ho bara, ’me a khutlisetse lipelo tsa bara ho bo-ntate.”—Malakia 4:1, 5, 6.
Lipotso Tsa Mangolo Lia Arajoa:
3:1-3—“Morena oa ’nete” le “lenģosa la selekane” ba ile ba tla neng tempeleng, ’me ke mang ea ileng a romeloa pele ho bona? Jehova o ile a tla tempeleng ea hae ka moemeli ’me a e hloekisa ka la 10 Nisane, 33 C.E. Ke nakong eo ka eona Jesu a ileng a kena ka tempeleng ’me a leleka ba neng ba reka le ho rekisa. (Mareka 11:15) Sena se etsahetse lilemo tse tharo le halofo ka mor’a hore Jesu a tlotsoe e le Morena ea Khethiloeng. Ka ho tšoanang, ho bonahala eka lilemo tse tharo le halofo ka mor’a hore Jesu a behoe teroneng e le Morena leholimong, o ile a tsamaea le Jehova ho ea tempeleng ea moea ’me a bona ho hlokahala hore batho ba Molimo ba hloekisoe. Lekholong la pele la lilemo, Johanne Mokolobetsi o ile a romeloa hore a thuse Bajuda ho itokisetsa ho tla ha Jesu Kreste. Mehleng ea kajeno, lenģosa le ile la romeloa esale pele hore le lokise tsela bakeng sa ha Jehova a tla tempeleng ea hae ea moea. Ho tloha ka bo-1880, sehlopha sa liithuti tsa Bibele se ile sa qala ho kopanela mosebetsing oa thuto ea Bibele bakeng sa ho ruta batho ba tšepahalang linnete tse ngata tsa motheo tsa Bibele.
3:10—Na ho tlisoa ha “likarolo tsohle tsa leshome,” ho bontša hore re lokela ho fa Jehova sohle seo re nang le sona? Molao oa Moshe o ile oa felisoa motheong oa lefu la Jesu, kahoo ho nyehela karolo ea leshome ea chelete eo motho a nang le eona hase tlamo. Empa, ho na le se tšoantšetsoang ke ho nyehela karolo ea leshome. (Baefese 2:15) Ha ho bolele hore re fane ka sohle seo re nang le sona. Le hoja karolo ea leshome e ne e tlisoa selemo le selemo, re fa Jehova sohle seo re nang le sona hang feela—nakong ea ha re inehela ho eena ’me re tšoantšetsa boinehelo boo ka ho kolobetsoa metsing. Ho tloha ka nako eo ho ea pele, sohle seo re nang le sona ke sa Jehova. Leha ho le joalo, o re lumella ho khetha karolo e itseng ea seo re nang le sona—e leng karolo ea leshome ea tšoantšetso—hore re e sebelise tšebeletsong ea hae. Ke eng kapa eng eo maemo a rōna a re lumellang ho e sebelisa le eo lipelo tsa rōna li re susumelletsang ho e sebelisa tšebeletsong ea hae. Mahlabelo ao re a fang Jehova a akarelletsa nako, matla le matlotlo ao re a sebelisang mosebetsing oa ho bolela ka ’Muso le ho etsa barutuoa. A boetse a akarelletsa ho ba teng libokeng tsa Bokreste, ho etela balumeli-’moho le rōna ba kulang le ba hōlileng le ho tšehetsa borapeli ba ’nete ka lichelete.
4:3—Barapeli ba Jehova ba tla “hatakela ba khopo” ka tsela efe? Batho ba Molimo ba lefatšeng ha ba na ho “hatakela ba khopo” ka tsela ea sebele, ke hore, ba ke ke ba nka karolo ha a ahlola ba khopo. Ho e-na le hoo, sena se bolela hore bahlanka ba Jehova ba lefatšeng ba tla ba hatakela ka tsela ea tšoantšetso ka hore ba kopanele ka lipelo tsohle moketeng oa tlhōlo o tla ba teng ka mor’a bofelo ba lefatše la Satane.—Pesaleme ea 145:20; Tšenolo 20:1-3.
4:4—Ke hobane’ng ha re lokela ho ‘hopola molao oa . . . Moshe’? Molao oo ha o tlame Bakreste, empa e ile ea e-ba “seriti sa lintho tse molemo tse tlang.” (Baheberu 10:1) Kahoo, ho ela hloko Molao oa Moshe ho ka re thusa ho bona kamoo lintho tse ngotsoeng ho oona li phethahalang kateng. (Luka 24:44, 45) Ho feta moo, Molao o na le “litšoantšo tseo e leng mohlala tsa lintho tse maholimong.” Ho hlokahala hore re ithute oona e le hore re utloisise lithuto le boitšoaro ba Bokreste.—Baheberu 9:23.
4:5, 6—“Moprofeta Elia” o tšoantšetsa mang? Ho boletsoe esale pele hore “Elia” o ne a tla etsa mosebetsi oa tsosoloso oa ho lokisa lipelo tsa batho. Lekholong la pele la lilemo C.E., Jesu Kreste o ile a re Johanne Mokolobetsi ke “Elia.” (Matheu 11:12-14; Mareka 9:11-13) Elia oa kajeno o romeloa “pele ho tla letsatsi le leholo le le tšosang la Jehova.” Ha e le hantle Elia oa kajeno ke “lekhoba le tšepahalang le le masene.” (Matheu 24:45) Sehlopha sena sa Bakreste ba tlotsitsoeng se ’nile sa etsa mosebetsi oa tsosoloso ea moea ka mafolofolo.
Seo re Ithutang Sona:
3:10. Ho hlōleha ho fa Jehova sohle seo re ka khonang ho mo fa sona ke ho itima tlhohonolofatso ea hae.
3:14, 15. Ka lebaka la mohlala o mobe oa baprista, Bajuda ba ile ba qala ho eisa tšebeletso ea Molimo. Ba boemong ba boikarabelo ka phuthehong ea Bokreste ba lokela ho beha mohlala o motle.—1 Petrose 5:1-3.
3:16. Jehova o boloka tlaleho ea ba mo tšabang le ba tšepahalang ho eena. Oa ba hopola ’me o tla ba pholosa ha a felisa lefatše le khopo la Satane. Ka lebaka leo, a ho se be le mohla re khoehlisang boikemisetsong ba rōna ba ho lula re tšepahala ho Molimo.—Jobo 27:5.
4:1. Letsatsing la ho ikarabella ho Jehova, “lekala” le “motso” li tla ba le phello e tšoanang—kahoo kahlolo ea bana ba banyenyane e tla tšoana le ea batsoali ba bona. Ka sebele batsoali ba na le boikarabelo bo boholo baneng ba bona. Bo-ntate le bo-’mè ba Bakreste ba lokela ho sebetsa ka thata ho batla kamohelo ea Molimo le ho lula ba le boemong bo botle ho eena.—1 Bakorinthe 7:14.
“Tšaba Molimo oa ’Nete”
Ke bo-mang ba tla pholoha “letsatsi le leholo le le tšosang la Jehova”? (Malakia 4:5) Jehova o re: “Ho lōna ba tšabang lebitso la ka letsatsi la ho loka le tla khanya, le e-na le pholiso mapheong a lona; le tla ea ’me le tile fatše joaloka manamane a nontšitsoeng.”—Malakia 4:2.
Jesu Kreste “letsatsi la ho loka” o khanyetsa bao ka tlhompho ba tšabang lebitso la Molimo, le bao Jehova a ba amohelang. (Johanne 8:12) Hape ba tla ‘folisoa mapheong a lona’—hona joale ke pholiso ea moea, ’me lefatšeng le lecha la Molimo e tla ba pholiso e feletseng ’meleng, kelellong le maikutlong. (Tšenolo 22:1, 2) Ka thabo ba ba “joaloka manamane a nontšitsoeng.” Re ntse re nahanne ka litlhohonolofatso tse joalo, a re eleng hloko keletso ea Morena Solomone ha a re: “Tšaba Molimo oa ’nete ’me u boloke litaelo tsa hae. Etsoe sena ke sohle seo motho a tlamehang ho se etsa.”—Moeklesia 12:13.
[Setšoantšo se leqepheng la 26]
Moprofeta Malakia, mohlanka oa Molimo ea chesehang le ea inehetseng
[Setšoantšo se leqepheng la 29]
Seo re se rutang se lokela ho lumellana le Bibele
[Setšoantšo se leqepheng la 29]
Bahlanka ba Jehova ba tlotla manyalo a bona